Meeyamgi Numit le Hill Leaders’ Day kimang Thinglhang le phaicham jopmat...

Meeyamgi Numit le Hill Leaders’ Day kimang Thinglhang le phaicham jopmat ding hi tu government tup thupipen ahi: CM

82
0
SHARE

Meeyamgi Numit le Hill Leaders’ Day kimang

Thinglhang le phaicham jopmat ding hi tu government tup thupipen ahi: CM

Imphal, Jan 15 (ET): Chief Minister N. Biren Singh in mipi ding a kivaihomna phatah pehding le thinglhang le phaicham jopmat ding hi tu government tuppi pen le chepi ahi ati. Hiche hi CM Biren in tuni Meeyamgi Numit le Hill Leaders’ Day kimanna a mipi lah a asei doh ahi.

Chief Minister in mipi kithopi le tosotna jal bou a state kivaihomna jong chamdel a chelha thei a abanle thinglhang le phaicham kah a jong kingailut le kitahsan tona asem hoi cheh ahi e, ati.

CM Biren in mipi in ahahsat agentheina akisei thei nading a Meeyamgi Numit le Hill Leaders’ Day nikho hi kigong ahi e, ati.

Hiche nikho ho a mipi in ngehna apehlut atamjo suhlhap ahitolhon a Meeyamgi Numit le Hill Leaders’ Day a lhaseh a hung jong alhomsuh cheh in hijongle hiche nikho hi chepi jing hiding in CM in aphongdoh e.

Self Helf Group le loan dei mimal 1800 ho loan apehdoh jeh in CM in Manipur State Co-Operative Bank (MSCB) pachatna jong ape e. CM in hiche application 1181  shortlist kibolna a kon SHG le mimal 400 ho chu crore 10 hompih ahi in crore 6 jong homdoh hivah ding ahitai, ati. Chule mipi dindoh nading a panla jing State Bank of India (SBI), United Bank of India (UBI) le bank dang ho CM in pachatna ape in ahi.

CM in Socio-Economic Caste Census 2011 data adihlou ho Pradhan Mantri Jan Arogya Yojana (PMJAY) chanvou amuthei nading in suhdih ahi, ati.

New Delhi Dwarka a Manipur Bhawan thah kisa vetlhahna anei tolhon in New Delhi a Bhawan 2 um jong athahsah nadia suhset hivah ding ahi e tin CM chun asei e. Bhawan 2 umsa suhset masang a Dwarka a Manipur Bhawan sah nading gam leiset acre 2 jong lah ahi in, asah nading crore 150 gon ahi e, ati. CM in Dwarka a Manipur Bhawan thah kisah na a hi Delhi a kijen a che ho gei pansatna thei ding pindan 20 le medical ventilator toh kito jong umtha ding ahi e, ati. CM in aseikit na ah Mumbai, Kolkata le Bengaluru a jong Manipur Bhawan thah sah hiding ahi e, ati.

Mipi dei na bang a Go to Village jong chelha pehding in CM chun asei be e. Chule CM in SSA le RMSA hilkung ho kiphinna jong kihoupi ding in chief minister in kouna aneitan ahi.

Tuni Meeyamgi Numit le Hill Leaders’ Day jingkah nidan 9 a pat 1:30 sung a CM in mi 1000 vel akimupi ban a lekha 350 ngailhahna jong anei ahi.

UPSC Civil service: Mi 2300 in interview kimaitopi ding

New Delhi, Jan 15: Union Public Service Commission (UPSC) in main result aphondoh tolhon in interview kimaitopi dia pachanna nei mi 2304 lhendoh ahi, ati.

UPSC in main lolhing ho a kon Indian Administrative Service, Indian Foreign Service, Indian Police Service le Central Services (Group ‘A’ and Group ‘B’) a tongthei ding ho interview lolhing ho a kon peh hidiu ahi, ati. UPSC in main lolhing mi 2304 ho hi February 27, 2020 a pat interview toupan diu ahi,  ati.  UPSC in interview touding ho achom a lekha apehlou ding e-Summon ahiloule e-Call bou apehding, jihtho a mujat le interview a mujat kigom khom a atam mu pen ho lhendoh hiding ahi, ati.  UPSC in interview nikho le aphat khelding a ngehna kisei khatjong pomlou din thuso abolkit e. Chule interview losam ho commission website a ni 15 sung a tahdoh hiding ni 60 sung kitahding ahi e tin UPSC thuso chun aseiye.

