Manipur board noiya HSLC Exam 2020 Result kiphong Government School a...

Manipur board noiya HSLC Exam 2020 Result kiphong Government School a kon simlai ni Top 25 position holder a pang; Pass percentage 65.34 pha

136
0
SHARE

Manipur board noiya HSLC Exam 2020 Result kiphong

Government School a kon simlai ni Top 25 position holder a pang; Pass percentage 65.34 pha

Imphal, June 15(ET): Board of Secondary Education Manipur (BOSEM) in abol High School Leaving Certificate Examination, 2020 Monday nikhon aphong tauvin ahi.

Agom a simlai 25,084 in pachanna aneiyin ahi. Tukum exam a dinga agom a simlai 38,390 min kikhum ahi in, pasal 18,860 le numei 19,530 pang ahi. Tukum pass percentage hi 65.34 per cent ahi. 25 position holder holah a Government School a kai simlai ni apang in ahi.

Chabungbam Ishwarchandra Singh, s/o Ch. Shwamichandra Singh le Ch Nirmala Devi, Phubala Awang maning leikai a cheng Moirang Multipurpose Higher Secondary School, Moirang a kai simlai pa hin marks 600 lah a 565 amu a rank 7 channa a pang ahi. Chule Satmunchon Kipgen, S/o Ngamlal Kipgen le ngahboi Kipgen, S Jalenmol kho a cheng chule Eklavya Model Residential School, Ganom Saparmeina a kai simlai pa rank 11 channa a apang in, amahin marks 600 lah a 561 amu ahi.

Education Minister Dr. Thokchom Radheshyam in BOSEM conference hall mun a Monday sun nidan 11 a department official ho umna a result official tah a phondohna anei ahi. Chomcha ahoulimna a Minister pa in simlai lolhinna nei ho akipapina thu aseiyin chule alolhing joulou hon khovei teng lolhinna anei diuvin aseiyin ahi.

Tukum exam a pachanna nei joulou hon pontho tah a pan alah uva, khonung a hoicheh a abol diuvin tilkhouna aneiyin, losapna hinkho a aumpon, kihilna bou ahi, ati. Nu le pa tehon alhahsam nau hetdoh peh nadinga pan alah diuvin jong temna aneiyin ahi. Tukum exam hi dihtah a bol ding tupna lenpen neiya kibol a, hiche jeh a tohgon chom chom kipandoh ahi, ati.

Online form fill up a admit card generation, answer booklet kikhel, answer key a ‘claim le objection’ kikoi, website a topper ho answer booklet upload kibol a, chule vigilance official hon jong akigu aumlou nadinga khoutah a pan alah u ahi, tin exam athen nadinga athah a kipan doh ho thu aseiyin ahi. Exam khoutah a akibol jeh a tukum pass percentage lhom jep ahi, tin aseiyin chule tukum exam a akinodoh (expelled) atamna hijong record ahi, ati.

Mi khel a tou chule exam a ‘unfair means’ bol jeh a simlai 102 expelled kibol ahi in, kum masa a simlai expelled kibol hi 53 ahi, ati. Covid 19 pandemic jeh a tukum exam paper kivetna a hahsatna aumho thu Dr Radheshyam in aseiyin, dan khoutah akichepi jeh a tukum a examiner, tabulator le staff hi 30-40% a kisunem ahi, ati.

Evaluation Centre tukum a akikalsah hi ‘social distancing’ angai jeh bou ahipon, evaluation akibol sunga school mun quarantine centre a akiman jeh a jong kichon ahi. Hiche ho jeh a HSLC 2020 exam result phondoh ding hi akigong nikho a kon nikho 20 vel a vaigei ahi, tin aseiyin chule simlai kiloikhom, nu le pa, jilkung chule exam a dihtah a akibol nadinga pan la jouse chunga kipathu aseibe in ahi.

Tukum HSLC exam a Pitambara English School, Kwakeithel a kai simlai Reshmi Nandeibam, D/o Nandeibam Rishinanda Singh le Rajkumari Sanahanbi Devi, Khongman Zone-V, Imphal East a cheng in marks 600 lah a 579 amu a, Rank First a hung ahi. Chule St. John’s English High School, Nambol a kai, Huidrom Rohid Singh, S/o H.Premjit Singh le H (o) Sumila Devi, Ishok Mayai Leikai a cheng in marks 600 lah a 578 amu a second position a pang ahi.

