Manipur by-election a Congress MLA haina neiho adia BJP ticket photchet hinailou;...

Manipur by-election a Congress MLA haina neiho adia BJP ticket photchet hinailou; Chief Minister N. Biren, leh State BJP President S Tikendra in Delhi jon

416
0
SHARE

Manipur by-election a Congress MLA haina neiho adia BJP ticket photchet hinailou; Chief Minister N. Biren, leh State BJP President S Tikendra in Delhi jon

Imphal, Sept 21(ET): Thulamleng kija toh abah leh Congress MLA phabep haina neiya BJP bel ho adia ahunglhung ding by-election adia BJP ticket achan diu, achan loudiu seithei ahi naipon ahi, hitoh kilhon in Chief Minister N. Biren Singh, State BJP President S Tikendra leh adang mi 3 in New Delhi ana jon un chunga kisei Ex-MLA ho ticket peh leh pehlou ding chungchanga kihouna aneidiu ahi.

Hinla thulhut khat kimu in aseina ah Delhi jon a ache nau jeh hi NPP toh akikah thu hitei ding in jong ginmo ahi. Chief Minister leh state BJP President in Ministerial reshuffle thu a NPP panglouva BJP sorkar sem ding thu toh kisai seikhomna jong hidinga ginmo ahi.

Chief Minister leh State President kholjin na hin BJP party a dinga seilou a khohtah um hiding injong ginmo ahi. Tuni nikho nidan 11:5 chun Special charter flight hired kibol a kholjin ding in Chief Minister team ana kipandoh un ahi. Amani hi PRO to CM Sanajaoba leh PSO Sashikumar in ana lhonpi in ahi. Chuleh Congress Party a expelled ana kibol MLA RK Imo injong ana jui in hinla ajeh vang akihepon ahi.

Thulhut chun aseina ah, tule tua coalition partner a pang NPP party in Chief Minister leh BJP state President pa alung phatmosah dan injong thulhut akimun ahi. Thulhut dangkhat a kimu dungjui a state BJP lamkai hon central lamkai ho henga NPP minister 2 tobang BJP MLA ho joh peh dinga phutna ahin nei maitheiyu ahi ati.

Xxxxxx

Manipur a Positive case 9000 valta; thina toh 2 um kit

Imphal, Sept 21(ET): Manipur a natna dang dang toh COVID-19 kitho in mi 2 in thina ana toh kit in ahi. Hitoh kilhon in nidan 24 sung chun thina toh agomin 59 alhingtan ahi. Thina toh teni ahileh khat hi Imphal West akon a nupi kum 75 ahi in, RIMS ah thina ana toh in chuleh Imphal West mama akon kum 53 nupi khat JNIMS ah thina ana toh kit in ahi yin official thulhut in atahlangin ahi.

Chuleh nidan 24 sung chun Milham lah a kon in positive cases thah 87 akimube in, Central Armed Police Force (CAPF) akon in mi 29 ana kimube in ahi. Cases 87 kimudoh lah a 83 hi travel history neilou ahiuvin ahi. 87 kimudoh lah a 39 hi Imphal East akon ahi in, 22 hi Thoubal,  7 hi Kangpokpi, 5 hi Tamenglong, 3 hi Bishnupur, Imphal West leh Churachandpur akon a mi 2 cheh chuleh Senapati leh Noney akon a mi 1 cheh ahi. Amaho chengse hi Covid Care facilities a koi ahi ngal un ahi.

Alangkhat ah mi 71 CCCs chom chom akon in discharged ana kibol kit in ahi. Discharged kibol na ho ahi leh CAPF a kon 53, JNIMS a 8, CCC Lamding a 5, JNV Chandel a 3, chuleh CCC Lamboikhongnangkhong leh CCC Jiribam a kon a mi 1 cheh ahi. RT PCR test kibol jouva negative ahiutoh kilhon a discharged ahiuvin ahi.

Tuni chan a positive cases kimudoh agomin 9010 (Milham-7052 leh Central Security Personnel-1958) aphatan chuleh adamdoh hi agomin 6838 (Milham-5174 leh Central Security Personnel-1664) alhingtan ahi. Active cases hi agomin 2113 (Milham-1822 leh Central Security Personnel-291) aphatan ahi. Tule tua recovery rate hi 75.89% tinjong thusodoh chun atahlang in ahi.

Xxxxxxxx

Covid-19 jeh a lha phabep akikha jouva mun phabep a Themjilna mun ho kihong panta; Simlai hetnom dohnom neihon Jilkung ho kimutopi

New Delhi, Sept 21: India sung mun phabep a ama mimal ngapchatna dungjui in jilkung ho a kon a doh le sah neinom ho dinga themjilna mun akihon toh kilhon in achesa March lha apat COVID-19 natna doudal nading leh kivendoh na thei dia akikha nung in themjilna mun ana jon pan tauvin ahi.

Centre sorkar in Unlock 4 guilines phabep lhaluiya ahin sodoh toh kilhon in achesa March lha a kon a gahtah a ana um chu themkhat lhakang in ahung um tan ahi. Hitoh kilhon chun temjilna mun ho a class 9 apat class 12 gei containment zone in ahuop khahlou sese ama mimal ngapchatna dungjui a September 21 apat jilkung ho toh kimuto thei ding in phalna ana phongdoh un ahi.

Union health ministry in achesa September 8 nikho chun SOP asodoh utoh kilhon a campus sunga teaching leh non-teaching staff 50% bou umthei ding, chuleh simlai ho dinga attendance jong alou theilou hisah lou ding tiho ahi in ahi.

North-eastern states-Assam, Mizoram, Nagaland, leh Meghalaya in hiche thupeh ana nit toh kilhon in social distancing chuleh juidinga kipe dan ho jui pum in themjilna mun ana hongdoh un ahi. Thulhut kimu in aseina ah, simlai anu leh apate akon a jihtho a phalna hin kichoi hobou themjilna mun ana kilutsah in ahi ati.

Hinla state chom chom Tripura, Arunachal Pradesh, leh Manipur vang tu tadi a kikhah nalai ding ahi.

