Meeyamgi Numit leh Hill Leaders’ Day kimang Centre in akitepna atuhchah...

Meeyamgi Numit leh Hill Leaders’ Day kimang Centre in akitepna atuhchah ding tahsanna lhingset kinei ahi, tia CM Biren in sei

227
0
SHARE

Meeyamgi Numit leh Hill Leaders’ Day kimang

Centre in akitepna atuhchah ding tahsanna lhingset kinei ahi, tia CM Biren in sei

Imphal, November 15(ET): Chief Minister N. Biren Singh in Indo-Naga Peace talk thu suhlhap nadinga Manipur gamsung tohkhah loudinga Prime Minister Narendra Modi leh Union Home Minister Amit Shah in kitepna anei abulhit ding ahi tihi tua sorkar in tahsanna lhingset anei ahi, tin Durbar Hall, Chief Minister’s Secretariat mun a Meeyamgi Numit leh Hill Leader’s Day kin a thuso miho henga aseiyin ahi.

Gamsung miho chule CSO chom chom in ngaidan anei leh adeisah ho thu kilakhom ahi, tin Chief Minister in aseiyin chule thu kilahkhomna report hi Union Home Minister Amit Shah henga tuni jingkah a kisei ahi, ati. Center toh hiche thu a kihouna akisem masanga state sorkar in Coordination Committee on Manipur Integrity (COCOMI) thalheng chule ‘Stakeholder’ chom chom hotoh kihouna asem ding ahi, tin jong aseiyin ahi.

Manipur Legislative Assembly ‘special session’ kou dinga thumna umho thu a Chief Minister in special Assembly session kou dinga state sorkar in lunggot aneipoi, tin aseiyin ahi. Tua sorkar kivaipohna noiya gamsung huhna dinga (territorial integrity) tua sorkar in kihouna asem a, kilolna nivei anei ahitan chule hiche tu a tu masanga sorkar honjong kilolna thakhat vel 12 vei asem ahitai, ati. State sorkar in hiche chungchang a Centre sorkar in akitepna ho atuhchah ding tahsanna dettah anei ahi, tin aseiyin chule ngaichat ahileh sorkar in ‘Assembly session’ agon ding ahi, ati.

Gamsung miho chule Civil society organization chom chom in sorkar chunga tahsanna anei diuvin kouna aneiyin, Union Home Minister injong Naga Peace Talk thu a thulhuhna akisem masanga ‘stakeholder’ jouse toh kihouna sem dinga kitepna anei ahi, ati. Indo-Naga peace talk thuchen seidoh dinga thumna umho thua CM in, Peace Talk akisei ho akidong in, ahin, Centre a lamkai hon Manipur kivaipoh na (administrative structure) kitongkha louding chule nam thu a district kisemna umlou ding ahi tia avel a eidonbut u ahi, tin aseiyin ahi. Tu naicha state government ‘financial transaction’ Ban akibol thu a CM in hiche hi ‘overdraft’ (excessive) peldoh nadinga kivenna a kibol ahi, tin aseiyin, Reserve Bank of India in gamsung ‘financial transaction’ ‘Ban’ abol louna ding ahi, ati. Centre share dangka crore 168 vel hi state sorkar account a janni a kiheng ahi’in, lhaseh kal kipat til a angaina a kikoi ahi, tin aseiyin chule ‘Ban’ kiladoh vahding ahitai, tin aseibe in ahi.

Chief Minister Biren in jingkah nidan 9.15 a kon 12.15 chan mi 1000 vel akimupi in ahi. Lamchom chom a tahsa bulhing lou, meithai chule insung hahsa ho apet pet a Chief Minister gi Hakshel-gi Tengbang (CMHT) leh Chief Minister-gi Sotharabashing-gi Tengbang (CMST) chule government scheme dang dang ho a amin akhumpeh uvin ahi. Lekha them chule thepna nei khangthah tamtah jong bank chom chom in loan apeh dinga lhenna anei uvin ahi.

Health Department leh JNIMS official hojong damtheina thu a kithopina ngaicha ho, reimbursement, healthcare a kithopi hol ho kithopi dinga aum uvin ahi. Minority, Other Backward Classes and Scheduled Caste , Social Welfare, Education (S), Manipur State Co-operative Bank Ltd leh Manipur Police Department hojong mipi kithopi dinga apang uvin ahi.