UPSC makaina noi a UPSC Civil Services Prelim, Main le Final result jong aphondoh jiu ahi. Alhangpi a August lha le prelim exam abolji chu kumthum jou a tu a hi umpan, graduate chai jouse themvetna pang thei ahi.

IRB kilahna a adih louva thil akibol’e, tia MPCC in ngohna nei

IMPHAL, Jan 15 (ET): State sorkar in IRB personnel alahna (recruitment) a Optical Mark Reading (OMR) ajui diuvin Manipur Pradesh Congress Committee (MPCC) in state sorkar henga thumna aneiyin ahi.

Tuesday nikho a Congress Bhawan mun a PCC spokesperson Kh Ratankumar in thuso miho akihoupi na’a, gamsunga Biren lamkaina sorkar in khantouna ding project chom chom achepi jeh a apachatna thu aseiyin chule tua sorkar in kitepna anei atamjo hi anatoh a kivetsah loulai ahi, ati.

Gamsunga project len len abangkhai a kinga ho Ratan Kumar in ajeh dohna jong aneiyin ahi. Tua aumding India Reserve Battalion (IRB) personnel kilahna process hi dihtah chule phatah a abol diuvin temna aneiyin, recruitment process a lamdih louva thil akibol’e, ti thulhut MPCC in amu ahi, tin jong ngohna aneiyin ahi. Chief Minister in Imphal-Mandalay regular flight service aganna thei pen a apat dinga PCC spokesperson in temna aneiyin chule Chief Minister in Manipur Police personnel ho kihop peh a kengkoh leh konggah panna a uniform chungchang thuchen mipi het a asei dinga jong temna aneibe in ahi.

Road safety week toh kisai a Ccpur a two wheeler rally kibol

B. Lalboi Gangte

Ccpur, Jan 15(ET): District Police makai na noi in  tuni jingkah lam nidan 10 vel in 31-vei channa National Road Safety Week toh kisai in  numei ho Two-Wheeler Rally ana kibol in ahi. Rally chu Peace Ground, Tuibong ah T. Paukhanlian, Chairman, Autonomous District Council, Churachandpur in lhadoh na ana nei in ahi. Rally chu Peace ground a ana kipan in, tedimroad, Lanva lei akon in ahin vel kit uvin SP office tuibong a ana chai uvin ahi. Hetthei khat chu National Road Safety Week hi January 13 a ana kipan a ahung lhungding January 17, 2020 chan a um ding ahi. Jing nikho le safety week toh kisai a jingkah lam nidan  10 apat a District Police makai na noi a walkathon umding ahi.  Hiche walkathon hi Peace Ground, Tuibong akon Lamka Public Ground, Hiangtam Lamka chan a um ding ahi.

Tuni numei ho gari neo rally kibol na toh kisai a Amrita Sinha, IPS, Superintendent of Police, Churachandpur leh Inspector James Vaiphei, in-charge, OC Traffic in thuso miho toh akihou limna hon a, TCP makai nanoi a safety week toh kisai a khopi sung mun chom chom a signboard tamtah ana kitah dan thu tahlang na ana nei in ahi. Saftey week toh kisai a passenger po a lhai le  Winger, Diesel Auto, Taxi le adang dang ho ading a free eye check up kibol ding dan jong tahlang na ana nei in ahi. OC James in ahou limna a Lamka khopi sung neocha ahi vang a gari tam toh lhon a traffic daan ho phate a jui ding apoimo dan thu tahlang na ana nei in ahi. Gari neo tol ho in helmet aki khuh cheh uva anung a tou ho in jong akhuh ji na ding uvin jong temna ahin nei in ahi.

CMHT card anei vanga ama sum a kijen nu JNIMS in Dk. 20,000  ale dinga ISA in recommendation pe

Imphal, Jan 15(ET): Achesa January nisim 12 nikho a Imphal Times thuso a CMHT chungchang thu kiseiya, damlou khat in dangka 1500 kalval amang theipon chule test bol dinga damlou nu doctor hon private clinic a asol e, tia thuso anaum chule Editorial a ‘What ails Chief Minister gi Hakshelgi Tengbang’ ti thupi January nisim 13 nikho a kijih, thuso editor in Facebook post a CMHT kichepi chungchang post atahdoh thu Implementation Support Agency (ISA), Chief Minister gi Hakshelgi Tengbang (CMHT) in apet pet a kholna aneiyin chule Medical Superintendent, JNIMS in CMHT card neiya Longjam Ronibala Devi, Keishamthong Longjam Leirak, Imphal West a cheng damlou numeinu akijenna man anungpeh (refund) diuva sorkar in thuhilna anei dinga asei uvin ahi.

