Manipur a travel history neilou mi 12 panna a Covid-19 case thah...

Manipur a travel history neilou mi 12 panna a Covid-19 case thah 55 kimudoh be

40
0
SHARE

Manipur a travel history neilou mi 12 panna a Covid-19 case thah 55 kimudoh be

Imphal, July 23(ET): Tuni a Manipur a Covid-19 case thah 55 akimudoh be toh lhon in tuhin hiche natna veikha mi 2,115 aphatan ahi. Tuni a kimudoh lah achun Thoubal akon travel history neilou mi 12 jong ajaove tin Dr. K. Sasheekumar Mangang, additional health director chun aseiyin ahi. Tuhin Manipur a active case 655 aum in chule midang 1460 ho adamdoh tauvin ahi. Kangpokpi district sung a Leimakhong Garrison a umho security personnel 12 ho jong positive akimudoh be toh lhon in tuhin CRPF personnel mi 63 hon hiche natna hi avei tauvin ahi. Tuni a kimudoh ho chu Thoubal akon mi 31, Leimakhong Garrison akon mi 12, Imphal west akon mi 6, Kakching akon mi 3, Kamjong, Tengnoupal leh Ukhrul akon mi 1 cheh ahiuve.

Mi konkhat ho chu travel history neilou beh jong ajao jeh uvin containment zone leh contact tracing jong health worker hon apan pai uvin ahi. Alangkhat ah tuni chun mi 42 ho chu adamdoh tah jeh uvin lhadoh ahi tauvin amauho chu Covid-19 care centre, Meitram kon mi 27, Senapati akon mi 3, Kakching a mi 3, RD Wing Lamphel akon mi 6, Thoubal akon mi 3 ahiuvin chule recovery rate jong 69.03 % aphatan ahi.

Lamkai ho akinel boi jing sang uva Covid leh khantou machalna ding angaito joh diuva ATSUM in sei

Imphal, July 23(ET): India government leh Manipur government noiya department leh ministry chom chom noiya khantou machalna natoh chelha ho Hill district jouse a inspection kibol ding ahi, tin ATSUM in aseiyin chule inspection akibol sunga nahsahna neilou ahilouleh ading banga na kitong lou ho akimudoh a ahileh lunghanna ato diu ahi, tin gihna jong anei uvin ahi.

Natoh kibol hohi kipan loulai ahilouleh akichai ahijong leh quality hoilou tah a kibol ahi ti mipi ho a kon hehna tamtah akimu jeh a adihlou bol a contractor, work agency ahilouleh koi tobang themmona neiho kholdoh a sosal dinga thulhuhna um ahi. Politician ahilouleh thingnoi toh kikhutjop na nei jeh a koima kilha ong chomlou ding, mipi ding kalval a athupi umlou ahi, tin ATSUM thuso chun aseiyin ahi.

Seiboi Haokip, General Secretary, ATSUM in soi akaina thuso a chun, kiloikhomna in Hill district a khantou machal nadinga natoh chelha jouse avet jing ahi in, contractor ahilouleh work agency hon amaho lolhin louna ho thingnoimi ho kilepna a anei uva, anatoh hoilouvu kiselna aneiyu alungdon nau thu asei uvin ahi. Sum deman kibolna, natong ho kikaimang na, leh kikumna thilsoh phabep aumin, hiche hin natoh achelhah ding banga achelhah sah theilou ahi. Hijong leh hiche hi na kitohlou kilepna a manlou ding ahi, ati.

Mipi phatchomna ding natoh ahijeh a sum demand chule natong ho angaicha louva suhboi louding ahi. Sorkar thalheng a monitoring agency ho lhinlel na jong kimu ahi. Contractor ho natoh sah sanga sumguh neh ding jong a kipe u ahi. Line officer ahilouleh department officer in amun a natong chelha ho vetlhahna neilou, quality kholtohna neilouva work completion certificate apeh u ahi. Commissioner, principal secretary, director, chief engineer, DC, ZEO, SDO, SO, principal, headmaster a kon field officer chan ‘contract work mania’ um a, ama kinaipi/insungmi ahilouleh percentage amu nathei hou bou contract work peh ding agot u ahi, ati.

