Manipur a masapen ding’a Covid-19 jeh’a mikhat thi; Insung miten thilong alahlou...

Manipur a masapen ding’a Covid-19 jeh’a mikhat thi; Insung miten thilong alahlou jeh uva authority hon ‘public crematorium’ a thi long meiya gou tau

53
0
SHARE

Manipur a masapen ding’a Covid-19 jeh’a mikhat thi; Insung miten thilong alahlou jeh uva authority hon ‘public crematorium’ a thi long meiya gou tau

IMPHAL, July 29(ET): Kum 56 a upa Khongjom a kon pasal khat Wednesday jingkah nidan 2.30 don a akijen na Regional Institute of Medical Sciences (RIMS) Covid Care Centre a COVID-19 natna jeh a athi tan, Manipur gam a Covid 19 jeh a thi masapen ahitai.

Achesa May nisim 5 nikho a RIMS a admit abol u ahi in, July 26 nikho a COVID 19 positive ahi kihedoh ahi. Vangsetna toh pa hin chronic kidney disease leh diabetes panna a natna chom chom aneiya chule dialysis avel vel a kibol ahi, tin Prof. Ch. Arunkumar Singh, Medical Superintendent, RIMS in aseiyin ahi. Prof Ch Arunkumar in asei dungjuiya amahi, Chronic Kidney disease, respiratory tract infection, Covid 19, Type-2 Diabetes Mellitus chule Hypertension jeh a thi ahi.

Thoubal district a cheng Manipur gam a dinga Covid 19 positive jeh a thi masapen kum 56 a upa mipa thilong hi insung miten alah nom loujeh uva official hon ‘unclaimed’ ahi, tia phondohna aneiyu ahi. Additional Health Director Dr. K Sasheekumar Mangang in asei dungjuiya, athi pa achenna a inheng achenkhom pi hon natna kilah son to nathei dinmun lentah aume, tia insung mite henga hatah a asei jeh uva insung miten thilong akilah thei louvu ahi, ati.

Chomkhat jouse, thilong Imphal Municipal Corporation crematorium mun, Imphal East district a meiya agou tauvin ahi. Natna nei pa hi Imphal West hopsunga um hospital a athi ahitai, tia phondohna aumjeh a district police commissioner leh Superintendent of Police in state sorkar a kon phalna alah a, thilong lhahna kin aneiyu ahi, tin Dr Mangang in aseibe in ahi.

RIMS Medical Superintendnet Dr Ch Arunkumar Singh in asei dungjuiya, vangsetna toh Sapam Basanta Singh hi achesa May 22 nikho a Chronic Kidney Failure type V jeh a hospital a ahin pohlut u ahi in, Sunday nikho a coronavirus positive ahi kihedoh ahi.

Hetthei khat chu, Health Minister L Jayantakumar in hiche masanga, thilong hi Government Crematorium Centre, Minuthong, Imphal a SOP (Standard Operating procedure) jui pum a kisumang ding ahi. Athi pa insung mite hon mopohna nei DC henga lekhathot apeh nauva, mipi ding gelna a thilong lah tahlou dinga aseiyu ahi, tin Minister pa in aseiyin ahi.

Manipur gamsung, adeh a Thoubal district a COVID 19 positive case hi kal cheh cheh ahi, tin Jayantakumar in aseiyin, chule sorkar in gamsunga natna vettup nadinga bol thei chan abol ahi, ati. Sorkar in COVID 19 positive case atam cheh cheh jeh a COVID care centre athah hon be ding jong angaito ahi. Hinkho huhdoh ding hi thupi ahi in, mipin natna nei ho athet bol louding chule natna douna a khat leh khat akitosot to joh diuvin jong Minister pa in temna aneibe in ahi.

Alangkhat a, RIMS staff ho tunin mass testing abol uvin ahi. Hiche masanga RIMS Medical Superintendent in RIMS hi July nisim 29 chan kikhah ding, hijong leh emergency service leh adang phabep kihong ding ahi, tia anasei ahi in, ahivanga, staff ho test kibol tuni chan a akijo joulou lai jeh a RIMS in OPD hi August 1 a hon dinga thulhuhna anei ahi.

