Manipur a travel history neilou mi 98 Covid-19 case thah kimube; Recovery...

Manipur a travel history neilou mi 98 Covid-19 case thah kimube; Recovery rate 79.19 % phata

65
0
SHARE

Manipur a travel history neilou mi 98 Covid-19 case thah kimube; Recovery rate 79.19 % phata

Imphal, Sept 11(ET): Manipur sung’a Covid-19 case niseh a apunjing to kilhon in achesa nidan 24 sungin case thah 109 akimudoh be kit in chule mi 209 akijendam be in ahi.

Tuni case thah kimu 109 lah a 101, Pasal-79 leh numei 22 chu milham lah a kon ahin adang 8 ho chu Central Armed Police Force (CAPF) ho ahi akiti.

Case thah kimuna ho chu VRDL, RIMS akon 6; Chandel 3; Imphal East -10; Mother’s Care 1; Imphal West – 49; Shija Hospital 1; Bishnupur 5: Thoubal -8; Ukhrul 2; Tengnoupal- 1; Churachandpur 3; Kakching 1; Kangpokpi – 1; Raj Medicity – 4; Babina Diagnostics – 12; Advance Hospital-1; Jivan Hospital -1 ahin, amaho chu Imphal West mi 59; Kakching 3; Tengnoupal – 2; Chandcl – 1; Imphal East -15; Churachandpur 4; Bishnupur – 2; Thoubal – 12; Ukhrul – 2 chule Kangpokpi-1 ahi.

Milham mi 101 holah a mi 3, Churachandpur akon mi 2 le Chandel akon mi khat chu gampam akon hunglhung ahiuvin adang mi 98 ho hi gamdang a kholjinna neilou ahiuve.  Tun amaho cheng abon uvin Covid Care facilities a koi ahitaovin ahi.

Chule tunin natna nei mi 209 RT PCR test kibol jouva negative ahiphat in discharged akibol taovin ahi. Ama ho chu CAPF 96, RIMS 7, CCC Lamboikhongnangkhong 27, CCC UNACCO 29, CCC Thoubal 12, Lamding Wangling 18, TK Ukhrul 1, JNV Chandel 3, Moreh 2, Jiribam 13 chule Senapati akon 1 ahi.

Tuni case thah 109 kimudoh be hotoh tuhin gamsung’a Covid-19 Positive case 7579 (Milham 5807 le Security personnel 1772), Chule tuhin active case 1533 (milham 1231 le Security Personnel – 302) ahi. Tuni discharged kibol 209 pum’a akijendam 6002 (Milham 4535 le Security personnel 1467) ahin, recovery rate 79.19 % aphatai.

Hiche nat jeh a gamsung’a thi 44 lhing ahitai.

Xxxxxxx

Minister khat leh achanu COVID-19 positive hilhon

Imphal, Sept 11 (ET):  Works, RD&PR Minister Thongam Bishwajit achenu lenpen chule a insung uva natong numei khat COVID-19 ahivin ahi.

Thulhut khat in aseina ah Minister pa jinu driver khat positive kimu jouva ama ho hi Sept 9 ni test kibol u ahin tuni result kisohna a positive hiu ahi. Tua hi Home quarantine kibol diu ahi tai ati.

Gah hetthei khat chu tu masang deu a  Minister Nemcha Kipgen jong positive hi a mudoh ana hi in tunvang adamdoh tan ahi. MLA Fajur Rahman jong positive ana hi in akiseijin ahi. Amaho hin home quarantine phatah a ana jui u ahi.

Xxxxxxxxx

xxxxxxxxxxx

India a Covid-19 case kal jing, case thah 96,551 kimube

New Delhi, Sept 11: India a COVID-19 case lakh 45 aval tan chule thina toh mi 76,271 apha tan hiche hi tuni case thah 96, 551 leh mi 1,209 athibe toh kisim tha ahin, natna akon kijendam jong lakh 35 aval tai tin Union Health Ministry in Friday ni data asohdohna a aseiyin ahi.

Tua hi India sung’a coronavirus case 45,62,414 aphatan chule akijendam jat 35,42,663 ahi tan, recovery rate hi 77.65 per cent ahi tai. Chule active case 9,43,480 aum in ahi.

India a achesa August 7 a chu Covid-19 case lakh 20 ana phah ahin, August 23 a lakh 30 chule September 5 a lakh 40 aphah pai ahi.

ICMR thuso dungjui in September 10 a sample test kibol 11,63,542 pum in sample test 5,40,97,975 akibol doh tan ahi.

Xxxxxxx

Themjilna mun ho kihondoh nadin thupeh imacha aumpoi–Education Minister

Imphal, Sept 11(ET): Union government in ahunglhung ding September 21 apat anom chan school kaithei diu ahitai tia juiding SOP phabep toh thupeh ana neita jongleu tutadi ading in Manipur sunga mipi chunga natna toh kisai lung sa-ih na aum nahlai jeh in themjil namun ho hon nading thupeh aum naipoi tin Education Minister Th. Radheshyam in thulakhom ho masanga phondohna aneiyin ahi.

Minister pa in a houlim na ah Ministry of Health and Family Welfare (EMR Division) a kon Director General of the Health Services in achesa nisim September 8 nikho chun koitobang Class IX – XII hon ama nopna cheh a SOP kisem ho jui puma themjil namun ajot thei diu ahitai tin thupeh ana neiyun ahi ati. Hinla SOP kisodoh chun themjil school hondoh ding atipon, hinla koi tobang jilkung ho a kon a doh leh sah neinom ho a ding bou ahi ati.

