Manipur Bhavan mai’a kiphin’na bol thinglhang miho police in lathi-charge bol khum

Manipur Bhavan mai’a kiphin’na bol thinglhang miho police in lathi-charge bol khum

534
0
SHARE

Controversial bill thum ho pass kibol doudal nah’a Sadar Patel Marg, New Delhi’a um Manipur Bhavan mai’a kiphin na nei Manipur thinglhang gam miho Tuesday ni nilhah lam chun Police in lathi-charged anabol’uvin ahi. Police ho lathi charge nah’a chun kiphin na bol mi 50 vel akisukha’e tin police official a kon kimu thulhut chun asei’e.
Hetthei khat chu August nisim 31, 2015 a chun Manipur Assembly in thinglhang miho ngaidan dohna neilouva bill thum ho achamtah’a pass anabol ahi. Hitolhon chun Lamka sung’a jong mipi’n kiphin na ananei’uvin state Police in kiphin na bol mi kuo anakaplih’uva tuni gei’a aluongdamsa’u vuidohlou’a kikoi nalai ahi.
Tuesday ni thilsoh chu kiphin na neiho’n police barricade apalkeh jeh’uva lathi charge kibolkhum ahi tin Police a kon kimu thulhut chun asei’e. Ahinlah kiphin na neiho’n aseidan un police in cheh-tum a eihinsejeh’uva mipi lungsou doh kha ahi ati’uve. Hiti’a kiphinna neiho toh police ho kinuotonah’a chun, kiphin na bol hon police jeep khat jong ajepse’uve. Akisukha ho lah’a akhoh dehset ho chu hospital’a puilut ahi’uvin adangse vang chu police in ana man in ahi. Police in lathi-charge aboljou’va kiphin na neiho chu adoncheh’a jam-u ahi. Ahinlah Police in khatjong lhasuolou hel in anaman’un, atokhah sun sun chu bolkitin abol in ahi.
MTFD  in aseidan in police lathi-charge a kisukha ho chu – Zenngaihlun, Marina, Pamthingla, Amgaila, Ranreiphy, Rinsophy, Manthianching, Lalsiempui, Priscilla Vungngaihmuan, Kimbiaklun, Lalremruati, Manini, Thelma, Biakmoi, Sisi, Chinghoih, Biakhoih, Lialian, Kimte, Grace Siamlianvung , Isaac Charenamei, Wangzendingbou, Isaac Pamei, Lemma, Khiminjon, Hoinu, Bokato, Khual Lian, Vipuni chuleh Hnunsang Thomte ahi’uve.
Geldoh thie chu June nisim 7 ni’a chu Chief Minister Okram Ibobi Singh lamkainah’a All party delegate hon Union Home Minister Rajnath Singh heng’a bill thum ho presidential assent aumlou apoimo dan hatah’a anasei’u ahi. Ahinlah MTDF in delegate hi athu lahthei ahipoi ajeh chu delegate a hin Naga People’s Front (NPF) member apangpoi tin nielkalna anei in ahi.