Chairel Thoubaltabi a cheng Eureka Academy a kai Khumanthem Bobosana Singh, s/o Khumanthem Sharat Singh le Khumanthem (o) Asha Devi chule Catholic School, Canchipur a kai Arapti Mayai Leikai a cheng Rahul Naorem, s/o Naorem Jibol Singh le Athokpam Shantibala Devi in marks 600 lah a 572 amu a, ani lhon a third position a pang lhon ahi.

Tukum exam a government school a kon simlai 9008 in exam apeh ahi in, hiche lah a simlai 1106 in first division a pachanna aneiya, 2383 second division a hung a chule 173 third division a aminchong ahi. Aided School a kon simlai 1891 in exam apeh a, hiche lah a 1st division mi 312, second division a mi 623 chule third division a simlai 40 in pachanna anei ahi.

Private school a kon simlai 27,491 in exam apeh a, hiche lah a mi 10466 in first division amu a, second division a mi 9642 chule third division a simlai 339 in pachanna anei ahi. Thoubal le Kakching hi Best Performing district ahi in, pass percentage 77.50 lhing ahi.

Result kiphonna a Commissioner Education (S) T. Ranjit Singh, Chairman BOSEM Th. Kirankumar, Secretary, BOSEM Dr. Chithung Mary Thomas leh adang dang jong apang uvin ahi.

Manipur sorkar in June 18 a kon ni 10 sung Imphal khopi a lenna lhun sah loudinga sei

Imphal, June 15(ET): Manipur government in Monday nikhon Imphal khopi a lenna leng ding ni 10 khongai dinga Centre henga temna aneiyin, ahung lhung sa passenger ho Covid 19 test kibol jou loulai atamjeh chule hiche ho suhtheng masat dinga ngehna aneiyu ahi.

“Tu dinmun a hi Imphal a lenna nga (5) hunglhung ahi. State sorkar in ni 10 sung hi Imphal khopi a lenna ahung len ding khongai sah dinga thulhuhna anei ahi in, test kibol loulai atam jeh chule quarantine centre a mi atamval olsah jep nading ahi. Hiche jeh a June nisim 19, 2020 nikho a kon June nisim 28 sung hi Imphal a hung leng ding lenna jouse khongai sah dinga nahenga temna kanei ahi.

Hiche thu a airlines jouse, DGCA chule AAI henga angaicha thuhilna napeh dinga temna kaneiyu ahi”, tin Chief Secretary J Suresh Babu in Usha Padhee, Joint Secretary, Civil Aviation Ministry henga lekhathot apehna a aseiyin ahi.

Gamsunga ahung kile atam val jeh a Covid 19 test kibol jong kibol jou loulai ahi in, tuchan a sample 15,000 hi test bol louv um nalai ahi, tin jong lekhathot a asei uvin ahi. Manipur gam a Covid 19 natna nei hi 458 lhing ahitan, hiche lah a active case 367 um ahi. Sorkar in mi gam a tangden ho a agam a akile nadinga phalna apeh lha masa a kon Manipur a Covid 19 case hi kal cheh cheh ahi. Flight service akipat masanga gamdang a kon hung kile batch masa pen hohi May lha a train a hung kileu ahi.

Manipur a covid-19 natna nei mi 32 kimube; Mi 60 kijendam be

Imphal, June 15(ET): Gampam akon hunglut ho test kibolna achun mi 32 chu Covid-19 vei ahidan hetdoh ahitoh lhon in tuhin Manipur gamsung a hiche natna veikha mi 490 aphatan hiche lah ahin active case 339 aum in ahi. A thah 32 kimube lah ahin 20 chu RIMS a kimudoh ahi in chule 12 chu JNIMS, VRDL akon kimudoh ahi. Official thulhut dungjui chun akimudoh thah ho travel history kholna akinei pet ahi ati.

Alangkhat a natna nei mi 60 ho result negative ahitoh lhon in hospital akon dischareged ahi tauvin mi 22 chu Covid-19 care facilities RIMS akon chule mi 38 hochu JNIMS akon ahiuve.

Additional Health Director Dr. K Sashee Kumar Mangang in aseina achun hiche natna akon damdoh mi 151 aphatai ati. Health Department a Media team hon kholchilna aneikit nauva chun keng a vahle 39.5 pc tobang in Mask akibeh pouvin hiche hi phalou hel ahi in koi hijong leh milah a vahdoh ahilou le mipi kipunkhomna che ding hon mask kibeh tei a sanitizer jong man a social distanching jong jui cheh ding in asei in ahi.

