Manipur Police le CSO hon kihoulhahna anei vanga Bungdung a boina umjing...

Manipur Police le CSO hon kihoulhahna anei vanga Bungdung a boina umjing nalai

226
0
SHARE

Manipur Police le CSO hon kihoulhahna anei vanga Bungdung a boina umjing nalai

Kamjong, April 25(ET): Manipur Police le civil society member hon Saturday nilhah a kinoptona anei jouva Kasom Khullen Police station a sepai ho akile a chule lamlen kikhah akihon tah vanga Bungdung Kashung, Kamjong district a Assam Rifles hole NSCN-IM ho kimaito jeh a boina aumjing nalaiyin ahi.

IGP IK Muivah lamkaina a Manipur police thalheng hole CSO chom chom hon Saturday nikho a kihouna aneiyu ahi’in, boina peldoh nading le kihetthem nadinga kihouna aneiyu ahi. Kiphinna bol numei hon lamlen ahon diuva kinoptona anei uva chule state police honjong nam douna bol louva kitahna anei diuva temna aneiyu ahi. State sepai hon Bungdung Kashung a security dinmun vetlhah ding agot ujong kinoptona dungjuiya avohai tauvin chule sepai ho Kasom Khullen Police station a kinga a, Saturday ni ma ma le Imphal a kile dinga thulhuhna aneiyu ahi.

Meeting chelhah dan chunga UNC general secretary Milan in alunglhaina thu aseiyin, “Chamna le lungmonna sem dinga kahung u ahi’in, boina akisulham tai”, ati.Kamjong district a Saturday nikho chan a boina aumna hi nithum lhinni ahitan, Friday nilhah a police hole CSO member hon Honpei a kihouna aneiyu hi ana lolhing joulou ahi.

Assam Rifles ho khosung khel a che ding agot jeh uva Kashung Bungdung kho a boina kipan ahi, tin thulhut in aseiyin ahi. Friday nikho a IG IK Muivah lamkaina a DIG Kabib, deputy COC Cecelia, IRBn, Assam Rifles ho gari 25 a kitol u ahi’in, Kashung Budung jon a ache nauva numei tamtah in Honpei kho a ana lamtin u ahi. Hiche mun a hi Thursday nikho a Army hole numei ho ana kiboiyu ahi.

Friday ni a, Army personnel le gamkai numei ho Bungdung Kashung a kon km 50 vel a gamlha Honpei kho a jingkah nidan 10 a kon kihoutoh thei louva ana kidin te u ahi. TNL lamkai Hopingson Shimray le TSL lamkai Veronica Zingkhai lamkaina Naga CSO chom chom in amun ana dellut ahi.

 

Assam Rifles le Manipur Police hon Covid-19 dan apalkeh e, tia NSCN-IM hon ngohna nei

Imphal, April 25(ET): NSCN (IM) hon Saturday nikhon vannoi pumpi in Covid-19 pandemic jeh a gal abol laitah a Assam Rifles le Manipur Police hon kinahna ding ahol uve, tin ngohna anei uvin ahi.

Achesa Friday nikho a Kasom Khullen, Kamjong district a boina anasoh ahi. Assam Rifles team hole Manipur Police ho Indo-Myanmar gamgi juiya um gamkaiya operation bol dinga khosung alut got nauva boina um ahi. NSCN-IM thingnoimi hon aphat dihlouva hitobang lunghanna thil kibol adei lounau thu asei uvin, mijousen social-distancing’ ajui a chule WHO in dan asem ho ajui laitah a hitobang thil kibol ahi, tin asei uvin ahi.

Lunggel tohna beiya he na sa sa a Covid-19 dan kipalkeh a thil kibol kiloikhomna Information and Publicity Ministry indemna aneiyin, Assam Rifles le Manipur Police hon Manipur gamsung Naga chenna mun a Indo-Naga ceasefire aumlou nadinga hiche hi abol ahi, ati.

Assam Rifels hon tu masanga Kangoi, Kasom Khullen block, Ukhrul district a NSCN camp bulu ding anagot u ahi’in, ahivanga lhang a um numei kiloikhom hon tohgon asuh molphou peh ahi, tin ngohna anei uvin ahi. Ahivanga NSCN thingnoi hon boina akhohset louna dinga camp mun achon u ahitai, ati.

Indian Army le Manipur police ho Kashung-Bungdung area a alut got uhi Covid-19 dan phatah a juiya khosung miho akihelou natna po ho a kon natna peh nathei dinmun lentah ahi, tin jong asei uvin ahi. “Vannoi pumpi Covid-19 jeh a kiging jinga aum laitah a hitia mopohna neilou tah a thil kibol hi mijousen adem ding dol ahi”, ati.

