Manipur a school jousen April – July lha sung school fee alah...

Manipur a school jousen April – July lha sung school fee alah lou diu Jilkung ho lhalo apeh diuva sorkar in thupeh nei

144
0
SHARE

Manipur a school jousen April – July lha sung school fee alah lou diu Jilkung ho lhalo apeh diuva sorkar in thupeh nei

Imphal, June 22(ET): Department of Education (Schools), Manipur government in gamsunga um private school le aided school jousen April le July lha sunga simlai ho tuition fees alah lou diuvin order asodoh tauvin ahi.

“Akisei lha sung ho a dinga school in fees ana lah tah a ahile aban a alah nadiu lha hotoh asuhto diu ahi”, tin T Ranjit, Commissioner, Education (S) in soi akaina order chun aseiyin ahi. Chule School in tu academic session a admission fee alah nauva admission fee akalsah lou dinga jong thupeh le thuhilna aneibe in ahi.

Lhaseh a kila school fee ho, tuition fee hohi March lha chan gei fee kalsah louva alah diu ahi, ati. Hetthei khat chu sorkar in achesa March nisim 12 nikho a COVID 19 pandemic jeh a school jouse kha dinga order ana sodoh ahi.

Jilkung le staff ho lhalo chungchang a government in order asodoh na a, simlai 700 noilang umna school hon teacher le non-teaching staff ho lha lo hi 50% apeh diuvin temna anei uvin ahi. Chule simlai 700 chunglang umna school hon staff ho alhing a lo apeh diuva jong aseibe uvin ahi.

Education (S) Department in achesa May nisim 20 nikho a private school le school dang dang hon May nisim 30 kah a fees alah dan u detail apeh diuva circular ana sodoh ahi in, hiche donbutna a United Association of Recognised Schools of Manipur (UARSoM) in coronavirus pandemic jeh a tua boina dinmun aum akichai teng ahilouleh school mun a quarantine centre kihong ho akikha a, sanitized akibol jouteng le adeiyu information private school hon apeh thei dinga ngehna ananeiyu ahi.

Gamsunga um school 1,200 vel lah a school 800 val in aphat hi June 8 chan a dinga akivohchon vanga ‘detailed statement’ apehlut loulai ahi. Education Minister panna chule private school ho jaona a stakeholder chom chom in meeting avel vel a anei ahitan, mopohna nei school management hon order hi bulhing set a ajui diuvin temna aneibe uvin ahi.

“Koi tobang hiche thupeh jui louva school authority auma ahile athu hi department henga email- Manipur.education.s @gmail.com a detail chule proof toh apeh tha a hehna semthei ahi”, tin order chun aseibe in ahi. Hetthei khat chu, Education Minister Dr. Thokchom Radheshyam injong Monday ni a SSA Conference Hall, Babupara mun a press conference abolna a, Manipur gam a um private school 1000 val holah a atamjo hin achesa kum 30 sunga themjilna phatah a apeh uva, enrolment jong sangtah a um ahi, tia asei ahi. Covid 19 pandemic jeh a school kikha jeh a simlai, jilkung, nu le pa teho le guardian chule non-teaching staff ho lungkhamna aso ahetpeh na thu jong aseiyin ahi.

Simlai hon school fee apeh diuham, apeh loudiu ham; private school a teaching/non-teaching staff ho lha lo ho panna a thukhoh tah tah ho seikhom dinga Education (S) Department in circular asodoh a, hiche dungjuiya April lha a kon July lha chan tuition fee louding chule teaching/non-teaching staff ho lo peh dinga kisei ahi, ati.

Press conference a hi Commissioner, Education (S) T Ranjit Singh, Director, Education (S), Th. Kirankumar le official hojong pang ahi.

Pre-Nursery a kon Cl-V chan simlai ho ‘online assessment/examination’ bol loudinga thupeh um

T Ranjit, Commissioner, Education (S) in achom a order asodoh na a, Pre-Nursery a kon class 5 chan ‘online class’ kibol jong kha dinga aseiyin ahi.

Private school phabep in ama ama school a Pre-Nursery le Class V (5) simlai ho ‘online assessment/examination’ abol e, ti thu akija in ahi. Pandemic sunga online a themjilna ding thil hitobang akigon Education(S) in akipapi in, hijong le Pre-Nursery le Class V chan simlai ho dinga hitobang ‘online assessment/examination’ a kibol hi state sorkar in dih asa pon, chule tilkhou lou dinga pha asah ahi, tin order a asei uvin ahi. Hiche hi chapang ho, nu le pa chule guardian ho lunggimna ahi, ati.

Lockdown aum sungse ahilouleh order asodoh kit kahse a ‘online assessment/examination’ kibol na hi khangdong cha simlai ho ding gelna a ‘ban’ kibol ding ahi, tin Governor in thuso aneina a aseiyin chule koi tobang thupeh juilou aumle state sorkar in athu sangtah a alah ding ahi, tin thuso chun aseibe in ahi.