Assam’s secondary education director, Phanindra Jidung, in aseina ah dinmun ho hi ni 15 jou teng leh velvetna kinei ding chuleh SOP ho juicheh ding ahi. Private school honjong amaho kigeldan dungjuiya hon le hon lou kingam ding ahi ati.

Assam sunga dinga SOP kisem dungjuiya Monday, Wednesday leh Friday hoa simlai leh Jilkung class 9 apat 12 gei ho kimuto na a hon hiding ahi. Chuleh nikho dang ho hi class 10 leh 11 ho dinga atumbeh a kikoipeh ding ahi.

Nagaland’s chief secretary, Temjen Toy in aseina ah, class 9 apat 12 gei containment zone pam a um themjilna mun ho a Jilkung hotoh ana kingapchat dungjuiya akimuto diu phalpeh ahiuve. Chuleh phalna jihtho a ainsung mite akon a kichoi hobou phalna kipe a themjilna mun kilutsah ahi ati.

Meghalaya government in simlai ho alungboi nau a Jilkung ho’u toh kimuto a doh le sah aneithei nadiuva themjilna mun achediu phalpeh ahivin, hinla angaibanga kihilna vang ahung lhung ding September 30 geiya phal ahipoi. Regular class leh kimanchahna dang dang ho themjilna mun jouse a September 30 geiya khah hinalai ding ahi tin Meghalaya’s principal secretary (education), DP Wahlang in order ana sodoh in ahi.

India sahlam a state chom chom Punjab, Haryana, Himachal Pradesh, leh Union Territories of Chandigarh chuleh Jammu & Kashmir in jong themjilna mun ho Government in juidinga asem bang bang in ana hongdoh un ahi. Jammu’s Government Ranbir Higher Secondary School a principal

Anjali Gupta, the principal in aseina a dan kisem dungjuiya themjilna mun ho hondoh dinga thupeh kinei ahi in, simlai ho themjilna mun ho a Jilkung hotoh kimuto nom leh doh le sah neinom ho dinga bou phalna kipe ahi ati. Chule 50% staff bou koidingin jong thupeh eibol un chuleh simlai koi tobang jilkung hotoh kimuto nom hon a insungmite phalna jihtho a ahin kichoi cheh diuvin jong simlai ho hetsahna akineiye ati.

Andhra Pradesh officials ho akon thulhut kimu dungjui in simlai hon dohnom leh hetnom anei ho Jilkung ho ahung kidoh thei diu hinla school hours sunga campus a umthei loudiuva thupeh kinei ahi. Andra a high school khat a headmistress Ramavat Kamala in aseina ah, state education commissioner thupeh dungjuiya themjilna mun hondoh ahidan aphongdoh in ahi. Simlai class 9 apat 12 gei themjilna mun a hung uva adohnom ahetnom ho jouse akidoh thei dingu ahi, simlai hon mask ahin kito uva kisuhtheng jing ding dan jong hilna akinei in, simlai ho feet 6 a kikah in aki tousah in, amacheh in donding tui ahin kipoh diu, khut aki sop  jing diu vin jong hilchana akinei in ahi. Ahung masang un school leh campus ho suhthengna akinei ji in, a insung mite a kon a jihtho a phalna hin kichoilou hovang aki nungsol ji in ahi tin Kamala chun aseiyin ahi.

School ahung kikha a online class akhel a hung kibol hin simlai lah ah kibungkhen na leh hahsatna ahin lhut in ahi. 2017-18 all-India National Statistical Office survey dungjuiyin India sunga three-fourths tobang in internet amang joupon ahi. Chuleh 89% tobang hi computer, tablet tiho neijou lou leh mangcha lou ahikit in ahi.

Xxxxxxx

MU a kijou bolna thu’a CBI in  MLA Lourembam Rameshwor Meitei le mi phabep chung’a charge sheet sem

Imphal, Sept 21(ET): CBI, ACB, Imphal Branch in tuni in case no.RC.1A2018- IMP toh kisai in  charge sheet MLA Lourembam Rameshwor Meitei chung’a file ana bol uvin ahi.

Rameshwor hi M/s Lourembam Enterprises neipa ahin, ama le a manager Kshetrimayum Joykumar Singh  chuleh chulai a finance officer ana hi K Jibankumar Singh, Kshetrimayum Basanta Singh, Assistant Finance Officer,  N Tejendro Singh, Assistant, chulai a store in-charge, Manipur University ho chu section 120B/420/468/471/477A IPC  le Section 13 (2) read with 13 (1) (d) of PC Act, 1988 noi a charge sheet chu file ana kibol ahi. CBI in a charge sheet uva chun Kshetrimayum Basanta Singh, K Jibankumar Singh le N Tejendro Singh in contractor Lourembam Rameshwor Meitei, Proprietor M/s Lourembam Enterprises, Canchipur Manipur le a manager Ksh Rustam Kumar Singh toh kitho a Manipur University jou lhep na achesa 2012-2016 sung a ana nei dan u tahlang na ananei uvin ahi.

Min phah na kinei ho hin Manipur University sung a natoh na le thil dang dang ho a sih nei langnei na nei pum a contractor Lourembam Rameshwor Meitei natoh na jouse ana peh dan u hetsah na ahung kinei in ahi.  Thil chohna  receipt ho chung chang a jong jou le nal a kisem thu ngen pehlut na ana kinei dan hetdoh in ana um in ahi. MU Recreation hall a thil le lo lhin lou na chung a sum ki ne chai a  thil avat ho mei kah chung a aka lha a ana kingoh na chung a jong achung uva thu tan ding in hetsah na ana kinei in ahi. Hiche recreation hall a mei kah a thil le lo mang dangka 74,01,978 ho chung a thil cho lou a athil choh lou ho u jouse ajao sah u jong tahlang na ana kinei in ahi.

