Manipur a MSME business registration kibol jat hi North East gam adang...

Manipur a MSME business registration kibol jat hi North East gam adang jouse kigom sanga tamjo ahi tia CM in sei

140
0
SHARE

Manipur a MSME business registration kibol jat hi North East gam adang jouse kigom sanga tamjo ahi tia CM in sei

Imphal, October 11 (ET): Chief Minister N. Biren Singh in Micro, Small and Medium Enterprise (MSME) a Manipur gam hi North East state holah a registration bol sangpen ahi, tin Chief Minister’s Secretariat mun a Friday nikho a press conference abolna a aseiyin ahi.

Thuso miho Chief Minister in akimupina’a, “Ministry of Micro, Small and Medium Enterprise, India government in Annual Report asodoh dungjuiya 2015-19 kum sunga Manipur gam a MSME business registration kibol hi 12,438 lhing ahi’in, hiche hi North East state adang jouse a register kibol jat 6695 sanga jong tamjo ahi, ati. Manipur gamsung hi MSME business bol a numei atamna pen jong ahi. India gam a MSME business hop 20 hi numei a ahi’in, chule Manipur gam a numei MSME business nei hi 50% lhing ahi, tin aseibe in ahi.

MSME business a Manipur share hi ‘national population a Manipur share’ sanga sangjo ahi, tin CM in aseiyin ahi. National population a Manipur ‘share’ hi 0.2 percent ahi’in alangkhat a MSME business a state share hi 0.3 percent ahi. India gam a mihem lakh khat lah a MSME business 4770 um ahi’in, Manipur gam a mihem lakh khat umna a MSME hi 6500 hi ahi.

Tua sorkar in gamsung economy sangtah a apuitou ahi’in, mipi tosotna leh kithopina jal a ‘economy’ khangtou jing ahi, tin CM in aseiyin chule sorkar in gamsunga tohmun neilou khangthah holeh entrepreneur ho Start-up policy leh scheme dang dang noiya laon grant leh loan apeh ahi’in, tua sorkar in gamsung entrepreneur ho atosot jom ding ahi, tin aseibe in ahi.

Press conference a CAF&PD Minister Karam Shyam, PHED Minister Losii Dikho, Agriculture Minister V Hangkhanlian, Deputy Speaker, Manipur Legislative Assembly K Robindro, Chairman, Tourism Corporation of Manipur Ltd. Dr Sapam Ranjan, MLA S Bira, MLA S Susindro, MLA Y Surchandra, MLA O Lukhoi, MLA Th Satyabatra jong apang uvin ahi.

Thoubal police hon Lilong a mi 4 leh khamnathei tamtah man doh u

Imphal, Oct 11(ET): Thoubal district police team hon khamnathei douna a drive abol jing utoh kilhonin Thursday nilhah in Lilong a tol a kikoi Sintex noiya kohom kisem a khamnathei tamtah kisel amudoh uvin ahi.

SP, Thoubal district Dr S Ibomcha in Thursday jan a thuso miho akimupi na’a, nilhah nidan 7 don a khamnathei a kivei aum’e ti thuguh akimu toh kilhon a police team ni in Md Abdur Rashid @ Linthoi (32), s/ (L) Md Tomba chule Md Momin Khan (27), s/o (L) Md Tomba, Lilong Tairenmakhong inmun kholna aneiyu ahi, tin aseiyin ahi. Inspector Oinam Ajit Singh lamkaina leh SI Md.Isha Khan chule ASI Laishram Tikendro, Lilong Police kithopina a All Lilong Anti-Drug Association (ALADA) chule ANJUMAN volunteer hon Lilong Tairen Makhong a um akisei inmun lang ajot u ahi.

