Minister kikhel di kisei

Minister kikhel di kisei

288
0
SHARE

Minister kikhel di kisei

 (Cabinet reshuffling)

                                  BJP National Secretary Ram Madhav Imphal a ahung lenlut jeng chu N Biren Cabinet sung’ah ipi ham khat vang boina aumtai ti jeh hiteidi ahi. Election jouva BJP in Manipur a lolhinna anei jeh a mipi te kom’a kipa thu seija kahung ahi tia Ram Madhav in asei vang’a ahunglona jehpen aseidoh lou ahidi jong hetsa ahi. N Biren sorkar a Cabinet minister kikhel di ahi kitina hi phat chomkhatpi ahung hitan thulamleng jong ajatjat jong umjing ahijeh in Centre a kon party lamkai khat ahung hi thu le la hotoh ivetkahleh sei ngailouva het thei jong umdi ahi. Tuchung Lok Sabha election lai, result kiphon di kinga petlaija pat result hung kiphon joujouleh N Biren Cabinet ‘reshuffling’ hung umdi, Cabinet paidoh loi, athah lahlut di loi ti hi ana kija jing chu Ukhrul a Cabinet meeting hung kibolto lhon’a chief minister N Biren nin hiche ‘reshuffle’ in kibol di ahi tia thuso miho kom geija ana phondoh ahi. Chuban’a N Biren nin “kei kahia midang ahia atu tu a-at di ahi” ati chu Cabinet reshuffling thua asei hinalai ahijeh in kon ipi atua ipi ahin atdi ham ti chu mitamtah in anga tho ahitai. NPP ho Cabinet post abon’a lahpeh diham, khat le ni bou lahdoh diham, NPF ho ijat kipehbe diham, BJP ho koikoi kikah a koikoi kilalut diham ti hohi ahi. Union Cabinet a jong ana hisa ho phabep kiladoh a athah kipansah jong tam thou ahijeh in State (Manipur) a jong hitobang kibolmo ahipoi ti jong N Biren nin asei hinalai ahi. Tua BJP lamkai Delhi a kon hungpa hin mi alhenchaija adalhah maithei hi ginmo um chu hikit jeng ahi. Congress ho pohlaija jong Cabinet reshuffling umdi teng Centre lang’a party lamkai ho kiselna’a kineija Cabinet kikahlha loi, kilalut loi ana umjing mong ahijeh in tua BJP govt bolgotdan jong hi ichuomcha hidehlou di tina ahi.

            Cabinet sung’ah boina aum’e ti photchenna khat kit jong chu ahileh Minister Karam Shyam in govt umsa khat suhlhuh di kiti hi khantou machalna suboi bep ahi ati chu ahi. Hichu, chief minister N Biren kheldoh di goloi aum’e tina ahiban’a Cabinet minister loi khat kheldohdi kigot aseina hijeng kit ahi. Hitobang thu umjeh a Manipur State NPP President jong Shillong lang’a party luboh hoto kihou dia an ache kit ahi. NPP ho abon uva akinot thap ujongleh Centre a BJP leh NPP kikah a boina khat umdoh thei kit ahi. Tua hi NPP hojong Congress ho toh govt anasemkhom lou u kisihta maithei u ahi. Meghalaya a NPP leh Congress ui le kel abah jeh a Manipur a kigomkhom theilou diu tina jong ana hidehlou ahi. NPF jong Centre a NDA partner khat ahivang’a Nagaland a pangkhom kit deh lhonlou ahi. Tua hi Congress sung’a jong boina um ahijeh in BJP ho suhtup ahilou uva aki kehkhen pai uleh alang lang’a hon Congress sung’a alunglhailou ho ‘support’ bolna a govt semthei ham ti “kihutohna” jong ahinnei thei u ahi. Ipi hileh Centre a kon party luboh hon aseilhah dung jui uva hung chedi ahijeh in itobang boina umjongleh President’s Rule (PR) lom vang hung umponte.