Mihem hinkho huhdoh ding hi athupi pen ahi, tia CM Biren in...

Mihem hinkho huhdoh ding hi athupi pen ahi, tia CM Biren in sei; ‘Janata Curfew’ tosot dinga temna nei

237
0
SHARE

Mihem hinkho huhdoh ding hi athupi pen ahi, tia CM Biren in sei; ‘Janata Curfew’ tosot dinga temna nei

Imphal, March 20(ET): Chief Minister N Biren Singh in tu dinmun a sorkar in akhohsah pen hi gamsung miho hinkho huhdoh ding hi ahi’in, adang dang hi ol a gel thei ahi, tin Chief Minister’s Secretariat a press conference abolna a aseiyin ahi.

COVID-19 hi Manipur gam ahung lhungpoi, tia ima louva gel ding ahipon, World Health Organisation (WHO) le sorkar in dan asem ho mipin phatah a ajui joh ding ahi, tin aseiyin chule natna kijen sanga kivenna neiding hi aphapen ahi, ati. Nat douna dinga mipin tosotna lhingset apeh dinga temna aneiyin chule neh le chah, thao chule lou le ai ho alhahsam louna dinga pan lahthei jouse kila ahi, ati. Gamsung mihon jong kikoi khol ding hilouva angaiya banga thil achoh diuvin temna jong aneiyin ahi.

State sorkar in achesa January nisim 18 a kon kivenna dinga pan alah pan ahitai, tin aseiyin chule gamsung mihon atosot nau jeh a kipathu aseiyin ahi. Prime Minister in kivenna dinga thuphon anei gamsung mihon ajui cheh diuvin temna aneibe in ahi. Ahung lhung ding kal 2-3 sung hi eiho jouse dinga khoh/thupi ahi, ati.

Mipi kikhopna lah a pan louding, inmun a ahithei chan a umding, tehse, upa chule kum 65 chunglang ho ahung lhung ding kal phabep sunga in a aumtup uva, in adalhah lou diuvin temna aneibe in ahi. India pumpi a umding ‘Janata Curfew’ tosot a jui dinga aseiyin, Prime Minister Narendra Modi in March nisim 22 jingkah nidan 7:00 a kon jan nidan 9:00 chan ‘Janata Curfew’ bol dinga aphondoh ahi.

Hiche phat sunga inmun dalhah louding, lamlen, vengsung a moh va louding a CM in aseiyin chule hiche nikho nilhah nidan 5 teng doctor le nurse chule adang dang ho chunga kipana vetsahna a, amaho dinga khut beh a ao dinga jong asei ahi. Curfew hi sepai thahat a kibol hilou ding ‘self-curfew’ hiding ahi, ati.

Department of Personnel and Training (DoPT), India government thupeh dungjuiya state sorkar in natohna mun ateh/anoh ho avet tup ding ahi, tin CM in aseiyin chule department a natong hop 50 bou office ni kihal a ache nading uva (financial transaction a natong ho tilou) order Chief Minister’s Secretariat in aso ding ahi, ati. HOD hon office a umding natong ho roster asem dinga thuhilna aneibe in ahi.

Angaicha louva hou thu a kikhopna le kin gon ho, Cheiraoba (Meilhei New Year) ni a CheiraoChing a mipi mol akal na ho bol loudinga Biren in temna aneiyin, chule natna kiseina gam a che ho inmun a amaho le amaho ‘quarantine’ akibol diuvin thuhilna aneiyin ahi. State sorkar in Philippines a tang den simlai ho nungpui nadinga pan alah thu CM in aseiyin, Ministry of External Affairs, India government henga athu kiseiya, pan alah diuva temna kinei ahi, ati. Chule simlai ho insung miten simlai ho thuchen ho apeh diuva jong kisei ahi, ati.

Principal Secretary (Health and Family Welfare) V Vumlunmang, Secretary to Chief Minister Ningthoujam Geoffrey, Media Advisor to Chief Minister Irengbam Arun le adang dang jong press conference a apang uvin ahi.

