Manipur muntin a cheng Kuki hon “SahNit” (Black Day) nikho nit; NSCN-IM...

Manipur muntin a cheng Kuki hon “SahNit” (Black Day) nikho nit; NSCN-IM khut a thi ho chunga thudih a thu tanding thumna a PM a dinga memorandum pelut kit u

382
0
SHARE

Manipur muntin a cheng Kuki hon “SahNit” (Black Day) nikho nit; NSCN-IM khut a thi ho chunga thudih a thu tanding thumna a PM a dinga memorandum pelut kit u

Imphal, Sept. 13(ET/UNA): Kuki nam miten Sahnit-Ni (Black Day) nikho anit toh kilhon a gamsunga Kuki chenna mun jouse a pon vom akikhai in, Kuki tamna town leh khosung ho a sorkar in thudih a thutanna aneilou jeh in kijotna chom chom jong achelha in ahi.

Kangpokpi district headquarter mun a Kuki Inpi Kangpokpi District leh Kangpokpi Town Committee chule Kangpokpi Town Churches  Fellowship lamkaina a Kangpokpi Christian Church mun a kijotna anei uvin, houin mun a konin DC Office, Kangpokpi chan akijot uvin, Kangpokpi DC mangcha in Prime Minister a dinga memorandum apelut uvin ahi. Achesa 1992 a kon 1997 kum a Th Muivah lamkaina a NSCN-IM thingnoi hon Kuki chate tamtah atha thu a thudih a thutanna aneidiu thumna memorandum apelut uvin ahi.

Kuki Inpi Manipur (KIM) in Kangpokpi DHQ a cheng jouse Kangpokpi Town Committee mangcha a thuhilna apeh dungjuiya Kuki Inpi Kangpokpi District in Friday nikho (September 13) a Kangpokpi district sunga natoh jouse khongai ding chule Kuki chenna inn jouse a pon vom akhai uvin ahi. KIM in pon vom khaidoh ding chule Sahnit-Ni kiman na a pan lahdinga thuhilna anei ahi.

Kangpokpi DHQ hopsung muntin avom soh in, Kuki chenna inn jouse a pon vom akikhai in, chapang, numei, pasal, khangthah, tehse, nupi, upa abon uva avom a akivon uvin chule gari ho a jong ponlap avom akhai cheh uvin ahi. Ahivanga themjilna mun, government institution ho kha nadinga thuhilna anei pouvin, lunghem vetsahna a sun chan a dukan mun ho akikhah in ahi.

KCC mun a Sahnit-Ni aman nauva Rev.J Lunkim, Pastor KCC in candle avah in, hiche jouva Dahpi achum uvin, kin amang uvin ahi. Rev Lamkeng Lhouvum, Pastor KBC in thupi aseiyin ahi. NSCN-IM ho khansetna a kon asohcha ho, insung mite panna a mihem asang a sim in pan ala uvin, mipi taokhomna anei uvin ahi. Pathen ngaidamna chan ding, Kuki chate kipunkhom nading, sorkar toh kihouna a lolhinna aumna ding chule Kuki lamkai leh CSO lamkai ho dinga taona anei uvin ahi. Kin gon kichaiya KCC Campus a kon DC office, Kangpokpi chan kijotna anei uvin, hiche jouva DC Kangpokpi, Lalithambigai Kalidas, IAS henga memorandum apehlut u ahi’in, Prime Minister thot son dinga apeh u ahi.

Lunseh Kipgen, Chairman, Kangpokpi Town Committee in Kuki Inpi Kangpokpi district chule Kuki nam mite thalheng a ahoulimna a, Pathen in chihna apeh Prime Minister Narendra Modi in Kuki mite gimna asuhlhap peh teiding chule NSCN-IM khut a thina toh a (Kuki Genocide) ho jouse chunga thudih a thu atan ding ahi, tin aseiyin ahi.

