Meitei/Meetei ho ST list a pansah ding deina a STDC in kiphinna...

Meitei/Meetei ho ST list a pansah ding deina a STDC in kiphinna bol; STDC President panna a member phabep Police hon man

231
0
SHARE

Meitei/Meetei ho ST list a pansah ding deina a STDC in kiphinna bol; STDC President panna a member phabep Police hon man

Imphal, Sept 6(ET): Meitei/Meetei ho Scheduled Tribe list a pansah dia ngehna bol Schedule Tribe Demand Committee (STDC) hon tuni chun MSRTC Complex a um Railway Office akhah uvin ahi. Hiche a chun STDC President pa pannan police hon member phabep anaman uvin ahi.

State Government in Meitei/Meetei ho Scheduled Tribe list sung’a khumlut dia Central Government heng’a aphatsahna kamcheng apeh lou jeh’a tuni Moirangkhom a um MSRTC Complex a Railway office kikhah ahin, ngehna ho suh bulhit ahi kahse’a railway project jouse khamgahna kinei ding chuleh kiphinna jong kibol jomjing ding ahi tin kiphinna bolhon asei uvin ahi. Akiphin nauva chun Imphal Police Station a OC pa lamkainan police team hon STDC President Yumnam Dhiraj leh STDC Working President Naodalenkhomba chuleh member phabep jong aman uvin ahi. Police hon chabi akhenlha uvin office ahonsah thou thou uvin ahi.

Meitei/Meetei Community huhbit ding hi amitakip mopohna ahin, hichena dia India daanpi noiya Schedule Tribe list sung’a kikhumlut hi bitna pen hiding ahi tin Schedule Tribe Demand Committee President Yumnam Dhiraj chun thuso miho heng’ah aseiyin ahi. Railway kisem masang jongchun gampam mi gamsung hunglut tampi aumtai, tun hiche railway hung kisemchai leh gampam mi tampi hunglut beding chuteng agammi tahbeh ho mangthah a umdiu ahitai tin jong aseijin ahi. State Government in ngehna ho subulhit dia Centre Government ano ding deisah jal’a kiphinna ho kibol ahi ati. Chuleh STDC in kiphinna jong khoucheh cheh a hung kibol nalai ding ahi tin aseiben ahi.

 

Tho leh gate beiya Govt. Residential School kibol; Class X simlai hon jilkung beiya exam bol ding

Imphal, Sept 6(ET): Private a kibol Boarding leh Hostel ho a dan (regulation) kituptah koi dinga thumna aumjing vanga Nungba sub division, Noney district noi Rengpang kho a um government co-educational residential school – Model Residential School tia kiminsah school a simlai ho venna ding gate ahiloule tho ima jong umlou ahi.

National Regulatory Guidelines for Hostels of Educational Institution for Children in dan (norm/standard) asem ho kipalkeh ahi. Model Residential School a hi simlai 134 (numei 66 panna a) um uva cheng u ahi’in, gamgi kikhenna tho (fencing) leh gate aumlou jeh a amaho boina toh theiya kikoi ahi. Staff leh simlai hon hiche jeh a hahsatna anei thu School Headmistress Jangsinlu Riamei in aseiyin, school hi highway kom ahijeh a tho leh gate aumlou hi boina sangtah ahi, ati.

Anaivel a um kho a kon mi ahunglut thei bou hilouva simlai chule staff ho dinga melhetlou ho a kon kichatna to thei dinmun tamtah um ahi, ati. “Residential school a simlai numei tamtah jong um ahijeh a simlai numei ho dinga kichat um ahi”, tin aseiyin chule tho leh gate aumlou jeh a simlai phabep jong campus a kon ajamdoh jong um ahi, ati. School a jilkung alhahsam thu jong asei uvin ahi. Class 10 simlai hohin jilkung umlouva exam apehdiu ahi, ati. School a kon simlai 27 in Board exam apehding ahi’in, simlai ho dinga vangset umtah ahi.