 

Manipur govt boina ni 3 sung’a  suhlhap hiding ahitai: Himanta Biswa Sarma

Imphal, June 22(ET): Manipur govt boina chung ahin akikhel ding le tijat na ding aumpom ahung lhungding ni 3 sunga suhlhap hiding ahitai tin Himanta Biswa Sarma, Convenor, North-East Democratic Alliance (NEDA) in hetsah na anei in ahi.

Manipur a BJP makai na coalition government  chu party akon MLA thum in haina lekha anase uva, Meghalaya CM Conrad Sangma National People’s Party (NPP) akon MLA 4,  Trinamool Congress (TMC) akon khat le Independent khat in govt atosot nao ana dalhah u ahitoh lhon a minority hung hikhau ahi. Hiche boina hi phaten vetsui na akinei in, MLA jouse toh kihou na akinei in, suh tup hivah ding ahitai tin Sarma chun Guwhatai a thuso miho toh akihou limna a ana sei in ahi.

Hetthei khat chu achesa 2017 kum a BJP in Manipur a govt asem masat pen na ding ahi Sarma in pan nasatah anal ah ahi. Achesa 2017 kum a state election a BJP in seat 21 bou a goljo na ana nei a Congress in seat 28 a goljo na ana nei ahin hinlah BJP in party dang toh kitho a govt ana sem ahi. BJP in govt chu NEDA member NPP, Naga People’s Front (NPF) chuleh TMC le Lok Janshakti Party (LJP) jaona a independent khat toh kitho a govt ana sem’u ahi.

Jani a NPP National president Sangma le Sarma in Imphal a party chom chom hotoh kihou na nei ding a hung kalsong hon ahin kihouna ho phaten achelha in, ahunglhungding ni 2 ni 3 ho a kikhel na hung umding angai ngai hiding ahitai tin Sarma in aseibe in ahunglhungding phat ho a Imphal vilna anei kit ding dan jong hetsah na anei in ahi.

Chief Minister N Biren Singh in apanmun adalhah a NPP MLA ho nungkou ding dan thu ana kisei na chung a Sarma in Chief Minister kikhel na ding lampi aumpoi tin hetsahna anei in ahi. Speaker Yumnam Khemchand Singh in MLA themkhat haina lekha ana san peh toh lhon a kikhel na phabep vang hung umding ahin hinlah NEDA le NDA lungput jui pum a govt semna kinei jing ding ahi tin Assam cabinet minister pa chun asei kitin ahi.

Hetthei khat chu tu le  tua hi Congress makai na a coalition thah kisem  Secular Progressive Front in MLA 26 anei u ahi. Manipur a MLA hi akikah lha MLA phabep aum toh lhon a 52 bou um ahitan ahi. BJP candidate Sanajaoba Leishemba in vote 28 mu a Rajya Sabha election goljona ana nei toh lhona govt huhdoh na ding lampi um ahi akiti.

Ram Madhav in Congress lamkai ho dan juilouva ngohna anei MPCC in suhthengna nei; BJP lamkai hon dan ajui diu atahsan louna thu sei

Imphal, Jun 22(UNA): Manipur Pradesh Congress Committee in tu naicha Ram Madhav in Manipur gam a hung Congress lamkai hon COVID 19 protocol ajui pouve, tia ngohna thu asei suhthengna anei uvin, BJP lamkai gamsunga hung hon protocol ajui diu tuchan a tahsanna aumlou thu asei uvin ahi.

Monday nikho a Congress Bhavan mun a pree meet abol nauva MPCC Vice President Dr Kh Ratankumar in thuso miho henga BJP in thuchen tahbeh he jong le jouthu a ahithei chan a mi chunga ngohna sem ding agot jing ahi, tin aseiyin ahi. MP Gaurav Gogoi le Ajay Maken in Covid 19 guideline ho juilouva Manipur gam alut e, tia BJP National General Secretary Ram Madhav in ama Twitter account a ngohna thu asei hi abul umlou jouthu ahi, tin Ratankumar in aseiyin ahi.

BJP hohin atahbeh a thilsoh toh kitoh louva chon louvu ahi in, amaho ‘Ram Rajya’ concept anei hi ‘Ravan Rajya’ a khel ding ahi, tin jong demna aneiyin ahi. Congress lamkai teni hi ahung lhun lhun a Imphal Hotel a ‘quarantined’ kibol pai ahi, tin Ratankumar in aseiyin chule Ram Madhav ngohna thu sei hohi thudih ahipoi, tin aseiyin, government official authority chom chom a kon phalna amu lhonna copy hojong aphotchenna dinga atahdoh in ahi.