XXXXXXXXX

Arambam Ranjan Meetei tha na a kimang revolver police mandoh ta

Ccpur, Sep 21 (ET): Achesa September 4, 2020 nikho a SBI Churachandpur main branch kom a WSG Arambam Ranan Meetei (37) kitha na chung thu toh  kisai in police hon khol chilna anei jing utoh lhon in ama thana a kimang 0.32 calibre revolver jong police hon amandoh tauvin ahi. Ranjan kitha chung ah police in FIR No 67(09)2020 CCP PS u/s 392/302/34 IPC & 25 (1-C) Arms Act r/w 120 B IPC chu athi nikho mama chun ana jihlut uvin ama that a panla hiding a ginmo Writers Safeguard Group (WSG) a natong mithum jong police hon amandoh tauvin akimandoh ho chu V Thangkhanmaun (40 years) s/o (L) V Tunkhokam r/o V Munhoi village, CCP, K Somen Singh (36 years) s/o K Achouba Singh r/o Khuga Tampak, Zouveng, Churachandpur, Khongkham Brojen Singh (40 years) s/o (L) K Sahen Singh r/o Bamon Kampu, Imphal East ahiuve.

Police hon kholchilna anei nauva chun ginmo a amat hou jong aki phongdoh tauvin Khongkham Brojen Singh in aseina achun Ranjan thading hi hoitah a ana gontup sau ahidan asei in tohgon chu ama gondan in asei in K Somen Singh leh V Thangkhanmuan teni kitho a atha hon ahidan jong asei in ahi. Aseibena achun licensed gun 0.32 calibre revolver leh chang 6 chu ATM booth aki mangtalou khat sung ahi K Somen Singh in aselguh ahidan asei in, 04.09.2020 nichun Khongkham Brojen Singh aga ladoh in achang 4 aum e tin asei in ahi. Ranjan atha jou uchun thal chu Khongkham Brojen Singh in a inmun lang a selguh ding in aposuh in ama hi police hon 08.09.2020 nichun amandoh uvin chule thal jong chu achenna Imphal East akon in jong amandoh tauvin ahi. Kholchilna aban chelhah be ahidan thulhut chun aseiyin ahi.

Xxxxxxxxxxxxxxxxxxxx

MP Ranjan in Centre henga Manipur Language hi Assam a Associate Official Language khat hisah dinga ngehna nei

Imphal,  Sept. 21(UNA): Lok-Sabha MP Dr. Rajkumar Ranjan Singh chun Centre hengah Manipur Language hi Assam sunga Associate Official Language khat hisah ding in ngehna anei in ahi.

MP Ranjan Singh hiche thu hi Sunday ni a 17th Lok-Sabha 4th Session toukhomna a Zero Hour sunga ana pohlut ahi.

Hiche thu apohlut toh kilhon in MP Dr RK Ranjan in union cabinet in National Recruitment Agency (NRA) noiya Common Eligibility Test bol nadia 12 India Languae ho a government noiya tohmun non-gazetted jouse jihthei nadinga National Recruitment Agency (NRA) approval anabol na chungah akipana thu aphong doh in ahi. Hiche hi kumkit apat umding ahitai.

MP pan akipana thu aphondoh toh kilhon in Speaker pa hengah National Recruitment Agency in in 12 languages ho a Exam abol sah sang uvin, Eight Scheduled hopsunga languages umjouse a Exam abol diuvin ngehna aneiyin ahi. Hiche hin adeh a thinglhang gam a um ham le pao a boina aneijeh a ahiding bangtah a tohmun mulou ho dinga kinepna kot lentah kihonpeh hung hiding ahi ati. Chuleh Railways injong languages chom chom 15 mangcha in exam ana bol tauvin ahi tin Ranjan in aseiyin ahi.

Aseibe na ah Assam State Assembly in Assam Public Commission Exam ding toh kisaiya Bill passed ana bol nauva chun pao thum bou gah hetthei ding a Assamese, Bodo leh Bengali bouva exam kibol ding in passed ana kibol in ahi. Hinla, Manipuri hi 8th Schedule of Indian Constitution in ahop ahi in hinla exam kibolna a pao kimang lah in ajaopon ahi. Assam sunga district 13 tobang ah 15 Century laiya pat in Manipuri ana cheng in chuleh 2 lakh val population aum in, hichena banah Manipuri-Medium School 104 tobang Assam government in recognised jong abol in ahi ati.

Centre in Manipur Language hi Assam state sunga Article 347, Special provision a kisei ham le pao kibang tho ho tam leh lhom thua apao mankhat official recognised hisah ding ti ahi toh kilhon a Assam state a Associate Official Language khat hisah ahi tei nading in ngehna ana bol in ahi.

Gah hetthei chu Assam a um Manipuri hon Manipuri Youth Front Assam makaina a Manipiri pao hi Assam state sunga Associate Official Language hisah nading in ngehna jong ana neijing un ahi.

Xxxxxx

Grameen Kaushalya Yojana skilling project toh kisai a workshop kibol

Imphal, Sept 21(ET): Manipur State Rural Livelihoods Mission ,Department of Rural Development and  Panchayati  Raj,  Government of  Manipur makai na noi in tuni in  Grameen Kaushalya Yojana, skilling projects for rural unemployed youths of Manipur noi in oneday workshop ana kibol in ahi.

Hiche workshop chu PN Regional Institute of Skill Development, Lamlong, Imphal East mun a ana kibol ahi. Hiche workshop achun state sung akon Project Implementing Agency 18 lam in panlah na ana nei uvin ahi. Hiche kingon chu RobitaYumnam, IAS,State Mission Director, Manipur State Rural   Livelihoods Mission   (MSRLM) lamkai na a ana kibol ahi.

Kingon a Robita Yumnam, SMD in ahou limna a PN Regional Institute of Skill Development, Director,  Gouchunglen Kom chung a kipa thu seina ana nei in ahi. Hetthei khat chu hiche institution hi mitoh banglou ho ading a India sung a skill provider lenpeh lah a ani na a pang ahi. Director pa in ahou limna a hiche institution hi gamsung a mitoh banglou ho natoh pe institute lenloi ahung hiding akinep na phondoh na jong ana nei in ahi. Kh Bobby Chief Operating officer in ahoulimna a Skill training kibol na a covid akon kiven na ding a SOP thah asem ding dan jong tahlang na ana nei in ahi.

xxxxxxxxxxxxxxxxxxxx

Kihouna achaina lam ahi toh lhon a NSCN-K sunga  Khango le Isak in kihou chamna nei lhon

Kohima, Sept 21: Daan toh kikal a cha loh jeh a kal masa a NSCN-K (Khango) chairman Khango Konyak in general secretary Isak Sumi chu kiloikhomna akon ana kah lhah jou in tuni in kihou lhah na ana kinei toh lhon in kihou chamna lamkai teni in anei lhon tan ahi.

