MCSCCE 2016 re-exam bol ding thu a MPSC Secretary thuso ATSUM in...

MCSCCE 2016 re-exam bol ding thu a MPSC Secretary thuso ATSUM in donbutna nei

77
0
SHARE

MCSCCE 2016 re-exam bol ding thu a MPSC Secretary thuso ATSUM in donbutna nei

Imphal, Aug 29: Manipur Civil Services Combined Competitive Examination (MCSCCE), 2016 toh kisaiya MPSC Secretary in August nisim 16 nikho a niseh thusoh ho a thuso anei All Tribal Students Union Manipur (ATSUM) in donbutna chule MPSC leh kiphinna bol ho kah a boina aum suhlhap na dinga thuso anei uvin ahi.

Constitutional Body khat ahijeh a candidate tamtah in exam hi thengtah leh dihtah a kibol ding chule procedure jouse hi media leh court ang chan a dettah a adin jou ding atahsan ahi. Vangset umtah a appointment akipeh kum ni leh keh jouva Manipur High Court in exam asan peh tahlou jeh a lolhinna nei candidate ho lungkhamna a dim ahi, tin Seiboi Haokip, General Secretary, ATSUM in soi akai na thuso a asei uvin ahi.

Exam akibol na a adihlou aume tihi gamsung miho kihetthem sah ahi. Hiche jeh a High Court in pan alah a, CBI in thukholna apat ahi. MPSC a tu masanga um a ana kisei nehguh, sihnei langnei na leh deilhen chom ho hetdoh ahi a, themmona neiho gotna akipeh thei nadinga athu kholna um ahi. CBI in thukholna anei lai ahi in, adihlou jouse kholdoh nadinga thukholna kichai loulai ahi. Ahivanga MPSC in August nisim 14 nikho a main re-exam kibol vah ding ahitai, tia thuphon aneihi kidang tah ahi, ati.

Anichanna a, MCSCCE 2016 a adihlou umho vetoh dinga High Court in asemdoh Enquiry Committee thu a review petition um ahi. Committee ho kah a deisah kibanglou um ahi in, amaho chate hi akisei exam a candidate umham ti thutah mipi leh candidate hon ahet diu doltah ahi. Achuti a ahileh committee in hiche chungchang a thuphon anei louham, ti thudoh jong um ahi. Athu hi High Court a um nalai ahijeh a MPSC in court sei abol a, thutah a thutanna aumna dinga pan alah ding ahi, ati.

Athum channa a, CBI in thukholna anei chule High Court a review petition kipelut ho panna a exam kibol na a adihlou ho akisuhtheng teng exam bol ding kidoudal louding ahi, tin asei uvin ahi. Supreme Court in athah a exam bol nadinga phat atep lou ahi in, hiche jeh a kinotah a exam bol ngai lou ahi. MPSC in amaho deilhen banga thutanna aneidiu ahipoi, ati.

Alangkhat a, vannoi muntin chule Manipur gam a Covid-19 pandemic kal jing ahi in, igam uva case aniseh a akalbe jing imu u ahi. Natna gangtah a akilah to jing chule kivenna sangtah nei phat a exam bol ding hi hahsa ding ahi. Hiche exam hi NEET ahilouleh JEE kiti exam ho banga khatvei bol a kichai theilou ahi in, MCSCCE, 2016 exam nukhah dungjuiya ni 15-20 ho lut a, simlai khat cheh in agom a nidan 24 (paper 8 a nidan 3 cheh) asuhmang ahi. Simlai ho ni 4 mask ahilouleh PPE angaichat leh tou uva abol diu ahi in, hiche jeh a tu dinmun a exam bol ding hi chihna hilou ahi, tin asei uvin ahi.

Chule tuchan geiya MCSCCE 2016 exam kibol na a adihlou aume kiti hohi lolhinna nei candidate ho chunga kimu loulai ahi in, hiche jeh a athu suhtheng ahi masanga exam kibol hin khonunga boina asemdoh be ding ahi. Hiche ho jeh a CBI in thukholna achaiya chule themmona neiho dan dungjuiya gotna akipeh kah a MCSCCE 2016 re-exam bol ding deilouna lunggel kisei ahi, tin ATSUM thuson aseibe in ahi.

Xxxxxxxxxxxxx

Corporate department akisem doh jouva Electricity department a natong hon promotion mu ding kinepna nei louvu

Imphal, Aug 29: Achesa 2014 kum a Manipur State Power Distribution Company Limited (MSPDCL) leh Manipur State Power Company Limited (MSPCL) akisemdoh jouva masang laiya meivah amit jing jeh a gamsung mihon hahsatna ato tua sorkar in asuhlham tan ahi.

Corporate department ni akisemdoh jouva meivah kitup a, khangthah tamtah jong corporate body teni a pang ahitai. Natong a kila chule regulation chepi hohi atamjo tua aum nalai state Electricity department a kichuhna nei leh natong jing staff ho hiu ahi. Amaho hi corporate body teni a deputation a akoi uva, experience dungjuiya promotion line thu ahiteng jumna ato u ahi.