Meeyamgi Numit leh Hill Leaders’ Day ni a pang ho Forest Department in thingnou 1000 vel ahom doh uvin ahi. Thingnou ahop holah a hi Leihao, lamkhong phung, Chorphon (Indian Olive), Manahi (Yellow Myrobalan), Arjuna (Mayokpha), sohlhu phung (Indian Gooseberry) leh jonglha phung (Tree Bean) jong pang ahi.

MSCCE, 2016 exam lahlou dinga thutanna aum jeh a candidate hon lungkhamna sangtah toh

Imphal, Nov 15 (ET): Manipur High Court  in achesa October nisim 18 nikho a MSCCE 2016 exam lah loudinga aseiya chule ‘appointment order’ kisodoh sa ho san loudinga thulhuhna anei jeh a MCS, MPS, Jr. MCS leh MSS panmun tuh a candidate 82 lunggim tah a umlo ahitai.

Thusoh hin ahinkho pumpi atohkhah ahijeh a amaho dinga hahsa tah ahi’in, chule candidate hohin tohmun kilhenna a apan tei nadinga kitah tah leh tomngai tah a pan alah ahijeh a thutanna hi asan je hah ahi, tin candidate khat in Friday nikhon Senapati a aseiyn ahi. Thutanna umhi thudohna kinei ahipon, ahivanga keiho hi akahlah a vangsetna toh themmona neilou kahiuve, ati.

Thil umchan hi pohnat umtah, lungkham na lentah ahi’in, khonung a ipi ato diu seithei louva um ahi. “Social media a midem hon amaho hi ‘Nehguh bol 82 (corrupted 82) tia photchenna beiya aminsah uhin pohnatna, jumna sangtah, kihetkhelna aso ahi’in, mijouse masanga aminset nau sangtah ahi. Amaho hin aphat mantam tah sorkar chule mipi natohna dinga kum ni lhing aman u ahitan chule phabep hin golvah abol a inchen jong asem ahitai”, tin asei uvin ahi.

Supreme Court a ngehna neiding hibou amaho a dinga alampi ahi’in, ahahsatnau koiman ahetpeh lou ahi. “Exam dihtah a bol a pachanna neiya chule themmona neilou candidate ho dinga koiyin pan alah ding ham? aminset nauva kon koiyin akithopi diu ham? kum ni na atoh uhi mangthah dinghitam”, tihi candidate ho lungthim a ging jing ahi”, tin asei uvin ahi.

Exam a dinga kigotna a kum phabep lut ahi’in, kum ni lekha phatah a akisim theilou jouva exam a tou kit nadinga kigotna neiding hi hahsa ahi. Exam ajo jou uva abon uva service apat u ahitan, anatoh na masa dalha a hiche natoh kilah a phabep jong um ahi. Hiche service kakilah khah hi vangset umtah ahi, tia aseiyu ahitai. Atamjo hi insung pumpi ve a pang akhang uva natong masapen jong hiu ahi.

Chule atamjo hin UPSC exam peh nadinga ‘age limit’ kisem akhel kon jong hikit ahitai. Assam Public Service Commission a themmona neiho bou anatoh na a kon akilahdoh thu asei uvin, ahivanga Manipur gam a candidate 82 ho abon a service kisutan ahi, ati. Thukholna aum akilamto in chule minsetna a kon eisuhtheng diu hi kakinepna ahi. Tamtah hin achesa phat sunga na pha atoh jeh a sorkar in award apeh jong um ahi. Mopohna nei authority hon candidate ho hahsatna agel peh diu akinep nau thu jong candidate hon aseibe uvin ahi.

Ibobi lamkaina Congress team hon CPI lamkai D Raja in akithopi diuva temna neiyu

Imphal, Nov 15(ET): Chief minister anahi Okram Ibobi lamkaina Congress MLA delegate hon Doraisamy Raja, MP leh General Secretary, CPI akimupi uvin, gamsung huhna dinga atosot diuvin ngehna anei uvin ahi.

Ibobi lamkaina Congress MLA hon CPI Head Office, New Delhi khopi a tuni nilhah nidan 3.30 don a Raja akimupi uva chule memorandum apehlut u ahi. Meeting a Congress team hon hiche thu a gamsung miho pohnatna ho CPI lamkai pa henga asei uvin chule Naga Peace Accord thu suhlhap nading thu asei nauva Manipur huhna dinga pan alah dinga temna anei uvin ahi.

