Manipur Legislative Assembly Speaker in kal 4 sunga Forest Minister Shyamkumar ‘disqualify’...

Manipur Legislative Assembly Speaker in kal 4 sunga Forest Minister Shyamkumar ‘disqualify’ bol ding thu a thulhuhna anei dinga Supreme Court in mopohna pe

267
0
SHARE

Manipur Legislative Assembly Speaker in kal 4 sunga Forest Minister Shyamkumar ‘disqualify’ bol ding thu a thulhuhna anei dinga Supreme Court in mopohna pe

Imphal, Jan 21(ET):  N Biren Singh lamkaina BJP coalition sorkar in tulha kichaiya umding a ginchat cabinet minister kikhelna a koi khel ding ham ti gel lhahna a boina anei laiya Forest Minister Th Shyamkumar in boina atoh in, Congress MLA K Meghachandra leh Fajur Rahim in ‘disqualification case’ asemkhum thu toh kisaiya Supreme Court in achungthu Manipur Legislator Assembly Speaker in aseilhah dinga thupeh aneiyin ahi.

Justice RF Nariman lamkaina a member thum umna Supreme Court bench in thutanna anei na’a, Speaker in thulhuhna anei dinga tha apeh ahi’in, amahi hi political party a ahi hetpehna anei ahi. Congress lamkai hon BJP lawmaker leh Forest Minister Th Shyamkumar disqualify bol dinga thumna aneiyu hi Manipur Assembly Speaker in kal li sunga thulhuhna anei dinga court in asei ahi.

Supreme Court in Forest Minister Shyamkumar disqualify kibolna dinga thumna chungchang a thupeh anei akijui louva ahileh Congress MLA K Meghachandra leh Fajur Rahim in hiche chungchang thu a hiche court ma ma a hehna asemthei dinga Justice RF Nariman in aseiyin ahi. Achesa July 2019 kum a Manipur Legislative Assembly Speaker in achesa kum ni-le-keh sung Congress MLA Th Shyamkumar Singh ‘disqualify’ abol loujeh a demna sangtah anei ahi.

Shyamkumar hi Congress a kon BJP a lut a, March 2017 kum a N Biren lamkaina sorkar noiya minister panmun atuh ahi’in, party a kon haina neilou ahilouleh re-election thumna neilouva BJP alut jeh a Constitution tenth Schedule apalkeh ahi. July nisim 23 nikho a Justice Kh Nobin Singh in Congress MLA TN Haokip leh Md Fajur Rahim in petition ni asem aseilhah ahi.

Shyamkumar hi Municipality and Administration, Housing and Urban Development (MAHUD), Town Planning, Forest and Environment, Horticulture and Soil Conservation Minister hi ahi. Supreme Court in Forest Minister Th Shyamkumar douna a hehna akisem chungchang a thulhuhna anei toh kilhon a, Congress MLA 7 ho chungchang thu jong itobang ahiding hiche thu a kingam ding ahi, ajeh chu case kibang a Supreme Court in thutanna chom chom anei louding ahi.

NSCN-IM leh CSO chom chom ho kah’a lunggel kibah louna beivah tading

Imphal, Jan 21(ET): NSCN-IM chule Manipur gam a um CSO ho kah a kum sottah kihetkhelna anaum ahung lhungding nikho a kichai ding dinmun a aumin ahi, ajeh chu NSCN-IM lamkai hon gamki miho akipunkhom a chule thakhat a pan alah louva ahileh lungtup bulhit nading lampi dang aumpoi, ti hetdohna aneiyu ahi.

Agam mi hon ‘Avakarar’ tia ahet NSCN-IM lamkai Th Muivah in gamsung CSO lamkai ho kouna apeh’a, chule North East gam mi hon boina chom chom ato ho thu seikhomna dinga meeting akouve, tin thulhut in aseiyin ahi. Meeting thuchen het ahipon, ahivanga thulhut in asei dungjuiya NSCN-IM leh Manipur CSO hon kum sottah kihetkhelna aneiyu hi giltah a aseikhom uve, ati.