 

COVID-19 kivenna a Ema Market March 25 chan kikhah ding

Imphal, March 20(ET): Ema Market tia kihe Imphal tolpi sung a numei kailhang chu Covid-19 jeh in March 21 apat 25 chan kha hiding ahi thu thulhut chun asei in ahi. Governor Dr. Najma Heptullah in thuso abol bang in Imphal khopi sung a um Ema Market athum a chule akoilah a kailhang dang ho jong kha hiding in thuphon abol in ahi. Thulhut in aseina achun Corona natna leiset pumpi chung a akithe thangsoh toh lhon in India gamsung ajong avei mi akhang cheh cheh in vangphat umtah in Northeast gamsung ahung lut naipon hinlah kiven theichan a kiven ding ahi in  Ministry of Health, Government of India chule Department of Health and Family Welfare, Government of Manipur in jong kiven ding thuso abol toh lhon a Ema kailhang hi kha ding a thuphon kibol ahi ati.

Manipur Administration, Housing and Urban Development (MAHUD) department in jong District gup sung a Ima Market umho jong ni nga sung March 21 apat 25 chan kha ding in thupeh anei tauvin ahi. Tupet a apoimo pen chu economy lampang ahi pon damtheina ahi in hiche natna veilou tei nading a govt. in pan nasatah a kila ding ahi in mipi hon jong jui cheh ding a kigot ding ahi in damna akinei poule economy lampang semhoi kithei ahi tin CM pa’n asei in ahi. CM pan aseibena achun Manipur gamsung ahung lhun lou vang a ngainep thei ahipon World Health Organisation (WHO) hon kiven ding dan asodoh hou hi mipi hon jui cheh a hiche nat hi veilou tei ding ngaito ding ahi ati.

Aseibe na a PM Modi in March 22 nikho ‘Janata Curfew’ ding a aphon doh toh lhon a mipi hon jong jui cheh ding asei in hiche nikho teng security personnel thahatna akibol ding ahipon sie le pha hetna a kingam ding ahi ati. Chief Secretary Dr. J Suresh Babu in jong state govt. natong ho jui ding in thuso abol in March 31 chan chu group B, C leh D 50% hon office akai uva adang sen inmun akon atoh ding in asei in chule office kai phat jong kilhah tho ding in asei in hiche dan kipe hi Administrative secretaries(AS), Deputy commissioners(DC) chule heads of departments (HOD) hon phatecha a avetsui ding un thupeh anei in ahi.

Ccpur dist sung’a mejohna kailhang phat chomkhat kikhah di

Imphal, March 20 (ET) : Government in COVID-19 (CoronaVirus) akon kivenbit nading’a leh japi tahsa damthei nading’a thupeh ahin nei dungjui in ahung lhung ding March nisim 21 akon 25 nikho 5 sung’a hi Churachandpur District sung’a mejoh na kailhang tichu temporary Vendors/Market ho jouse kha ding’a thupeh ahi toh lhon’a koiman thupeh ahung kinei kit kah’a ahon lou ding uvin Deputy Commissioner, Churachandpur Pawan Yadav in hetsah na anei in ahi.

 

Congress in Assembly a member 28 anei nahlai ahi, tia Ibobi in sei

Imphal, March 20(ET): Forest Minister Th Shyamkumar in Speakers’ Tribunal in MLA kahina kon disqualify’ eibol naipoi, tia hangsan tah a aseiyin chule Rajya Sabha Election a dinga Manipur Legislative Assembly a vote peh nading tha kanei ahi, tia asei vanga Congress party in Supreme Court thutanna Manipur Legislative Assembly in ajuiya, Assembly sunga alutding aphal peh louding atahsanna thu asei uvin ahi.

Rajya Sabha election a Th Shyamkumar in vote pe thei le party in itobang pan alah ding ham tia thudoh aneiyu chun Opposition lamkai Ibobi in, tua sorkar ahilouleh Manipur Legislative Assembly Speaker in Supreme Court thutanna apalkeh ding katahsan poi, tin adonbut in ahi.

