‘Manipur State Commission for Women’ in 13th Foundation Day nit; gamsung in...

‘Manipur State Commission for Women’ in 13th Foundation Day nit; gamsung in ‘United Nations Conference’ host abolding ahi, tia Governor Dr Najma Heptulla in sei Moreh town a security khoutah a aum vanga gucha michom hon kichatna neideh lou; mipi lungmong theilou Thil le lo pole gari ho Nagaland lut nomlou: dan toh kikal a sumdong tam

246
0
SHARE

‘Manipur State Commission for Women’ in 13th Foundation Day nit; gamsung in ‘United Nations Conference’ host abolding ahi, tia Governor Dr Najma Heptulla in sei

 Imphal, Sept. 15 (ET): Tuni chun Hotel Imphal mun a ‘Manipur State Commission for Women’ a 13th  vei Foundation Day Celebration kin kimanna achun Manipur gam in Union Nations International Conference host abol ding ahi, tin Governor Dr. Najma Heptulla in phondohna aneiyin, September nisim 30 akon October nisim 1 chan umding kin gon hi gamkaiya HIV/AIDS leh khamnathei toh kisai boina ho thu seikhomna ding ahi tin aseiye.

Chief guest a pang D.r Najma in country sagi a kon delegate hon International Conference a pan alahding ahi, tin aseiyin chule Chief Minister in Conference a pang dinga Northeast gam jouse a kon Home Minister ho kouna apeh dinga temna aneiyin ahi.

Aseibe na achun Numei kimaina, gang-rape, sexual assault thilsoh hohi kum phabep sunga gamsung a tam cheh cheh ahi, tin aseiyin chule numei kisuhgimna natoh ho douna dinga mijousen pan alahkhom dinga aseiyin ahi. HIV/AIDS natna neiya minu, sopi numei, meithal leh chaga hohi vangsetna toh nom ahiuvin, kibungkhenna ato nom u ahi, ati. Kibungkhenna ho douna dinga tohgon tamtah aumin, ahivanga hiche dan ho bulhit set a akichepi loujeh a lhahsamna umjing ahi, ati.

Commission in numei venbit nading lampi ahol dinga temna aneiyin, Law Enforcement Agency hotoh pan alahkhom diuva temna aneiyin ahi. Chule akichepi loud an hojong apohdoh diuvin aseibe in ahi. Gamsung a numei hohi kichep golseh panna a imalam jouse a amalang a pang u ahi, tin Governor in aseiyin chule state sorkar in gamsung numei ho khantou nadinga welfare scheme tamtah agon a, women empowerment hi sangtah a khohsahna apeh ahi, ati. Department chom chom a numei ho DC leh SP ahina jong um ahi, tin aseibe in ahi. Beti Bachao Beti Padhao kiti PM Modi in achepi campaign noiya state sorkar in numei lekha sim ding khohsahna aneiya chule Nute Kailhang jong thinglhang district a jong kisemdoh ahi, ati. Numei chunga thilse lhung ho gangtah a seilhah nadinga Fast Track Court kisemdoh ahi’in, district chom chom a Women Police station jong kisemdoh ahitai, ati.

Gamsung a khamnathei in society asuhboi dan thu jong Chief Minister in aseiyin, minu hon hiche douna a pan alah diuvin temna anei uvin ahi. Jin a kikou hon ‘Women News Horizon- Vol-III’ kiti newsletter jong hondohna anei uvin ahi. National Commission for Women member Soso Shaiza, Chairperson, Manipur State Commission for Women Prof. Binota Meinam, Manipur State Commission for Women a member leh chairperson anahi ho jong apang uvin ahi.

Moreh town a security khoutah a aum vanga gucha michom hon kichatna neideh lou; mipi lungmong theilou

Imphal Sept.15 (ET): Prime Minister Narendra Modi in atup ‘Act East Policy’ a dinga mun thupi tah Moreh Town a security khoutah in aumin, ahivanga Moreh Town chule Imphal Moreh lamlen (NH102) a gucha hon lungmong tah in sun noiya jong thil agu uvin, achom thei uvin ahi.

Achesa August lha a kon gucha michom gang hon manchah aman uva mi achom u ahi. Tengnoupal SP Th Vikramjit Singh lamkaina noiya Moreh Police hon achesa August nisim 29 nilhah a Tata DI khat chom a pang mi ni September nisim 13 nilhah a amat u ahi’in, ahivanga tuchan geiya gucha michom hon kichatna anei deh pouvin, Moreh College Gate maiya Saturday jan nidan 6.30 don chun Tata DI khat achom kit uvin, driver pa sum 21,000 alahpeh uvin ahi.

Gucha michom hon police ahilouleh security agency adang dang ho thilse abol nauva kichatna anei louvu ham chule security khoutah noiya gucha hon iti mi achom theiyu ham, tihi tua thudoh kisei pen ahi. Action phatah a akilahna umlou chule tuchan geiya gucha ho mat nadinga security hon operation abol lou ahi’in, security in action kitup tah a alah loujeh a Imphal-Moreh lamlen a lhai mipi ho dinga lungmonna umlou ahi.

Kondong Lairembi Check Post, Moreh Police leh Moreh Police station kah a gucha hon mi achom ji ahi’in, police station toh naicha ahi. Security hon khohsahna aneilou jeh a khonung a jong hitobang thilsoh tam cheh thei ahi’in chule mihem hinkho jong asuhkhah thei ahi. Themmona neiho police hon amat louva ahileh security ho dinga jumna lentah hiding ahi. Gucha michom ho khut a vangsetna toh hon Imphal-Moreh kah a che hon lamkah a gari angah lou diuvin temna anei uvin, ahilouleh vangsetna toh agup channa nahidiu ahi, tin aseibe uvin ahi.

 Thil le lo pole gari ho Nagaland lut nomlou: dan toh kikal a sumdong tam

 Dimapur, Sep 15 (ET): Nagaland check gate ho a dan to kikal a sum le pai dong atam jeh in thil le lo pole a pang ho Nagaland chot lut ding athaset gamtai tin thulhut akimun ahi. Thil le lo po gari tamtah Karbi Anglong New Field Check Gate leh Dillai Gate a atang den tauvin ahi.

Thuso lakhom hoa konna thusoh kimu dungjui in, ni 3 sunga hin transporter hon Nagaland a lut thei louvin aumtan ahi. check post hoa hin sum kidong jing ahin, tulai phat in sum kidong sangtah in akal tai, tin Nagaland lut louvin Karbi Anglong sunga kinga ahiuve. Thuso lakhom ho toh kihoulim, local businessman khat in transporter ho kiphinna hi ache jom leh ka sumkolveina nasatah a atohkhah ding ahi ati.

Public Action Committee, Naga Council hon thilsoh umchan ahetdoh phat uvin, Nagaland Governor chuleh  Chief Minister pa henga sum le pai, kai don na mun hoa dan to kikal a kidong ho hi kham hen tin lekhapeh in ajih uvin ngehna anei uve. Thil le lo ho hi gamsunga aphatcha akipoh lut lou leh neh le chah man kal ding, neh le chah jong kilhasam khading ahi tia mipi te kichat na alen in ahi. Boina ho hi phatmasa laiya jong umsa ahin, transporter hon Sorkar henga alhut vang uvin donlou in akikoi in, sorkar in anatoh ding apohdoh loujeh a gamsunga kiphinna lhung ahi.