Hiche chena lhongpi hi ngah a, gamdang toh kibanga khantou ding ahi. Nehguh bol official leh adang dang ho sosal ngai ahi. Sorkar vaipo sunga kinel baotamna leh boina aum jinga ahileh chamna leh lungmonna chule khantouna umlou ding ahi. 2019 kum kipat til a kon hitobang ho jeh a phat mantam tamtah manga hi in, hiche hin milham ho atohkhah ahi, tin asei uvin ahi.

Hill area mun tamtah hi munchim, kijapna thei a len lamlen kotong umho jeh a gam dang dang toh kijonto theilouva um a, loubol mihon har lahna a hahsatna ato a, angaicha khoh ho lhasam a, khantou machalna ding natoh chelha theilou chule achungchon a COVID 19 in hahsatna tamtah apohlut ahi in, ahivanga politician hohi chang ding gelna a kisalel uva, khohsahna anei louvu hi kidang tah ahi, ati.

Achesa lha phabep sung themjilna mun ho kikhah a, simlai ho inmun a um a, hospital a Covid natna nei tam cheh cheh a, positive case kal sang cheh cheh a, gamsung mipi ho kel thoh ding dinmun a aum laiya jong politician ho sum thu a kinel baotam nalai ahi. Thunei vaipo ding kichu jeh a jachat umtah thilsoh mipi hon amu ahi in, politician ho ministerial berth kichu uva, mipi hon jumna ato ahi.

Covid jeh a Manipur gam in hahsatna sangtah ato ahi in, akilhengdoh MLA hon amaho kah a lunggel kibah louna ho hahsa lheh jong leh aseilhah uva, mipi gentheina sangtah suhlhap nadinga pan alah diu ahi, tin ATSUM thuso chun aseibe in ahi.

PM Modi in Manipur Water Supply Project ‘foundation stone’ hondohna nei; 2024 kum kah a inson a don ding twi kipe ding ahi, tia CM in sei

Imphal, July 23(ET): Prime Minister Narendra Modi in Thursday nikhon video conference a kon Manipur Water Supply Project foundation stone hondohna aneiyin ahi.

Prime Minister in ahoulimna a, dangka crore 3050 lhing Manipur Water Supply Project hin gamsung a twi hahsatna jeh a boina asuhnem ding chule adeh a gamsung numei ho dinga olna lentah hiding ahi, ati. Greater Imphal tilouva project hi town neo neo 25 chule khosung 1700 in jong aphatchompi ding ahi, tin aseiyin ahi.

Manipur gam a vaicha genthei mihem lakh 25 vel in Pradhan Mantri Garib Kalyan Anna Yojana (PMGKAY) noiya anchang man beiya amu ahitai, tin Prime Minister in aseiyin chule numei lakh 1.5 val jong Ujjwala scheme noiya anhon na gas man beiya kipe ahi, ati. Lockdown sunga state sorkar in angaicha kigotna ho aneiya chule gamsung mi gamdang a kon ahung kile nading uva kigotna aneijeh uvin apachatna thu aseiyin ahi.

Chief Minister N Biren Singh in liemna thu aseina a, hiche project aum toh kilhon a don ding twitheng hi 2024 kum kah a Manipur gamsung a inson in amu ding ahi, ati. New Development Bank (NDB) in project a dinga dangka crore 3054 fund abol hi India sorkar in Manipur a dinga sanction abol ‘compact project (single) masapen ahi, ati.

Prime Minister Narendra Modi lamkaina leh puihouina noiya achesa kum thum sunga Manipur gam a mutheiya kikhelna um ahi, tin CM in aseiyin chule bandh leh blockade anaum jing hohi masang thu hi ahitai, ati. Mipi tosotna leh kithuto na jal a Manipur gam a tu sorkar vaipohna noiya lungmonna um ahi in, chule gamsung miho phatchomna dinga welfare scheme chom chom tamtah jong kichepi ahi, ati. Prime Minister in phatthei aboh jeh a sorkar in gamsunga um district jouse a Nute Kailhang asah thei ahi, tin CM in aseibe in ahi.

