Manipur Sorkar in July 1 a kon 15 chan chepi ding Lockdown...

Manipur Sorkar in July 1 a kon 15 chan chepi ding Lockdown guideline sodoh; Themjilna mun leh Ima Market thum kikhah nalai ding

57
0
SHARE

Manipur Sorkar in July 1 a kon 15 chan chepi ding Lockdown guideline sodoh; Themjilna mun leh Ima Market thum kikhah nalai ding

Imphal, June 30(ET): Disaster Management Act, 2005 Section 20(2)(a) noiya State Disaster Management Authority a Chairperson, State Executive Committee hina a Chief Secretary Dr J Suresh Babu in July nisim 15 chan ahilouleh order asodoh kit kah a Imphal khopi chule district headquarter ho a juiding guidelines asodoh in ahi.

Gamsunga natna nei atam cheh cheh a chule gamdang a kon lenna a hung kile atam cheh cheh jeh a lockdown kichepi kiladoh theilou ahi. Hiche jeh a Disaster Management Act, 2005 noiya Chairperson, State Executive Committee, State Disaster Management Authority hina a juiding guidelines ho kisodoh ahi, tin order asodohna a aseiyin ahi.

Deputy Commissioner in anasei banga containment zone jouse a lockdown le curfew bulhing set a July 15 chan kichepi ding chule jan nidan 6 a kon jingkah nidan 5 chan order asodoh kit kah a July 15 chan curfew umding ahi.

Akikhah nalai ding ho

July nisim 1 nikho a kon nisim 15 chan gamsung pumpi a akikhah ding hohi Home department in phalna apeh ho tilou inter-state bus service jouse, auto rickshaw le taxi, school le college, themjilna mun, training le coaching institution ho, hotel, restaurant le hospitality service ho (tourist ho panna a health, police, government official, healthcare worker le gamdang a kon hung kile ho lhunna tilou) ho kikhah ding ahi.

Cinema hall, shopping mall, gym, swimming pool, park, theater, auditorium, assembly hall le mipi kikhopna ho, social, political, sports, entertainment, academic, cultural, religious function le mipi tamtah kikhopna ho, chule saloon le spa jouse jong kikhah jom nalai ding ahi. Imphal a um Ima Market thum chule Ngarigali a retail shop (dukan) hojong kikhah ding ahi.

Akihong ding ho

July nisim 15 chan gamsung pumpi a aphat tep louva akihong ding hohi, angaicha khoh toh kisai ho (essential service), dammona thu toh kisaiya hospital, nursing home, clinic le dispensary ho chule Jan Aushadhi panna a lou kijohna chemist, pharmacy ho, medical laboratory le collection centre, veterinary hospital, dispensary, clinic le pathological laboratory chule vaccine kijohna le supply kibolna mun ho kihong ding ahi.

Social sector a chaga in, tibukimlou ho chule lungthim kivat ho leh tehse ho, meithai ho umna mun ho kihong ding ahi. Juvenile home jong kihong ding chule Old Age pension/widow pension/freedom fighter pension ho, Anganwadi centre a neh le chah ni 15 sunga khat vei beneficiary ho inmun chan a kihop peh ding ahi.

Themjilna mun jousen online class abol ding jong kihong jom ding ahi. Thil kipohna gari alhai ding Mao, Jiribam le Jessami a thil pohna gari ho kikhah louding, highway a truck semphatna workshop le dhaba (cha donna mun) hojong kihong ding ahi. Ahivanga, truck driver hole helper hon Standard Operating Protocol (SOP) ajui tei diu ahi in, koi tobang a inn vil aumle home quarantine a umding ahi. Railway contract labour le staff ho che le va le jong kikhah louding ahi, tin thuson aseibe in ahi.

