Manipur High Court in MPSC-2016 Main Exam kibol lah loudinga sumang ta;...

Manipur High Court in MPSC-2016 Main Exam kibol lah loudinga sumang ta; CBI in athu akhol dinga sei

373
0
SHARE

Manipur High Court in MPSC-2016 Main Exam kibol lah loudinga sumang ta; CBI in athu akhol dinga sei

Imphal, Oct 18(ET): Justice Lanusungkum Jamir leh Justice Kh Nobin Singh umna Manipur High Court divisional bench in MCSCCE 2016 exam thu a hetthei umtah thutanna anei tauvin ahi. Manipur Public Service Commission (MPSC) in MCS, MPS, SDC, EO post 62 alahna exam asumang tauvin chule tohmun kipe ho kilahna order jong asumang tauvin ahi.

Division bench in MPSC in Main Examination, 2016 abol dan hi tuni a kon lhathum sunga Central Bureau of Investigation (CBI), New delhi in akhol dinga jong thupeh anei ahi. “Writ petition WP(C) No. 606 of 2017; WP(C) No.725 of 2017 leh WP(C) No.313 of 2018 akiphal in, hiche toh kilhon a MPSC in nisim 07-04-2016 ni a notification asodoh a kibol Main Examination, 2016 hi kisumang a kila talou ding, Deputy Secretary (DP), Manipur government in nisim 22-06-2017, 26-06-2017 ni a asodoh order chule Deputy Secretary (Revenue) Manipur in nisim 23-06-2017 ni a order asodoh jong kisumang a achom a kikoi ahitai. Ahivanga MPSC in candidate ho notice apeh a Main Examination, 2016 abol ding ham tihi kihong ahi”, tin court thutanna chun aseiyin ahi.

Central Bureau of Investigation, New Delhi in MPSC in anabol Main Examination, 2016 hi court copy kimu ni a kon lha thum sunga kholna anei ding, hiche toh kitoh a dan dungjuiya action umding ahi. Thutanna certified copy hi CBI, New Delhi henga aganna thei pen a thot ding ahi, tin jong aseiyin ahi.

MCSCCE 2016 exam a adihlou akibol e tia ngohna phabep hi exam a lolhing lou candidate phabep in answer sheet thumna a RTI application apeh jouva kihedoh ahi. Main exam a hi agom a candidate 1,130 pang ahi. Lolhing lou candidate hon Group of Aspirants MPSC Manipur kiti kiloikhomna asem uva chule exam hi gangtah leh dihlou tah a akibol jeh a exam kibol ni 10 jouva result kiphong pai ahi, tia ngohna aneiyu ahi. “RTI a kon kila answer sheet atamjo a marks adih louva akipehna, examiners signature umlouna sheet, mark tally adihlouva kibol chule adang dang amudoh jou uva candidate ho lunglhai louna sang cheh cheh ahi.

Hiche jouva toumun kiphinna abol uva, mipi leh media in atosot ahi. Tuchan geiya appeal case khat double bench a pending a um a chule case thum hi single bench a pending a um ahi. Adihlou bol a kingoh official leh candidate nehguh bol ho gotna apeh diuva kisei ahi, tin Group of Aspirants MPSC Manipur thulhut in aseiyin ahi. Manipur High Court a hiche case um a candidate phabep in exam cancel bol dinga aseiyu ahi.

Tu masanga Supreme Court injong candidate Nelojit Mayengbam le case dang khat akipehlut jouva pan alah ahi’in, High Court in case hi akhongai sot e, tia hehna asem ahi. Supreme Court in August nisim 5 nikho a athu hi High Court in order amu ni a kon kal get sung, October nisim 9 kah a aseilhah dinga thuhilna apeh ahi. Chule High Court in case akhongai a ade dang na thu a alunglhai louna thu jong Supreme Court in asei ahi.