Health Ministry in gamsung pumpi a velvetna ahin neikit ding chuleh juiding SOP jong amopo ahinau toh kilhon a athahnbeh a ahin sodoh kitdiu hiche jou teng leh state government injong gamsung dinmun kive a chuten themjilna mun ho hon leh honlou ding athahbeh a hetsahna hung kinei kit ding ahi at.

Alangkhat ah, tuthah a themjil hon ding toh kisai a juiding SOP hung kipe ho hoitah a vetchilna neilouvin mi tamtah in ahilou lamtah in akilahkhah in thulamleng tamtah jong akija jinge ati. Minister pun aseibe na ah  tu tadi in government in themjilna mun hondoh ding thu akisei poh naipon chuleh hettohna neilouva thulamleng ho in simlai leh nulepa te adia boina alhunsah thei ahidan jong aphongdoh in ahi.

Aman aseibena ah, themjil na ho ahung kihon ding malam vepum in akisaipi mopohna nei department injong simlai ho class a tou ding dan ho gelkhomna aneina ban ah class ijat apat hon pan thei ham, themjilna mun a simlai ne tamjep ho leh nei lhom jep ho amasa anukhah umsah ding dan jong gelkhom ahi jinge ati. Vetsah na in Johnstone, Ram Lal Paul kiti ho leh private themjilna mun mitamna ho lah a seat arrangement hahsat ding dan ho hahsat ding dan jong simlai kiloikhom chom chom leh amopo hotoh seikhom ahi jinge ati.

Chuleh ahunglhung ding September 21 apat themjil na mun ho 9-12 class ho dinga hondoh nading thupeh aum kha napon, hetkhel jeh a thuthang ho jeh in mi tamtah aboisah in ahi. Themjil na mun hon leh honlou ding thu hi Chief Minister leh amopo hotoh kihoukhom na hung kinei ding, gamsunga COVID-19 toh kisai a hondoh ding ahi jong leh juiding SOP phatah toh thupeh na hung kibol bep ding ahi tin Education Minister pun aphongdoh in ahi.

xxxxxxxxx

CM in Startup conclave 2020 hongdoh

Imphal, September 11 (ET): Chief Minister Shri N. Biren Singh in tuni chun City Convention Centre, Imphal mun’ah State Planning Department gonna naiya Manipur StartUp Conclave – 2020 kin kiman na achun Rs. 525.09 lakh chu StartUp chanvou chang dinga lom mi 272 ho ana hopdoh peh in ahi. Hiche chanvou chang ho lah ah mi 8 chu StandUp category ahi in, 5 ho hi Revenue Stage ahi in chuleh mi 259 ho hi hiche scheme noiya Idea Stage a pang ho ahiuve.

Manipur StartUp scheme hi achesa 2017-2018 a ana kihongdoh ahi in, hiche in atup le adoi pipen chu thingle song ho suhset leh suhmang a umsah louva ama leh ama kitoudel nathei sumkolvei na leh tohding neilou ho dinga ama leh ama thepna cheh leh boltheina akon a tohmun ong kipe ho chunga kithopi na ahithei chan a peh ana hijing un ahi. Hiche scheme a chanvou chang dinga lom ho hi achesa 2017-18 sung chun mi 877 lhendoh leh peh in ana um un ahi. Hiche chanvou changthei dinga lhendoh ho hin 1 crore gei 30% subsidy a anatoh dungjui uva amutheiyu ahi.

Hiche kingon a Jingun a pang Chief Minister Shri B. Biren Singh in ahoulim na ah state sunga talent nei akivat pon, chuleh Manipur StartUp hi khangdong gunchu tah a natong nom ho leh khangdong sumkolvei na bolho dinga sum le pai a kithopi naleh abatoh nauva thanopna ahin neithei jing nadiuva hung kigongdoh ahi. Hiche scheme kigondoh akon in khangdong tamtah leiset chung pumpi huop injong minphah thei akisepdoh tan ahi. Chuleh hiche schem lolhinsah thei nadinga government kithopi jing bank chom chom hojong pachatna apen ahi. StartUp kigondoh a pat bank chom chom hon tahsan na nei tah a khangdong chanvou chang dia lom kilhengdoh ho loan chom chom apeh jing jeh in jong akipana aohongdoh in ahi.

Aman aseibe na ah, Lockdown jeh a kailhang mun tou a neh leh chah, sum le pai hol leh,  sumkolveina asuhboi mi 20,000 val jong bank loan peh ding lunggel akinei laitah ahi. Chuleh bank honjong hiche chungthu a natoh apat uva sumkolvei mi hon phatah a sum le pai aholnau ajom kit thei nadiu lampi ahin ngaito peh diuvin jong temna aneiye. Manipur StartUp thu a ahoulim na ah chanvou changnom jousen phat akikhah tai tia lungphalou a aum diu adeisah dan aphondoh toh kilhon in hiche chanvou changding kikoukhom na hi phatseh a kihong jing ahitoh kilhon a a 4 vei nading jong hung kihong pai ding ahi tan, adeh a atohmun hin dalha a inlam hinjon ho dinga jong ama leh ama akitoudel thei nadiuva atumbeh a kot kihonpeh ding ahi ati.

Manipur StartUp hin chi chomcheh a kikhen dan 4 aneiyin ahi- (i) Revenue (ii) Idea (ii) Entrepreneurs Support Scheme (ESS) leh (iv) Stand Up Manipur (hiche hi 2019-20 kum a adeh a SC/ST/OBC/women/Minority/ differently-abled entrepreneurs ho dopsang nadinga kikoi ahi).