BOSEM themvet nanoi’a CCpur le Pherzawl Dist. sung’a Candidate 3,716 lah’a 2,504 in lolhin nanei

B.Lalboi Gangte

CCpur. June 15 (ET): Board of Secondary Education Manipur (BOSEM) noi’a tukum High School Leaving Certificate (HLSC) themvet na result phondoh ahitoh lhon in Candidate 38,390 lah’a candidate 25,084 in pachan na anei in agom’a pass percentage 65.34 alhing in ahi. Chuleh kum lui’a sang in 9 percent in anemjo in ahi.

Hiche toh lhon’a CCpur leh Pherzawl District sung’a candidate 3,716 um nalah’a candidate 2,504 pachanna anei in chuleh District pass percentage 67.38 alhing in ahi. Chuleh gamsung pumpi a Govt. School akon candidate lolhing jat 3,662 (40.65%), Aided School akon candidate lolhing jat 975 ( 51.56%), Private School akon candidate lolhing jat 20,447 (74.38%), Regular candidate pasal 17,580 lah’a candidate lolhing jat 12,461 (70.88%), numei regular candidate 17,992 lah’a candidate lolhing jat 12,009 (66.75%) ahi toh lhon’a tukum ah numei sang in pasal hon abol hoijo uvin Top 25 chan alhung uvin ahi. Hiche lah’a thinglhangmi  mi 3 jong Top 25 sung alo thei uvin ahi. Ama hochu Top 11 ah Eklavya Model Residential School, Sapermeina akai Satmunchon Kipgen S/o Ngamlal Kipgen of S Jalenmol (561 mark), Top 19 ah Little Flower school, Imphal akai Mary Lalchawimawi D/o John H Pulamte of National Game Village (553 mark) chuleh Top 22 ah Nirmalabas School, Imphal akai Nengpilhing Haokip D/o Thiengin Haokip of National Games Village (550 mark)ahi.

Alangkhat’a Subject topper ho chu MIL a topper ho Saviour Public School, Mission Veng, Hiangtam Lamka akai Kamminthang (MIL Gangte) in 99 mark; Little Flower School, Imphal akai Mary Lalchawimawi (MIL Hmar) in 100 mark; Donbosco Hr. Sec. School, Lamka akai Telen Chungneireng Kom leh Loyola School, Bishnupur akai Leivon Ignatius Kom (MIL Kom) in 95 mark amu lhon in; Lamka Central High School akai Laqlmalsawma (Mizo MIL) in 92 mark; Savio English Hr. Sec. School, Thangmeiband akai S. Chingbiakdik (MIL Paite) in 98 mark; Donbosco Hr. Sec. School CCpur akai Christy Chingngaihsiam leh Hope Baptist Academy, Rengkai akai Ruthi Kimngaihhoih (MIL Simte) in 97 mark amu lhon in; Salt Brook School, Ccpur akai Zovin Tainunnem (Thadou-Kuki  MIL) in 100 mark; Donbosco Hr. Sec. School, Ccpur akai Ngaidoikim (Vaiphei MIL) in 97 mark chuleh Chinkham Modern High School akai Khuphaunian ( Zou MIL) in 96 mark amu uvin amaho cheng hi MIL Subject a topper ahi uvin ahi.

Mathematics Subject topper in Young Learners School, Churachandpur akai Joseph Mangkhohao Haokip, Eklavya Model Residential School akai Satmunchon Kipgen leh Diamond English High School Kangpokpi akai Lengunlal kipgen ho cheng in 100 mark cheh amu uvin ahi.

Hetthei khat chu CCpur District sung’a Private School um holah’a The Dawn School, Sielmat Christian High School, Mount Carmel School, Partnership Mission Society leh North Eastern Children Academy hon pass percentage 100 cheh anamu uvin CCpur District sung’a School bol hoipen in apang uvin ahi.

BOSEM noi’a themvet na’a Kum chapangpen Isaac Paulallungmuan 1st Division a lolhing

B.Lalboi Gangte

Ccpur, June 15 (ET): Manipur Board (Board of Secondary Education, Manipur) noi’a High School Leaving Certificate (HSLC) Examination 2020 result phondoh ahitoh lhon in gamsung’a ding’a exam pe lah ding’a achapang pen Isaac Paulallungmuan jong First Division in lolhin na achang in ahi. Hetthei khat chu Isaac Paulallungmuan S/o Genkholian & Boijem hi Kangvai Mount Olive School, Kangvai a simlai ahi. Ama hin 600 total mark akon 432 amu in percent 72 alhing in ahi. Chuleh amahi November 10, 2007 kum’a peng ahi.