State power department a tua hi natong lhomcha bou um ahi in, achesa kum 15 val Section Officers (SO) rank a department a lut ho tuchan geiya hiche rank hi uva chule government service rule dungjuiya increment jong amu louvu ahi. State power department a um amaho promotion peh ding thu aumteng corporate office a section chom chom in adoudal jeh a kihetkhel na soh ji a, state power department a umho dinga service career boi ji ahi.

Sorkar in amaho dinmun ahetpeh uva chule service career hitia akijumso louna dinga phat sottah thohgim a department staff hon ngehna anei uvin ahi. MSPDCL leh MSPCK staff akilah a kon electricity department a dinga staff kilah kinga ahitan, ahunglhung ding kum 10 leh 15 jouteng Electricity department a staff umlou ding ahitai, ajeh chu recruitment hi abon a corporate office in amaho ngaichat dungjuiya alah ahi.

Corporate office in garde 1 leh II dinga alah hohin na atoh nau kum 6 nailam ahitan, tua hi corporate office in alah hohiamaho guideline dungjuiya promotion process chelha ahi. Ahivanga, sorkar in service rule agel khoh loujeh ham ahilouleh he na sa sa a don louva akoi jeh uham Electricity department a phat sottah natong technical staff ho dinga promotion mu nading kinepna umlou ahi.

Mopohna nei sorkar vaipo hon tua hi pan alah phat u ahitan, sorkar in chingthei tah a hiche ho thu hi asuhlhap ngai ahi.

Xxxxxxxxx

UTPCM in ATSUM, ANSAM leh KSO-GHQ tosot dinga sei

Imphal, Aug. 29: United Tribal People’s Council Manipur (UTPCM) in achesa August nisim 27 nikho a niseh thusoh ho a simlai kiloikhomna thum- ATSUM, ANSAM leh KSO-GHQ in sorkar in akitepna masa abulhit dinga aseiyu tosotna anei uvin ahi.

UTPCM Secretary John Anal in soi akaina thuso a chun, thulhut dungjuiya, simlai kiloikhomna thum in achesa 2019 kum a thumna chom chom anei hou August 31 kah a sorkar in abulhit dinga phat apeh u ahi. Sorkar in kiloikhomna thum toh kitepna asem anatoh a avetsah louva ahileh ATSUM, ANSAM leh KSO-GHQ in itobang pan alah na hijong leh UTPCM in pan alah a simlai kiloikhomna ho atosot ding ahi, ati.

Thinglhang gam a um school ho a teaching leh non-teaching staff alhahsam na, hill district a school teacher ho phaicham a akimanchah jeh a boina, 2006 contract teacher ho regularize hisah ding, MMIL lecturer kilah nading, high school phabep higher secondary a upgrade bol ding, ad-hoc teacher ho regularize hisah ding, Government college ho a ST backlog Assistant Professor post a lah ding (government college a ST backlog Assistant professor post 166 um ahi), Tamenglong leh Tadubi college a Science stream umsah ding, thinglhang district a B.Ed centre hondoh ding, TA & Hills a post ong 32 lah ding, ADC a Primary teacher lah ding, JNIMS a category chom chom a backlog ST post lah ding leh adang dang hohi simlai kiloikhom hon sorkar henga thumna anei chule Chief Minister in san peh dinga kitepna anei vanga tuchan a akitahso ima umlou ahi.

Lockdown sunga state sorkar in hill district a kon specialized doctor ho alahdoh hohi kisang louding ahi, tin jong asei uvin ahi. State sorkar in tribal miho ngaichat khoh leh thumna khohsahna aneilou hin dei umlou thil tamtah asodoh sah thei ahi, tin UTPCM thuson aseibe in ahi.

Xxxxxxxx

Salungkham leh Ringpam kho kikah a kinahna um AMUCO in vangset umtah ahi, tia sei; lungmong a chenkhom dinga temna nei

Imphal, Aug. 29(UNA): Thoubal district noiya um Salungpham kho leh Tengnoupal district noiya um Ringpam (Warok) khosung miho kikah a Friday nilhah nidan 4 don a gam leiset thu a kinahna thilsoh alhun All Manipur United Clubs’ Organization (AMUCO) in vangset umtah thilsoh ahi, tin asei uvin ahi.

AMUCO secretary organization S Jameskumar Mangang in thuso aneina a, khonung teng hitobang boina aso kit louna dinga khosung tenin kihetthem to na asem ding chule gamsung mihon chamna leh lungmonna aumna dinga kithopina anei diuvin temna aneiyin ahi.

Khosung teni kikah a kinahna thilsoh aum akihetdoh jou jouva AMUCO president Pheiroijam Nando Luwang lamkaina a AMUCO team ho amun a che uva khosung teni a lamkai chule upa ho toh kihouna anei uva, hitobang thilsoh avel a alhun kit louna dinga temna kinei ahi, ati. Ache nauva MSF president Sajad Bhuiyamayum panna a simlai kiloikhomna a volunteer phabep jong pang ahi.