School hi kum masa a High School a upgrade kibol ahitan, ahivanga class 9 leh 10 a jilkung kitup lhasam jing nalai ahi. Jilkung kitup umlouna a lekha asim u ahi’in, jilkung regular beiya class 9 simlai ho class 10 a promote kibol ahi, tin aseibe in ahi. Model School ahivanga medical assistance jong umlou chule simlai leh staff ho kipui nading gari jong aumpon, anaipen a um health centre hi school a kon km 15 a gamlha ahi. Class 10 exam bol ding simlai ho Jangsinliu in alungkhampi na thu aseiyin, class 8 chan jilkung aum vanga class 9 leh 10 a regular teacher umlou ahi, tin aseiyin chule sorkar in simlai ho ding jilkung (regular) asolpeh dinga temna aneiyin ahi.

Residential school a medical practitioner- doctor ahilouleh nurse apeh diuvin temna jong aneiyin ahi. “Adamlou aumteng anaivel a um health centre aumlou jeh a Nungba chan km 15 lhing akipui hi hahsatna lentah ahi”, tin Jangsinliu in aseiyin, che le nading gari aumlou hi boina kibe na ahi, ati. Twi kholna ding aumlou jeh a twi alhahsam thu aseiyin, gamlha tah a twi khaiya kiche ahi’in, sorkar in twi kholna alhinga eipeh peh diuva temna kanei ahi, ati.

Sorkar in ‘School Fagathani Mission’ noiya government school semhoi nading tohgon apat vanga school a angaicha khoh khoh ho aumlouna school phabep jong um nalai ahi.

NEFIP in CAB chule gamdang mi dan dihlouva lut ho doudal dinga avel a seikit u

Aizawl, Sep 6: North East Forum for Indigenous People (NEFIP) kiti simlai kiloikhomna chom chom umkhomna in Friday nikhon Citizenship (Amendment) Bill (CAB) doudal ding chule gam kinaipi a kon dan dihlouva mi alut doudal dinga avel a asei kit uvin ahi.

Hotel Sangchhia, Aizawl khopi a Wednesday nikho a Forum in Federal assembly masapen anei hi Friday nikho a khumkhana aneiyu ahi’in, kihouna a kilolna tamtah jong phatsahna anei uvin ahi. Federal Assembly in CAB doudal ding chule gamdang mi dan dihlouva hunglut ho dou ding a kilolna aneiyu ahi. North East gam hon Inner Line Permit (ILP) chepi dinga thumna anei NEFIP in tosot dinga kilolna anei uvin chule gamkaiya NRC tobang dan ho chepi dinga jong state sorkar jouse henga temna anei uvin ahi.

United Nations Declaration on Rights of Indigenous People (UNDRIP) chepi tei dinga jong NEFIP in aseiyin ahi.

Manipur People Against Citizenship Amendment Bill 2016 (MANPAC) tohgonna noiya NEFIP tu naicha kisemdoh ahi’in, kum masa Dece lha a Lok Sabha in aphatsah CAB doudal dinga kouna anei uvin ahi. Forum in NE People’s Conference masapen hi tukum April 1 a kon 3 sunga Imphal khopi a ana neiyu ahi.

NE member state hon kihouna phabep anei jouva Aizawl khopi a Federal Assembly masapen aman u ahi’in, hiche a Central executive council asemdoh uva office bearer ho lhendohna aneiyu ahi.

Federal Assembly a member state li- MANPAC, Confederation of Meghalaya Social Organisation (COMSO), Assam League of Aborigine Rights Movement (ALARM), United Arunachal Indigenous People’s Forum (UAIPF),  Joint Committee on Prevention of Illegal Immigrants (JCPI), Tripura Social Organisation Solidarity (TSOS) leh Mizo Students’ Union (MSU) apang uvin ahi.

Gam kichu jeh a Zeliangrong hon asem Lamhainandi kho kibulu

Kohima, Sept 6: Mel hetlou mi phabep in athah a kisemdoh Peren district noiya um Zeliangrong kho ‘Lamhainandi’ khosung a meithal (blank fire) akap uve ti thulhut police hon photchenna anei uvin ahi.

Khosung hi hetpehna umloulai ahi’in, official hon asei dungjuiya September nisim 6 jingkah nidan 4 don thilsoh ahi. Mel hetlou mi phabep ahon a che uva khosung a meithal akap u ahi’in, khosung mi phabep amun a um hohi ache hon meithal akap phat a jam soh u ahi. Thilsoh a akisukha aumpoi. Mel hetlou mi phabep hohin khosung mihon akisah houin panna a inn phabep jong meiya ahal uva asuhset u ahi.