Alangkhat a Ibobi in state Assembly a Congress hi 28 hi nalai ahi, tin aseiyin ahi. Congress a kon jamdoh a MLA 7 ho status thu adoh nauva Ibobi in amaho hi Congress a kon kinodoh (expelled) loulai ahi, tin aseiyin ahi.

Ibobi in aseibena ah Congress MLA BJP jop adang ho jong Congress ahi nahlai utoh lhon a tu naicha a state assembly session a hetdoh na nei thei ahi ati. Hitabang a party khel ho hi nidan 24 sung a kah lhah a a hinkho a MLA tet thei kitlou ding a koi ngai ahi ati.

Manipur Forest and Environment Minister Th Shyamkumar chung a Supremce Court thutanna chung’a Speaker in gangtah a minister pa kahlhah na anei ding in jong Congress in ngehna anei uvin ahi.

Shyamkumar hin achesa 2017 kum a Congress candidate hina a MLA kaidoh na ana nei ahin hinlah akaidoh jou a BJP ana jop a minister panmun analo toh lhon a athu ana kitan ahin,  Manipur speaker in tu chan in kah lhah na ding phondoh na anei lou lai ahi.

Supreme court in achesa January nisim 21 akon a MLA 13 kah lhah na ding plea an akinei na chung a Manipur assembly speaker hetsah na ana nei utoh lhon a  kal li sung a speaker in adinmun ahin hilchet ding a phat ana peh ahi.

Sorkar in jihtho a kitepna anei toh kilhon a Chassad thilsoh toh kisaiya KSO in gamsung pumpi a bandh akou ladoh ta

Imphal, March 20(ET): Kamjong district noi Chassad kho meiya hal a pang ho mat a chule gotna peh dinga thumna um sorkar in bulhit dinga jihtho a kitepna anei toh kilhon a Kuki Students’ Organisation GHQ in Friday jan kim a kon gamsung pumpi a bandh bol dinga tohgon anei aladoh tan ahi.

Health Minister Jayantakumar le Water Resource Minister Letpao Haokip in KSO GHQ thalheng ho toh akihouna a jihtho a kitepna apeh ahi. KSO thulhut in asei dungjuiya, thukholna dinga phat kipe ni 10 akichaiya, report apeh lut teng ule sorkar in themmona neiho chunga action lah dinga kitepna anei ahi.

Chule Chassad khosung thahsem kit a khosung miho ‘rehabilitation’ peh dinga jong sorkar in kitepna anei ahi’in, hiche tilouva high school hi kal thum sunga akihon doh nadinga jong tohgon sem dinga kitepna aneiyu ahi. State sorkar in kitepna anei banga chamna sem nadinga security lhingset chule medical facility ho peh dinga jong sorkar kitem ahi.

State sorkar in Chassad khosung thah tundoh kit dinga dettah a pan alahna ho chule temna anei ho jeh a KSO in bandh lahdoh dinga thulhuhna anei ahi.

 

AMCO in COVID-19 kivenna a Houin kikhop phat chokhat ngah dia  ngehna nei

Imphal, March 20 (ET): All Manipur Christian Organisation (AMCO) in tunin Seventh Day Adventists (SDA) office, Chingmeirong, Imphal mun’a Special General Boddy meeting ananei nao in tulai tha’a kisei minthang natna COVID-19 chung thu leh Hon’ble Prime Minister of India Shri Narendra Modi in hiche natna’a kon kivendoh thei nading’a Janata Curfew akoi nachung thu’a kihoukhom na ananei uvin ahi. Hiche COVID-19 natna jeh’a vannoi leh kiging jing’a aum lai tah ahi jeh in member ho jouse in taona natoh tho’a kihoukhom na anei utoh lhon in Government in japi kiven nading’a thupeh ahin neiho jui cheh ding in phatsah na ananei uvin ahi.