Xxxxx

ATSUM, ANSAM leh KSO-GHQ in nidan 48 bandh vo hai ta

Imphal, Sept 11(ET): Ahung lhung ding 14th September 2020 ni apat Manipur pumpi nidan 48 sung All Tribal Students’ Union Manipur (ATSUM), All Naga Students’ Association Manipur (ANSAM) leh  Kuki Students’ Organisation General Headquarters in inter-state bandh bol dinga ana phondoh sa hijong leh chomkhat tadi ading in voh hai na aneitan ahi

Tuni nikho nidan 2pm a  SSA Conference Hall, Imphal mun a All Tribal Students’ Union Manipur (ATSUM), All Naga Students’ Association Manipur (ANSAM), Kuki Students’ Organisation General Headquarters (KSO-GHQ) palai holeh Govt. of Manipur akon palai Hon’ble Minister Education Shri Radheshyam Singh leh Hon’ble Forest & Environment Minister Shri Awangbou Newmai in  kihoukhomna anei nauva simlai kiloikhom ho thilngeh chung chang nidan 3 sung tobang seikhomna ana neiyun ahi.

Kihoulimna a chun thil kingeh ho abon in kinoptona lhingset um thei naihih jong leh ahunglhung ding September 25 masang ngeiya Chief Minister jaona a toukhomna khat neikit ding injong kinopto na ana neiyun ahi.

Hiche kinopto na aum tah toh kilhon in simlai kiloikhom thum hoa konin nidan 48 sung inter-state bandh bol dinga tohgon na kinei chu lhakang ahitai, hinla sorkar in akisei ho alepmanga suhbulhit na aneilou leh nisim 26 September apat kiphinna kipan kit ding ahi tin ATSUM Sectetary Shri Seiboi Haokip min a thu kisodoh chun atahlang in ahi.

Xxxxxx

Framework Agreement chunga boina suhlhap na dingin natoh akinei jing e: NSCN-IM

Dimapur, Sept 11: NSCN-IM in Indian govt toh akihou na u apoimo laitah ahi tahdan tahlang na ahin nei utoh lhon in framework Agreement chung chang a boina ho suh lhap na ding in kihou na akinei jing in ahi tin hetsah na anei uvin ahi.

Hiche kihouna kichai tokah a mipi ho in kiging jing a hinkho aman na ding uvin temna jong ahin nei uvin ahi. Maj. (Retd.) Hutovi Chishi, Convener, Steering Committee akon thuso kimu chun asei na a Framework Agreement chu boina suhlhap na ding aum nah lai toh lhon a mipi hetding a tahdoh na kinei loulai ahi ati. Hiche agreement noi a kinoptona kinei ho hi suhbulhit ding ahi lou le India le Naga ho kikah a kigui jopna tan na louding a tahdoh na kinei thei lou ahi akiti.

NSCN-IM in hiche political boina toh kisai a Naga mi tamtah in ahinkho u ana to doh u ahi toh lhon  a flag jaolou a kihou lhah na anop lou beh ding dan u tahlang na ahin nei uvin ahi. Daanpi jong hi Naga te ding a angaicha jing ahi toh lhon a daanpi jaolou a jong kihou na kichai theilouding, hepeh na akinei jouteng Nagalim sunga cheng jouse in hiche daanpi kisem na ahi panlah na anei ding danjong tahlang na ahin nei uvin ahi. Naga thu seichai ding hi Naga mite jouse in anga lal jing u ahin, hinlah chan ding a lom chang lou a kihou lhah na kinei thei louding ahidan jong hetsah na ahin nei uvin ahi. Naga mite dei le ngai akipeh thei louding le Prime Minister pa jaona a kinoptona kinei ho apanna bei ahiding dan jong tahlang na ahin nei uvin ahi.

XXXXXXX

ATRPFM in achaina kei dia government kom a ngehna nei

Imphal, Sept. 11(ET): All Tribal Rights’ Protection Forum Manipur (ATRPFM) in 2018-19 le 2019-20 kumsung a ST simlai ho scholarship pehdoh ding in state government le amopo tum TA and Hills kom ah achaina kei din ngehna aneikit in ahi.

ATRPFM in aseina ah 2018-19 a scholarship mu phabep aumvang in tuchan a mulou jong tamtah aum nalai e, ati.

Hiche hi thildang hilou in TA & Hills sum le pai a officer ho kichepna suhtoh dia Minister TA & Hills le department mopo ho kom a kisei jing bang a avel a kisei talou ding, September 2020 sung a government le amopo hon bolding dol abollou le kiphinna chelhah pi ding in ATRPFM chun phondohna anei in ahi.

Xxxxxxx

Khamnathei phabep mun chom chom a kimandoh

Imphal, Sept 11(ET): Tuni nikho nilhah lam nidan 4:30 vel chun ASP/NAB Sahlemba RK lamkaina in Nambol police hon numei 2 ana mandoh un ahi. Matdoh a um teni ahi leh Yumnam (O) Noni @ Lousangian 34 yrs w/o Y. James of Moreh ward no.7;  RK Renuka Devi (35 yrs) d/o RK Sanatomba of Thangmeiband;Samurou, IW district ahi lhon e. Amani a kon in sabon(soap) caps 273 asunga Heroin powder 3.412 kg ana mandoh un ahi. Akimandoh teni thudoh kineina a kon in adang mi 2 jong matdohbe ahikit lhon in ahi. Matdoh be a um teni ahileh Thounaojam Brojen (48) s/o Th. Athoi of Thounaojam Mayai leikai, Kakching leh Laishram Rabichandra Singh (32) s/o L. Ratan Singh of Heingang Panthoibi leikai ahi lhone, amani hi Imphal sung mun chom cheh a kon a maydoh a um lhon ahi. Case jong Nambol Police Station a jihlut in aum in ahi.