Working Committee (WC) Naga National Political Groups (NNPGs) akon thuso kimu chun asei na a Indian govt toh kihou na in achaina lam ahin mano toh lhon a hitabang tohgon chu hung kinei ahi tin hetsah na ahin nei uvin ahi. Hitabang a kiloikhomna sung a kitomo nahin kihou na ahin suh bang khai thei ahi toh lhon a kihou lhah na nei ding a tohgon ana kinei a lamkai teni kikah a boina suh lhap na ana kinei ahi akiti.

Isak Sumi lah lut na le achung a thu tanna thu sei chamna chu Khango Konyak, chairman NSCN le president GPRN (K) jaona a NTC peace mediation team, NGBF le WC, NNPG member hotoh ana kinei ahi akiti. Sumi in NNPG a apanmun jong alo jom ding in hetsah na ana kinei in ahi. NNPG akon thuso kimu dugjui in NSCN-K in NNPG daan jui a natoh na anei jing ding kitepna ahin nei uvin ahi akiti.

xxxxxxxxxxxxxxxxxxxxxxxxx

COVID-19 relief material po truck khat in toset toh

Ccpur,  Sept. 21(ET): Achesa September nisim 19 nikho nilhah nidan 8 vel in COvid-19 thil le lo po truck khat in Thanlon lam ajot na in Chiangpi le S Khawzin kikah a toset na ana toh in ahi akiti. Hiche toset na toh truck chu registration number MN 05C1030 ahin kol lah a feet 500 lamthuh a kitang lha ahi akiti.

Truck chun anchang bag 280 lam le bemu ago bag 2 ana poh ahi akiti. Truck driver Lallianjohn, 28, apamin Chinsuankhai, Hiangzou kho akon chu akitoh khah na akon in damdoh jou talou in thina ana toh in chuleh handyman  Manglunlal, 30, apa min Lianthang, South Point chu nasatah in akitong kha in ahi akiti. Driver pa thilong chu Churachandpur district hospital a post mortem kichai in vui ding in ana kipo doh tan ahi.

Chairman, Manipur Tribal Development Corporation (MTDC) le MLA, Thanlon assembly constituency, Vungzagin Valte in district DC le SP toh hospital mun a thilong le akitong kha pa vilna ana nei uvin, driver pa le truck neite chu dangka 10,000 cheh anape in chuleh akitongkha handyman pa chu dangka 5000 ana pe in ahi.

xxxxxxxxxxxxxxxx

CCpur District a Covid case thah 4 kimudoh; agom’a case 858 lhingta

B.Lalboi Gangte

CCpur, Sept. 21 (ET): Churachandpur District khopi sung’a Covid-19 positive case anitin’a akibe jing toh lhon’a tunin jong +ve case thah 4 mudoh in ana um in ahi. CCpur District sung’a case kimudoh tule tun agom’a case 858 alhing tan ahi. Case thah kimudoh 4 lah’a khat hi returnees ahi in adangse vang hi kholjindoh na neilou ho ahi. Chuleh kholjindoh na neilou positive hochu Tuibong akon numei 1, Bungmual akon pasal 1 leh Hengken kho akon pasal 1 ahi.

Hetthei khat chu achesa Sept. nisim 20 nikhon kholjindoh na neilou Molnom kho akon pasal 1 +ve ana kimudoh toh lhon’a tuni chan’a kholjindoh na neilou +ve hi agom’a 124 alhing tan ahi. Chuleh Covid-19 vei ho hetdoh leh matdoh nading’a kimang Rapid Antigen Testing Kits (RAT) akon test 4,727 kibol nalah’a 342 positive ahin adangse vang hi RT-PCR akon ahi.

Alangkhat’a CCpur District sung’a Covid-19 Care Centre ding mun 7 akimang in hiche achun agom’a lupna 398 aum in ahi. Hiche lupna 398 lah tuhin lupna 155 akimang cha in ahi. NIELIT a mi 41 aum in, Lanva TD Block a mi 42, STC BSF a mi 9,  27-Sector Assam Rifles Khuga Dam a 58 leh 2nd Assam Rifles Singngat a 5 aum in ahi. Chuleh Covid-19 vei 858 um nalah’a adamdoh 686 aum tan avei nalai 169 aum nalai in ahi. Self Isolation/ Home Quarantine a mi 6,773 in nikho 14 sung Home Quarantine ajou theng tan tuhin mi 807 in Home quarantine abol lai ahi. Contact tracing akon mi 150 aum in ahi.

Xxxxxxxxx

Naga mipite Lolhin nadin kithokhom angaiye: V S Atem

Dimapur, SEP 21: NSCN-IM lamkai V S Atem in tule tua NDA government in Indo-Naga peace talk achaina geiya seilhah nading tha anei in hinla achesa kum 5 sung Naga Framework Agreement (FA) soi kibol sung in Naga mipite lunglhadai louvin ana kipang jing in, India government in ipi lampanga thuchaina ahin semdiu ham seithei ahipoi tin aphongdoh in ahi.

NSCN-IM a Army Chief lui V S Atem September 19 nikho chun a 18th channa Morung Dialogue ‘To Freedom: A human story’ kiti thupi mangcha a Naga Peoples Movement for Human Rights, Delhi (NPMHR-Delhi) hon Webinar a kihoulimna kingon anaman nauvah anapang in ahi. Hiche Morung Dialogue hi NPMHR, Delhi in lunggel seikhomna, hetna kibelapsahna, chamna leh social justice chuleh thuchom chom a kihoulimna a ana gonjiu ahi.

V S Atem hi tule tua Member of the Collective Leadership, NSCN/GPRN ahi in ahi. Atem in Naga movement a apan lahdan leh tule tua sorkar toh kihouchamna thu toh kisaiya houlimna anei ahidan jong NPMHR- Delhi thuphondoh chun aseiyin ahi.

