Meghalaya a Dr Sailo Covid-19 a athi toh kilhon a Northeast a...

Meghalaya a Dr Sailo Covid-19 a athi toh kilhon a Northeast a natna jeh a thi mi 2 hita

76
0
SHARE

Meghalaya a Dr Sailo Covid-19 a athi toh kilhon a Northeast a natna jeh a thi mi 2 hita

Imphal, Apr 15: Meghalaya gam a COVID-19 positive masapen pa Wednesday jingkah a athi tan, Northeast a natna jeh a thi agom a ni lhing ahitai. Natna jeh a tu masanga Assam gam mi khat ana thi ahi.

Meghalaya gam a coronavirus natna jeh a thi mipa hi Shillong a cheng kum 69 a upa L Sailo Ryntathiang ahi’in, Bethany Hospital a managing director hi ahi. Wednesday jingkah nidan 3 don a thi ahi’in, Dr Sailo hi Monday nikho a Covid-19 positive ahi kihedoh ahi.

Meghalaya Chief Minister Conrad Sangma in thuso photchenna aneiyin ahi. “Tuni jingkah nidan 2.45 don a Meghalaya a Covid-19 positive masapen athitai, tihi pona tah a kasei ahi. Insung mite kalunghempi uve”, ati. Meghalaya Chief Secretary MS Rao in Tuesday nikho a Covid-19 hi community transmission ahipoi, ajeh chu doctor pa insung mikhat gamdang a kholjin um ahi, tia aseiya chule health and district surveillance team hon akimupi ho thuchen akholjing ahi, ati.

Agamsung thuso in Tuesday nikho a achesa March nisim 22 a kon Bethany Hospital Nongpoh vil a chule March 30 ni le ajouva ache hon 108 phone abol uva amaho le amaho register akibol diuva thuhilna anei ahi. Bethany Hospital Outreach, Nongpoh hi district administration in phatah a akha chah ahitai. Covid 19 case akisei jouva Shillong, East Khasi Hills district le Ri Bhoi district a curfew kikoi ahitan, chule Bethany Hospital, Shillong jotna lamlen jouse kikhah ahi.

Achesa March nisim 30 nikho a Meghalaya Health authority hon Meghalaya a Covid-19 case hidinga ginmo a test kibol sample 52 negative ahi, tia asei ahi. Sample hohi North Eastern Indira Gandhi Regional Institute of Health and Medical Sciences (NEIGRIHMS) a athot u ahi’in, hiche mun hibou Meghalaya a Covid-19 testing centre hi ahi. “NEIGRIHMS a sample 52 akithot in, abon a negative ahi”, tin Director, Health Services (DHS), Dr Aman War in aseiyin ahi.

Northeast a dinga coronavirus jeh a thi masapen hi kum 65 a upa Assam gam mi ahi’in, Assam gam Silchar Medical College and Hospital a thi ahi. Assam gam a Covid-19 case hi 32 lhing a, Manipur a 2, chule Nagaland, Mizoram, Meghalaya le Arunachal Pradesh a khat cheh ahi’in, Northeast a dinga natna nei agom a mi 40 lhing ahitai.

Shillong a coronavirus jeh a thi pa insung mi 6 COVID-19 positive hita

Shillong, April 15: Wednesday jingkah a Shillong khopi a Covid-19 natna a thi Bethany Hospital doctor pa insung mi 6 COVID-19 positive ahi photchen ahitai, tin Meghalay CM Conrad K Sangma in aseiyin ahi.

“Tuchan geiya Covid-19 sample test kibol 68 lah a Covid-19 natna jeh a athi pa insung mite chule insung natong ho panna a mi 6 positive ahitai. Case adang 6 avel a test akibol kit in, adang se negative ahi”, tin Sangma in Twitter a aseiyin ahi. Athi doctor pa hi kum 60 val ahitan, Monday nilhah a natna anei kihedoh a, Wednesday jingkah nidan 3 lhah masanga natna jeh a thi ahitai. Meghalaya gam a Covid-19 natna a thi masapen ahi.

