Manipur High Court in Congress MLA 7 ho State Assembly alut thei...

Manipur High Court in Congress MLA 7 ho State Assembly alut thei tahlou diu va, thutanna nei khum

65
0
SHARE

Manipur High Court in Congress MLA 7 ho State Assembly alut thei tahlou diu va, thutanna nei khum

Imphal, June 8(ET): Manipur High Court in Monday nikhon party a kon jamdoh a BJP a lut Congress MLA 7 ho tua kon Manipur Legislative Assembly Speaker in 10th Schedule, Indian Constitution noiya kipe petition asuhchen kah a Manipur Legislative Assembly lut thei talou diu ahi, tin khamgahna anei tan ahi.

High Court in order asodoh toh kilhon a MLA 7- Sanasam Bira Singh, Ginsuanhau, Oinam Lukhoi Singh, Ngamthang Haokip, Yengkhom Surchandra Singh, Kshetrimayum Bira Sing leh Paonam Brojen Singh hin June 19 a umding Rajya Sabha election a vote apeh thei lou maitheiyu ahi.

Manipur Legislative Assembly Tribunal in achesa Saturday nikho a Congress MLA 7 hon ngehna (objection plea) anei asan peh talou ahi. Tukum March nisim 28 nikho a jong Supreme Court in Manipur Legislative Assembly a MLA alut thei louna ding hitobang case analah ahi.

Petitioner ho thalheng a senior advocate Kapil Sibal ding a, petition apehna a, achesa November 8, 2018 kum a Speaker henga MLA ho disqualify bol nadinga application akipeh lut vanga notice hi 10-07-2019 ni a bou kisodoh ahi in, private respondent ho avel vel a phat akipeh vanga amahon donbutna apeh louvu ahi. Supreme Court in Keisham Singh Vs The Hon’ble Speaker, Manipur Legislative Assembly & ors., CA No 547 of 2020 le adang dang a Supreme Court in thutanna anei jou, February 3, 2020 a bou apeh u ahi, ati.

K Meghachandra Singh (supra) respondent hina a Speaker in Supreme Court thutanna in akan ahet ahi’in, thupeh banga lha thum sunga thulhuhna anei ding ahi. Speaker in lha thum sunga petition kipe chungchang a thulhuhna anei thei ahi.

Manipur a Covid-19 positive 272 lhingta; Natna nei mi 6 kijendam be

Imphal, June 8(ET): Sunday nilhah akon Monday (June 8) jan nidan 7 chan a gamsunga Covid 19 positive 100 het doh be ahitoh kilhon in gamsunga natna nei 272 alhing tan, active case 214 ahi, tin Health Department spokesperson Dr Sasheekumar in soi akaina COVID 19 Common Control Room a kon thuson aseiyin ahi.

Athah a Covid 19 positive ahi kihedoh a mi 63 holah a mi 24 hi VRDL, RIMS a test kibol a chule mi 39 hi JNIMS a test kibol ahi. Natna anei kihedoh mi 34 hi Bishnupur district mi ahiuvin, Kakching mi 18, Kamjong district mi 3, Ukhrul, Senapati le Imphal West district mi 2 cheh chule Kangpokpi le Noney a kon mi khat cheh ahi.

Abon uva gamdang a kon hung kile hiu ahi. Mopohna nei district a lamkai hon ‘containment’ le ‘contact tracing’ kiti kivenna angaicha ho apat u ahitai. Alangkhat a, Covid 19 positive hi a pasal 6 RT PCR test abol nauva negative ahi jouvu Monday nikho a akijen nau RIMS hospital a kon discharge abol tauvin, tuni chan geiya natna a kon kijen dam hi mi 58 lhing ahitai.

Delhi a kon hung kile mi 26 panna a midang 37 hohi Sunday jan a coronavirus positive ahi kihedoh ahi. Additional Health Director, Dr K Sasheekumar Mangang in asei dungjuiya, sample 22 hi VRDL, RIMS a test kibol a chule adang 15 hi VRDL, JNIMS a test kibol ahi.

Case athah kisei 37 holah a 13 hi Imphal West mi ahiuvin, 12 hi Churachandpur, 5 hi Kamjong mi ahiuvin, Kakching, Bishnupur le Tengnoupal a kon mi 2 cheh chule Ukhrul district mikhat pang ahi. Mi 26 hi Delhi a kon train a hung kileu ahi’in, midang 9 hi Mumbai a kon hung kile chule mi 2 hi Uttar Pradesh a kon hung kile ahi.

