Mi lolhing jousen atup mudehlou (PM anatuplel vanga President a thi)

Mi lolhing jousen atup mudehlou (PM anatuplel vanga President a thi)

235
0
SHARE

Mi lolhing jousen atup mudehlou
(PM anatuplel vanga President a thi)

India a politician abolthei jep holeh Union cabinet minister hung mingthang jep jousen ahintup jiu chu Prime Minister leh President office khatvei beh lodi ti ahijeh in Ex Indian president Pranab Mukherjee jong atup khat molsoa ahinkho bei khat tidi ahi. Ahin President sanga anatup masat Prime Minister (PM) vang chu ana hijou dehlou ahi. Calcutta a College lecturer khat anahi chu politics a analutna Raja Sabha MP hung himasa’a Union Cabinet minister jong abanban’a hung hi anahi. Chomkhat Cabinet lah a ahungbolthei thimjouva Indira Gandhi kaplih jong ahung hia chu PM post hi achilvaleuva ahinvetpan khahleh Rajiv Gandhi toh hung kitohmopan anahi. Hiche jeh a Mukherjee hin Congress anadalhah a  political party thah khat phudi anatileh asuh asah beija anakichaidoh a achaina’a 1989 kum’a Congress mama a anakile kit ahi. Hiche kalse chu Centre a Cabinet boltheipen anahiji vanga PM office chu avel’a anavetlel tahlou ahi. Indira Gandhi khanga Finance minister anahisa ahin UPA govt phat sunga Defence minister jong anapoh ahi. Injole PM office hinvelel kha kit khante anatiu ham, ahilouleh oljepna din President nahisah naovinge anatiuham Congress hon 2012 kum’a chu India a office sangpen President office chu analosah u ahi. Indian President hi Centre a Ruling party khat nin adeisei atun, atousah hijongleh a term kichai kah a party dang khat Centre poa ahung panjongleh amoh kheldoh theilou ahi. President office kiti hi Governor post banga centre a govt kikhel dungjuija moh khel khel theilou ahi. 2014 a BJP/NDA centre a ahung hatdoh vanga Pranab Mukherjee chu a term kichai geija jana le ngailut tah a anabol u ahi. President ahai jou kum 3 jouva kum tamlang (kum 84) hijongleh chutitah a kongkonleu lom hidehlou chu tuchung Covid 19 positive hung hia hapta 3 lang akijen jouva damdoh louva ahinkho bei ahi.

Alang khatna North East Tribal mi India politics a India pumpia ana minthang tah Meghalaya a kon Purno A. Sangma chu Prime minister sanga direct India President hidi anatupna lam’a achaina langa suhnadi helouva State politics a ana kilea ahinkho jong tehseman behlou (kum 75 vel) a anabei ahi. P.A. Sangma chu miching ahijeh a PM lomlom vang kol le vai lah a kihijou dehponte ti anahet jong hidi ahi. India President hi Election khatna kon kilhendoh ahivanga centre a Ruling party ho sot le tuntun bou hijeng ahi. Pranab Mukherjee chun PM anatup vanga hijoulou President analhung jou kit, P.A. Sangma jong politics a mi lolhing tah khat ana hivanga atup ana lhungjou dehlou ahi. Congress ah det tah in anapang jingle achainaleh North East Tribal pumpi vetna’a President jong ana peh ujong kihelou ahi. India President kiti hi a term kichai teng politics a aban boltalou di, kicholdo mong mong tadi tehse lang ngen bou jong ahi. India kol le vai lah a State politics hoa ivetleh kum 80 chunglam hojong politics a ‘active’ tah loi tam ahi. India te hi Politics a ateh thi tokah a koiman kacholtai, nga tang’e ti umbehlou ahi.  Japan te PM Shinje Abe invang khatveini vel’a chu kadammo jeh PM hi lha jeng inge atitan, ahin India a Tamil Nadu CM Jayalalitha chun damo’a hospital’a soi akaithei geija akai, athijeng geija CM lha tang’e anatilou ahi.