NSCN-IM thingnoi hon chapang, naovop numei, tehse, chatmo ho panna a themmona neilou Kuki 905 atha a, kho 360 asuhmang a chule Kuki gam alahpeh a, Kuki cha 1,00,000 val chenna ding mun neilouva akoi thu seilhahna a Prime Minister in pan alah dinga Kuki Inpi in memorandum apeh nauva ngehna anei uvin ahi. Sorkar sem jouse henga aban ban a memorandum avel vel a akipehlut vanga tuni chan a India sorkar in hiche thu a pan alahlou jeh a alunglhai louna thu jong asei uvin ahi.

International law toh kitohlou chonna hi NSCN-IM toh sorkar in kihoulhahna asem masanga asuhlhap nadinga mopohna anei ahi, ati. Manipur chule gamdang dang a cheng Kuki hohi dan jui ahiuvin, India sorkar douna a gal bol lou ahi’in, ipijeh a dan juiya gamsung mi dihtah Kuki te chunga India sorkar in thudih a thutanna aneilou ham, chule ipijeh a Kuki Genocide a themona neiho toh sorkar in kihouna asem ham?, tin thudoh jong anei uvin ahi.

Historian phabep in Kuki Rebellion/Kuki Uprising tia asei Anglo-Kuki War, 1917-1919 sunga Kuki hon gam, hina, thaneina venna dinga pan alah a, kigotna aneijing ahi’in, hiche jeh a Kuki ho ‘identity, territory (gam) chule political rights ho hetpehna umlouva Naga toh kihoulhahna kisem hin Manipur gam a politics a boina asuhlhap theilou ding ahi. Sorkar chunga Kuki hon tahsanna lhingset anei ahi’in, NSCN-IM ho khut a vangsetna toh hon thudih a thutanna amu diu tahsanna lhingset akineiye, tin Prime Minister a dinga apeh u memorandum a chun aseibe uvin ahi.

S Gouminlun Gangte, Lhangsam (Info.Secretary) in soi akaina Kuki Inpi Manipur thuso a chun, September nisim 13 hi Kuki thusim a dinga mujin/muthim nipen ahitan, Tamenglong leh Kangpokpi district (Senapati district anahi) noiya um Joupi Kuki leh Gelnel kho a cheng themmona neilou Kuki 108 NSCN-IM hon 1993 kum hiche nikho a atha ahi, ati. Achesa October nisim 22, 1992 kum a United Naga Council in Kuki ho ‘Quit Notice’ asokhum jouva NSCN-IM hon kum nga lhing khansetna sangtah anei uva, Kuki chenna kho 350 val meiya ahal uva, Kuki chenna gam leiset hunam a alahpeh uva, numei, chapang, naovop, tehse, chatmo khenchomna neilouva melsetah a Kuki 1000 val atha ahi’in, Kuki 1,00,000 val galjam ahi. Chule NSCN-IM khut a thi mi tamtah hi tuni chan a thi vuina kin phatah a jong kibol pehlou ahi, ati.

Kuki hon September nisim 13 nikho hi athi ho geldohna chule achung uva thudih a thutanna aumding thumna leh jana vetsahna a Sahnit-Ni (Black Day) tia anit ahi. Kuki atamna khosung leh town chom chom a kijotna umhi India sorkar in thudih a thutanna tuni chan geiya aneilou jeh chule sorkar chunga lunglhai lou jeh a kibol ahi, ati.

Kuki Inpi-CCpur lamkai nan achesa 1992 akipat 1997 kum sung’a NSCN-IM khut’a Kuki hi jeh’a thina anatoh mihem 1,157 ho het jing nading’a Janglum-song kitun peh naomun KIC, Complex, Tuibong, Churachandpur mun’a ama ho geldoh naleh jana peh nakingon Kuki Civil Society Oragnisation lamkai hojouse leh mipi hon ananei uvin ahi.  Kingon phatsung in Kuki Chief Association (KCA) hon ana mollem sa Kuki chanu, chapa te ho jana vetsah naleh jana pehnan meipum Longkhat cheh kapging na (Guns Salute) anape uvin chujouvin amaho cheng geldoh naleh janan minute 1 thep chet in ajanao anavetsah uvin ahi.