Alangkhat ah, khamna thei drugs suhmang dinga tohgon aum jing toh kilhon in, tuni chun thulhut kimu a kon in NH37 via Jiribam District a Anti Drug Cell, Jiribam team hon dan in aphallou khamna thei a kimangcha khuut lou(cough syrup) INSTACODIN kiti cartoon boxes 35, leh carton khat asunga 100ml cheh bottle 100 kikoi agoma bottle 3500 chu phalna lekha umlouvin truck khat sunga hardware thil kipo hotoh ahin pohtha nauvah ana mandoh un ahi.

Xxxxxxx

Tengnoupal Police hon crore 2.59 val man brown sugar mandoh

Imphal, Sept 11(ET): Tengnoupal district Police in tuni jingkah nidan 2 velchun brown sugar crore 2.59 valman amandoh un ahi.

Tengnoupal District Police Superintendent of Police Vikramjit Singh in thuso miho ho kom a aseina ah OC John Lamkang makaina lom in Moreh a hung kipan Maruti Alto car khat No. MN05A 9725 chu akhol chil naovah hiche khamna thei lou chu amudoh u ahi e, ati.

Gari a kipan in Md. Salim Khan kum 27 a upa chu matdoh ahi. Police team ho chun car chomkhat number WB 26R 5634 khat jong ana khol nauvah khamna thei lou ana mudoh kit un, gari tolpa Laljuithang Gangte kum 20 a upa Moreh Ward No.9 Moulhoi Part 3 jongchu ana man uvin ahi.

Xxxxxx

PPRRM in thudih leh theng tah a bye election ache theina dia ngehna nei

Imphal, Sept 11(ET): Maban a bye-election umna ding thua People’s Political Rights and Responsibilities Manipur (PPRRM) chun theng tah a election achelhah theina din mopoh na neiho leh mipi kom a ngehna anei un ahi.

Campaign akipat toh lhon in SOP COVID-19  dan kisem hojong akijui poi tin PPRRM chun asei e. Vote lhah phat leh mipi ho jong kiveng tah a umdin thumop anei un ahi. Ajeh chu COVID-19 positive hi seithei lou dinmun ahitai, ati.

Hetthei khat chu tuchung by-election a hi seat 13 ong ahi in Bihar election phat toh kibang a chelha ding ahi.

PPRRM chun aseibena ah  mipi hon sum le pai gelkhoh jo lou a thengtah a vote lhadin general secretary Romananda Mangang chun ana seijin ahi.

XXXXXXXXXXX

MS, District Hospital, CCpur in mipi hetding’a thuso nei

B.Lalboi Gangte

CCpur. Sept. 11(ET) : Dr. Vanlalkungi, Medical Superintendent, District Hospital, Churachandpur in thuso aneina’a tahsa damlou Ward ah admit kibolsa ho koima potsah lou ding chuleh admission dang lah lut tahlou ding in aseiyin ahi. Ajeh chu Sept nisim 10 nikho’a hospital ward akon Covid-19 +ve case mudoh anahi toh lhon’a damlou leh avekolho venbit na ding deina’a ward kimkhat tichu Medicine, Paediatric, Surgery leh ENT Ward ho’a damlou umsaho koima potdohsah tahlou ding leh damlou dang koima admit tahlou ding ahi ati.

Alangkhat’a Covid-19 veikha jong leng mo kakipoh ding ahi tiho jouse vang admit kibol ding ahi. Chuleh zalen tah’a koima lut leh-pot um theilou ding ahi naban’a Hospital mun’a damlou ho ann jingkah nidan 8:00 leh 9:00 kikah chuleh nihah lam ann nidan 4:00 leh 5:00 kikah sung’a peh thei ding ahidan thuso chun atahlang in ahi.

xxxxxxxxxxxxxxxx

Aizawl Municipal Area hapta khat lockdown kikoi khum

AIZAWL, Sept 11:  Zoramthanga government in Mizoram a COVID-19 positive akhan jing toh lhon in Municipal Area hapta khat lockdown koi din aphong doh tai. Hiche hi September 11 ni a COVID-19 positive case thah 141 mudoh ahi jeh ahi tin Mizoram Health Department in aphongdoh e.

Hiche lah a hin case 90 tobang hi ‘local transmission’ ahi in, matdoh loujong umthei nalai ahi tin Health Department chun aseijin hitobang hi tijat umtah dinmun ahitai, ati.

State Chief Secretary Lalnunmaiwa Chuaungo in Aizawl Municipal Area sunga mipi lah a chele va le venbit angai e tin asei e. Hiche lockdown dan hi September 17 chan chelha ding ahi jong, ati.

Aizawl sunga kona mipi ho koima potdoh loudin dan khoutah sem ahitai. Polam a kona lut le pot jong September 17 chan a kikhah ding, emergency tailou thildang phal hilou ding ahi tinjong asei e.

Dukan neoho le ngaichat ho choh theina ding phat nilhah nidan 5 chan hon hiding ahi. Themjil namun holeh hou inn hojong kha hiding ahi. Case thah to gom a Mizoram a COVID-19 case 1353 alhing tai. Tu leh tu a Mizoram hin active case hi 603 anei in ahi.