BJP in thutah, thudih, dan le mol ho khohsahna neilou na atoh ahi, ati. Ratankumar in tu naicha gamsunga hung kholjin BJP lamkai ho aginmo na thu joh aseiyin, public interaction program chom chom a pang lamkai hohin SOP guideline ajui mong ding atahsan louna thu aseiyin ahi. BJP lamkaina sorkar in amaho miho dinga dan chombeh anei ademna thu aseiyin, Congress party chule adang ho dinga dan chom akoiyu ahi, ati.

MPCC Vice President Ratankumar in Congress party thalheng a gamsung a hung BJP lamkai ho thu jong authority hon akhol dinga thumna aneiyin ahi. Amaho hin gamsunga Covid 19 nat douna dinga kikoi guidelines le dan dang dang ho ajuiyu hinam, ti khol dinga thumna anei uvin ahi.

 

CSO 6 in 2001 census dungjuiya Delimitation exercise bol ding douna a High Court a PIL sem

Imphal, June 22(ET): Gamsunga um civil body kiloikhomna gup in 2001 census dungjuiya Delimitation Commission in Delimitation process apat douna a Manipur High Court a Public Interest Litigation asem uvin ahi.

Civil body chom chom 5 in thakhat a thuso aneina a, achesa 2007 kum a Gauhati High Court in PIL No 16/2005 noiya January 19, 2007 kum a Status quo order aso ahi. Hiche laiya Manipur State Cabinet in Agenda No 16: Delimitation issues (September 2005) a kilolna ananei ahi. Manipur gam mi hon delimitation hi 2021 census data dungjuiya bol ding chule electronic satellite image/geo-tagging le Aadhaar link-up bol ding adei ahi, ati.

2001 le 2011 Census Data masa a hi growth rate ajat ni a akal ni kisang lou chule gender population le non ST jong 1991 a banga Mao Maram, Paomata, Purul, Saitu Gamphazol, Chakpikarong, Machi, Chandel HQ, Kasom Khullen le Moreh a kisei lou ahi, tin thuso a asei uvin ahi. Delimitation Act, 2002 noiya, 2008 kum a Delimitation Commission of India in Manipur gam a akisei sub division ho a population ajat ni a akal ahet a delimitation process angah ahi, tin jong asei uvin ahi.

Manipu Legislative Assembly in May 26, 2020 ni a Delimitation Commission a associate member ding nominate abol jouva civil society kiloikhomna nga- PANDM, IPSA, ACOAMLUP, IPAK le KSA in Manipur High Court a adouna a PIL apehlut a chule court order kisodoh masa kipalkehna ahi, tia court in asan dinga jong ngehna aneiyu ahi.

Civil body 6 in asei nauva, gamsung in Delimitation adoudal ahipon, ahivanga 2001 census dungjuiya delimitation bol ding hi adeilou ahi, ajeh chu mun phabep a population sangtah a akalna um ahi, ati. 2021 census report dungjuiya delimitation exercise akibol a ahile gamsung mihon aliem ding ahi, tin aseibe uvin ahi.

 

BJP lamkaina coalition government a kon hai ding’a thulhuhna kinei kikhel louding ahi: NPP Manipur unit Chief Thangminlien Kipgen

Imphal, June 22(ET): National People’s Party (NPP) Manipur unit chief Thangminlien Kipgen in Monday nikhon N Biren Singh lamkaina Manipur a coalition government tosot lou nadinga thulhuhna kinei hi kikhel louding chule kituhchah ding ahi, tin aseiyin ahi.

Thangminlien Kipgen in thuso miho akihoupi na a, “Thuphon kinei banga kiche jom ding, lunggel khelna umlou ding ahi. Mipin eidei nau mun a kache diu ahi”, ati. NPP Chief le Meghalaya CM jong hi a Conrad K Sangma le Assam Minister chule BJP lamkai Himanta Biswa Sarma achesa Sunday ni a Manipur a BJP le NPP kah a boina um sulham dinga ahung jouva Kipgen in hiche thu asei ahi.

Sunday nikho a Conrad K Sangma le Himanta Biswa in NPP MLA hotoh kihouna asem a, tua sorkar huhna dinga kihouna aneiyu ahi. N Biren Singh lamkaina state sorkar vaipoh dan hi chang thuneina chule democracy toh kitoh lou ahi in, coalition partner ho tahsanna kisem ding agot lou ahi, tin jong aseiyin ahi.

“Coalition partner hotoh kihoukhomna umlou ahi. Biren in adei chu NPP dohna um louva achanga kigel lhahna anei ahi. NPP in 2017 kum a sorkar kisemna dinga pan lentah alah vanga BJP in keiho party member ho abolna hi nu-no mibol na banga abol jeh a coalition government a kon hai dinga kigel lhahna kaneiyu ahi”, ati.