Hiche toh lhon’a mollem saho geldohna kigon kichai in Kuki Black Day (Kuki Sahnit-Ni) kinit lona ajeh chuleh NSCN-IM hon Kuki chate ho atha nao limlah ho leh hiche phatsung’a Kuki gam-le-go suhmang’a ana um ho thusim jouse mitmu thei ding leh vannoi pumpi in ahet nading leh amit tah uva amuthei nading’u  ti in Kuki Black Day- Media in-charge Committee in Black Day Committee nganse nabang in Kuki Black Day Website anasem’u kukiblackday.com chu PS Haokip, President, Kuki National Organisation(KNO) in hondohna ananei in ahi.

Kingon phatsung’a Daniel Gangte, President, Kuki Inpi-CCpur in houlimna aneina’a Kuki chanu, chapa te NSCN-IM khut’a ithi nao tam ni nikho 13 Sept hi Kuki ten Kuki Black Day a akiman lona ajeh hi NSCN-IM in atha Kuki teho chung’a tuni chan’a Centre Govt. in thutan lhah na aneilou jeh’a Blcak Day hi kinit jing ahi. Kuki te chondan dungjui’a NSCN-IM khut’a thina toh ho Kuki Nam miten thupi tah in Feb. nisim 10, 1996 chun Polo ground,Imphal mun’a thilong lim 700 val ana kisem in kijotna thupitah jong anakinei in thivui na ana kisem in ahi ati. Hiche nikho achun “Mithi ho le kho kihal ho thu akisei chai masang se’a Sahnit Ni nit-jing ding ahi” tin phondoh najong anakinei in ahi. Hiche jeh’a hi tuni chan’a athu akisei chai loulai jeh’a kibol jom jing peh ahi. Chuleh India daan dungjui’a NSCN-IM ho gotna peh’a akithat ho chan dia lom chansah dia Khut-hen na soi ana kaisa ahi tan hiche naban’a Kukite mi 1,157 val kithat’a kho 360 kihal lha na chung leh mihem Lakh 1 val gaal jam umta’a India Govt. in daanpi dungjui in hiche thu hi tan hen tin Memorandum 60 val kipe’a kino hi adih ahi in ahin tuni chan’a India Govt. in abol lou hi United Nation a akitepnao asuhkeh ahi jeh in India hi Human Right sukeh ahi.

PS Haokip, President KNO in houlimna aneina’a Kuki Nam mite hon ichennao gam kai tin’a Sahnit-nikho akinit jing hi Kuki chanu, chapa NSCN-IM khut’a thepmona neilou ho atha nao jeh hi India Govt. in  thisan kiso nachung thu’a thutan lhahna anei kah se’a Naga toh chamna thu kisei lou ding ahi tin aphongdoh in ahi. Chuleh iham tia Govt. in Kuki chanu chapa kitha nachung thu’a thudih’a thutan na anei leh athutan dungjui’a chamna sem hiding chuleh India Govt. in thina toh hochung thu thutan lhah na aneito kah’a Naga Frame Work Agreement NSCN-IM toh aneihi chelha thei lou ding, doudal na kinei jing ding ahi ati. Kingon kichai in Kuki CSOs lamkai ho jouse leh mipi jouse KIC Complex, Tuibong akipat Deputy Commissioner, Office mun chan kijot na ananei uvin hiche kijot na achun mipi ten Placard leh Banner choi in DC Office mun’a Prime Minister Narenda Modi kom lhung ding Memorandum peh lut na KIC lamkai hon ananei uvin ahi.

Hill Tribal Council, Moreh lamkai nan Kuki Civil Society kiloikhomna hon Kuki Inpi Manipur (KIM) vetkolna noiyin Sahnit- Nikho geldoh na in Moreh Galngam lentol akipat in Moreh khopi sung’a kijotna anei uvin ahi. Kijotna achun ‘Kuki chate mi sang lam anathat ho gotna pe un’, ‘Kuki hohi Human Rights neithei dia lom hilou’u ham’, ‘ Kuki te thu kiseichai masang’a Nagate thu kisei theilou ding ahi’, ‘thisan kiso kadei pouvin chamna kadei uve’, ‘thudih kisu ngongkai hi thudih kidonse louna ahi’ chuleh ‘thudih hi keiho democratic right ahi’ ti thucheng ho tahlang na ananei uvin ahi. Hiche achun SDO Moreh khut’a Prime Minister Narendra Modi heng’a lhung ding in memorandum khat jong anapelut uvin ahi.

