MLA 12 ho resign kibol uhen tia Congress party in ngehna nei

MLA 12 ho resign kibol uhen tia Congress party in ngehna nei

107
0
SHARE

MLA 12 ho resign kibol uhen tia Congress party in ngehna nei

Imphal, Sept 19(UNA): Manipur High court in Manipur Parliamentary Secretary (Appointment, Salary and Allowances and Miscellaneous Provisions) Act 2012 leh Repealing Act 2018 invalid leh dan toh kikal ahi tia aphondoh toh kilhon in Congress MLA Keisham Meghachandra in Biren lamkaina a Council of Minister 2017 sunga Parliamentary Secretary dinga kihahsel na ananei MLA 12 ho agangthei pen a haina (resign) akibol diuvin ngehna aneiyin ahi.

Congress Spokesperson MLA Keisham Meghachandra in virtual press conference a ahoulim na ah Supreme court in Bimolangshu Roy Vs State of Assam chungthu a thutan na anei dan ho leh state dang danga um High court hon Parliamentary act ho chunga thutan na ana nei dan jouseu vetkahna anei toh kilhon a High court in Manipur Parliamentary Secretary (Appointment, Salary and Allowances and Miscellaneous Provisions) Act 2012 leh Repealing Act 2018 invalid leh dan toh kikal ahi tia aphondoh toh kilhon in achesa 2018 kum chun avellin BJP lamkaina government in Manipur Legislative Assembly a Manipur Parliamentary Secretary (Appointment, Salary and Allowances and Miscellaneous Provisions) Act 2012 pass bol dinga ana tohgon ana neilai uvin jong Congress party in hatah in ana ki doudal in ahi hinla government in namthu in passed ana bol uve tin jong aseiyin ahi.

BJP lamkaina government in dan leh thupeh ho nahsah in akoi pon, amaho thunei natah in dan palkeh in vai ahom uve. Hiche hi September 17 nikho a Manipur High Court in Parliamentary Secretary Act hi dan toh kitohlou chuleh dankal ahi tia aphondoh toh kilhon in hetdoh thei in aum in ahi ati.

High court in MLA 12 Parliamentary Secretary ana hikha jouse invalid leh dan toh kitoh lou ahiuve tin ana phongdoh in chuleh tu le tua government vaipo BJP hi minority asodoh tan, government vaihom a pang dia lhing joulou ahi tauve. Hiche MLA 12 ho hi seitam umlouva moral ground a haina apehdiu bou ahitai tin Congress MLA in ahoulimna ah aseiyin ahi.

Biren Government in Supreme court leh High court jalou tah in Ex MLA Shyamkumar disqualified ana bol in, Congress MLA mi 7 ana lhinlel sah in, chuleh MLA 12 dan dihlou tah in Parliamentary secretary in ana lhengdoh in ahi. Hitobang thilsoh hi India sunga Manipur tilouvin ana umkhapon, Government hin dan leh thupeh ho ajuipon, BJP government hi achsn dia lom gotna peh dia lomtah ahi tin jong Congress MLA Meghachandra in aseiyin ahi.

Aman aseibe na ah, Article 192(1) dungjuiya elected MLA ho hi office of profit dinmun a koiding phal ahipon ahi. Hinla MLA 12 ho hi Parliamentary secretary ding in kihahsel na ana nei un hiche panmun hi office of profit ahitoh kilhon in GAD department in office room, Driver leh Office staff jong ana gonpeh uvin ahi. Chuleh government akon in jong lha lo ana kilah jiuvin ahi. High Court in Parliamentary secretary ho hi invalid leh dan toh kikal ahi tia aphondoh toh kilhon a MLA 12 office of profit neikha ho Article 192 dungjui a Governor in Election Commission henga recommend ahin bol a haina apeh diu achung uva gotna apeh diu ahi. Governor in tu le tua vaihom government hon dan leh thupeh apalkeh nikho a pat tuni geiya achaloh na jouseu kholchilna anei a bol dinga lom ahin bol ding injong temna leh ngehna jong aneiyin ahi.

Xxxxxxxx

High Court thutan na in Parliamentary Secretary lhendoh a ana um MLA 12 ho makho sunohphah dinga um

Imphal, Sept 19(ET): Manipur High Court in 11th Manipur Legislative Assembly a Parliamentary Secretary appointment kiboltoh kisaiya Writ petition leh PIL file ana kibol toh kilhon a chomkhat tadi hi N. Biren Singh lamkaina noiya state government vaihomna hi lhohsatna ahin lhutthei ding dinmun in ahung umtan, chuleh Parliamentary Secretary a ana kilhengdoh MLA 12 ho makho seitheilou ding dinmun a ahin lhut ding in aum tan ahi.

11th Manipur Legislative Assembly sunga MLA 12 gah minphah thei ho ahileh L. Susindro Meitei (Yaima), Nahakpam Indrajit, Lourembam Rameshwor Meetei, Thokchom Satyabrata, Heikham Dingo Singh, Dr. Sapam Ranjan, Soibam Subashchandra, Kongkham Robindro Singh, K Leishiyo, Khasim Vashum, Awangbow Newmai, chuleh Ashab Uddin amaho cheng hi Parliamentary secretary a lhendoh in ana um un ahi, hiche panmun hi Minister of state panmun toh kibahna aneina ban a Manipur Parliamentary Secretary (Appointment, Salary and Allowances, and Miscellaneous Provisions)Act 2012 toh kikal ahina ban a High Court in Supreme Court toh Guwahati Hight Court akon a reference alah toh kilhon in dan toh kikal ahi tin aphongdoh un ahi.

Manipur government in jong achesa June 26, 2017 ana kisemdoh toh kilhon in Parliamentary secretary (Appointment, Salary and Allowance, and Miscellaneous Provisions) Repealing Act, 2018 ( Manipur Act No. 6 of 2018) passed ana bol un ahi.

Tule tua case um pen hi Section 2(2) na dungjuiya saving clause ahitoh kilhon a Repealing Act, 2018 jong invalid leh dan toh kikal ahi akitin ahi.

