Manipur a nidan 24 sunga Covid-19 positive athah 11 umbe; Natna nei...

Manipur a nidan 24 sunga Covid-19 positive athah 11 umbe; Natna nei khat hospital akon discharged kibol, adamdoh mi 5 hita

73
0
SHARE

Manipur a nidan 24 sunga Covid-19 positive athah 11 umbe; Natna nei khat hospital akon discharged kibol, adamdoh mi 5 hita

Imphal, May, 28(ET): Thursday nikho a Covid 19 positive athah 11 akihetdoh be toh kilhona  Manipur gam a Covid 19 case agom a 55 alhing tan, natna nei mi 5 adamdoh a, hospital a kon akisoldoh toh kilhon a gamsunga active case 50 ahi.

Case athah kisei 11 holah a mi 2 hi Delhi a kon lenna huikong a Wednesday nikho a hung kile a chule Institutional Quarantine centre a um ahi. Additional Director, Health Department le COVID-19 Common Control Room spokesperson Dr Khoirom Shasheekumar Mangang in thuso anei dungjuiya, positive ahi photchenna kinei case 7 ho sample hi Regional Institute of Medical Sciences lab a test kibol a chule mi 4 hohi Regional Institute of Medical Sciences lab a test akibolna a Thursday nikho a positive ahi kihedoh ahi, ati.

Natna anei kihedoh athah 11 holah a mi 9 hi pasal hiya chule numei 2 pang ahi. Abon uva JNIMS le RIMS Covid 19 Care facility a achon tauvin, adinmun u alel aumpoi, tin aseiyin ahi. RIMS a test kibol case athah 7 holah a mi 5 hi Thoubal a kon ahiuvin, amaho hi train a hung kile holah a pang ahi. Chule Kakching le Imphal West district a kon mi 2 hi Delhi a kon lenna a hung kile ho lah a pang ahi’in, Wedneday nikho a hunglhung ho ahi.

VRDL, JNIMS a positive ahi kihedoh case 4 holah a mi 2 hi Churachandpur a kon ahi’in chule mi 2 hi Tengnoupal district a kon ahi. Thursday ni a agom a RIMS a sample 303 test kibol holah a 7 hi positive hi a chule JNIMS a sample 621 test kibol holah a case 4 positive hi ahi.

Tuni chan geiya gamsunga sample test kibol jat hi 7758 lhing ahitai. Agom a mi 10,489 hi Community Quarantine centre a um a, mi 3709 hi Government Quarantine centre a um ahi. Thursday nikho a Government Quarantine centre a mi athah a 959 akoibe uva chule Community Quarantine centre ho a mi 1314 kikoi be ahi.

Manipur gam a athah a case akihetdoh May 13 jouva kon positive case kihedoh atam na pen hi anivei channa ahitan chule tu kal sunga dinga jong tuni a case kihedoh jat hi atamna pen ahitai. India gam chom chom a um gamsung mi ahung kile atambe jing toh kilhon a authority hon case hi kal cheh cheh dinga ginchatna aneiyu ahi.

Tuchan geiya case akihedoh hohi abon uva gamdang a kon hung kile ho ngen hinalai ahi. Kigotna le kivenna khoutah a akinei jeh a natna hi community level a chal lou ahi, tin state government authority hon aseibe uvin ahi.

Ama ama district a peh dinga COVID-19 positive case hi Churachandpur a 20 lhing a, Thoubal a 11, Imphal East a 4, Kamjong a 3, Tengnoupal a 4, Imphal West a 7, Kakching a 1, Bishnupur a 1, Kangpokpi a 1, Senapati a 1, Jiribam a 1 chule Noney a 1 ahi. Hiche lah a Imphal West, Thoubal le Imphal East a kon natna nei khat cheh chule Tengnoupal district a natna nei mi 2 Covid 19 natna a kon kijen dam a, hospital a kon kisoldoh ahitai. Pherzawl, Ukhrul, Tamenglong le Chandel district a hi Covid 19 natna nei umlou lai ahi.