Alangkhat’a amahi adih tah’a class X themvet na pehthei nading’a a kum lhing lou lai ahi in ahin ngehna abol dungjui uleh exam peh thei nading’a test chom chom kibolsah na’a alolhing jeh’a themvet na’a pan analah thei ahi. Department of Clinical Psychology, RIMS, Imphal in Psychology test abol nao’a kum 17 leh lha 5 mi toh kibang’a ‘basal age’ hi kum 14 leh terminal age ahileh kum 22 mi toh kibang ahi dan amudoh naoban’a IQ jong 141 aphah jeh in “Very Superior Intellectual leh Development Functioning” ah report mu ahi dungjui in Director of Education (S) in apen kum November 6, 2019 dihtah mangcha’a Special Case a HSLC Examination 2020 apeh thei nading’a thulhuh na anei dungjui uva ana phalpeh ahi.

Ccpur ADC Chairman deilou kibe jing; adeilou MDC Member 16 lhing ta

B.Lalboi Gangte

CCpur. June 15 (ET): ADCC Chairman T. Paukhanlian  Ministry noi’a Deputy Chairman Genneihkhup Vaiphei, Chongkhojou MDC leh Executive Member Lalhrillien, Saikot MDC in Council Member akon haina apeh toh lhon’a tun Chairman khel ding dei Camp ah MDC Members 16 alhing tan ahi tin Langkhanpau Guite in aseiyin ahi. Chuleh Chairman adeilou nao MDC 16 thalheng’a atahlang na’a mimal’a Paukhanlian hi kimuda ahipon style of function dan joh kideilou jeh’a BJP hatjoh sah ding deina joh ahi ati. Covid-19 pandemic thu’a MDC ho jong toukhompi ngailou, sum leh pai thu chuleh Govt. a natoh ong thu ho’a MDC ho toukhompi’a kihoukhom pi ding lunggel ima jong aneipon ahi. Alangkhat’a ADC noi’a School 170 um nalah’a School building 7 sah na ding leh Barack Type Quarter 10 sah nading chung thu ajong Executive level a seikhom na ima umloua ama adei dei’a ADC School asah nachung’a MDC member hon kitahsan lou hiche nachung chon’a Chairman ding’a jong akidei lou jeh’a Camp dang’a kium kha ahi tinjong aseibei.

Hiche toh lhon’a tun Chairman pan MDC  7 anei in chuleh ADC Election hi tukum November lha sung hi ding ahi naban’a aphat lhin nading lha 5 bou kivah hita jong leh ADC Churachandpur sung’a leadership kikhel ding deina achelha jing nalai in ahi. BJP akon MDC ngen akihi vang vin kehni in akiso in Imphal ah Khaipao Haokip leader hi nan Camping abol uvin ahi. Alangkhat’a tudin mun’a Chairman din mun tut jinglai T. Paukhanlian ahi vang in ADC/CCpur Chairman tut ding kichu na’a Khaipao Haokip camping bolna’a ama tosot ding ADC member 16 alhing tan amaho chu Langkhanpau Guite, Seilenmang Khongsai, Ngamhao Touthang, Grace Zamnu, Hausuanthang, Nehminthang Haokip, G. Suanchinpau, Khaikhomang, CT. Lian Guite, M. Gouzamang Guite, Lalhrillien, Pumtulthang, Genneikhup, Chungpa Kom leh Lalhmangpui Fimate ahi. Chuleh Chairman T. Paukhanlian Camp ah ADC Members 7 hochu G. Thangkhosuanmung, Lal Hossan, P. Kamkholal, V. Khaikhanmung, Paolal Haokip leh Holkhojang ahi tin Langkhanpau Guite chun aseiyin ahi.

Alangkhat’a achesa June 11, 2020 nikho’a Congress Party akon MDC Members 8 in BJP ana jop uvin chuleh Party kibang sung’a “No confidence motion” um theilou ding ahi ti’a BJP lamkai ho thuso aum jeh in DC/CCpur ah “No confidence motion” apehlut ujong lahdoh ahi kit tan ahi. ADC kivai pohna toh kisai’a State ah toh molso ding um ho State Cabinet in athulhuh bang’a ADC sung ajong ADC ah Executive member hon jong case len lou ho’a thu anei thei ding in akisei in ahi. Chule Barack Type Quarter sah nading toh kisai’a Executive meeting thulhuh na ahidan leh School 7 kisah nahi ADC noiya school thah aum ding poimo jeh’a aumsa hilouva athah ding’a kisa joh ahi tin thulhut dang khat chun atahlang in ahi. Chairman post chung thu hi itih nikho leh asuhtheng ding’u ki hechen hih lai jong leh ahung lhung ding June 19, 2020 nikho’a Rajya Sabha election kichai jou teng kichet ding ahidan jong Langkhanpau Guite in aginmo nathu aphongdoh in ahi.