“Jan nidan 8.30 don a inmun lhung uva, police team chule ALADA leh ANJUMAN volunteer hon inmun teni phatah a kholna aneiyu ahi’in, inn teni hi imai kikhong ahi”, tin SP Ibomcha in aseiyin ahi. Lilong Tairen Makhong a cheng Md.Momin Khan insung mite police hon akou uvin, kot hi asunga kikap a chule avel vel a akou vang uva kot ahonpeh deh louvu ahi. ‘Minute 10’ tobang anga jou uva Md. Momin Khan kahi tia sei mikhat in kot ahin hon peh u ahi.

Police team hon anhon na room a um twi kikoina sintex akhol ule blue colour louchang kikoina polythene khat amudoh uvin, SP louchang leh N-10 louchang hidinga ginmo hi syntax sunga twi lah a kiletdoh ahi. Police hon akisei lou ho alah uva, asim ule SP louchang 42 leh N-10 louchang 36 strip a kon kiladoh a kikoi amudoh uva police honjong apet pet a khamnathei ho amat uva, Md.Momin Khan jong amat ahi.

Hiche a kon Md Abdur Rashid @ Linthoi, s/o (L) Tomba, Lilong Tairen Makhong inn ajot kit u ahi’in, amun a thih box sunga kisel khamnathei SP louchang 765 amat kit u ahi. Bu hon na indan sunga polythene a kichun louchang kang- Pseudophidrine cough syrup hidinga ginmo Bolirex-New kitia kijih louchang neo cha cha 5,498 amudoh kit u ahi.

Inmai a kikoi sintex khat a kon Bolirex tia kisun Cough syrup bottle tamtah jong amudoh uvin ahi. Thilsoh toh kisaiya Md.Abdur Rashid @Linthoi aman uvin ahi. Amani akimat jouva police hon akiman teni toh natong khom a Md Nawaz @ Boycha (19), s/o Md Sirajur, Lilong Turel Ahanbi Boroi Makhong a cheng leh Md Aziz @ Abungo (20), s/o Md Abdul Hasim, Lilong Turel Ahanbi Boroi Makhong a cheng jong aman kit uvin ahi. Thilsoh toh kisaiya Lilong Police station a case ajihlut tauvin ahi.

India sorkar toh kihouna sem NSCN-IM sorkar tohgon chunga lunglhai lou; Framework Agreement a kisei ho kituh chah ding ahi, tiu

Dimapur, Oct 11: New Delhi khopi a ‘peace talk’ kihouna anukhah pen a aseiyu nikhat jouva NSCN-IM in thuso aneiyin, ‘Framework Agreement’ gelkhohna sangtah akineiyin chule itobang dinmun hijong leh kituh chah ding ahi, tin asei uvin ahi. Chule khat chunga khat thu hunam a kichepi jong akidoudal e, tin asei uvin, ipi thu aseinau ahi aseichen deh pouvin ahi.

October nisim 10 nikho a NSCN-IM hon General Secretary Th Muivah lamkaina a India Interlocutor RN Ravi toh kihouna aneiyu ahi. Thulhut dungjuiya alangni in kihouna a ‘flag’ leh ‘constitution’ thu asei uve, ati. October nisim 10 nikho a kihou lhahna anei theilou nung uva NSCN-IM team holeh India government Interlocutor in avel a toukhomna neivah kit dinga kinoptona aneiyu ahi. Tahsan umtah thulhut in aganna thei pen a kihouna aneikit diu ahi, tin aseiyin ahi.

Alangkhata, Nagaland Today niseh thuso a RN Ravi leh Prime Minister Narendra Modi in October nisim 10 nikho a kihouna (closed-door meeting) aneiye, tin aseiyin, ahivanga Indo-Naga peace talk thu a kihouna kichaiya lamkai tenin kihouna anei na a ipi thu asei kihelou ahi. NSCN-IM in thuso anei nauva chun, kum 22 lhing kihouna phatah a akinei jouva India sorkar in akitepna ho a kon nungchon nading tohgon anei uvin, gimtah a kisem Framework Agreement suhmang ding agot u ahi, ati.

