Manipur CM N Biren Singh in lakh 4,831.46 lhing PHED project 5...

Manipur CM N Biren Singh in lakh 4,831.46 lhing PHED project 5 hondohna nei

60
0
SHARE

Manipur CM N Biren Singh in lakh 4,831.46 lhing PHED project 5 hondohna nei

Imphal, July 8(ET): Manipur Chief Minister N Biren Singh in Wednesday nikhon dangka lakh 4,831.46 vel lhing PHED project nga hondohna aneiyin, PHED Minister Losii Dikho panna a Chief Minister’s Secretariat, Imphal a video conference a kon hondohna anei ahi.

Athah a hondohna anei project a hi Porompat Integrated Water Supply Project, Sangakpham IWSP, Canchipur IWSP, Heingang Awang Leikai Water Supply Scheme chule Churachandpur Water Supply Distribution Network pang ahi.

Chief Minister in ahoulimna a, sorkar in gamsunga developmental project chom chom ajo ding ahi, tin aseiyin chule aphat cha hondohna kinei ahi, ati in chule mipin atosot dinga temna aneiyin ahi. New Development Bank in gamsunga um inson jouse a twi peh nadinga dangka crore 3,000 sanction abol ahi, tin CM in aseiyin ahi.

Angaicha tender, work order kisodoh na leh adang dang abon a kijou ahitan, Foundation stone tundohna kin umvah ding ahi in, hiche kin goun a Prime Minister Narendra Modi apan dinga state sorkar in ngehna anei ahi, ati. CSO, mipi chule mopohna nei adang dang hon gamsung khantou machalna dinga natoh kichepi ho asuhboi lou diuvin temna aneibe in ahi.

Covid 19 chungchang thu a Chief Minister in, natna a kon kijen dam (recovery rate) hi 53 percent val ahitan chule igam uva tuchan geiya natna jeh a thi aum poi, tin aseiyin ahi. Natna a kon mipin kivenna aneiya chule Health Ministry leh sorkar in asodoh protocol le SOP jouse ajui cheh diuvin temna aneiyin ahi.

Jiribam a Rapid Antigen Detection Centre akihondoh toh kilhon a covid 19 natna nei gangtah a kihedoh theiding ahi, tin CM in aseiyin chule district dang dang a jong testing facility kikoi vahding ahi, ati. Tuchan geiya state sorkar henga rapid testing kit 15,000 kipe ahitai. Chule Jiribam district hospital hi COVID Care Centre a khel nadinga sorkar in thulhuhna anei loulai ahi, tin CM in aseiyin, Jiribam district a natna nei ho amaho district ma ma a akijen thei nadinga COVID Care Centre hondoh ding sorkar in tohgon anei ahi, ati.

PHE Minister Losii Dikho in, 2022 kum kah a gamsunga um inn jouse a twi peh ding hi sorkar in agelkhoh ahi, tin aseiyin chule mipi tosotna jal a, Churachandpur a Water supply scheme hi jo nadinga phat kitep lha get masanga kijou ahi, ati. SPML Infra. Ltd. Kolkata in aphat masanga natoh jo nadinga tomngai tah a pan alah jeh a kipathu aseiyin chule mipin gamsung miho dinga kibol khantou machalna ding natoh ho atosot diuvin temna aneibe in ahi.

Hetthei khat chu Koirengei a Integrated Water Supply Project for Imphal Planning Area Ph-I (15.89 MLD) hi dangka crore 8.58 lut a kisa ahi. 15.89 MLD (Million per day) capacity project hi March 2018 kum a kipan a chule March 2020 kum a ajo u ahi. Integrated Water Supply Project for Imphal Planning Area Ph-I (0.80 ML) i/c Pumping Station, Sangakpham hi dangka crore 4.44 a kisa ahi in, 0.80 ML capacity project hi March 2018 a kipan a chule March 2019 a ajo u ahi.

