Manipur a mi 3 thibe toh lhon a Covid-19 jeh’a thi mi...

Manipur a mi 3 thibe toh lhon a Covid-19 jeh’a thi mi 21 lhing ta; achesa nidan 24 sunga positive 124 kimu be

82
0
SHARE

Manipur a mi 3 thibe toh lhon a Covid-19 jeh’a thi mi 21 lhing ta; achesa nidan 24 sunga positive 124 kimu be

Imphal, Aug 21(ET): Manipur gam a Friday nikhon Covid-19 natna jeh a mi 3 athi be kit in, hiche toh kilhon a gamsunga natna toh kisaiya thi mi 21 alhingtai, tin official thulhut in aseiyin ahi

Covid-19 natna nei khat Jawaharlal Nehru Institute of Medical Sciences (JNIMS) Imphal a Friday nikhon athi e, tin hospital Medical Superintendent Prof. T Rajen Singh in aseiyin ahi. Natna jeh a thi teni hi kum 73 a upa pasal khat leh kum 67 a upa pasal khat ahi in, ani lhon a Imphal West mi hilhon ahi.

Tuni nidan 5:00 vel chun CCC, Meitram a Covid-19 jeh in mikhat in thina atoh e tin Medical Dr. N. Hemantakumar Sing, Medical Superintendent, Covid Care Center, Meitram in Deputy Commissioner Imphal West District hetsahna aneiyin ahi.

Thina toh pa hi T. Thangsian Mang (34), 1st IRB, H/Q Veng, Churandpur akon ahi. Amahi August 16, 2020 nikho a CCC, Meitram a admit kibol ahin hiche nikho mama a RAT test kibol jouva Covid-19 positive ahi kihe doh ahi.

Mikhat hi achesa August nisim 20 jan nidan 7.30 a tisat, SOB leh ehkho jeh a COVID Ward JNIMS a admit abol u ahi. Achesa July nisim 29 nikho a gamsunga Covid-19 jeh a thi case masapen akimudoh jouva natna a thi hi kal cheh cheh ahi.

Achesa nidan 24 sunga CAPF personnel 26 chule milham 98 (pasal 64 leh numei 34) Covid 19 positive ahi akihetdoh be in ahi. VRDL, RIMS a 6, JNIMS 30, JNIMS RAT 5, Shija Hospital 1, Public Hospital 1, Raj Medicity 3, Chandel RAT 1, Jeevan Hospital 1, Thoubal RAT a 3, Little Clinic 1, Imphal West RAT 19, Imphal West 32, Advance Hospital 1, IRL 1 chule Babina a mi 19 test kibol ho Covid 19 positive hiu ahi.

Natna nei hohi Imphal West district mi 50, Imphal East 26, Bishnupur 5, Chandel 8, Thoubal 5, Churachandpur 2, Kakching 1 chule Tamenglong district mi 1 ahi. Kakching a positive hi a mikhat hi bou gam dang a kon hung kile ahi in, milham adang 97 hi gamdang a kholjin khalou hiu ahi. Abon uva Covid Care facility a achon uvin chule angaicha ‘containment’ leh ‘contact tracing’ ho apan tauvin ahi.

Chule achesa nidan 24 sung ma ma a mi 259 Covid 19 a kon adam doh jouva discharged abol tauvin ahi. CAPF 107, CCC Lamboi Khongnangkhong a 71, UNACCO 34, Noney 13, Kakching 16, NIELIT Churachandpur 14, Senapati a kijen mi 4 RT PCR test abol nauva negative ahi jouva discharged abol tauvin ahi.

Gamsunga positive case hi agom a 5049 (CAPF 1312 leh milham 3737) lhing ahitan, recovered case agom a 3261 (milham 2744 leh CAPF 517) lhing ahitai. Active case hi 1768 (milham 974 leh CAPF 794) hi a chule recovery rate 64.58% lhing ahitai.

Xxxxxxxx

ECI in Covid-19 boilaiya general election/by election bol nading Guidelines so doh

Imphal, Aug 21(ET): Election Commission of India in Covid-19 pandemic sunga general election/by election a juiding guidelines phatsahna anei tauvin ahi.

Guidelines hi https://eci.gov.in/files/file/12167 a muthei ahi. India gam a Covid 19 pandemic ahung lhun jouva Ministry of Home Affairs (MHA) leh Ministry of Health and Family Welfare (MoHFW) in aphat phat a guidelines asodoh jing ahi in, anukhah pen, achesa July nisim 29 nikho a circular asodoh nauva MHA in India pumpi a juiding guidelines/directive ana sodoh ahi in, hitobang ma a hi Ministry of Health & Family Welfare injong disinfection, sanitization leh Covid 19 natna vetkol nadinga SOP ana sodoh ahi.

Hiche masang July 17 ni a Commission in July 31 kah a national leh state political party hon ngaidan leh lunggel asei diuva anasei ahi in, phat kipe hi political party hon ngehna anei jeh a August 11 chan asuhsao be kit u ahi. ‘Election campaign chule public meeting’ thu a political party chom chom chule State/UT a Chief Electoral Officer ho ngaidan leh lunggel Commission in gelkhomna anei ahi.