Khosung teni kah a kihetkhel na hi lentah hihen lang neocha hijong leh thilsoh hin boina sangtah asodoh thei chule gal sodoh nathei ahi. Hiche jeh a khosung miten ‘kingaidam na leh thilsoh asuhmil a’ kihetthem to na aneiya, lungmong a achen khom kit diuva AMUCO in temna anei ahi. Lungmong a chenkhom a kihetthem to nadinga jo chan a pan kila ding ahi, tin AMUCO thuson aseibe in ahi.

Athu hi aboi ahi in, achengkhom khosung kinai kikah chule nam chom chom kikah ahi. State sorkar in gam leiset jeh a boina asodoh louna dinga pan alah dinga temna anei uvin ahi. “Kingailutna tobang a hou dih adang aumpoi, hiche jeh a kingailut na dinga chihna hol uhite. Khosung tenin adih leh athemmo khol na a akitet jinga ahileh nam kah a kidouna chan soh thei chuteng leh dei umloutah tah thilsoh lhung thei ahi”, ati.

Salungpham leh Ringpam khosung miho akingaidam to uva, tu masanga banga lungmong a achen khom diuva temna kinei ahi, tin AMUCO thuso chun aseibe in ahi.

Xxxxxxxxx

Centre in ‘Unlock 4.0 Guidelines’ sodoh ta; School, College ho September 30 chan kikhah jom ding

New Delhi, Aug 29: Home Ministry in Saturday nikhon Unlock 4 guidelines asodoh in, hiche hi ahung lhung ding September nisim 1 nikho a kon nisim 30 chan kichepi ding ahi. September nisim 30 chan school, college, educational leh coaching institution ho kikhah jom ding ahi, tin Centre in Unlock 4 guidelines a aseiyin ahi.

Hijong leh class 9 a kon class 12 kikah simlai hon amaho nopna (volunteer) a ama ama teacher ho kom a ‘guidance’ angaichat uva ahileh school avil thei diuvin Centre in aseiyin, hijong leh Containment Zone pam a umho ding bou ahi. Hijong leh hiche hi nu leh pa/guardian hon jihtho a phalna apeh ngai ahi.

State hon containment zone pam a local lockdown restriction akoi theilou ding chule metro rail service ho September nisim 7 nikho a kon graded manner a lhai pan ding ahi, tin guidelines a asei uvin, Covid 19 restriction a ol sah be uvin ahi.

Sports, entertainment, hou thu toh kisai, politics toh kisai kin gon leh mipi kikhopna ho September nisim 21 nikho a kon kiphal ding, hijong leh atampen a mi 100 hiding ahi. Ahivanga, September nisim 30 chan gei hi containment zone ho a lockdown khoutah a kiche jom pi ding ahi, tin Centre in aseiyin ahi. Cinema hall, swimming pool, park, theatre (open air theatre tilou) chule hitobang mun ho kikhah jom ding, international air travel jong kiphal loulai ding ahi.

Containment zone sunga dan khoutah kichepi jom a, angaicha khoh tah tah ho bou kiphal ding ahi. Containment zone hi ama ama district collector leh state/UT in website a apeh ding chule Union Home Ministry athu ahetsah diu ahi.

India gam a chesa kal khat sunga alhangpi a Covid-19 case athah hi 69,558 ho kisei jing ahi in, Friday nikho a Covid 19 case athah 76,139 akimu be jouva natna nei agom a 3,458,186 lhing ahitai. India gam a case thah kisei hi kal jing jenga, tuchan geiya nemsuh loulai ahi.

Xxxxxxxx

Manipur a Covid 19 positive 117 kimube; natna a thi mi 28 lhingta

Imphal, Aug 29: Achesa nidan 24 sunga Manipur gam a Covid 19 positive case athah milham lah a 87 (pasal 54 leh numei 33) chule CAPF 30 akimudoh be in ahi.

VRDL, RIMS a 7, VRDL, JNIMS a 32, Thoubal – 1, Hillside Charitable Hospital – 1, Imphal West – 49, Bishnupur – 1, Babina Diagnostic -17, Advance Hospital – 1, Maipakpi Hospital – 1, Imphal East RAT-2, Raj Medicity – 1 chule Churachandpur a case 4 kimu ahi. Natna nei hohi Imphal West – 62, Imphal East – 9, Churachandpur – 4, Thoubal – 6, Bishnupur – 2; Chandel -1 chule Noney district mi 3 pang ahi.

Chandel a kon mikhat leh Noney a kon mithum panna a mi 4 hibou gamdang a kon hung kile ho ahiuvin, adang 83 hi ‘local transmission’ case ahi. Natna nei ho abon uva Covid Care facility a achon tauvin, containment leh contact tracing ho apan tauvin ahi.

Achesa nidan 24 sunga Imphal East district a kum 78 a upa pasal khat Covid-19 natna toh kisaiya athi in, natna a thi gamsung a mi 28 alhingtan ahi. Chule achesa nidan 24 sung ma ma a, Covid 19 positive ahina a kon damdoh a mi 129 discharged abol tauvin ahi.

Discharged kibol hohi CAPF mi 39, CC Lamboi Khongnangkhong a kijen mi 33, RIMS a 1, CCC Kasom Khullen a 3, NEILIT Churachandpur a 2, CCC UNACCO a 20 chule JNIMS a kijen mi 20 ahi in, RT PCR test a Covid 19 negative ahi jou uva asoldoh u ahitai.