Zeliangrong tribe hon Peren district noiya recognized hilou khosung thah akisemdoh u ahi’in, kho thah asem uhi Western Sumi Tribe hon adoudal ahi, tin official hon asei uvin ahi. Thilsoh umchan jouse hi Zeliangrong leh Western Sumi ho kah a gam kichuna thu jeh hidinga kisei ahi’in, lha phabep masanga kon kiboi pan u ahitai. State sorkar in kho semdoh loudinga order aso ahi’in, police leh official hon amun a thukholna apat ahitai. Tuchan geiya thilsoh toh kisaiya akiman umlou lai ahi’in chule khosung bulu hohi hoiya kon hung uham ti jong kihe loulai ahi.

Hetthei khat chu hiche kho hi Dimapur district toh ki gamgi a um ahin, Sumi kho phabep in a um khum ahi akiti. Sumi hon hiche khomun a cheng ho chu Nagamese helou gampam mi ahi tia ngoh na anei utoh lhon a khomun jong Dimapur district ahi dan le Sumi ho gam ahi dan tahlang na ana nei u ahi tan ahi.

Lamhainandi kho kibulu Zeliangrong kiloikhomna in demna nei

Dimapur, Sept 6: Naga National Council Parent Body Zeliangrong Region Assam, Manipur le Nagaland(NNC-PB ZLR-R,AMN) in Nagaland Peren district sunga Lamhainamdi kho kibulu na chunga demna sangtah ahin nei uvin ahi.

Zeliangrong Kiloikhomna akon thuso kimu chun asei na a hiche kho mun chu Sumi pao tho miho in ana bulu u ahi akiti. Kiloikhomna in asei na a Zeliangrong mite hi Assam, Manipur le Nagaland gamsung a cheng ahiu vin, tu channa gam dei cha tamtah in mun chom chom akon a gam sung ahin neh jing vang a ki ting jing ahi toh lhon a tu  a jong tin le ha tho a gam hin neh ho akitin ding dan tahlang na ana nei uvin ahi. Kiloikhomna in vai po ho ang a khol chil na nei a gam nei ho phate cha a kiboi na mun pehdoh a aum na dingin hetsahna ahin nei uvin ahi. Naga thu kisai chai ding kon cha a hitabang thilsoh ho Naga jat kikah a asoh na chunga nopmo asah na ujong kiloikhomna in hetsah na ana nei uvin ahi.

Manipur in North East a dinga CSR Conclave masapen vailhun; State sorkar toh ‘partnership’ sem dinga CM in corporate ho kouna nei

 Imphal, Sept 6(ET): State sorkar in Fourth Dimension Global toh kithon Friday nikhon City Convention Centre, Palace Compound, Imphal East district a Corporate Social Responsibility (CSR) Conclave of North East Region masapen host abol uvin ahi.

Kin gon a Chief Minister N Biren Singh chief guest a apang in, Chief Secretary Dr. J. Suresh Babu, Additional Chief Secretary Dr. Suhel Akhtar leh M.H. Khan, Principal Secretary (Commerce and Industry) P. Vaiphei, CSR expert leh Department of Public Enterprise, Government of India a Secretary anahi Dr. Bhaskar Chatterjee chule Managing Director, IRG Systems South Asia Pvt. Ltd. Amit Jain jong jin a apang uvin ahi.

CM Biren in ahoulimna a gamdang dang a corporate house ho Manipur gam a ahung uva state toh lamchom chom a na atohkhom diuvin kouna aneiyin ahi. Achesa kum phabep sunga ‘law and order’ nasatah a machal ahitai, tin aseiyin chule gamdang corporate hon gamsunga invest abol diuvin kouna aneiyin, a sumpi ho mang louding ahi, tin kitepna jong aneiyin ahi.

Khantou machalna alhun louna mun phabep um ahi’in, sum alhom vanga state sorkar in CSR a kon hiche sector a lungtup ho molso ding agot ahi, ati. Airports Authority of India in JNIMS mun a Accident and Trauma Centre a ding manchah lahna dinga CSR fund 4.95 peh dinga kitepna anei ahi’in, IOCL in community bathroom sahna ding fund abol ding ahi, ati. Sector chom chom invest bol nathei aume, tin CM in aseiyin chule state sorkar in education, skilling, healthcare, social development leh human development sector hohi CSR funding dinga gelkhohna apeh ahi, ati.