Hebron camp thulhut in asei dungjuiya hiche hi NSCN-IM lamkai (Collective leadership) holeh Manipur gam a um Civil Society Organisation lamkai hon kihouna anei nau anivei channa ahitai. NSCN-IM lamkai toh kihouna sem a CSO holah a UCM president Sunil Karam, AMUCO president Nando Luwang, HERICOUN president Longjam Ratan, UCM Secretary Organisation Ng Deva, Rajen chule adang dang jong pang ahi.

AR Rifleman pa chunga IPS officer nu ngohna sem hohi jouthu ahi, tia Assam Rifle hon nelkalna nei

Imphal, Jan 21(ET): Achesa January nisim 19 nikho a Moreh a kon hung kile a Anupam, SDPO, Yairipok in Assam Rifles sepai khat in dihlou tah in abol in, akhut alha e, tia ngohna kinei hohi jouthu, semthum chule kivetda jeh ahi, tin Assam Rifles hon nelkalna thuso anei uvin ahi.

PVCP Khudengthabi mun a Assam Rifles sepai hon January nisim 19 nikho a angaiya check abol nauva officer nu chunga engsetna abol uve, tia ngohna hi Assam Rifles hon sangtah a anelkal a, asan pehlouvu ahi. Nilhah nidan 2 don a Tata Sumo akang (registration number MN01G6243) Moreh a kon hung kile a, PCVP Khudengthabi a gari queue a kigol akheltan jeh a passenger dang holah a thunoh um ahi.

Gari hi AR sepai hon akham uva, passenger ho identification athum ahi’in, hiche hi PCVP a angaina a kibol ahi. Passenger ho identity athum uva chule queue akheltan uva, scanning adalhah jeh u adoh uleh civil a kivon escort pasal hon uniform a kivon sepai ho pao ngailou tah a ahouvu ahi. Assam Rifles sepai ho navel vel a ngehna anei vang uva numei nu in ama identity aseidoh lou, hiche sanga sepai ho henga koi kahi neihet louvu ham, tia adoh ahi.

Hiche pet a hi driver seat kom a tou numeinu in PVCP lim alah ahi’in, Rifleman PK Pandey in ajahda ahi. Ahivanga, officer nu in dan juilouva lim alah tei tei ahi. Officer nu in PVCP mun khohlai khat a kiletsahna leh kithuneisah tah athil abol ahi’in, sepai ho thusei angaiya, ‘identity card’ athum a hi avetsah jeng a ahileh hitobang thilsoh ho kivengdoh theiding ahi, tin Assam Rifles hon asei uvin ahi.

Police officer nu leh ama escort hohi amajo jurisdiction khel a civil chule meithal choiya cheu ahi’in, Commandant, 12 Assam Rifles leh Deputy Inspector General, Headquarter 26 Sector Assam Rifles in athu phatah a seilhah dinga ngehna aneiyu ahi’in, ahivanga hiche hi aphatna a donbut louva ‘Sepai pa chu ka anga kun sah uvinlang akengto som vei tat hen, hiche teng leh ngaidam kithum kasan ding ahi’ tia joh adonbut ahi, ati.

Republic Day anaitoh kilhon a NH-102 a security kikhousah a kiginna sang cheh a kinei ahi. Thingnoi douna a operatrion akibolna gamkaiya security agency adang dang ho hetsahna nei masa louva civil dress a meithal toh gari a che hi aboina sangtah um ahi. Officer nu in jouthu a ngohna asem hin athaneina adihlouva aman avetsah ahi. Organisation in jouthu a kingohna, kigihna leh paocheng ngailou sangtah a adoudal ahi. North East Sentinel hina a Assam Rifles in thilsoh kholna anei ding chule officer nu in athu apohdoh dihtah a akhol ding ahi.

Thukholna akinei na’a, hehna sem a Anupam hi dan dihlouva Myanmar gam a lut’a, ginmo chule ipi ahi kihelou thil Namphalong/Tamu a akichoh ahi. Myanmar gam alut’a, chule ama official gari a ginmo um thil ahet na video Assam Rifles ho henga um ahi’in, official duty a asei hi ajou asei avetsah ahi. Mopohna nei sorkar natong khat in FMR rule ho apalkeh a, Myanmar gam a lut ding ham, tin aseibe uvin ahi. PVCP a um video hi aphat ahiteng leh media ho henga kisodoh ding ahi.