Alangkhat a, ni phabep masanga Covid 19 positive ahi kihedoh a Kairang kho mi Md. Yunus (31) hi Wednesday nikho a test anivei channa abol nauva ‘negative’ ahitai, tin thulhut in aseiyin ahi. Ama hi JNIMS a kon Thursday nikho a discharge abol utoh kilhon a natna a kon adamdoh mi 5 lhing ahi. Hetthei khat chu Yunus hi Mumbai a kon hung kile a, Khabeisoi Quarantine centre a um ahi. Hospital a kon kisoldoh jong le ni 14 lhing Home Quarantine a um nalai ding ahi.

Thoubal, Ccpur  le Tengnoupal DC hon ‘Containment zone’ phongdoh; mun phabep kikhah ta

Imphal, May 28(ET): DC Thoubal, N Bandana Devi in Wednesday nikho a University College Block-A, Wangkhem assembly constituency le Thoubal College Campus, IGNOU Block, Thoubal hi ‘containment zone’ dinga phondohna anei tan ahi. Thoubal a cheng hiche quarantine centre a kikoi mi 2 Covid 19 positive ahi akihetdoh jouva natna achal be louna dinga kivenna a thuphon anei ahi.

Containment zone hi kikhah ding, hiche mun a lut le pot umthei louding chule Covid 19 case active surveillance umding ahi, tin thuso chun aseibe in ahi. Mi khattou ahiloule institution/organization in ‘Containment zone’ a dan apalkeh uva ahile Indian Penal Code section 188 chule Section 51, Disaster Management Act 2005 noiya thilse bol a kisim ding ahi, tin gihna aneibe in ahi.

District Magistrate/Chairman DDMA, Churachandpur Pawan Yadav in jong Chennai akon hung kile Lanva Quarantine Centre akon mi khat Covid-19 positive akimube jeh in tunin Ccpur District sunga mun phabep khading in thuphon aneiyin ahi. Hiche sealed kibolna ho chu New Lamka Area, Kawnpui, Tangnuam Area, Ngathal Area chuleh Gangpimual Area ahi.

Koitobang sealed kibolna mun ho a daan palkeh aum leh a chunga Indian Penal Code, Section 188 noiya gotna kipeding ahi tin ati.

Alangkhat a, Mayanglambam Rajkumar, (D.C.) Tengoupal District injong District sunga um Institutional Quarantine Centre mun ni a kon a positive case 2 akimudoh toh kilhon in mun phabep kha dinga (Sealed) thuso aneitan ahi. Hiche Sealed kibol na in ahop ho chu ahileh, Electricity Guest House Campus, Moreh leh Forest Rest House Campus, Moreh chuleh akoma Waiting shed leh amasanga um market shed ho chengse hi ahi.

Koitobang hiche akisei mun ho a daan kikoi ho jui lou chuleh ja lou aum leh Indian Penal Code chuleh Section-51, Disaster Management Act,2005 noiya gotna kipeding ahi tin thupeh chun aseibe in ahi. Hetding leh gelkhoh ding khat chu, hitobang daan/thupeh ahung um teng phatah a jui hi mipi eiho a dia damna pen leh aphapen ahi ti sumil pou hite.

RD&PR Minister in Technical Assistant hon ‘work estimate’ asem masanga natoh namun avil diuva sei

Imphal, May 28(ET): Mahatma Gandhi National Rural Employment Guarantee Scheme a Technical Assistant hon Work Estimate asem masanga ‘work site’ ho avil diu ahi, tin Rural Development and Panchayati Raj Minister Thongam Biswajit Singh in Thursday nikhon aseiyin ahi.

Panchayat Bhavan, SIRD Campus, Porompat mun a ‘Work Estimates, Schedule of Rates’ le adang dang sem ding thu a ‘One-day Meeting Cum Interaction Programme’ agon nauva Minister pa in ahoulimna a asei ahi. Technical Assistant hon ‘work site’ (natohna mun) avil uva ahile na kitoh dan ahetthem diu, project estimate semna a akithopi hiding ahi, ati.

