Manipur Kuki te Dinmun: Politics A Kikhel Na Poimo Ta

Manipur Kuki te Dinmun: Politics A Kikhel Na Poimo Ta

103
0
SHARE

Manipur Kuki te Dinmun: Politics A Kikhel Na Poimo Ta

By: M.T. Kuki

Manipur sunga Kuki te politics hi ivet leh kum 30-40 masanga idinmun utoh tedin ichan ham in ilhasam lheh taovin ahi. Pu (L) Holkhomang le Pu Chungkhokai ho bolthei lai chun nasatah in Manipur politics ah tha inei jou uvin, tun vang Meilhei ho khong beh dungjui a chatloh ngen ihitaovin, Kuki Nampi a dia hangsan tah’a pan la-ngam ilhom lheh taove. Kelngoi chingpa amit mo leh a genthei ding kelngoi te ahiuve; hiche bang chun namsung a lamkai ho alhahsam teng agenthei ding mipi te ahiuve.

Manipur politics kichep dan (political landscape) ivet teng ihet masah pen diu thil khat aum e; hichu ahileh, Manipur a hin nam len cheh thum (3) ium uvin, Meitei (Meilhei), Kuki le Naga ahi. Amaho thum hi adeisah u chomcheh ahin, khat a dia pha chu khat teni dia phalou tah ahi jing kei in ahi. Tekah nan, Naga ten adei pen u chu Greater Nagaland ahi; hichu Meilhei te le Kuki te dia dei umlou pen ahi e. Kuki te dia Kukiland (TC) hi kit, hichu Meilhei ho le Naga te dia jahda um pen hikit. Meilhei te dia ngaichat pen ipi ham iti kit leh, jalen tah a thinglhang gam jouse toupha na thei lampi sem jing ding; hichu la Kuki te le Naga te dia jahda umpen hikit!

Ahileh hitobang dinmun a hin, nam ni (2) joh-joh hung kitho hen lang nam khat (1) pa chu hin tat khom lhon taleh ipi ati ta dem? Hiche dinmun chet hi tulai tah a Kuki te chung a lhung ahi. Meilhei ten Naga te hi alo na je ahet beh lou u ahitai, ajeh chu a lampi’u (lifeline) jeng jong Naga te khut a um ahin, a politics kichep dan mong- mong u jong aphah jou lou u ahitai. Langkhat a seidin Naga ten Greater Nagaland a dia demand abol u gam atam jo (Ukhrul, Senapati, Tamenglong) khu Meilhei te khunung khat cha jong kimu lou ahi. Hiche hi ahet them jeh uva Naga te toh le pankhom uva, Kuki te chung a hi ha-hem ding kichu lhon ahitai. Eiho kitomo le mitmo nakah a, “hammo chung ah songtat achui” ti hi ichung uva hung lhung ahitai. Kuki te dia thil thupi tah, Anglo-Kuki War Centenary kiman na ding chung chang ah ahung thangse khom uvin, ahung kitho toh chet uvin, “ancestral land” lahdoh na din ahung kivai pei uvin, ilamkai ho vin ma ‘pressure’ ana ting jou tapouvin, hibang thil mantam tah panna bei iki sodoh uvin, “ancestral land” neilou tobang isoh doh taove.

Hiche tailou, Kuki te chung chang thu tampi hi ivet leh Meilhei ten einop thap jing uvin, imacha don in eisep ta pouve. Ipi ati leh Moreh mipi commando ho lahdoh dia chuti kiphin uva, lahdoh malah atam cheh ahin sollut u ham? Ipi ati leh Chahsad kho kihal a, tuni chan koima matding jong kigo lou ham? Police/IRB ho gari kisan ahallhauvin, imacha aging poh hih hel e; Kuki ten gamsa khat iki thau jong le jail kilhung chet-chet! Naga te thingnoi mi akimat jong leh aki phin u le kilha doh chet, eiho thingnoi mi aki mat le athisa ham, voh-e-tia kivoh jou ham le bou kinung mu ji. Sports University a kiboi na kihoupi kham jong ei kisa lou u, Kuki te gam a development fund lut ding jouse (Henglep, Khengjoi, etc.) Naga te gam a kihei lut peh jing ta. Hiche ho hi Meilhei ten “Naga appeasement at the expense of Kuki” policy ache pi ahilou leh ipi hidia igel uvem?