Atem in Naga mipite dinga pan anala ana muolliem sa ho leh tugeiya dam nalaiho jana pehna jong aneiyin, chuleh Naga numei bol gentheiya ana umho leh gentheina tamtah melma ho khut a anathoh nauho jong aminphah in, hinla angol puma tantih neilouva taona kineijing ahitoh  kilhon a  lungtup molso nadinga Pathen injong lampi ahin gon ding akinepna aphongdoh in ahi.

Tulai dinmun toh kisaiya Atem in ahoulimna ah, hiche chamna thu hi kum 4 kum 5 val alah louding ahidan aseiyin, hinla tuni chan a kihoulhahna achaina dihtah aum theilou phamo asahdan jong atahlange. Tuni chan a seilhah a aumthei lou na hi NDA government in lungthim thuh tah a R. S. Pandey Interlocutor hina a seichai ding lunggel anei ana losam in, R. S Pandey jong resigned ana kibol in, Chule Vajpayee lamkaina NDA government jong minirity government ana lamkai jeh in ana dingdet jou kit pon hijeh chun kihouna ahina bangtah in ana chal lha theipoi tinjong V S Atem in aseiyin ahi.

Thudoh khat adonbut na ah, Naga ho phatchomna natoh na ah koima alen chom leh aneo chom aum poi, footbal kipeh khom banga goal khum holeh goal ngah ho thakhat ahiu tobang ahi. Naga mipiho jouse hi team khat a dinga pangkhom cheh ihiuve. Tule tua bolthei jouse bolding ahi. Naga mipite aki thutoh lou leh imacha suhlhap hilou ding ahi. Naga te ading in tup le doi chom chom aumpoi, tup le doi khatbou ahi ati.

V S Atem in Naga political group ho kikah a kithutoh na um ding hahsatah ana hijeng jong leh ahung kithokhom uvaahung pankhom diu akinepna jong aphong doh in ahi. Chuleh civil society organization hojong kithutoh tah a ahung dinkhom uva ahung kihet themto diu adeisah dan aphongdoh in, Namkhat semdoh nahi mikhat mini akon ahipon kithokhom a panlahkhom akon a kisemdoh thei bou ahi tinjong aphongdoh in ahi.

xxxxxxxxxxx

Moreh ward no 5 Muslim Basti a mi 6 Covid positive hikit

Tengnoupal, Sept 21(ET): Tengnoupal District sung kho jat ham akon Covid natna nei anaum jing vang a Moreh khopi sung a ana um khalou lai ahin hinlah tuni a sample tetst result pot toh lhon  phat phabep masang a nupi khat le achateni positive hijou ban a  tuni a Muslim basti sung a positive anahi te insung mama akon mi 3 positive ana hikit utoh lhon in khopi sung a positive case 6 ana lhing tan ahi.

Achesa nisim 19 nikho a kum 45 lam a upa nupi khat in PHC  a kivetsah na ana nei na Covid positive ahi hetdoh anahi toh lhon a insung miho jong test ana kibol ahi. Achesa nisim 20 nikho a Sub District hospital a ana kijan mi 11 lah a mi 7 jong Covid positive ahiuvin ahi akiti. Muslim basti akon mi 3 ho chu tuni in a inn uva kon in ana kipodoh in Sub District hospital a jan ding in ana kipolut tan ahi.

xxxxxxxxxxxxxxxxxxx

Serum Institute in a covid vaccine asem final trial tu kal sung’a pan tadiu

Mumbai, Sept 21: Volunteer 300 lam in Pune le Mumbai a tu kal sung le Oxford-Astrazeneca’s Covishield vaccine patep na achaina pa abol pan ding u ahitan ahi tin Drugs Controller General of India (DCGI) in Serum Institute of India (SII), Pune patep na nei ding a phalna ana peh utoh lhon in hetsah na ahung kinei in ahi.

Volunteer 200 lam in hiche patep na chu Pune Sasson General Hospital a abol ding u chuleh volunteer 260 lam in KEM le Nair Hospital, Mumbai a patep na anei ding u ahi akiti. KEM ahi mi 350 lam in amin pehlut na ana nei u ahin chuleh BYL Nair Hospital ahi mi 160 lam in min pehlut na ana nei u ahi.DCGI in KEM chu phalna ana peh vang a Nair hospital ana peh loulai u ahi.

Volunteer ho chu dangka lakh 35 insurance cover kibol peh soh kei ding u ahi akiti. Hiche trial che lhah na ding a phalna chu DCGI in SII ang a achesa nisim 15 nikho a ana nei ahitan nisim 19 akon a mi lah lut na ana kinei pan ahi. SII in hiche vaccine hi British-Swedish pharma company AstraZeneca toh kitho a University of Oxford in ahin pohdoh u vaccine asem u ahi.

Xxxxxxxxx

Nikho khat chelha ding “Capacity Building Training on Shaala Siddi 2019-20” chelha

B.Lalboi Gangte

CCpur, Sept. 21 (ET): Zonal Education Office, Pherzawl District leh Sarva Shiksha Abhiyan (SSA) tohgon nanoi in tunin Rengkai Hr. Sec. School Hall mun’a nikho khat chelha ding Capacity Building Training on Shaala Siddi 2019-20 kiti kingon ananei uvin ahi. Kingon chu Andrea Sanching, Asst. Inspector of Schools Thanlon block in alamkai in chuleh Lalhminglien, MES ZEO/DPO in Shaala Siddhi toh kisai’a “School khantou na ding’a Evaluation poimo na” kiti thupi mangcha in houlimna ananei in ahi. Chuleh Resource Person Gospel Laltlanthang in “self Evaluation ding’a guideline chom chom hotoh kisai’a kichuhna ape in chuleh Jonah Gaigonglin Kamei in ‘Domains of Shaala Siddhi” thupi a thuhilna aneiyin ahi.

Hetthei khat chu Shaala Siddhi hi National Programme on School Standards & Evaluation (NPSSE) tin jong akihe in chuleh India gamsung’a School khantou na ding’a School jouse evaluation bolna ding’a manchah poimo tah khat ahi naban’a tu’a kimang hohi National University of Educational Planning and Administration (NUEPA) in develop abol ahi.