Gamsung hi South-East Asia a dinga ‘Gateway to India’ ahi, tin CM in aseiyin chule India-Myanmar-Thailand project hohin gamsung akhel ding ahi, ati. North East gamkaiya natural resource tamtah um ahi’in, kum phabep sunga Myanmar toh gamsung chule state dang dang lamlen jong nasatah a khangtou ahi. Gamsung hi cultural tourism a khangtou tah ahithei na dinmun um ahi, ati. Lou a kimang thei thil (plant) atam dan, anamtui a semthei, nehthei ho atam hi akhantou pi thei ahi. Chule handloom, bamboo craft leh leibel sem a jong gamsung machal jing ahi, ati.

Investor ho dinga ‘one stop solution’ a ‘Single Window Agency’ kisemdoh ahi’in, chule State Industrial Estate a gam man thei jong um ahi, ati. Business-to-Government (B2G) meeting, Government Department leh corporate body ho kah a CSR partnership seikhom ding hohi conclave a asei sang pen  ahi’in, corporate house chule NGO chom chom in pan ala uvin ahi. Conclave a government department leh gamsung SHG chom chom in dukan som jong ahong uvin ahi.

CM toh kinopto na aumjouva JAC member 14 ho kilhadoh ta

Imphal, Sept 6(ET): Babysana thi thu a kisemdoh JAC member akiman mi 14 police hon Friday nikhon Chief Judicial Magistrate Imphal West a apui jou uva alhadoh tauvin ahi.  Thulhut dungjuiya akiman kiphinna bol hohi akimat thei nadiu photchenna alhasam e tia Investigarion officer hon report a asei jouva kilhadoh ahi.

Janlhah chun JAC leh Chief Minister N. Biren in kihoukhomna khat aneiyin ahi. Hiche a chun Chief Minister pan JAC member kiman ho condition ima umlouva lhadoh ding’in nopna aneiyin chuleh JAC injong akiphinna’u ahaisan ding’in aseiyin ahi. Kihoukhomna a chun JAC member ho, Babysana penna pa Ningthoujam Tomchou, Retired Prosecution Director leh JAC Advisor Advocate Ng Tejkumar hochu JAC thakhel in apang uvin chuleh Additional DGP L Kailun, Imphal West District SP Meghachandra chun Chief Minister pa atoupi lhon’in ahi. Hiche a chun Deputy Speaker K Robindro, Forest & Environment Minister Th Shyamkumar jong apang in ahi. Hiche a chun L Pratap panna a JAC member 12 kiman ho condition imacha umlouva lhadoh ding’in kinoptona aneiyuvin ahi. Minphah theikhat chu CJM Imphal West in JAC Convener Th Chittaranjan leh member Sagolsem Basanta chu PR bond noiya dangka 75,000/- leusah pum’a bail a ana lhadoh lhon ahi.

Alangkhat ah janlhah Chief Minister patoh JAC kihouna toh kisaiyin THAU a um JAC office ah press meet khat akibol’in ahi. Janlhah kihoukhomna a chun Chief Minister N. Biren in Babysana thina case CBI a pelut dia Union Minister Amit Shah kino ding ahi tin aseiye tin JAC Convener in-charge Laishram Gyaneshori chun aseiyin ahi. September 8 tengle kihoukhomna khat umding ahin, chutengle Chief Minister paleh Union Minister Amit Shah jong pang ding ahi tin aseiben ahi.

Chief Minister pan nikho 10 sung’a Babysana thina chungchang thudih hung kipodoh ding ahi tia akamcheng apeh jal’a JAC in phat chomkhat a dia kiphinna ho kihaisan ahi tin jong aseijin ijem tia Chief Minister pan akitepna ho anatoh a ahin pohdoh louva ahileh kiphinna khoucheh a kibol ding chuleh Chief Minister patoh jong kihouna kinei kitlou ding ahitai tin Gyaneshori chun asekit in ahi. Gyaneshori chun aseibena ah JAC member kiman ho condition imacha umlouva ahung kilhadoh diu keu hilouva kiphinna kibol laija akitongkha akisukha hojong Government in mopohna alah ding ahi ati. Chuleh police hon aphat seh’a Babysana insung mite agih jing’u jong angah diu ahi tin JAC Convener in-charge Gyaneshori chun aseiben ahi.