 

BJP lamkai ho kimupi dinga CM Biren New Delhi jon a che ta; Congress MLA RK Imo le midang 4 in kilhonpi

Imphal, June 30(ET): Chief Minister N.Biren Singh  Tuesday nilhah nidan 2 a special charter flight a New Delhi jon dinga alengdoh tan ahi. CMO thulhut dungjuiya, BJP national president JP Nadda, Prime Minister Narendra Modi le Home Minister Amit Shah panna a centre a BJP lamkai hotoh kihou ding ache ahi in, June 19 nikho a Rajya Sabha election a BJP candidate Leisemba Sanajaoba lolhinna chule adang dang thu toh kisai ahi.

Chief Minister Biren hi Congress MLA RK Imo toh kilhon ahi. Manipur Chief Secretary Dr. J Suresh Babu jong che dinga um ahi in, ahivanga akon a avohhai ahi. PRO to CM Sanajaoba le midang ni jong pang ahi. Rajya Sabha a BJP candidate in lolhinna anei vanga CM amatah in Rajya Sabha election masang le akichaiya politics dinmun ho asei ding ahi, tin CMO in aseiyin chule NPP MLA ho thu giltah a aseikhom diuvin jong aseibe uvin ahi.

Sorkar tosot tahlou dinga haina anei nunga BJP lamkaina sorkar a NPP MLA 4 ho kile kit ahi in, thumna phabep anei uva chule BJP toh kiloikhom NPF honjong ministerial birth kibang tah a ahop diuva thumna aneiyu ahi. Minister 4 le portfolio athum uhi sorkar ‘blackmail’ kibol tobang ahi in, NPP apan loule BJP sorkar lhu ding ahi, tina ahi. Kal phabep masanga BJP MLA in thuso miho akihoupi na a, NPP MLA ho abon uva minister panmun akipeh alunglhai louna thu asei uva, sorkar in kikhelna lentah asem louva ahile kiphinna bol dinga jong aseiyu ahi.

Rajya Sabha election kichaiya N Biren sorkar in NPP tosotna beiya sorkar ventup jou ding atahsanna thu asei ahi. “NPP beiya Rajya Sabha election kijou ahi in, floor test a jong BJP ding jom ding ahi tihi tahsanna kaneiyu ahi”, ati. Party chief Conrad Sangma le BJP lamkai Himanta Biswa toh kihouna anei jou uva NPP MLA li hohi CM Biren lamkaina sorkar a kile kit u ahi.

NPP MLA 4 ho minister panmun a akoi jom a chule portfolio apeh ding ham, ahiloule BJP MLA adang ho lunghanna avetlhah peh ding ham, NPF ho thumna avetlhah ding ham tihi kihe loulai ahi.

Centre sorkar in Unlock 2 a juiding guidelines ho sodoh; school le college ho July 31 chan kikhah jom nalai ding

New Delhi, June 30: Centre in Monday nikhon July nisim 1 nikho a kipan ding Unlocked Phase II a chepi ding guidelines asodoh uvin, jan a kikoi curfew kilha ong ding, flight le train lhai kal ding chule dukan a mi 5 val umthei tadinga asei uvin ahi.

Hijong le school, college le themjilna mun adang dang hohi July 31 chan kikhah nalai ding, metro rail, multiplexes, gym, swimming pool, bar, auditorium ho thuso aumkit kahse a kikhah jom dinga asei uvin ahi. Union Home Secretary Ajay Bhalla in thuso aneina a, National Disaster Management Authority thuhilna dungjuiya, containment zone pam a natoh (activity) hi tu masanga sanga tamjo kilha ong be ding chule containment zone ho a July 31 chan lockdown umjom ding ahi, ati.

Ama ama state in ngaicha asah na ho a dan akikoibe theiyu ahi in, hijong le gamgi (border) akha theilou diu ahi. “State le UT hon dinmun amaho mudol dungjuiya containment zone pam a jong dan akoi theiyu ahi. Hijong le inter-state le intra-state kikhah louding, mi chule thil kipoh ho gamgi a alamtin loudiu ahi. Amaho a dinga achom a phalna/phatsahna/e-permit ngailou ahi”, tin guidelines a asei uvin ahi. Vande Bharat mission noiya international air travel jong kiphal (limited manner) ahitai. Chule jan nidan 9 a kon jingkah nidan 5 chan curfew kikoi jong tua kon jan nidan 10 a kon jingkah nidan 5 sung hiding ahitai. Home Ministry in order asodoh na a, hiche hi National highway le state highway a mi che le na chule thil akipoh le a ol nading ahi.