 Tamenglong District hopsung Kaimai kho mun’a jong ‘KUKI BLACK DAY’ ana kinit in ahi. Hiche achun

Kaimai khosung’a nungah/gollhang hon hiche thil anasohsa tuni chan’a achungthu seitoh louva akikoi nahlai jeh leh thil kibol dan ho deilou na in “Justice for the Victims of Kuki Genocide” kiti thupi mangcha in kijotna ananei uvin ahi. Hetthei khat chu Kaimai kho hi Kuki toh Naga chenkhom na gam Kuki inn 150 vel leh Naga inn 50 vel chen khomna Tamenglong District, Manipur sung’a thinglhang kho khat ahi.

Imphal Christian Church mun’a jong SAHNIT NIKHO (KUKI BLACK DAY) nitna ananei uvin hiche achun mona neilou Kuki ahi jeh mai mai’a kithat ho geldohna le taopehna ananei uvin ahi.  Athisa ho geldoh nale puldou huna Dr. H. Khongsai, Associate Administrative Secretary, KCCA in anamang in chuleh Sahnit lapi “Tindal gin ngui jen jene, Vo palam lema pel theilou, Lungdon mukho thimjongle, Pupa han minin sel ute,” sah naleh Dahpi thumvei jong ana chumin ahi.

Alangkhat’a Imphal khopi sung’a um veng chom chom tichu New-Lambulane, Khongsai Veng leh Haokip Veng hon jong ama ama vengsung cheh in Sahnit-Nikho nitna ananei uvin ahi.

Sept 13 nia Naga thingnoi ho khut a thi Kuki 108 chunga thudih a thu tanding ahi: KIM

Imphal, Sept. 13(UNA): India sorkar in Manipur gamsung Senapati leh Tamenglong district a achesa September nisim 13, 1993 kum a NSCN-IM thingnoi hon atha themmona neilou Kuki 108 ho chunga thudih a thutanna anei na dinga Kuki Inpi Manipur in avel a thumna anei kit uvin ahi.

KIM Office, Babupara mun a President, KIM, Khaimang Chongloi in thuso miho akihoupi na’a, KIM chule akiloikhompi kiloikhomna hon NSCN-IM khut a melsetah a thi a themmona neilou Kuki vangsetna toh ho chunga thudih a thutan ding thumna anei ahi’in, Center chule state sorkar henga themmona neiho kilomtah a gotna peh ding thumna a memorandum avel vel a kipelut ahitai, tin aseiyina hi.

Tuchan geiya Kuki hon gim gentheina sangtah ato hohi Centre in hetpehna anei loulai ahi, tin aseibe in ahi. NSCN-IM thingnoi hon themmona neilou Kuki khosung mi sangkhat val atha demna vetsahna a KIM chule akiloikhompi Kuki kiloikhomna hon September nisim 13 nikho hi tuni chan geiya Black Day (Sahnit-Nikho) tia aman jing ahi. Vangsetna toh ho jana chule ngailut vetsahna a Friday nikho a Kuki Black Day kimang ahi, ati.

Black Day hi Kuki chenna mun jouse a kimang ahi’in, nam khat douna a kimang ahipoi, tin Khaimang Chongloi in aseibe in ahi.