Manipur a Covid-19 positive agom a 5960 (General Population -4419 and Central Security Personnel – 1541) lhing a, natna a kon dam doh jat 4186 (General Population -3376 and Central Security Personnel – 810) ahi in, active case 1746 (General Population -1017 and Central Security Personnel -729) um a chule recovery rate hi 70.23% lhing ahitai.

XXXXXXX

Government in natong lah nadia danthah asem agangthei pen a chepi ding ahitai: Ng. Roben Singh, Secretary, MPSC

Imphal, Aug 29(ET): National Recruitment Agency semdoh ding le gamsung a testing centre 1000 hondoh nadia sum ninglhing sel gon dia DOPT in jannia thupeh asodoh tolhon a government noi a natong ding lah nadia danthah semdoh a jong agangthei pen a chepi dia semtoh ahitai tin Ng. Roben Singh, Secretary Manipur Public Service Commission in Press Information Bureau leh Regional Outreach Bureau gonna noi a tuni Webinar a chu phondohna anei ahi.

Ministry of Information and Broadcasting North East Zone ADG S N Pradhan in lemna thu aseilai in government in natong alahding hi selguh umlou hel le athengthei pen a lahdia tohgon athahbeh a asem hi aphat phat a media le amopo tum ho kihouna jing a pat phatah a chelha thei bep ding ahi, ati.

Langkhat a Imphal Times Editor Rinku Khumukcham in asei na ah danthah noi a themvetna pang ding simlai hon che le na a phat tamtah asuhmang lou diu le themvetna amujat kum thum sung amanthei diuva kigong hi mun gamla hon jong phatah a amanchah thei nadia government in angaicha ho agontup angai e, ati.

PIB Imphal Director Abhishek Dayal in gam ningchong a khosa simlai ho dia jong hiche tohgon a pat khopi chanvou ho kibang a amuthei nading ahi e, ati. Hiche Webinar kingon a chu PIB le ROB Imphal region a pat official le media kigom mi 30 tobang pang ahi.

Xxxxxxxxxxxx

Manipur University in National Sports Day mang

Imphal, Aug 29(ET): Fit India Movement lhangsap na in, Fit India Campaign Committee, Fit India Club, Department of PESS le NSS Cell, Manipur University, Canchipur ho kithokhom nanoi in Ministry of Youth Affairs and Sports, Govt. of India tohgon “Observance of National Sports Day” kingon chu  Traffic Point, MU, Canchipur ah tuni jingkah nidan 8 chun Jarnail Singh, Vice-Chancellor, Manipur University; Prof. R A S Kushwaha, Dean, School of Human and Environmental Sciences; Prof. Ch. Yashawanta Singh, Dean, School of Humanities; Prof. Th. Ratankumar Singh, Dean, Students Welfare, Manipur University cum Chairman, Fit India Club ho panna in man ahi e.

Dr. Nepram Sanjib Singh, Deputy Superintendent, RIMS  lamkaina in Manipur Adventure and Mountain Biking Association (MAMBA) ho jong Cycle tol in kingon a chun pan ala un ahi. Kingon kipat masang chun apen nikho geldohna a National Sports Day kinit Hockey kichep a minthang Major Dhyan Chand jana in pahvui the na anei un ahi. Ni 12 sung chelha ding hiche Fit India Freedom Run hi Traffic Point, MU, Canchipur a pat hondoh hi a achekhom jouse’n tahsa damthei nading a cycle atol ahi. Jarnail Singh, Vice-Chancellor, Manipur University jong cycle tol a pang ahi e.

FICC le FIC, MU, Canchipur convenor Dr. L. Santosh Singh in ahungkhom jouse lemna anei in, National Sports Day kimanlo chungchang houlimna anei e. Chule Prof. T. Inaobi Singh, Head, Department of Physical Education and Sports Science, Manipur University, Canchipur key note address abol in ahi.

Jarnail Singh, Vice-Chancellor, Manipur University, Canchipur in mihem a dia apoimo pen sum le pai lut lou a tahsa damthei na hitobang a pat muthei ahi, ati.

Prof. R A S Kushwaha, Dean, School of Human and Environmental Sciences, Manipur University in National Sports Day kiman hin golseh lam a gamsung mi hatah a ahin cho thou ding ahi e, ati. Prof. Ch. Yashawanta Singh, Dean, School of Humanities in nitin hinkho a tahsa damthei na apoimo tolhon a hiche nikho hi Major Dhyan Chand geldohna gamsung pumpi a kinit ahi e, ati.

Prof. Th. Ratankumar Singh, Dean, Students Welfare, Manipur University cum Chairman, Fit India Club in hitobang a tahsa kisuhjoi na nikho khat kimang hi hinkho a dia poimo ahitolhon a hinkho lhung a bol jing ding ahi e, ati. Dr. K. Shitaljit Singh, NSS Cell Coordinator in phat khumkha houlimna anei e.