“RIMS a kijen dinga hung natna nei ho leh ahin kilhonpi hon natna akilahson diu kichatna akinei jeh a OPD panna a department phabep hi phat chomkhat sunga dinga kikhah ahi in, hospital a adamlou hon natna akilah son to louna dingu ahi”, tin Prof. Arun in aseiyin ahi. Hijong leh emergency service, ante natal leh department dang kihong ahi, ati.

Covid natna akisei jing laiya, dammona nei adang ho phatah a akijen thei nadinga COVID 19 hospital achom a umsah dinga Medical Superintendent in ngaidan anei thu jong aseiyin ahi. “Hospital a hung COVID hilou natna nei adang hohi ‘minute 10’ val lut louva manchah (equipment) a kive ding ahi”, tin aseibe in ahi.

Manipur a covid-19 case thah 141 kimudoh, Nikhat sung a kimu tampen hi

Imphal, July 29(ET): Covid-10 common control room akon thulhut khat in aseina achun tuni chun Manipur a covid-19 case thah 141 akimudoh e ati. Tuni a kimudoh hochu RIMS (12), JN1MS (78), DM Thoubal (7), Churachandpur (9), Tamenglong (4), Babina Diagnostic Centre (2), 1st MR (3) and Imphal West RAT (26). They belong to the districts of Imphal West (30), Churaehanpur (51), Thoubal (8), Imphal East (7), Bishnupur (2), Scnapati (29), Kakching (7), Kamjong (3) chule Tamenglong (4) ahi. Abon uvin covid care facilities ho a kijen ding in apolut tauvi chule travel history neiho jong authority hon akhol pai uvin ahi.

Alangkhat ah tuni pungkah 24 sung chun mi 38 ho adamdoh kit uvin JNIMS akon mi 6, CCC Meitram akon mi 16, Ukhrul akon mi 7, Thoubal akon mi 9 ho chu RT PCR test akibol uvin a result negative ahi phat in apotdoh tauvin ahi. Tuhin Manipur a hiche natna veikha case 2458 aphatan hiche lah achun active case 819 aum in chule adamdoh ho chu mi 1653 chule recovery rate 67.24 aphatan ahi.

IDSP Manipur in update abol nauva chun tuni chun sample 2508 test akibol in RIMS lab a test 456 akibol in, JNIMS a 1459 akibol kit in STDC/IRL Imphal Truenat a 4, District Hospital Senapati (Truenat) a 2, Rapid Antigen test (486), Babina Diagnostic (82) chule Shija Hospital (19) test akibol nalah achun mi 141 hochu positive ahidan akimudoh in ahi.

CCpur District a Covid-19 +ve case thah 9 kimu

B.Lalboi Gnagte

CCPUR, July 29 (ET): Novel Coronavirus (COVID-19) natna CCpur District sung’a 200 val akimudoh naban’a tunin jong case akimudoh kit in ahi. Tuni case thah kimudoh hi STC BSF Campus sung’a um 113 Bn BSF mi 9 ahi in amaho hi Rapid Antigen Test (RAT) mangcha’a test kibol ahi. Tuni chan’a BSF personnel Covid +ve 64 lah’a khat hi STC BSF akon, khat hi Loktak akon, khat hi CI Post Torbung akon chuleh adangse hi 113Bn BSF akon ahi. Chule achesa July nisim 23 nikhon District Administration in STC-BSF sung containment zone ding’a anaphondoh vang in natna vei kemsuh sang in atam cheh cheh jo tan ahi.

Hiche toh lhon’a STC-BSF toh kijom’a um Gangpimual kho sung hi sepai hon lamlhah na aman ji ahi jeh in khosung lungmon in aum thei tapon ahi. Hijeh chun mopoh naneihon avetkol ding uvin khosung mipin ngehna jong anei in ahi.

Khamnathei kimat na case len jouse CBI in akhol dinga ATRPFM in thumna nei

Imphal, July 29(ET): All Tribal Rights’ Protection Forum Manipur (ATRPFM) in gamsunga khamnathei chule dum (tobacco) thil kipoh na thilsoh atam cheh cheh apohnat nau thu asei uvin ahi. Hitobang khamnathei thil akimat a chule khamnathei po ho akimat na thilsoh hohi dinmun tahbeh ahi in, hijong leh mipin ahet lou, dan dihlouva kivei ho toh akah uva aseilhah u case tamtah jong um a, authority hon athu ahetphah lou jong tamtah um ahi.