“State sorkar in Naga ho douna a hitobang thil abol hi thusim a mihem douna na kitohna a kisei jingding ahitai”, ati. Union Home Ministry in Manipur Polcie le sepai Unified Command ho chamlhatna lhingset apeh avetsah ahi, tin NSCN-IM thuso chun aseibe in ahi.

State Bank of India Staff Association, Manipur Region in Sang-ga Muon Inn kithopi nape

B.Lalboi Gangte

CCpur. April 25 (ET): State Bank of India Staff Association (SBISA), Manipur Region in tuni jinglam nidan 10:00 in  Bijang kho’a Kuki Women Union (KWU) vetkol nanoi’a um Sang-Ga Muon Inn mun’a COVID-19 Relief Material pehdohna ananei uvin ahi. Hiche Relief pehdohna kingon’a SBISA Manipur Region akon L. Maipak Meetei, Assistant General Secretary, SBISA, NEC, L. Narjit Singh, Regional Secretary leh Roshan Kshetrimayum, Zonal Secretary hon ana lamkai uvin ahi. SBI Churachandpur Branch leh SBI Tuibong Branch akon Staffs hon jong akilhon pi vuin hiche achun Sang-Ga Muon Inn aum chapang 40 KWU hon avetkol hou kithopi na in Covid-19 Relief in ann-chang Kg. 100, dal Kg. 60, ankamthao liter 15, ngathu Kg. 4, chi Bag 1 leh malcha gop Kg.1 ape uvin ahi.

Hiche toh lhon’a SBI Staff Association, Manipur Region in thilpha bolna anei uhi kum 100 lam alhing toh lhon’a midang ho panpi thei ding dan angai touva Branch chom chom akon Staff Association members hon sum atokhom ji uva poimo asahnao mun ho kithopina ape jing uvin ahi. Chuleh North East Circle ah Assistant General Secretary, L. Maipak Meetei in atahlang na’a COVID-19 jeh’a niseh’a insung’a ding’a apoimo ho alhahsam naban’a mi tampi in neh le-chah kichoh nalam’a hahsat na sangtah ato jeh uvin apoimo dehset leh panpi ding’a kilom ho ding’a Association member hon sum leh pai kitoh khom ho mangcha’a tuni hung kipedoh ho kicho ahi ati. Tuni kihom doh panpi nahi 1st Phase ahi in maban ajong District chom chom’a tuni’a kibol bang’a kibol jom jing ding ahi tinjong aseibei.

Alangkhat’a Sang-Ga Muon Inn a ding’a Home Mother leh Advisor Lhing Haokip in SBI Staff Association in thilpeh anei nao chung’a akipa na aphondoh ahi.

MGNEGS panna a RD&PR Scheme ho sorkar dan jui pum a thinglhang gam a chepi pat dinga Minister in thuhilna nei

Imphal, April 25(ET): Rural Development and Panchayati Raj Minister Thongam Biswajit Singh in RD & PR Department official hon Mahatma Gandhi National Employment Guarantee Scheme panna a thinglhang gam a kichepi scheme ho athah a achepi pan diuvin thuhilna aneiyin ahi.

Panchayat elected member le department official hotoh office mun a meeting abolna a Minister pa in MGNREGS natoh akichepi kit na a sorkar in apeh guideline ho ajui diuvin thuhilna aneiyin ahi. Adhyaksha hon job card neiho scheme akichepi sunga mask le hand sanitizer ahop diuvin jong thuhilna aneiyin ahi. Scheme kichepi jouse hi mask kibol a chule social distancing jui ding, dan um jouse jui dinga jong aseibe in ahi.

Department official hon nikho tha adih louva kimang aumlou nadinga pan alah diuvin thuhilna aneiyin chule MGNREGS pass-book hohi mopohna nei beneficiary ho henga pehdoh dinga aseibe in ahi. Natohna mun a panglou ho nikho tha pehding adeilou na thu jong aseiyin ahi.

Department in koi tobang gamsunga scheme akichepi sunga hahsatna toh ahiloule hehna sem nom auma ahile toll free number 1800-345-3872 kihong ahitai, tin Minister Biswajit in aseiyin ahi. Hiche number hi min aman a chule official ho henga ahahsat nau ho ahetsah diuvin temna aneibe in ahi. Meeting a Adhyaksha ho Additional Chief Secretary MH Khan chule department official dang dang apang uvin ahi.