Thilsoh hi sun nidan 2 don thilsoh ahi’in, agency tamtah mai ahi. Sepai pa in IPS officer khat amai got a, akhut alha a ahilouleh avoh got ding hi gel dinga jong tahsan theilou ahi. Adihtah a officer nu hinjong duty bol a sepai pa asen a chule hunam a scanning galkaiya lamlhah ding agot joh ahi. Officer ahina adihlouva aman’a chule SDPO ahina a hunam thahat aman ahi’in, athil poh ho akikhol lou nading agot jeh hithei ahi.

Khudengthabi a PVCP hi Moreh-Imphal pam a thil kikholna leh mi kikholna ding mun a kisem ahi’in, achesa January 2019 a kon dan in akha thil dangka crore 500 val man lhing thilsoh chom chom 125 a kiman ahitan, Khudengthabi a PVCP athupi dan avetsah ahi. 2019 kum a thil kimandoh hi achesa kum 5 sunga thil kiman agom a sanga tamjo ahi’in, PVCP hi khamnathei thil ho a kon gamsung khangthah ho huhna dinga thupi tah ahi, ati.

Kinopto na tohdoh ahilou leh kiphinna boldia ATSUM in govt gihna nei

Imphal, Jan 21(ET): Kinoptona kibolsa nungjui a tohdoh ahiloule kiphinna khohse tah chelhahpi ding in All Tribal Students’ Union Manipur (ATSUM) in government gihna aneitan ahi.

ATSUM in August 13, 2019 nia Tribal Affairs & Hills Department a tohmun 42 a-ong a um ho lhakhat sung a suhdim ding a kinoptona kineichu tugei a donlou a um nalai ahi e, ati.

Chule Autonomous District Council 6 noi a teaching le non-teaching staff panmun ong ho huhdim nadia cabinet phatsahna hapta 3 sung a boldoh dia kisei jong vangset umtah in tugei in tahsa ahi naipon chule 2006 a pat contract oja regular ngah ho October 2019 a lha 2 a regular hisah dia kinoptona jong lha 5 achetah vang in boldoh in aumnaipon chutobang ma a lha 2 sung a MIL Lecturer 46 lahdia kinoptona umsa jong athu bou a um ahitai, ati.

ATSUM in aseikit na ah thinglhang gam district 3 a Government College umlou lai chule Pettigrew College le Churachandpur College a BEd simna ding hondoh ahinai pon abanle Lamka College, Hill College Tadubi le Tamenglong College ho a science stream umlou lai chujongle January 2018 sung a Assistant Professor tong ding ST ho lahdia ana tepsa jong tuchan in government in ima abol nai poi, ati.

‘Naga Accord’ noiya Arunachal Pradesh leh Manipur a Naga ho chenna mun a Autonomous Council 2 kisemdoh ding

Imphal, Jan 21: Naga peace accord a kisei dungjuiya Arunachal Pradesh leh Manipur gam a Naga chenna mun ho a autonomous council ni kisemdoh ding ahi.

Nagaland gam kinaipi state teni a Constitution Sixth Schedule noiya Naga chenna mun ho a autonomous council ni kisemdoh ding ahi, tin Assam Tribune in aseiyin ahi. Hiche tilouva Nagaland gam a Lok Sabha seat khat kipehbe ding chule sorkar in Accord akisem toh kilhon a thingnoimi ho rehabilitation peh nadinga pan alah ding ahi.

Thulhut dungjuiya NSCN-IM leh Naga thingnoi kiloikhom chom chom chule Centre sorkar toh kihouna ajo u ahitai. Centre leh NSCN-IM chule Naga National Political Groups (NNPG) in thukhoh seikhom ding anei tapon, accord hi soi kaiding bou kivat ahitai, tin thuso chun aseiyin ahi. Naga Peace Talk hi achesa 1997 kum a kipan ahitan, tukum hi kum 23 lhinna ding ahi.