CM Conrad K Sangma in Tuesday nikho a asei dungjuiya, adamlou pa hi non-invasive ventilator a um’a chule Category C a kikoi ahi. Wednesday jingkah a Sangma in natna nei doctor pa athi photchenna anei ahi. Alangkhat a Meghalaya gam a Covid-19 positive case akimudoh jouva agom a sample 90 hi test bol dinga athot uva chule Shillong le Nongpoh a um Bethany hospital ani a kikhah ahitai. Natna neiho toh kimuto ho list jong asem u ahi.

Manipur Inner MP in FEEDS Hengbung a scientist hon asem Hand Sanitizer hondohna nei

Imphal, Apr 15(UNA): Ethno-Medicinal Research Centre, Foundation for Environment and Economic Development Services (FEEDS), Core Support Group in asem alcohol panna herbal hand sanitizer (instant hand sanitizer), non- allergic Wednesday nikhon Manipur Inner MP Dr Rajkumar Ranjan Singh in FEEDS Campus a hondohna anei tan ahi.

Kin gon a Dr Rajkumar Ranjan Singh, MP, Lok Sabha le member, Committee on Science & Technology and Research Chief guest a apang in chule Major Krishna Singh, 34 AR Hengbung le Basanta Sharma, Editor in-chief, Morning Bell jong apang in ahi. ‘Social distancing’ dan jui pum a kin gon aman u ahi.

Dr Ranjan in ahoulimna a, ‘Manipuri’ kahi e, tia kithang at tah a sei phat ahi, tin aseiyin, sanitizer lhahsam pet a thinglhang gam a hiche hi kisemdoh ahi, ati. ‘Social distancing’ juiya, thenna hinkho man jing ding athupi dan aseiyin chule FEEDS team jousen pan alah nau chunga kipathu jong aseiyin ahi. MP pa in EMRC Laboratory avil in hand sanitizer kisem ho vetlhahna aneiyin ahi.

Prime Minister Narendra Modi in gamsunga scientist khangthah hon aganna thei pen a vaccine asemdoh nading uva temna anei ahi’in, hiche a dinga CSIR, Science and Technology le ICMR in fund peh dinga nopna anei ahi, tin aseiyin chule Covid-19 pandemic vettup jou ahiding akinepna thu jong aseiyin ahi.

Instant Hand Sanitizer hi Dr. Dhanaraj Singh Thokchom, Senior Scientist le Scientist in-charge, EMRC subordinate Dr Kangjam Tilottama Devi, Scientist, Orchid Research and Development Centre (ORDC), Dr Rupam Patowary, Senior Programme Officer, DST Core Support Programme, Jadumani Ahongshangbam, JRF chule Scientific staff 4 le Technical support staff 10 panna a asemdoh u ahi.

Hiche hi SEED Division, Department of Science and Technology (DST), India government thuhilna noi chule WHO guidelines dungjuiya kisem ahi. Artemisia nilagirica (Indian Wormwood/Laibakngou) a kon hand sanitizer kisem ahi’in, coronavirus natna kon venna dinga phachomd ing ahi, tin Dr Thokchom in aseiyin ahi.

Denmark le Germany gam a kon Scientist group khat injong artemisinin kiti Artemisia annula kiti species dang khat a kon Covid-19 nat douna dinga na atoh u ahi, ati. Natna venna ding ahijeh a tamtah sem dinga jong ngaidan aseiyin ahi. WHO in asei ingredients ho tilouva sanitizer a hi Artemisia nilagirica le Morus alba (Mulberry) a kon kila doh gu hilou (non-toxic) natural colouring agent jong pang ahi.

FEEDS Secretary, Kimjaneng Kipgen in District Commissioner Senapati le Kangpokpi district chunga kipathu aseiyin, chule Haokholet Kipgen, President, FEEDS in research team ho akipapina thu aseiyin ahi. MP pa in thil launch abol jeh a jong kipathu aseiyin ahi.