Abon uva RIMS le JNIMS Covid-19 Care Facility a achon diu ahitai. COVID 19 positive case thah hohi abon uva gamdang a kon hung kile ahijeh uva district authority hon ‘contact tracing’ kiti kivenna chom chom abol u ahi, tin Dr. Mangang in aseibe in ahi.

Imphal sung’a Kailhang ho kihon nading nikho kipe

Imphal, June 8(ET): Imphal sung’a jingkah nidan 6 akon nilhah lam nidan 2 chan dukan/Kailhang ho kihong ding ahi.  Dukan kihonding dan June nisim 1 akon nisim 15 chan a ding chu  Monday nikho le Thangal bazaar a von, kengkoh,  stationary thil,  kichep golseh thil le insung manchah thil ho kijoh ding chuleh Paona bazaar a  bag le stationary thil ho,  Tuesday nikho a  Thngal bazaar a electronics thil le rong,  Paona bazaar a  sana, cosmetic,Photo studio le pon pet, Wednesday ni le  Aluminium thil, Inn sah na thil, Plywood le inn a manchah ding thil chuleh  Paona bazaar a von kijoh na solam lhang a bou kihongding, Thursday ni le  Thangal bazaar a  electronics thil, computer, mobile le pet chuleh Paona bazaar a  Cycle, computer, glass, ply chuleh mobile kijohna ho, Friday ni le Thangal bazaar a  motor parts, tyres le battery chuleh Paona bazaar a  von lhumlam langkai a kijohding chuleh Saturday nikho le Thangal bazar a  hardware, sanitary fitting le marble ho kijohding chuleh Paona bazaar a kengkoh, sports le mitkam ho kijohding ahi. Gully lahdung a thil kijoh ho phal na kipe louding akisei chung a min chong lou dukan ho jong kihong thei louding ahi akiti.

Quarantine centre a dan jui louva lam khom ho thu police hon kholna nei ding

Churachandpur, June 8(ET): Manipur police hon Monday nikhon Churachandpur district a um quarantine center a ‘social distancing’ dan kikoi jui louva party bol a alam kimu ho thu akhol ding ahi, tin aseiyin ahi.

Superintendent of Police (SP), Churachandpur Amrita Sinha in thuso miho akihoupi na a, “Hiche thu akija in, chule quarantine center sunga um phabep in party abolna video jong kamu u ahi”, ati. Center hi volunteer hon avetkol ahi’in, keiho hi security pe a bou kapan u ahijeh a, phalna neilou (unauthorized) ho center a alut le apot ding khah a kapan u ahi’in, akisei thu a pang ho thudohna kinei ding chule quarantine period ni 14 alhin a, home quarantine ni 14 aum jouteng ule action khoutah kila ding ahi, tin aseiyin ahi.

Tu dinmun a center a umho gihna khoutah kipe ahi’in chule WHO le health expert hon ajui diuva asem dan jouse ajui diuva kisei ahi, ati. Tu dinmun a center a hi lenna a kon hung kile mi 25 vel um ahi’in, ahivanga police hon party bol a hi center a um jouse pang uham ti doh chetna anei loulaiyu ahi, tin thulhut in aseiyin ahi.

Tu masanga District Magistrate Pawan Yadav in thilsoh chungchang kholna anei dinga kisei ahi. Thulht dungjuiya, Bimala Raina Government High School quarantine center, Churachandpur district headquarter mun a lhung thilsoh ahi’in, center a um gamdang a kon hung kile mi lhomcha in lentol a music hattah a alha uva chule akhut u kituh to uva, social distancing dan kikoi jana neilou hel a lam khom u ahi.

Chomkhat jouva video hi social media a kithang a, amu tamtah in demna aneiya, natna akisei khoh laitah a jan a party le lam abol u demna sangtah anei ahi. Tu le tua a district administration in district sunga quarantine center 84 ahon ahi’in, hiche mun ho a hi gamdang a kon hung kile mi 3,000 vel um ahi. Chule district a COVID 19 case 46 um ahi in, Manipur a dinga covid case tamna pen jong hi ahi. Natna nei holah a mi 16 hi dam doh ahitai.