Xxxxxxx

Tuithapi kho’a meithal kikap thu’a CCpur Police hon HPC-D cadre 2 man

B.Lalboi Gangte

CCpur, August 29(ET): Churachandpur District hopsung Tuithapi kho’a ki gihna leh meithal kikap ging nachung’a ngoh’a um ho CCpur Police in tunin HPC-D Manipur region akon Cadre 2 anamandoh uvin ahi. Hetthei khat chu HPC-D cadre 2 kimat lo na ajeh hi achesa Aug. nisim 26  nilhah nidan 5:30 vel ah Tuithapi kho’a cheng B. Nanglunmang S/o (L) B. Damkhansuan heng’a agan nathei pen’a achenna inn adalha ding’a hetsah nei toh gom’a thal anakap ging jeh’u ahi. Hiche thilsoh nachung’a CCpur Police a report anabol dungjui uva Police in jong hiche thilsoh na’a panla Lalremruot Lungtau @ Michael, Home Secretary, HPC (D) Sanga Group (Manipur Region) leh Cadre 4/5 chung’a Arms Act. noi’a melchihna ananei uvin ahi.

Hiche toh lhon’a CCpur Police in jong thilsoh toh kisai’a kholchil anei jing tuoh lhon’a tunin Lalremruot @ Rema of Muolvaiphei leh Ramchullou Varte of Muolvaiphei anamandoh uvin chule thudoh na nei ding in Police custody akoi uvin ahi.

Alangkhat’a  DIG Range-III, Kamei Angam Romanus IPS in tunin CCpur District dinmun vetlhahna ananei phatsung in Amrita Sinha IPS, Superintendent of Police, Churachandpur leh Lawrence Munluo, MPS, Additional SP (Operation) teni lamkai nan Tuithapi kho jong anapha uvin ahi. Hiche phatsung’a chun khosung lamkai, Village Authority leh Tribe Leader ho anakimupi in ahi.

Xxxxxxx

CCpur District a by election a manchah ding EVM leh VVPAT vetchilna kinei

B.Lalboi Gangte

CCpur. August 29(ET): District Election Officer (DEO) Churachandpur tohgon nanoi in tunin District Training Centre (DTC) Tuibong mun’a Distrist sung’a pohlut’a aum Electronic Voting Machine (EVM) leh Voter Verifiable Paper Audit Trial (VVPAT) 177 ho First Level Checking (FLC) ananei uvin ahi. FLC Strong Room ding in tunin DC office a anahong uvin chuleh check bol ahi sung in Churachandpur leh Pherzawl District akon Government in ahetpeh Political Party jouse’a President phabep in pan anala uvin ahi. Electronics Corporation of India Limited (ECIL) Hyderabad akon Engineer 2 in FLC anei lhon in chule District Election Department in apoimo dungjui kithopi anape uvin ahi.

Alangkhat’a tuni First Level Checking kibol EVM  leh VVPAT manchah thei ding jouse maban leh First Randomization nei hikit ding chuleh hiche phatsung’a EVM leh VVPAT kimanchah na ding jouse Assembly Constituency semtup hiding hiche jouteng Second Randomization chelha kit ding ahi. Hiche nikho teng leh Polling Station a kimanchah na mun ding ho’a gontup hi ding hiche akon Vote lhah theina ding’a EVM jouse gontoh hi ding chleh Candidate min leh symbol ding EVM a tahdoh hiding ahi.

Hetthei khat chu First Level Checking kibol EVM leh VVPAT hi CCpur District ding’a hung masapen ahi toh lhon’a tuni’a EVM leh VVPAT vetlhah na’a manchah thei lou ding jouse nikho 7 sung’a Imphal khopi a anung peh ding’u ahi. Chief Electoral Officer, Manipur gonna noi’a tukum (2020) Nov lhasung’a Manipur a Assembly Constituency chom chom’a by-election um ding ahi toh lhon’a Vote lhah na ding’a manchah ding EVM leh VVPAT jouse manchah thei ding din hinam ti vetchil na chelha ahi.

Xxxxxxxxxxxxxxxxx

CCpur District a Tribe lamkai jouse in Covid-19 toh kisai’a kihoukhomna nei

B.Lalboi Gangte

CCpur. August 29(ET): Churachandpur District sung’a Tribe Leader chom chom um hon tunin MPC Office, Hmuia Veng mun’a Joint meeting ana neikhom uvin hiche achun Covid-19 chung chang thu’a seikhom na ananei uvin ahi. Hiche meeting chu Letpu Haokip, President, KIC in ana lamkai in chule kingon phatsung’a CCpur District sung’a Covid-19 kimudoh atam tah jeh in Govt. panlah na Quarantine Centre suhmang’a Positive jouse bou atum’a koi ding in kihoukhom na anei uvin ahi. Chule District dang dang in testing kit’s anei thei’a Churachandpur ah constituency chom chom in tuni chan’a khat jong anei loudan leh Govt. in Constituency jouse’ a agannathei pen’a ahin ngaito ding in adeisah dan thu jong atahlang uvin ahi. Tudin mun’a Govt. panlah dan leh positive punbe hin Covid-19 Care Centre hi hung kilhing jou lou ding dinmun ahitoh lhon’a Govt. in hiche chung thu avetsui ding uvin jong aseikhom uvin ahi.

