Mipi kilhepna nikho lhung kit hitam

Mipi kilhepna nikho lhung kit hitam

412
0
SHARE

  Sadar Hills thua Public Meeting hung kikou hi ipipen “doina/tupna” ham akihetloulai vang’in aphaat le nikho hi ivetleh khovei election doina hijeng dia mi tamtah ginmo ahi. Athu hi seitahlouhel di tina ahipon hinlah ipi atileh chutihchan hiche thua public meeting anakikou loubeh a tu MLA term kichaidi kontah a hung kikouham ti hi mijouse tobang dohnom hidi ahi. Public Meeting kiti hoa hi mipi tamtah tah akikhopji vang’a alunggel sei hi mi themkhat bou hiji, mipi ho hi lamkai ho thusei ngailha dia bou kikou hijiu ahi. Mipi hojong hin mipi dohna aumpoi tia phunloi aumji jeh a mipi kihouna (public meeting) kikou jong himaithei, akouhon mipi pansatna leh kiselna’a neiya thilboldi atiu jong himaithei ahi. Chuleh Jiribam thu gindoh jeh a Sadar Hills thu jong iti kithipbeh diham ti jong himaitheiyinte. Ahin ahung kiseidi ho ichan ham’a hetsa tobang ahi. Tutua govt vaipo Congress party in Sadar Hills athenso louleh ahunglhung ding MLA Election teng Congress party ‘boycott’ boldi ham, sotloudi ham hung kiti taleh Congress in ahinsei dia ginmo umhi – khatna’a, October sung ahilouleh November lha sung’a kiboldi ahi tia kilhepna (kijoulhep bena) hung umthei ahi. Angaiya Naga hon jahdana ahinnei uva sagu hung kisepdi hi akipet-to ahung umteng “chomkhat gah khongai tadiute” ti hung hikitdi ahi. Nina’a, govt (Congress) in “Election teng Congress Candidate ho hinsondoh kit unlang govt (ministry) akisem kit-kit leh kibol jengdi ahi” ti jong hung kiseidin tahsan aum’e. Hitobang hi kum hitihchan ana umjingsa ahi. October lha sung’a Election Code of Conduct hung kiphondi mijousen anga laitah a hitobang thil kiguong, chuleh Sadar Hills district level Chavang Kut a-jong CM, Dy. CM leh Sadar Hills a Congress MLA/Minister ho sese kikou ahijeh in public meeting hihen Kut kinguon hileh district thensonadi hilouva Election Campaign lamjoh hidia mi tamtah in atahsan ahi.

  Kum 30/40 masang thu kiseida tajongleh Sadar Hills thua 2011 August a pat October chan mipi kiphinna khucheng’a ana umjouva ipi ana um’em ti sehseh ajong hetthei tamtah umdi ahi. October 31, 2011 ni chun Sadar Hills Demand Committee hotoh State govt in district khelin Sub-division 6 leh SDC office 2 Sadar Hills sung’a semdoh din kinoptona ananeitai. Chuban chun govt in Sadar Hills sung’a jat le nam jouse Civil kiloikhomna ho lungeldan dohna (public consultation) aneidi, hiche kichai chaileh athu seichaina (boldohna) umdi ti anahi-e. Public consultation tolhon’in Civil kiloikhomna lamkai hochu abanban’in anakikou un aphatsahdi leh ajahdadi jong hetsa pipi chu ana kidong’e. Lha khat kah a chaithei public consultation chu tugeijin asuh asah umlou akisohdohtan ahi. Tu tua hi ADC 6 lah a Sadar Hills leh Chandel bou hi nahnah a Congress Council ahipet ahijeh in Sadar Hills ADC hin ADC dang bang’a District pilhing ahilouleh kahai diu, party dang kabel diu tijongleu state govt dia gel khat neina khopset hidi ahi. District kithenso jeh a adeilouhon bandh/blockade hinbol jongleu tonsotna chelha dehloudi ahi. Aboldi hon abollou jeh a kibollou hipen, election dikon lebou athu kisugingji ahi hi mipin jong sotna ahet ahitai.