 Xxxxxxxxxxx

CCpur CMO in NDD leh IDCF 2020 Sept. 21 akon Oct. 5 sung chan nei ding’a sei

B.Lalboi Gangte

CCpur, Sept. 21 (ET): Dr. Vumchinpau Tonsing, Chief Medical Officer (CMO) Churachandpur in thuso aneina’a Covid-19 din mun jeh’a National Deworming Day (NDD) leh Intensified Diarrhea Control Fortnight (IDCF) 2020 Sept. nisim 21 apat Oct. nisim 5 sung mankhom ding in hetsah na anei in ahi. Hiche dungjui’a NDD leh IDCF 2020 toh kisai’a District Level Orientation/Meeting Sept. nisim 23 nilhah lam nidan 1:30 akon 2:30 kikah sung’a Online Google Meet akon kihoukhomna um ding ahi.

Hiche toh lhon’a hiche phatsung’a ICDS Unit tin’a DPO, CDPO, Supervisor leh CHC/PHC, AF a Medical Officer In-charge, CHO, AF, BPMU leh DPMU jouse ajao cheh ding uvin jong hetsah na anei in ahi. Chuleh Albendazole tablet leh ORS hi CMO Store, Churachandpur a Sept. nisim 23 akipat lah thei ding ahidan jong atahlang in ahi.

 Xxxxxxxxxxxx

Pastor Lunkhongam Haokip in Divine Clinic & Pharmacy hondohna ananei

B.Lalboi Gangte

CCour. Sept. 21(ET): Churachandpur District hopsung’a um Divine Clinic & Pharmacy chu tunin Pastor Lunkhongam Haokip in hondoh naleh Pathen heng’a lhandoh na ananei tan ahi. Kingon achun Kuki Inpi noi’a abahkhai kiloikhomna ho jouse akon lamkai ho pan anala uvin ahi. Divine Clinic & Pharmacy hondoh naleh pathen heng’a thenso na Pastor Lunkhongam Haokip in aneiyin ahi.

Xxxxxxxx

Kho sung leh vengsung mun chom chom’a Covid-19 chung thu’a awareness programme chelha

Imphal,  Sept. 21(UNA): The Peoples’ Task Force for Covid-19 (PTF Covid-19) Indian Red Cross Society (IRCS), Manipur State Branch, Indian Medical Association (IMA) leh Association for Health Care Providers of India (AHCPI) in kho sung leh vengsung mun chom chom in Covid-19 chung thu’a awareness programme ananei uvin ahi. Hiche awareness programme chu Lamali-19 Task Force leh PTFC-19, IRCS, Manipur State Branch, IMA chuleh AHCPI kithokhom nanoi in tuni chun Lamlai Lai Haoraobung mun’a ana chejom pi uvin ahi.

Hiche kingon achun PTFC-19  Co-Convenor N. Bimol, Hod Community Medicine RIMS & former IMA President Dr. Akoijam Brojen leh IRCS Manipur State Branch Chairman Narendra Ningombam ho cheng chu resource person in anapang uvin ahi. Chuleh Covid-19 Task Force Lamlai Chairman Thokchom Nabakumar, Vice-President M. Helendro leh Lamlai Apunba Meira Paibi Lup Takhelmayum President Purnimasi ho cheng chu ngailut chom in kouna anachang uvin ahi.

Hiche toh lhon’a resourse person HoD Community Medicine RIMS cum fromer IMA President Dr. Brojen Akoijam in aseina’a Covid-19 natna hit hi AC room a mipi kitit nalah leh mipi um na’a kilahson na abailam lheh in ahi. Ahin hiche hi natna hi kichat ding ahipon eima leh eima ikiventhem leh aboi ding ima aum pon ahi ati. Chairman IRCS I/E Branch Narendra Ningomba in aseina’a hiche Covid-19 natna jeh in insung genthei hon neh leh chah hahsat na jeh’a boina ato nachung chon’a mask choh nading sum leh jong anei jou pouvin ahi. Mask choh khel nading sum le pai aneilou jeh uva amasa sa amang jing jeh uva jong hiche natna hi mitam tah hung veidoh kha hiding ham tin aseiyin ahi. Chuleh Home Department in japi lah’a hung pot koi hijong leh mask bol lou ho jouse aleu (fine) sah uvin ahin akibol lou ho mask ahoppeh deh pouvin ahi. Hiche jeh hin Covid-19 task force hon neh leh chah khel’a mask, hand sanitizer apeh ding hi poimo ahi tinjong aseibei.

…………………………..

Charangpat GP Pradhan kimat deilou na’a Charangpat Meira Paibi Apunba Lup member hon toumun kiphinna ananei

Thoubal, Sept. 21(UNA): Charangpat Meira Paibi Apunba Lup member hon tunin Charangpat Keithel macha mun’a Charangpat GP Pradhan Sorokhaibam Imo hi ima unconditional a ahin lhadoh ding’u ngehna in toumun kiphinna ananei uvin ahi. Hetthei khat Pradhan Sorokhaibam Imo hi achesa Sept. nisim 18 nikho’a Charangpat Mayai Leikai sung’a cheng vengsung mipi hotoh kiboi na ananei nachung’a licence thal mangcha’a thal analha nachung’a Thoubal Police team hon anamat ahi. Chuleh Thoubal Police hon hiche nikho ma ma’a thilsoh chung’a case ajih khum utoh lhon’a CJM Thoubal a ajing (Sept. 19) nikho’a ana dinsah utoh lhon’a Police custody a nikho 5 sung um ding’a Court in thutan na ananei khum ahi.