Hiche toh lhon’a meeting a kikhom khom hon member 6 um na team asemdoh uvin hiche team member ho hin apoimo dungjui’a Govt. mopoh naneiho akithu jatmat pi’a pan alah ding chuleh apan lah nao leh poimo asah ho jouse Joint meeting kit teng seikhom ding in thulhuhna anei uvin ahi. Hiche nading’a team member ding in B. Dongzalian, Letpu Haokip, Muan Tombing, Paul Lalchhanhima, Francis Songate leh Dr. Gary Haokip analhengdoh uvin ahi.

Xxxxxxxxxxx

Truck khat in numei chapang khat anatang lih

Thoubal, Aug. 29 : Nongpok Sekmai Police Station hopsung’a um Shikhong Chingya mun’a tunin truck (bering registration no. MN0-4-A-8505) khat in numei chapang kum 10 vel khat anatang kha in amun’a chapang nu chu anathi pai in ahi tin thulhut chun aseiyin ahi. Hiche numei chapang nuhi Shikhong Chingya akon Ithemcha chanu Baby Erena ahi akiti. Hiche toh lhon’a hiche thilsoh chung’a Police hon case khat anajih lut uvin chuleh chapang nu thilong chu JNIMS morgue mun’a post mortem bol ding in anapolut uvin ahi.

xxxxxxxxxxxxxxx

Home Minister Amit Shah AIIMS akon discharged kibol vah tading

New Delhi, Aug 29 : All India Institute of Medical Sciences (AIIMS), Delhi akon thulhut kimu dungjui in Union Home Minister Amit Shah in Covid-19 akon damdoh na anei tah toh lhon’a discharged kibol vah ding ahitai ati. Hetthei khat chu Union Home Minister Amit Shah hi post Covid Care ding’a AIIMS, New Delhi mun’a admitted anakibol toh lhon’a damdoh na anei tah jeh’a discharged kibol ding ahitai tin AIIMS Chairperson Dr Aarti Vij in thuso miho hetsahna ananei in ahi.

Alangkhat’a Amit Shah hi achesa Aug. nisim 2 nikho’a Covid-19 test anakibol na’a +ve anahi jeh in anakijen in August nisim 14 nikho’a test akibol na’a –ve anahi tan ahi. Ahin Covid-19 akon adamdoh jou nung in jong August nisim 18 nikho’a AIIMS a admitted anakibol kit ahi.

Xxxxxxxxxxxxxxx

Moreh khopi sung’a Assam Rifle hon thingnou phuna ananei

Moreh, Aug 29 : Ministry of Home Affair toh kithokhom nanoi in Assam Rifle hon Moreh khopi sung’a mipi hon 2020 kum sung’a thingnou phu nalam’a lunggel anei thei nading uleh gamsung huhbit nading in Moreh Battalion, 26 Sector (Assam Rifle) hon tunin thingnou phu nading leh mipi toh kihoukhom thei nading in National Sports Day anabol uvin ahi.

Hiche toh lhon’a hiche plantation drive hin sepai sung leh khosung mipi ho heng’a thingphung phatchom dan hettohsah na ding in gamkai sung’a thingnou 100 val anaphut khom uvin ahi. Hiche drive chelhah phatsung’a 43 Assam Rifle Coy. Command in thingphut tamtah kiphuh lhuh jeh hin leiset a ecosystem nasatah asuhkhah naban’a mihem te ding injong hahsatna nasatah ahung soh doh tan ahi ati.

Alangkhat’a Mantripukhri Battalion in jong Mantripukhri Garrison, Koirengei leh Yaingangpokpi Company Operating Bases mun’a thingnou phu najong ananei uvin ahi. Hiche bang chun Keithelmanbi Battalion injong Adro, Lilong, Canchipur leh Singjamei Company Operating Bases mun’a plantation drive ananei cheh uvin ahi.

Xxxxxxxx

Home a um chaga, meithai, insung khosahna hahsa ho kithopina anakipe

B.Lalboi Gangte

CCpur, August 29(ET): Churachandpur District sung’a numei kum 70 chunglam ho vetkol namun Lajangphai aum Ruth Blessed Home for Old aged home in tunin Home a cha-ga, meithai, insung khosah na hahsa dehset ho heng’a panpi nading in neh le-chah hoppeh na ananei uvin ahi. Rev. Dr. Ruth Niangpi Singson, Founder Director Ruth Blessed Home lamkai nan tulai natna hit Covid-19 akon kivendoh nading’a Awareness toh kikop’a Covid-19 akon kivengbit na ding’a social distancing, hand washing bol’a face mask kibol jing ding in atahlang in ahi. Chule Covid-19 natna bou hilou, natna chom chom ho akipat kivengbit na ding’a tahsa leh inn kimvel ho thengthou tah’a koi ding ahidan jong aphongdoh in ahi.

Alangkhat’a Ruth Blessed home for Aged hin CCpur District sung’a meithai mi 71 heng’a sabon, chi, chini, ankamthao, ann-chang leh hawai pehdohna anei in chuleh Ruth Blessed home for Aged hin phatchesa in jong Covid-19 jeh’a hahsat natoh insung 40 heng’a ann-chang kg 10, hawai Kg. 1 cheh,  facemask anape uvin ahi.