Xxxxxxxxx

Kangpokpi a numei khat in Christian Bible COVID-19 sunga jih tho a chai

Kangpokpi, Sept, 11 (UNA):  Kangpokpi a kum 16 chapang numei khat in Christian Bible Old Testament leh New Testament jaona apumpi a nikho 104 sung in ajih chai e. Hiche chapang numei nu hin Pandemic sunga hi Bible hetna belapna dia jihtho a kabol ahi tin aseijin ahi.

Tup le doi a chom chom umjong leh tulai Christian te lah ah Bible jihtho hi achal lheh in ahi. Amanu hi Ngahminnei alias Ngahsi Kholhou, Pu Thangkhojang Kholhou leh Pi Vahneikim chanu Kangpokpi DHQ a cheng ahi. Amahi Bible jihtho  holah a a khangdong pen a het ahitai.

Ngahsi hin pen 80 val leh nikho 104 lut a ana jih chai ahi e. HSLC pachan na leh Bible jihchai kipapina leh vang thum pehna kin leh thempu hina Rev. J. Lunkim, Kangpokpi Christian Church in ana mangin ahi. Hiche kingon hi achen na inmun a man ahi e.

Chuleh SFS Daili a simlai ana hisa, HSLC 1st division a apachan toh lhon in Royal Academy of Science, Kongba Bazaar a admission peh ana hi e. Ama hin khonung a doctor khat ahung hiding athanop na aseijin ahi.

Amanu hin May 18 a Bible hi ahin jihpan ahi in niseh a pung kal 10 tobang lut a ana jih ji ahi. Old Testament hi phengmai 1191 ahi in blank papers 1603 alut e, New Testament hi phengmai 381 ahi in paper 626 lut a ajih ahi.

Aman aseina ah hitobang ajo theina hi anu leh apa jala ahi tin aseijin ahi. Kangpokpi Christian Church library a koi din chapang nu khutsoh hi peh lut ana hitai.

Xxxxxxxx

The Kapaih Van Dhan Vikas Kendra CFC building hondohna kinei

B.Lalboi Gangte

CCpur. September 11(ET) :  Tuni (Sept. 11) jinglam nidan 11:00 in Khousabung kho’a The Kapaih Van Dhan Vikas Kendra CFC Building hondohna ana um in ahi. Kingon achun Jin-gun in Serto Esther Laltankim Kom, IFS, DFO, CCPur Forest Division anapang in chuleh The Kapaih Van Dhan Vikas Kendra CFC Building hondohna ananei in ahi. Chuleh hondoh’a um building chu Rev. Y. Noren Singh, UPC Pastor Khousabung in Pathen heng’a lhandohna ananei in ahi.

Hetthei khat chu hondoh aum The Kapaih VDVK hi Lengthei (pineapple) akon neh-leh don thei ding juice, jam leh squash ho asemdoh ding chuleh kailhang mun holeh dukan mun ho’a joh thei ding’a hung kisemdoh ding ahi.

xxxxxxxxxxxxxxx

Chiengkonpang Area a ASHA Worker leh Helper hon khosung mi 56 vel Malaria test anabol 

B.Lalboi Gangte

CCpur. September 11(ET) :Chiengkonpang Area a ASHA Worker leh Helper hon Village Authority kithopi na in tunin  Chiengkonpang Haosa pu inn a khosung mi Malaria test bolnom jouse test anabol uvin ahi. Hiche kibol lo na ajeh hi tulai go juh leh twi tam jeh in thoukang akipat pengdoh thei natna chom chom um thei CCpur District sung’a mudoh ahi ahitoh lhon’a Malaria Department, CCpur in ASHA Worker hon test abol ding uva kits ding anapeh’u ahi. Chule phat lemchang dungjui’a ASHA Worker hon jong amaho Area sung’a cheng mipi ho manbei’a test anabol’u ahi.

CCpur District sung’a tukum sung’a ding in Malaria case masapen achesa May nisim 28 nikhon Henglep Sub Division hopsung Tuikot kho akon Thangneilien (kum 47) leh kum 13 a chapang khat Malaria PF vei ahidan mudoh in ana um in ahi. Ahin Thangneilian chu vetkol manlou in thina anatoh in ahi. Chuleh May nisim 29 nikhon Singngat Sub Division hopsung Bualkot kho akon kum 10 a upa pasal khat Malaria PV leh Kangvai Sub Division hopsung Pengjang kho akon kum 23 a upa pasal khat Malaria PF mudoh ahi in, June nisim 1 nikhon Singngat Sub Division hopsung Bualkot kho kum 28 numei khat leh kum 28 a upa pasal khat Malaria PV mudoh ahi in, June nisim 5 nikho in Gangpimual kho akon kum 40 a upa pasal mudoh ahi in, June nisim 22 nikhon Panglian kho akon kum 22 a upa pasal khat Malaria PV mudoh anahi in ahi. Amaho cheng chu treatment bol ahinung uvin anatnao akon in adam theng tauvin ahi. Tuni’a Chiengkonpang kho sung’a Malaria test kibol phatsung in khosung mi 56 test kibo nalah’a koima positive anamudoh pouvin ahi.