Kin gon a hand sanitizer bottle ho print le electronic media, Hengbung Youth Club thalheng, Hengbung Village Authority chule Major Krishna Singh, Company Commander, 34 AR, Hengbung COB ahop peh uvin ahi. Ruth SHG le Salem SHG kiti self help group ni Ethno-Medicinal Research Centre laboratory facility a sanitizer sem dan jong kichuhna ape uvin, hiche hi khosung miho sum muna a pang ding ahi.

Hand sanitizer tilouva FEEDS in achesa April nisim 8 nikho a kon Community Radio Centre (91.2 MHz) a hi nikhat a thumvei Manipuri, English, Nepali le Naga pao a COVID-19 pandemic a kon kivenna dinga thuhilna anei jingu ahi. In a kimang pon ho a mask kisem dan video (minute 3) jong WhatsApp a athot son u ahi. Covid 19 nat douna dinga FEEDS a um scientist hon lampi dang dang jong avet u ahi.

India sorkar in Covid-19 Lockdown sunga jui ding chule akiphal ho ‘Guidelines’ sodoh

New Delhi, April 15: Prime Minister Narendra Modi in Covid-19 lockdown suhsaobe dinga thuphon anei jou Wednesday nikho a sorkar in May nisim 3 chan juiding dan velvetna aneiyu asodoh tauvin ahi.

Train, lenna chule lamlen a kholjin kikhah ding, themjilna mun le training institution, industrial le commercial activity, hospitality service, cinema hall le shopping complex ho kikhah jom ding ahi, tin Ministry of Home Affairs (MHA) in thuso aneiyin ahi. Chule April nisim 20 nikho a kon hotspot hilou mun ho a mipi lah a chedoh hon mask akibol tei diu chule abol louho gotna kipe ding ahi, ati.

Social, political chule kin gon dang dang, houin mun ho lockdown akiche jompi chan a kikhah ding ahi. Natohna mun le mipi lah a face mask (homemade) man tei ding chule guideline thah dungjuiya office in staff ho sanitizer apeh a, shift asem a chule ‘thermal screening’ akoi ding ahi. Centre sorkar in guidelines asodoh na’a, e-commerce company chule self-employed person kiti electrician, IT repair, plumber, motor mechanic le carpenter ho che le va le aphal pehdiu ahi.

Hardware kisemna, packaging material chule special economic zone (SEZ) a industry dang dang hon ‘access control’ anei diu chule lockdown sunga kimangcha thei diu ahi. “Covid-19 hotspot mun ahiloule natna hatah a akalna ho hi Ministry of Health and Welfare, India government in guidelines aso banga dan kijui ding ahi. Hiche mun hohi State, UT le district administration in MoHFW dan dungjuiya akhen ding ahi”, ati.

Dan semphatna umhi Covid-19 nat achal louna ding chule loubol mi, niseh a natong nikho tha kilo ho olsah nading ahi, tia sorkar in thuso anei ahi. Mipi hahsatna suh ol nadinga April nisim 20 nikho a kon adang phabep jong phalna kipe pan ding ahitai. Lockdown sunga dan phatah a jui a state le Union Territory ho kimanchah dungjui hiding ahi.

Ahivanga guideline kisem thah hi ‘containment zone’ a kichepi louding ahi. Government office, ministry, department le office a officer (deputy secretary level chan) ho attendance 100 percent hiding chule adang officer le staff ho hi ngaichat dungjuiya che diu ahi.