Kuki Inpi in Black Day toh kisai in  Prime Minister ang a pehlut ding memorandum khat Manipur Chief Minister N Biren Singh ang a pehlut na ananei uvin ahi. Memorandum achun Kuki Inpi in tuni nikho a Naga ho in mi Kuki mite khohephalou mi 118 ana tha dan ule, October 22nd 1992 a UNC in quit notice ana peh jou apat kum 5 lam chelha Kuki mite mi 1000 val lam kithana na le kho 360 lam ki hallha na chunga avel in Prime Minister pa hetsah na ana nei uvin ahi. Hiche thu toh kisai a Kuki Inpi Manipur government vai po ho ang a avel vel a athu seilhap dinga temna ananei uva tu channa don lou a akikoi na chunga jong nopmo asah dan u tahlang na ana nei uvin ahi. NSCN(IM) ho cha val na vannoi dan le India dan toh kikal ahi toh lhon a government in NSCN(IM) toh kihou lhah na anei masang uva dan toh kitoh a athu seilhah na anei ding uvin avel in temna jong ana nei uvin ahi. Manipur le India sung gamchom chom a cheng Kuki te in Indian government chunga boina ima semlou a, Indian danpi noi a mipi te vetsui na le huhdoh na ding dan kisem ho tahsan a um Kuki mite kidonlou a, Kuki milham 1000 vaal that NSCN(IM) toh kihou na umna chunga Kuki Inpi in government dohna ana nei uvin ahi. Kuki te in agam u huhdoh na ding a Anglo-Kuki War 1917-19 a apanlah na ho geldoh pum a government in Kuki te gam le go le dinmun hetpeh na neilou a Naga ho boina asuh lhap thei lou diu dan jong Inpi in ana sei uvin ahi. Kuki te in government ang a kinepna anei bang uva Kuki te boina jong gamsung a chamna umna dinga suhlhap ding ahin nei to ding uvin jong Kuki Inpi Manipur in Prime Minister pa ang a temna ananei uvin ahi.

Naga hon Naga thu seilhah nadinga kigotna anei ahi: WC, NNPGs

Dimapur, September 13: Working Committee (WC), NNPGs in Friday nikhon Naga mite ho Naga thu seilhahna dinga kigongsa um ahi, tin asei uvin ahi.

Working Committee in Friday nikho a thuso anei nauva, achesa November nisim 17, 2017 kum a WC, NNPG leh India sorkar in Agreed Position soi kaina anei ahi’in, Naga Plebiscite, 16 May, 1951 toh kitoh a abol ahi, ati. Naga gam thu a akibah louna umjong leh hiche chungchang thu a alangni in kichehna anei ahi, tin WC in aseiyin ahi.

Aumding kinoptona a hi Naga chondan (Naga Customary Laws and Practice) dungjuiya Naga hon ‘rights, power, vaipohna, dan semna’ a chamlhatna aneidiu ahi, ati. Alangni in kikhelna semthei ho chule hahsatna ho hetdohna anei ahitan, hiche jeh a aboina umho suhlhap nading a ‘operational clause’ koi be ngai ahi, ati. Kinoptona kisem hi phatsahna aum teng leh parliament ahilouleh constitution injong hiche thu a kikumna aneilou ding ahi.

Hiche hi India sorkar leh Naga ho lungmong a achenkhom thei nading ahi. Indo-Naga political solution hi tua eiho khut a um ahi tihi NNPG in tahsanna anei ahi, tin WC in aseiyin ahi. “Imalam jouse a khangthah ho kitetna sangpen a apan thei nadiu um ahi’in, kibahlouna hohi Naga ho loupe nadinga suhmang ding ahi”, ati.

Working Committee (WC), Naga National Political Groups (NNPGs) chule India sorkar in achesa September 2017 kum a preliminary dialogue masapen aneiyu ahi’in, India sorkar in asan thei hohi athu ahipon, India in asan ding hohi kikhohsah ahi. Naga hon amaho khonung (political future) akilhen thei nadiu tha aneiyu ahi’, ati. RN Ravi hi state Goevrnor ahina hilouva Indo-Naga kihouna a India sorkar in Interlocutor mopohna apeh banga RN Ravi in pan alah ahi tihi WC, NNPGs in Naga mite henga asuhchen ahi.

Governor dinga alhen masang uva Ravi hi Deputy National Security Adviser anahi ahi’in, hiche jeh a amatoh kihouna sem ding hi WC in nopna anei ahi, tin jong asei uvin ahi. WC, NNPGs in India sorkar toh 2017 kum a Agreed Position soi kaina aneiya, Tribal body, GB, Civil society group, intellectual, houbung, legislator masa leh tua ho, legal chule constitutional expert, scholar, leh adang dang toh thuchom chom a ngaidan lahkhom nadinga kihouna anei ahi, ati.