Chule Citizenship Amendment Bill athah a akipohdoh a ahileh CPI MP hon nasatah a adoudal diuvin jong team hon temna jong anei uvin ahi. Raja injong ache ho thusei angaipeh jouva kithopina peh dinga kitepna aneiyin ahi.  Chule Parliament Session a athu sei dinga jong kitepna aneiyin ahi.

Hetthei khat chu CM anahi leh CLP lamkai Ibobi lamkaina a Congress Legilsature Party delegate 15 in New Delhi ajot u ahi’in, Indo-Naga Peace Talk in gamsung atohkhah louna ding thu sei dinga kholjin u ahi. Team hohi tu le tua New Delhi khopi a um ahiuve. Team hon amasapen a AICC lamkai Sonia Gandhi, Prime Minister, Union Home Minister chule political party lamkai dang dang ho akimupi diu ahi.

Congress team a hi CM anahi Okram Ibobi, MLA K Ranjit, MLA AK Mirabai, MLA Dr Chaltonlien Amo, MLA K Meghachandra, MLA N Loken, MLA O Surajkumar chule Speaker anahi Th Lokeshwor leh adang dang jong pang ahi. Indo-Naga thu kiseilhah na dinga Manipur gamsung akitohkhah louna ding chule CAB phatsah ahilou nadinga team hon centre a lamkai ho henga aseidiu ahi.

NITI Aayog SDG India Index a Manipur 6 channa a pang

Imphal, Nov 15(ET): 2030 kum kah a gamsung khantou machal nading chule hinkho man dan amachal nadinga lungtup um suh bulhit nadinga Chief Minister N Biren Singh in Friday nikhon Cabinet Hall, Chief Minister’s Secretariat mun a ‘Manipur Vision document 2030’ hondohna aneiyin ahi.

Chief Minister in kin gon a houlimna anei na’a, NITI Aayog SDG India Index, Baseline Report 2018 dungjuiya state 29 lah a Manipur gam leh state adang ni hi 6th position a pang ahi, tin aseiyin ahi. Manipur ‘composite score’ hi 59 ahi’in, India pumpi a average score hi 54 hi ahi, tin aseibe in ahi. BJP lamkaina state sorkar in achesa kum ni-leh-keh sunga thengtah a na atoh jeh a hiche hohi hithei ahi, ati.

Vision document hi gamsung akhantou machalna dinga policy leh program kisemna a apuihoui hiding ahi, tin aseiyin chule document hi gamsung in aumsa resource ho amanchah theina hiding ahi, ati. 2030 kum kah a gamsung in imalam jouse a chamna leh machalna, khantouna aneiding, thinglhang leh phaicham kah a kikhenna kisunem na, food security, kel chule neh lhahsamna a kon chamlhatna, thenna, numei chunga khansetna thilsoh kisuhmangna amu ding, lamlen pha chule infrastructure pha aneiding ahi, ati.

Planning Department, Manipur government, Manipur University leh UNDP in lolhing tah a Vision Document ahin pohdoh jeh a akipapina thu aseiyin ahi. Phengmai 276 lhing Manipur Vision Document hi section 5 a kikhenna a bung (chapter) 20 um ahi. Document a hi agriculture, education, health, gender equality, peace, justice, sanitation, industry, biodiversity leh adang dang ho thupi a kipe ahi.

Vision Document 2030 hi Sustainable Development Goals (SDGs) 17 in asemdoh ahi’in, stakeholder chom chom in ngaidan apeh ho alahkhom u ahi. Health and Family Welfare Minister L Jayantakumar, CAF & PD Minister Karam Shyam, PHED Minister Losii Dikho, Forest and Environment Minister Th Shyamkumar, Agriculture Minister V Hangkhanlian, Social Welfare Minister Nemcha Kipgen, Education Minister Th Radheshyam, Chairman, Manipur Handloom and Handicrafts Development Corporation S Rajen, Yaiskul MLA Th Satyabrata, Chief Secretary, Additional Chief Secretary ho, Commissioner holeh Secretaryho, HOD ho, Regional Head UNDP John Borjoyary, Prof E Bijoykumar, MU chule Planning Department official hojong kin gon a apang uvin ahi.

