Mijousen corona toh hinkhomdi ti hita (Hindan vang kikhel ngai ahi)

Mijousen corona toh hinkhomdi ti hita (Hindan vang kikhel ngai ahi)

365
0
SHARE

Mijousen corona toh hinkhomdi ti hita
(Hindan vang kikhel ngai ahi)

Mutheilou melma a kon kivenje ahah jeh a hitobang melma kom’a nahung kon phat phatleh kimaito jeng hite tidan’a vannoi mipi te umna sot ahitai. Lockdown kilahdoh (Unlock) vanga corona natna hi akichailang ahitai tina hidehlou ahi. Chuche malah India pumpi a dia natna vei hi niseh a hakal be cheh jing nalai, Manipur a jong niseh a natna beibe jakhat chunglam hijing nalai ahi. Tugeija Manipur a covid a thi hohi dammona dang neisa hobouva jong kihe nalai ahi. Adamdoh jat atam jing kit jeh a kinepna khat um ahi. Covid positive ahi tia Covid Care Centre (CCC) a umho jong kihollel leh kichat tijat malah aumnao inmai dunga vahle metmut, kipel metmut uva totna dan’a gel loi aumdan jong social media a video kithejal hoa kon muthei ahi. Nuina’a aneilou kah uleh neh le don aphatchan eikipepouve tia kitom loijong umkit jiu ahijong mijouse het ahi. Hitobang dinmun’a hi Manipur govt ninjong Centre thupeh chakhat juidi tihihleh kumlhung’a lockdown koidi ati maithei ahi. Mi asang aja aja a umna India khopi hoa bon angaija hinkho chegamta’a Manipur a lockdown lhakang louva achuti chejom dijong hitheilou ahi. India a Unlock-4 channa ahung umjouva hi akikhahnalai phabep umjongleh hinkho le natoh ho, chele vale ho angaija umkit ahitan hiche ban’a thil jouse akikha chah kheh teitei lejong natna sanga boina dang khohjo jo umdi ahijeh a alouthei louva hung kiban hondan ahitai. Ahin Cenema hall, Swimming pool, Gym, School le College ho hi mi tamtah tah phat chomkhat beh umkhomna ahijeh a kihong dehloulai ahi. Hiche jeh a Christian ho houin kaikhomna ho jong umthei dehloulai di tina ahi.

September 21 a pat kichenna le thi opna kin hoa mi jakhat lang kikhom theita di kiti hi Centre govt sei (guideline) ahin hiche lam hi koiman akon ajang’a ajuideh lousa ahi.  State khat le State khat kikah leh district ho kikah a bus lhai ho akikhalou vanga Private bus holeh mipo gari dangdang ho angaija lhaipan loulai hi gari nei hon mi lhom chacha pohdi thaoman kalto ahileh kimang behset khante atijeh u hidi ahi. Mi lhomjep jepma touva bahara jong tamsah jep di vang hi natna a kon kivenna phatah jong hidi, munkhatna che ho dia jong gangtah a ajotna mun lhunna hidi ahi. State govt noija um Inter-district Bus ho alhaipan jong aumtan hinlah Private bus ho alhai louleh gari neilou mipi atamjo ahijeh a angaija kiman chahna leh chele valena kiti umdoh dehlou di ahi. Juidia kisei ho phatah a juina aumpouleh private passenger gari hojong angaija lhai pat kit thei ahijeh in bus ho chunga ateh atom’a kihetlutna ho malah kinai chacha a toukhom, dinkhom ho bollou di (social distance), mask kibu di, Sanitizer kinu di tiho hi sotna pat mijousen anachepileh natna jong hibang lom’a kithejal loudi ahi. Lockdown kilhakang jeh tahtah a hi jui dia kisei ho jui tei ngai mong mong ahitai. KIgahna kilhakang hi mipin amankhelleh mipi mama hahsatna hung hidi ahi. Tujeng’a jong ana adammo, akisukha, naoneidi emergency a hospital kipolut ho covid test kibol masat loujeh a hahsatna toh dim ahi. Vaccine kisemdoh kah a gamdang mi honjong corona to hinkhomdi tilou lampi aumtapoi ati saosao ahitah jeh in eihon jong ibol u ngai ahitai.