Mizoram a kalsuong Ccpur ADC Chairman le Vice-Chairman lolhingtah’a hung vailhung honta,...

Mizoram a kalsuong Ccpur ADC Chairman le Vice-Chairman lolhingtah’a hung vailhung honta, YMA in Mizoram a konna thao pohlut ding phalta

380
0
SHARE

B.Lalboi Gangte
CCpur. 6 Jan (ET): United Naga Council (UNC) in National Highway phattep lou eco­nomic blockade Manipur sung’a abol kal’u lha 2 val ahi nung’a ladoh lou’a akoi nachung uva Manipur state gamsung’a nitin ngaichat ho lhahsam na alhun nachung chon’a mipi tamtah asuh kha nachung’a Manipur state toh kinai cha umkhom Mizoram State akon’a nitin’a mipi ngaicha ho lhun ahi thei nading in 3 Jan 2016 nikhon Autonomous District Council, Chairman Langkhanpau Guite leh Vice Chairman Lalhossan teni Mizoram State sung’a Centre Young Mizo Association (YMA) kimu pidia kalsuong doh lhon chu lolhing tah in tuni jingkah nidan 8:00 in Churachandpur district ahung lhung lhon tan ahi.
ADCC Chairman leh Vice Chairman Mizoram akalsondoh nalhon chung chang thu Eimi Times Correspondent heng Langkhanpau Guite in ama chamber mun’a ahetsah na ah; Manipur gamsung’a Economic blocked jeh in Manipur ah cheng Zo suon chate nasatah in genthei na akithoh in, hiche chung chon’a niseh’a milip gari lhaithei lou’a khosa theilou, neh leh chah hol na kimang ahi na, Gari thaotwi Manipur sung pohlut di nei khapeh uhi thisan khat leh sopi khat hinan neilha ongpeh vin ti’a akitao na, Mizoram Govt. toh kihou vin atiu peh vin, kinjong nang ho heng’a hung tao kahin nang ho Govt. kihou vin kati phat in Centre YMA ama ho jao nan Mizoram Chief Minister toh kihou na ahung kineijin ahi.
Hiche Thao twi kipoh nachung thu’a dankal ah kipo ajeh’a kikhah ahi atin, kinjong Manipur Changvang Kut nahung chung’a Zosuon chate ding’a Jerusalem chu Mizoram ahin genthei hesoh nikho leh nang ho kithopi ding’a um kahiu nati jeh’a tuni’a hung kalsuong kahin dankal ah UNC in blockade abol jeh’a Zosuon chate asuhgenthei ahin hijeh achu nang hon jong kangai chat hou chu dankal ah neibol peh diu dol hilou ham ti’a kihou na ahung kinei phat in Mizoram Chief Secretary leh DGP Mizoram Mobile chungchon’a thil umdan ho ahil in thaotwi kitingdan ho lhadoh ding thupeh aneijin ahi ati.
Thaotwi kilah nading chung chang thu’a kihou lhah na kinei chu, Churachandpur akon’a Oil Tankers bou’a Mizoram leh Silchar ah thao manbai theipen’a lah hiding, hiche thao poding ah cheho chu ADCC Letter Head kichoi’a chediu Mizoram Centre YMA in hiche phalpeh nachoi hobou avetsui diu, apeh diu, Mizoram akon’a Thaotwi hin po’a CCpur hinjon ding hojong Centre YMA Letter head akichoi diu, Boundary mun hihen lang Check post hijong koiman Tax alah loudiu, chuban’a Police hihen thingnoi ho hijong Tax lah louding’a kinop tona kibol ahi ati, chuleh mipi hon niseh’a angai chat hou jong Mizoram akon’a kilah thei hiding ahi ati.
Hiche thaotwi district sung lhut ahiteng leh district polang ah kisol doh louding, mipi hoheng’a aman lhom theilam’a kihopdoh sah ding ahi ati. Thaotwi Mizoram akon’a kilah nading’a akithum najeh ahileh district sung’a Oil pump inei hou hin Blockade jeh’a Imphal mun’a quota diu apeh lou jeh uva mipi hon Oil pump ah imutah lou jeh uva mipi genthei na suhlhap nadia kibol ahi ati.
Chuleh tu injong Churachandpur district sung’a Burma/Myanmar Petrol 3rd class ho akijoh in hiche thaotwi kithun jing gari hobou in akithun thei ahin, India Thaotwi kithun jing na Gari ho’a Burma/Myanmar thaotwi ho ithun uva ahileh gari in athoh lou ding gari manchah theilou sohding ahin, hitobang thao twi ho akon’a mipi hojong chingthei din mipiho tep na aneijin ahi.