PM leh Home Minister in avel vel a kitepna anei nunga ipijeh a jihtho a kitepna asemdinga thumna umham, tia MP Ranjan in thudoh nei

 Imphal, Nov 15(ET): Prime Minister leh Union Home Minister in Indo-Naga Peace Talk hin gamsung atohkhah louding ahi tia tu masanga jong kitepna anei ahi, tin Lok Sabha MP Dr RK Ranjan in aseiyin chule Centre a lamkai hon avel vel a kitepna anei nunga jihtho a kitepna apeh diuva thumna umhi ipi kiseina ham, tin thudoh aneiyin ahi.

Peace Talk Final Agreement chungchang’a kachung’a ngohna eikinei khum hi jou le nal chuleh bul le bal neilou ahin chule mi phabep in media ho mangcha a MP pa akiselmang tai tia aso’u jong thujou ahin, hitia bul bal neilouva mi moh ngoh hohi MP natoh ipi ham ti helou ho ahiuve ati. MP khat hinan katoh ding jouse ahina ding bang’in kasubulhit jing’e tin aseikit’in ahi.

Annual session of Manipur Historical Society kiman na Standard College, Kongba mun a kin apanna pam a MP Dr RK Ranjan in thuso miho akihoupi na a asei ahi’in, avel vel a kitepna anei jou uva jong jih tho a kitepna asem diuva thumna kinei hi vangset umtah ahi, ati. Prime Minister leh Home Minister kitepna itahsan lou uleh idinmun u hoiya um ham”, ati.

Tu naicha state sorkar delegate ho akimupi na a Prime Minister in kitepna kipalkeh louding chule gamsung kijoulhep louding ahi tia anasei ahi’in, jihtho a kitepna anei dinga thumna umhi kisang louding ahi, ati. Gamsung MP ho apang pouve tia ngohna aum thu a Dr Ranjan in gamsunga um MP hon hiche thu sangtah a alah ahi, ati.

“MP in atoh ding amopohna ho kahe uve. Ka mopohnau hi parliament a ahi’in, lamlen a ahipoi. Gamsung thu akipohdoh teng Parliament a kinelkalna sem dinga jong kigotna kaneiyu ahi”, tin aseiyin chule Naga thu hi gamsung tongkha louva akiseilhah thei nadinga taona neiyu hite, ati. Mipin tahsan thei hih jongleh Centre a lamkai ho kitepna katahsan e, tin aseiyin ahi.

November lha a kipan ding Parliament session a Naga thu napohdoh ding ham tia thudoh anei uchun MP pa in Framework Agreement hi achelha jing nalai, akichai loulai ahi, tin aseiyin chule parliament a apilhing lou thu pohdoh ding hi akilompoi, tin adonbut in ahi.

Centre toh Naga Accord soi kaina aum jouteng NSCN Group kikhelna phatah a chelhah sah dinga CFMG in tohgon nei

Guwahati, November 15 : Achesa 2001 kum a kisemdoh Ceasefire Monitoring Group (CFMG) in Naga Accord soi kaina aum jouteng National Socialist Council of Nagaland (NSCN) group chom chom ho boina beiya kikhelna achelhah thei na dinga tohgon anei uvin ahi.

NSCN group holeh sorkar in tu naicha avel vel a meeting anei uva, kihoukhomna aneijing utoh kilhon a akah uva tahsanna kibe ahi. CFMG in thingnoi natoh toh kisai thilsoh ho avettupna ahilouleh Ceasefire Ground Rules (CFGR) avettupna hi faction len len toh hemkham kinoptona akisem masang, kum som masanga CFMG dinmun hi chom ahi.

Hemkham hi kum 22 lhing um ahitan, achesa August 1997 kum a NSCN-IM in sorkar toh hemkham anei ahi. Hiche jou, April 2001 kum a NSCN-Khaplang in hemkham asem kit a chule tukum April lha a NSCN-Khango leh sorkar in hemkham asem thu a athah a kihouna aneikit ahi. Hiche tilouva India sorkar in NSCN (Neopao Konyak-Kitovi) (NSCN-NK) leh NSCN- Reformation (NSCN-R) toh jong hemkham anei jom ahi’in, NSCN-NK chule NSCN-R toh sorkar in Suspension of Operation (SoO) asem hi kum khat suhsaobe a April 27, 2020 chan chepi dinga aphat atep sao ahi.