Chief Minister in ‘Fight against Drugs’ slogan apohdoh hi sangtah a kakipapi uvin, hijong leh thu kisei toh amun a dinmun hi akibang pon, hiche hi mipi dinga lunglhai umlou tah ahi, ati. Akilhengdoh lamkai ho, CSO chule police officer ho kah a kingohto na leh kingoh son to na thilsoh tamtah um ahi in, hiche hin system a adihlou aume ti kicheh tah a avetsah ahi. Covid 19 protocol aum sunga jong dum thil chule khamnatheit hil akipoh theiya chule dukan (retail shop) ho a aman tahbeh sanga hatah a tamjo a kijoh ahi in, dan in akha thil po ho leh gari a hin po ho chule public leader phabep kikah a kisaina aume tihi avetsah ahi.

Achesa kum phabep sunga khamnathei leh tobacco thil akipoh na thilsoh tamtah kisei ahi in, akilhengdoh lamkai hon jong pan ala e, tia akingohna jong um ahi. Dum thil neh hi setna a kikoi ahi in, ahivanga, hitobang thil ho akipohlut theiya chule mantam tah a akimu jing thei hi milham ho dinga sum leh pai a hahsatna sangtah ahi, tin ATRPFM thuso chun aseiyin ahi.

Lockdown phat sottah akikoi jeh a, angaicha khoh thil ho man leh dum thil hohi man tam tah a kijoh ahi. Dinmun hi ahaosa ho hao cheh cheh a chule avaicha ho genthei cheh cheh na ding ahi. Hiche jeh a state sorkar leh police ho lunggel hi itobang ham tia thudoh theiya um ahi.

Hetthei khat chu Additional SP Thounaojam Brinda a kon khamnathei (drugs) douna a state sorkar akitah louna leh ginmo aumna thu ging doh ahi. Keihon kahet chan gei uva Th Brinda hin khamnathei thu a kitahna aneiya chule khonung khang huhdoh nadinga hahsatna tamtah ato vanga pan alah jing ahi in, chule state sorkar in ‘Fight against Drugs’ slogan achepi hi anatoh a asodoh uva ahileh hitobang kitahna nei police officer khat douna a state sorkar in na atoh ding ginchat umlou ahi.

Hiche jeh a ATRPFM in thudih a thutanna aum thei nading chule mipi deibang a natoh achelhah theina dinga politics a boltheina nei hihen lang ahilouleh status nei hijong leh bungkhenna nei louva drug case alen jouse CBI in akhol dinga thumna anei ahi, tin ATRPFM thuso chun aseibe in ahi.

 

Chief Secretary panmun tuh dinga gamsung mi IAS officer lhen dinga ATSUM, DESAM leh AIMS in thumna nei

Imphal, July 29(ET): Chief Secretary panmun tuh dinga gamsung mi IAS khat lhenna dinga All Tribal Students’ Union Manipur (ATSUM), Democratic Students’ Alliance of Manipur (DESAM) chule AIMS in thumna anei adinpi nau thu avel a aseikit uvin, state sorkar in gamsung miho deilhen toh kitoh louva pan alah leh sangtah a kidoudal ding ahi, tin gihna anei uvin ahi.

Seiboi Haokip, General Secretary, ATSUM, Leishangthem Lamyanba, DESAM General Secretary leh Khumujam Romen, AIMS in soi akai nau thuso a chun, achesa June nisim 9, 2018 kum a Chief Minister leh Cabinet Minister ho umna a simlai kiloikhomna thum in Manipur government toh MoU soi akai uva, khonunga Chief Secretary panmun kilhen na a gamsung mi hi a officer ho deilhenna kipe ding ahi, tia kitepna aneiyu thu avel a aseidoh kit uvin ahi.

Ahin, tua hi sorkar in gamsung mi hilou IAS officer khat lhenna dinga tohgon phatah a anei thu akija in, hiche hi New Delhi leh Nagpur a politics a alamkai hou lung hol na dinga MoU toh kinoptona kisem jana apeh louvu vetsahna ahi. July nisim 31 teng Chief Secretary post ong ding ahi gamdang mi IAS officer khat in ahet jeh a ahung kile e ti thu kimu ahi, ati.