 Xxxxxxxxxxxxxxx

North East a khoiju semna hatsah dia FICCI le KVIC in pan lakhom lhon ding

Imphal, Aug 29(ET): Government of Assam directorate of Horticulture tosotna le FICCI le KVIC gonna noi a chelha online National Conference on Honey “Honey Season 2020” kingon a Khadi and Village Industries Commission Chairman Mr. Vinay Kumar Saxena in KVIC in honey industry sem pilhing ding hi akhohsah khat ahitolhon a chutobang tohgon machal nadia FICCI panlah na hi pachat umtah ahi e, ati.

Saxena in adeh a Tripura gam a kimu rubber honey ahiloule monofloral honey hi lentah a pohdoh thei khat chu ahi in, North East gam ning chong chan gei a khoivahna hatah a pilhinsah ding hi KIVC tohgon khat ahitolhon in nikhat sung she a Kaziranga hopsung a khoi bom 1000 homdoh ahijeh in world record jong ana kimu ahi, ati.

FICCI- Northeast Advisory Council Chairman Mr. Ranjit Barthakur in vannoi kiloikhomna United Nations, World Economic Forum, World Health Organization le Agenda 30 in vaichat suhbei ding tohgon anei hi khoivah a kon 2030 kah a kumkhat sung a $ 15 billion muthei nading semdoh thei hiding ahi in, tohgon lolhin nading a government le company ho kithokhom poimo dan atahlang e.

All India Food Processors Association President Dr. Subodh Jindal in khoivah lam a India vannoi hetdoh a umthei nading a khoivah hon dan gahtah ajui a government khoiju joh nading lampi asempeh angai e, ati.

Hiche kingon a chun North East le India state chom chom a pat mi 300 tobang apang un, het thei kingon a pang lah a Govt of Assam Horticulture & Food processing Director Mr. Abdul Jalil in state sung a ama department in honey industry aboipi dan asei in, Dy. CEO, KVIC ana hi Mr. Jawahar Lal Chaudhari in khoivah ho dia insurance chung chang asei in, Dr. Sukamal Deb, Dy. CEO, KVIC-Northeast, Mr. Anup Dhanuka, MD, Kejriwal Honey, Mr. Sagar Kurade, MD, Suman Food consultants, Mr. N.K. Lotha, Team Member & Nodal, Nagaland Honey Mission hon khoivah thudol a lolhinna um ho thu in ahoulim un, chule Mr. L. . Abraham, CEO, Ria foods, Mr. Manoj Kr. Das, MD, NERAMAC, Mr. S. Bhattacharjee, Chairman, Sub-Committee on Agro-food processing & non-timber forest products, FICCI-Northeast Advisory Council ho jong kingon a chun apang uve.

Xxxxxxxx

India a Covid-19 case 3.4 million lah a adamdoh jong 2.6 million vel hi

New Delhi, Aug 29: Ni thum kijom a India mi Covid-19 natna nei athah a hetdoh be mi 75,000 le ni li chan a thina toh mi 1000 sim tha a India a Covid-19 natna nei hi mi 3463972 aphatai tin tunia Union health ministry thuso chun aseiye.

Tunia natna nei athah a hetdoh chu 76,472, Thursday ni a 75,760 leh Friday nia hetdoh chu 77,266 ahi in, tu le tu a natna nei hi agom a 752,424 ahi in abanle Friday le tuni jingkah nidan 8 chan a thina toh mi 1021 ahi in, Thursday nia thina toh chu 1059 le Friday nia thina toh chu 1023 ahi e tin health ministry thuso chun atahlang e.

Langkhat a nikhat sung a mi 65050 adamdoh pum a tuchan a Covid-19 natna a pat damdoh jong agom a mi 2,648,998 ahi in, adamdoh hi 76.47% ahi.

Natna nei sang a natna a pat adamdoh hi 21.90 % vel a khotdoh ahi in chule patepna kiboldoh jat jong Friday nia lakh 9 sim tha a million 4 val ahi in, avetsah chu hapta khatsung a million 10 patepna kiboldoh jou ahi e tin health ministry chun asei e.

Natna akipat til a hi phatecha a patepna kibol lou chu moh hetdoh thei ahipoi tin hetgilna nei hon asei un ahi.

Xxxxxxxx

Mat a um thingtum ho choh dia thing-at na nei hon ngehna nei

Imphal, Aug 29(ET): Forest department in amat thingtum ho choh ding aphalpih ding in All Manipur Saw Mill Owners Welfare Association ,Manipur hon Principal Chief Conservator , Government of Manipur  kom ah tunichun ngehna anei un ahi.

State polom a toldoh dia truck 19 a thingtum hoitah kipoho chu Forest department in achesa March It may be mentioned that  the Forest department authority had seized 19 loaded trucks of block 19, 2020 nia ana mat a Central Forest  Division , Mantripukhri , Imphal, leitol a pohlut a um chu department in johdoh ding tohgon anei chu Imphal Times in ana sodoh ahi.