State legislature in Repealing Act, 2018 sunga saving clause hi dan le mol adeidan tah a kitosah tei nadia asemtheilou ding hichu Manipur Act No. 10 of 2012 dungjuiya dantoh kikal ahi. Manipur Act No. 10 of 2012 dungjuiya dan dang asemkhum thei lou ding chuleh Repealing Act, Manipur Act No. 6 of 2018 ho ajong dankal a dan chom asemkhum thei lou ding ti ahi. State legislature in direct tah a abol theilou chu, indirect tah a jong abol thei lou ding ahi. Chule Repealing Act 2018 dungjuiya invalid leh dantoh kikal tihi het angaiyin, Manipur High Court bench a chief justice Ramalingam Sudhakar leh Ramalingam Sudhakar chun aseiyin ahi.

Manipur High Court thutan na hin MLA 12 Parliamentary secretary a ana kilhengdoh ho makhankho phat chomkhat ahin suhnohphah tei ding in aum tan ahi.

Xxxxxxxx

Saparmeina-Saikul lampi hapta khat kah a semphat hihen tia KISG, KSO in ngehna nei

Kangpokpi, Sept 19(UNA): Achesa kum phabep sunga Kangpokpi district huop sunga gam teni kikom mat tona Saparmeina-Saikul road agam mipi ho dinga kihinso na lampi a ana kimang jing chu melse tah a aset tah jeh in che le va le anongkai sah naban a agamsung mipite ading in hesohna lentah asodoh tan ahi.

Hiche lampi asaodan Km 15 vel hidinga gichat ahi in adeh a Saparmeina leh Ekou kikomto na leh Konghom area sunga kho le veng 30/40 kijotmat na leh Kangpokpi District Headquarters, Saikul Sub Divisional Headquarters leh Saikul area mun phabep kikomto na lampi khat jong ahin ahi.

Lampi set na in amano jing vanga agamsung mipi te adia kimangcha jing pen ahitoh kilhon in gari len hiheh gari neo hijong leh hahsa tah in muthei in alhai jing un ahi. Hiche lampi hi Thangal Sarung mun a um  Eco Tourism Park jotna lampi jong ahi.

Hiche lampi setna kibelap jing jeh a gamsung mipi gentheina gelkhona jal in Kuki Inpi Saikul Gamkai (KISG) leh Kuki Students’ Organization (KSO) Saikul in kithokhom in lampi setna dinmun ho amuntah a kholchilna ana nei utoh kilhon in agamsung MLA hihen, akisaipi PWD Department leh state government in Saikul area gamsung mipi asanga sim kineh holna lampi ahitoh kilhon a agangthei pen a asemhoi diuvin ngehna abol un ahi.

Hiche lampi setna mun kholchilna ana lamkai KISG President Seimang Lupho in

aseina ah, lampi hi kotong (potholes) in alodim lha jeng in, kotong phabep jong athuh tah tah aum in, vonpo gari tamtah tanden nathei jeng ahi. Gari driver phabep in alhaidoh thei tei nading un suong ana kisun jiuvin ahi ati.

Kuki Inpi Saikul Gamkai President, Seimang Lupho in aseibena ah, hiche lampi set jing jeh a gamsung mipi ho a kon a agenthei nau thu Saikul CSO ho henga ahin lhut jing utoh kilhon a tuni nikho a kihetmosah thei ahi tahlou tohkilhon a pan hung kila ahi.

Hijeh chun gamkai MLA, amopo PWD Department leh state government in aphat cha a semphat na ahin neilou leh khonung leh koima themmo achan thei loudiu ahi ati.

Alangkhat ah, L. Tongkholen Khongsai, executive member of BJP ST Morcha Manipur, leh L. Loujol haosapu in aseina ah Saparmeina-Saikul lampi hoilou jeh leh gamsung mipi ho gentheina ato hou athohpi na thu aphongdoh in ahi. L. Tongkholen Khongsai in Saparmeina-Saikul lampi gamsung mipite a dinga apoimo dan neh kiholna lampi khat ahitoh kilhon a government in akinthei pen a gelkhohna ahinei dingin jong temna aneiyin ama mimal a kona jong ajochan a pan ahinla dingin jong aphongdoh in ahi.

xxxxxxxxxxxxx

By-election a kitetpi beiya akaidoh ding GS Haupu in kinepna nei

Ccpur, Sept. 19(ET): MANIREDA a Chairman ana hi leh 60 Singngat AC a Ex MLA Ginsuanhau Zou in tunin ahunglhung ding by-election a kimangcha pan ding Polling station thah khat Songpeh kho mun ah hondoh na ana neiyin ahi. Hiche AC sunga MLA Ginsuanhau Zou in haina anapeh toh kilhon a AC sunga mopoding aum tahlou toh kilhon a ahunglhung ding November 2020 sunga by-election chelha dinga ginchat ahi.

Hiche kin-gon kiman na ah gamsung haosa 12 leh social worker honjong pan ana lauvin ahi. Ex MLA pu in ahoulim na ah tu le tua Chief Minister lamkaina government in adeh a tulaitah a UPF leh KNO sorkar toh kihouna aneijing toh kilhon a ahung lhuhding deilou na leh huhdoh a aumthei nadinga membership hina a kon a haina kanapeh ahi atin ahi.

Aman aseibe na ah, hangsan tah a haina kapeh thei na hi mipi ding gelna jal leh avel a gamsung miten eihin sotkai uva kitetpi bei a eihin tundoh kit diu kinepna neipum a haina kanapeh ahi ati. Chuleh Robert Haokip in ahoulimna ah Ex MLA pa kigel lhah na leh hangsan tah a haina apeh ho pachatna sangtah apehna ban ah Ex MLA pu hi tule tua government sem a pang hon adeisah leh atosotna ban a UPF leh KNO tosot ahijing toh kilhon a lhendoh kit ding adeisah thu ana phongdoh in ahi.

Nilhah lam chun MANIREDA Chairman G. S. Haupu in Zou Sangnaupang Pawlpi GHQ Meritorious awards 2020 kingon kiman na a Zou nam sunga class X leh XII a subject chom chom a sangtah a pachanna neiho kipaman hopdohna injong pan ana la in ahi. Hiche kin-gon kiman na ah UZO leh ZYO GHQ  lamkai holeh Muallum MDC Grace Zamnu injong pan ana lauvin ahi.

Xxxxxx

Manipur a COVID-19 a toh kisaiya mi 3 thi kibe kit; Travel history neilou mi 111 positive thah kimudoh

Imphal, Sept 19(ET): Manipir COVID-19 a thi athahbeh a 3 aumkit toh kilhon in, agomin mi 55 aphatan chuleh positive case thahbeh a kimu 117 aumbe toh kilhon in agomin mi 8724  alhing tan ahi tin Saturday nikho a state health department thuphondoh chun atahlang in ahi.