Naga thalheng hilou chule Naga thu hilou mi phabep thusei ho India sorkar in lahding agot hi kidang tah ahi, tin NSCN-IM thuso chun aseibe in ahi. “Naga national thu joulhep a kihoulhahna sem dinga kisei hohi achesa phat masa ho a suhkhel anaum ho kivel bol kit na hiding ahi. Hiche phat hi akilhaso a ahileh alangni a dinga manna lentah hiding ahi. Thutah thi theilou ahi’in chule koima thahatna injong thutah asuhmang theilou ahi”, tin NSCN-IM thuso chun aseiyin ahi.

NSCN-IM hon asei dungjuiya Naga thu hi ‘political’ ahi’in, chule India dinga ‘law and order’ boina ahipoi, ti hetpehna neiding ahi chule India sorkar leh NSCN in kihouna asem hi August 1,1997 kum a hem kham soi kaina auma kon kipan ahi, ati. “India sorkar in July 11, 2002 kum a Naga ho thusim achombeh ahi hetpehna anei ahi’in, hiche hin Naga hohi Indian Union ahilouleh Burma noiya anaum hilou ahi ti avetsah ahi”, ati.

“Naga ho thusim leh dinmun achombeh ahidan thu a India sorkar leh NSCN-IM in August 2, 2015 kum a ‘Framework Agreement’ soi kaina anei ahi, tin aseiyun chule BJP sorkar in Prime Minister Narendra Modi lamkaina noiya hangsan tah a Naga ho ‘sovereignty’ hetpehna anei ahi, ati. Kigomkhom akiti teng leh mun jouse a Naga jouse tina ahi’in, Union of India tobanga hetkhel ding ahipoi, ati.

‘Naga national flag’ hi Naga ho kihetna vetsahna ahi’in, Pathen henga Naga mite kipehlutna ahi”, tin NSCN-IM thuso chun aseiyin chule Naga Constitution hi hetpehna leh kinoptona kisem a ‘sovereignty’ ahi, tin NSCN-IM thuso chun aseibe in ahi.

KSO Moreh Compound a bomb ana poh; phat teplou bandh kikou

Tengnoupal, Oct 11(ET): KSO Moreh Office compound fencing a bomb ana poh toh lhon in mipi in Assam Rifles ho ngohna ana nei uvin kiphinna ana nei uvin ahi.

KSO Moreh office chu Ngamkhai veng, Moreh Ward No.8 mun a um ahin, bomb chu nilhah 7:55pm vel a ana poh ahi. Hiche bomb poh chu ahal ho chu main road lam a um Chengjapao milim lam chan a aleng in ahi akiti. of Oct 11. Hiche bomb poh deilou na jal in Moreh sung phat teplou in bandh akikou tan ahi.

Hetthei khat chu KSO Moreh in Anglo Kuki War Documentary film project toh kisai a ahung lhungding October nisim 12 nikho le KSO Office compound mun a concert bolding ati u ahi.

DTS Staffs leh simlai hon “Stop Poppy Cultivation” thupi noi’a Marathon Race chelhah pi

B.Lalboi Gangte

CCpur, Oct 11 (ET): Tunin Lajangphai khomun’a um Discipleship Theological Seminary (DTS) themjil na inn ah staff holeh simlai hon “Stop Poppy Cultivation” thupi mangcha in Marathon Race ananei uvin ahi. Hiche marathon race chu Rev. Dr. J. Lamboi Haokip in Tollen Auto parking mun’a flag off anabol toh lhon in DTS chan marathon race ananei uvin ahi. Chuleh campaign phatsung in DTS staffs leh simlai mi 70 vel  in pan analah naban’a lampi dung’a Kaa-ni phatlou naho lhang sapna ananei uvin ahi. Principal DTS Rev. Hemkhomang in mipi ho heng’a Kaa-ni hin lhagao lam jeng hilouvin thing leh go jong ha tah’a asuhset tah jeh hin mihem damthei najeng jong hatah in asukhatan ahi. Chule hitobang thil phalou Govt. in aphal louho ibol uva eiho leh eiho hinkho iki suhset uhi agang natheipen’a ngah ding in mipi temna anei in ahi.