Thulhut dungjuiya Joyshankar leh Santoshi, Implementation Support Agency (ISA) in athu akholna’a damlou Longjam Ronibala Devi hi Associate Professor Dr Th Rajendro Singh, Medicine Department in December nisim 24 nikho a Female Medicine Ward, JNIMS a admit abol ahi. Anikho ma ma a M/s Babina Diagnostics Centre mun a investigation bol dinga thuhilna aneiyu ahi’in, KFT (thisan test) hibou lab pam a abol u ahi.

Ahivanga CMHT Help Desk a Arogya Mitra hi December nisim 26 nikho a bou kipelut ahi. Lab test adangse hi CMHT noiya JNIMS a kibol ahi’in, chule ISA team ho henga beneficiary nu in December nisim 24 a kon January nisim 6 chan JNIMS a akijen sunga lou chohna a dangka 8000 leh hospital pam a investigation bolna a 12,000, agom a dangka 20,000 asuhmang thu aseiyin ahi.

Ronibala Devi hi hospital a admit abol pet uva, ama jen a doctor in Hospital MEDCO ahilouleh Arogya kithopina alah a nikho kipat ni a kon CMHT a book abol thei ahi, tin ISA in aseiyin ahi. Natna akihet doh masang a ‘General Ward’ package hi nikhat a dangka 1100 ahi’in, nikho sagi chan kimangthei (agom a dangka 7700) ahi. Damlou nu hi hospital a ni 14 um ahijeh a Package hi ni sagi (nikhat a dangka 1100) kehlet be thei ahi.

Laboratory test jouse hi JNIMS Lab a bolthei jeng ahi. MEDCO/Arogya Mitra in akilom Package hi CMHT Package list a aumpoi ati a ahileh amaho hin adamlou jen nu doctor in ‘unspecified package’ akilah dinga thuhilna aneithei ahi’in, hiche hi JNIMS ahilouleh CMHT umna hospital dang a doctor hon abol jing ahi.

Tu leh tu a CMHT/PMJAY noiya JNIMS a Arogya Mitras/MEDCOs hi 12 um ahi’in, adamlou beneficiary/mijen doctor ho kithopi dinga um u ahi. Hiche case a beneficiary in ama sum dangka 20,000 asuhmang hi JNIMS in refund abol dinga thuhilna kanei maitheiyu ahi. Chule MS JNIMS in khonunga hitobang case aumsah kit lou nadinga SNC in ngehna anei thei ahi, ati.

Beneficiary hon hahsatna anei hou hospital a um Arogya Mitra ahilouleh toll free no. 1800 103 2015 a report abol uva, media henga ache pai sang uva kithopina angeh theiyu ahi, tin SNC in avel a aseikit in ahi. Longjam Ronibala Devi, CMHT card neinu hi RHF (rheumatic heart failure) natna nei ahi kihedoh ahi’in, ahetna amol jeh a ading dol a ana jen louvu ahi.

Koubru lhang’a nakitong thu’a Narcotic SP panna’a Heirok Club in SGAYO heng’a ngaidam thumna aneitoh lhon’a athu seichai hita

Kangpokpi, Jan 15 (ET): Kangpokpi District hopsung Koubru lhang’a Kaani lei Narcotic leh State Force chuleh Ningol Club Heirok hon ana suhset nao chung leh abolkhel nao chu’a Narcotic SP panna’a tunin 1st MR a Narcotic Office mun’a kihoutoh na toh gom in ngaidam anathum tah jeh uvin SGAYO in angaidam thum’u anasan peh tan ahi. Hetthei khat chu achesa Jan. nisim 13 nikho’a Naroctic SP Kunja Kishore in hiche thilsoh nachung’a SGAYO kouna ananei in hiche achun Narcotic SP leh Heirok Club in kiphatlam naleh ngaidam thum na anei nao ban’a maban leh hitobang toh avel’a abol kit tah lou ding kihahsel na ananei utoh lhon’a angaidam thum nao SGAYO in anasanpeh ahi.