Commission in nomination kibol na a candidate nung juiya mi jat chule gari jat jong velvetna anei uvin ahi. Nomination form leh affidavit print akibol jouteng online a fill up bol a chule ama ama RO henga pehlut thei nading facility asem uvin ahi. Candidate hon election online a tet nadinga security deposit bol dinga ‘option’ akipeh nau amasapen jong hiding ahi.

Containment guidelines jui jing pum a Commission in candidate hon innson a campaign abol nauva candidate panna a ache ding hi mi 5 hidinga atep ahi. Public meeting leh road show ho kiphal ding, ahivanga MHA/state in thuhilna apeh dungjui hiding ahi. Electoral process a face mask, sanitizer, thermal scanner, glove, face shield leh PPE kit ho kimang a chule social distancing dan kijui ding ahi.

Elector jousen voter register a soi akai nau chule vote pehna dinga EVM button ameh nading uva hand glove jong peh dinga asei uvin ahi. Mopohna nei state/UT a Chief Electoral Officer hon guidelines ajui nadinga State/District & AC election plan kicheh tah a akigon diu ahi. Tohgon hohi ama ama state/UT a Nodal Officer, COVID-19 toh kihoutoh na anei uva asem diu ahi.

Xxxxxxxxxxxxxxxxxxx

Manipur hi dan umlouna gam soh ahitai: Th. Lokeshwar

Imphal Aug 21: Achesa August nisim 10 nikho a ‘special single-day session’ a Trust vote a BJP lamkaina coalition government in goljona aneiya, parliamentary procedure avel a kipai kit ahi in, hiche special session a CM Biren in apohdoh ‘vote of confidence’ ajouvin chule Congress mLA 6 in haina aneiye, ti thu um ahi.

Session kichaiya social media a House sunga chair leh table kipai thang ho lim tamtah kithang ahi in, House sunga media mihon ama ama mobile phone leh camera achoilut theilou dinga khoutah a ajah da nungu ahi. Agenda a kipe trust vote hi voice vote a ajo u ahi. Manipur assembly speaker anahi leh veteran Congress lamkai Okram Joy in, “Speaker pa in voice vote a ‘confidence vote’ lah dinga thulhuhna anei hi constitution chule law toh kitohlou ahi, ati. MLA 15 ahilouleh 20 bou umjong leh Speaker in government majority ahi, tia asei nahlah ding ham, ati.

Speaker anahi leh Congress MLA Thokchom Lokeshwar Singh injong alunggel aseiyin, “Manipur gamsung hi dan (rule of law) umlouna gam asoh tai. Tua sorkar hi hunam a thunei choiya chule mikhat lamkaina sorkar ahi. Anti-defection law dungjuiya, division vote hi house member khat inbou athum a ahi jong leh kipe ding ahi. Proceeding umdan tahbeh jong Supreme Court thutanna masa toh kitoh lou ahi”, ati.

July 28 ni a, Congress in state sorkar douna a ‘no confidence motion’ apehlut ahi in, ahivanga Opposition hon no-confidence motion apehlut san peh louva Speaker in sorkar in apohdoh ‘vote of confidence’ joh asana hi. Parliamentary proceeding a expert hon asei dungjuiya, no-confidence motion hi motion adang tobang hilouva speaker in admit bol ding leh bol louna dinga thu aneilou, house in tha anei ahi, tin asei uvin ahi.

Opposition hon no-confidence motion thum apohdoh hi Business Advisory Committee in asan peh lou ahi. Indian Parliamentary thusim a aum behseh lou thilsoh ahi in, democracy kitha na ahi, tin Joy in aseiyin ahi. Dan dungjuiya, vote of confidence masanga House in business dang alah theilou ahi. Special session a agenda 8 list kibol a, hiche a hi ‘trust vote’ hi agenda achaina pen a um ahi, tin Joy in aseibe in ahi.

“Hitobang hi vannoi mundang, Indian Parliament ahilouleh state assembly dang a jong soh khalou ahi in, parliamentary procedure ahet louvu ahilouleh he na sa a thanei vetsahna a abol u ahi”, ati. Congress hon asei dungjuiya voice vote bol ding deilouna thu kiseiya ‘division’ joh kithum ahi in, ahivanga Speaker in asan peh loujeh a opposition hon vote jouva kiphinna abol uva, house sunga kisen chule touna kipai na thilsoh um ahi, ati.

“Covid 19 pandemic sung, khamnathei toh kisai chule Manipur a thukhoh khoh tamtah aum laiya ipijeh a session hitia abol uham, ipi selguh ding anei uham, hiche hohi lhangphong live-televised session bol ding ahi”, tin Joy in aseibe in ahi.

Xxxxxxx

Covid-19 pandemic sunga mihem ngailutna natoh na a Kangpokpi kihilna thei hijing

KANGPOKPI, Aug 21(UNA): Kangpokpi district a Covid-19 pandemic douna dinga nam pumpi in pan alah na tuni chan geiya pachat umtah hi a, gamsung mun chom a tamtah dinga kitilkhouna a pang ahi.

Chawangkining COVID-19 Relief Committee hi Chawangkining Village Authority in asem doh ahi in, “Mihem a dinga thilpha bol ding Pathen natoh na ahi’ tia kisemdoh voluntary organization khat ahi in, pandemic douna a pan lahkhom ding hi agel thupi ahi. Chawangkining hi Twilang lampi (Imphal-Tamenglong Road) kiti gamsunga highway luipen a um kho khat ahi in, Kangpokpi District headquarter a kon km 12 vel a gamlha ahi.