Special Judge ND&PS in  Lhukhosei Zou case court danga chon dinga HC a application pe

Imphal, Jun. 15(UNA): Special Judge, Narcotic Drug and Psychotropic Substance (ND&PS) in Monday nikhon Special Trail case number 100 of 2018, Manipur Versus Lhukhosei Zou @ Shesei Zou and others’ case transfer bol dinga Registrar General High Court Manipur henga application ape uvin ahi.

A.Noutuneshwari Devi Judge Special Court (ND&PS), Manipur in hiche case toh kisaiya achunga ngohna kisem ho jeh a application apeh ahi. Mi tamtah in keima kitahna chule Court kitahna hi aphotchenna umlouva thudohna aneiyu ahi. Boina asang in, social media mangcha a judiciary minset nading demna thu mihon asei pan a chule court chelhah dan thu a kikumna aneiyu ahi. Hiche jeh a hiche kihehna conduct bol ding lunggutna kaneilou ahi, tin aseiyin ahi.

Hiche ho jouse jeh a hi Office of the Registrar General High Court of Manipur in pan alah a, hiche case hi keima court ti louva akilom Court adang a achon nadinga ngehna kanei ahi, ati. Kum masa June 18 a Cril. Misc. Case No 67 of 2019 a Special PP anahi T Bipinchandra Singh in submit abolna a dangka 57,18,000 lhing akiman sum deposit bol ding akiphalna thei aume, tia aseiya chule akisei sum hi SBI Secretariat Branch henga ‘denomination’ agon jouteng ule deposit abol diuva thuhilna anei ahi.

Application hi Y Sushil Kumar Singh kiti IO jong hilou chule witness jong hilou khat in asem ahi. Hetthei khat chu nisim 12-06-2020 ni a application a hi, Prosecution witness number 15 Ashok Kumar Oinam, case IO masapen thudohna (examine) abol nauva Special PP Koshia Mao in Court henga akiman sum 57,18,000 hi SP NAB PS account no. 38398015820, SBI Secretariat Branch a nisim 18-06-2019 ni a order dungjuiya deposit kibol ahitah jeh a kahin pohdoh (produce) louding ahi, tia asei ahi.

Sum hi khamnathei a kivei a kingoh achom chom a kon amat u ahi in, bank locker hilouva angaiya banga deposit kibol ahijeh a court a kipodoh theilou ahi, tia anasei ahi. Hiche ho jouse hi Registrar General hon agel khom a chule case hi thudih a thutanna ding gelkhoh na jal a court adang akilom khat a akichon nading a pan alah diuva temna kanei ahi, tin ngehna aneina a aseibe in ahi.

Northeast a Galguh bol ho a inmun cheh akile jeh uva sumdon nemlheh

New Delhi, June 15: Northeast a galguh bol hon neh le chah hahsat jeh’a a in cheh’u akijot jeh uvin gamsung a sumdong ahung nemlhehe akiti. Achesa lha thum sung a sumdon na nem hi covid-19 jeh ahi jong akiti.

Thuso kimu dungjui in neh hah jeh in National Socialist Council of Nagaland (NSCN) sung a faction chom chom hon asepai hou a inn cheh uva asol utoh lhon in gamsung a sumdon anemlheh in ahi. Ka chapang hou lockdown jeh’a inn kileu ahipon, neh le chah chung changa boina tuchan in aum hih laiyin covid-19 case tamjeh bou a inn a kisol ahi tin NSCN-Neopao Konyak/Kitovi (NSCN/NK also known as GPRN/NSCN) lamkai khat in thuso miho toh akihou limna a asei in ahi.

