Manipur gammi khat Covid-19 jeh a Karnataka a muollem

Manipur gammi khat Covid-19 jeh a Karnataka a muollem

90
0
SHARE

Manipur gammi khat Covid-19 jeh a Karnataka a muollem

Bengaluru, April 16: Tuni chun Manipur, Moreh a cheng Tamil mi K. Ramachandra (66) chu Covid-19 nat na jeh in Bengaluru, Trauma Care Centre, Victoria Hospital a akijen chu damdoh jou talouvin tuni jingkah in ana muollem tan ahi. Ama hi April 10 apat a ICU a ventilator toh kitho a kijen pan ahi tai.

Ama pan thina atoh toh lhon in Karnataka gamsung a covid-19 jeh a thina toh mi 13 alhing tan ahi.

Ramachandra hi Moreh Ward No. 6 Tali Road a kon Punjabi khat toh kicheng ahin March 12 ni a Manipur akon Bengaluru anajot ahin chomkhat jouva hai hahsa asah jeh a private hospital a kijen aphat chom lou phat jeh a Trauma care centre a ki admit ahin April 9 nia covid-19 positive ahidan hetdoh ahi.

Thulhut in aseibe na ah amapa hin adammo na akon lou ana neh ahin ahung dam doh jou Bangalore bazar khat a thil cho a ache kit na akon dammo na ahin nei kit a hospital a ana um kit ahi jong ati.  A mollem pa hin antna hi Moreh akon anei ahi pon Bangalore ache jouva natna akilahson a thina ana to ahi tin jong thulhut akimun ahi.

Thina toh Ramchandra insung mite Moreh a um ho jouse Imphal a test bol ding in Ambulance a apodoh taovin ahi.

Old Aged Home a um tehse minu khat in inmun a kon ana nodoh a achapa chung’a action lah dinga CM heng’a sei

Imphal, April 16: Chief Minister N. Biren Singh in Kongba Nongthombam Leikai, Imphal East a um Senior Citizens Home for Women kiti old aged home a um tehse numei khat ajah kidang asahna thu aseiyin ahi.

Covid-19 pandemic douna thu toh kisaiya Home avilna a Home a um tehse numei khat in Chief Minister henga, a inmun a kon gam beh neocha jeh a nodoh a achapa chunga action alah dinga asei ahi. “Gam leiset neocha jeh a ka chapa in inmun a kon einodoh ahi’in, kajam na a ka bil/na kakita khah a, chomkhat jouva hatah a kakita jeh a kamit cho ahi”, tin numeinu in Chief Minister henga aseiyin chule achapa chunga action alah ding adeina thu jong aseiyin ahi.

Chief Minister injong pona tah a apet pet a jing nikho kah a anu nodoh pa police hon amat diuva thupeh anei ahi. Tehse minu mipa sugim a chule gelkhoh louho chate gotna pehna dinga government order jong um ahitai. “Hitobang case hi kanga jing ahi”, tin Chief Minister in aseiyin chule ngailutna neilou hitobang thilse bol ho lha louding ahi, ati.

Hiche Home a um numei tamtah in ama ama boina thusim aneisoh u ahi’in, chenna ding mun neilou jeh a ‘old aged home’ a um u ahi, ti thusim hi kibang soh ahi.

Kuwa na thu’a politics bol sanga angaicha ho kithopi ding khohsah jouvin: CM Biren

Imphal, April 16:  Chief Minister Biren Singh in demna thu sei ho suhthip nadinga mipi ngaichat thil ho peh nadinga panlah angaiyin, kuwa na jeh a politics bol ding ahipoi, tin aseiyin ahi.

“Kuwa na jeh a politics bol hih uvin, hiche sanga angaicha ho tu phat a thil peh ding khohsah uhite”, tin Chief Minister in Thursday nikhon video message a aseiyina hi. Imphal airport a kikoi akiman kuwa na hohi mi phabep in aladoh uvin, kuwa na khel a kopi (cabbage) na akoi uve, tia mi phabep in ngohna anei thu Biren in suhthengna a asei ahi.