Union government in October nisim 31, 2019 kah a Naga Peace Talk thu seilhah dinga phat anatep vanga bulhing joulou ahi. Centre thalhenga Interlocutor a pang chule   Nagaland Governor RN Ravi in Naga boina akisuhlhap na hi ahop soh ahithei nadinga Naga civil society group hotoh jong kihouna agon ahi. Chule Manipur leh Arunachal Pradesh sorkar dohna anei uve, tin thuso chun aseibe in ahi.

Soi kaina dinga avat ho nalai ho thu a sorkar in NSCN-IM chule NNPG toh achom chom a kihouna asem ahi, tin thulhut in aseiyin ahi.

Assam Rifles hon Manipur gam adalhah  phat ahitai: YFPHR

Imphal, Jan 21(ET): Youth’s Forum for Protection of Human Rights (YFPHR) in achesa kum tamtah Assam Rifles hon Manipur gam mi ho chunga setna abol jing ahi, tin ngohna anei uvin chule 12th Assam Rifles sepai khat in Khudengthabi a Anupam (IPS), SDPO Yairipok chunga khansetna anei demna sangtah anei uvin ahi.

Assam Rifles hon hunam a mi suhset leh toltha, dan pam a mi kitha na, mi suhgim chule khamnathei pohna a pang chule thilse dang dang abol u ahi, tin forum in thuso aneina a asei uvin ahi. Gamsunga ja umtah officer khat hitobang a hi avet uva anoise uva ahileh Assam Rifles ho milham chunga a engset diu hi thilsoh in avetsah ahi, ati.

Achesa November nisim 18 nikho a numei khat Khudengthabi check post mun a Assam Rifles sepai khat in ‘sexually assault’ abolna case jong kisei ahi’in, Assam Rifles hon numei chunga khansetna aneiyu hi nelkal thei hilou ahi, tin aseibe uvin ahi. Thuso miho, ana adamlou, sumkolvei numei ho, truck driver, MLA ho, khosung mi chule adang dang chunga Imphal-Moreh lamlen, Imphal Jiribam lamlen juiya um chule mun dang dang a tou Assam Rifles hon asuh genthei nau case tamtah um ahi, ati.

“Assam Rifles hon dan jana apeh lou uva ahileh Manipur gam a kon Assam Rifles ho achedoh nadiu phat ahitai”, tin YFPR in aseiyin chule gamsunga kon Assam Rifles ho akitoldoh nadinga Chief Minister in pan alah dinga ngehna anei uvin ahi. Chule MHRC in Assam Rifles ho douna a angaicha action alah diuvin jong temna aneibe uvin ahi.

IGAR(S) in themmona nei AR Rifleman pa state Police henga apehdoh dinga kisei ahi: CM Biren

Imphal, Jan 21(UNA): IGAR (South) in IPS officer numei khat dihlou tah a bol’a, akhut lha khum a 12 Assam Rifles rifleman pa apehdoh diuva state sorkar in asei ahi, tin Chief Minister in aseiyin ahi.

1st MR mun a Tuesday nikho a ‘Statehood Day’ kiman na kin gon pam a CM in thuso miho akimupi na’a asei ahi. Chief Minister in thilsoh hi vangset umtah ahi, tin aseiyin chule thukholna a themmona anei ahi photchen ahileh achunga action kila teiding ahi, ati in chule state DGP toh hiche thu a kihouna kaneiye, ati.

AR personnel pa douna a FIR kijihlut ahitan,  IGAR(South) in rifleman pa state police ho henga thudohna leh thukholna sunga apehdoh dinga asei ahi, tin aseibe in ahi. Hetthei khat chu Yairipok Police station a SDPO a tou IPS officer Anupam leh ama security escort ho Moreh a office kin a ache nauva kon ahung kile nauva Khudengthabi mun a 12 AR Rifleman khat in hunam a abol’a, ahouset’a, akhut alha a chule agih ahi.

Thilsoh jouva officer nu in Tengnoupal police station a hehna asem’a, AR pa chunga action alah diuva thumna aneiyu ahi. Moreh police injong thilsoh toh kisaiya hehna asem’a chule AR hon mipa apehdoh diuva aseiyu ahi. Monday nikho a Moreh police team ho Khudengthabi AR post a che uva, mipa apehdoh diuva ngehna aneiyu ahi’in, ahivanga AR hon sepai pa akihelou mun khat a akipuitai, tia police ho henga pehdoh ding anop peh louvu ahi.