Achesa nidan 24 sung chun Imphal West a kon cheh kum 80 mi khat leh kum 75 mikhat RIMS mun’ah ana muolliem in chuleh Thoubal district akom kum 65 mi khat JNIMS ana muolliem toh kilhon in state sunga Covid-19 jeh a thina toh agomin mi 55 alhingtan ahi. Chuleh milham lah a kon in positive case thah 116 mudohbe ahi in, hiche lah a mi 111 hi travel history neilou ahiuvin chuleh from Central Armed Police Force (CAPF) akon a mi 1 ahi. Mi 111 lah a 38 hi Imphal West mi ahiuvin, mi 33 ho hi Imphal East,  24 ho hi Thoubal ahiuvin chuleh 8 Churachandpur leh Bishnupur akon a mi 8 cheh ahiuvin, Senapati leh Kakching akon mi 2 cheh ahikit in chuleh Jiribam a kon a mi 1 ahi. Amaho cheng hi apet pet a Covid Care facilities a chonlut ahi ngal un ahi.

Alangkhat ah, state sunga CCC chom chom a kon in mi 94 discharged ana kibol kit in ahi.

Discharged kibol ho hi CAPF akon mi 35, CCC Lamboikhongnagkhong akon a mi 29 , JINIMS a kon mi 14, RIMS a kon mi 7, CCC UNACCO a kon mi 6, TK Ukhrul akon a mi 2 leh CCC Jiribam akon a mi 1 ahiuve. Amoho cheng hi RT PCR test kibol toh kilhon a discharged ana kibol ahiuvin ahi.

Tuni chan a positive case kimudoh agomin 8724 (Milham — 6797 leh Central Security Personnel -1927) apha tan, chuleh recovered cases hi agomin 6723 (Milhan – 5112 leh Central Security Personnel – 1611) alhing tan ahi. Tu le tua active cases um hi agomin 1946 (Milham – 1633 leh Central Security Personnel – 313) ahi. Recovery rate hi 77.06 % ahitai.

State Covid Treatment team tia kiminvo sub-committee khat semdoh ahitoh kilhon in Director, Health Services chu Chairman a gon ahitoh kilhon in inspection, supervision leh Covid-19 a manchah dinga kisem hospital ho  guidance ding in officials 11 toh gontha ahi.

Hiche sub-committee ho hin state sunga COVID-19 toh kisai ijakai vetkol na anei jinhdiu ahi.

xxxxxxxxxxxx

Monday apat State phabep a themjil namun kihong tading

New Delhi, Sept 19: Ahunglhung ding September 21 (Monday) apat achesa lha 6 sung ana kikhah themjil na mun ho state phabep a hondoh hiding ahitai. Centre in themjilna mun hondohna dinga juidinga asem akhatna jong ahi nalaiyin ahi. Hiche dan juidinga kisem hi adeh a simlai class sang ho leh alenjep lang ho, ama ama nopna dungjuiya themjil na mun a jilkung ho a kon a dohnom leh hetnom neiho ding bouva kisem ahi nalai in ahi. Chuleh containment zone huop sunga um themjilna mun hovang phal hilou diu ahi.

Themjilna mun hon nadinga juiding ho ahileh, simlai hon themjilna mun phahthei na dinga nule pa akon a phalna jihtho a akichoi cheh diu, simlai ho assembly umthei lou ding, kin-gon jat chom chom leh kitit khomna ho um theilou ding, themjilna huom sunga neh le don kijohna ho kha hiding, 50 percent capacity a themjilna mun hon hiding, alou theilouva lut kon leh thermal screening leh khut soptheng ding, classes room jouse suhtheng jing ding, swimming pool ho kha hiding, asymptomatic ahilou leh natna neilou chuleh tahsa hatmona neilou staff leh simlai hobou phal hiding tiho hi ahi.

Assam, Jammu and Kashmir, Haryana, Himachal Pradesh, Karnataka, Nagaland, Meghalaya, Andhra Pradesh ho in themjilna mun ho kihong pan ding in kigel lhahna anei un ahi. Chuleh ama ama state cheh in juiding dan jong semtohsa in akikoi cheh un, classroom ho suhtheng na leh social distancing mun dingho jong amun mun ah melchihna asem pan tauvin ahi.

Hinlah state dang dang in tutadi in tahsatah a themjilna a kihilna neiding anom naipouvin, online class chepi nahlai ding jong anopnau aphongdoh un ahi.

AAP government in simlai alenjep lang ho adia themjilna mun ajot thei nadiu hi hatah in anopnau ana phongdoh un, hinla Friday nikho chun themjilna mun ho October 5 chan geiya kha hiding in thupeh ana neikit un ahi.

Saturday nikho chun Congress Rajya Sabha MP Ahmed Patel chun simlai chapang adeh a online class bolho dinga juiding dan hin sem ding atumbeh a task force gonding adeisah dan ana phongdoh in ahi. Chuleh adeh a genthei vaicha jep computer leh smartphone neijoulou ho dinga government in panpina leh kithopina apeh dingin jong MP Ahmed in temna ana neiyin ahi.

Xxxxxx

Dan dungjuiya, Rape case hohi kisu lamdang theilou ding ahi

Imphal, Sept 19(ET): COVID 19 Pandemic sung jengin jong numei chapang chunga khanset na hi abei dehpoi tin Manipur Alliance for Child Rights (MACR) chun phamo asah nau aphongdoh un ahi. Hiche hi Mayang Imphal Gang Rape thu a numei chapang kum 14 khat kisuh set le kitha thilsoh jou a Moreh border kom a September 15, 2020 nia chapang numei kum 3 leh akeh khat suhset a um kit ahi e tin thuso chun aseiye.

Hiche case hi party 2 tichu chapang inkote leh asuse hon amaho kikah a seichai dia ana gon u ahi.

Moreh Police Station a Section 6 POCSO Act noiya FIR hi ana kibol khum ahi tin MACR chun asei e.

MACR chun hitobang a kihou toh got naho a kon a kikangse dingin thuphon anei ban un kum 3 leh akeh chapang kisuse kiti hi crime lah a asangpen ahi tin jong asei uve.

Hitobang hohi POCSO Act noiya Kum 20 beh Jail a umthei ahilou leh thina chan gotna jong amuthei diu ahi tin MACR chun aseiye.