Hiche toh lhon’a hiche thilsoh nachung’a SGAYO in sangtah’a kithampi ding’a lunggel anei ahi in ahin hitobang’a Heirok Club leh SP in abolkhel nachung’a ngaidam akithum nachung’a gamsung’a mipi jouse in ahetcheh nading uva News Paper mangcha’a ngaidam athum nao thu ahin soh ding uvin jong kinoptona jong ananei uvin ahi.  Chuleh SGAYO in pohnat jeh’a hichan hi ahin lhaipi’a hichan hi hung lhung ahi jeh in hitobang dinmun aum teng YO boipi ding hilou in VO in aboipi joh ding ahi tin SYGAYO Info. Secy. Paul Guite chun aseiyin ahi. Hiche nachung chon’a  YO Executive hohin Youth te khantou nathei ding chuleh themjil nalam ahilou leh kichep golseh lam’a hapan ding joh akihi in ahin hitobang Nam issue hung umdoh nathei thu hohi avel’a SGAYO hon sei talouva SGAVO ho joh in akilah ding uvin temna jong anei in ahi.

Alangkhat’a amaho toh kinop to na aum tah toh lhon’a amahon jong News paper mangcha’a ngaidam athum ding uva kihouna akinei toh lhon’a nung teng avel’a CSO in eiho tailouva Koubru lhang’a anop nop abolthei tahlou ding ahitai. Hijeh chun lhang sung’a pute pate chuleh Housa ho jousen jong gamsung hi maban’a iti venbit ding ham tihi angaito ding’u phat jong ahi tai tin Paul Guite chun aseibei.

MSF in Uripok Yambem Leikai a um RTS Dealer Private Ltd phat teplouva kha dinga thuphon nei

IMPHAL,  Jan. 15(UNA): Manipur Students’ Federation (MSF) in tohmun peh dinga gamsung mi ho henga sum tamtah dong a chule scam project chom chom bol a RDS Dealer Private Limited (RTSDPL) phat teplou kha dinga phondohna anei uvin ahi.

MSF Head Office, Kwakeithel mun a Wednesday nikho a press meet abol nauva MSF in hiche thuphon anei ahi. Vice president, MSF Sazad Bhumamayum in thuso miho akimupi na’a, Uripok Yambem Leikai a um RDSDPL Managing Director Kh Rajendra Singh in Solar Power Project, 500 Megawatt, Loktak Beautification, Firefighting, RBI Fund Lottery, Anti-Microbial Surveillance Sustem (Indian Council of Medical Researched noi) chule Manipur Nano Science and Technology panna a project chom chom alah ahi, ati.

Circular agent tamtah asodoh uva, tohmun peh ding tia jouthu a kichem uva sum tamtah adon u ahi. Vangset umtah chu office in-charge leh assistant in-charge jeng injong project chom chom ho alhinga ahetlou chule amaho kivaipoh dan ivet leh project hohi alhem ahi, tin vice president in aseibe in ahi.

MD Rajendra Singh hi MSF office a hung ahitan, MD in simlai kiloikhom ho henga January nisim 10, 2020 kah a ‘white paper’ kasodoh ding ahi, tia tahsanna neitah a asei ahi. Hiche jeh a simlai kiloikhom hon phat sottah anga ahi’in, ahivanga akipe phat sunga ‘white paper’ pe louva kiselmang ahi, tin vice president in aseibe in ahi.

MSF in athu phatah a akhol jouva tuni a kon RDSDPL office hi phat teplouva kha dinga phondohna anei ahi. MD ama leh ama akipehdoh a aganna thei pen a MSF office a ahung dinga vice president in temna jong aneiyin ahi. Hetthei khat chu achesa kum som masanga MD Rajendra hin gamsung mi ho henga sum tamtah akilah’a, chule phat sottah ana kisel mang ahi. Gamsung miho hitobang jouva kichem leh gucha a pang ho a kon akichih thei diuvin vice president in temna aneibe in ahi.

Nu le pa in government school a numei akaisah in, private school a pasal kaisah ding adei e: Survey

Guwahati, Jan 15: NGO Pratham in India minu mipa atamjon cha numei ho government school ah akaisah un hinla cha pasal ho private school ah akaisah uve tin asei un ahi.

Annual Status of Education Report (ASER), 2019 in jannia asodoh dungjui a themjil lam a numei pasal kikhetna lentah mudoh ahi.

Kum 4 le kum 5 chapang government school a kai numei chu 56.8 percent le pasal chu 50 percent ahi in hinla private school a kai numei chu 43.2 percent le pasal chu 49.6 percent bou ahikit e. Chule kum 6-8 kikah government school a kai numei chu 61.1 percent le pasal chu 52.1 percent ahi.