Gamsung miho sanga mun dang a kitahna neiya lamkai Manipur in adei pon, Chief Secretary panmun kilhenna hi gamsung miho dei dungjuiya Chief Minister in abol a, New Delhi leh Nagpur thu a abol ding ahipoi. Gamsunga post thupi jouse hi Delhi ahilouleh mun danga kon kipan ding ham, tihi mihon agel ahi. Hitobang hi aum jom leh Manipur kivaipohna in boina ato tei ding ahi, tin thuso chun asei uvin ahi.

Thepna neitah chule panmun tuh dinga lhing jou officer ineiyu ahi in, ipijeh a gamsung thusim, pao leh ham, chon leh khan, boina umho ima hetthemna neilouva gamdang mi officer lah ngaiya ham. Kum som a sim central deputation ngehna nei louva gamsung dinga kitah tah a natong IAS officer ineiyu ahi in, state sorkar in amaho adalhah a adang adeilhen hi boina hiding ahi, ati.

BJP sorkar in gamsung a ineiyu IAS cadre ho avel vel a hitia hi abol uva ahileh ineiyu officer leh subordinate ho dinga lunglhahna hiding ahi. British khang laiya Bengal miho khohsahna nei louva ama superannuation kichaiya dan dihlouva alahkhom gou tamtah London a kipoh a Robert Clive tobang Manipur in adei pon, anei theilou ding ahi, tin kiloikhomna thum in thuso anei nauva aseibe uvin ahi.

 

Ex-Minister Th. Shyamkumar petition peh lha 2 sung’a asuhtup ding’a Supreme Court in Manipur High Court thupeh nei

B.Lalboi Gnagte

CCpur, July 29 (ET): India a ding’a thutan na inpi lenpen Supreme Court in Manipur High Court heng’a MLA akon Disqualified aum Ex-Minister Thounaojam Shyamkumar in Election Petition apeh pen lha 2 sung kah’a asuhtup ding in Supreme Court of India a Justice Rohinton Fali Nariman leh Justice Navin Sinha lamkai na Double bench in janni (July 28) chun Manipur High Court thupeh ananei in ahi. Hetthei khat chu Dr. Nimai Chand Luwang, Ex-Minister & Spokesperson BJP Manipur Pradesh in Th. Shyamkumar chung’a ngoh na asemna’a Th. Shyamkumar in Election Petition a file abol chun affidavit dihlou apelut naban’a ama satah jaona’a Delhi High Court a Petion apehlut pen ima cha jihlut louvin aum ahi tin ngohna anei in ahi.

Alangkhat’a Th. Shyamkumar hi achesa Oct. 2,2006 kum’a Delhi Police Special Cell in UNLF akon senior member 2 toh Kathmandu jon’a lenna’a alengdoh ding kon’a Indira Gandhi International Airport, New Delhi mun’a ana kiman ahi. Chuleh Tihar jail a aum lai in 2007 kum’a Manipur Assembly Election achun 7-Andro A/C akon MLA ahung kaidoh phat chun Bail in ana kilhadoh in ahi. Ahin 2011 kum in Delhi District Court in Case umsa ho asuhtheng sah in hiche jou in Manipur State Govt. in tu’a order hi 2012 in velvet thah ding in ngeh anei in ahi. Chule hiche ngehna jong Delhi High Court a 2014 kum a jihlut anahi vang in tuni chan pending in aum nalai in ahi.

Hiche toh lhon’a Delhi Police Special Cell DCP Sanjeev Yadav in 2017 Manipur Elections masang jep chun MLA Thounaojam Shyamkumar in Ranjit Khoirom, Commander-in-Chief of KCP (Porei-Meitei)  kimat na anei lhon ahidan kamso jong ananei in ahi ati. Chuleh Th. Shyamkumar hi phat chomkhat jouva Manipur Legislative Assembly ah Member akon in 10th Schedule of the Constitution pansa in Manipur Legislative Assembly in Supreme Court thupeh dungjui in analhadoh in ahi. Amahi 2017 kum’a Congress Ticket ah MLA kai ahi vang in election kiphondoh jou in BJP tosot na anape pai in ahi. BJP Govt. ah Forest & MAHUD Minister atuh ahi.

