Mipi hilna Meeting ham, Vote holna joh ham

Mipi hilna Meeting ham, Vote holna joh ham

305
0
SHARE

  MLA Election hungnai tolhon’in tumasang’a ana kiha hetbehsehlou ‘political awareness meeting’ kiti hi ahung kihabolpan tan hinlah hiche hi political party khat a dia mipi hilna leh vote holna joh ahi akilang jeng’e. ‘Political awareness meeting’ akitileh mipi hon politics lam’a thu le la ho ahetnadiu leh mipi thaneina ho hetsah di ti ahi. Ahin tua hitobang ‘awareness meeting’ hohi abolbol party in a-party u doi le tup chuleh Candidate ho tahlangna dia kikhopna joh hijidan in akilang’e. Political party hohi mipite dia thuhil leh hetsah a pang diumong ahin atohdiu chu mipi leh gam le nam dia thukhoh (issue) ho dinmun ahilchen diu, hichea kon’a chu mipi hon Vote apieh diu ti ahi. India a hi Democracy kiti mipi thaneina kivaipohna akitivang’a lekha helou leh mipi thaneina ipi ahi helou hatam’a tamjo gam ahijeh-a political party hojong hin amaho phatchomnadi lamtah bouva mipi ho thu le la ho ahiljiuva lekha helou mimol tamjo hi adei dei uva apeijiu ahi. Hijeh a chu Political Awareness Meeting/Campaign akitileh abolbol party hon ahasei masatpen diu chu mipiten Vote thahat’a athalheng diu lamkai leh mipi natongdi akilhen theina diu hidi ahi. Igam uva hi mipi thaneina leh Vote manlutdan (thupina) koiman iya agelkhohlou, gelkhoh henlang hejong leu a vote uleh athaneinau ahidi doltah-a amanchah theilou u jeh uva politics lam’a lima unglutna aneibehlou utobang ti thei ahi. Aching apiljep hon ama mimal phatchomnadi akigel kit uva Election laileh ijat kanehdoh theiyin eima chang phatchomnadi ipi kakiboldoh theidem atiu ahi. Mipi tamjo kit hi mi seiseiya lon, haosa holeh thingnoi thingchung lamkai langho seisei chu adih apha’a agel jeng uva a-vote ujong apieh jeng jiu ahi. Hiche hohi adih in adihpon, hiti khati di joh ahi kitina hojoh hitobang ‘political awareness meeting’ hoa kihaseileh hichu ‘awareness meeting’ dihtah hidi ahi.

  Kho khat veng khat, Constituency khat a mipi hon ama ama dei taobang chetna anop aning’a Vote akilhah diu aphatlouna jong umthou ahi. Jat le nam dang hotoh chengkhom ihi jeh uva ama ama dei dungjui cheh-a Vote piehna aum lejong mi khat le ni vetda jeh ham, ama mimal phatchomnadi gel jeh ham’a jat dang nam dang ho Vote piehdi jong khohsalou tamkitdi ahi. Chuban’a mi dang, jatdang Vote pieh teiteinadi mun hoa jong koiman ama ama dei bang hilouva khosung vengsung le gamsung pumpi di gelna’a khat vote apiehsohkei ujongleh vote kipe hon khunungleh jana leh gelkhohna khat aneiteidi ahi. Ka vote kathu thu kitina leh Vote kihoptelna kho le veng, gam le lhang hoa itobang khantouna natoh um’am ti muthei ahijeng’e. Hijeh a chu Political Awareness Meeting hohi political party ho sang’a party kiti a bena neilou (neutral) Civil kiloikhomna hon habol jo uhenlang, koi party hileh khosung lhang sung khantounadi leh gam le nam dia phachom thei hitobang party leh Candidate ho isot diu tijoleu dih theidi ahi. Party hon mi akhop uva thu le asei uleh amaho party dia Vote ahol ubou hidi ahi.