Dukan mun ho a ‘physical distancing’ akikoiya ahile munkhat a mi 5 kalval jong lut khom theiding ahi. Themjilna chungchang a Monday ni a kisodoh guidelines a, “State le UT hotoh kihouna sottah akinei jouva July 31 chan themjilna mun jouse kha jom dinga thulhuhna um ahi”, ati. May nisim 30 nikho a guidelines asodoh nauva school le college ho kihon ding thu hi July lha teng thulhuhna umding ahi, tia ana seiyu ahi.

Central le state government a Training institute ho vang July 15 a kon kihong pan ding ahitan, hiche chungchang a Department of Personnel and Training, Government of India in SOP asodoh ding ahi. Delhi kiti state phabep in ngehna anei vanga Centre in Metro service hon pat dinga phalna apeh loulai ahi. Cinema hall, gymnasium, swimming pool, park, theatre, bar, auditorium le mipi kikhopna mun ho kikhah jom ding ahi.

Chule ‘social, political, sports, entertainment, academic, cultural, religious function ho le mipi tamtah kikhopna kin gon hojong kikhah ahi. Containment zone a dinga MHA in tuchung guidelines kichen tah a asodoh ahi in, amaho a dinga lockdown hi July lha kichai chan umjom ding ahi. “Containment zone hi district authority hon MoHFW guidelines avet uva akhen diu ahi”, ati.

Containment zone a hi alou theilou hobou kilha ding ahi in, hiche mun ho a house-to-house surveillance, contact tracing, leh clinical intervention angaicha ho umding ahi. Mask bol ding, Aarogya Setu app manding kiti hohi tu masanga banga kichepi jom ding ahi.

 

Manipur a Covid-19 case 7 kimudoh be

Imphal, June 30(ET): COVID-19 common Care Centre thuso khat in aseina achun tuni chun Manipur a Covid-19 natvei case thah 7 kimudoh thu asei in ahi. Tuchan in Manipur a case kimudoh jat 1234 aphatan hiche lah ahin active case 681 aum in chule adamdoh jat 553 ahi in recovery rate chu 44.81 percent aphatan ahi. Tuni a case kimudoh holah achun mi 5 chu pasal ahi in chule adang 2 chu numei ahi. Bishnupur, Imphal East le Kangpokpi akon mi khat cheh, Senapati akon mi 4 ahiuvin abon uva gamdang akon hung kinungle ho ahiuve.

Pungkah 24 sung in mi 59 ho adamdoh tauvin mi 24 chu JNIMS akon apot tauvin chule Ccpur District Hospital akon mi 9, Ukhrul akon mi 19, Meitram akon mi 5 chule RIMS akon mi 2 ahiuve. Alangkhat ah frontline a natong Doctor leh nurse ho jong a duty bol u akichai phatleh govt. in order aso bang a quarantine akibol uvin ahi. Amauho ading in government in amanbei a aum nading uvin mun agonpeh uvin hinlah Hotel a umnom hon amau hon sum akipohdoh ding u ahi. Alangkhat ah psychological expert hojong phone a counselling boljeng theiding a kimansa in aum uvin Covid-19 natvei jeh a lungboi ho kihoupi ding in aum jing uvin 8787457035, 9402751364, 7629943596 ho a kihoupi jingthei ahi dan thulhut chun asei in ahi.