Rape case kiti hi non-compoundable tichu khat leh khat kihou vanga kichai thei thil hilou, hitobang case hohi jalhang hinkho atoh khah tolhon a community lamkai koi hijongleh hitobang kihou naho a kon akikangse angai e, ati.  Chule hitobang case hohi Juvenile Justice Act 2015 noi a seilhah ding a jong ngehna anei u ahi.

MACR chun Moreh Police in investigation kibol a pan phatah a alah uva mona neiho amatdoh diuvin jong tepna leh hetsah na jong anei un ahi.

Xxxxxxx

KIM le UNMM in Helam Haokip mollem lunghempina phongdoh

Imphal, Sept, 19(ET): United NGOs Mission Manipur (UNMM) in Helam Haokip leiset hinkho abei na chung ah lunghempi na thu ana phongdoh un ahi. Helam Haokip hi September 17, 2020 nikho a akijenna mun Shija Hospital a mollem  ahi.

UNMM in Helam Haokip hi 2003 a kipat ama ho active member khat ahi e tin jong aphongdoh uve.

Helam hin Convenor of District Women Committee of UNMM Senapati leh Kangpokpi no ana po, mi kitah le pon thotah let  Meitei-Naga-Kuki kito nadinga NGO chom chom a pan ana lajing khat ahi tin UNMM chun aseiyin ahi.

Chule international bodies for justice  a jong active tah a pan lajing, Numei chunga khanset na ho hihen child rights hijongleh athei top a panla jing abanle jat le nam pumkhat a khosah khom thei nading a jong pan lajing khat ahi in aphatlou a ahinkho abei hi manna lentah ahi tin UNMM Women Committee, chuleh Staff member hon a-it nao aphongdoh un ahi.

Langkhat ah Lamkhonem@Helam Haokip (52) former KIM executive member mollem na chung’a Kuki Inpi Manipur (KIM) in jong lunghem pina thuphon anei uvin ahi.

KIM thuphon in aseina ah Helam Haokip hi nungah feltah leh Nam ngailu, Nam a dia aphat, athepna chule anei agou itcha louhella panla mikhat ahiban a 2009-2012 sunga Kuki Inpi Development Sub-Committee member a anapang ahin, 2012-2015 sunga KIM executive member (Women Representative-Cum-Secretary Custom & Culture) panmun ana tuh ahin, tu le tua jong Kuki Women Union Speaker panmun atuh jinglai ahi ati.

Hitobang it umtah le Nam a dia mi poimo tah khat in lomlou tah a eimollem san nau chung’a Kuki Inpi Manipur in lunghem pina le jana peh tolhonin along damsa chu lomtah in KIM President pa makai nan lamkai apang thei chan chule KWU le KSO lamkai ho jaonan Shija Hospital a pat achenna Urangpat vangkho chan ama a dia aleiset kholjin chaina aga kilhon pi in ahi. Khaimang Chongloi President, KIM in along chunga houlimna aneina banna Saipikhup tompon akikhun Chule KWU le KSO hon jong tompon Saipikhup khatcheh akhuvin ahi.

Xxxxxxxxxxx

Chassad khopi ading’a Bright Future Inn in kithopina pe

B.Lalboi Gangte

CCpur. Sept. 19 (ET) : Jesus Love Church, Seoul, South Korea a natong lai Pastor. Mang Thomas Vaiphei in atohna Mission noi’a pansa’a (based) um gam chom chom’a eimi hon kipun khomna Bright Future Inn in Chassad khopi ading’a ana dondoh khom’u kithopina Dk. 5000/- leh ann-chang bag 5 chu amaho thalheng in SN. John, President, Zillai GHQ in KKL Complex mun’a Kamthang Haokip, President, KKL khut’a pehdohna ananei in ahi.

Hetthei khat chu Bright Future Inn hi India gamsung mun chom chom akon leh Cambodia, Pakistan leh Sri Lanka akon na jong mi um ahi. Chule CCpur District akon Pastor. Mang Thomas Vaiphei in Vice President hina apohna Korea Manipuri Association in jong achesa Aug. nisim 20 nikho chun Manipur state sung mun chom chom’a khamnathei neho leh sex worker ho vetkol namun Rehab Centre chom chom’a  panpi na jong anape uvin ahi. Hiche naban’a CCpur District sung’a um Overcomers, Bijang Family Lane; Agape, Rengkai, Muollhum leh Gilead Balm, Kanan veng ho’a jong panpi nan Dk. 3000/- cheh anape uvin ahi.

 xxxxxxxx

CCpur District a Covid-19 +ve case thah 8 kimudoh; agom’a case 853 lhingta

B.Lalboi Gangte

CCpur. Sept. 19 (ET) : Churachandpur khopi sung’a anitin’a Covid-19 +ve Case natna nei akimudoh jing toh lhon’a tunin jong +ve Case 8 anakimudoh kit in ahi. Tuni chan’a CCpur District sung’a agom’a case 853 alhing tan ahi. Chuleh tuni case thah kimudoh 8 lah’a mi 2 hi returnees chuleh adang 6 ho hi kholjindoh na neilou ho ahi. Alangkhat’a tuni case thah kimudoh ho lah’a Tuibong kho mi khat JNIMS Hospital, Imphal a akivetsah na’a kon Covid-19 test akibol na’a hetdoh anahi in chuleh thina toh janni (Sept. 18) kivui pasal kum 70 vel’a upa toh close contact na’a kon numei 3, pasal 2 leh naosen lha 2 ahi.

Hiche toh lhon’a kholjindoh na neilou mi 6 akon +ve case thah akimudoh toh lhon’a tuni chan’a kholjindoh na neilou +ve case kimudoh agom’a 120 alhing tan ahi. Covid-19 +ve ho hetdoh nading’a kimangcha Rapid Antigen Testing Kit (RAT) akon test 4,520 kibol nalah’a 338 +ve mudoh ahin adang hi RT-PCR akon kimudoh ahi. Chuleh CCpur District sung’a Covid-19 Care Centre ding in mun 7 akimang in hiche hochun agom’a lupna 398 um nalah’a tuhin lupna 160 akimang cha in ahi. Covid-19 Care Centre holah’a NIELIT a mi 39, Lanva TD Block a mi 49, STC BSF a mi 9, 27 Sector Assam Rifles Khuga Dam a mi 58 leh 2nd Assam Rifles Singngat a mi 5 aum in ahi.