Kuwa na hohi achesa April nisim 4 nikho a lenna huikong thum lah a khat a ahin pohlhung u ahi. Mipin tuhi angaicha lou thil ho poh phat ahipon, Covid-19 jeh a gamsung in medical supply chule neh leh chah, niseh a manding ngaichat tamtah anei ahi, tia mipin demna sangtah anei jouva hiche thil hi kiman ahi. Ahin pohlhung uva kon kuwa na hi airport a umden ahi.

“Kuwa na kipoh jeh a jail a mi aum’e ti thulhut um khalou ahi’in, tuchung a kuwa na a sumkol vein a a pang ho ni 14-15 jail a kikoi ahi”, tin CM in aseiyin ahi. Kuwa na akigudoh in, akhel a kopi na akikoiye, ti he a group aumle hung uhenlang ngohna asem houhi kisan uhen, tin aseiyin ahi. Dan in kuwa na a sumkol vei ding phalna pe jong le, na hohi lockdown sunga airport a kon kiladoh theilou ahi. Kuwa na hi sepai hon anga ahi, ati.

“State sorkar in sumkol vei ho douna a pan alah’a, amat uva chule court a apui ahi’in, themmo kichan nathei ding mun hol hih uvin”, ati. Achesa April 12 nikho a thuso mihon airport a kuwa na tamtah kikoi ho vetlhahna anei nauva kuwa na phabep hi mon lha a chule basket phabep akeuva amudoh u ahi. Neh dinga pha hinam tia adoh nauva airport a um official hon ‘test’ kibol ding ahi, tia aseiyu ahi.

Gamdang miho neh le chah kihopna a adihlou aum’e, tia MLA Joykishan in CS demna nei

Imphal, April 16: Achesa April nisim 2 nikho a Chief Secretary in natong dinga hung gamdang mi (migrant worker) ho angaicha neh le chah hop dinga notification aso thu MLA Khumukcham Joykishan in tunin demna aneiyin, natong ho thil (neh le chah) kihopna dinga tohgon asem nauva avat/adihlou tamtah aumin, Chief Secretary mitmona ahi, tin demna aneiyin ahi.

“Chief Secretary in gamdang mi natong dinga hung ho dinga neh le chah akhoh ho agonpeh in, ahivanga in bahara a aumna a tangden, gamsung mi nikho tha kihol thu, natong ho thu seiding asumil e”, tin Joykishan in aseiyin chule mipi thu ahiteng itidan a Chief Secretary in hibanga mitmona aneiham, ati. “Achesa April nisim 2 nikho a Chief Secretary in notification asodoh na a, migrant worker jousen anchang kg 5 chule hawai hop dinga thuso anei ahi’in, kal ni achetan ahivanga hawai (dal) kihom loulai ahi”, ati.

Chief Minister in MLA le local body ho sanga Chief Secretary hi lolhing jo a agel ahi, tin jong aseiyin ahi. MLA, politician chule midang tamtah in ama ama jo chan a lunggel chom chom nei pum a angaicha ho kithopina aneiyu ahi. State sorkar in Local Area development fund hop 25 Covid-19 nat douna a man dinga phalna apeh hi tohgon pha ahi. Ahivanga ama panna a MLA tamtah dinga Local area development fund 25% hi kisodoh loulai ahi’in, tuchan geiya MLA hon kithopina apeh hohi sorkar in apeh ho chunga amaho sum a kon kithopina aneiyu ahi, tin Joykishan in aseiyin ahi. Pradhan Mantri Garib Yojana noiya Thangmeiband constituency a dinga anchang kihop ahitan, ahivanga anchang kihom hi NFSA a kon kikah kit ahi. Hiche thu hi Chief Minister henga kiseiya, ama thuhilna dungjuiya athu kipodoh a, achaina a DC in akikah quota ho pehdoh dinga kitepna anei ahi, tin Joykishan in aseibe in ahi.