Canchipur a Integrated Water Supply Project for Imphal Planning Area Ph-I (Water Treatment Plant (9.08 MLD) hi dangka crore 6.10 lut a kisa ahi in, 15.89 MLD (Million per day) capacity project hi March 2018 a kipan a chule March 2020 a ajo u ahi. Heingang Awang Leikai a Water Supply Scheme hi dangka crore 5.88 lut a kisa a, 0.384 MLD capacity project hi August 2018 a kipan a March 2020 a ajo u ahi.

Churachandpur a NESIDS noiya Water Supply distribution network hi dangka lakh 2339.36 lut a February 2019 kum a asah pan uva chule June 2020 a ajo u ahi. Lamphel a Controller of Legal Metrology, R&D Centre Office building hi 2018-19 kum a dangka crore 2 lut a kisa ahi.

Kin goun a CAF&PD Minister Karam Shyam, Agriculture Minister V Hangkhanlian, Deputy Chairman, State Planning Board, S Rajen Singh, MLA Okram Henry, Chief Secretary Dr. J Suresh Babu, Principal Secretary (Health), V Vumlunmang, Commissioner (PHE) Nidhi Kesarwani, Secretary to Chief Minister Ningthoujam Geoffrey, Chief Engineer (PHE) H Sunil leh adang dang jong apang uvin ahi.

Eastern Bengal Frontier Regulation noiya ILPS kichepi aphatchom na aumpoi: JCILPS Convenor

Imphal, Jul 8(ET): Eastern Bengal Frontier Regulation noiya Manipur a Inner Line Permit System (ILPS) akichepi chungchang a gamsung miho dinga kipana ima aumpon, hiche a hi gamsung mi dihtah ho ventup nading provision aumlou jeh a act hi aphatchomna umlou ahi, tin JCLIPS Convenor Yk. Dhiren in aseiyin ahi.

Lamjing Meira Ching, Awaching, Imphal East a Wednesday nikho a S Robinhood athi kum 5 lhinna ‘Lamjing Meira Numit’ anit nauva Dhiren in thuso miho akimupi na a asei ahi. JCILPS tohgon noiya Manipur gam mi asang a sim in gamsung mi dihtah ho huhna dinga kiphinna apat a, chule gamsung mi dihtah ho ding gelna a Robinhood in ahinkho aphal nikho (July 8, 2015) geldoh jingna kin gamsung in aman ahi, ati.

India sorkar thuhilna banga Manipur sorkar in Gazette notification asodoh na a, Manipur gam a ILP chepi dinga kiseiya chule ILP hi gamsunga December nisim 31, 2019 a kon bulhing set a kichepi pan ahi. Gamsung mi dihtah hohi koiham ti kiseina provision umlou chule ILP ‘base year’ akipeh loujeh a ILP akichepi nunga jong aphatchomna umlou ahi, ati.

JCILPS in thumna anei hi, 1951 kum jouva kon Manipur a hunglut gamdang miho hi permanent residential pehlou ding, voter list a pang louding chule gam leiset achoh thei lou nadiu dan semding hi ahi. Kiphinna kibol hi gamsung mi dihtah ho huhna ding ahi, ati.

State sorkar in gamsung mi dihtah ho aseichen louva chule aganna thei pen a ‘base year’ asem louva ahileh kiphinna athah a umkit thei ding ahi. Gamsunga ‘divide and rule policy’ hi thuhtah a sei phat ahitai. 2001 census report dungjuiya delimitation bol ding doudalna aum hi census data a adihlou lentah aumjeh ahi. Population data ratio dihtah a akilah jouteng thinglhang leh phaicham kah a boina aumlou nadinga delimitation exercise bol ding ahi, tin jong aseiyin ahi.

Manipur Population Commission akisemdoh a chule census report adih teng leh bou sorkar in delimitation abol dinga ngehna aneiyin chule gamsung mihon Manipur a ILP lolhing tah a akichepi thei nadinga pan alah uva tosotna lhingset apeh diuvin temna aneibe in ahi.

Joint Committee Inner Line Permit System (JCILPS) official holeh Robinhood insung mite, chule simlai kiloikhomna chom chom a volunteer holeh adang dang in kin goun a aum talou Robinhood jana pehna anei uvin ahi.