KSO-CCpur, TKSU-GHQ leh DFO lamkai hon Monjang twilahna mun vetlhah na nei

B.Lalboi Gangte

CCpur. Sept. 6(ET):   Kuki Students Organisation(KSO-CCP) leh Thadou-Kuki Students Union(KSU-GHQ) lamkai nan Sanajaoba Khuraijam District Forest Officer(DFO) leh Ajit Kumar Range Officer(RO) jaona tuni jinglam nidan 11:00 in Patlen Water Intake Point leh Catchment Area Inspection anei uvin ahi.

Tuni’a Zone II Mongjang Water Tank, Twi kilah namun Twinah KSO-CCpur leh TKSU-GHQ ah lamkai hon Inspection aga bol lo napen jeh uhi CCpur Khopi sung a Japi Twineh  hahsat cheh cheh jeh leh Twineh kining lhing a Khopi sung a mipi hon amuthei nadiu lampi ding kholna a Twinah Intake Point leh Catchment Area, akimvel a Thingphung (Mass Plantation Drive) tohgon chelhah ding deisah na jeh ahi tin thulhut chun  aseiye.

KSO-CCpur akon’a hiche twi kilah namunpi Twinah vetlhahna anei jounao uva, maban ajong 12 Sept 2019  nikho leh District Administration akon’a  Department chom chom hotoh K. Patlen Water Intake point leh akim vel ho’a Song ki lahna (quarry) le gam le-go, Twineh na tongkha leh sukha thei, Twi samput sumang thei hojong vet lhah ding in tohgon kinei kit ahi ati.

Hiche Water Supply Zone II, Mongjang Tanky ah twilong luthi K.Patlen gam akipat twi lah ahi in, hiche twinah akon’a twi hung longlha a Mongjang Tanky a kikhol tup hohi Mongjang Tanky akipat Tuibong Sub-division acheng mipi hon aneh u ahi in, ahin twi hi deibang a kining lhing a mipi apeh jou lou naban’a twi hunglondoh namun Twinah a Thing le song ho lah ahi naban’a twi hung putdoh namun gam ho’a gamlah thing ho kum sih’a tuhchai a aum ban ah, agampheng a Kaani lei alho jeh uva kum sih’a twi nah a deibang a Twi ahung londoh thei tahlou jeh’a Khopi sung a cheng mipi hon twin neh nalang a hahsat na atolo u ahi in, chuleh hitobang hahsatna ho ahung lhun bejing nalou ding gelna a Thing le song kilaho kha hiding leh Dept. leh Civil Organisation hon Khopi sung le akim vel ho’a mipi hon maban’a Twi jeh’a hahsat na atobe jing nalou ding leh Twinah mun akon’a Twi ahiding bang tah’a ahung putdoh jingthei ding deina maban’a twi kanglang lou’a hung londoh di dei na a Song le thing kha a Thingphung atamthei pen phube nading deina jeh’a Twinah mun ho kholchil na anei masat u ahi in, DFO leh Civil Organisation hon hitobang natoh jalhang phatchom nadi tohgon anei nao chung’a alolhing ding hi agam kai mipi in nasatah in kinep na anei ujong tahlang na anei uvin ahi.

KSO-CCpur, TKSU-GHQ leh DFO in Vetlhah na anei naojeh ahileh KSO Churachandpur in Manipur Chief Minister N.Biren Singh heng’a panlah huding’a ngehna ana nei dungjui uva, Kereilhouvi Angami, Principal Chief Conservation of Forest in DFO, Churachandpur Forest Division kom’a velha ding’a mopohna apeh dungjui’a vetlhah na masapen tuni’a kipan ahi in, tuni’a amudoh hou  Report apeh dungjui uva KSO Churachandpur leh TKSU GHQ toh kitho khom’a avel vet kitding u ahi, ana vet masatna uva amudoh hou chu Kolsong lahna leh Poppy lei kilho na mun jouse Khoupum Block noiya Teiseng, Daibong leh Vengnom kho kiti ho ahi in, Kolsong lah ahi jeh’a Munchim thupitah umthei ding leh poppy (Kaani) leilho jeh’a damdoi kijang chom chom hon Twinah akipat Twisam potna ho asuhboi ahidan mudoh ahi in, Koite Lui a twi kininglhing hung pendoh thahkit theina dia songlah leh Poppy Leilho ngah ahi a, Thingkeh nou tamtah son  poimo ahi naban’a agam kum 15 beh venbit di poimo ahidan report achun ana tahlang uvin ahi.