Technical Assistant hole mopohna nei official hon nikho 100 a dinga estimate asem pan diuvin thuhilna aneibe in, hiche hi go juh lha kipat masanga kigotna akijo theina ding ahi, tin aseiyin chule hiche jeh a go juh kichai chai teng le natong boina umlouva chelha jom theiding ahi, ati. Natong ding tamsah be ding jong kangaito ahi, ati.

Meeting a ‘Scheduled of Rates’ le thu dang dang aseikhom uvin, DPC le Technical Assistant honjong amaho lunggel le boina ho asei uvin ahi. Biswajit in natoh akichepi na a dan phatah a juiding, mask kibol a, hand sanitizer man a chule ‘physical distancing’ jui ding angaidan thu jong aseiyin, chule natong hohin ‘social distancing’ ajui tei nadinga DPC hon batch a amanchah diuvin aseibe in ahi.

COVID pandemic sunga government protocol le guidelines ho chepi nadinga ‘awareness’ bolna a scheme a Information Education, Communication fund man ding thu aseiyin, thinglhang gamkai ho a hiche thu hi lentah a tahdoh ding ahi, ati. MGNREGS hi tha man mu nading scheme ahi’in, lockdown sunga thinglhang miho kithopi a pang ahi, tin aseiyin chule DPC hon scheme kitup tah a achelhah nadinga GRS hotoh kihouna anei jing dinga aseiyin ahi.

Deputy Secretary RD&PR Lalrobul Fimate in ahoulimna a MGNREGS noiya kimanchah a ol nading, Animal Husbandry, Horticulture, Housing, Fisheries, Sericulture, lemon grass le citronella plantation chule Industries department noiya natoh chom chom bol dinga RD&PR Minister in asei ahi, ati. Central Ministry toh Wednesday ni a Video Conference akibol na a, Minister pa in proposal apeh thu asei ahi, ati.

Tuni a chelha meeting a Additional Chief Secretary MH Khan, BDO ho le MGNREGS official hojong apang uvin ahi.

CSO chom chom 5 in Chandel Ex ADC Chairman Lhukhosei Zou atosotna thu sei

Imphal, May 28(ET): Hill Tribal Council (HTC), Moreh, Kuki Students Organization (KSO-MB), Kuki Women Union & Human Rights, Moreh, Moreh Youth Club (MYC), chule Anti-Drug Abuse Campaign Committee (ADACC), Moreh panna a Kuki kiloikhomna nga in Lhukhosei Zou ‘bail’ akipeh thu toh kisaiya Th Brinda, ASP, NAB umchan adei lounau thu asei uvin ahi.

Officer Brinda social media a kon thuso chom chom a case umchan kisei le dinmun chom beh alhun dan jong kiloikhomna hon adei lounau thu asei uvin ahi. Th Brinda hin ASP, NAB hina a dangka crore aja a sim khamnathei amat a chule brown sugar factory jong asuhset ahi. Akitahna le anatohna hi koiman hiche pet a atahsan lel lou ahi. Ahivanga, social media a thuso aneina ho a pilhing loutah a ngohna thu asei chule khamnathei a kivei (drug lord) tamtah NAB in charge sheet abol loulai thu asei hin ama chunga tahsan lelna aumsah ahi, ati.

Th Brinda in Lhukhosei Zou hi kamoh lha lou ding ahi, tia case chelhah sunga gihna anei hin atup mong hidinga organization in atahsan ahi’in, hiche hi case kipat til a kihouna aneilhon lolhing lou ahi tia thulamleng anaum jeh hidinga ginmo ahi.

Hetthei khat chu Chandel ADC Chairman anahi Lhukhosei driver le Personal assistant (PA)hi NAB official hon Lhukhosei Zou douna a ‘statement’ dihlou apehna dinga avoh uva, sum a alhep uva chule sorkar tohmun le quarter peh dinga kitepna ana neiyu ahi. Hiche hi 2019 kum a NAB, Imphal khut a Lhukhosei aumpet hi ahi. Min neitah Th Brinda tobang officer khat in May 23 ni a ama Facebook post a judiciary douna a thucheng ngailou tah tah aman a kihahselna anei hi ama bol dinga ginchat umlou hel ahi.