 

2001 census dungjui a Delimitation Exercise achelhah ding PDA in tosot na nei; pan nathei chan a pan lah dinga sei

Imphal, July 8(ET): People’s Democratic Alliance (PDA), kiti ‘recognized hill based political party’ in February nisim 28 nikho a Ministry of Law Justice in 2001 census dungjuiya Delimitation exercise Manipur gam a chepi dinga notification asodoh alamto na thu asei uvin ahi.

President L Seth in thuso aneina a, Delimitation exercise hi India pumpi in Delimitation Commission Act, 2002 noiya achepi democratic exercise ahi, tin aseiyin chule 2008 kum masanga state 24 a Delimitation Commission in delimitation exercise ajo ahitan, chule 2009 kum a ‘house of the people’ election hi Delimitation Commission Act, 2002 guidelines dungjuiya kibol ahi, ati.

Ahivanga, Northeast state 4 a delimitation exercise hi India President in Ordinance asodoh a avoh chon ahitan, O Ibobi Singh lamkaina SPF sorkar in security thu a vohchon dinga anasei jeh ahi in, hiche hi imadang ahipon, Manipur sorkar in phaicham a um district a kon thinglhang district a Assembly seat 3 re-adjust bol ding avendoh thei nadinga abol ahi, ati.

Dzelimitation exercise akibolna ajeh tamtah um ahi, tin PDA in aseiyin, hiche lah a khat hi population segment kibang a representation kibang aumna ding ahi. Chule ‘one vote, one value’ aumthei nading ahi, tin PDA in aseiyin ahi. Delimitation exercise hi House of the People a SC leh ST representation aumthei nading ahi, tin jong asei uvin ahi.

Constitution noiya gamsung mi jousen ama ama rights exercise abol nadinga kichepi hiche exercise, gamsunga political party holeh Manipur a organization len len hon adoudal hi kidang asah na thu PDA party in aseiyin chule mopohna nei political party leh organization jousen pan alahkhom a gamsunga kibang tah a khantouna aumna dinga pan alah diuvin temna aneibe in ahi.

Gamsung mi jousen India Constitution a kipe dungjuiya ama ama constitutional rights amu tei nadinga PDA in pan nathei chan a kithopina anei ding ahi, tin kitepna jong aneibe uvin ahi.

 

Manipur a Covid-19 positive 5 kimu be; natna a kon kijen dam 55.26% lhingta

Imphal, July 8(ET): Achesa nidan 24 sunga Manipur a pasal 4 leh numei khat panna a Covid 19 positive case 5 akimu be in, abon uva VRDL, JNIMS a test kibol ahi.

Mi 5 hohi abon uva Senapati district mi ahiuvin, Covid Care Facility, Senapati a achon tauve. Chule angaicha containment leh contact tracing ho chelha ahi.

Alangkhat a, achesa nidan 24 ma ma sunga natna nei mi 22 RT PCR test abol kit nauva Covid 19 natna anei tahlou jeh uva discharged abol tauvin ahi. Hiche lah a mi 13 hi CCCs, Meitram a kijen a, mi 2 hi Senapati a kijen, Kamjong a mikhat, Covid Care Facility, RIMS a mikhat chule JNIMS a kijen mi 4 pang ahi.

Gamsunga positive case hi agom a 1435 lhing ahitan chule natna a kon kijen dam jat leh active case um hi 793 leh 642 ahi. Recovery rate hi 55.26% lhing ahitai, tin Dr. Khoirom Sasheekumar Mangang, Additional Director leh Spokesperson, Health Department, Manipur in thuso aneina a aseiyin ahi.

Chief Minister N Biren Singh in Wednesday nikho a Rapid Antigen Test Kits hondohna anei ahi. Kit 300 hi Jiribam a athot uva, chule tuni ma ma a test apat u ahitai. Test kit 15,000 hi ICMR a kon amu u ahi in, chule kit hohi district dang dang a jong ngaichat dungjuiya athot diu ahi.