Chawangkining khosung mihon Chawangkining Village Authority leh Chawangkining Village COVID-19 Relief Committee lamkaina noiya tunin district sunga um IQC chom chom a gam a kilou me athah thah tamtah kithopi na a ape uvin ahi. Hiche masanga jong Chawangkining COVID-19 Relief Committee hon district sung bou hilouva Senapati chule Imphal district a jong gamdang a kon hung kile ho kithopina avel vel a ana neiyu ahi.

SDO Chunglenmang Kipgen, MCS umna a Kangpokpi a dinga centralized kitchen hi a TBA Church Kangpokpi mun a Village Authority leh Relief Committee hon khosung mihon achomkhom me/anche Tata DI khat dimset a apoh u pehdohna anei tauvin ahi.

Team hohi Ch. Wishubui, Chairman, Chawangkining Village Authority, Adam Gonmei, Convenor, Chawangkining Village COVID-19 Relief Committee leh Wichamdinbou Charenamei, Co-Convenor, relief committee leh adang dang lamkaina a kalsong u ahi.

TBA Kangpokpi a houbung lamkai Thanglensei in achung uva kipa thu sangtah aseiyin, pandemic sunga nap ha toh na a pang tamtah lah a Chawangkining kho mihon pan alah nau asang in, midang tamtah dinga kihilna leh kitilkhou na ahi, tin aseiyin ahi.

Chawangkining Village Authority Chairman, Ch. Wishubui injong TBA Kangpokpi leh SDO Chunglenmang Kipgen chunga akipana thu aseiyin ahi. Gamdang a kon hung kile hohin hahsatna tamtah ahin to jou uva IQC a amaho chule society venna dinga um u ahi in, District Administration neh leh chah chule lhunna ding gon na a pan sangtah alah ahi, tin jong aseiyin ahi.

xxxxxx

Naga thu boina aso lou nadinga seilhah ding ahi: MP Leishemba Sanajaoba

Imphal, Aug 21: Tu naicha Rajya Sabha Member of Parliament dinga kihahselna neiya leng phunggui hi a Leishemba Sanajaoba in India sorkar chule Naga Socialist Council of Nagalim (NSCN-IM) in kihouna anei hi boina beiya seilhah dinga aseiyin ahi.

Upper House member ahi jouva Ukhrul district a akhol jin masat na pen a EastMojo toh interview abolna a Sanajaoba in, Naga Peace Talk thulhuhna akisem teng leh thinglhang leh phaicham ani a dei umlou boina asodoh lou ding adeisah na thu aseiyin, gamsung miho pohnatna hilou ding ahi, ati.

Naga hon pan alah nau hi kum 60 val ahitan, Centre leh NSCN-IM in kihouna asem hi chamna adet na ding hisah ding ahi, ati. “Indo-Naga Peace process hi boina umlouva ana kipan ahi in, kinahna a seilhah louding, stakeholder jouse kihouna a pan sah a, final agreement sem ding ahi”, tin aseiyin chule Naga peace talk boina beiya achelhah nadinga pathen henga taona kaneiye, ati.

Naga thu kiseina a thinglhang leh phaicham mihon angaicha louna boina asem lou dinga gamsung miho henga temna jong aneiyin ahi. State Home Department in tu masanga N Biren Singh lamkaina sorkar in tuchan a Centre toh hiche thu a kihouna aneipoi, tia suhthengna ana neiyu ahi.

Union Ministry of Home Affairs (MHA) in draft accord hi kihouna dinga aseiyu lhakhat masanga apeh diuva jong state sorkar in MHA henga temna anei ahi in, lunggel leh ngaidan state in phatah a asei thei na ding dinmun apeh diuva aseiyu ahi, tia Joint Secretary (Home) Rehanuddin Choudhury in anasei ahi.

Thulhut dungjuiya, Centre leh NSCN-IM in kihouna anei ‘final accord’ soi kaina anei masang uva Centre in Manipur sorkar chule gamsunga um stakeholder adang dang ho akihoupi masat ding ahi, tia kisei ahi. Naga Flag leh Constitution tilouva ‘Greater Nagalim’ ahilouleh Naga chenna gamkai jouse punkhom ding (integration) ding hi NSCN-IM in thumna anei pipen khat ahi

Nagaland gam tilouva Manipur gam chule Arunachal Pradesh, Assam leh Myanmar gam a jong Naga tamtah cheng ahi.

Xxxxxxxxx

Themmo kichan to ngah ding ahi, tia CAF & PD Minister K. Shyam in politician ho henga sei

Imphal, Aug 21(ET): CAF & PD Minister Karam Shyam in politician ho khat leh khat themmo akichan to jing angah diuvin temna aneiyin ahi.

Lilong Chajing Mairenkhong Community Hall mun a LJP a athah a member a kilalut ho ‘reception program’ chule lolhinna nei simlai ho prize distribution program aman nauva K Shyam in, tua politics dinmun hi politician ho khat leh khat themmo kichan to jing u ahi, tin BJP lamkaina coalition party ho kah thu aseiyin ahi.

Covid 19 kisei khoh laitah a hitobang a kingoh to na anei jingu hin politician ho tahsan lel na hiding ahi. Politician ho kah a kihetthem to na aumlou hin politician ho khonung asuhboi ding ahi. Alangkhat a, K Shyam in mipi lhendoh kahi jeh a sorkar det sem dinga kigel lhah na dettah kanei ahi.