India leh Mayanmar gamgi chin’a CCpur Police leh IRB in thih-dai kaina chelhah pi jing

B.Lalboi Gangte

Ccpur, April 25 (ET): India leh Myanmar gamgi chin aum Behiang kho lam akipat India gamsung adeh’a Churachandpur District hunglut aum jing toh lhon’a CCpur District Administration pan lah na in gamgi ah Thidai kaina tulai in achepi uvin ahi. India leh Myanmar gamgi chin’a Behiang gamsung’a boundary thihdai kaina ding’a achesa April nisim 16 nikho in State Government akon Dr. Suher Akhtar, IAS, Addl. Chief Secretary, Letkhogin Haokip IAS, Addl. Chief Secretary leh P. Vaiphei IAS, Principal Secretary, Govt. of Manipur, District Administration lam’a  Pawan Yadav IAS DC/Ccpur leh Amrita Sinha IPS SP/CCpur teni pannan Behiang Area kholchilna ananei uvin ahi.

Hiche toh lhon’a amun ho kholchil na aga nei dungjui uvin gamgi pal tan’a India gam hung lut aum ding ventup na ding in thihdai gamgi chin in akai uvin chuleh hiche natoh nahi  Shivanand Surve, IPS, Additional SP (Law & Order) vetkol nanoi’a Police leh IRB personnel hon gamgi venbitna natoh tho in thih-dai akai uvin ahi. Chuleh Border Fencing thihdai kikai venbit ding in Pakmual kho’a  Police Check-post khat tun doh in aum in hiche naban’a Pakmual kho phah masang Meter 600, Border Pillar 37 mun’a Kilometer 1.5 ahsao feet 7 a sang thih-dai akai uvin ahi.

Alangkhat’a thulhut kimu dungjui in Mynmar gamsung’a Eimi kho jaonan Coronavirus positive Case mudoh ahi jeh’a India toh beilam tah’a  kijot matto nathei gamgi khatan ding’a panlah na nasatah’a chelha ahi. Natna hit akon CCpur District Police in kiven nading’a Face Mask leh Face Shield phabep jong SP thupeh dungjui in abol uvin chuleh hiche akibol ho hi khopi sung leh Border Area a Posting Police personnel hon amanchah ding ahi. Coronavirus (COVID 19) natna hit toh kisai’a India hi Sikkim tilou State dang jouse Coronavirus COVID 19 vei um soh kei ahi tan hiche lah’a Goa leh Manipur ah Coronavirus (COVID-19) vei aum vang in adamdoh soh tan ahi. Ahin Manipur in aki gamgit pi International Border Myanmar akon natna hit  hunglut thei ding venna in State Govt. leh gamgi chin in ahop khah District sung’a Administration in nasatah in pan ala in ahi.

Seiminlen Doungel, Goa FC striker le InSIDE North East in Covid-19 Lockdown sunga kithopina ngaicha ho panpina neiyu

Imphal, April 25(ET): Covid-19 Lockdown sunga InSIDE North East in thilsoh umchan ho amun a kholtohna anei uvin, Saikul Sub-Division a hahsatna toh a insung jakhat val amudoh uvin ahi. Atamjo hi meithai, chaga, chatmo, chule kal khat ding jong anchang kikoi khol joulou insung hahsatah ho hiu ahi.

Insung jakhat val ni ni lut a ration ahop u ahi. InSIDE Northeast in Kangpokpi district a kithopina ngaicha ‘orphanage home’ li jong amudoh uvin ahi. Phat hahsat pet a kel thoh pum a lupna jon louva chule neh lhahsam jeh a tahsa tongkha louva chapang ho aum theina dinga kithopina sangtah ngaichatna aneiyu ahi.

Seiminlen Doungel, Goa FC striker le ISL player chule InSIDE North East team hon Shom-inn Academy, Saikul Hill Town a kithopi dinga alhendoh u insung ho neh le chah apeh uvin ahi. Thil ahop nauva hi anchang kg 15, dal kg 1, chini kg 2 jong pang ahi.

Seiminlen Doungel jong ama tahsa tah a thil hom a apan bou hilouva neh leh chah ho chohna a jong sum le pai a kithopina ape in ahi. Covid-19 pandemic chungchang thu chule kiven ding dan thu hilna jong aneiyin chule hiche hi kithet phat hilouva kingailut phat ahi, ati. Mijousen kivenna dinga mask akibol a chule ‘social distancing’ ajui dinga temna aneibe in ahi.

Hejang Misao, Director, InSIDE North East in kivenna dinga pan lahna thei chan a kila ahi, tin aseiyin chule Covid positive ho bungkhen ding hi mihem ngailutna chule dan toh kitohlou ahi, tin aseiyin ahi. Lou le ai chule lunggel a tosotna angaichat u ahi’in, vetda louva ngailutna neiding ahi, tin aseiyin chule organization in khonung a jong thinglhang le phaicham a kithopina ngaichat insung kithopi kit dinga tohgon anei ahi, ati.