Rajya Sabha election a dinga candidate kilhen na a BJP in akiloikhompi party 5 ho, adeh a NPP hi thu dohna aneilou ahi in, hiche hi coalition government rules toh kitoh lou ahi. Hiche jeh a party teni kikah a aboisa dinmun hi setso ahi, tin aseiyin ahi.

Achesa Sunday nikho a jong Kipgen in thuso aneina a party in BJP lamkaina coalition government a kon haina anei na ajeh sagi ana peh ahi. CM Biren Singh henga avel vel a akisei nunga jong sorkar in thulhuhna sem khom nadinga steering committee platform sem ding hi ngaipeh a einei louvu ahi, tia jong ngohna anei ahi.

“Coalition ethics aumlou hi jihtho a photchenna um ahi”, ati. Political party jousen ama ama ideology le identity anei ahi in, ahivanga party 5 kiloikhomna government in khantou nadinga ‘common mimimun programme’ sem dinga NPP in asei Biren in nahsah a akoilou chule coalition government min phu dinga kisei jong eijah peh louvu ahi”, ati.

BJP MLA thum panna a legislator 9 in coalition government a kon haina anei ahitan, NPP hi tua Opposition Congress toh Secular Progressive Front (SPF) noiya um ahitai. Athah a kisemdoh political party chom chom kiloikhomna in tua hi BJP lamkaina sorkar douna a ‘no-confidence motion’ bol dinga Assembly special session thumna aneiyu ahi.

BJP hi tua House a alhomjo hiu ahitan, SPF noiya Manipur a sorkar akisem ding hi tahsan ahi, tin Thangminlen Kipgen in aseiyin chule thutah in goljona aneiding ahi, tin aseibe in ahi.

Delimitation chungchang a Cabinet in gangtah a thulhuhna anei dinga KSA in CM henga temna nei

Imphal, Jun 22(UNA): Kangleipak Students’ Association (KSA) 2001 census dungjuiya Assembly constituency ho a delimitation bol ding chungchang a Chief Minister N Biren Singh in Cabinet thulhuhna gangtah a anei dinga temna anei uvin chule Gauhati High Court order dungjuiya 2026 kum kah a aumsa assembly constituency ho a status quo ‘maintained’ bol dinga India government henga sei dinga temna jong anei uvin ahi. CSO chom chom thalheng hon thuso miho akimupi nauva, 2021 census data dungjuiya delimitation lah ding Manipur gam mi hon adei ahi, tin asei uvin ahi. Ajeh chu Sub division phabep a 2001 le 2011 census data a hi growth rate ajat ni a akal ni kisang lou ahi, ati.

Enumerator in Census data dihtah lahna dinga amun (field) avil lou ahi, tin KSA in aseibe in ahi. Thunoh aumna sub division ho a voter percentage hi table work a kibol ahi in, tu naicha High Court a hehna akisem na a hiche thu hi demna sangtah jong kinei ahi, tin KSA in aseibe in ahi.

Bishnupur dist a doctor 2 le nurse 1 covid-19 vei

Imphal, June 22(ET): Bishnupur district hospital a tong Doctor 2 le nurse 1 chu covid-19 vei ahidan aki hedoh in ahi. Amaho hetdoh ahitoh lhon in frontline a natong akivei kihedoh masaloi ahiuvin chule amaho hi Bishnupur Covid-19 care facility a natong ho ahiuvin ahi. Tuhin abon uvin JNIMS a kijen in aumsoh kei uvin adamtheinau jong ahoinai akitin ahi.

Leiset chung’a Covid-19 case 8.7 million val ta, nidan 24 sunga athah a natna nei mi 183,000 kihetdoh be

Geneva, June 22: Covid 19 natna neiya vannoi pumpi a agom a mihem 8.7 million aval tan, Sunday nikho a bou athah a natna nei 183,020 akihetdoh be e, tin World Health Organisation in aseiyin ahi.

Achesa nidan 24 sunga Covid 19 natna jeh a agom a mi 4,743 thi a, natna jeh a thi tuchan geiya hi 461,715 lhing ahitai, tin report in aseiyin chule natna neiya photchenna kinei hi 8,708,008 lhing ahitai, ati. WHO Regional Director for Europe, Dr Hans Henri P. Kluge in asei dungjuiya, vannoi muntin a covid 19 case kisei holah a 31 % hi Europe gam a ahi in, chule natna jeh a thi 43% jong Europe a ahi, ati.

Gam tamtah a natna hi kal be jing ahi, tin jong Dr Kluge in aseiyin ahi. Natna jeh a vangsetna toh sangpen a gam hi United States hijing nalai ahi. US a coronavirus case 2.2 million chule natna jeh a thi 118,895 lhing a, vangsetna toh sangpen gam hijing u ahi. Novel coronavirus hi WHO in achesa March 11 nikho a ‘pandemic’ ahi tia phondohna anei ahi.