Hiche toh lhon’a Manipur gamsung’a nam chom chom ho jouse akon Pastor leh Church lamkai hon ahung lhung ding March nisim 31,2020 nikho chan’a Hou inn kai naho jouse akha tah ding uvin AMCO in ngehna anei in ahi. Chuleh Manipur gamsung’a cheng Christian chate jouse in inmun cheh’a Pathen thangvah na anei uva japi kikhopkhom tiho phat chomkhat ading’a bol lou ding in jong asei in ahi.

Governor in ‘Janata Curfew’ juicheh dinga temna nei

Imphal, Mar 20(ET): Manipur Governor Dr Najma Heptulla in vannoi muntin a chule India gamsunga jong coronavirus natna akisei agelkhohna thu aseiyin ahi.

Prime Minister Narendra Modi in March nisim 22 jingkah nidan 7 a kon jan nidan 9 sung India pumpi a ‘Janata (Public) Curfew’ bol dinga phondohna anei akipapina thu aseiyin chule gamsung mihon ‘Janata Curfew’ hi ajui uva, pandemic douna dinga pan lahkhom vetsahna a insunga aum thim diuvin avel a aseikit in ahi.

Natna jeh a mi tamtah adammo a chule tamtah athi Governor in apohnatna le vangset um asahna thu aseiyin ahi. State government department hon asem guidelines ho jui ding bou hilouva mipi ahithei chan a inmun a aum tup diuvin Governor in gamsung mi jouse henga temna aneibe in ahi.

ADC election Oct/Nov leh kibol ding

Imphal, March 20 (ET): Achesa March nisim 3 nikho’a State Cabinet in Section 13 (1) of the Manipur (Hill Areas) District Councils, Act 1971 noi’a thulhuh na ananei utoh lhon’a Members of the Autonomous District Councils, Manipur term lha 6 suhsao be ding in Additional Chief Secy. (TA & HILLS), Government of Manipur in thupeh anei tan ahi. Hiche toh lhon’a Autonomous District Councils, Manipur election hi ahung lhung ding Oct. leh Nov. 2020 lha sung’a kibol ding ahi tinjong aseiyin ahi.

CBI hon Fake Encounter case a police li heng a ngohna bolkhum

Imphal, Mar 20: Thulhut khat in aseina achun 2009 kum a Akoijam Priyobrata thina chungthu ah tuni chun Central Bureau of Investigation in Manipur police li chung ah ngohna abolkhum tan ahi. CBI hon charge sheet chu Chief Judicial Magistrate, Imphal West masang a abol uh ahi in 2017 kum a Supreme Court in fake encounter case 41 CBI khut a apehlhah lah a charge sheet kibol khum a li channa ahi. Chule hiche ngohna kibolkhum hi Forensic ho ngaidan kilakhom, Thilsoh namun a kholchilna kibol, Central Forensic Science Laboratory leh post-mortem report dungjui a ana bolkhum uh ahi.

Ngohna kibol khum police ho chu Irengbam Khaba, assistant commandant 5th IRB; Pebam Sanyaima, head constable; Soibam Premjit, head constable; Yengkhom Ibomcha chule Moirangthem Goberdhon ahi in ama hi kholchilna kibol laiyin ana muollem tan ahi. Thilsoh chu Second Sangai Home, Langol a soh  ahi. Charge sheet a kisei dan achun General Staff Officer-3 (intelligence) Headquarter, 9 Sector Assam Rifles, PIN-934829, Cl 99 APO vide letter No GS(WP)/NHRC/19/770 dated 24/06/2019, letter No.GS (WP)/NHRC/20/1244 dated 03/03/2020 and letter No. GS (WP)/NHRC/20/1243 dated 03/03/2020 in ahetsah na achun thilsoh peta Imphal west Police Commando a SI a pang Goberdhon heng ah imnacha thu ana lut pon chule Iroisemba ajong a unit uva kon koima duty aumlou thu asei in hinlah Goberdhon in 16 AR ho akon thuso akilahson thei chu ginmo umnatah khat aum thu asei in ahi.