Hiche toh lhon’a Pradhan kiman nachung’a deilou vetsah na’a toumun kiphinna a panla Meira Paibi member khat in aseina’a Pradhan chung’a ngoh na kinei bul le bal um lou thu ahi. Ajeh hiche thilsoh pet tah in keima jong kaum in Pradhan hin vengsung mipi akon kivendoh nading’a ama licence thal mangcha’a blank fire abol ahi in amahin mipi lah adoi’a thal alha ahipoi ati. Aman aseibei na’a thilsoh hung kipat nahi Pradhan in Charangpat Mayai Leikai public pond semphat nading’a lei analah doh ho achesa Sept. nisim 18 nikho’a JCB mangcha’a khangthah 2 hiche lei kiladoh ho Community hall sah na’a manchah ding’a analahsah got chu vengsung mipi hon hiche lei hi playground semphat na’a kimangcha ding ahi in koiman la thei ponte tin anating uvin ahi. Hiche phat chun Pradhan jong amun tah vechil ding’a anache na’a vengsung mipi hon hiche lei ho kipodoh thei lou ding ahi anti jeh uva kon vengsung mipi leh Pradhan kikah’a boina anasohdoh ahi. Hiche achun vengsung mipi hon Pradhan pa anavo go uvin chuleh a gari jeng jong anahal lhah phat uva mipi akon kivendoh nading’a thal analha khah joh ahi tin aseiyin ahi.

Xxxxxxxxxxx

WinG in Helam Haokip mollem nachung’a lunghempi thuthot nei

Imphal, Sept. 21(ET): Women in Governance-India (WinG-India) in achesa Sept. nisim 17 nikho’a Helam Haokip in tahsa dammo najeh’a aleiset hinkho anadalhah nachung’a lunghempi na aphongdoh in ahi. Hetthei khat chu Helam Haokip hi Urangpat kho a hung seilen ahin toh lhon’a Science a Masters Degree chai khat jong ahi. Chuleh amahi achesa 1998 kum akon japi a ding’a pan nasatah’a anala jing mi khat jong ahi naban’a ama Manipur gamsung’a tribal community lah’a ding’a patriarchal norms deilouna lhangsap masapen khat jong ahi. Hiche naban’a Kuki Inpi, Manipur ading’a jong numei executive member masapen ahi toh lhon’a Urangpat a Intergrated Rural Management Association a Secy. apoh jing lai’a thina anato ahi.

XXXXXXXX

Manipur hills district a MGNREGS Employees ho regularisation ahi nadiuva ngehna sanbe jing

Imphal, Sept 21(ET): Manipur hills district sunga MGNREGS noiya natongho September 25 kah a regularisation bol hihen tin All Manipur Hills District MGNREGS Employees Association (AMHDMEA) chun government komah kiphinna anei un ahi.

AMHDMEA chun aseina ah government in angeh nao agelkhoh lou leh maban a natoh nahi asut jomlou diuvin asei un ahi.

Hetthei khatchu  September 16 a chu (cease-work)  natoh hi anangah u ahitai. State government in athil ngeh u ngaisah in aneipon, hills district sunga adeh a thinglhang miho genthei na agelkhoh poi atin ahi.

AMHDMEA chun Sunday nia press release asonauvah government komah ngehna chom chom nei in memorandum jong authority ho koma ana peh u ahi.

Hinla hills district sunga adeh a thinglhang langho genthei na hi seithei lou ahi tin press release chun aseiye.

Hiche MGNREGS hi 2006 kum a UPA government in ana patdoh ni 100 sung adeh a rural area a dinga mitin in nikho tha alo thei nadinga anagon ahi tia aseibe ahi.

MGNREGS hi 2006 kumin Manipur ah Tamenglong district ah ana um masa pen in, hiche a kipat a chu Tamenglong district hin staff members 15 ana nei e tin Injiangam Kamei, MGNREGS Dedicated Employees Association President chun September 15 nichun aseiye.

MGNREGS um a kipat in Tamenglong district sunga natoh nahi phatah in ana chepeh in, hinla government in Valley district ah 2016 kum chun MGNREGS noiya natongho regularisation anabol in hills district ho anadon phapoi tin Kamei chun aseiye.

Tamenglong DC conference hall ah toumun kiphinna banner leh placard ho mang in “stop injustice to Manipur hills district” tiho ana tahdoh un ahi.

MGNREGS staff in Valley district sunga regularisation ahi banga hills district ho a jong regularisation ahilou leh natoh hi kijom louding ahi tin jong aphongdoh un ahi.

Tamenglong district sunga MGNREGS Employees hon cease-work a chepi uhi government in regularisation alhah sah vahlou leh job card holder tampi adeh a COVID-19 sunga hi aha tohkhah diu ahi tin Kamei chun aseibei.

Government kom a memorandum jong regularisation ahi thei nadinga tampi pehlut anahitan hinla government in agelkhoh poi, ati.

Kamei chun aseibe na ah hiche MGNREGS Employees hills district sunga regularisation ahi kahse a cease-work hi kinga lou ding ahi ajeh chu lampi dang aum tapoi tin aseibei.

XXXXXXXXX

Ukhrul district lampi khangthah 100 val in ana sempha u

Ukhrul, Sept 21: Ukhrul district lampi selai hochu COVID-19 umbe jinglai ahivangin khangthah 100 val in manchah chom chom construction tools jaonan ana semphauvin ahi.

Local Youth Organization in hiche programme lampi semphat na hi ana gon, Harkui Kathe mun a kon in mi 103 velin pan ana la un ahi.

Hiche a lampi selai hochu Nimshimri society, Khampasom leh Harkui Kathe kikah ho km 1 in ahuop sung ahi e. Hiche kho ho a dinga lampi poimo khat ahi naban a bazar lampi jong ahi.

Main market toh kijop mat lampi ahi naban ah keima hon fund hi kapoh doh uva kasem u ahi e tin Ashang Shimrah natongho lah a khat chun East Mojo toh akihou nauvah chun ana seiye.

Shimrah chun aseibena ah fund lakh 1.5 tobanghi well wishers ho a kon ahin, mipi kom a ana kidong khom ahi in, government a kon in kithopina ahilou leh scheme aumpoi tin ana seiye.

Aman aseikit na ah market lampi a kinei hi ase lheh jeng tan, gari hihen kenglam hijong leh genthei aumlheh e, ati.

Hiche a hin well wisher ho ahi in autonomous council hon contribution anabol na chungah kipathu jong asei un ahi. Hiche hi local Youth in akigel khoh in concern authority a kon a ima ana umlou jeh a ana kibol ahi e tin Ashang chun aseiye.