Th Brinda in asei banga khamnathei hi Lhukhosei Zou chunga kiman ahipon, hiche hi aumna official quarter campus sunga kimu ahi tihi thutah mijousen ahet ahi. Case kisei chai loulaiya ‘drug lord’ tia akisei hi pilhing lou ahi’in, Brinda in judiciary system thutanna ngah louva aman hiche case a thulhuhna anei masat avetsah ahi, tin asei uvin ahi.

Mijousen judicial system jana apeh a chule kitup tah a achelhah theina dinga koima akikum lou dinga organization nga in temna anei uvin ahi. Themmona neiya kingoh ho langneina umlouva achungthu seiya chule dan dungjuiya gotna peh ding ahi. Judiciary akhut a choi go a aumle kiphinna sangtah umding, HTC chule kiloikhomna dang dang hon kiphinna bol ding lung phatmona aneilou diu ahi, tin aseibe uvin ahi.

 

Ministerial team hon Thoubal Dist Hospital vil

Imphal, May 28 (ET): Health Minister L. Jayantakumar le Education Minister chule Thoubal le Kakching a district-in-charge hi a Dr. Th. Radheshyam in Thursday nikhon District Hospital, Thoubal avil uvin ahi.

Ministerial team hon Chief Medical Officer (CMO), Thoubal, Dr N Jayentakumar, Medical Superintendent, Dr Ch. Memcha, health worker chule Thoubal district a mopohna nei official hotoh kihouna anei uvin ahi. Doctor, nurse le health worker ho umna dinga room semhoina dinga fund kikoi hi natoh achelhah thei nadinga kipedoh vahding ahitai, tin Health Minister in aseiyin ahi.

Kitepna ana kinei masa banga hospital a ngaichat dungjuiya emergency medicine doctor kikoi ahitai, ati. Hospital a isolation ward, Personal protective equipment (PPE) le manchah dang dang jong Covid 19 douna dinga kisemdoh ahi, ati. PPE lhasam louding ahi, tin Health Minister in kitepna aneiyin chule health worker hon guideline ajui diuvin thuhilna aneiyin ahi.

PPE hi kivenna ding manchah ahi’in, Health and Family Welfare Ministry, India government in dan asem dungjuiya COVID 19 natna nei hidinga ginmo toh kimaito a, natna akilah nathei dinmun sang hon PPE aman diu ahi, ati. Gari alhahsam thu a ngaichat dungjuiya thil gon dinga Minister pa in aseiyin ahi. Thoubal district a positive case akal cheh cheh jeh a Kakching a kikoi ALS Ambulance hi manthei ahi, tin aseiyin chule India sorkar in Covid 19 douna a natong ho dinga Pradhan Mantri Kalyan Package: Insurance Scheme for Health Workers Fighting Covid 19′ phondohna anei ahi, ati.

Health worker jousen tomngai tah a pan alah diuvin temna aneibe in ahi. Dr. Thokchom Radheshyam in ahoulimna, pandemic doudalna a protocol jouse jui dinga aseiyin ahi. Gal tobang dinmun ito u ahi’in, frontline worker hina a ikichat nau ijo uva, mihem khohsahna a itohdiu ho itoh dingu ahi, tin aseiyin chule natna achal louna dinga chihthei dinga temna aneibe in ahi.

Centre in gam 5 a khaokho lan douna dinga pan la; khaokho hi hon ni a akikhen uve, tia thulhut in sei

New Delhi, May 28: Khaokhopi (desert locust) douna a Centre in pan lah dinga asei toh kilhon a Ministry of Agriculture and Farmers Welfare in Wednesday nikhon khaokho alan na gam ho a ‘Locust control operation’ akikehlen e, tin aseiyin ahi.