Hetthei khat chu India sorkar in ‘Har Ghar Jal’ thupi noiya 2024 kum kah a phaicham a um inson jouse a don ding twi theng akilhun lut theina dinga Jal Jeevan Mission ana pat doh ahi.

Kin goun a Governor, Dr. Najma Heptulla, Union Minister (Jal Shakti) Gajendra Singh Sekhawat, Minister of State, Ministry of Development of North Eastern Region (DoNER) Dr. Jitendra Singh, Deputy Chief Minister, Cabinet Minister holeh MLA ho, Chief Secretary chule official luboh dang dang jong apang uvin ahi.

 

KNPO in PM Modi henga memorandum pelut; RN Ravi chunga alunglhai lounau thu seiyu

Imphal, Jul 23(UNA): Khurmi Naga Peoples’ Organization (KNPO) in Prime Minister Narendra Modi henga memorandum apeh na a RN Ravi henga Indo-Naga Political Issue toh kisaiya alunglhai louna thu aseiyin ahi.

KNPO president Paulhring Langphu, general secretary Huten Alexander, NSUC president David Langphu chule general secretary Tepamran Maku in soi akai nau memorandum a Prime Minister office in apet pet a action angaicha alah dinga hatah a asei uvin ahi.

Indo-Naga thu hi Political thu ahi in, Interlocutor hi Statesman hina hiche thu hi aganna thei pen a athu asuhlhap ding ahi, tin asei uvin ahi. Final Solution soi kaina umlou lai ahi in, Naga Political Issue a Ravi in akikumna a kitimna anei ding ajeh chu kihouna hi Prime Ministerial Level ahi in, Prime Minister in mopohna akilah a, NSCN-IM lamkai hotoh toukhom uva, thulhuhna anei uva, athu aseikhom diu ahi, ati.

Indo-Naga boina hi thisan leh mitlhi twi ahin thoh a, achesa August nisim 1, 1997 kum a India sorkar leh Naga sorkar in hemkham kinoptona soi kai ahi. Aumtalou Atal Bihari Vajpayee Prime Minister hina noiya NDA sorkar masa in Naga thu hi hetpehna ananei masat pen a, July nisim 10, 2002 kum a Naga ho dinmun chule thusim chombeh ahina hetpehna um a, Political talk a pang dinga Naga lamkai ho kouna anaum ahi, tin KNPO thuso chun aseiyin ahi.

India sorkar leh Naga Nationalist Organization hon avel vel a kihouna anei jouva achesa August 3, 2015 ni a ‘Framework Agreement’ soi kaina um ahi tihi Naga hon atahsan ahi, ati. Ahivanga, lungdon umtah chu Indian Interlocutor RN Ravi in Naga lamkai hotoh hiche thu suhlhap nadinga apan ding dol a pan la louva, political talk hi October 31, 2019 kum a khumkha ahitai, tia asei ahi.

Ama lungthim phatlou selna dinga Ravi in NSCN lamkai ho joh themmo achan pan ahi, ati. Tu naicha Ravi in ki oi tah a Naga Nationalist Organization hohi thal choi gang ahiuve, tia ngohna anei ahi in, hiche organization ho ma ma hitoh India in Prime Ministerial Level a kihouna asem ahi, ati.

Indo-Naga thu hi ‘law and order’ boina mai maiya suhnem dinga Ravi in agot ahi, tin aseibe uvin ahi. Achesa June nisim 16 nikho a Nagaland Chief Minister Nephiu Rio henga lekhathot apehna a, interlocutor hina a apilhin louna thu avetsah soh ahi in, athusei hin Nagaland boina thu suhlhap sanga Nagaland gam a thu neo cha cha niseh thu ho a joh lunglutna anei ahi, tin aseibe uvin ahi.