Sorkar tohgon amolphou jeh a Manipur hi ‘green’ a kon ‘red zone’ hi ahitai: Nupi Marup

Imphal, Jun 8(ET): All Manipur Nupi Marup in Manipur gam a COVID 19 douna dinga state authority chule bureaucrat officer hon guideline policy kitup tah asem loujeh a gamsunga natna jeh a thi akisei louvanga natna hi kal jing a, green zone a kon red zone lhung ahitan, hiche hi sorkar policy amolphou jeh ahi, tin ngohna anei uvin ahi.

AMNM Secretary L Sumatibala in thuso aneina a, quarantine center chom chom umhon authority ho hehna anei uva, natong chule thil alhasam e, tia aseiyu hi state sorkar alhin joulou na vetsahna ahi’in, World Health Organisation (WHO) guidelines toh kitoh a sorkar tohgon hi bulhing lou ahi, ati. Test kit atamna thei pen a alah uva chule sorkar in natna douna a pan dettah a alah diuvin temna aneiyin ahi.

Gamdang a kon hung kile hohi Mao gate, JIribam railway station le airport a COVID 19 test bol sah tei ding ahi, ati. COVID 19 nat douna dinga doctor le nurse ho panna a natong ding mi alhahsam hi virus chal na hisah louding ahi. Hiche jeh a state sorkar in quarantine centre jouse a kivenna sang cheh anei diuva temna kaneiyu ahi, tin aseibe in ahi.

Waikhom Mani Girls College IQC a um hon college thil asuhset jeh uva ngaidam thum u

Imphal, Jun 8(UNA): Achesa Sunday jingkah a Waikhom Mani Girls College Institutional Quarantine Centre a um thil suse a pang mi 32 hon Monday nikhon acham uva authority ho henga ngaidam athum uvin, thilsoh hi kihet khel na jeh ahi, tin asei uvin ahi.

Chule centre a umhon abon uva college gate asuhset u semphat dinga kihoulhahna jong anei uvin ahi. Achesa Sunday nikho a ka thil bol uhi adihlou ahi’in, umchan hoilou ahi, tin centre a um mikhat in athil bol khel thu asei uvin chule authority ho henga ngaidam athum uvin ahi. Gamsung a um center dang dang a um hon ahung lhung ding nikho a hitobang thilsoh abol lou dinga aseiyin ahi.

Centre a umho le authority ho kah a kihetkhelna auma ahile kihouna nei masau hite. Chief Minister henga kasei nom uchu kabol khel val uve, tihi ahi, tin center a um hon ngaidam athum uvin ahi. Chule centre a kon ka jamdoh pouvin, ahivanga official tah a authority ho a kon ‘discharged certificate’ kakilah jou uva home quarantine dinga kakile u ahi, tin jong suhthengna anei uvin ahi.

Alangkhat a, Waikhom Mani Girls’ College a simlai kiloikhom hon thilsoh demna sangtah anei uvin, vangset umtah thilsoh ahi, tin asei uvin ahi. Hiche thilsoh a pang jousen ni 5 sunga College thil asuhset u asem phat diuvin jong gihna anei uvin ahi.

Hetthei khat chu achesa Sunday jingkah a, Waikhom Mani Girls’ College, Thoubal a ‘quarantine’ kibol mi 32 in ‘home quarantine’ abol diuva thumna anei uva, college gate panna a college thil phabep asuhset u ahi. Achesa June nisim 1 nikho a jong amaho ma ma hin kiphinna anei uva, college thil jong ana suhset u ahi.

Hiche center a um hohi abon uva May nisim 18 nikho a Delhi a kon hung kile ho ahiuvin, anikho ma ma a hiche centre a akoiyu ahi. Hiche centre a um mi 5 hi Covid positive ahi akihetdoh jeh a amaho ‘quarantine’ umna phat hi mopohna nei hon asuh saobe peh u ahi.

Alangkhat a, Chief Minister N Biren Singh in hiche centre a umhon ngaidam athum ahetpeh na thu aseiyin ahi. College thil suse a center a umhon kathem mo uva tia ngaidam athum uhi kipapi aume, tin aseiyin chule amaho hin achesa Sunday nikho a thil asuhset hou jong asemphat u ahitai, ati. Chule center a umhon hitobang thil abol kit louna dinga temna jong aneibe in ahi.