 

AB-PMJAY noi’a beneficiaries Dialysis package mu thei ding ho booking bolpeh ding’a Guite IAS in Medical Superintendent jouse thupeh nei

B.Lalboi Gangte

CCpur, June 30 (ET): Haulianlal Guite IAS, State Health Agency Manipur & Additional Secretary, Govt. of Manipur in Manipur sung’a Ayushman Bharat-Pradhan Mantri Jan Arogya Yojana (AB-PMJAY) hamphat na manthei na District Hospital ah Medical Superintendent jouse heng’a AB-PMJAY beneficiaries kitaphot in Dialysis package um thei ho booking bolpeh ding in hetsah na aneiyin ahi. Chuleh India gamsung pumpi’a Health Insurance Scheme AB-PMJAY hi Manipur a achesa September 2018 kum akon kimang pan ahitan hiche scheme noiya PMJAY hamphat pithei ding beneficiaries insung hon kum khat a Dk. Lakh 5 chan’a adamlou nao toh kisai’a ki-vekol thei ding’u ahi ati.

Hiche masang ajong chun Ministry of Health & Family Welfare, Govt. of India in PM National Dialysis Programme chu achesa April 7, 2016 in District Level ding in Machine mangcha in Dialysis bolho Hemodialysis ding in guideline khat anasemdoh in hiche achun Hemodialysis khat vei bolman Dk.1200 ding in anakisem in ahi. Hitobang ah PMJAY hamphat piho ding in Manipur ah District Hospital um jouse’a General Medicine leh General Surgery toh empanelled ahi nah leh Dialysis toh kisai package umho booking bolthei ding ahi dan leh National Health Mission, Manipur noiya Manipur ah District Hospital jouse’a Dialysis bolthei soh kei ding ti ahi jeh’a Dialysis treatment toh kisai’a scheme ni um ho’a kon damlou Dialysis bol ding hon ipi scheme pen amaho ding’a hoijo ding ham ti ho avetlhah ding uvin hetsah na jong anei in ahi.

 

ATRPFM in tribal kiloikhomna 14 toh ‘delimitation’ thu a kihouna nei; Constitution a kipe banga chelhah pi dinga seiyu

Imphal, June 30(ET): All Tribal Rights’ Protection Forum Manipur (ATRPFM) in Tuesday nikhon RNBA Centre Church, Tarung, Imphal West a tribal kiloikhomna chom chom 14 vel toh kihouna (consultative meeting) anei uvin ahi.

Meeting a ADC member ho, AMTU, Mate Tribe Union, Kharam Union, Maring Tribe, Kom Union Manipur, Chiru Union, United Zou Organisations, MTU GHQ, KKSDDA, Liangmei Naga Council, PTC-GHQ, Zeliangrong Union (A,M,N), ZU (CCP), lamkai holeh adang dang apang uvin ahi. Chule Village Authority Chairmen, social worker, ex-MP, ex-MLA, social activist adang dang jong apang uvin, Pamchuiwon Gangte phat homtoh na a meeting achelha in ahi.

Behring, Ex-MP/MLA, Mani Charenamei, Ex-MP, leh Ramthing Hungyo, Social Worker resource person a apang uvin, ‘Delimitation’ thu a houlimna anei uvin ahi. Article 82, Indian Constitution noiya ‘delimitation exercise’ kibol ahi in, hiche hi tribe le tribe hilou thu ahipon, census jouseh a kibol ahi, tin asei uvin ahi. Article 82 noiya Parliament in Delimitation Act asemdoh ahi in, Parliamentary le state assembly constituency ho gamgi khen(demarcation of boundary) dinga Delimitation Commission kisemdoh ahi. 2001 census dungjuiya athah pen a delimitation kibol ahi, tin asei uvin ahi.

Northeast gam li- Manipur, Assam, Nagaland le Arunachal Pradesh a ajeh chom chom jeh a ‘delimitation exercise’ ana umlou ahi in, tu naicha akidalha state li ho a delimitation exercise bol dinga Union Home Ministry le Delimitation Commission of India in asei hi phaicham a um organization le political party hon doudalna sangtah anei uva, Manipur High Court a jong PIL (No 22, 23 leh 25) apehlut u ahi.