Hiche chung thu’a Dr. Nimai Chand Luwang in Manipur a Political institution a chon le-khan phalou ho suhtheng na ding’a panlah na kinei hi goljo ahi tei ding akinepna aphongdoh in ahi. Chuleh Manipur High Court in thudih’a vai ahin hop tei ding injong kinepna akinei in ahi. Dr. Nimaichand hi Medical Doctor ahi naban’a  Manipur Legislative Assembly ah Member ding’a 5 vei lhendoh in aum tan chuleh State ding in ijat veiham khat Heath leh Education Minister jong anatuh in ahin 2017 Election (7-Andro A/C) kum in Th. Shyamkumar chung’a gollel na ananei in ahi.

 

India pumpi kiphinna a AMCTA in pan la

Imphal, July 29(ET): All Manipur College Teachers’ Association (AMCTA) in July nisim 6, 2020 ni a UGC guidelines kisodoh lahdoh dinga India pumpi a kiphinna um atosot uvin ahi. UGC guidelines dungjuiya university hon September, 2020 kah a UG leh PG term end examination ajo dinga asei ahi.

Joint Forum of Movement on Education (JFME) a hi AIFUCTO, Federation of Central University & College Teachers’ Associations, All India Federation of Retired University & College teachers’ Organisations, All India Confederation of University & College Non-Teaching Employees, All India Federation of Elementary Teachers’ Organisation, All India Forum For Right to Education leh Students’ Organisations and Parents’ Associations College teachers pang ahi in, AMCTA (All Manipur College Teachers’ Association) banner noiya India pumpi a kiphinna abol uva, July nisim 6 nikho a UGC guidelines kisodoh lahdoh dinga thumna aneiyu ahi.

September 2020 kah a UG leh PG term kichaina exam bol a jo tei dinga university ho athupeh u ahi in, kiloikhomna in examination mode hi adang a akhel ding uva MHRD leh UGC henga ngehna jong anei uvin ahi. Coronavirus jeh a India gam atamjo a boina sangtah aumjeh a simlai ho hinkho hi khohsahna kipe a, guidelines hi lahdoh ding chule evaluation mode adang khat joh asei ding uva JFME leh AIFUCTO in thumna anei ahi, tin thuso anei uvin ahi.

Ahivanga, MHRD leh UGC in adin na atuhchah jing ahi. India gam pumpi a simlai ho MHRD leh UGC lungput akikhel loujeh a lungkham ahi. AIFUCTO in simlai ho dettah a adinpi ding ahi. Hiche thu a JFME in mopohna nei jouse panna a webinar agon ahi, tin jilkung kiloikhom hon thuso anei nauva aseibe uvin ahi.

 

Eastern Motors te gari khat in accident toh; mi 1 thi

Imphal, July 29(ET): Tuni chun Imphal akon kipandoh a Dimapur jon gari (Force Traveller) khat chun Senapati a accident ato jeh chun asung a tou mi 18 lah a mi 1 in thina atoh in chule adang 16 ho akitongkhan, vangphat umtah in mikhat akitongha pon ahi.

Thina toh chu Shasikanta Sharma @ Heiton  (27) yrs S/O Tomba Sharma of Chingmeirong Lei Hingkhol, Imphal West district  ahi akitin, akisukha mi 16 ho lah a khat chun athoh gim in distirct hospital lhut ana hin chujouvin abon uvin RIMS Hospital a ana kichon taovin ahi. Thulhut in aseidan achun tuni jingkah pung 8 don chun hiche toset chu aum in Senapati district council office ahin phah ding koncha a toset atoh u ahi in lamlhang ft 100 a alhai lha in ahi.

Hiche gari a tou ho chu Eastern Motors, Chingmeirong a natong ho ahouvin Dimapur a car lading a che u ahidan thulhut chun asei in ahi.

 

Education Policy thah kisem, Class V chan eima paova kihil ding’a kisei

NEW DELHI, July 29: Union Cabinet in tuni Education Policy thah khat phatsah na ana nei utoh lhon in chepi ding in pohdohna anei uvin ahi.