Kholchilna dungjui in Akoijam Priyobrata Singh longdamsa chu RIMS morgue a aum pet in SDPO Pushpanjali in SP, CID(SB) heng a lim lahding leh finger print ho lahthei nading a noppehna athum toh lhon in SP, CID (SB) akon police personnel hon lim akap uvin chule Director Finger Print Manipur akon Police personnel hon finger print jong agala uvin ahi. Hetthei khat chu Priyobarta thina chung ah natohphat jeh a kipaman Moirangthem Goberdhon Singh leh Pebam Sanyaima teni in ana kisan lhon ahi.

Tangkhul le NSCN-IM hon Chassad kho meiya ahal kiloikhomna chom chom in demna nei; themmona neiho apet pet a mat dinga thumna neiyu

Imphal, Mar 20(ET): Achesa March nisim 16 nikho a Tangkhul mi phalou ho lamkaina a Kamjong district noi Chahsat kho a Kuki in 200 nailam akihal na thilsoh kiloikhomna chom chom in demna sangtah anei uvin, thilsoh vendoh nadinga pan la louva Manipur Police le 42nd AR official ho athu khol ding, suspend bol ding chule themmona neiho mat dinga thumna anei uvin ahi.

Thilsoh jouva KNA, KGBA, KSO, KHRF, KWA le KNT kiti Kuki civil society organization hon KNA office Manja, Diphu kom a March nisim 20 nikhon ‘emergency’ meeting abol uvin, Tongthang Touthang, President, KNA lamkaina a meeting abol nauva kilolna phabep anei uvin ahi. Social media a viral che a video phabep a kimu dungjuiya Tangkhul hon March nisim 16 nikho a State Police le Assam Rifles ho umna a Chassad kho meiya ahal u ahi, tin meeting a asei uvin chule amun a posting hi a AR le Manipur police ho demna sangtah anei uvin, Home Minister in thilse aso ding ting louva chelhah sah a security force ho chunga action alah dinga ngehna anei uvin ahi.

State sorkar in meihal a pang ho aganna thei pen a dan dungjuiya amat nading uva ngehna nei dinga kilolna anei uvin chule vangsetna toh hon angaichat chan a state sorkar in compensation alhing a apeh dinga jong temna anei uvin ahi.

Union Home Minister a dinga Deputy Commissioner, Diphu henga memorandum pehlut dinga kilolna anei uvin, Minister pa in athu phatah a kholtoh a hetthem nading chule chamna sem kit nadinga amun avil dinga ngehna anei uvin ahi.

Vangsetna toh ho kithopina neiding, chule Relief Committee a KNT (Kuki Nampi Taona), Karbi Anglong unit mopohna peh dinga kilolna aneibe uvin ahi.

Zomi Human Rights Foundation, GHQ in thuso aneina a khangtou loutah a hitobang chonna umho kisang louding ahi, tin asei uvin, chule tukhang a boina hohi kihoukhomna kineiya kiseilha ahi, ati. Zomang, Secretary, Information & Publicity Department in thuso aneina a Chassad lhang a um sepai hon thilsoh vendoh nadinga pan alah loujeh uvin demna sangtah anei uvin ahi.

Vangsetna toh ho compensation peh ding chule mopohna nei hon aganna thei pen a dinmun asemphat kit diuvin temna aneibe uvin ahi.

Kuki Inpi Meghalaya le Kuki Students Organisation, Shillong Branch injong in 150 val umna Chassad kho meiya akihal a, thil le lo Kamjong le Samsui Tangkhul hon achom nau thilsoh demna sangtah anei uvin ahi. Chassad kho pumpi meiya kihal gam soh a, khosung miho houin a kinga uva, numei, chapang le tehse hon gentheina sangtah ato ahi’in, neh le chah, don ding twi, sil le chen chule angaicha tamtah lhasam u ahi.