CCpur Dist. a lockdown sung’a kholai dung’a vahthang mipi tam cheh cheh; lockdown khou cheh nading’a 1st IRB, Police, TCP in duty pota

B.Lalboi Gangte

Ccpur, April 15 (ET) : National lockdown nikho aki suhsaobe kit toh lhon’a CCpur District sung’a lockdown khou tah in achelha jing in ahi. April 14, 2020 nikho’a India Prime Minister Narendra Modi in India gamsung pumpi Lockdown hi ahung lhung ding May nisim 3 chan ding’a asuhsao be nachung’a K. Kabib, IPS, DIG Range III in Ccpur District sung lockdown din mun vetlhah na ananeiyin ahi. Hiche phatsung in Police Station jaona in mun chom chom anapha in ahi. Chuleh K Kabib, IPS in SP Office Chamber, Tuibong mun’a Amrita Sinha, IPS SP CCpur pannan Police Officer hotoh CCpur District sung’a lockdown phatah’a achelhah thei nading leh panlah ding dan toh kisai’a houlimna ananei toh lhon’a tunin 1st IRB, CCpur District Police leh Traffic Control Police in lockdown hoitah’a juiding deisah na in mun chom chom ah duty anapo uvin ahi.

Hiche toh lhn’a DIG in CCpur Lamka khopi sung vetlhah na anei phatsung in imacha boldi neilou’a kholai’a vah leh lampi dung’a tou mi tamtah anamu jeh in lockdown kibol hi khou sahcheh ding poimo asa in ahi. Lockdown vetkol natoh kisai’a tunin District Police leh Traffic Control Police hon mipi kholai potdoh ho a-inn cheh’u kijuh chet ding uvin kholhang anasam uvin chuleh gari lhai le hojong akhahtang uvin. Chuleh alou thei louva kholai’a potdoh hon jong mask kitom cheh ding uva hetsah na apeh naoban’a ATM booth a sum ladoh ding hon jong Social distancing ajui cheh ding uvin thupeh jong anei uvin ahi. Lock-down khoutah’a achelhah jing lai tah in ani-ani in CCpur District sung’a kholai pot atam deudeu jeng in ahi. Tuni District Police leh Traffic Control Police hon kholhang asap nao mun aphah naho’a mipi ho akikhen uvin ahin Police in adalhah namun ho’a mipi akikhomdim pai kit ji jeh uvin vetkol na neiho ding in lungdon na asodoh tan ahi.

Phailei bol ho dinga ‘Lockdown’ dan olsah dinga loubol kiloikhom hon CM henga temna neiyu

Imphal, April 15: Manipur Progressive Farmers Association (AMPFA) in gamsunga loubol miho a kon thil choh nading mopohna nei authority hon agonpeh uva chule phailei kibolna mun a kon alah diuvin Chief Minister henga temna anei uvin ahi.

Manipur Progressive Farmers Association (AMPFA) in tunin hahsatna ato hou thu a CM henga memorandum apelut uvin ahi. Loubol mihon anatoh atohjom thei nading uva guidelines asuh ol jep diuvin temna anei uvin ahi. Coronavirus lockdown jeh a loubol mihon hahsatna ato bou hilouva twi lhahsam jeh a hahsatna ato ho thu jong memorandum a asei uvin ahi.

Covid 19 nat akipat a gamsung akikha jouva loubol mihon hahsatna tamtah ato ahi’in, phailei a natong dinga lockdown jeh a che theilou ahi. Sorkar in anchang lhomcha chule adang dang in thil ahop hohi kihinso nadinga akilhing joupoi, tin asei uvin chule gari alhai lou jeh a loubol miho hahsatna sangcheh ahi. Ahivanga Covid-19 pandemic a kon hinkho huhdoh ding athupi jeh a Lockdown kiloikhomna in atosot ahi, ati.

Chief Minister in HYV (high yielding variety) muchi, fertilizer, pesticide le insecticide angaicha ho chule adang dang apeh diuvin temna jong anei uvin ahi. ‘Lift irrigation system’ le adang dang manchah a twi peh nading lampi agon diuvin temna anei uvin chule phailei kibol achelhah jom theina dinga angaicha ho apeh diuvin organization in temna aneibe in ahi.