“Boina umjong leh politics hi pam koi thei ahipoi. Politics umlouva ima imu loudiu ahi. Chuleh social service dalhah jong dihlou ding ahi in, lolhinna nei simlai ho tilkhou jong ngai ahi”, tin CAF & PD Minister in aseiyin ahi.

Petrol pump retail outlet kikha thu a Karam Shyam in government gari ho a ding tilouva retail petrol pump adang hohi rotation basis a akihon ding kiphal ding ahi, tin jong aseiyin ahi.

Xxxxxxxxx

Congress in apaidoh ‘vangset um’ ahi e tia RK Imo in sei

Imphal: Congress party in August 20 nia apaidoh chu vangset umtah thil ahi e tin Sagolband A/C MLA RK Imo in asei e.

Imo in BJP makaina state government chung a August 10, 2020 ni confidence motion a jong party thupeh ngai a INC a dia kana din vang a paidoh a um kahi in CLP lamkai Okram Ibobi Singh thusah mai mai a MPCC in congress a pat ei moh paidoh ding ahipoi, ati.

Imo in aseikit na ah CLP lamkai Okram Ibobi Singh in anop chabep in INC vai ahom khum in, ageltoh lou lamkai phabep in anung ajui ahi e, ati.

Imo in paidoh mong ding kahi jong le RS Election a Maharaja ka dinpi a chu paidoh ding joh kahi in, Assembly Session a Congress ka dinpi pet a paidoh lou joh ding kahi e, ati.

Chule khang thum channa a congress kana hi vang in 2007 leh 2012 chun Congress Party ticket jong eina kipe pon hitia hi keima le ka insung hi Ibobi in adoujing chu kahi in, hitia khat in anop chabep a congress sung vai ahom jing jeh a congress MLA 28 ana hi jong tu a MLA 15 bou um ahitai, ati.

Chule INC MLA 6 jong CLP lamkai tahsan lel jeh a MLA le Congress Party a pat hai ahiuvin chule party a pat eikipaidoh masang in INC Party WhatsApp Group a kon a jong eipaidoh u ahi in aphapen chu district khat a pat CLP leh PCC president hi ngai khoh mong ham mipi le congress nungjui hon agelcheh ding in jong Imo chun temna anei e.

Xxxxxx

COROBOI – 3D Android Game kiti Manipur kum 13 chapang khat in semdoh

Imphal, August 21(ET): Manipur mi kum 13 chapang khat in COROBOI, 3D Corona kichepna asemdoh chu Google Play Store a vet thei din atahdoh tan ahi. Thilthah semdoh Baldeep Ningthoujam chu Kha-Naorem Leikai, Pechu Lampak a cheng Kishan Ningthoujam le Nebedita Ningthoujam chapa tahsa kum 4 ahi a pat computer hin thampan, Premier English School, Canchipur a class 9 simlai leh Javascript, PHP, JAVA, Kotlin ho a thepna sangtah nei jong ahi.

Baldeep hin masang a jong private company website phachompi jong ana sem in seithei ho chu eThabak app, Manipur Times delivery app, Hello Food Express app chule Temple of Learning te website jong ahi.

Manipuri leh English hethei car robot khatjong ana semdoh jeh  a Langthabal Assembly Constituency MLA Karam Shyam in kithopina jong ana peh ahi.

Baldeep in COROBOI game hi Unity, Blender kiti software a pat asemdoh a C# tia aminvo ahi.

Baldeep paneo Rakeshor Ningthoujam in telephone a Imphal Times toh akihouna ah game chu android a um ahivang in sum lut ahijeh in iOS vang manthei ahinaipoi, ati.

COROBOI game hi Google Play store  https://play.google.com/store/apps/details?i d=com. baldeeningthoujam.coroboi a pat lahdoh thei ahi in, tu le tu a hi 4.8 star review nei ahi.

Xxxxxxxx

Governor houlimna mipi in asangthei poi:  Nagaland Ruling Alliance

Imphal Aug 21: Governor RN Ravi Independence Day houlimna chu Nagaland mipi in apomnom behseh lou dan in Neiphiu Rio makaina People’s Democratic Alliance vaihomna chun asei e.

Government hi Rio party  Nationalist Democratic Progressive Party (NDPP) le BJP kiloikhomna in asem ahi.

Governor deimo a BJP in kam akeh jong tuchung apatna ahiseh hilou in state vaihomna toh Ravi hi kilhon khom theilou dan a umdoh ahi.

Hetding chu Ravi hi Naga thu a palai a pang le Prime Minister Narendra Modi manchah khat jong ahivang a Thursday ni  People’s Democratic Alliance (PDA) Kohima kihoukhom a chu NSCN(IM) toh kihouna palai a pat Ravi lahdoh dia jong thulhuh anei u ahi.

PDA hin centre le NSCN(IM) kah a 2015 framework agreement heikon le a Governor themmo achan ahi.

BJP president Temjen Imna leh NDPP president Chingwang Konyak chun Indo-Naga kihouna sutjom dia Prime Minister le Home Minister ban a government of India thulhuh asem u chu akipapi lhon ban a gamsung khantou machal nadia agelkhoh cheh dia jong temna aneilhon ahi.