PIL no 53, 2003 le 16, 2005 jong kipelut ahi in, Gauhati High Court Imphal Branch in 2007 kum a athu atanna a delimitation exercise ‘stay’ abol ahi in, ahivanga Supreme Court in asan lou ahi. Census 2001 a hill sub-division a adihlou aume kiti hi suhdihna um a, final figure hunglhung ahitan, tua adihpoi, tia ngohna thu kisei ho abul umlou jouthu ahi, tin asei uvin ahi.

Hiche jeh a tribal kiloikhomna chom chom meeting a pang hon delimitation thu sei dinga kilolna anei uva chule India President, Prime Minister, Chairperson, Delimitation Commission of India, Chief Election Commissioner of India le adang dang henga memorandum jong apehlut ding ahi. Kihouna a pang hon Manipur a recognized kibol tribe 34 val hi memorandum a signatory hiding chule representative dinga ATRPFM mopohna peh dinga jong kilolna aneibe uvin ahi.

Delimitation exercise hi Constitution a kisei banga achelhah louva, tribal miho thaneina (constitutional rights) akisuhnem jom a ahile tribal hon thakhat a hiche thu suhlhap nadinga kiphinna panna a lampi dang dang chepi dinga jong kinoptona aneibe uvin ahi.

 

Assam a twilet jeh’a thi mi 27 hita; Gujarat a keh lhah jeh’a mi 7 thi

Guwahati, June 30: Tuni chan in Assam a vadung ho akhang jing nalai in chule tuni chan a twilet jeh a thina toh mi 27 aphatn chule mi 1.5 million tobang in gentheina atoh uvin ahi.

Assam State Disaster Management Authority thuso in aseina achun 66 revenue circle sung a um kho 2,235 ho twi in achuptan chule lou hectare 75,700 tobang asusietai ati. Central Water Commission bulletin a kimu dungjui chun Brahmapurtra leh vadung dang dang danger mark akhokhel tauvin ahi.

Tuhin district 21 ah relief camp 265 akihong in hiche achun mi 25,461 tobang aum uvin ahi. Kaziranga National Park, Rajiv Gandhi Orang National Park leh Pobitora wildlife Sanctuary ho ajong twi alet gamtan Kaziranga akon gamsa 25 akihuhdoh in ahi. Gujarat ajong chapang 2 jaona in mi 7 chu kek jeh in thina atoh uvin amauho chu Saurashtra region a cheng ho ahuvin ahi.

 

Mumbai a Manipur mi tangden ho puidoh nading a National Law School in vanleng hire bol

Imphal, June 30(ET): Delhi based National Law School (NLS) in Mumbai a Manipur mi tangden train a chetheilou ho chu ache nading u vanleng agonpeh uvin tuni chun Air Asia in mi 185 ho chun Manipur ahin polung in ahi.

Chhatrapati Shivaji International Airport, Mumbai akon tuni jingkah 8:10 chun ahung lengdoh uvin Manipur 11:40 am in ahung lhung uvin ahi. Hiche tobang tohgon NLS in abolna chung uva Mumbai a um Northeast mihon akipapi lheh uvin ahi. Tangkhul Society Welfare Mumbai (TSWM) vice-president Thotmahai Raingam in thuso miho heng a aseina achun Manipur akon natong ding a Mumbai a um phabep aum uvin tuchung natna jeh in amauhon jong gentheina sangtah atoh uvin chule Inlang kile theilou ho chena ding NLS in amauho sum le pai podoh a thil agon uhi kipapi umtah ahi in suhmil theilou ding natoh khat aboldoh uh ahi ati. Mumbai a um social activist Leo Tharmi Raikhan, chu NLS team hotoh kithujah in Mumbai akon NLS tohgonna noiya chedoh ding ho lampi aman agontup peh in ahi. Chule lockdown kipat apat akim avel a genthei hahsa ho jong aman kithopina ape jing in ahi.