Lockdown sunga simlai hon kum amansah louna dinga kigotna um

Imphal, April 16: Covid-19 lockdown in gamsunga themjilna sangtah a asuhkhah toh kilhon a boina suhlhap thei nadinga Commissioner (Hr & Tech Education), Manipur Government, M Harekrishna in gamsunga higher educational institute a authority ho thuhilna phabep ape in ahi.

College atamjo in aman e-learning tool hatsah ding chule college website, Whatsapp group, e-mail le adang dang a college department chom chom a jilkung jousen a study material ho akimu tei nadinga pan alah diuva jong thuhilna aneiyu ahi. Jilkung hon YouTube a Video lecture upload abol diuvin jong temna aneiyin, simlai koima akidalha aumlou nadinga College in pan sangtah alah dinga aseibe in ahi.

Government le Government-Aided chule Private hijong le College jousen lockdown kilahdoh teng ‘extra class’ kiti tohgon ho akisem diu, social distancing ajui uva, khut kisop theng jing ding chule adang dang ho tohgon akisem diu ahi. Chule simlai hon kum amansah louna dinga pan alah soh diuva jong asei ahi.

College jousen ‘mental health, psychological le simlai ho phatthei nadinga helpline jong asemdoh uva chule faculty member hon aphat tin a hiche ho avetsui dinga thuhilna anei uvin ahi. Thuhilna dungjuiya, education institution a lamkai luboh jousen simlai, faculty member, non-teaching staff le insung mite ho Aarogya Setu App chule Ministry of AYUSH in chapang nat douna hatsah nadinga Protocol asem ho ahil lhang diuva jong aseiyu ahi.

College Principal hon aphat tin a Director (University le Higher Education) chule University a Registrar le dan semna a mopohna neiya UGC, NCTE, AICTE le adang dang hojong website, email, telephone le lampi dang dang a akijahmat pi diuvin jong thuhilna aneibe uvin ahi.

Education Minister in Class 8 akon 10 chan e-Textbook hondohna nei

Imphal, April 16 (ET): Education Minister Dr. Thokchom Radheshyam  in Thursday nikhon New Secretariat, Imphal a class 8 a kon class 10 chan E-Textbooks hondohna aneiyin ahi.

Minister pa in ahoulimna a, covid-19 jeh a gamsunga themjilna ho achelhah tah theilou jeh a textbook hi electronic format a akimu thei nadinga kibol ahi, tin aseiyin chule Class-1 a kon 10 chan agom a e-textbook 71 hi upload kibol vahding ahitai, ati. Lekhabu jouse upload bolna dinga atam pen a kal 2 vel lut ding ahi’in, hiche jouteng Tribal dialect lekhabu hojong aban ban a upload kibol ding ahi, ati.

Dr. Thokchom Radheshyam in vannoi pumpi hi Covid-19 pandemic in atohkhah ahitan, hiche hin education sector sangtah a asuhboi ahi, ati. Themjilna hi sector thupi tah khat ahi, ajeh chu khangthah ho khonung sem dinga akipuihoina ahi. Textbook hohi electronic format a akipeh teng le tamtah a dinga phatchomna hiding ahi, tin aseiyin ahi.

Covid-19 kiti tu dinmun a jong textbook hi simlai chule jilkung hon bailam tah a aman theidiu ahi. Chule textbook sem hoi nadinga mipi ngaidan lahna jong kinei ding ahi, ati. Minister pa in official ho tompan na jal a akipapina thu aseiyin chule e-textbook program hi Board of Secondary Education Manipur (BOSEM) in alah ahi, ati.

BOSEM in print chule Class-1 a kon 10 chan textbook kijohna amopoh ahi’in, class 1 a kon 8 sung hi SCERT in asem a chule print le sales hi BOSEM in abol ahi’in, alangkhat a Class 9 le 10 lekhabu hi BOSEM noiya kibol ahi. Textbook hohi bosembook.in website a muthei ahi, tin aseiyin chule hiche hi mobile application “Bosem eBook’ a kon Google Play Store a download bol thei ahi, ati.