Lam chom chom a kihouna jouse ‘blueprint’ kisem a charter point a kipansah ahi. WC in Naga ‘historical leh political right’ thu a kon kiheimangna anei lou ahi, ati. Kinelkalna thunoh baotam umho jouse kiseijom ding, Naga ho panlahna a kihouna kisem jom ding ahi, tin aseibe uvin ahi.

Shillong a Kuki chaten jong KWS-Shillong houin mun’a “Sahnit” nikho nit u

Shillong, Sept 13(ET): Tuni muntin a Kuki te ding’a “SAHNIT/BLACK DAY” akiman toh lhon in kum 26 channa Sahnit chu Shillong sunga um Kuki chaten jong kilungtoh tah leh guntah in Kuki Worship Service Shillong hou-in mun ah ana mang uvin ahi.

Achesa September nisim 13, 1993 a Kuki chate jakhat val thina ana toh ho leh gal sung a Kuki chate thina ana toh ho jouse lunghem pina leh geldoh na Angam Kuki, President Kuki Inpi Meghalaya in alamkaiyin, chuleh amollem saho insung mite leh Nampi adinga taona Rev. Samuel Awnkhongam Haokip, Pastor KWS Happy Valley in ana lamkaiyin ahi.

Sahnit toh kisai a houlim na Dr. Roel Hangshing, Associate Professor NEHU, in anei in, 1992 apat NSCN-IM holeh UNC kikhut jop a Kuki te chunga lung phalou anei uleh Kuki te chunga akhanset nahou chung changa houlim na ana nei in ahi. Gal masanga Joupi vangkho leh akim vella Kuki te kho ho umdan leh khosah dan, chuleh Tamei kho hi Kuki te kho ahidan leh Tamei tia Naga hon ahin kiminsah dan ho thusim ho jong aseijin chule Tamei kho hi Kuki kho ahin, Ai-mol ana kiti ahi ati. Aman aseibe na ah “tuhin Kuki ten gal bol u hitin phu laote kiti ahipon, ahin khangthah ten nam genthei na a konna isochat thei nadiu leh nampi dam nading gelpum a lekha lam hihen ibol itoh nalam jouseuva gunchu tah leh Pathen hepum a pan ilah diu ahi” atin khangthah te tilkhou na ana nei in ahi. Chule “Kuki te hin a itih apat chamna kidei a chamna umnading a pan kila jing ahin, hiche hi Pathen ihou utoh jong kitoh ahi” ati.

Aollem saho meivah pehna Lunkam Lenthang, Secretary Custom, Kuki Inpi Meghalaya lamkai na in aum in akikhom mipi jousen meivah khatcheh ana de uvin ahi.

Ju kha nadinga Manipur Police hon ‘Mass drive’ apat ding ahi: CM Biren

Imphal, Sept 13(ET): Manipur Police in gamsunga dan pam a khamnathei ju kijoh chule ju kisem/kihon douna a drive lentah apat ding ahi, tin Chief Minister N Biren Singh in aseiyin ahi.

Chief Minister’s Secretariat mun a Press conference abolna a CM in asei ahi’in, achesa lha phabep sunga police hon ju kisemna mun phabep amatdoh jou ahi. Gamsunga  kihon ju hohi mi phabep in chonna ngaiya abol ahi’in, ahivanga hiche hi sum holna a kiheidoh a, ju joh dinga kisem tamjo a ahitai, tin aseibe in ahi.

Hiche jeh a expert hotoh kihoutohna neiya ju kijoh, ju kisem vetsui nadinga policy kituptah gon ngai ahi’in, mipin hiche chungchang a tosotna apeh diuvin CM in temna aneiyin ahi. CSO hon sorkar in pan alah ding dan ngaidan aneiyu asei diuvin temna jong aneiyin ahi. Sorkar in gamsunga khamnathei ju kijoh agelkhoh ahi’in, IMFL manufacturing unit  aban ban a akimat doh jing hijong lungkhampi umtah ahi, ati.