xxxxxxxxxxxxxxxxxx

NEDAR le RBI Imphal kithokhom nanoi’a Women Self Help Group ho kichuhna anape 

B.Lalboi Gangte

CCpur. Sept. 11 (ET) : North East Development Alliance & Research (NEDAR) Foundation leh Reserve Bank of India (RBI) Imphal kithokhom na in tunin Headquarter Veng mun’a Women Self Help Group ho ding in sum lang toh kisai’a kichuhna anape uvin ahi. Kingon phatsung’a Sonkholal Haokip, CBI Churachandpur, G. Thangchinkhup, AGM, NABARD leh Haukhanpau, LDM, Churachandpur hon thupi chom chom pansa in kichuhna anape uvin ahi. Resource Person Mangta Shoute, Manager (PP), RBI, Imphal in RBI toh kisai leh Bank hamphat pi ding dan lam chom chom ho tahlangna aneiyin chuleh CBI akon Sonkholal Haokip in CCpur Khopi sung’a Central Bank of India (CBI) noi injong Self Help Group phabep aum jeh in Bank leh Self Help Group kikah’a natoh achehoi theina ding’a Self Help Group lam akipat palai um thei hileh phachom mama ding ahi ati. Self Help Group in bank account hoi tah’a ahin manchah uleh a turnover utoh kitoh’a Bank lam akon na jong loan jong apoimo dungjui uva peh thei ding ahi dan jong atahlang in ahi.

Hiche toh lhon’a Haukhanpau in houlimna aneina’a kum tamtah Bank ah katoh vang in tunai cha’a Manipur a hung posting kahi jeh in natoh chedan ho kolgam toh te ding in eiho lah’a natoh dan akibah louna lentah aum in ahi. Hiche na kitoh dan hohi Christian gam’a chi ding’a jachat umtah thil ahi ati. Self Help Group hon bank akon loan alah thei ding ti ahi dungjui’a tamtah jong pehdoh ahi tan hiche lah’a loan lesah kitlou jong aum dapon ahi. Loan hopdoh jeh’a bank ho jong chelha jom thei ahi jeh in loan sa joulou ding hon jong Bank toh kithu jah’a settlement khat bol joh poimo ahi. Self Help Group hi loan muna ding bou hilouva mimal cheh in ahamphat pithei nading tupna’a kisemdoh ahi.

Thangchinkhup NABARD in aseina’a India a numei ho dinmun khosah naleh neh le-chah holna dopsang nading tupna’a Self Help Group semdoh ahi dung jui’a gamsung’a kikhelna lentah alhut in ahi. Chuleh eiho lah’a jong Self Help Group 2,600 tobang aum in hiche lah’a Self Help Group tamtah sum muna ding scheme chom chom’a loan ngai tona ding bou’a akisemdoh jeh uvin achesot thei ji pon ahi ati.

xxxxxxxxxxxxx

CCpur District a Covid +ve case thah 8 kimudohbe; agom’a case 740 lhingta 

B.Lalboi Gangte

CCpur. Sept. 11(ET) :Churachandpur District sung’a tunin Covid-19 +ve Case thah 8 akimudohbe kit toh lhon’a agom’a case 740 alhing tan ahi. Hiche case thah 8 lah’a 5 hi kholjindoh na neilou, 2 hi returnee ho chuleh khat hi Imphal aum Ccpur District mi ahi.

District sung’a kholjindoh nanei lou case thah 5 kimudoh ho lah’a Chiengkonpang khomi pasal kum 24 aupa khat janni (Sept 10) Samaritan Hospital, Bijang a ki-vetsah ding’a achena’a Rapid Antigen Testing Kits mangcha’a Covid-19 test abol nao’a positive ahidan anahetdoh’u ahi. Hiche toh lhon’a Contact tracing ana kibol pai in tunin ama toh kitong kha insung miho jouse test abol nao’a numei 2 leh pasal 1 positive ahi dan anahetdoh uvin ahi. Chuleh Chiengkonpang Area apat nidan 24 sung’a local Transmission case 4 amudoh ahi.

Alangkhat’a tuni District Hospital a ki-vetsah ding’a che tehse kum 90 a upa khat Covid-19 vei ding’a ginmo na anei jeh uvin RAT testing abol nao in positive ahi dan anahetdoh utoh lhon’a agom’a kholjindoh nanei lou Covid +ve case 6 anamudoh uvin ahi.

xxxxxxxxxxxxx

Assam Rifle hon khamnathei Dk. Lakh 76 vel man ding mandoh

Tengnoupal, Sept. 11 (ET) : HQ IGAR (South) vetsui nanoi’a um Assam Rifle hon tunin khamnathei tamtah anamandoh uvin ahi. Hetthei khat chu Assam Rifle hon thuguh pole ho akon Indo-Myanmaar Border (IMB) chin’a khamnathei a kivei ho avah le jing uve ti thulhut amu dungjui uvin Moreh Battalion team khat in Haolenphai gamkai sung chele vah leh ginmo umho vetchilna anei phatsung uvin Security Force hon ginmo jeh’a mi khat kholchilna nei ding’a akham uvin ahin amapa chu jamdoh ding anago in ahin sepai hon anajamdohsah man pouvin ahi.

Hiche toh lhon’a ama chu kholchilna aneinao’a ama akon in Bronw sugar 380 Gms a sum a sei ding in Dk. Lakh 76 anamudoh uvin ahi. Chuleh mat’a um pa hi Moreh hopsung E M Lhangoi akon (L) Mangkhothang Mate chapa Saimanthang Mate ahi. Ama akon thudoh aneibe anao’a Saimanthang chun hiche thil ho hi Burmese National hon Moreh sung lhut ding’a eipeh’u ahi ati. Akimatdoh khamnathei jouse Narcotics Control Bureau (NCB) Team khut’a daan toh kitoh’a kholchilna nei ding in anapedoh tauvin ahi.