Ngaihoichong Kipgen, Vice President, KSO Shillong Branch leh Angam Kuki, Kuki Inpi Meghalaya in soi akaina thuso a chun centre le state sorkar in chenna ding mun neilouva um khosung miho apet pet a ‘rehabilitation’ apeh diuvin thumna anei uvin ahi. Khosung a hitobang thilsoh alhun kit louna dinga security det le alhinga apeh diu chule 42nd Assam Rifles Commanding Officer pa in aumna mun a kon metre phabep a bou gamlha Chassad khosunga khansetna thilsoh sangtah vendoh nadinga pan alah loujeh a achungthu khol a action lah dinga jong thumna anei uvin ahi.

Tangkhul le NSCN-IM hon khosung meiya ahal uva hi ipijeh a sepai holeh AR ho thipbeh a um ham, chule Kamjong District a Superintendent of Police leh Deputy Commission in mei kihal le boina kisem vendoh nadinga pan alah louham? District Administration in hitobang thilsoh iti alhun sah thei ham, tin asei uvin ahi.

Medical Team expert chule lou le alhinga khosunga asol diu, vangsetna sangtah toh a khosung miho lungthim natna kithopi dinga Counsellor ho sol ding ahi, tin thuso chun aseibe in ahi.

Kuki Students Organisation, Guwahati in jong Tangkhul mipi ho khansetna thilsoh demna sangtah anei uvin, state le district administration in thilsoh thipbeh a avet alungkhampi nau thu asei uvin ahi. Tangkhul hohin District le State administration toh kihoutohna aneiya abol uham, tin thudoh anei uvin chule lhanga um Manipur Police le Assam Rifles hon thil umchan amoh vet jeh uva demna sangtah jong anei uvin ahi.

Themmona nei, video chom chom a pan alah kihe ho apet pet a amat diu, khosung miho thil le lo aman jeh bou hilouva alungthim leh atahsa nasatah a asuhgim jeh uva compensation le rehabilitation apeh diu, lhanga posting hi a Administration, Police le sepai hon duty abol loujeh a gotna peh dinga thumna anei uvin ahi.

Themjilna aboi louna dinga meiya kihal lha school asah phat diu, thilsoh CBI hon akhol dinga sorkar in thupeh aneiding a jong KSO, Guwahati in thumna aneiyin chule khosung miho apohnat hu uvin ahi.

KSO, Bangalore injong NSCN-IM in atosot Tangkhul ho khansetna demna sangtah anei uvin, in 150 vel chule khosung pastor pa gari panna a gari 10 meiya akihal a, phailei acre 30 meiya akihal vam hi imadang ahipon, mi meisan, mi lungneo natoh, nam ni kikah a boina sem doh thei ahi, ati. Achesa 1990 khanga Tangkhul lamkaina NSCN-IM hon Kuki themmona neilou aja a sim atha nau thilsoh akoudoh kit ahi, tin aseiyun chule Manipur Police leh 42nd Assam Rifles hon pan alah loujeh uva demna sangtah jong anei uvin ahi.

KSO, Bangalore injong themmona neiho akimat nading, khosung miho compensation peh a, kho tun doh kit ding, Kamjong district a thilse bol a pang NSCN-IM ho chamlhatna neitah a lhatsah louding chule duty bol louva Police Office-in-Chare leh personnel ho suspend bol dinga thumna anei uvin ahi.

March 16 nikho a Chassad khosung kihal thu ah Tripura gamsung a um Ranglong, Bongcher, Darlong, Molsom, Hrangkhawl, Sakachep leh Kaipeng nam hon jong demna sangtah in anei uvin ahi. Hiche tobang a lungsetna beihel a in kihal peh kiti hi mihem khat chondan ding jong ahipon hiche tobang hi society sung a umding a jong kideilou ahi ati. A gam government in achungthu akinthei pen a angaito a inhal a pang ho amatdoh uva akitopi gotna apeh ding uvin jong asei in chule Chassad kho mipi ho lungthoi louva hangsan tah a pan lajing a kitho thei chan a amau hon jong kithopi na ahin peh ding uh ahithu jong asei in ahi.