Ju kisem, athenglou ho jeh a natna sangtah tah soh ahi, tin Biren in aseiyin chule hitobang sumkol veina pang hon mihem hinkho tongkha thei sum holna a aneiyu angah diuvin temna aneiyin ahi. Press conference a Chief Secretary Dr J Suresh Babul eh DGP LM Khaute jong apang in ahi.

Thursday nikho a Thoubal police hon Thoubal Athokpam a ju kisemna (manufacturing) unit khat amatdoh u ahi’in, akiman thil ho thuso miho vetsahna jong aneiyu ahi. Hetthei khat chu Thoubal Police hon tu masang, March nisim 11 nikho chule March nisim 4 nikho a jong ju kisemna unit Khongjom Bazar a amatdoh u ahi.

Hetthei khat chu Thoubal Police holeh Numei Police hon thuguh ajah dungjui in janlhah chun Thoubal Police OC Jadumani lamkainan chuleh SP Thoubal vetkolna noiyin Thoubal Athokpam ah ju kisemna munkhat agamatdoh u ahi.

Ju kisemna mun a kiman mikhat leh jusemna a kimangcha thilkeu ho Thoubal Police ho khut in anapelut taovin ahi. Akiman nu Changanbam Romita Devi W/o Moirangthem Boicha, Khurai Lamlong kailhang akon ahin, tule tua sumkol vei a Thoubal Athokpam Awang Leikai a khosa ahi akiti.

Amanu chu janlhah chun Thoubal Police hon thuso miho mai ah ana podoh uvin ahi. Romita leh anaonu Ch Asharani chuleh Kakching, Thongjao a kon Ch Asharani loipa S Ratan hin daan kal in ju asem uve ti thuguh akijah dungjui a gakiman ahi tin SP Thoubal Dr. S Ibomcha chun thuso miho heng’ah aseiyin hinlah Asharani chu ana jamdoh man’e ati. Amun a chun OLD MONK XXX RUM 750ml bottle 126, bottle keu 873, spirit litre 20, jusemna a kimang hetlou chemical leh jerry cane 6 jong amudoh uvin ahi.

Bank 10 bank 4 a gopkhom deimona September 25-27 sung a Bank officer hon kiphinna chelhahpi ding

New Delhi, Sept 13: Centre government in tunaicha bank 10 agopkhom a bank 4 aso deimona a ahunglhung ding September 25-27 sung a Bank officer union hon kiphinna achelhahpi ding ahitai.

Hitolhon a All India Bank Officers’ Confederation (AIBOC), The All India Bank Officers’ Association (AIBOA), Indian National Bank Officers’ Congress (INBOC) leh National Organisation of Bank Officers (NOBO) ho se chu centre tohgon deimo vetsahna natonglou dia kigong ahi tauve.

Geldoh ding chu August 30 nia chu centre government in Oriental Bank of Commerce leh United Bank of India chu gamsung Public Sector Bank anichanna Rs 17.5 lakh crore a bussiness bol ding a Punjab National Bank toh ana gopkhom a, Rs 15.20 lakh crore a PSB lichanna business bolthei dia Canara leh Syndicate bank agopkhom a athum channa ding a Union Bank of India ni tobang a len PSB ngachanna dia Andhra Bank le Corporation bank chu Union Bank of India toh agopkhom a abanle Rs 8.08 lakh crore a business bolthei dia PSB asagi channa dia Indian Bank leh Allahabad Bank agopkhom doh chu natoh tamtah lahdoh na tohgon dan a bank natong hon agel tolhon a kiphinna chelhahpi dia tohgon ahin nei u ahi.

Langkhat a corporate house ho lunghol na a bank gopkhomna kibol ahi e tin RSS labour wing Bharatiya Mazdoor Sangh (BMS) hon jong centre tohgon chu demna anei ahi. Ahin Finance Minister Nirmala Sitharaman in hiche tohgon chelhah kon a chu bank natong khatjong atohmun dalhahsah hilou hel ding a kana seisa ahi e, ati.