Governor houlimna chu mipi in asangthei pon, Nagaland hi vaihomna hoipen jong hilou maithei ahinla gamsung machal nadia theitop so a pan ladia um akihi tolhon a mipi thalheng hinadol  a mipi lunggel a um phondoh ding chu kakin u jong ahi e tia thulhuh asem u ahi.

Governor Ravi in  Independence Day ni ahoulimna a chu gamsung khantou machal nadia sum le pai ho adei bol a thuh tah a natong hon mipi kom alhut tahsang a boina joh in gamsung alonkhum jeng hi mipi kinepna sukeh ahi in, hitobang pom hahsa suhbei a mipi kipana le khantou nading lampi hol joh ding ahi e tia ana sei ahi.

Hitolhon a Joint Legislature Forum a pat Naga Peoples Front (NPF) in apotgot jong athah gel dia state vaihom PDA chun temna jong anei ahi.

Xxxxx

Telangana leiko noi Hydroelectric Plant meikah a ohden mi 9 abon a mollem, CID in kholchilna aneidia CM in phongdoh

Hyderabad, Aug 21: Telangana leiko noi Hydroelectric plant jannilhah meikah a ohden mi 9 ho abon un amollem tai tin senior government official khat in tunichun asei e.  Nagarkurnool District Collector L Sharman in tuchan in mi 6 bou lahdoh ahinalai in adang mi 3 ho lahdoh dia hatah a boipi ahinalai e, ati.

Sharman in Suryapet mi  assistant engineer Sunder Nayak long lahdoh a um chu post mortem dia thotdoh ahi in, long ni na lahdoh a um chu assistant engineer Mohan Kumar ahi e tin police hon asei e.

Leiko noi Thursday jan nidan 10:30 meikah pet a chu mi 19 um lah a mi 10 chu jamdoh man a mi 9 chu ohden ahi.

Hiche thilsoh hi CID in kholchilna anei a thulhut state government ahin pehlut ding in Telangana chief minister K Chandrasekhar Rao in aphongdoh pai e.

Power station a um unit 4 na meigui a meikah kipan hidia vang ginmo ahi e. Hiche meikah khu chun unit 6 pumpi a sa tah a khu a kongdoh ahi.

Sharman in meiphal gari 5 tah in meikah chu achen mit vang in mun jouse mei in atomchah nahlai ahi, ati.

Mi huhdoh dia kigong ho jong jingkah chan a thumvei lut dia akon vang uva meikhu atambeh jeh lut thei lou a um den chu tuni jingvai nidan 11 vel chun alut thei bep uve tin Sharman chun asei e.

Sharman in huhdoh thei um am tichu gelkhoh pen ahi e ajehchu asung a um khat in jong mobile achoilou u ahi e, ati.

Chief Minister Rao in thilsoh chung a nopmo asah na jong aphongdoh pai ahi.

Nagarkurnool district fire officer Sri Das in asei na ah Kurnool district sung Kothakotta, Mahababubnagar, Amarabad, Achampeta le Atmakur a pat meiphal gari ho chekhom ahi e, ati.

Meikah phal a che ho jong kho helou a umdoh loi jong aum in vangphat umtah a meiphal gari tol mutom jal a huhdoh a um kit ahiuve. Hiche boipi hin NDRF ho jong ache un, leiko noi a natong a che Singareni Collieries ho jong hiche meikah mun a panla din kou ahiuve.

Xxxxxx

Online a louthem kivetsahna thei Medilane in gongdoh

Imphal, Aug 21(ET): Covid-19 natna hise umlai a dammo veiset thu a mipi in hahsatna ato olsah ding ngaito na in Manipur a Healthcare tahsan umpen Medilane in Manipur leh North Eastern State ho a din Online a louthem kivetsah nading hondoh ahitai tin Dr M.Dayananda @Pibarel Meetei, Founder le CEO Medilane lekha sodoh chun aseiye.

Dayananda in tulai gamsung boilai a louthem kom che nadia damlou hon hahsatna ato ho gelkhoh jal a Manipur leh North Eastern State ho dia hiche tohgon hi kigongdoh ahi, ati.

Hiche gon kal ni 2 phatsung a min hin pelut mi 200 vel lah a mi 100 tobang vet chai ahi a kon mi deilam ahi hetdoh thei ahi.

Online kivetsahna a miveding louthem ho chu Dermatology ( Skin), General Medicine, Urology, Cardiology ( Heart), Gynaecology (Numei natna) , Paediatric (chapang natna), General surgery, Psychiatry, Dietician, Physiotherapy, ENT, Ophthalmology (Eye),Dental, Ortho, oncologist (cancer natna), Neuro medicine ( stroke le neurological natna ) ho kivetsahthei ding ahi.

Kivetsah nom hon 24×7 Medilane helpline number +919205987988 a anomchan in min akipehlut thei, kivetsah man jong Dk. 100 a pat Dk. 400 kikah hiding hichu online a pat Gpay, Paytm, netbanking , card payment a pehding ahi.

Medilane CEO in asei be na ah BPL leh AAY Card nei ho manlhom a vet hiding, hiche tohgon hi tulai natna hise lenlai a Manipur leh North eastern state ho dia phachomtah ahung hiding tahsan ahi, ati.

