Mel hetlou hon mel hetlou that!

Mel hetlou hon mel hetlou that!

427
0
SHARE
Mel hetlou hon mel hetlou that!

                      Sadar Hills Bongbal Kholen lang Hengjang kho haosa Thangneo Kipgen (kum 58) leh atupa Thangminlun Haokip (kum 26) Hengjang leh Bongbal Kholen kho kikah “mel hetlou” thalchoi hon July 10 (2019) ni’a anakiplih chu kon ipi jeh chetna abol ham ti akihepon abol honjong kiphonna aneipouvin ahinbol diu jong tahsan ha umlou tah ahi. Akikaplih teni pucha touna gari (gypsy) a tou asohcha Bongbal Kholen a kon gollhang khat seina akon het thei ho chu ahileh mikap ho chu mel hetlou ahivang’un koi namdang galmi ti thei hilou, manchah phatah tah choi ijat inam mi mama ahi. Kinaicha a kon ahinkap uva akaplih jou uva gari kom’a hung uva akikaplih teni hi koiham tin adong uve kiti hi mikaplih hon ahetlou tahbah u ahileh hetkhel (midang khat tou hisah) a kikap ham ti jong gelthei ahi. Ahin koi ahi helouva mi akap jeng diu jong tahsan ha umthei kitlou ahi. Ipi chu hileh meithal a mi kidoija ikapdoh kal meichang lekou thei hitalou, khat ikapma ikaplih jouteng katei kahetlou ahi ti di jong hitheilou ahi. Mikap ho chu mi 6 vel ahiuleh gari a tou ho chu mi 3 bou ahiuvin gari chu akham uva aban mattup thei ujong hidi ahi. Thengneo hi haosa khat ahijeh a akithana hi haosat leh gam thua kiboina to kisamkaina um hidia gingmo loi jong umjeng ahi. Haosa thua kiboina (kichu) jeh a meithal gei kimang’a kitha kikaplih thilsoh jong ana umkha japjap ahijeh in haosat dei nam mite lah a haosa kichuna jong beitheilou ahi hi hiche kithana thuto ginmotha theija um ahidan hiche thilsoh thua Social Media a thu kisei leh kinelna hoa kon muthei ahi. Ningkum kum masa lang jong chun Tamenglong/Noney district lang’a Sehjang kiti kho a haosa kichunalam’in meipum’a kikaplih jengna thilsoh ana um’e. Kho haosa thua kiboina (kichuna) hi aumteng koidang kina kichu hijilou, phung bah sung’a jong haosa te insung’a ucha pacha kikah mama ahiji e. Haosa thu hihih jongleh tulai thil neoneova ki lungnopmona ho phung le chang leh insung thua seilhah thei ho kisan thingnoi kithalah tona ho gei aumji hi kintah a ngahdoh di hi nam damna hidi ahi. Ipi thua kiboina hileh ei le ei kikah ahiteng Custom neite le juite ihijeh un Custom dungjuija seilhahmo umloudidol ahi.

            Hengjang haosapu leh atupa that hi melhetlou ahivang’a thingnoi ho ahi het ahijeh in hoilai koi society hileh kiboina khat aum photleh alang lang’a thingnoi kikumna leh kithalah tona umji jeh a asohlou loudi gei sohji injong akilangji-e. Kuki society hihen Naga ho society hileh ipi kiboina, kichuna ham aumteng thingnoi ho lhangphong’a akikumji louvang’un asunglang’a kikumna aneitei jiu jong lhangphong thuguh ahi. Ipi thu hileh thingnoi lang hon sei uleh chamna dileh  apha dia kikikum ahi atidiu ahi. Kinah kithana umlouna dia koi ahileh akikum jongleh apha thou tidi ahi. Ahin kitha tona lom ahilevang ija galmi to kiboltona lom hilou mihem hina a kingailut le kijana umlou ahi. Kithana thilsoh aumteng Civil kiloikhomna hon demna aneijiu hi ahidimong ahin hinlah kitha tona hoa govt themmo kichansah vang dihdeh jilou ahi. Ajeh chu govt nin koima kithatto dia asollouhel di ahi. Hitobang melhetlou ho thilse bolna aumteng nikhat nini kah a govt nin thilse bol ho amatdoh jeng dia kiseiji hi Manipur mi ho hinadan bep ahitan amoh hitheidi jong hilouheldi ahi. Ami amel kihe, aumna akiselna kihe hilevang thukhat ahi.

SHARE
Previous articleThusoh chom chom lahkhom
Next articleThusoh chom chom
Editor at Eimi Times.