Xxxxxxxxxxxxx

Mizoram a Covid +ve case thah nidan 24 sung’a 20 kimudoh; agom’a case 1,353 lhingta

Aizawl, Sept. 11: Mizoram a Covid +ve case thah nidan 24 sung in naosen 2 ( six & 10 month) panna in mi 20 akimudohbe toh lhon’a agom’a case 1,353 alhing tan ahi. Hiche case 20 lah’a 16 hi Aizawl District akon, 3 hi Kolasib District akon chuleh khat hi Lunglei District akon ahi. Chuleh tule leh tun gamsung’a active case 603 aum nalai in hiche naban’a Covid akon damdoh mi 750 alhing tan ahi. Health Department akon thulhut kimu dungjui in Mizoram a recovery rate 55.44% ahi akiti.

Hiche toh lhon’a janni chan’a Mizoram gamsung’a sample 46,638 test kibol nalah’a 2.91% hi Covid +ve ahi. Chuleh Mizoram a ding’a Aizawl District a case 887 aum toh lhon in case tampen District ahi.

xxxxxxxxxxx

KSO Churachandpur in simlai ho het ding’a thuso nei

Ccpur, Sept 11(ET): KSO Churachandpur, Information & Publicity Department in tunin district sunga mipiho, adeh a khangdong simlai chapang ho het ding in thuso abol in ahi.

KSO Churachandpur in thuso abolna a, khangdong simlai chapang konkhat in exercise lahdi paome in jingkah matah tah in athou ji un, chonchan kilom lou tah tah jon-thanghuoina, khamthei, kinah-kibao leh thil ijakai dei umlou tah tah abol jiuve ti thulhut kimoh lhon a, hetdoh ahi jeh in KSO Churachandpur in phamo akisalheh e, ati. Hitobang umchan kilomlou hohi KSO Churachandpur in hatah in akigel khoh in, mimal ahiloule loitum koitobang abol a um a ahile KSO Churachandpur in achung uva na kitong ding ahin; chuto kilhon in khangdong simlai chapang koima jingkah pung 4:00 AM masang a kholai pot talouding in hetsahna anei in ahi. Hichetoh kilhon in mipiho’ kithopina le panpina jong KSO in angeh in ahi.

KSO Churachandpur Information & Publicity Department’ thuso in aseibe na a maban a umchan khanchan kilom lou bol hetdoh leh matdon a um leh KSO Office a hetsah din ngehna jong anei in, ahetsah ho hi’na (identity) selguh hiding ahi, ati.

Xxxxxxxxxxxx

KSO Henglep executive expansion kibol

Imphal, Sept 11(ET): KSO Henglep Block a Kum 2020-23 sunga lamkai ding kilhenna achesa September 4, 2020 a Henglep Sub-Division, Tuilaphai kho a KSO Churachandpur panlah na in Election ana chelha in ahi. Hiche kin achun election a port-folio poimo dehset 7 lhendohna ana um jou in tuni nilhah lang chun Kangvai Sub-Division, Phuoljang kho a member kehlet (expansion) na kin ana um kit in ahi.

Akilhengdoh lamkai thah ho chu; President (Elected) : John Thanglal Haokip, Vice-President (Administration/Elected) : Lunkhosei Haokip, Vice-President (External/Nominated): Doulalson Chongloi, Vice-President (Relief and Rehabilitation /Nominated): Kaikhokam Haokip, Vice-President (Home): T. Demkholal Haokip, General Secretary (Elected) : Thangchinkhup Haokip, Joint Secretary (Nominated) : Jacob, Finance Secretary: Henminlal Haokip, Jt. Finance Secretary                : Kamkholun Khongsai, Treasurer : Zopui Vaiphei, Information Secretary : S. Sonminlal, Asst. Information Secretary: Jangkhohao Haokip, Education (Secretary( : Thangminhao Haokip, Asst. Education Secretaries : Sarah Kimneo Simte, M.Lamsangkim Zou, Letkhotinthang Haokip, Games & Sports Secretary : Shonthang Khongsai, Asst. Secretary : L.Khaiminlen Lhungdim, Relief and Rehabilitation Department: Secretary : Lunkholam Haokip, Asst. Secretaries: Lamsiemlen Chongloi, Nemsangkim, Nehlun, Social and Culture Secretary : Sonminlen, Asst. Secretaries: Paominlen, Hatneithem, Environment Secretary: N.Thuomlal Gangte, Asst. Secretary : Ginlenthang Simte ahiuve.

Akilhengdoh lamkai ho ding in Pastor George Jamkhokai in Pathen heng’a vangthumpehna taona ana nei peh in ahi.

Xxxxxx

Higher Secondary Improvement exam

Imphal, Sept 11(ET): Covid-19 toh kisai a Higher secondary improvement exam akibol thei tah louding toh lhon in Council of higher secondary Education, Manipur in examination committee hotoh kihou na ana nei utoh lhon in exam form fill up ana bol ho ahiding dungjui a result pehdoh na kinei ding ahitai tin phondohna nei uvin ahi.

Xxxxxxx

China in Arunachal mi 5 kiholmo ho tuni alhadoh ding ahi : Kiren Rijiju

Itanagar, Sept 11: Arunachal Pradesh khangdong mi 5 gamgi a tulha bul langa ana vahmanga Chinese toupha na gamsunga gavahlut ho chu Saturday nikho leh China in India khut a pehdohna anei ding ahi tin union sports minister Kiren Rijiju in aphongdoh in ahi.

Hiche thu hi Chinese PLA in Indian Army ho henga avahmang Arunachal Pradesh khangdong mi 5 ho pehdohna aneidiu, pehdohna kin hi nisim 12 September, 2020 mun kilom khat a pehdohna kin chu um ding ahi tin Arunachal Pradesh a kon a BJP palai Rijiju in Tweeter mangcha in tunilhah lam chun ana phongdoh in ahi.