Alangkhat’a tuni chan’a Covid-19 +ve case 853 lah’a adamdoh mi 674 aphatan ahi. Self Isolation ahilou leh  Home Quarantine toh kisai’a mi 6,717 in nikho 14 sung Home Quarantine ajou theng uvin tuhin mi 734 Home quarantine ah aum in chuleh Contact tracing akon 10 aum in ahi.

xxxxxxxxxxxxxx

ASHA Facilitators ho ding’a Community Volunteer Training kibol khumkha hita

B.Lalboi Gangte

CCpur. Sept. 19 (ET) : District Health Society, Chrachandpur tohgon nanoi in achesa Sept. nisim 14 nikho kon ana kipan GNM Training Hall, IB Road mun’a ASHA Facilitators ho ding’a Community Volunteer Training chu tunin khumkha anahi tan ahi. Training phatsung chun Resource person in Dr. Ngahneikim, District Surveillance Officer, Ccpur, Dr. Thanglalmuang, Rapid Response Team leh  Dr. Zamlianmang, Psychiatrist, District Hospital Ccpur  anapang uvin ahi.

Hiche toh lhon’a tuni Training phatsung’a Dr. Ngahneikim Haokip in ‘Briefing on COVID-19 IPC & Disinfection of common Places’ thupi mangcha in kichuhna anape in, Dr. Thanglalmuang in ‘Community surveillance/House to House Survey leh SOP nukhahpen toh kisai’a kichuhna anape in chuleh Dr. Zamlianmang in ‘Psychological support & Stress Management for Volunteers’ thupi mangcha in kichuhna anape in ahi. Hiche Training sung’a chun ASHA facilitator ho, ASHA nei leh neilou kho ho akon Village authority hon pan anala uivn ahi.

xxxxxxxxxxxxx

CCpur District Mata kho kom’a Medical College sah na ding gam leiset Health Minister L. Jayantakumar in vetlhah na nei

B.Lalboi Gangte

CCpur. Sept. 19 (ET): Churachandpur District hopsung Mata kho kom’a Medical College sah namun ding gamleiset tunin Health Minister lamkai nan vetlhahna ananei uvin ahi. Hetthei khat chu Medical College sah nading’a State Cabinet in Churachandpur District ah Medical College khat sah nading’a thulhuhna analah utoh lhon’a akiphaldoh Mata Haosa pu hiche sah nading’a agam atodoh’u pompeh ahi dungjui’a natoh kipat theina ding’a Manipur Chief Minister in gam hondoh na nei gang ding’a kino na anei dungjui’a Healh Minister L. Jayantakumar lamkai na’a vetlhahna ananei’u ahi.

Hiche toh lhon’a gam todoh (donate) aum Acre 27 vetlhah na nei ding kondoh hochu Imphal akon Y. Jayantakumar, Minister, Health & Family Welfare lamkai nan Vumlunmang Vualnam, Principal Secretary, Health & Family Welfare, Dr. K. Rajo Singh, Director, Health Services, Dr. Babychand, Additional Director, Planning, Dr. Samorendro, Deputy Director, Dr. Prabin Singh, Deputy Director leh Bankim, Chief Architect, PWD Manipur ho ahi. Amaho cheng chu Pawan Yadav, IAS, Deputy Commissioner, Churachandpur, Dr. Vumchinpau Tonsing, Chief Medical Officer (CMO), V. Jamkhanmang, Executive Engineer, PWD Churachandpur Division, S. Khaikhopau Ngaihte, MCS, Additional Commissioner, S. Ginmuan Ngaihte, SDO/Churachandpur, Dharun Kumar, IAS, SDO/Lanva, Lawrence K. Munluo, MPS, Additional SP (Operation), Dr. Paulunmang Vaiphei, DFWO, Dr. Vanlalkungi, Medical Superintendent, District Hospital, Dr. Romeo Sanate, DACO; Lallunkam, Chief of Mata hon anakilhonpi uvin ahi.

Hetthei khat chu Medical College Centre funding nanoi’a Manipur State sung’a Medical College thum tundoh nading’a Chandel, Thoubal leh Churachandpur lhendoh ahi. Hiche lah’a Churachandpur District a natoh kipat ahi in DPR leh angaicha ding jouse Centre ah thotlut h iding hiche kipat Centre thupeh dungjui’a natoh pat hi ding ahi tin Health Minister in tahlangna anei in ahi.

Alangkhat’a Medical College mun ding’a gam tohdoh Mata Haosa Lallunkam in khosung mi MGNREGS scheme noi’a thaman peh ding in asuhtheng sah in suhtheng na natoh akichai teng gam letdan kite ding chuleh hiche gam leiset hi theiphung chi chom chom tamtah um ahitoh lhon’a natoh pat ahi teng thingphung leh theiphung ho apilhingsa ahi dungjui’a ahithei chan’a aphuh lhuh lou ding uvin Haosa pu in asein toh lhon’a vetlhah na anei utoh lhon’a hondoh na nei ding pha anasa tauvin ahi. Ahin lamlhah na deibang ahilou jeh in District Hospital jong Medical College ding’a component khat ahi dungjui in vetlhah nanei team hon District Hospital mun’a nei ding aphatsah uvin ahi. Hiche hi Chief Minister heng’a hetsahna anei ding’u Chief Minister in pha asah leh chelhah pai ding ahi.

XXXXX

ATSUM in general election nei; President ding’a Seiboi Haokip lhendoh hi

IMPHAL,  Sept. 19(ET) : All Tribal Student’s Union Manipur (ATSUM) in tunin Amity Hall, Adimjati Complex, Chingmeirong, Imphal mun’a 2020-22 sung’a ding general election ananei uvin ahi. Hiche kingon achun KSO General Headquarter branch, ATSUM Units, ANSAM leh Hill District sung’a tribal student bodies akon lamkai 150 val in pan anala uvin ahi.