Nikho 41 quarantine centre a aum jouva inn kile numei khat Covid-19 positive ahi kihedoh

Ukhrul, July 8: Mumbai a kon hung kile chule Ukhrul district a um quarantine centre a ni 41 vel um kum 21 a upa numei khat ‘home quarantine’ bol dinga asoldoh nikho uva Covid 19 positive ahi akihedoh in, Manipur a ‘community transmission’ aum nathei lungkham umtah thusoh ahi.

Thulhut dungjuiya, numeinu hi Institutional Quarantine centre a ni 14 aum jouva DIET Teacher’s Quarters, Dungrei, Hungpung kho a um Comminuty Quarantine Centre a achon kit u ahi. Dungrei Public Organisation (DPO) president Xavier CS in asei dungjuiya, Community Quarantine centre a um hohi Covid 19 test akibol na a negative hi ho ngen ahi.

Ahivanga, CQC a nikho 14 aum jou uva aumho ama ama inmun a ‘quarantine’ bol dinga achedoh kon uva centre vekol a DPO executive hon CQC a um mi 31 lah a numei khat test result akimu loulai ahetdoh ahi. “Ama sample hi IQC a nikho 14 anaum sunga kila ahitai, tia eiseipeh u ahi in, ahivanga result umlou ahi”, tin Xavier in aseiyin ahi.

Xavier in asei dungjuiya, Mumbai a kon hung kile numeinu sample anivei channa a July nisim 2 nikho a alah kit u ahi in, hiche hi quarantine centre a ni 38 aum jou tina ahi. “Quarantine centre a nikho 41 um a chule CQC a achang a um a, Covid 19 symptom ima aneilou jeh a mopohna nei medical official hotoh kihouna kanei uva July nisim 5 ni a centre a kon discharged bol dinga kaseilhah u ahi”, ati.

Vangset umtah a, numeinu Community Quarantine centre a kon discharge abol niu a nilhah ma ma a Covid 19 positive ahi kihedoh ahi. Report amu jou uva DPO executive holeh medical official hon numeinu akimupi chule a insung mite 15 aholdoh paiyu ahi. Numeinu jong apuidoh uva tua hi TK Wood COVID 19 Care Center a akoiyu ahitan, ni 5 jouteng swab test kibol kit ding ahi.

Tuesday nikho a Ukhrul District Deputy Commissioner Joseph Pauline Kamson in Dungrei pumpi ‘containment zone’ a phondohna anei ahitan, veng 10 um ahi. Ahivanga, thulhut dungjuiya Dungrei a um KVS Oil Pump hi containment zone in ahop tha lou ahi.

Koi tobang dan palkeh a aumleh Indian Penal Code Section 188 chule Disaster Management Act, 2005 Section 51 noiya gotna kipe ding ahi, tin thuson aseibe in ahi.

 

MLA 4 in ‘disqualify’ abol nau High Court a chouna neiyu; July 17 teng athu kisei ding

Imphal, July 8  : Justice Lanungsungkum Jamir leh Justice A Bimol panna High Court bench in writ petition thum a respondent hon ni 10 sunga counter-affidavit apeh diuvin thuhilna aneiyin chule athu hi July 17 nikho a sei dinga akoi tauvin ahi.

Manipur Legislative Assembly a MLA 4 in ‘disqualification’ akibol nau chouna a Manipur High Court a writ petition apehlut ahi. Justice Lanunsungkum Jamir leh Justice A Bimol panna High Court bench in July nisim 10 teng athu sei dinga phat atep a, chule ni 10 sunga counter-affidavit file abol dinga aseipeh ahi.

Speaker in disqualify abol nau thutanna chouna a writ petition hi Kshetrimayum Biren, Yengkhom Surchandra, Tongbram Robindro, Sanasam Bira in asem ahi. Tongbram Robindro leh Sanasam Bira in disqualification kibolna thutanna chouna a petition achom akipe in, writ petition (C ) a registered kibol ahi, tia writ petition lahdoh dinga ngehna anei ahi.

Chule Assembly speaker masanga koiyin ‘disqualification application’ apeh ham ahet louna thu jong asei lhon in, court in writ petition lahdoh dinga phalna apeh ahi. High Court in Congress MLA petition thu jong apohdoh ahi. MLA K Ranjit, MLA Surajkumar Okram chule MLA K Meghachandra in MLA O Lukhoi, MLA Paonam Brojen chule Ngamthang Haokip disqualify bol nadinga case asem ahi.

