Mithi kivuisa kilaidoh (Gam le haosa thua kiboina thua haosa kivuisa kilaidoh)

Mithi kivuisa kilaidoh (Gam le haosa thua kiboina thua haosa kivuisa kilaidoh)

599
0
SHARE

Mithi kivuisa kilaidoh
(Gam le haosa thua kiboina thua haosa kivuisa kilaidoh)

Chandel district Lamkang kho Challong haosapu akivuikal lhakhat jou lang’a jan khotim kah a alhan kisuse’a thikong pum’a thilong kiladoh a kiselmang kiti thusoh hi koi society hileh thil sohkha behlou khat ahijeh a datmo um ahi. Thilong le thikong chu akilaidoh jouva akivuipi von le thil dang dang ho lhan kom’a kihal lha a thilong hi thikong pum’a kipomang’a mi hetlouna di mundang khatna kivui ham, meija kihal lha ham akicheh kihelou ahi. Hiche thua Lamkang haosa kiloikhomna ho lamkaina’a ni 2 Chandel district bandh anabol uchu bandh kichai masang’in district sung’a govt langa mopohna neiho leh Laqmkang haosa lamkai ho kihoulhahna khat umdoh jeh in bandh chu ana kiladoh e. Kinoptona chu achen achaijin kihe/kisei hihjongleh lhan suse’a thikong ladoh leh selmang ho matdoh a aumdi ti hi ahidi hisa tobang ahi.  Aban ipi ahung ti chula thuchuom ahitan hinlah hitobang thilsoh hi vang thou (sohkha behlou) ahijeh a midang in adatmo keu hilouva Lamkang ho kah a kiboina jong sang ahi. Hichea akibolto hi koima dang hilou Lamkang ho kikah mama a gam le haosat thua kiboina jeh in akiseije. Challong a along kivuija kilaidohpa hi Chandel district HQ a cheng ahivang’a athiphatna akondohna kho leh “ahaosatna” Challong khoa ana kipoa ana vui u ahi. Challong toh aki inhengpi Wangkhu kho teni kikah a gam thua kiboina ana umsa ahijeh a Challong haosapu akivuina mun hi aphatsahlou loi umdan ahi. Challong khomi ho kikah jeng’a jong haosat thua kiboina ana umsa, thingnoi kigoitoa kijep kivohna jong tu masang jepma ana umsa ahi.
Lamkang haosa kiloikhomna hon ‘demand’ abol u chu thilse bol ho matdoh in hihenlang thilong jong ahinpodoh uva Lamkang Custom dungjuija athu seidi ti ahi. Hitobang thu ah govt kiha kum kitleh mi custom ah govt akikum’e atikit maithei u ahi. Ahin thilse bol ho matdohna dia govt mopohna kipea akimatdoh louleh tia govt chung’a kiphinna’a bandh jong kibol kit ahi. Koi natoh ham ti jong Lamkang ho kiheto sohkei teidiu ahi. Ahin thingnoi kithalah tona ahijeh a kikichato uva kiseidoh ngam lou ujong hidi ahi. Hitobang hi Manipur mi ho hina dan’a umdoh ahi. Mithat, thilse bol koi ahi henasa’a ima aseingamlou jeh uva govt nin mithat miphalou thilse bol ho mandoh hen tia kiphinna hi govt chung’a kihansahna tah ahivang’a thilse bol ho akiboltopi ngam lou jeh u hiji ahi. Hiche hi jachat umtah ahi. Mithi kivui kiti hi Custom dan keuseh hilouva hou thu to kitoh a jong kivuiji ahi. Police Case thupi tah jeh a mithi kivuisa laidoh di ahileh Magistrate in phalna apeh a ama jaona a kilaidohji ahi. Hitobang hi Kashmir gam’a Army hon milham ho thingnoimi ahi tia atha kivuisa ho post mortem bol dia kilaidoh ana umsaosao ahi. Challong haosapu tia kiseipa thilong hi mundang khatna kivui/kiselmang hidia kisei ahi. Haosa leh gamgi neokhat thua kiboina jeh a mithi kivuisa kilaidoh a koima hetnalou munkhatna kisel/kivui kiti hi mihem hina jong lutle kilomlou ahi.