Hiche toh lhon’a presiding officer Lunsei Touthang leh returning officer Adani David Choro soi kaina noi’a ATSUM in thuso aneina’a ATSUM a 2020-22 sung’a lamkai lhendoh’a um hochu President : Seiboi Haokip; Vice-President: Vanllalien Khaute; General Secy.; SR Andria; Assistant General Secy. : Micah Kamei; Finance Secy.: Henkai Singsit; Secretaries of Education: Kaikho Hopeson Mao; Information and Publicity: Khaiminlen Doungel; Social and Culture: Karang Paul; Forest and Environment: T.P. Dining; sports and youths affairs: Lamcha Chongloi; Assistant Secretary (education): Thangtinlen Haokip chuleh Assistant Secretary (forest and environment): AS Marakhai ahi. Hiche nachung chon’a Assembly Speaker ding in Lovejoy Shimrah athah beh in appointed abol uvin chuleh Assembly Affairs ading’a Deputy Speaker leh Secy. ding in Kakam Haokip leh Malsawmthang Ralsun lhendoh ahi.

Alangkhat’a lhendoh’a um lamkai ho mopoh nahi ahung lhung ding Sept. nisim 20 nikho leh pehdoh na kingon chelha ding chuleh nikho 14 sung’a executive expansion jong election commission leh search committee hetpeh nanoi’a abol ding’u ahi.

XXXX

Assam Rifle hon khamnathei Dk. Lakh 72 vel ding anamandoh

Tengnoupal, Sept. 19 (ET) : HQ IGAR (South) vetsui nanoi’a um Assam Rilfe hon janni (Sept. 18) chun routine patrol che hon ginmo thei tah’a kenbo bike a mi khat gamlah akon hung anamu utoh lhon’a kham ding anagot uvin ahin bike tolpa chu bike dalha in ana jam mang tan ahi tin thulhut chun aseiyin ahi.

Hiche toh lhon’a Assam Rifle hon jong hiche kenbo bike a thil hung kipo bag kholchilna anei nao’a brown sugar 360 gms asum a sei ding’a Dk. Lakh 72 vel leh mobile phone anamudoh uvin ahi. Chuleh mudoh’a um thil ho jouse daan toh kitoh’a kholchilna nei ding in Police Station, Moreh a anapelut tauvin ahi.

xxxxxxx

India COVID 19 million 5.3 valta, adamdoh 4.2 million lhingjou

New Delhi, Sept, 19: India in COVID-19 case thah 93,337 leh 1247 in COVID 19 jeh a thina pungkal 24 sungin aumbe in chuleh  Coronavirus vei hi million 5.3 avaltai tin Union Health Minister in tunichun aseiye.

Health ministry dashboard chun atah doh dungjui in jingkah nidan 8am chan in 1,013,964 active case aum in thina toh jong 85,619 alhing tai, ati.

India in Saturday ni chun United States akhel in no. 1 COVID 19 case nei ahitai. Ministry in aseina ah tua hi case 4,208,431 aum in 95,880 ho Friday le tuni in lhadoh ahiuve. Chule Recovery rate jong 79.28% ahitai.

India hi COVID 19 case nei holah a akhoh sepen ahitai tin report chun aseiye, ni 11 sung in 70,000 case val ana damdoh jouve.

Government in Friday nia aseina ah recovery rate hi vel 4.04 in active case sangin atamjo in, State 5 COVID 19 case tamna mun ho a jong recovery rate hi asang pen in ahi.

Hiche a 59.8% active case hi Maharashtra, Andhra Pradesh, Tamil Nadu, Karnataka leh Uttar Pradesh a ahiuve. Hiche state hoa kon a recovery rate jong 59.3% alhingin ahi.

Hiche report ah chun 90% tobang recovery neiho hi state 16 leh Union Territories ahikit uve. Hiche lah ah hin Maharashtra 22.31%, Andhra Pradesh 12.24%, Karnataka 8.3%, Tamil Nadu 6.31% Chhattisgarh 6.0 % vel hi recovery rate ahi.

Hiche state hohin agom a 55.1% in damdoh na anei jouvin ahi tin Health Ministry chun asei e.

Government thuso chun  hitobang a damdoh na ahung umjou hi “effective clinical management and treatment protocol dan centre in ana phondoh jeh ahi tin jong aseiye.

Ministry of Health in AIIMS toh kitho a ‘National e-ICU on COVID 19 Management’ noiya State leh UT ho a hospital jaona Centers of Excellence ti a phondoh ahi e. Hiche hi Tuesday leh Friday nikho jao a hapta khat sung a nivei session hi umji ahi.

Government in aseina ah hiche session kigong hohin recovery rate hi asuh sang ahi, ati. Tuchan hin National e-ICU 19 hospital 249 chuleh state/  UTs India pumpi huop a aum in ahi.

India hin Ramdesivir, leh tocilizumab tiho amang in hiche hohin COVID natna nei ho din damna alhut ahi, ati. Home isolation chuleh ambulance ho aphatcha natoh abol jeh ujong ahikit e.

India fatality rate (CFR)  chu 1.62% alhinge tin Health Ministry in Friday nichun asei e. John Hopkins University Coronavirus tracker sei dungjuiyin COVID 19 case nei 30,397,759 aum in hiche jeh a thijong 950,493 alhinge tin aseibei.

Xxxxxx

Green Mission tohgon noiya IFM le NYK Kpi in thingkeh phuna nei

Kangpokpi, Sept 19(ET): Green Mission tohgon  noiya plantation programme Twinom village, Kangpokpi mun a tunin ana chelhan ahi. Hiche program hi Innovatory and Friends Missions (IFM) leh NYK Kangpokpi kitho khom a agon ahin, hiche a thingnou keh hohi District Forest Dept. Kangpokpi district, Manipur in apeh ahi.

IFM President, Nehkhothang in aseina ah thingnou keh hi 2500 tobang ana kitu doh tan hitobang hohin gamsung a eco-balance ahin umsah kitding ahi ati.

Khangdong hinkho phalou tah a mangho sangin thingnou keh khat kitu hi aphachomjoi tinjong aseiyin ahi. Hiche mission hin atup pipen chu climate change hohi agelkhoh pen ahin khangthah honjong hitobang lampang a hi pan phatah alahdiuvin jong tepna anei in ahi. Hiche a thingnou keh kitu hi avel thumna ahitan Youth Club 8 tobang in pan alah ahi.

Lalkhoneh, District NYK Accountant chun gamsung a eco-balance ahung kile na dinga hitobang a thingnou keh tuding hi apoimoi tin aseiyin Youth Club 8 holah a chun volleyball leh net hojong pehdohna aneiyin ahi.

Innovatory and Friends Missions (IFM) Secretary Manghekam in District Forest Dept chuleh District NYK leh Youth club hochung ah kipathu asei in, Climate change thu a IFM panlah najong akipapi dan phondoh najong aneiyin ahi.