 

VDF hon duty dungjui a honorarium kipeh ding ngehna nei

Imphal,  July 8(UNA): Covid-19 sung’a frontline a nasatah’a panla VDF personnel ho a duty dungjui uva honorarium hoitah’a peh ahi nading in All Manipur VDF Welfare Association in Govt. heng’a ngehna ananei in ahi. Chuleh ngehna kinei ho agannathei pen’a Govt. in asuhbulhit lou leh ahung lhung July nisim 16 nikho akon kiphinna kipan ding ahi tinjong gihna anei in ahi.

Hiche chung thu’a All Manipur VDF Welfare Association General Secretary Sh Shanjit in aseina’a gamsung mipi in tuchung thilsoh nachung’a VDF personnel hon ichan’a pan alah dan’u ahet utoh lhon’a amahon jong kiphal theng tah in gamsung mipi ding gelkhoh najal in sun leh jaan um louvin duty abol uvin ahi. Chuleh VDF personnel ho keu hilouv Manipur Police personnel ho jeng injong Covid-19 doudal in in pan nasatah in ala uvin ahi. Ahin hitobang’a VDF leh Police personnel hon kiphal theng tah’a natoh anei nao ho Govt. in hetpeh na aneilou hi VDF ho ding in athoh ahah in ahi ati.

Hetthei khat chu Jiribam a posting VDF personnel 8 achesa July nisim 6 nikho’a Covid-19 positive ahi anahetdoh naban uva hiche akon kilason VDF  personnel 4 jong positive anahikit uvin ahi. Hiche jeh chun Association in VDF personnel ho Govt. in gelkhoh na anei ding leh Covid-19 doudal’a pan nasatah’a alah phatsung’a atoh dungjui uva honorarium hoitah’a apeh ding in ngehna anei in ahi. Hiche nachung chon’a Covid-19 vei khat akon VDF personnel ho kilah kha tau henlang thina toh taleh Govt. in itobang facility ape dem tin dohna anei in ahi. Chuleh gamsung’a kum 11 val na hintong VDF personnel ho regularization alhahsah ding uvin jong ngehna anei in ahi.

 

Assam a Covid-19 jeh’a mi 6 thi; thina toh agom’a mi 22 lhingta

Guwahati, July 8: Assam a Covid-19 jeh’a numei chapang kum 19 khat panna’a tuni (July 8) seh seh in mi 6 in thina anato toh lhon in record jong anahi tan ahi. Tuni Covid-19 jeh’a thina toh mi 6 pum’a agom in Assam a mi 22 in thina atoh tan ahi. Hetthei khat chu hiche numei chapang kum 19 nuhi Monika Bhumji akiti in chuleh amahi Jorhat Medical College and Hospital mun’a ICU a kijen ahi. Chuleh tuni chan’a Assam sung’a Covid-19 jeh’a thina toh lah’a ding’a achapang pen jong ahi.

Hiche toh lhon’a janni (July 7) jong chun Majbat, Udalguri akon Jitendra Prasad (30) chu Tezpur Medical College mun’a Covid-19 jeh in thina anatoh in ahi. Chuleh tuni (July 8) jingkah khovah masang jep vel ajong chun mi 4 in thina anatoh kit in ahi. Amaho chu Hidayatpur, Guwahati akon Safikul Rahman (60 years); Patacharkuchi, Barpeta akon Romoni Mazumdar (60); Kahilipara Dispur akon Utpal Kumar Chaliha (75) chuleh Lalganesh Guwahati akon Hari Prasad Mandal (68) ahi akiti. Amaho cheng hi GMCH Covid ICU a admitted kibol uva jingkah nidan 2:00 leh 5:00 a adammo nao akon damdoh jou talouva thina chan anato’u ahi.