Chutolhon a thing-at na nei kiloikhom hon Principal Chief Conservator of Forest kom a mat a um thing tum ho government tep peh jat a chohding aphalpeh dia ngehna lekha ana pehlut u ahi.

Xxxxxxxxx

MHRC in 2018-20 sunga tohdoh ho phongdoh

Imphal, Aug. 29(UNA): Manipur Human Right commission (MHRC) Acting Chairman Khaidem Mani in achesa August 30, 2018 nia MHRC mopo a pansah ahi a pat August 30, 2020 kum 2 phatsung a Manipur Human Right Commission tohdoh ho tunichun aphongdoh e.

Khaidem Mani in asei na ah sum le pai le natong mi alhom vang in case 300 sang a tamjo hunglut lah a case 70 tobang suhlhap ahi in, Chandel leh Moreh a jong case aga kiboipi e, ati.

Sajiwa a Manipur Central Jail, Imphal, Police Station phabep ban  Imphal east le Imphal west district a rehabilitation centre phabep le High Court nganse dungjui in thinglhang le phaicham a  Covid-19 kikulkhup namun ho vilna jong akinei e, ati.

AFSPA lahdoh chungchang thudol jihlut ban in Manipur vaihomna dinmun aboi a um jing thu in jong political party ho lunggel koukhom ahi in, chule DESAM hehna a pat Karnataka Model  examination code/law/rule juithei dia semdoh ho jong government a pehlut ahi in abanle NGO toh kithokhom in mihem in athaneina manchah ding anei ho mipi hilson na jong nei ahi e tin MHRC thuphon chun aseiye.

Xxxxxxxx

Salungpham le Ringpam kho teni kikah a kiboi na beilou lai; Kihouna um

Thoubal, Aug. 29(UNA): Jani sunkim a Thoubal district sung a um Salungpham kho le Tengnoupal district sung a um Ringpam kho teni kikah a kiboina ana um toh lhon a khomi ho in kinotona ana nei utoh lhon a district teni a vaipo ho in kihou na nei dinga kouna ana nei jeng vang uvin kho teni kikah a chamna akisem doh hihlai in ahi.

Kho teni kikah a boina um toh lhon a police tamtah in duty apoh ing u ahi. Police um toh lhon in tu chan in deilou thilsoh aum hih in ahi akiti. Boina toh kisai in SP Thoubal office mun a khoteni lamkai ho in IGP Zone-1 K. Jayenta makai na in kihoukhomna ana nei uvin ahi. Hiche kihou na achun thulhut thum ana nei uvin ahi akiti. Hiche meeting a chun kho teni kikah a kiboina um nalou ding a gam aboina ho u sung a 144 CrPC koi ding in jong kinoptona ana nei uvin ahi. Hiche boina toh kisai a maban a kihou na ahunglhungding August 31, 2020 sun nidan 1.30 pm le amun tuni kihou na mun mama a kihou na nei kit ding in phatsah na ana nei uvin ahi. Meeting kit hi Thoubal SP makai na noi a kibol ding ahi akiti.

Xxxxxxxx

Covid-19 natna um sunga ipi election hijong le bol ding kiti hi angai na ahipoi: CSO

Imphal, Aug 29(ET): State sunga kon mipi kiloikhomna chom chom hon covid-19 natna um sunga By-election hihen, ADC election hihen ipi election hi jong le bolding kiti hi angai na ahipoi thuphon anei uvin ahi.

Tuni CCSK, HERICOUN, LIPUL, MMWO le UCM ho in kithokhom a thuso ahin nei nauva tu laitah a hitobang tohgon kinei hi mipi adinga  tijat umtah ahin, election kibol ding jouse vohchon ahina ding in temna anei uvin ahi. MLA phabep in tu laitah a alhang sung mipi ho adalhah uva genthei thoh ding le amaho le amaho kivesui dinga amohvet jengu chunga nasatah a demna anei utoh lhon in, ama chang ding kigel hitobang lamkai ho hi  mipin alhen tah louding uvin hetsah na ahin nei uvin ahi.  Amaho ding kigel na in apanmun akon ahai uvin, tu in election bol kit ding in mipi suhgenthei na anei uvie tin kiloikhomna ho chun thuphon nei uvin ahi.

Xxxxxxxxxx

Sugnu police 18 covid-19 positive hi

Kakching, Aug 29(ET): Tuni Sugnu police station akon sepai 18 lam covid-19 positive ahi hetdoh in ana um uvin ahi. Hiche thuso hetdoh ana hi toh lhon in Police Station kha in ana umtan chule akilahson dinga ginmo ho holna achelha jing in ahi. Akilahson dinga ginmo ho mudoh ahi jou teng ule test kibol soh kei dingu ahi akiti.

Akihol ho mudoh ahikah uva Chandel akon CHakpikarong lampi che le vale naho Khambthel lam lampi jah hithei talouding, Maribung Khupalu lam joh jah ding ahidan jong hetsah na ahung kinei in ahi. Hiche police station a tu naicha a hung kha ahi lou le positive hotoh kinai a ana umkha akigingmo aum le ahung kipehdoh uva test ahung kibolding uvin hetsah na ahung kinei in ahi.