Shimrah chun aseibena ah munlen tah huop jou hih jongleh na kitong hin khovel leh akim vel  a Youth holah a hitobang tohgon ahung kondoh ding akinepna thu jong aseiye.

Xxxxxxxx

CM in treatment bolna dinga hospital phabep package rate adinga gonbe

Imphal, Sept 21(ET): Ayushman Bharat PM Jan Arogya (PMJAY) kum 2 alhintoh kilhon in CM Biren Singh chun Jiribam District Hospital, CHC Nambol, Shija Eye Care, Moirang CHC hohi empanelled akibol tai tin mipi hetding in aphongdoh in ahi. Aman aseina ah State health Agency in PMJAY beneficiary hon bailamtah access anei thei nadiu toh kilhon khom dingin website khatjong hondoh ahitai, ati.

Hiche hin dammo na chom chom a kon a kijen na rate hojong suhsang hiding ahi.

PMJAY hi September 23, 2018 a kipan ahi in hiche hi health insurance scheme umlah lah a alenpen leh beneficiary leiset chunga atamna pen ahitai tin Chief Minister chun asei e.

Hiche scheme noi a hi family khat in cashless benefits lakh 5 chan amuthei ahi. Manipur adinga health scheme masa pen dingin 2017 kum in Chief Ministergi Haksellgi Tengbang (CMHT) jong state government in ana semdoh ahi. Hiche scheme noiya hi meithai ho, physically challenged, person, AAY card holder ho, media persons, newspaper hawkers, drivers, chuleh below poverty line ( BPL) hon cashless benefits lakh 2 chan natna chom chom jen nadia amuthei u ahi e tin Chief Minister chun asei e. CM in aseibe na ah PMJAY noi a min khumlut 270000 lah a chanvou mu hi mi 140008 ahi e, ati. Hiche enroll kibol lah ah hin 21367 tobang hohin treatment lakh 29.26 lut in ana kipedoh e atin ahi.

Chuleh CMHT noiyah hin 340000 in enrolled anahi in mi 37370 in treatment anamu uvin crore 4.30 vel alut e, ati.

Hiche scheme noi a hi dialysis, chemotherapy, delivery case, gall bladder removal operation leh adang dang jong treatment peh ahi e. Hiche a hospital minphah theiho chu ahileh RIMS, JNIMS, district hospital holeh Shija Hospital, Raj Medicity ho ahiuve.

Xxxxxxx

Bhiwandi building chim na a chapang 7 jaona mi 13 in thina toh

Mumbai, Sept 21: Tunia Maharashtra Bhiwandi town a building khat chim lhah na ah chapang 7 jaona in mi 13 athilo tan ahi. Hiche holah ah hin chapang kum 4 khat jaona in mi 20 huhdoh in aum e. Hiche building hi dan 3 a sang, building chim namun a tudinmun hin mi huhdoh be nading ahahsai tin police hon aseiye.

Hiche hi offence sections 337,338,304(2) IPC noiyah building neipa Syyed Ahmed Jilani chungah hehna aumtolhon in register akibol tai tin Bhiwandi DCP Rajkumar Shinde chun asei e.

Police hon aseinauvah hiche building hi kum 43 lang ahitan jingkah nidan 3:40 vel a chim ahi, ati. Hiche athi holah ah hin chapang kum 2 khat ajaovin chule Civic official 2 jong suspend ahitai. Thane a kipat a km 10 vel a gamla Bhiwandi muna building a hi flats 40 um a mi 150 tobang cheng ahi.

Uithem ho mangcha in National Disaster Response Force (NDRF) in building chim namun lah a mi ahol uvin ahi. Building hi akeh khat tobang hi chim ahi in mi phabep atangden nalai e tin Thane Municipal corporation official hon asei un ahi.

Kiven nadin power supply jong lahdoh ahi in chuleh akisukha hochu local hospital ah admit ahiuve tin Bhiwandi-Nizampur Municipal corporation (BNMC) chun aseiye. Chuleh hiche building hi dilapidated structure list lah a jaolou ahidan jong BNMC chun aseiye.

Hiche a hin BNMC chun senior official 2 jong suspended abol tan ahi. Official 2 teni chu Assistant Municipal Commissioner Sudam Jadhav leh engineer and verification officer Dudhnath Yadav ahi lhon e.

Official Release chun aseina ah inquiry committee assistant town planner jaona semdoh ahitai, ati.  Prime Minister Narendra Modi injong building chim namun a hinkho ana chanho lunghempi na thuthot ana neijin ahi. Rescue operation achelha jingin akisukha hojong adamvah diu itaonau ahi tin Modi chun tweet abol in ahi.

Maharashtra CM Uddhav Thackeray injong alung hempina thu aphong doh in akisukha ho phatah a jendin thupeh abolpai ahi.

Xxxxxx

Opposition hon doudal jongleh Farm bill hin loubol ho tha apeh ding ahi tia PM Modi in sei

New Delhi, Sept 21: Prime Minister Narendra Modi in Farm bill 2 tunia phatsahna kinei hi loubol  ho machal nading ahi e, ati. Hiche hi ‘Ghar Tak Fibre’ kiti scheme khat aphondoh jou a virtual event khat a anasei ahi, hiche scheme chu Bihar mun a ana sem ahi. 21st century ahitoh lhon a hiche Bill hin farmer ho income asuhpung ding ahi tin PM chun aseiye.

Hiche bill hin farmer ho trade free tah a apehding hoilai mun hijongleh, hiche bill hin farmer ho asuhboi louding ahi tin jong Modi chun aseiye. Chule farmer hon tu hahsat phat laitah a hi profit nei a thil ajoh theidiu ahi tin Modi chun aseibei.

Minimum selling price system umjongleh farmer ho kom a avel a ka sei ahi mijousen minimum support price system amu thou diu ahi, ati. Hetthei khatchu Monday niachu opposition leader MP 8 hochu Rajya Sabha akon a rule 256(2) noiya suspended ahiuve.

Amaho chu Trinamool Congress floor leader Derek O”Brien, AAP akon a Sanjay Singh, Congress leader Rajeev Satav, Syed Nasir Hussain leh Elamaram Kareem chuleh Trinamool akon a Dola Sen ahiuve.