 

Substandard Mask supply boljeh a kiman Senior Medical officer khat July 13 chan jail a um ding’a court in thu tan khum

Imphal, July 8: Directorate of health services a Senior medical Officer, Dr. M Dinesh in substandard mask supply bolna a pan alah jeh in Vigilance and Anti-Corruption police hon Tuesday ni a amatdoh utoh lhon in Court masang a adinsah uvin July 13 chan police custody a umding in thutan khumna anei in ahi. Dr. Dinesh hin N-95 mask a original sang a quality niemjep (substandard) supply order jaolou hel a supply aboljeh a kiman ahi. A Counsel pa mangsa in Dinesh in court heng a bial a lhadoh ahithei nading in jong thumna lekha apelut in ahi. Additional special Public Prosecutor in court masang a apehlutna achun District hospital, Ccpur a ding a kikoi N-95 mask chu supply order jaolou in ana pedoh in apeh jong chu substandard quality ahi ati. Dr. Dinesh hi Government of Manipur noiya Directorate of health services a Senior Medical officer a pang ahi in chule State Nodal Officer, State Health Mission ajong panmun atuh ahi.

Dinesh Counsel pan aseina achun achung a ngohna kisem bang bang chu hiding ahi in ama hi jamlou hel ding ahi in chijeh chun Bail a lhadoh ding a pha asahthu jong asei in ahi. Counsel pan a pehlut ho jouse chu court in ave in chule Dr. Dinesh chu thudohna leh kholchilna neibe angai jeh in police custody a umding in court thu tankhum na anei in chule Dr. Pa’n adammo nathu aseikhah jeh chun hiche case a IO pa heng ah Court in Dr. pa chu a ngaichat bang a lou pe ding in jong aseipeh in ahi.

Hetthei khat chu March-April 2020 kikah chun Medical Directorate in N-95 mask chu firm chom chom akon covid-19 akon kivenna ding in ala uvin hiche chu Manipur a District 16 a CMO leh District hospital authority ho heng a hopding a alah u ahi. Medical Directorate in tuni chan in firm Nga, M/S Blue Sky Services, Guwahati-29,150; M/S Nim Pharmaceutic, Guwahati-2,000; M/S Global Infrastructure and Construction, Dimapur, Kohima (C/o M/S Lords, Delhi); M/S Fama Marketing, Guwahati-3,050; M/S Yumnam Agency, Imphal -5,000 ho akon N-95 mask 52,100 aladoh tauvin hiche hochu firm aho a issued boltheina ding supply order  jong kibol lou ahi.

Mask 52,100 lah achun N-95 mask 3,050 chu M/S Fama Marketing, Guwahati akon kila ahi in hiche lah achun mask 200 chu District hospital Ccpur ading a Dr. M. Dinesh order bolna noiya issued kibol ahi in hiche order chu April 3 leh 6 nikho a kibol ahi. Hiche mask jouse chu a quality tah tah chan lhung joulou in akimu in chule mantheilou asoh in ahi.

Zomi Re Unification in society phatchomna dinga natoh chelha ho suhboi lou dinga kouna nei

CCpur, July 8(ET): Zomi Re Unification organisation in Wednesday nikhon Dorcas veng a press meet abol uvin, society phatchomna dinga tang louva na atoh u mijouse ahetsah nom u chule group chom chom panlah apachatna thu asei uvin ahi.

Ministry of Information and Public Relations Jt. Secretary, TK Mang in, society phatchomna dinga mipi panlah ding ngai ahi, tin aseiyin chule society deilouva thil kibol douna a pan lah jom dinga aseiyin ahi. Secretary, Planning & Social Development, Khupthang in ahoulimna a, Ministry of Road Transport and Highways (MoRTH) noiya sorkar in Churachandpur police station Zero Point a kon Mizoram gamgi (via Tiddim road leh Guite Road) a double lane asah pan ahi in, lamlen kisem hi National highway standard banga metre 14 (inwide) leh asa dan 23 inches ahina dinga construction natong ho kithopi dinga aseiyin ahi.

Package kipe a tamtah lah a company 6 in natoh apat a chule anatoh nauva koiman asuhboi lou dinga temna aneiyu ahi, ati. Company chom chom honjong quality hoilou tah a na atoh lou diuvin jong aseibe uvin ahi.