“Ganhing tha na lou (pesticide) kap nadinga fire brigade 89, survey gari 120, control vehicle 47 (spray kibolna thil kikoina) chule sprayer umna tractor 810 hi khaokha lan vetkol nadinga kimangcha ahi’in, ngaidang dungjui ahi”, tin Ministry in aseiyin ahi. State nga- Rajasthan, Punjab, Gujarat, Maharashtra le Madhya Pradesh gam a khaokho lang a, hatah a chal u ahi.

“Tuni chan a, Rajasthan gamsung Barmer, Jodhpur, Nagaur, Bikaner, Ganganagar, Hanumangarh, Sikar, Jaipur district chule Madhya Pradesh gam Satna, Gwalior, Seedhi, Rajgarh, Baitul, Devas, Agar Malwa district a khaokho hon phabep umjing nalai ahi”, tin Ministry in Wednesday nikhon aseiyin ahi. Maharashtra a official hon asei dungjuiya, Monday jan le Tuesday jingkah sunga lou (pesticide) akikap jouva khaokho hon hi hop ni (group ni) a kikhen uva, khat hin Parseoni, Nagpur lang ajot a chule khat hi Bhandara a lut ahi.

“Wednesday nikho a Andhalgaon, Mohadi taluka a kon Ramtek tehsil, Nagpur a khakho hon hi km 100 val lenga hiche a kon Tumsar Bhandara lang che kit u ahi. Temani kimvel a um thei lei ho a kinga u ahi”, tin Ravindra Bhosale, divisional joint director, Agriculture in aseiyin ahi. State Agriculture department in Vidarbha a um district 11 chule Maharashtra a district 4 a ‘Locust warning alert’ asodoh ahitai.

Khaokho alan nathei dinmun aumjeh a Odisha government injong Wednesday nikho a gamsunga um loubol mihon ajui diu guidelines asodoh a chule kivenna anei diuva temna aneiyu ahi. Loubol mihon kivenna a phailei, me lei, thei lei ho a hi ‘Neem’ mu a kon kiladoh atui le twi ahal uva athe diu ahilouleh kailhang a kijoh ‘neem-based pesticide’ ho twit oh akal uva akap diuva asei ahi.

 

Manipur a IQC a mi 3,746, CQC a mi 10,293 um; CCpur Dist. sung’a Sample test bol ding’a kilakhom 900 lhing ta

B.Lalboi Gangte

Ccpur, May 28 (ET): Manipur State sung mun chom chom’a Institutional Quarantine Centre aum mi 3,746, Community Quarantine Centre chom chom’a 10,293 aum in ahi. Chuleh Churachandpur District sung’a Case um jat 20, test bol ding’a sample 900 val ana kilahkhom vang in Test kibolna lam deibang’a agang jou lou jeh in Sample lahkhom’a um sa tamtah pending in aum tan ahi.

Sample test bol ding’a thot’a um tamtah pending a aum tah jeh in mi kimkhat a result sodoh masang in Home Quarantine ding in soldoh’a um jong aum tan ahi. Hiche chung thu’a District Control room thuso in atahlang na’a tuni (May 28) bou in jong sample 150 test bol ding in lahkhom ahi in hiche holah’a Rostad Memorial High School apat 8, St. John School apat 11, Mini Secretariat apat 48, Happy Heart School apat 24, Mini Secretariat aum Volunteer apat 25, SDO leh ah staff  ho akipat 7, Circuit House apat 2, Medical staff apat 11 leh Ngarian apat 14 ahi. Tuni chan in mun dang apat inn lam hung line listing aum 2168 apha in, Community Quarantine Centre chom chom’a um 1450, Institutional Quarantine a 5 um nalah’a Circuit House Bijang ah pasal 4 leh numei 2, Youth hostel Hiangtam Lamka ah 1, Young Learners School ah pasal 70 leh numei 46 agom’a mi 116, St. Paul institute ah pasal 22 leh numei 42 agom’a mi 64, Lamka Central School ah 1 aum in ahi. Chuleh Institutional Quarantine Centre a um jouse agom in mi 186 ahi in chu naban’a  District Hospital Isolation Ward ah pasal 1 leh numei 3 aum in ahi.