Xxxxxxxxxx

Assam Rifles hon Covid-19 dan ajuilou in asang a sim Mizo mipi ho dinmun ase lamtah in aumsah e tia themmo achanna government in DIG 23 Sector jihtho a hetsahna nei

Aizawl, Aug 21: Mizoram gam hopsung Vairengte a dan juilou hel a Assam Rifles ho chaloh in asang a sim Mizo mipi ho Covid-19 thu a dinmun kichat umtah a akoi jeng chu Zo Indigenous Forum hon phamo asa lheh un ahi.

State government in medical screening dia dan akoi juilou a 46 Battalion Assam Rifles sepai mi 13 vel in Vairengte mun a kotbul (gate) chu August 18, 2020 nia hunam chang a atum vong tho ahi.

State kichot tona kotbul ho a juiding dan kisem ho Assam Rifles hon nahsah in aneipoi tia Mizoram state government chun AR ho themmo achan ahi.

Gamgi kotbul a lut ho RAT bolcheh ding state government dan sem chu Border Security Force hon phatah in ajui un hinla Assam Rifles in state government dan koi chu nahsah lou hel in apalkeh un, melse cheh in Captain khat makaina’n uniform le meithal lhingset kivon sepai mi 25 in Vairengte kotbul alut un, hitia hi government official leh Vairengte kho mi ho kichatsah dia Assam Rifles ho um mong hidia jong tahsan ahi e, ati.

State government in May a pat August 10 phatsung a Assam Rifles sepai mi 1124 vel Mizoram hunglut holah a 10 percent velchun Covid-19 natna nei ahi e, ati.

Chule state sung a Covid-19 natna nei mi 873 lah a sepai natna nei mi 339 hi 38.83 percent ahi in, hiche lah a Assam Rifles mi 101, BSF 230 abanle CRPF le Army a pat mi 4 cheh in Covid-19 natna nei ahi e tin health department thuphon chun asei e.

Hitia umchan hoilou tah le hunam mang a state government dansem juilou a Assam Rifles chalohna Mizo mipi dia tijat umtah sodoh thei thilsoh chu Zo Indigenous Forum in nasatah a themmo achan ahi. Ministry of Home Affairs (MHA) thupeh paolap a Assam Rifles ho chaloh hi mipi ding khohsah lou na umchan kichehsel ahi in hijongle Mizoram mipi le government dan sem ho jana peding in security force ho temna jong anei un ahi.

Ama hon aseikit na ah UNDRIP Article 30 dan dungjui a north-east gamsung a gammi toupha gam leiset sung a sepai moh cha lou dia kisei juilou a aum hi gam mipi dia thilkhoh tah ahi e, ati.

Hiche thilsoh hi Mizoram state home department in 23 sector Assam Rifles DIG Brigadier Vinod S jihtho a hetsahna apehban a Covid-19 natna in gamsung alonkhum lai a umchan hoilou a sepai ho chalohna suhtang ding a ngehna jong anei pai ahi.

Hetding chu Covid-19 natna umsung  a sepai kitol le jong phatchomkhat khongaisah dia chief minister Zoramthanga in  Prime Minister Narendra Modi kom a ngehna jong ana pehlutsa ahi.

Xxxxx

Koite Lui in alhoh chapang khat kihuhdoh

L. Seikholen Khongsai

Ccpur, Aug 21(ET): Churachandpur District hopsung Koite lui ah tunin (Aug. 21) pasal chapang khat analhoh in ahin vadung’a neldi loh’a natong pasal khat in anahuhdoh man in ahi tin thulhut chun aseiyin ahi. Chuleh hiche chapang pahi vadung in ahin lhoh natong khat in anamudoh pai jeh chun atahsa kita khah na neo khat jong um louvin damsel in anahuhdoh man in ahi. Hetthei khat chu avel’a um hon hiche pasal chapang hi Nabil kho akon Paothang chapa ahidan jong anatahlang uvin ahi.

Xxxxxx

CCpur District hopsung S. Phaiza kho kom’a passenger gari khat in toset toh; mi 15 kitongkha

B.LALBOI GANGTE

CCPUR. AUG. 21 (ET) : CCpur Khopi akipat kipandoh Behiang kho jon Tata pickup (Registration No. MZ-06 4219) khat tuni (Aug.21) jingkah nidan 8:00 vel in S. Phaiza kho gei’a toset anatoh in asung’a tou mi tamtah anakisukha in ahin thina toh vang ana umpon ahi tin thulhut chun aseiyin ahi. Chuleh akisukha holah’a kimkhat X-ray akila in ahin adang ho vang serious behseh aum pon ahi.

Hiche toh lhon’a toset na’a akisukha hochu Rebek (40) W/o Ginkhanlian of Dorcas Veng, New Lamka; Ginkhanlian (38) S/o Vungzakhup of Dorcas Veng; Thangmuanlian (35) S/o Khupzakhai of G. Tonjang; Chingbiaklian (24) D/o Paulemthang of New Zou Veng; Baby Chingdeihnuam (6) D/o Mangkhansuan of Suangpeh; Chinkhanlam (63) S/o (L) Nangkhokam of L. Kanan; Vungkhoching (55) W/o (L) Khamchinkhup of Behiang; Liansuanthang (23) S/o Pauzagin of Behiang; Thiangching (27) D/o (L) Tuangkhankham of Vengnuam; Vunghoihkim (23) D/o Kapsuanmang of Suangpeh; Niangngaihlian (40) W/o Lunkhanmang of Kanan Veng; Niangngaihkim (37) W/o Mungkhansuan of Suangpeh; Siantung (69) S/o (L) Chintong of Suangpeh; Nanglianmung (30) of Hiangtam (B); Ginsialkap (62) of Suangphuh leh Suanliankhup (19) of Suangphuh ahi.