Alangkhat ah Chorei Students’ Association (Assam, Tripura and Mizoram) hon jong thilsoh chung ah demna sangtah anei uvin 21st century a hiche tobang aum nahlai adatmo thu aphong uvin chule mona neiho agam govt. in gangtah a amatdoh uva akitopi gotna apeh tei ding un jong asei in ahi.

BJP Vice president Benjamin Mate in Chassad School kihallha thahsah na ding’a langva bundle 10 pehdia kitepna nei; Kuki Politician dang dang hon jong Chassad vilna ananei

Mangneo Touthang

Imphal, Mar 20(ET): BJP Manipur Vice president leh 17th Lok Sabha BJP Outer Manipur Candidate H. S Benjamin Mate lamkainan tunin Manipur BJP lamkaihon Chassad khomite vilna ana nei uin ahi.

Chassad kho gavil BJP lamkai hon Chassad mipiho kithopinan Angchang, thao chule sum le pai ajokham kham u anape uvin, Mipiho genthei le hahsat danho kihoulimpina le thilshoh chung chang’a apohnatnao phondoh naleh aganthei lam’a inhal ho Govt. in amatdoh a dandungjuja gotna apeh ding uvin jong anaphongdoh un chuleh demna lentah jong ana ananei uvin ahi.

H.S Benjamin Mate in 24th Assam Rifle CO pa jong akimupin, Chassad kho kihal nia Chassad khosung’a um 42 AR hon khosung halho imacha lolouva anoptah uva kho le veng ahallhah sah u nasatah’a alunglhai louna thu jong anaphondoh in chule hiche 42 AR officers ho dan dungjuija gotna achan nading a State le Central Government kom a report khoutah a kipe ding ahi tin jong anaseiyin ahi.

Chule government akon gangtah a compensation amu uva inn le lou gangtah a akithah tundoh thei nading uva Police IO pan gangtah a report Government kom a apehlut ding in jong thupeh ana neiyin ahi. Chassad khosung’a simlai chapang ho school akihal lhah toh lhon a school kailou a aum u pohnat najal in leh school gangtah a thah tundoh nadinga langva bundle 10 agangthei lampen’a ama pocket a kon kithopina apeh ding in jong phongdohna aneiyin ahi.

Chassad vil’a kalsong BJP lamkaihon jingleh Manipur Chief Minister akimupi uva Chassad mipiho gentheina le tule tua Government in kithopina apeh ding’u avat ho gangtah a mipin amutheina ding a kihoulimna aneipi diu dan jong anaseiuvin ahi. Benjamin Mate chu atohkhompi Shri M Ashnikumar Singh Vice President, Shri Z Khikonbou Newmai Vice President & Ex-MLA , Shri Salam Joy Singh Vice-President & Ex-MLA, Shri P Premananda Meitei Secretary Organisation, Shri M Prafulo Singh Secretary, Shri Paotinlun Congloi Vice President ST Morcha leh Shri Phoni Meitei Imphal West District President hon ana lhonpi uvin ahi.

Chassad khomite chu ADGP Kailun Lupheng in aumpi jing ahin, maban ajong Kuki CSOs holeh MLA Minister, MDC hon jong Chassad khomun hi agavil  uva nam mite genthei hahsatna hohi amittah uva gamu dia kigotna nei jong tampi aum nalai uvin ahi.

Jani nikho jong chun Yamthong Haokip Hon’ble MLA Saikul A/C leh a team hon jong Chassad vil in anakalsong uvin relief materials phabep jong ana pouvin ahi.

Achesa March 17 nikho jong chun TN Haokip, Hon’ble MLA Saikot, Khaipao Haokip, Hon’ble MDC, Lunkhohen Haokip, Hon’ble MDC, DP Haokip Redt. Commissioner Income Taxes Govt. of India hon jong Kuki Inpi lamkai hotoh Chassad ana vilkhom uvin kithopina jong anapeuvin ahi.