 

Kamjong district Khamasom Phungthar kho a hetkhahlou nat na jeh a mi 2 in thina toh, mi 2 hospital kilhut

IMPHAL, Jan 21(ET): Khamasom Phungthar kho, Kamjong district a nat hetkhah lou leh kidang tah khat aumin ahi. Khosung hi Myanmar Pillar no. 124 leh 125 kikah ahi.

Akisei natna lamdang tah jeh a khosung mi 2 in ni ni sunga thina ato ahitai. Khosung Chairman Chihanpam Ramrak in asei dungjuiya, athi masapen hi chapang ahi’in, chapangnu hi lel a anu apa in a imutsoh ahi ati’a, lupna alupsah ahi. Ahivanga ‘minute 10’ jouva chapang neocha hi hatah a hung pengdoh ahi’in, anu apa in alupna indan adellut leh chapang nu kho helouva um ahitai.

Atahsa akhol ule anunglang a ha nung tobang maha avom khat amudoh u ahi. Nidan khat sunga chapang hi thi pai ahitai. Thilsoh hi achesa January nisim 17 nilhah nidan 4 don ahi. Chapang khat athi ni-ni jouva numei khat in a oi/sung nopmo thu aseiya, Sunday jingkah nidan 6 don a houin che dinga akigot pet’a lo a ahi. January nisim 19 nikho ahi’in, nidan thum leh li tobang jouva numeinu jong thi pai ahitan, numeinu akeng leh atahsa a maha avom ho umkit ahi.

State sorkar in apet pet a pan alah’a, kivenna ding thil agon peh diuvin Chairman in ngehna aneiyin ahi. Ajeh chu khosung mi adang tamtah jong akihelou natna hin atohkhah thei ahi, ati. State sorkar chule mopohna nei authority hon medical team ho asolpeh uva, gangtah a apan alah diuvin ngehna aneibe in ahi.

Akihelou natna a thi teni hi Philangam Wungkhai (4), d/o Thanshok Wungkhai chule Valleyjoy Ramrak (38), w/o Standhope Ramrak ahi’in, ani lhon a Khamasom Phungthar kho a cheng hilhon ahi. Achesa January nisim 20 leh 21 jan kim don a Ukhrul district a um district hospital a hiche kho a kon ma ma hi a khosung mi adang ni jong hospital a kipolut ahi.

Hospital a kilhut teni hi L Yarchung (20), s/o L Mashivam leh J Ringphawon (26), w/o L Lovejoy ahi’in, ani lhon a Khamasom Phungthar kho mi hilhon ahi.

Kiphinna iti chelhah jong le CAA nung lahdoh hilou ding ahi; Amit Shah

New Delhi, Jan 21: Citizenship Amendment Act doudalna in itobang in mipi in kiphinna chelhahpi jongle nung lahdoh hilou ding ahi e tin Union Home Minister Amit Shah in avel in tunichun aseikit e.

Chule Lucknow a citizenship act thu a kinelpi ding in home minister in Congress lamkai Rahul Gandhi, West Bengal chief Mamata Banerjee, Samajwadi Party lamkai Akhilesh Yadav ho temna anei e.

Amit Shah in asei be na ah CAA chung chang ahilou lam beh a lhangsap ahi jeh in mipi in ahe them pon mipi in CAA thudol ahet chet nading a BJP in Jan Jagran Abhiyan hi kichepi ahi e, ati.

Chule home minister in aseikit na ah Lok Sabha a CAA bill kapodoh in kaseinom chu opposition hon CAA thudol hi lhangphong a mipi het a sei jo ding le koi tapou India mi a lahlutna kinei aumjongle hin phongdoh hen tin aseiyin ahi. CAA doudalna numei lom ho kiphin kal ni 5 lhin nung a Shah makaina mipi toh kimutona hi um bep ahi.

Uttar Pradesh Chowk lhangsung Clock Tower a CAA thu a mipi kiphinna pang police hon amatdoh melhet lou mi 100 lah a poet Munawwar Rana chanu mi 2 le numei 16 jong pang ahi.