Xxxxxxxxx

Moreh khopi sung a covid positive mudoh be hi

Tengnoupal, Sept 19(ET): Moreh khopi sung a covid-19 positive 3 mudoh ana hitoh lhon in Primary Health Centre (PHC) Moreh jong phatchom khat ading in kha ahitan ahi.

Centre kha ahi toh lhon a emergency bou kijan ding ahitahdan Kh. Gojen Singh, CMO Tengnoupal District in hetsah na ahin nei in ahi. Hiche positive case chu Moreh ward no 5 Muslim basti akonMuslim nupi kum 45 a upa khat PHC a kivetsah a ahung toh lhon a tetst kibol na a positive ana hi toh lhon a hitabang tohgon chu ana um ahi. Nupi nu chu covid positive ana hi toh lhon in acha mi 2 toh Sub–district Hospital Covid Care centre Moreh a ana kikoi tan ahi.

Hiche positive nu chun diabetes, lung chang nat na le hail al na dammo na anei dan jong hetdoh in ana um in ahi. Kh. Gojen Singh  Chief  Medical officer (CMO)Tengnoupal District toh thuso miho ho toh akihou limna a Primary Health Centre (PHC) Moreh ni phabep sung ading a kha ahiding dan hetsah na ahin nei in ahi.

Emergency a kijenna nei ding ho in Dr. Haominlun  Medical officer phone number 7005768893 ahilou le Dr.kh. Santikumar singh Medical officer in-charge PHC Phone number 9402050981 toh kihou matna anei na idng uvin jong hetsah na ahung kinei in ahi.

Tengnoupal district magistrate in jong covid positive hetdoh ana hi toh lhon in Moreh ward no. 5, Nepalii basti le Mayai Leikai akon Chanvangphai noilam ho containment zone ding in phondoh na ana nei tan ahi.

Xxxxxxxxxxxxxxxxxxxxxxxxxxxxxxxxxxxx

WAD in chapang numei rape thu a demna sangtah nei

Imphal, Sept. 19(ET): Women Action for Development (WAD) in Moreh a chapang numei kum lhinglou kisuh set thu tunichun demna sangtah aneitan ahi.

Press release abol nauvah chun Secretary WAD in newspaper holeh tahsan umtah thulhut kimu dungjuiyin chapang kum 3 leh akeh khat  September 15 nilhah nidan 5:30 vel a suhset a um chu nilhah nidan 6:30 vel a report kibolpai ahi, ati.

PHC Moreh in chapang nuhi anikho ma ma in RIMS a apohlut kit ahi.

Police komah Doctor hochun Moreh Police Station ah FIR no.72(9) 2020 MRH-PS U/S 6 POCSO Act noiya jihlut ahi. Chuleh ngoh a umpa hi matdoh ahi naipon ahi, ati.

Thu kimu dan in chapang nu anuthah nuhin rape bolpa hi aseidoh nompoi, ati. WAD chun customary Law dungjui a lakh 3.50 in athu hi ana seichai uve, ati. Hiche hi atah ahileh khonung a Manipur dinmun seithei ahitapoi atin ahi.

WAD chun aseina ah hitobang crime hohi loi, vohcha ahilou leh sum in anakichai ji e, ati. Haosapa jaona in WAD chun mipi hon mona neipa Police ho khut a ahin pehlut diuvin jong tepna anei un ahi.

WAD chun aseina ah CSO, tribal unions, student bodies chuleh religion institutions honjong hitobang a khanset na neiho hi demna apeh diuvin jong tepna anei un ahi. Rape bolpa hi agang theipen a police khut a pehdoh ahi nadin avel in wad chun ngehna anei ahi.

xxxxxxxxxx

Gynae doctor umlou jeh a Moreh mipi ten hahsatna toh

Tengnoupal, Sept 19(ET): Moreh hospital a Gynaecologist Doctor umlou jeh in mipin hahsatna atoh jing uvin ahi. Hiche chung changa mipi ding gelna a agan nathei pena khat hin solna ding a tohgon akinei ding dan Benjamin Mate, Spokesperson BJP Manipur in thuso miho toh akihoulimna a ana sei in ahi.

Moreh Sub–district Hospital Covid Care centre le  Primary Health Centre (PHC) Moreh a achesa August nisim 8 akon in Gynae doctor jao lou in naosen 15 lam jong ana peng doh tan ahi akiti. Hetthei khat chu Gynae doctor umlou jeh a Moreh khopi sung a mipi kiloikhomna ho in govt ang a temna ana neijing’u ahitan ahi.

Govt in khosung mipi ho ding gel na a agan n athei pen a gynae doctor ahin sol ding uvin jong temna anei uvin ahi. Docotr umlou jeh a Imphal lam jot na a lampi a toset ijat ham ana so jing tah toh lhon a mipi the ngehna agan nathei pen a san peh a aum na ding in jong hetsah na anei uvin ahi. Tu le tua gamsung vaipo BJP gov tin thinglhang le phaicham kikhel na le sihnei langnei na umlou a khantou na kibah sah ding tohgon anei utoh lhon a hitabang ngehna ho hi ahin sanpeh ding uvin jong mipi in hetsah na anei uvin ahi.

Xxxxxxxxxxxxxxxxxxxxxxxxxxxxxx

Pakistan in Indian Kashmir lam a drone jang a manchah le sum hin leh lha

Srinagar, Sept 19: Pakistan in Indian occupied Kashmir gamgi a drone jang in manchah le sum ahin leh lha uvin ahi. Hiche manchah le sum ho chu Kashmir Rahouri district sung a ahin le lhah u ahi.

State police chief Dilbag Singh in aseina a hiche natoh na chu hetdoh ahi toh lhon a police in amun ana dal lut na a LeT galgul bol sum le manchah la a che ho matdoh na ana nei uvin ahi. Singh Akon thuso kimu dungjui in police in 38 Rashtriya Rifles toh kitho a hiche natoh chu hetdoh na ana nei utoh lhon a amun chu ana dal lut na uva galguh bol ho chu ana matdoh u ahi ati. Hetthei khat chu Rajouri district sung ahi manchah tamtah le heroin kg 11 lam dangka crore 11 lam man ana matdoh u ahitan ahi. Pakistan le a agency ho in Kashmir sung a chamna le lungmonna suhboi na ding in natoh na anei jing uvin ahi tin DGP pa chun asei in ahi.

