Mipi thutanna (Mob justice) (Mipin khat avohlih le abulu thilsoh umjing)

Mipi thutanna (Mob justice) (Mipin khat avohlih le abulu thilsoh umjing)

326
0
SHARE

Mipi thutanna (Mob justice)

(Mipin khat avohlih le abulu thilsoh umjing)

                                     Khatvei veileh phaigam’a mipi honchang khat nin suhkhelna nei khat dan dungjuija thutan’a um manlouva avoding kichuthoa avohlih jeng kiti (mob violence/mob justice) thilsoh hi sorkar lin suhtangna dia dan asem vang’a abep bep ahi. Achesa May 18 (2019) nikho’a  chu mithatna ki-ngoh khat Imphal Uripok Cheirap Court achung thu seina dia Court ang’a dinsah di kitina’a Ukil khat mipi avodi kichutho jeng’a amaltel diu phatna police hon nahchangsal’a anahuhdoh ahi. Hiche thua lunglhailou vetsahna’a Ukil (Advocate) hon ‘All Manipur Bar Association’ tia akiloikhomnau nuoija toumun kiphin ahinbollo kit u ahi. Ukil hojong hin sum thahatna mona nei khat jong seithem’a huhdoh tei agot jiu jong um thoudi ahi. Ahin Ukil hon mona nei khat chu iti danbu ahup ahal’a lena (interpret) bol’a kamthem man’a huhdohdi tijongleh thutan’a pang Magistrate hon amoh lhadoh di ahidehpoi. Hiche thilsoh a Ukil-pa chun mipi kikhom ho ngaimah thei thu ngeilou aseidoh khat jeh a abulu lo un jong akiseijin ahi. Ukil ho chung’a tahsanna lhom jeh a mipi hon Ukil akitileh moh lunghan lungput jong anei u tina ahi. Ukil-pa avoh keu u hilouva Court compound sung’a thil le lo phabep jong asuhsetman u ahi. Govt court naivel kisan’a hitobang thilsoh aumjing hi police hon thilse bol ho venna dia atohdidol atohlou u ahi tia themmo chanloi jong aum’e. Ahin police hon mipi ho ajeple anokhum atho jeng jeh a court jong meija hall hah a umlou, Ukil-pa hinkho jong huhdoh a um ahi. Tohding bolding helou bang’a thil khat asoleh mipi ho hetman louva kikhom pai jiuva Court ang’a kidinsah di ho kisan chance imuleh malchame’a neidi tia akitit khom jing u hi achejom jingleh khatvei vang court a kipolut hoti, Ukil hoti mipi’n ahintha khah thei, chuteng police injong meithal alhalo’a athilo gei hung umtei thei ahi.

                             Phaicham’a hi khosung vengsung hoa jong tolthat leh hunam’a numei suse’a ki-ngoh ho athu sei masatna umlouva mipi’n amoh vohlih jeng ham, a-in ahalpeh u, aphet peh u ham, vengsung’a kon anodoh uham ti thilsoh ho atamval tah jeh a Manipur Assembly injong hitobang’a thilbol ho gotna pehna dia– ‘Manipur Protection from Mob Violence’ kiti dan (Bill) pass anaboldoh ahi. Ahin hiche dan (Bill) hi aphatchomna umlou tobang hidoh nalai ahi. ahinsem doh ahi. Haosa kivaipohna nuoija thinglhangmi holah a vang ahoitah leh aphatah khat chu mi khat nin tolthana leh itobang bolkhel neijongleh hemkham kibol’a pupa custom dungjuiya thutanna leh seilhahna umthei ahi. Phaigam mi ho lah a hitobang custom thu le dan umlou, u-cha pacha kikah a kinahna gei police a kihehtona um ahi. Police leh govt court hi sum nehguh umna ahi tia tahsanna aum-mo cheh cheh jeh a jong mipi hin lungsou husan’a apet petna thutanna aneijia gotna jong apehji hidan’in akilang’e. Koi hileh langnei sihnei beija thudih a thutanna neidi hi thilse le khansetna ho aban umlouna di ahi geldoh di ahijeng’e.