Hiche tohgon hi Narendra Modi in vai ahin pohtil akon chepi dinga ana kigong ahitan ahi. Hiche tohgon page 400 lam a kisun achun  tu le tua 10+2 model akon 5+3+3+4 kum 3-18 chan ading a sem phat ding le Union Ministry of Human Resources Development chu Education Ministry a khel ding tohgon ho ajao in ahi. School board jouse vetsui na nei ding kiloikhomna National Assessment Centre kiti khat jong semdoh in phatsah na ana um in ahi. Hiche tohgon noiya hin Class-VI akon a vocational training jaosah ding dan le textbook ahithei chan a suhlhom ding tohgon um ahi. Hiche natoh na le kikhel nahin India sung a education chunga phatchom na lentah ahin pohdoh ding ahi tin Union HRD minister Ramesh Pokhariyal Nishank chun anasei in ahi. Hiche tohgon noi ahi simlai ho secondary school akon a subject adeipen u kilhen na jong kinei sah ding ahi akiti.

Chule Class V chan ho beh eimapao a man tei ding in jong akiseiyin ahi. Textbook ho ajong India khang thusim le tulai dinmun ho thu ha jaosah ding in tohgon akinei in ahi. Hiche tohgon noi a hi report card ho jong mark le lekha keu hilou a athep nalam jong ahi tah ding dan hetsah na akinei in ahi.

 

Naga Hoho in Prime Minister heng a memorandum khat pehlut

DIMAPUR, July 29: Naga Hoho in Prime Minister Narendra Modi heng a memorandum khat pehlut na ana nei utoh lhon in memorandum sung a phate a vetlhah na aneiding thil phabep ajao dan jong hetsah na ana nei uvin ahi.

Memorandum achun Framework Agreement kinei jou kum nga lam ahung che tah vang a kihouna in phatchom na ding amano loudan thu tahlang na ana nei uvin ahi. Kihou na kinei na a machal na aum loudan jong hetsah na ana nei uvin ahi. Hiche framework agreement kinei lo na jeh Indian government in hilchetna ahin peh ding u adei dan u jong kiloikhomna chun hetsah na ana nei uvin ahi. Hiche agreement toh kisai a Naga mite in kihou na kichai ding anga laitah uva achesa October nisim 31 a kihou na kichai tah dan gov tin phondoh na ahin neina chung uva lungdon na anei dan ule  hiche jou a Nagaland pumpi  ‘Disturbed Area’ a phondoh na ana kinei kit chung chang a het them na anei loud an u thu jong tahlang na ana nei uvin ahi. Indian Army in chamna sukeh a state sung a chaloh na anei jing dan thu jong kiloikhomna in tahlang na memorandum achun ana nei uvin ahi.

Framework le akisaipi kihou naho a kinoptona ana kinei hop hate a juicheh ding adei dan ule achesa 2001 kum a Bangkok a kinoptona bang a ceasefire in gamgi khen na anei louding tia kihou lhah na an um jou a phat phabep masang a Arunachal a kithana soh ho adeilou dan u jong hetsah na ana nei uvin ahi. Indian gov tle Naga ho in achesa phat ho a kinoptona ana nei ho u akihet phah ji tah louna chung a jong nopmo asah na u phondoh na ana nei uvin ahi. Hitabang thilsoh ho hi govt in kinoptona kinei ho ajui lou jeh u ahi dan jong hetsah na ana nei uvin ahi.

Nagaland Governor  le interlocutor a pang a RN Ravi chung a Naga ho in jana apeh jing vang uva Ravi in daan apalkeh jingdan le Naga kiloikhomna khat toh kum sot tah kihou naho apan na umlou ding bang a tohgon ahin nei ji naho chung a nopmo asah dan ho u jong tahlang na Naga Hoho in ana nei uvin ahi. Naga hOho in gamgi nei lou a Naga mite ho chung  vaipoh na anei utoh lhon a temna le hetsah na kinei ho Indian govt toh kinoptona kineisa ahi tah toh lhon a govt in velvet na phate a anei uva Naga thu ahiding doltah a chaina ahung um nading in hetsah na jong Naga Hoho in Prime Minister pa ang a ana nei uvin ahi.