Sielmat QC aum ho  Khamnathei supply bol Mi 2 Sielmat Task force hon mandoh; Youth Hostel QC a koi honta

B.Lalboi Gangte

CCpur, June 8 (ET): Sielmat Christian Higher Secondary School Institutional Quarantine Centre (ICQ) aum Inmate ho a ding Ju, Lou leh Khamnathei aguh’a pe jing aum toh kilhon in Janilhah (June 7) nidan 7:50 vel in Institutional Quarantine Centre kim vel leh Sielmat Khosung lut na bul’a Sielmat Task Force Duty hon kholchil na anei phat sung uvin pasal mi 2 aman doh uvin ahi. Hiche thu’a Sielmat Task Force akon’a thulhut kimun aseina ah Institutional Quarantine Centre mun’a Inmate hoding Ju leh Khamnathei supply  bolgo kimandoh teni chu  Suanthang Naulak (24) S/o Khamhao Naulak of Nghathal Village leh Tuansanmung (23) S/o Nanglianthang of Zion Veng ahi akiti. Chuleh amani toh kilhon Joylian of Tangnuam Village chu ajamdoh man in, amaho thum hin Sielmat Quarantine Centre a um Mangminlun @ Minlun aguh’a khamnathei apeh jiu ahin, Mangminlun hi Chennai akon hung ahi.

Hiche thu’a Sielmat Task Force, CCPur Police chule Medical Department hon akimandoh teni chu Youth Hostel a ni 14 sung Quarantine Centre a um dingin tunilhah mama in akoilut uvin ahi.

CM in Sanjenthong a Plant Health Clinic hondohna nei

Imphal, June 8(ET): Chief Minister Shri N. Biren Singh in Horticulture and Soil Conservation, Sanjenthong, Imphal a Monday nikhon Plant Health Clinic hondohna aneiyin ahi.

Chief Minister in ahoulimna a gamsung economy khantou ding hi agriculture, horticulture le MSME kiti sector ho a kingam ahi, tin aseiyin ahi. Horticulture department official ho apachatna thu aseiyin, department in loubol miho phatchomna ding hitobang plant health diagnostic service asemdoh thei akipapina le atilkhouna thu aseiyin chule loubol miho lah a ‘awareness campaign’ abol diuvin thuhilna jong aneiyin ahi.

Covid 19 pandemic kisei khoh laiya state sorkar in gamsunga agriculture le horticulture sector khohsah ding a thulhuhna anei ahi, tin aseiyinc hule hiche sector thahat sah nadinga state sorkar in Task Force asemdoh ahi, ati. Manipur gam hi achang a ding thei chule angaicha alhing a asodoh thei na gam ahiding hi sorkar in akhohsah pen ahi in, hiche chungchang a bol thei chan abol ding ahi, ati.

Gamsung soh neh le chah chule thei hohi scientific research le practice alhahsam jeh a mang cheh cheh ahi’in, phailei bolna a har (chemical fertilizer) iman uhi ingah kigot diu ahi, ati. Chemical le fertilizer ho henga natna akihelou tamtah umthei ahi, tin jong aseiyin ahi.

Gamsunga natna hise atam cheh cheh thu a CM in virus toh hin khom je ihet u ngai ahi, tin aseiyin chule mipin face mask, hand sanitizer le social distancing dan ajui diuvin temna aneiyin ahi. Waikhom Mani Girls College quarantine centre, Thoubal a umhon college thil asuhset nau demna aneiyin, chule centre a umho anu apa tehon umchan pha atho uva, SOP kisodoh ho ajui nading uva thuhilna anei diuvin aseiyin ahi.

Ni 5 sunga gamsung mi 35,000 val gam chom chom a kon hung kile ahi, tin aseiyin chule mipin nat douna a sorkar atosot dinga temna aneibe in ahi. Kin gon a CM Biren in Mobile Soil Testing Laboratory Van jong hondohna aneiyin ahi. Kikhopna a Deputy Chairman, State Planning Board S. Rajen, Principal Secretary (Horticulture) P. Vaiphei, Director (Horticulture) N. Joymati Devi, Director (Agriculture) Laltanpuii Vanchhong, Director (Veterinary & Animal Husbandry Services) Dr. H. Chaoba le adang dang jong apang uvin ahi.

Doctor 7 ‘quarantine’ bol lou ding’a sorkar in phalna pe

Imphal, June 8(ET): Simlai kiloikhomna 6- MSF, AMSU, DSAM, KSA, SUK le AIMS in Monday nikhon Sky Hospital & Research Centre, Imphal a lungchang natna nei (heart patient) ho kijen nading thu a ‘consultative service and treatment’ a dinga gamsung a hung doctor 7 ho ‘quarantine’ bol lou dinga phalna apeh demna sangtah anei uvin ahi.