xxxxxxxxxxxxxx

CCpur District a Covid-19 toh kisai’a CMO CCpur lamkai nanoi’a kihoukhomna anachelha

B.LALBOI GANGTE

CCPUR. AUG. 21 (ET): Chief Medical Officer (CMO) Churachandpur lamkai nanoi in tunin Conference Hall, GNM School of Training mun’a kihoukhomna ananei uvin hiche achun tuni chan’a Covid-19 doudalna toh kisai’a natong chom chom Covid-19 Care Centre, Institutional Quarantine Centre, Community Quarantine Centre, Screening leh Segregation Centre, Sample Registration leh Collection Team, Driver, Cook, Nodal Officer leh Medical Officer hon pan anala uvin ahi.

Hiche toh lhon’a Dr. Vumchinpau Tonsing, CMO in Covid-19 natna toh kisai’a hetthem lou na umho hilchet na anei naban’a meeting kikoulo na ajeh tahlangna aneiyin ahi. Dr. Genthianson, Transport in-charge, Covid-19 Churachandpur leh Dr. Thanglalmuang, DNO, CQC, Dr. Dona Samte, DNO, IQC leh CCC chule Dr. Sania Monica, DNO Sampling hon jong thil chelhah dan toh kisai’a hilchetna jong anape uvin ahi.

Alangkhat’a thulhut kimu dungjui’a CCpur District sung’a Covid-19 doudalna toh kisai’a District Health Society chungchon’a natong ho honararium ding 4 vei hung ahung tan hiche lah’a ahung masa leh hung jom ho Quarantine Centre ding’a akimangcha in ahi. Chuleh honorarium ding’a hung a-thum veina channa hi achombeh’a IDSP a ding ahin chuleh a li (4) veina hi Sample Registration leh Sample Collection Team a ding ti ahivang in amaho toh kitho’a tongkhom Driver, Grade-IV leh adang dang um ahina’a kining lhing lou ding ahi jeh’a hopdoh louvin akikoi in ahi akiti. Honorarium hi atong jouse koima aneo alen khentum umlouva kibang cheh’a Dk.150/- hopding’a hung ahi tinjong akiseiyin ahi.

 xxxxxxxxxxxxxxxx

Songgel Home CQC a um inmate ho quarantine achai utoh lhon’a lhadoh hita

B.LALBOI GANGTE

CCPUR. AUG. 21 (ET): Home Community Quarantine Centre, M. Songgel a um inmate jouse tunin (Aug. 21) analhadoh tauvin ahi. M. Songgel hin Covid-19 um toh kilhon’a Home Quarantine ding’a Home Community Quarantine Centre anasemdoh utoh lhon’a hiche mun ahi khosung mi mun dang apat hung jouse in Quarantine Centre ahin chai jouphat uleh hiche mun’a hi nikho 14 sung anaum sah ji’u ahi. Hetthei khat chu M. Songgel kho hi inn 320 val aum toh lhon’a khosung’a Government building aum lou jeh’a imalam jouse’a Village Authority vaihop nanoi’a kivaipo’u ahi.

Hiche toh lhon’a M. Songgel Home Community Quarantine Centre hi Village Authority vetkol nanoi’a chelha ahi naban’a ECA Sunday School Building Room 10 alo ahi. NGOs leh Government akon panpi na um hih jong leh  khosung’a mi hongphal hon atokhom ho mancha’a Home Community Quarantine Centre hi avetkol’u ahi. M. Songgel Home Community Quarantine Centre In-charge Paojathang Secretary, Village Authority in aseina’a achesa May nisim 20 akipat M. Songgel ECA Campus sung aum Sunday School building ah Village Home Quarantine Centre kiti ana kisemdoh in chule tuni chan’a inmate 88 vetkol’a um ahi. Chuleh inmate a umho hi Bangalore, Delhi, Mumbai, Shillong, Punjab, Guwahati, Mizoram leh Foreign gam kimkhat akon hung kipan anahi vang uvin koima Covid-19 positive vei ana umpon ahi ati.

 xxxxxxxxxxxxxxx

CCpur District a Covid +ve case thah 2 kimudoh; agom’a case 605 lhingta

B.LALBOI GANGTE

CCPUR. AUG. 21 (ET): District Surveillance Unit, IDSP/ CCpur in Covid-19 toh kisai’a report asodoh toh lhon’a tunin (Aug 21) CCpur District sung’a positive case thah 2 akimudoh in ahi ati. Chule hiche case kimudoh hohi Imphal khopi sung Shija Hospital a admit aum damlou pasal 1 leh JNIMS hospital a admit aum damlou pasal 1 ahi tinjong aseibei. Tuni case thah 2 kimudoh toh lhon’a District sung’a positive case 605 alhing tan ahi.