Hetthei khat chu achesa May le June lha sung phabep a NSCN faction galguh bol phabep Arunachal Pradesh le Assam a sumdon jeh a anakiman doh ahi. Lha masa kipat nalam a jong Progressive Motors, Darogapathar village, Dimapur a anei pa chung a Naga National Political Groups (NNPG) faction khat in sumdon na an anei utoh lhon a GPRN/NSCN in adih loud an le kholchil na anei ding dan u hetsah na ana nei u ahi. Lockdown a akum tengle koima in sum ahol thei lou ahin, hiche hohi het them ngai ahi. Tu gamsung dinmun a kami ho u sum dong ding a kasol ding uchu iti hithei ding ham tin NSCN/NK lamkai pa chun ana sei in ahi. A chapang ho u tu lai a camp kom dung vel a farm abol sah dan u joh tahlang na ana nei in ahi. Lamkai pa in asei be na a Naga thu Centre in asei lhah loiding akidei vang in natna len jeh hin ahithei pon, tua lamkai ho Delhi a che a alhun akon uva ni 14 quarantine um ding u kiti chu hithei lou ahi ati.

 

CM Biren in video conferencing a kon PHED project thum hondohna nei

Imphal, June 15(ET): Chief Minister N. Biren Singh in Chief minister’s Secretariat, Imphal a kon Monday nikhon video conferencing a Imphal Sewerage Project phase-I le Imphal Planning Area Phase-I a dinga Integrated Water Supply Project ni hondohna aneiyin ahi.

Chief Minister in ahoulimna a, New Development bank in dangka crore 3000 hi gamsung a um inson in twi amu nadinga sanction abol ahi, tin aseiyin ahi. Tender, work order le angaicha process dang dang ho kijou ahitai, tin aseiyin chule Prime Minister Narendra Modi, Union Finance Minister Nirmala Sitharaman chunga kipathu aseiyin ahi. Scheme a dinga foundation stone tundohna kin umvah ding ahitai, tin aseibe in ahi.

Insung 3000 hi Imphal Sewerage project noiya tuchan geiya connect kibol ahitan, insung 12,000 vel in aphatchompi ahi. Tamenglong, Senapati le Churachandpur district a water supply scheme hondohna umvah ding ahi, tin aseiyin chule PHED official ho leh contractor hon aphatcha project ajo jeh uva akipapina thu aseiyin ahi.

Twi hi manlutah ahi in, moh suhmang louding chule twilong (tap) lha a koiden lou dinga aseiyin ahi. Dangka crore 95 vel lut a Nambul River Rejuvenation project kipan ahitan, project hi Nambul vadunga pollution vettup nading chule Iroisemba le Heirangoithong kikah a nen kipai ho Mongsangei a water treatment plant a kon suhtheng nading ahi, ati.

PHE minister Losii Dikho in akingah jing Imphal Sewerage project hondoh ahitoh kilhon a Imphal khopi a mi asang a sim in scheme aphatchompi ding ahi, tin aseiyin chule PHE official, contractor ho pot tho na jal a Sewerage le water supply project hi aphatcha kijou thei ahi, ati. Water supply scheme adang dang jong kihongdoh vah ding ahi.

Hetthei khat chu Lamphelpat, Imphal West a um Imphal Sewage treatment plant hi North East India a sewage treatment plant aum khat seh bou hi ahi. Phase I a hi dangka crore 345.43 lut a capacity MLD 27 lhing kisa ahi.

Integrated Water Supply Project for Imphal Planning Area Phase-I hi Porompat, Imphal East district a crore 636.19 lakh lut a kisa ahi. JNIMS, DDK, Khurai Laiwangma, Khurai Sajor Leikai, Minuthong Hatta, Rahmania, Sanjenthong Officer’s Quarters, New Checkon, Wangkhei Khunou, Soibam Leikai, Khurai Ayangpali Road, panna hi scheme noiya kihop tha ding ahi. 9.53 MLD (Million per day) capacity project hi March 2018 kum a kipan a March 2020 kum a kijou ahi.

Integrated Water Supply Project for Imphal Planning Area Phase-I hi dangka lakh 736.77 lut a Iroisemba Hilltop, Imphal West district a asah u ahi. Lamphelpat, Iroisemba le Uripok lhang, Nagamapal, Wahengbam Leikai phabep jong scheme noiya umding ahi. 9.00 ML capacity project hi April 2018 a kipan a December 2019 a ajo u ahi.

Kin gon a Chairman LDA L. Susindro, Chief Secretary Dr. J. Suresh Babu, Addl. Chief Secretary Dr. Rajesh Kumar, Commissioner (PHE) Nidhi Kesarwani, Secretary to Chief Minister Ningthoujam Geoffrey, Chief Engineer (PHE) H. Sunil leh adang dang jong apang uvin ahi.