CAA thu a mipi kikhop khom na kingon a chu Shah le BJP lamkai dang hon jong houlimna aneidiu chule BJP luboh panmun tuhdia lhendoh thah JP Nadda in jong Thursday ni le Agra a houlim aman ding chujongle UP munchom chom a CAA thudol a BJP luboh panmun lo masa Defence minister Rajnath Singh le Union road transport minister Nitin Gadkari tenin jong houlimna aneilhon ding ahi.

Ahin Clock Tower a CAA thu a kiphin numei ho chu police hon atuhtang jou tapon ahi. Hitichun Gomti Nagar mun a jong CAA le NRC doudal na in numei 15 vel in jong toumun kiphinna achelhahpi un ahi.

 

Ex Servicemen league CCpur leh Athrava Education Foundation Mumbai in KKL Ambulance pehdoh na nei

B.Lalboi Gangte

CCpur, Jan 21 (ET): Ex Servicemen league CCpur leh Athrava education foundation Mumbai in tunin KKL Complex, IB Road, Headquarter veng mun’a Ambulance pehdohna kingon ananei uvin ahi. Kingon phatsung’a Sangboi Gangte MPS Addl SP (Law & Order), T. Paukhanlian, Chairman, ADC CCpur leh Sunil Rane, founder chairman, Athrava education foundation Mumbai hon houlimna anei uvin ahi. Sunil Rane, founder chairman, Athrava education foundation Mumbai in Colonel. NG Sitlhou, President, Ex Servicemen league CCpur khut’a Ambulance pehdoh na leh sepai thina toh Veer Naris chanu hokom’a Computer, Laptop pehdoh na jong ananei in chuleh Hony captain Rev, Lalzawmliana Pangamte in Pathen heng’a Ambulance lhandoh na ananei in ahi.

Hiche toh lhon’a T. Paukhanlian Chairman ADC in houlimna aneina’a Athrava education foundation Mumbai in India gamsung mun chom chom’a thilpha natoh anei jing utoh lhona’ akalson naoho athupi in ahi. Chuleh Manipur gamsung ading’a CCpur District sung’a Ex Servicemen league CCpur chungchon’a sepai ho leh CCpur District mipin aphatchom peding thei nading’a Ambulance apeh naochung’a District mipi leh ADC CCpur thalheng in akipana thu aphongdoh in ahi. CCpur District sung’a Ex-servicemen hon sepai apan sung uva gam leh leiset huhbitna ding’a phat manlu tah apeh jou nung uva jong mipi leh jalhang ading’a lam chom chom’a natoh anei nao chung’a akipa najong aphongdoh in ahi. Chuleh tuni computer, Laptop kipe sepai thina toh Veer Naris chanu hochu April, 1, 2002 a Operation Vijay Kargil lai’a thina toh mi 9 Assam riffle apat (L) Lunkhothang chanu, Baby Lhaineihoi, BA Third Year; April 6, 2000 a Operation Megdoot lai’a thina toh 4 Assam riffle apat (L) Isaac Gangte chanu Jessica Roneimawi BA third year; February 12, 1997 a Operation hifazat lai’a thina toh 8 Assam riffle apat  (L) Paukhanlal chanu Niangngaihlian Class XII; February 8, 2010 a Operation Raksahak lai’a thina toh 2 Assam riffle apat (L) Thangsuanlal chanu Chingnunmawi Class IV; June 28, 2001 a Operation Hifazat a thina toh 6 Assam riffle apat (L) Rinlian chanu Vanlalremruati Class IX; June 28, 1993 a Operation Hifazat a thina toh 15 Assam riffle apat (L) T. Thangkhongam chanu Sanglaldei Class VI leh June 28, 1993 a Operation Hifazat a thina toh 35 RR, First Assam riffle apat (L) John Laluma chanu Neichonghoi BA second year ho ahi. Kingon pahtsung in T. Paukhanlian, Chairman, ADC CCpur, Sangboi Gangte, MPS Addl SP (Law & Order), Hasby Haokip MPS Addl SP (IUCAW) CCpur, CCpur Assam Riffle apat lamkai ho chuleh Ex Servicemen league CCpur apat member ho leh insung miho chuleh sepai thina toh Veer Naris insung mihon kingon achun pan anala uvin ahi.