Hiche toh lhon’a marathon race achun pasal lam’a ding in 1st Thehkholen, 2nd  Jamkhogin chuleh numei lam’a 1st Chinneikim leh 2nd Nengneithem in anala in ahi. Chuleh kingon kichai in Seminary Compound sung’a kichep Golseh leh kisuh halna jat chom chom jong ananei uvin ahi.

Anglo-Kuki War Centenary toh kisaiya AR hon Litan a khomi hotoh kihoukhomna bol

Ukhrul, Oct 11 (ET): Tu le tu dinmun a Anglo-Kuki War Centenary ding thu’a Kuki kho jouse a janglum song akitundoh jeh a alhang a cheng Tangkhul le kuki tribes ho kah a kitomo na umthei dinmun a aum jeh leh ahung lhung ding Shirui Lily festival a aboilouna ding in tuni chun HQ IGAR (South) ho gonna noiyin 10 Sector AR, Shangshak Battalion hon Litan khosung a alhang a cheng ho Peace meeting ana kou uvin ahi.

Hiche kihou khomna achun Kasom, Litan, Leingangchin, Yawllen Cheppu, Patlijang, Thawai, Jalenbung chule Shankai kho akon khuo hausa le authority hon pan ala uvin ahi. Kihouna achun khosung lhangsung a boina sosah louding in akihou khom uvin chule thingnoi tohgon ho tosot louding chule chamdel a umkhom ding in kinoptona anei uvin ahi.

CM Biren in Sora Khanuda police outpost leh Staff quarter hondohna nei; Police natohna a kikhelna lentah aum’e, tia sei

Imphal, Oct 11(ET): Chief Minister N Biren Singh in Friday nikhon Sora Khanuda Ching, Kakching district a police outpost chule Thoubal Police station complex a ‘Twin type-II quarter’ hondohna aneiyin ahi.

Sora Khanuda Ching mun a Chief guest a pang CM Biren in ahoulimna a, achesa kum phabep sunga police ho chonchan leh natoh dan akikhel in, police toh kimuto ding mipin kichatna anei tapoi, tin aseiyin ahi. Alangkhat a gamsung a ‘entrepreneurship’ sangtah in akhangtou jing in, law and order akitup cheh cheh jeh a sum holna natoh ho a machalna aum in, hiche ho jouse hi Manipur police panna a security agency adang dang in pan alahkhom jeh u ahi, ati.

State police hon mipi chule CSO chom chom tosotna a ‘War on Drugs’ campaign lolhingtah a abol jing u ahi, tin Biren Singh in aseiyin, campaign akipat a kon tuchan geiya dangka crore 1000 man vel khamnathei amat ahitai, ati. Khamnathei jeh a boina hohi khonung khang huhdoh nadinga abon a suhmang ding ahi, tin aseiyin chule khamnathei a kivei hon anatoh u adalhah nading uva kikhelna anei jouteng ule sum akihol nadiu lampi adang gon peh angaiye, ati.

Dan dihlouva sum hol sanga mipin sorkar scheme chom chom ho a pan alah diuvin CM in temna aneiyin, Sora leh akimvel a cheng hon Zilla Parishad member leh police hotoh kihouna anei uva akimvel a um mol ho a thingphung atu diuvin temna jong aneiyin ahi. Gam hi abon a sorkar a ahi’in, gam jeh a kinah louding ahi, ati.

Education Minister Th radheshyam, Tourism Corporation of Manipur Ltd. Chairman Dr Sapam Ranjan, MLA Y Surchandra, MLA Paonam Brojen, MLA L Susindro, MLA K Meghachandra, MLA Md Abdul Nasir, MLA Th Satyabrata, Chief Secretary Dr J Suresh Babu leh DGP LM Khaute jong kin gon a apang uvin ahi. Hiche kin kichaiya Chief Minister in Thoubal Police Station ajon in, Twin Type-II Quarter hiche mun a hondohna anei kit in ahi.