Hijeh chun hitobang dinmun a hi nam lamkai hon “politics ipi ti kichep ding ham?” ti hi si-al lungthim sang a thuhtah a gel ngai ahi. Tupet dinmun vang ivet leh Meilhei te thu-thu’n inung uvin, anoi uvah ikun soh kei uvin, eima chang cheh ‘kei ka houi doh pou leh…!’ ti lungthim pu itam taovin, Kuki te dia manthah nikho nai lam cha ahitai ti hi aki lang e. Ahin Kuki Nampi a manthah leh nangbou nachang a houi-doh sot dia ipi ti na kigel ham? Mordecai in Esther kom a, “hi tobang nikho’a ding a…” tia ana phosal chu geldoh leu hen deisah aum e. Hoilai hihen, ipi thu hi jong leh Kuki te boina le genthei thoh na chan a pan lah jing ding, CM pa pressure peh jing ngai ahi. Tuchung Moreh le Chahsad boina chu MLA hon pan nasa tah a alah thei u ahi; la jong la nao vinte, ahin hiche kal a jong ha tah a lahna thei aum jing nalai in ahi. CM pan I thusei u angai lou le ibol a isot nah-nah diu ham? Kihou toh chet u tin dalha soh kei leu hen ada cham lou va lhu jeng ding ahi.

Hiche toh kisai a kasei nom pi pen chu ahileh, ipi ati leh Kuki MLA hijat kinei a ‘political platform’ khat a idin khom theilou u ham? Kuki National Assembly ina nei uvin, ahin ‘internal party democracy’ ana lhahsam jep jeh ham, nampi level a manthei le phatchom pi thei in aum tapoi. Kum masa lai chun “Kuki National Congress” ti ahung kiphut doh kigo in, ajah da ana um dan ahin, aki vo hai kit tai. Kei geldan in hitobang platform khat sem doh thei leu hen pha lheh inte; ajeh chu eima nampi min a political party khat inei thei uva, Kuki te hatna Assembly Constituency jouse’a mipi deilhen cheh hiche party ticket a kon isot doh thei uleh Manipur bep-bep a chu CM jousen ei ‘khurum’ le-le jeng diu ahi. India hi phat sotpi ‘coalition politics’ hung che jing ding ahin, hiti’a hi ium na’u State sung a MLA 10 tobang Kuki party khat min a isot doh jing thei uleh “kingmaker role” inei jing diu, Kuki Nampi khantou na le sochat na hung lhung ding ahi. A chuti masang a vang Meilhei le Naga te khut thah lhou naa ium jing diu, MLA inei sun u jong mi noi a kithol le-le a thanei na imacha kipe lou diu ahi.

Iham tia eima nam min a party phudoh aphat lou na aum khah tah jong leh, national party khat pen-pen ki lungtoh tah a ijop uva, government sem a ipan le pan ngal ding, opposition ihi jong le hi ngal ding ahi. Iham tia hiche jong aboi nah lai leh, party idei-dei kijop ta jong leh, KUKI NAMPI issue ahi teng Assembly sung beh a khu “cutting across party lines” a thakhat a din khom angai e. Hijeh chun, eima mimal kitomo na ho, phung le chang a kibung khen na ho ipai lhah uva, lungkhat a idin khom uva, politics a ‘khat bou’ ihi thei na diu lampi iki sem loi u angai tai. Hi tobang kikhel na khat politics ibol dan uva ahung lhun masang se’a Kuki chate genthei thoh a kaana awgin kija jing ding ahitai.