Hiche khangdong mi 5 ho hi Arunachal Pradesh a kon a Taigin tribe ho ahiuvin, ana ho hi Indian Army ho von po le a pang ahiuvin, achesa September lha nisim 2 nikho a chu India toupha na McMohan line, Arunachal Pradesh leh China toupha na Tibet Autonomous region(TAR) a um Sera-7 vel a gam mang  ana hiuvin ahi. Holmo a aum utoh kilhon in holmo a um mikhat chu a sopi pan social media mangcha in PLA hon amat dan un ana sodoh in ahi. Hima bang chun Arunachal Pradesh a kon BJP Tapir Gao leh Pasighat Ninong Ering akon a Congress MLA khat in tweeter mangcha in PLA hon amat hi in ana tahdoh lhon in ahi.

India Army ho thuso khaotoh asodoh utoh kilhon in, Tuesday ni chu China’s People’s Liberation Army hon damsel a amaho koma um ahi dan u ana phongdoh uvin ahi. Hiche khangdong ho hi gamsa ahol nauva vanmang kha uva, gamgi ana paltan khah ahi. PLA ho a kon thulhut kimu dungjuiyin damsel in aum uvin ahi chuleh pehdoh na kin kilomtah um ding a kigon na umjing ahitai tinjong Lt Col Harsh Wardhan Pande, PRO (Defence), Tezpur, Assam, in Tuesday ni chun aseiyin ahi.

Hiche vahmang leh aki holmo khangdong ho hi PLA in apuimanga amat ahi tia ngohna kibol hin gam teni kikah a sousang na ana lhut man in ahi.

Monday nikho chun Chinese foreign ministry spokesperson Zhao Lijian chun China in Arunachal Pradesh kiti akihekha pon Chenese toupha na gam leh China south Tibet region ahi bouve, Indian Army in PLA thuthot aneina a Indian mi kiholmo ho lhadoh na ding thu kimu a hin

phondoh thei ding thuchen akinei naipoi ana ti in ahi.

Xxxxxxxxxx

Covid-19 Symptoms neiya RAT test a negative jouse RT-PCR a test thah bol dinga Centre in State le UT ho hetsah

New Delhi, Sept 11: Union Health Ministry and Indian Council of Medical Research (ICMR) in tunia thuso abolna a state lendomho konkhat in Rapid Antigen Tests (RAT) akon symtomatic negative case ho test akiboljou phat le RT-PCT test abol loujeh un, state le Union Territories chom chom hon aloutheilou a RAT a symtomatic negative case ho RT-PCR test avelbol kitdiuvin ahetsah in ahi.

ICMR le Union Health Ministry dan (guidelines) dungjui in koitobang khosih, khut (cough) ahiloule hai hahsatna neiho le RAT a Asymptomatic negative cases hon nini-nithum sung a symtoms anei ule RT-PCR test avelbolding ahi, ati. Hitoh kilhon in Union Health Ministry le ICMR in state le UT jouse koma aloutheilou a RAT a symtomatic negative case ho RT-PCR test thah boldin thupeh abolin ahi.

State le UT hon akintheilam a hiche natoh vesuiding designated officers ahiloule team aphudoh a, niseh a Rapid Antigen Tests (RAT) kibolho aphatcha a avela test akibolthei nading uva panla dingin ahetsah in ahi.

Union Health Ministry in aseibe na a, state le UT hon positive case koima test kibolloujeh a matdoh loua aumlouding, RT-PCR test a positive umle umlou niseh a phatah a avetsui uva asuijui diuvin jong ahetsah in ahi.

Xxxxxx

NEC Secretariat, Shillong a tohmun ong um

Imphal, Sept, 11: North Eastern Council Secretariat, Shillong in tohmun ong phabep anei atahlah ho chu Draftsman Grade-l  (post 1)  leh Stenographer Grade-ll (post 17) deputation basis a ding in akou e. Lunglutna neihon Application Cadre Authorities ahilou leh Head of Department Deputy Secretary (Admin) NEC koma ni 60 sung a pehlut ding ahi.

XXXXXX

AR in state sunga thingnou tuna nei jing

Imphal, Sept 11: Ministry of Home Affairs in thingnou tuna nei jing dinga hetsah na ana nei utoh lhon in Assam Rifles in thingnou tuna natoh ana nei jing uvin ahi. Hetthei khat chu tu chung a thingou tuna hi Assam Rifle sin ni 4 sung a bolding a tohgon anei u ahi.

Hiche thingou tuna kingon ahi mipi ho anga thingphung phatchom dan thu sei ding in jong hetsah na ana kinei in ahi. Tu chung a thingou tuna hi Imphal sung mun phabep le Churachandpur un phabep sung a kibol ahi akiti. Manturpukhri Battalion in jong Mantripukhri Garrison, Sawombung, Koirengei le Yaingangpokpi Company Operating Base ho a thingnou tuna ana nei uvin chuleh Keithelmanbi Battalion in jong Andro le Lilong Company Operating Base teni a thingnou tuna ana nei uvin ahi.

Thoubal Battalion  le Noney Battalion in jong battalion hopsung muntin a thingnou tuna ananei uvin ahi. Churachandpur Battalion in jong Sangaikot, Tuitum, Khongkhai, Hengkot , P Sajol le Churachandpur khopi sung dung a thingnou tuna ana nei uvin ahi. Hiche thingnou tuna a sepai pan la jat hi 1200 lam ahi akiti.