Hiche mi thum ho chun police ho ahin mu utoh lhona grenade ahin le khum u ahidan le grenade chu ana poh loudan tahlang na jong ana nei in ahi. Drone a thil hungki sep lha bag chu hondoh na ana kinei na a AK-56 rifle 2, pistol 2, grenade 4 le sum dangka lakh 1 Indian sum a mudoh ana hi in ahi akiti. Hiche thu chung chang hetbe na ding in akiman ho thudoh akinei jing in ahi akiti. Drone a hitabang tah a natoh na kinei hi tu masang a jong kibol jing ahin hinlah BSF ho in ana tin jing u ahi akiti.

Hiche lhang sung hi mol le lhang ngen ahi toh lhon a phate a vetchil na akinei lou le nom tah a galgul bol ho chat thei u ahi tin jong DGP pa chun asei in ahi.  Pakistan akon manchah kimandoh ho hi atamjo America a kisem M-4 le M-16 ahi jing dan jong hetsah na ahung kinei in ahi.

xxxxxxxxxxxxxxxxxxxxx

Intangki forest thu chung chang a NSCN (I-M) in ZB (N) thuso nelkal

Dimapur, Sept. 19: Zeliangrong Baudi (Nagaland) in Intangki wildlife sanctuary chung chang a thuso ana neina uva NSCN (I-M) Chairman Tuccu in Intangki sung koima lut na thei louding mun in phondoh na anei e tia asei na chung uva demna ahin nei utoh lhon in hitabang ngohna kinei chu bul le bal neilou thu ahidan hilchetna ahin nei uvin ahi. NSCN akon thuso kimu dungjui in kiloikhomna in hitabang thu asei khah loudan le Nagaland sung a reserve forest ho huh nading thu joh aseidan tahlang na ana nei uvin ahi.

Thuso kimu chun asei in a Gilgal Camp (National Hoho) a kihoukhomna achesa March 27 akon April 2, 1996 kum a akinei na a Naga ho lhang sung a gam le go huhding toh kisai a natoh an nei ding a kinoptona kinei toh lhon a hitabang kinoptona in Intangki ahopdan thu tahlang na ahin nei uvin ahi. Hiche lhang sung hi mi phabep in chen lut ding le lo lut ding tohgon anei jing utoh lhon a hitabang khan a ding a natoh an kinei ahidan le kiloikhomna in hiche chung chang thu a gamsung amaho adan a akilah u thu ima aum loudan jong hilchetna ahin nei uvin ahi.

Xxxxxxxxxxxxxx

Inn hung kile ho ama ama gari a covid test kibolsah

Imphal, Sept. 19(ET):District administration, Thoubal  in thuso ahin neina uva state pam akon lenna a hung ho chu ama ama gari a ahung ule Kodompokpi Sports Complex, Wangjing mun a covid tetst kbiol ding dan hetsah na ahin nei uvin ahi.

Deputy Commissioner Thoubal District N Bandana Devi in aseina a hitabang tetst nei nom ho in e-pass neina ding a ahung na ding u nkhat ni ni masang a pass aki ngaito masat ding uvin hetsah na ahin nei in ahi.

xxxxxxxxxx

PREPAK(PRO) cadre khat kiman

Thoubal, Sept 19-  Security Force ho in tuni in Thoubal district sung Maringthel a PREPAK(PRO) cadre khat ana man uvin ahi. Akimandoh pa akon in 9mm pistol  khat matdoh in ana um in ahi. AKimandoh pa chu Andro Police station a pehlut ana hi tan ahi.

Xxxxxxxxxxxxxxxxxxxxxxxxxxxxxxx

Dan toh kitoh lou a lou kipo kiman

Thoubal, Sept 19: Thoubal Police commando ho in tuni in Sachidananda Soibam, Addl. SP (Ops) Thoubal makai na noi in dan in aphal lou damdoi hinpo mi khat ana mandoh uvin ahi. Hiche lou hinki po chu Cefrex 100 ml bottle 216 ahi akiti.

Hiche lou hinpopa chu Pusam Abdullah (29) yrs S/o P. Abdul Rahman, Mayang Imphal Bengoon akon ahi akiti. Ama pa chu tuni jingkahlam nidan 8 vel a Leishangthem Tayenjam Leikai mun a ana kimandoh ahi. AKmandoh pa chu Thoubal police station a pehlut ana hitan ahi.

xxxxxxxxxxxxxx

Military canteen ho a Indian thil bou johding tohgon akineipoi: Govt

New Delhi, Sept 19: Tuni in Defence ministry in India sung pumpi a Military canteen ho a India a kisem thil ho bou johding tohgon akinei loudan hetsah na ahin nei uvin ahi.

Hiche thu chung chang a hin tohgon akineipo kihou na jong akineipon ahi tin Minister of State for Defence Shripad Naik  in tuni in Rajya Sabha a phondoh na ana nei in ahi. Hiche thu chu minister pa in Prime Minister pa in gamsung thil ho bou jah ding a muntin a kholhang ana sap jing toh lhon a military canteen ho a chepi na kinei ding ham tia thudoh ana kinei donbutna a ana sei ahi.

Hetthei khat chu Prime Minister Modi in gamsung suh hatna ding a gamsung a kisem ho thil ho bou jah ding a muntin a kholhang sapna ana nei jing ahi.

Xxxxxxxxxxxxxxxxxxxxxxxxxxxxx

Flight a hung ho ding’a SOP thah kisem

Imphal, Sept 19(ET): Manipur govt home department in gampam akon inn hung kile ho ding SOP thah asodoh uvin ahi. SOP thah kisem chu gampam akon lenna a hung kile hon ama gari ahilou le aki hired u gari ama ama district DC henga kon e-pass ahin kichoi ule Airport akon innlam kijot sah ding, inn hung kile ding hon ama ama DC heng a ni 2 masang a e-pass akidel ding, DC in ama ama district miho web portal, email address le adang dang ho hetsah na aneiding, epass neilou hon MST bus ho a ama ama district jot masang a HRD academy ahilou le Imphal West DC in akopeh na mun a ajot ding ahi akiti.

Airport sung a epass hin kichoi ho hi passenger hotoh kilha doh thei ding, security force hinpo ho ahilou le airport sah nading thil hinpo ho vang airport sung a gari kingah sah louding chuleh gari ngah pet a social distancing phate a juiding ahidan jong hetsah na ahung kinei in ahi.