Sorkar in July 31 chan juiding guidelines phondohna nei

Imphal, July 23(ET): Dr. J. Suresh Babu, Chief Secretary in Chairman, State Executive Committee Government of Manipur hina a Manipur pumpi a July nisim 31 chan ahilouleh athah a order akisodoh kit kah a dinga juiding Lockdown guidelines phondohna aneiyin ahi.

Manipur gam pam a kholjin khalou mi phabep Covid 19 positive ahi kihedoh ahi in, Covid 19 natna achal jing jeh a State Cabinet in July nisim 22 nikho a Covid toh kisai dinmun velvetna anei uva chule Thursday nikho a kon gamsung pumpi a lockdown chepi dinga thulhuhna anei ahi.

Disaster Management Act, 2005 Section 20(2)(a) noiya thaneina kipe dungjuiya Dr J Suresh Babu in tulha nisim 23 a kon nisim 30 chan gamsung pumpi a lockdown chepi dinga thuso aneiyin, Deputy Commissioner in ama ama district a curfew order aso ding ahi. High Court in Central government leh state sorkar in order leh guidelines asodoh dungjuiya ama order leh guidelines asodoh ding ahi. Chule Annexure a phalna kipe tilou adang se hi curfew leh lockdown sunga kikhah ding ahi, ati.

July nisim 23 a kon July nisim 30 sunga hi angaicha khoh ho supply bol ding kiphal ding ahi in, hiche a hi niseh ngaichat thil ho home delivery bol ding, bongnoi chule bongnoi thil ho kilah, kihop leh kijoh, niseh a kimang thil, thei, bongnoi kijohna, sa leh nga kijohna dukan hojong district jouse a Sunday nikho tilou nikho dang jingkah nidan 6 a kon nidan 10 chan akihon ding kiphal ding, hijong leh gari lhai kikhah ding ahi.

Thil po gari ho kiphal ding ahi. Thil po gari hon Mao, Jiribam leh Jessami a interstate border agalkai diu kiphal ding, driver ni leh helper khat panna a truck chule thil kipohna gari ho kiphal ding, highway pam a truck semna leh cha don na ho kihong ding ahivanga, social distancing ajui diu ahi.

Dammo toh kisai hojong kikhah louding ahi. Hospital, nursing home, clinic leh dispensary ho kihong ding, chemist, pharmacy chule Jan Aushadhi Kendras leh Medical equipment shop ho panna a lou kijohna mun jouse kihong ding ahi. Medical laboratory leh collection centre, veterinary hospital, pathological laboratory toh kisai dispensary, clinic ho chule vaccine kijohna leh supply kibol na ho kikhah louding ahi.

Postal service, LPG gase home delivery bol ding, telecommunication leh internet service, twi, sanitation, power supply leh waste management sector ho kikhah louding chule petrol pump hi CAF & PD Department in ana sodoh banga essential service ho a dinga bou kihong ding ahi.

Phailei bol na toh kisai natoh hojong kiphal ding ahi. Fishery thu a nga vahna farm chule fish feed plant ho kihong ding, Animal Husbandry a ahcha, vatot kivahna ho, vohcho vahna chule bongnoi kisemna ho, gancha an kisemna ho kikhah louding ahi.

Finance Sector jong kihong ding ahi in, Reserve Bank of India leh RBI, bank branch leh ATM chule business correspondent ho chejom ding ahi. Social sector a, chapang, tibukimlou, lungthim bulhinglou, tehse, meithai ho umna mun (home) kihong ding, Juvenile Home leh care home ho jong kikhah louding ahi. Anganwadi centre kihong jom ding hijong leh neh leh chah hopding ho beneficiary ho inmun chan a thah peh ding ahi.

