March 4 le 8 nile Manipur a Vote kilha ding: Manipur jaona...

March 4 le 8 nile Manipur a Vote kilha ding: Manipur jaona a State 5 a Assembly Election um na ding nikho ho phondoh hita

342
0
SHARE

New Delhi, Jan 4(ET): Manipur jaona’a India sung state 5 a Assembly Election aumding toh kilhon in tuni chun Chief Election Commissioner Nasim Zaidi in vote lhah na ding nikho ho phondohna aneitan ahi.
Election umna ding state ho ahile; Uttar Pradesh, Punjab, Manipur, Goa le Uttarakhand ahin, Election Commissioner in aphondoh dungjuiyin Uttar Pradesh Assembly Election hi phase 7 a chelha ding, Manipur Assembly Election phase 2 a chelha ding chule State dang ho hi Phase khatcheh a chelha ding ahi.
State 5 ho’a Election hi ahunglhung ding Febrauary 4 a kipat March 8 sungkah’a chelha ding ahin chule Vote simna (results) hi March 11 le kipanding ahi.
February 4 le Goa le Punjab a Election chelhading, February 15 le Uttarakhand a chelha kitding chule March 4 le 8 nile Manipur Election phase 2 a chelhading ahi.
Tuchung’a State 5 a Election aumding toh kilhon’a 2014 Lok Sabha Election jou’a kipat Vote lha tamnapen hiding ahin chule agom’a Constituency 690 a ding mipi thalheng lhenna umding ahi.
Hetthai khatchu tuchung Election umna ding State holah’a Goa in Assembly Constituency 40 aneiyin, Punjab in 117, Manipur in 60, Uttarakhand in 70 le Uttar Pradesh in Assembly Constituency 403 aneiyin ahi.
Manipur State Assembly ding toh kisaiya Assembly Constituency 60 lah’a Assembly Constituency 38 ho hin first phase a vote lhahna aneidiu chule first phase ho vote lhah ding ni chu March 4 guon ahi. Second phase hi March 8 le chelhading ahin, hiche a chu Assembly Constituency 22 a vote lhahna umding ahi.
Manipur State Assembly Election a ding first phase notification hi Febraury 8 hiding, February 15 hi nomination bolna dia last date hiding, February 16 le Scrutiny umding chule Withdrawal hi February 18 nile bolthei hiding ahi.
Second phase a ding notification hi February 11 le potding, nomination bolnadia last date chu February 18 chan hiding, February 20 le Scrutiny umding chule February 22 chan withdraw bolthei hiding ahi. Vote simna hi March 11 le kipan ding chule Election Process jouse March 15 le jotheng hiding ahi.
Manipur State a Assembly seat 60 aumnalah’a Seat 1 hi Scheduled Caste hodia reserved ahin, seat 19 hi Schedules Tribe hodia reserved ahin chule adangse hi General a ahi. Final Electoral Roll dungjuiya tuchung Manipur State Assembly Electiona hi Voter 18,07,843 hiding ahin chule Polling Station 2794 aphajou in ahi.
First Phase a Assembly Election umna ding Constituency ho chu ahile; 1-Kundrakpam , 2-Heingang, 3-Khurai, 4-Khetrigao, 5-Thongju, 6-Keirao, 7-Andro, 8-Lamlai, 9-Thangmeiband, 10-Uripok, 11-Sagolband, 12-Keisamthong, 13-Singjamei, 14-Yaiskul, 15-Wangkhei, 16-Sekmai(SC), 17-Lamsang, 18-Konthoujam, 19-Patsoi, 20-Langthabal, 21-Naoriya Pakhanglakpa, 22-Wangoi, 23-Mayang Imphal, 24-Nambol, 25-Oinam, 26-Bishenpur, 27-Moirang, 28-Thanga, 29-Kumbi, 46-Saikul(ST), 50-Kangpokpi, 51-Saitu(ST), 55-Tipaimukh(ST), 56-Thanlon(ST), 57-Henglep(ST), 58-Churachandpur(ST), 59-Saikot(ST) le 60-Singhat(ST) assembly constituency ho ahin chule second phase na vote lha ding Assembly Constituency ho ahile ; – 30-Lilong , 31-Thoubal, 32-Wangkhem, 33-Heirok, 34-Wangjing Tentha, 35-Khangabo, 36-Wabgai, 37-Kakching, 38-Hiyanglam, 39-Sugnoo, 40-Jiribam, 41-Chandel(ST), 42-Tengnoupla(ST), 43-Phungyar(ST), 44-Ukhrul(ST), 45-Chingai(ST), 47-Karong(ST), 48-Mao(ST), 49-Tadubi(ST), 52-Tamei(ST), 53-Tamenglong(ST) le 54-Nungba(ST) assembly constituency ho ahi .
Hiche ho kahlah’a Election Candidate hon Election Campaign sung’a sum amanthei diujat phondohna aneitan; UP, Punjab le Uttarakhand a Candidate hon Dk. 28 lakh chan amanthei diu chule Manipur le Goa a Candidate hon Dk. 20 lakh chanbou amanchah theidiuvin ECI phalpehna aneiyin ahi.
ECI in State 5 ho’a Assembly Election chelhah nading nikho ho aphondoh toh kilhon in Election Code of Conduct jong kipanpai ahingal tan ahi.