Tu naicha NSCN group hon CFGR soi akai toh kilhon a CFMG (NSCN-IM toh)/Ceasefire Supervisory Board (NNPG adang toh) in Naga political group hon Nagaland gam a phalna beiya kihong office (unauthorized office) ho akha diuva aseiyu ahi. CFMG.CFSB chairman, Lieutenant General Shokin Chauhan in October lha kichaiya Kohima khopi a kihouna phabep anei jouva hiche thuhilna aneiyu ahi.

“Aphatcha hiche thuhilna kipe hilou hijong leh phatna langa kalson na ahi’in, unofficial office phabep kikhah ahitai. Sorkar chule security force hon gamsunga chamna aumkit ding adeiyu avetsah ahi’in, natoh pha ahi”, tin NSCN-U lamkai C Singson in aseiyin ahi. “Nikho kichai thulhuhna akisem teng camp jouse hi kimangcha talou ding ahi. CFMG in tu masanga abol ding vaigei tah a abol hijong leh achaina akilhun kon ahitai, tihi ahet ahi”, tin political writer leh retired IAS officer KK Sema in aseiyin ahi.

CMFG chairman leh NSCN-IM in anukhah pen a kihouna anei hi October nisim 15 nikho ahi’in, ‘ceasefire monitoring’ leh ‘ground rule’ adang dang ho thu a kihouna aneiyu phatchomna lang a che ahi. Alangni in Nagaland gam a sumkolveina (trade and commerce) kai kilah thu a jong kihouna aneiya, NSCN-IM on ‘legitimate taxation’ umjom ding ahi, ati ahi. NSCN a pang ding thingnoi akilah be jing alungkhampi nau thu jong kihouna a asei uvin ahi.

April lha a um Lok Sabha election a NSCN group hon boina asemna thilsoh umlou chule Nagaland gam a ‘hemkham’ kipalkehna thilsoh jong sangtah a nemsuh ahi. Kum masa August lha a Lt.Gen Chauhan in DK Pathak khel a CFMG chairman panmun atuh ahi. “CFMG hi kiloikhomna pha chule lolhingtah ahi. Naga political system hi chombeh ahi. Indian military hon ima jouse ahet ahi’in, CMFG ho ngaidan hi thupi tah ahi. Galsat jom ding kadei tapouvin, CFMG pha kasa uve”, tin NSCN-IM Cabinet Minister khat in aseiyin ahi.

Centre leh NSCN-IM in achesa October nisim 31 nikho a Naga Peace Talk chungchanga kihoulhahna asem banga um ahitan, ahivanga Centre in kihoulhahna akisem naipon, ‘stakeholder’ jouse (Manipur, Assam leh Arunachal Pradesh) dohna akineiya kihouna akisem khom pi jouteng le bou kihouna khumkhana kinei ding ahi tia aseijeh uva mipin maban a ipi thilsoh lhungding ham tihi alungkhampi jing ahi.

Govt in winter session sung a CAB pohlut ding tohgon nei

Guwahati, Nov 15:  Thulhut khat in aseina achun Citizenship (Amendment) Bill hi Centre in Winter session a kihouna ahung lhung ding Monday nikho a pat ding utoh lhon a hiche phatsung a bill thah 27 kipodoh ding lah ah CAB jong ajouve ati. Home Minister Amit Shah panna in BJP lamkai phabep in hiche CAB hin Pakistan, Bangladesh chule Afghanistan akon India gamsung a um Non-Muslim ho India citizenship hina kipe ding  ahi ati. Hiche bill hi Northeast gamsung a mihon adei pouvin hiche jeh hin Civic body organisation chom chom in kiphinna anei jing un ahi.

Chief Justice of India Ranjan Gogoi Retired che

New Delhi, Nov 15: Tuni chun Chief Justice of India (CJI) Ranjan Gogoi anatoh na akon retires ahi toh lhon in Supreme court lawns ah farewell abol in chule anatoh nikho kichaini ahitoh lhon in case 10 amathanei na in asumang in ahi. Hiche kingon ahin ama thalheng a CJI a pang ding SA Bobde leh Judges phabep jong apang uvin ahi.  Anatoh nikho kichaini hin Rajghat a um Mahatma Gandhi lim vilna anei in ajana salam ape in ahi. Gogoi hi CJI a ding a achesa October 2, 2018 nikho achu ana jop ahi.