Melhetlou hon Hengjang haosapu le atupa kaplih; Kiloikhomna phabep in demna aneitoh...

Melhetlou hon Hengjang haosapu le atupa kaplih; Kiloikhomna phabep in demna aneitoh lhon a nidan 24 sung a thilse bolho govt. in amatdoh ding’a ngehna neiyu

231
0
SHARE

Melhetlou hon Hengjang haosapu le atupa kaplih; Kiloikhomna phabep in demna aneitoh lhon a nidan 24 sung a thilse bolho govt. in amatdoh ding’a ngehna neiyu

Imphal, July 10(ET): Tuni jingkah nidan 11 vel chun Hengjang haosapu Thangneo Kipgen touna Gypsy chu melhetlou thalchoi hon ana lamtin uva abulu nauvin Thangneo Kipgen (58) S/o (L) Letkhai Kigpen le atupa Thangminlun Haokip (26) S/o Thenthang Haokip in amun in thina atoh lhon in ahi. Thilso namun chu Keihao leh Hengjang kho kikah Island Block Kangpokpi district, Island Sub-divisional headquarter akon km 20/25 vella gamla ahi.

Thilso namun chu Adl SP (Ops) Imphal East KT, Andro OC, Suonjakhup Haokip MPS chule Commando Imphal East team hon ana dellut pai uvin ahi. Thilsona a sohcha khat police hon thudoh anei nauva chun, eilamtin uva eibulu uchu thalchoi mi 6 ahiuvin manchah AK le M16 akichoi uve ati. Aman aseibe na ah chun meipum a eikap jou uchun ahung kumsuh uvin, a thi teni koi ahi eidong uvin kasei jouvin ei dalha tauve tin aseiyin ahi.

Police thuso in aseina achun thilso namun a formalities imajouse chai ahi jouvin nilhah nidan 9:30 vel in post mortem bol ding in JNIMS morgue akilhut e tin aseiyin ahi.

Thangjamang Kipgen,Member, 24- Bongbalkholen DCC in jong hiche tobang ama constituency sung a dei umloutah thilso chung a lungnop mona thu aphongdoh in, lungkhamna toh insungmi ho heng a alunghempi dan jong aphongdoh in ahi. Hiche tobang thilsoh hi avel a aum kitlou nading in jong ngehna anei in ahi.

Thilsoh kiloikhomna chom chom in demna aneiyin hiche tobang mihem khat chung a thil kibol in gancha ho chondan tobang ahi in, milham mona neilou chung a khut kilha adeilou dan Kuki Inpi Kangpokpi in sangtah in demna anei in ahi. Kuki te kivaipohna lepen chu Haosa ahin hitobanga Haosa chunga hemle thal mangcha-a khut lha ho hi State govt. in 24 sunga ahinmatdoh dingin ngehna lentah akineijin ahi. Chubanna gamsung chamle lungmon umlouva melhetlou mi khat le nin khat chunga thilphalou abolthei jing hi datmona lentah akineijin ole state govt. hin law & order hi phatecha avetsuijoulou hitam, avetsui joulou le iti agam mipi lungmonga kikhosa thei ding hitam

hijeh chun govt. nin hitobang deilou umtah hi asokit louna dingin gamsung phatechan ahina ding bang tah-in venbitna neihen tin jong ngehna akineijin ahi.

Kipgen Khangthah Kiloikhom, GHQ in jong hiche thilso chungthu ah demna sangtah anei in lungjinna toh insungmi te heng a muonna umthei nading a Govt. in pungkah 24 sung a mona neiho amatdoh tei ding in jong asei in, matdoh ahilou le kiphinna jat chom chom kibol ding ahidan athalang in ahi.

Thadou Students’ Association, Sadar Hills, chule Kuki Students’ Union, Sadar Hills injong hiche kithana melsetah chung a demna sangtah anei in hiche tobang deiumlou gamsung a aum jing phamo asah thuu asei un ahi. Akinthei lam a chamna le lungmonna aumthei nading in jong State Govt. in kholchilna ahin neivah ding un asei un ahi.

Hiche thu kijih chan hin thilsoh chung’a koiman kiphonna aneipon chule thuchen hetbe ahipon ahi.