Tengnoupal a gam mang jouse reserved forest a phondoh na kinei toh kisai a TL & RPO in Forest minister toh kihou khomna nei

Imphal, Sept 6(ET):  Tribals’ Land & Resource Protection Organisation (TL & RPO), Tengnoupal District in tuni in  Minister Forest & Environment/TP/MAHUD/Hort& SC, Manipur Th. Shyamkumar Singh,  New Secretariat a office mun a ana kimu pi uvin ahi.

Minister pa toh kihou khomna achun Yangoupokpi Lokchao Wildlife Sanctuary phondoh na kinei na, Tengnoupal district sunga gam mang jouse reserved forest a phondoh na kinei na le district sunga song le nel lah ding kikha chung thu ho seikhom na ana nei uvin ahi. Kihoukhomna kichai na in Chief Minister pa jaona a kihou khomna nei dingin kinoptona ananei uvin ahi.

Hetthei khat chu Kiloikhomna in achesa August nisim 22 nikho a jong Tribal Affairs & Hills, Minister N. Kayisii toh kihou khomna ana nei u ahi tan ahi. Kiloikhomna  President, L. Thangboi Mate in Forest Minister pa ang a government in thinglhang mi ho tha le chanvou dan apalkeh na thu a houlimna ana nei in ahi. India in chamlhat na amu masang a pat gamnei ho hetsah na nei lou a Yangoupokpi Lokchao Wildlife Sanctuary phondoh na kinei, district sung gam mang jouse reserved forest tia kiminvo le district sunga song le nel kilah kha ho chunga government in thinglhang mi ho thanei na apal keh dan tahlang na president pa in ana nei in ahi. Thinglhang mi ho in tol lai apat a gam le go akon hung kivah a inching ahi utoh lhon a government thupeh in kihinso na atoh khah dan jong forest minister pa ang a hetsah na ana nei uvin ahi.

KNF-N  in suhthengna leh demna nei

Imphal, Sep 6(UNA): Kuki National Front –Nehlun in Hengjang haosapu kitha thu toh kisaiya sepai hon KNF-N thingnoi aman e, tia asei thu suhthengna thuso anei uvin ahi.

Gou @ Kuki, Information and Publicity, KNF-N in thuso aneina a akiman KNF-N thingnoi ahi tia ngohna aneiyu Lunkam Haokip, s/o Nehkholam Haokip hi themmona neilou ahi’in, kiloikhomna toh kisaina ima aneilou ahi, tin aseiyin ahi. Tu naicha Lunkam Haokip chanu khat thi ahi’in, lunghem tah a aum laitah a sepai hon kholtohna nei louva KNF-N suhminset na dinga jouthu a ngohna aneiyu ahi, ati.

Lunkam Haokip kimat hi jouva kingohna ho kholtohna beiya kibol, human rights kipalkehna ahi, tin aseiyun chule KNF-N in Lunkam toh kisaina ima akineipon, KNF-N min a ama kimat thu kisei hi kiloikhomna in mipi hetdinga asuhtheng ahi’in, Lunkam hin KNF-N toh kisaina aneilou chule thingnoi ahipoi, tin aseibe in ahi. Sepai ho themmona neilou khosung miho chunga achonchan demna anei uvin, Hengjang kho haosapu leh atupa kithana a themmona nei ho man louva sepai hon themmona neilou khosung mi, tolthana thu a pan lalou ho amat ahi, ati.

Hengjang haosapu kithana a Paotinthang @ Paotin Kipgen leh asopipa Ngamkhogin hi themmona neiya kingoh sangpen ahi’in, ahivanga sepai hon lungmongtah a alha a, alangkhat a themmona neilou khosung ho chunga hunam aman ahi, ati. Mopohna nei holeh sepai hon thilse bol tahbeh ho anai ngamlou ahi’in, themmona neilou ho suhgim da hen, tin aseibe uvina hi.