 

Jilkung le nu le pa tehon July lha kichai teng school le college ho honding adeisah nau thu ‘Joint Consultative Meeting on Education’ kingon a seiyu

Imphal, June 30(ET): Manipur a nu le pa teho chule jilkung (teaching community) hon Tuesday nikhon achesa March lha a kon Covid 19 pandemic jeh a kikhah school le college ho akihon ding adeisah nau thu sangtah asei uvin ahi.

City Convention Centre mun a Education Minister Dr Thokchom Radheshyam lamkaina a Joint Consultative Meeting on Education abol nauva nu le pa chule teaching community a kon member apang tamtah in simlai ho huhna dinga tu dinmun a school le college akihon kit ding hi alampi phapen ahi, tin asei uvin, achuti louva ahile khonung a athemjilna nau chule alungthim u boina lentah hiding ahi, tin asei uvin ahi.

Covid 19 pandemic jeh a school le college kikha thu a boina chom chom umho thu seikhomna dinga meeting abol u ahi. Session 6 a meeting achelha in, simlai ho admission, curriculum revised bol ding dan, exam bol ding dan, jilkung le thil (infrastructure) lhahsamna, themjilna mun ho kihon kit ding dan chule adang dang thu jong aseikhom uvin ahi.

Department of Education (S) le Higher and Technical Education, Manipur government in agon meeting a school le college ho kihon kit nadinga kihouna a pang hon ngaidan le lunggel aseikhom uvin ahi. “Gal laitah a um ihiuvin, melma kihelou ahi”, tin Education Minister Dr Radheshyam in aseiyin chule nu le pa, guardian, jilkung hon tu boi pet a chate ho themjilna pha peh nadinga pan lentah anei thu asei uvin ahi.

Stakeholder jousen gampam a lekhasim tua hung kile simlai asang a sim ho boina suhlhap nading lunggel asei diuvin jong Minister pa in temna aneiyin ahi. Tu academic calendar a syllabus semtoh ding ham, simlai ho dinga SOP thah sodoh ding ham higher le lower class shift a bol ding ham, ti seikhom dinga aseiyin ahi.

Th Kirankumar, Director, Education (S)/Chairman (BSEM) in themjilna mun ho dinmun aseiyin, institution 328 lah a school 267 hi quarantine centre a kimang ahi, tin aseiyin ahi. July nisim 6 le 7 teng le Class XII a theory paper 7 a exam umding, result hi kal phabep jouteng kiphong ding ahi, ati.

Diana Khumanthem, Director, Hr & Technical Education in gamsunga government college 39, government-aided college 6 le private college 37 um ahi in, college atamjo hi Manipur University le Dhanamanjuri University noiya um ahi, tin aseiyin ahi. Dhanamanjuri University a hi college nga umkhom ahi. College a simlai 60,000 min kikhum ahi in, ahivanga covid 19 pandemic jeh a achesa March 13, 2020 a kon higher education a class jouse kivohai ahitai, ati.

Tuni a meeting a technical session 6 aumin, thupi chom chom- Education Institutions – Re-Opening & Conditionality (Professor MC Arunkumar); Admission (Asst Professor Chinglen Maisnam); Curriculum/Syllabi (Dr Dhanabir Laishram); Assessment /Examination (Dr Ch Sheelaramani); Teachers Shortage (Professor W Nabakumar) chule Infrastructure gaps (Professor Amar Yumnam) anei uvin ahi.

Khamnathei po khat kum 15 jail lut dinga thu kitankhum

Imphal, June 30(ET): Special Judge Narcotic Drugs & Psychotropic Substance ND & PS Manipur, A. Noutuneshwari Devi in tuni chun Motbung bazar a cheng (L) Thangkholun Lhouvum chapa Lalthang Lhouvum (48) chu khamnathei apoh jeh a kum 15 jail lutding in thutankhum na anei tan ahi. Lalthang chu 19 August 2014 ni a chu Kaani kg 3 toh Narcotic Cell leh City police ho kithokhom a Imphal khopi sung a Kasturi leibul a amatdoh u ahi.