Hiche toh lhon’a tuni chan’a case 605 um nalah’a adamtheng 327 (54.04%) aum tan chule active case 278 aum nalai in ahi. Covid-19 veiho hetdoh nading’a Rapid Antigen Test kibolna’a sample 1429 test lah’a  positive 109 mudoh ahin chuleh adang jouse hi RT-PCR akon ngen ahi. Alangkhat’a mun dang akon hung kipan total line listing 6801 aphatan hiche lah’a sample kilasa 12,415 alhing tan chuleh result kisodoh 12,153 ahin sohdoh nailou 50 aum nalai in ahi.

xxxxxxxxxxxxxxxxx

Nagaland a Covid +ve case thah 36 kimudohbe; agom’a 3,619 lhingta

KOHIMA, AUG. 21 : Nagaland a Covid +ve case thah tuni 36 akimudohbe toh lhon’a agom’a 3,619 alhing tan ahi. Hiche case thah kimudoh hohi sample 742 test kibol na’a kon kimudoh ahidan thulhut chun aseiyin ahi. Chuleh case thah 36 kimudoh lah’a 17 hi Kohima akon, 10 hi Dimapur akon, 7 hi Zunheboto akon chuleh khat hi Peren akon ahi.

Alangkhat’a tuni Dimapur akon case thah 10 akimudohbe kit toh lhon’a District jouse lah’a ding’a case tamnapen ahi naban’a tule tun confirmed case 1,850 val aum tan ahi. Chuleh Kohima a jong case thah 17 akimudoh kit toh lon’a confirmed case 1,009 alhing tan ahin tule tun active case 610 aum in ahi. Hiche naban’a Peren District a +ve case 266 lah’a tule tun active case 16 aum in chuleh Zunheboto District a +ve case 107 lah’a tule tun active case 70 aum nalai in ahi.

Xxxxxxxxxxxxxxx

Assam Rifle hon daan toh kitoh louva Dk. Lakh 20 vel man bim mandoh

UKHRUL, AUG. 21 (ET) : HQ IGAR (South) vetsui nanoi’a um Assam Rifle hon Ukhrul leh Kamjong District akon Imphal lam’a ding’a hung kipo daan in aphallou bim (timber) Dk. Lakh 20 vel man ding anamandoh uvin ahi. Hetthei khat chu thuguh pole ho’a daan dih louva bim’a kivei aum’e ti thu Assam Rifle hon thulhut amu dungjui uvin janni (Aug 20) nilhah nidan 9:00pm vel akon in Lambui vehicle check post mun’a kiging jing’a ana umtoh lhon’a tata truck 5 anamandoh uvin ahi. Hiche truck 5 lah’a 2 bearing registration no. MN-01-8251 leh MN-04-33175 hi Kamjong akon chuleh truck 3 bearing registration no. MN-01-8017, MN-05-3905 leh MN-04-0889 hi Ukhrul akon Imphal lam jon ding’a ahung nao’a anamat’u ahi.

Hiche toh lhon’a check post mun’a Assam Rifle hon document ho kholchilna anei nao’a akon daan dih louva hung kipo ahidan anahetdoh’u ahi. Chuleh truck driver ho chu Santosh Bhandari, r/o Ukhrul; Prem Singh, r/o Khurei vill; Lukhoi Singh, r/o Lamkai vill; Ngaraipam Kashung, r/o Ukhrul leh Tomba Singh, r/o Imphal akon ahidan anahedoh uvin ahi. Hiche naban’a driver le co-driver hon document kituptah’a anapohdoh jou lou jeh uvin tuni (Aug. 21) jingkah’a nidan 7:30 vel in Shangshak Police Station khut’a anapelut tauvin ahi. Truck in ahinpoh bim (pinewood) hi 2300 cubic feet ahin asum a sei ding in Dk. Lakh 20 vel man ahi.

Xxxxxx

India a Covid-19 natna akon damdoh 74% val ta

New Delhi, Aug 21: India sung a covid akon damdoh na nei mi 74 percent aval tan ahi akiti. Thuso kimu dungjui in achesa nidan 24 sung in mi 62,282 lam in damdoh na anei uvin ahi akiti. Gamsung a covid akon damdoh an nei hi agom in mi 21.5 lakh lam alhing tan ahi tin Union Health Ministry akon thuso kimu chun asei in ahi. Athi aum beh tah loudan jong hetsahna anei in ahi.

Achesa June nisim 17 chan a chu damdoh na nei hi mi 52.8 per cent ahin hinlah July 16 akon chun 63.24 pc in ahung khang in ahi akiti. Tu le tua gamsung a natna nei hi 6,92,028 lam ahi akiti. Hiche natna jan na ding hin hospital jouse phate in vetsui na akinei in, inna um ho jong vetlhah na akinei jing in ahi akiti. Natna nei hopoh le nading le vetsui na ding a tohgon jat chom cho akinei jingdan jong hetsah na ahung kinei in ahi. Hitabang tohgon ho akon a gamsung a thina toh hi hung lhom ahi tin ministry akon thuso kimu chun asei in ahi.

Damdoh na nei state ahilou le UT holah ahin Delhi a atampen in, adamdoh jat hi 90.10 per cent ahin, Tamil Nadu a 83.50 pc, Gujarat  a 79.40 pc, Telangana a 77.40 pc, Rajasthan a 76.80 pc, West Bengal a 76.50, Bihar  a 76.30 pc  chuleh Madhya Pradesh a 75.80 pc. Ahi. Tuni a gamsung pumpi a sample ana ki test doh jat chu 8,05,985 lam ahin tu chan a gamsung pumpi a sample ki test doh jat hi 33,467,237 ahitan ahi akiti.