InSIDE North East in Covid-19 Emergency Respond Program noiya training centre a mask jong asem uva chule man beiya miho ahop peh u ahi. Covid-19 pamphlet (lekha) asem uva, District Health Department, Kangpokpi toh kitho a athu ahil lhang u ahi’in, chule Lalithambigai, DC Kangpokpi noiya district administration toh kitho a Covid19 Volunteer jong asem u ahi.

‘Radio-tagged’ kibol Chiulon vacha India gam a hung kile kit ta

Imphal, April 25(ET): Covid-19 pandemic jeh a vannoi aboijing laiya radio tagged kibol kum masa November lha a ni-nga tang louva kilometer asang a sim tang louva lenga Africa gam lhunga Amur Falcon vacha India gam a ahung nung len tan, northern China a ‘breeding ground’ a kile kit kigo ahitai, tin Wildlife Institute of India Dehradun in aseiyin ahi.

Ahivanga, Amur falcon achal Chiulon kiti April nisim 21 nikho a Somalia coast a kon kipandoh vacha India gam hunglhung ahitai, tin WII scientist R Suresh Kumar in aseiyin, amahin tu le tua migratory birds ho lamlhahna avetkol jing ahi. Vacha hi Madhya Pradesh gam Satpura Tiger Reserve kom a um ahi, ati.

Friday nilhah a Chiulon hi Arabian crossing lailung a um ahi’in, km 3150 lhing ahin galkai ahi. 2019 kum November kal kipat a Chiulon le vacha adang li- Puching, Phalong (ani a Tamenglong district a um kho min kiputsah), Irang le Barak (ani a vadung min kiputsah) vacha hohi Manipur gam a Forest department in WII scientist toh kitho a ‘satellite transmitter’ umna radio tagged abol u ahi’in, alenna chule ‘environmental pattern’ ho het nadinga abol u ahi.

Radio-tagging programme sunga falcon jouse hin data apeh vanga Puching le Phalong hi tagged akibol ni phabep jouva amani a kon data kimu talou ahi. Alangkhat a Barak le Irang hi Somalia gam a um nalaiya, India gam a hung kile loulai ahi. Vacha hohin northeast ahin pel vah diu ginchat ahi, tin scientist hon asei uvin ahi.

Alangkhat a Nagaland gam a district khat min kiputsah a Amur Falcon vacha anu Longleng jong Chiulon masanga India gam achesa Thursday ni a hunglhunga hitan, southern India lang jon a kinga louva nidan 94 lhing leng a, km 3800 lengdoh ahi, tin scientist hon asei uvin ahi. Vacha hi Somalia a kon India gam a April nisim 20 nikho a hung kile ahi’in, nidan khat a km 45 hat a leng ahi.

October 2016 kum a Nagaland gam a radio-tagged kibol Longleng vacha jong aphat ngaiya sanga kal khat ma a India gam hung kile lhung ahitai.

Bombay le Karnataka a Republic TV ‘Ban’ bol dinga petition kipe

New Delhi, April 25: Karnataka le Bombay High Court a Republic TV founder Arnab Goswami le ama channel ‘Ban’ bolna dinga petition athah akipelut in ahi.

Supreme Court in achesa Friday nikho a Arnab akimat theilou nadinga kal thum lhing venna (protection) peh dinga thuso anei nidan phabep jouva petition thah kipelut kit ahi. Court in Republic TV chule ‘The Debate’ kiti Arnab Goswami in host abol primetime debate show jong broadcast abol sah lou diuva ngehna aneiyu ahi.

Petition pe a Mohammed Arif in Karnataka High Court a ngehna asem ahi’in, Republic TV le channel dang dang hin gamsunga covid 19 natna hi Tablighi Jamaat thu akisei jouva Muslim ho jouse jeh ahi tia atahlang ahi, ati. Hitobang thuso hin society a Muslim ho kithetna asodoh sah ahi, ati.

Arnab Goswami hin nam kah a kivetda nading bou hilouva minsetna, kisuhnem na chule kijumso na jong abol ahi, ati. Goswami in thusoh lhem ho apansat na a, Palghar a Hindu sadhu ni kithana hi Christian ahiloule Muslim ho natoh ahi tia ngohna anei ahi, tin aseibe in ahi.

Bombay High Court a Goswami douna a hehna asem nauva Hindu sadhu ho kitha na thilsoh hi Muslim ahiloule Christian mipi ho natoh ahi, tia jouthu a ngohna aneiyu ahi, ati. Petition pe a Suraj Singh Thakur le Bhai Jagtap in hou thu jeh a sadhu teni kithat a ngohna um ahi’in, ahivanga, mivolih a pang akikhom mipi holah a hou akibah pi ho ma ma pang ahi, tin asei lhonin ahi.