ENPO in SOP juilou vaipo ho gotna peh dinga ngehna nei

Kohima, May 28: Eastern Naga People’s Organization (ENPO) in tuni in Nagaland chief minister ang a lekha thot anei na uva government natong SOP nitlou hoc hung a gotna kipeh na ding in hetsah na ana nei uvin ahi. Hetthei jhat chu govt vaipo themkhat in Tuensang mun a mi phabep a inn lam jon ding a vetchil na nei lou a ana tol lut u ahi. State vaipo ho in khatvei ni a Chennai akon hung kile mi 155 lam ho chu bus nga a Tuensang district sung ana sol lut u ahi.Hiche akisol lu tho lah a chu khat ocvid-19 positive ahi hetdoh a an aum a maban a 3 hetdoh be a ana um kit ahi.

 

Special train a Bharuch, Gujarat, Kerala, Delhi leh Bengaluru a hung kipandoh ho Jiribam railway station hung lhung tau

Imphal, May 28(ET): Covid-19 jeh a India gamsung a lockdown akikoi toh lhon in gamdang a umhon a inmun cheh akijot jing utoh lhon in Bharuch, Gujarat, Kerala, Delhi leh Bengaluru gamsung a Manipur gammi tangden ho jong Special train mangcha in Jiribam railway station tuni nilhah nidan 2:00 don chun ahung lhung tauvin ahi.  Ahung lhung holah achun Thoubal district akon mi 229, Bishnupur district akon mi 20, Kangpokpi, Senapati le Imphal East akon mi 39, Tengnoupal, Kakching le Jiribam akon mi 33 ho chu State Transport Department bus 11 in in ama ama district chan ading in apodoh uvin ahi. Thiruvananthapuram Central Railway Station,Kerala akon hung kipandoh ho jong tuni jingkah nidan 5:15 don chun Jiribam ahung lhung uvin ahi. Ahung lhung holah achun Ukhrul district akon mi 26, Noney district akon mi 37, Kangpokpi district akon mi 36, Ccpur leh Pherzawl district akon mi 47, Chandel district akon mi 19, Imphal east leh Kamjong district kon 58, Senapati district akon mi 60, Thoubal district akon mi 75, Kakching akon mi 206, Tamenglong district akon mi 91, Bishnupur district akon mi 179 chule Imphal west district akon mi 73 ahiuve. Kerala akon hung hochu State transport bus 29 mangcha in ama ama district chan thah ding in Jiribam akon apoh tauvin ahi.

Bengaluru, Karnataka le New Delhi akon hung kipandoh train jong janhi nilhah chun Jiribam railway station ahung lhung tauvin ahi. Bengaluru akon hung hochu Ukhrul le Noney district mi 169, Ccpur le Pherzawl district mi 189, Kakchng district mi 39, Chandel district mi 47, Tengnoupal district mi 41, Imphal East district mi 182, Kamjong district mi 32, Imphal west mi 284, Thoubal district mi 214, Tamenglong district mi 32, Senapati district mi 105, Kangpokpi district mi 153, Bishnupur district mi 122 ahiuvin amau ho chu state transport bus 47 mangcha in ama ama district ading in Jiribam railway station akon apodoh uvin ahi.

New Delhi akon hung holah achun Ukhrul district mi 199, Noney district mi 36, Ccpur le Pherzawl mi 157, Chandel le Tengnoupal mi 57, Imphal east mi 39, Kamjong district mi 81, Kangpokpi mi 133, Senapati district mi 152, Thoubal district mi 37, Kakching district mi 38, Tamenglong district mi 78, Bishnupur district mi 45, Imphal west district mi 73 ahiuvin chule midang 109 hochu Imphal a quarantine centre a koiding in apo tauvin ahi. Delhi akon hung hochu state transport bus 36 mangcha in apodoh uvin ahi.