Hiche chungchon a webpage a hi year-wise instruction, Blue print, Teachers guide book le answer script  a topper le subject topper ho sca copy kiti features hojong umding ahi. Website chule mobile application hi X-treme Wave in design abol a asem ahi. Thuso miho toh Minister pa akimuto na a Commissioner Education (S) T Ranjit Singh, Director Education (S) Th. Kirankumar Singh, Secretary, BSEM, Dr. Chithung Mary Thomas le official dang dang jong apang uvin ahi.

Huipi in CCpur District sung’a inn phabep anasuse

B.Lalboi Gangte

CCpur. April 16 (ET) : Janni (April 15) nilhah lam nidan 4:00 vel a Northeast gamkai mun chom chom’a huipi hattah ana nung chun CCpur District sung thinglhang lam’a cheng chenna inn ho anasuset naban’a Suangdoh kho’a BADP 2017-2018 fund noi’a kisa Hostel building jong anasuse in ahi. Hiche hostel hi Government tohgon ananoi’a kibol ahi in Coronavirus (COVD-19) jeh’a natoh ho chelha thei lou ahi. Hiche huipi chun Hostel bang anasuse in ahi.

 

CM in Old Age Home ho vilna nei; Covid-19 nat venna dinga kigotna anei dan u vetlhahna nei

Imphal, April 16(ET): Tehse akum tam hon Covid-19 athoh lel jeh uvin Chief Minister N Biren Singh in Kongba Nongthombam Leikai, Imphal East le Mongshangei, Imphal West district a um Old Age Home ho avil in, amun a natna a kon kivenna dinga akigot dan hou vetlhahna aneiyin ahi.

CM in Old Age home a um ho jong akihoulim pi in chule neh ding, hand sanitizer, mask, lou le adang dang ahop peh in ahi. Chief Minister in thuso miho akimupi na’a, gamsunga Covid-19 nat douna dinga sorkar tosotna pe a gamsung miho chule thuso miho chunga kipathu aseiyin ahi. April nisim 20 jouteng state sorkar in dinmun avet a, akilhengdoh sector phabep a dan olsah (relaxation) ding angaito ding ahi, ati.

Hijong le kino tah a thulhuhna ima kinei louding ahi, ajeh chu Manipur le Myanmar gamgi saotah kikop ahi’in, lhahsamna neocha auma ahi jong le muphah lou boina kitoh thei ahi, ati. Mipi chule civil society organization hon pan alahkhom a Covid-19 nat douna a sorkar toh na atoh khom diuvin temna aneiyin chule tuphat hi kidem to a chule themmo kichan to phat ahipoi, tin aseiyin ahi.

Sorkar in niseh a angaicha khoh thil man asem/atep ho kalval a thil mantam jo a joh auma ahile mipin police ho hetsahna aneidiu ahilouleh Common Control Room toll free number a hetsahna anei diuvin temna aneiyin ahi. Khopi chom chom a gamsung mi atangden ho hahsatna ngailhah peh dinga state jouse a IAS officer khat cheh hi in-charge officer dinga kilhengdoh ahi, ati.

Amaho hi khohsahna peh ngai ahi, ajeh chu inmun a kon gamlha tah a um uva, sum dimun a hahsatna ato chunga jat le nam a kithetna le kibuluna chule hahsatna dang dang ato u ahi, tin CM in aseiyin chule gamdang a oh den ho kimanchah nadinga tengbang.in a kithopina thum ho bank account a dangka 2000 cheh kithot pan ahitai, ati.

Sorkar in khopi chom chom a um kijenna a kithopi na ngaicha ho kithopina peh ding jong angaito ahi, tin aseibe in ahi. CM in Old Age Home avilna a Yaiskul MLA Th Satyabrata, Principal Secretary (Health) V Vumlunmang chule officer dang dang jong pang ahi.