Print leh electronic media, courier service, private security services, food processing unit, bottled water manufacturing and distribution hojong lockdown sunga kiphal ding ahi. MSME in thinglhang gamkaiya atoh ho panna a lamlen leh railway project a natohna chelha ho, water supply scheme a construction leh maintenance, municipal corporation leh municipality hopsunga construction project ho achelha jom ding kiphal ding, hijong leh natong hohi gam pam a kon pui ngailou ding ahi.

Medical leh veterinary care ngaicha ho panna a emergency a lhai private gari ho chule natohna mun jon ding sorkar natong (exempt kibol) ho private gari alhai ding kiphal ding ahi. Central leh state government office (essential service a dinga kisaboi) ho kihong ding, Under Secretary rank officer leh Secretariat chunglang rank ho office che diu chule Administrative Secretary/HoD in aseilhah banga staff 10 percent, Treasury a angaicha jat staff ho office che diu, chule Central government office jouse jong India sorkar in guidelines asodoh banga kipo jing ding ahi, tin order chun aseibe in ahi.

 

Kangpokpi district a July 30 chan ‘lockdown’ khoutah a kichepi ding

Kangpokpi, Jul 23(UNA): Kangpokpi District a COVID 19 pandemic dinmun aboi hi phatah a akivet kol louva ahileh mihem hinkho, tahsa damtheina chule mipi hinkho tongkha thei ahi, tin District Magistrate/DC Kangpokpi in aseiyin chule tua kon July nisim 30 nikho chan Kangpokpi district pumpi a lockdown chepi dinga phondohna aneiyin ahi.

Somorjit Salam, IAS, District Magistrate, Kangpokpi in Section 144, Cr.P.C 1973 noiya thaneina akipeh na banga tua kon district pumpi a Home Department in phalna apeh ho tilou adang koima ama ama inmun a kon achedoh louding chule gari lhai ding aphal tahlou ahi. Koitobang dan kipe palkeh a aumleh dan dungjuiya gotna peh dinga aseiyin ahi.

Order kisodoh hin ‘law and order’ vekol chule ‘essential service’ a pang government agency ho ahop tha lou ahi, ati. Home Department, Manipur government in Thursday nikho a asodoh Lockdown sunga chepi ding guidelines chule akiphal leh akiphal lou ho thu jong District Magistrate/DC Kangpokpi, Somorjit Salam, IAS in achom a atahlang na a order asodoh in ahi.

July nisim 23 nikho chan a Kangpokpi a Covid 19 positive case 257 um ahitan, hiche lah a mi 1010 kijen dam a chule active case 156 um ahi. Sample agom a 4837 test bol dinga athot doh u ahitai. District sunga July nisim 23 nikho chan a Home Quarantine a mi 471 um a, Institutional Quarantine Centre a mi 186 chule mi 7 hi Community Quarantine Centre a um ahi.