Monday ni a simlai kiloikhom hon thuso miho akimupi nauva ‘quarantine’ hi ahung kholjin doctor ho a dinga jong bol tei ding (mandatory) hisah ding ahi, tin asei uvin chule amaho ‘quarantine’ kibol louva gamsunga na atoh diu sorkar in aphal a ahile thilsoh lhung aumkhah a ahile sorkar themmo kichan ding ahi, tin jong asei uvin ahi.

MSF President in simlai kiloikhom ho thalheng a ahoulimna a, tu masanga jong sorkar in lenna a kon hung kile a gamsung miho hi Home Quarantine bol ding phalpeh dinga SOP ana sodoh ahi’in, hiche dan hi simlai kiloikhomna 6 in sangtah a adoudal ahi, ati. “Simlai kiloikhom hon hiche hi ana doudal lou hile natna kilahson to na hi ‘local level’ a umding ahitai”, ati.

Simlai kiloikhom hon Waikhom Mani Girl College quarantine centre a um hon gate asuhset nau thilsoh jong demna anei uvin ahi.

 

CCpur Dist. a Covid-19 case 46 umlah a mi-16 kijendam ta; Active case 30 um

B.Lalboi Gangte

CCpur. June 8 (ET): District Surveillance Officer, IDSP, CCpur in tuni district Covid-19 report asodoh na ah tuchang a State dang apat  CCpur mi 3,379 ahung lhung tan, mi 3,168 test bol dinga sample kila ho lah a mi 1,811 result asohdoh in tuhin mi 1,357 result kingah jing ahi ati.

Result sodoh loulai tamtah um ahi jeh in Quarantine Centre a social distance juiding thil poimo tah ahin,  tunai cha’a Video leh lim phabep kithethang na Quarantine Centre  ho a hitobang juiding kisemho akijuilou ding aginmo thu aseiyin jong ahi.

CCPur district a Case thah numei 4 leh Pasal 8 aum be in, tuchan hin JNV Bishnupur CQC apat mi 1 jaonan District sung a positive case 46 apha tan, hiche lah’a mi 16 akijendam uvin tua vetkol a um Active case mi 30, numei 14 leh pasal 16 aum e ati.

Manipur State sung’a Case 272 umlah a Active case 204 ahin mi 58 akijendam tai.

Tuni chan hin sample 17,028 COVID-19 test bol ahi tan, State lutna mun a checking Centre chom chom a mi 2,56,062 vetlhah  (screening) ahitan, Community quarantine Centre a mi 11,958 leh government quarantine Centre a mi 6,499 tuhin aum in ahi.

CCpur District a Sample Collection team in tunin sample test ding in 133 alakhom kit uvin, hiche ho chu Komkeirap CRPF Loktak Project apat 8, NHPC guest house apat 5, Circuit House Bijang apan 12, Volunteers apat 11, Munjang UPS Torbung apat 15, St. Teresa School, Tuaitengphai apat 40, ITI Saikot apat 27, Rengkai Govt. School apat 2 leh District hospital apat 20 ahi.

Delimitation hi BJP sorkar ‘policy’ dihlou ahi: CPI

Imphal, Jun 8(ET): CPI Manipur State Council census lui a Delimitation bol ding hi BJP sorkar in abol policy dihlou ahi, tin asei uvin ahi.

Asst. M Joykumar Luwang in thuso aneina a, civil society organization chule CPI panna a political organization tamtah in Delimitation process adei lounau thuso anei vang uva CM N Biren lamkaina BJP sorkar in mipi awgin jui louva Centre sorkar sei ho alhen joh ahi, tin aseiyin ahi. ‘Delimitation Act’ thu a CPI MSC in political party meeting bol dinga kouna anei hi sorkar in tuchan a adonbut loulai ahi’in, tua sorkar in mipi awgin jahpeh louva assembly constituency 3 val kisuhmang nathei ‘Delimitation Commission’ gangtah a asem ahi, ati.

BJP lamkaina Assam sorkar in Delimitation Act hi anop peh lou chule commission jong asem doh loulai ahi, tin aseibe uvin ahi. State secretariat meeting bol dinga CPI MSC in kouna aneiyin chule gamsunga Delimitation Act process hi vohchon dinga CPI Central Party in apohdoh seikhom dinga aseibe uvin ahi.