Hiche hi Northeast panna a India state 24 a kon district 26 ho kholchilna a kon kisemdoh ahi e. Hiche kholchilna kibol sung chun kho 1514 a kon inlap 30425 a kon tahsa kum 4-8 kikah ho kholchilna a kon kiboldoh ahi.

Kum lhom cha a pat numei pasal ho kichom bol na umpeh ahijong thulhut a kon hetdoh thei ahikit e.

Langkhat a Right to Education Act, 2009 (RTE) in chapang kum 6 in class 1 asimpat tei dia asei vang in kholchilna a kon class 1 simpan atamjo kum 5 ahi hetdoh ahikit e.

Meghalaya East Khasi Hills district a chapang kum 5 a kaipan chu 65.8 percent le class 1 a kaipan chu 9.8 pc le class II a kaipan chu 16 pc ahikit e.

 NIA in khopi sung mun 3 kholchil nanei

Imphal, Jan 15 (ET): National Investigation Agency (NIA) in tun Imphal khopi sung mun 3 a thingnoi’a akon fund kibol hiding’a ginmo na thu ajah utoh lhon’a kholchil na ananei uvin ahi. Thulhut kimu dungjui in New Delhi akon Deputy Inspector General of Police makai nanoi in NIA team in Sinam Pritam Eastern Hero Showroom chuleh Ringon @ Ramung chenna Dewlaland Kabo Leikai jingkha lam’a kon in kholchil nananei uvin ahi. Chuleh NIA in kholchil na anei phatsung uvin State Police, IRB, Manipur Rifles leh Women Police personnel honjong kithopina anape uvin ahi.

Dan in aphal lou Dk. lakh 59 man thil kiman

Imphal, Jan 15(ET): Assam Rifles hon HQ IGAR (South) lamkaina a Khudengthabi Check Post, Tengnoupal district a January nisim 13 nikhon dangka lakh 59 val man dan in aphal lou thil aman uvin ahi.Duty bol sepai hon thuguh amu utoh kilhon a Md Wahidur Rahaman, Moreh a cheng in ahin tol register kibol lou Scooty avom alamtin uva kholna aneiyu ahi. Gari a hi Md Mukram, Moreh leh Md Imtiyas Khan, Wangjing, Thoubal district anunga tou lhon ahi. Gari phatah a akhol nauva international market a dangka lakh 59 vel man hiding WIY tablet 2.068 kg amudoh u ahi.

Akiman ho chule thil Moreh Police station a maban thukhol dinga apedoh tauvin ahi.

Ccpur town sung le avel a Christmas le New Year a khosung jemhoi pen kitetna toh kisai a kipaman pehdohna ana um

B. Lalboi Gangte

Ccpur, Jan 15(ET): Autonomous district council ADC CCpur panlah na noi a  Christmas 2019 le Kumthah 2020 lopna toh kisai a Lamka leh a vel ho a khosung jep hoi na kittet na a kipaman tuni in pehdoh in ana um in ahi.

Hiche kipaman pehdohna kingon chu tuni ni sun nidan 2 vel  a council office a ana kibol ahi.  Kingon achun T Paukhanlian, Chairman, ADC CCpur, Vice-Chairman, Deputy Chairman, Executive Member, MDC, CEO, ADC CCpur leh staff-te maban a kho haosa, village authority leh member ho in panlah na an anei uvin ahi.

Kingon a T Kammuanlal Simte, MCS, CEO CCpur in district adia a masa pen ding a Christmas 2019 leh Kumthah 2020 lopna toh kisai in vengsung jem hoinakitet na kumhei masang a phondoh na ananei utoh lhon a tuni a kipaman pehdoh a um ahi.  Chairman pa in ahou limna a achesa December nisim 2 nikho a vengsung  ho kumhei toh kisai a jemhoi ding a phondoh na an anei utoh lhon a council member ho in kho sung veng sung ho vilna nei a ana vet lhah jing dan u thu tahlang na ana nei in ahi.

Christmas seh a mipi in a inn cheh u ahi lou le hou in ho jep na anei jing utoh lhon a  Nagaland leh Mizoram te bolbang a khosung jep hoi ding tohgon council in ana nei toh lhon a ana kibol ahi. Churachandpur sung a veng sung jem hoi pen a lhendoh ana hi chu Nehru Marg in ana a in, ani channa in New Lamka Vengnuam apang in chuleh athumna in Muolvaiphei le Chienkongpang te in ala uvin ahi. Consolation prize chang ho chu Red Cross Road, District Headquarter, Zenhang lamka leh Elim veng, new lamka te ahiu vin ahi.