Manipur Police Department noiya Constable 537 Head Constable a kaisang

Imphal, July 23(ET): Manipur Police Department noiya Director General of Police in thuso abolna achun achesa 9/12/2019 leh 10/12/2019 nikho a Class-III DPC abol utoh lhon in tuni chun Constable 537 hochu Head Constable ding in promote abol tauvin ahi. Promotion mulah a eimi jao hochu Nehkam Vaiphei, Letkhothong Haokip, Ngamkholen Haokip, Helkholam Vaiphei, Hemhoulen Haokip, T.Soithang, Jangkhohao Haokip, L.H.Shotinthang Khongsai, Thanghankhup Guite, Jangkhogin Lhungdim, Lamboi Kipgen, Paolenlal Kipgen, Mangsuankap, Tongmanq Haokip, Songlianmang, Lengoulal Khongsai, Thangjahlun Haokip, SL.Letneipao Vaiphei, Th James Khongsai, Kamtinlal Kipgen, Lamgoulien, Lhunkholen Haokip, M Dongkhanlun, Paogoulun Singsit, Seiminlen Kipgen, Seiminthang Guite, T.Paominsei Haokip, Thangtinkai Khongsai, P.Kamtinlien Gangte, TD.Thangsuanmang, Ph.Lamthanga Vaiphei, Seiminlun Kipgen, L Khenthanq Ngaihte, P.Lienminlun Gangte, Paotinlal Sitlhou, Seimingou Chongloi, T.Khaiminthang Zou, H Dalkhansiam, Haokholal Lhungdim, Lamtinmang Guite, Lenminthang Tuboi, Lianthansang Guite, Seiboy Kuki, Seiminlal Haokip, Jangkhogin Zou, Seigoumang Lhouvum, Seiminthang Singsit, H.Liankhanthang, Thangkhanmang, Jangkhohao Chongloi, Jangkhohao Haokip, Kamsanglal Doungel, Kamthianmang, Kh Thangjaneh Vaiphei, L.Richard Haokip, L.Thangkhanlian Nqaihte, Lamkhomang Haokip, Letminlun Vaiphei, M.Ngamkhomanq Haokip, M.Paokholal Haokip, N Mamang Baite, Nqamkhogin Khongsai, Ngamkhojang Haokip, Paokholai Haokip, Paominthang Haokip, Pv.Thangboi, S.Soilien Gangte, Seikholal Haokip, Seikholen Touthang, Seiminlun, Siamlalpaul, Th.Lalbawi Vaiphei, Thangminlen Haokip, Thangminlun Kipgen,Thangsat, Thangtinlen Haokip, LH.Chungkhokai Khongsai, Seikhogin Kipgen, T Mimin Vaiphei, Thangminlen Khongsai, T. Khaijamang, Lamminlal ho ahiuve.

Moreh khopi sung ajong ni 7 curfew/lockdown kichepi panta

Moreh, July 23: Janhi a Manipur state cabinet in ni 7 sung covid-19 douna ding a Manipur pumpi sung a lockdown aphonbe toh lhon in Indo-Myanmar border town Moreh khopi sung ajong tuni nilhah nidan 2 apat chun achelha pantan ahi. Lockdown kipat masang chun a milip nehding leh thil them them choding in abuoi lheh jeng uvin ahi. Moreh khopi sung achun Post office, Bank leh ATM booth ho jong akikah soh kei in lou kijohna ho bou akihong muding aum in ahi. SP Tengnoupal Th Vikramjit le Addl. SP Sangboi Gangte makaina noiyin Moreh police hon pan nasatah in ala uvin curfew/lockdown ahiding bangtah in achelhah sah uvin ahi.

Hetthei khat chu Moreh Hospital jong Covid Care Centre khat ding in July 22 nikho apat chun amang uvin hiche hospital a kimang manchah jouse chu Moreh Primary Health Centre a achonlut uvin ahi. Hiche Moreh CCC ahin Pallel akon staff nurse khat chu aki admit masapen in ama nu chu travel history jong anei ahi.

CCpur District a Dengue case masapen kimudoh

B.Lalboi Gangte

CCpur, July 23 (ET): Churachandpur  District a tu kum sung’a ding’a Dengue case masapen achesa July nisim 21 nikhon pasal khat kon in ana kimudoh in ahi. Chuleh amahi kum 20 a upa ahi in chuleh Chennai akon July nisim 17 nikho’a District sung hung lhung’a hapta khat tobang khosih jeh’a Thenmuol QC mun’a anaki umsah’a Covid-19 leh Dengue test akibol na’a Dengue positive ahi dan anahetdoh’u ahi. Hiche toh lhon’a District sung’a ding’a Dengue case masapen ahi naban’a maban’a Dengue bou hilouva Japanese Encephalitis leh sahit akipat pengdoh natna Scrub Typhus jong hung umbe thei ding in akilang in akiti. Hetthei khat chu tuni chan’a Dengue natna akon kijen dam thei na lou aum lou lai jeh in Dengue natna akon kivendoh nading’a Fridge nung’a twi kikhol theina mun ho’a twi umsah lou dibg, twi kikhol khom theina um sahlou ding chuleh khut leh keng ki tom jing ding hi kivendoh nading’a thil poimo pen ahi.