Manipur a Lockdown June 30 chan umjom ding ahi, tia CM Biren...

Manipur a Lockdown June 30 chan umjom ding ahi, tia CM Biren in thuphon nei

68
0
SHARE

Manipur a Lockdown June 30 chan umjom ding ahi, tia CM Biren in thuphon nei

Imphal, May 31(ET): COVID-19 natna hise achal louna dinga kivenna a Manipur gam a Lockdown hi June nisim 30 chan umjom ding ahi, tin Chief Minister N Biren Singh in Chief Minister’s Secretariat a Sunday ni a thuso miho akihoupi na a thuphon aneiyin ahi.

Natna akilahson to louna dinga Lockdown hi kivenna lampi khat ahi, tin Chief Minister in aseiyin chule Lockdown le curfew kikoi hi mihem hinkho huhdoh nading ahi, ati. MSME sector, agriculture le horticulture toh kisai ho, MNREGS natoh le adang dang ho Lockdown sunga kiphal ding ahi, tin CM in aseiyin, ahivanga, WHO le Health Ministry in ‘social distancing’ le dan chom chom asem ho mipin ajui tei dingin thuhilna aneiyin ahi.

Sorkar in tu naicha pandemic douna dinga pan alah ho thu aseiyin, ni 10 sunga gamsunga lupna 100 umna COVID 19 natna nei hobou kijenna ding hospital kisemdoh ding ahi, ati. RIMS le JNIMS a test kibol jat jong nikhat a 1000 val a kikalsah ahitan, chule Imphal International Airport a ‘thermal scanner’ kikoi ahi, ati. District jouse a Chief Medical Officer hon volunteer chule kichuhna nei nurse ho alah diuva sorkar in thuhilna apeh ahi’in chule gam dang dang a kon hung kile ho aum nadiu Insitutional le Community Quarantine centre jong kikal sah ahi, tin aseiyin ahi.

Gamsung miho amoh lungjin lou diuvin CM in temna aneiyin, Manipur gam a tuchan geiya community transmission umlou lai ahi, ati. Lockdown sunga gam pam mun chom chom a tangden gamsung mi 28,000 vel kipui doh ahitai, tin hetsahna jong aneiyin ahi.

Gamsung mihon thulamleng ho atahsan loudiu, WHO, ICMR, Health Ministry le tahsan um agency adang dang hon thuhilna le guidelines asodoh hobou atahsan diuvin temna aneiyin ahi. Covid 19 douna ding tohgon sem nading chule tua dinmun vetkol nadinga kal seh le Manipur State Consultative Committee for COVID 19 meeting umjing ahi’in, COVID 19 Joint Committee a hi gamsunga um CSO chom chom a kon member ho pang u ahi’in, gamsung miho COVID 19 chungchang thu ahil lhang diu ahi. Pao chom chom 24 a COVID 19 awareness leaflet kisodoh ahitai, tin CM in aseibe in ahi.

May 31 nilhah nidan  chan a gamsunga Covid 19 positive case 71 aumtah, hiche lah a mi 11 hi natna a kon datheng ahitai, tin aseiyin chule adang akijen nalai hojong adamdoh vah nadiu adeisah thu aseiyin ahi. Frontline worker, media miho, simlai kiloikhom, CSO hon pandemic douna a pan alah u akipapina thu jong aseiyin ahi.

Chomkhat jouva Centre a Narendra Modi lamkaina sorkar term ni channa kum khat alhin toh kilhon a CM in lolhinna tamtah neiya PM Narendra Modi akipapina thu aseiyin chule Modi lamkaina sorkar in gamsunga Inner Line Permit System aphatsah a, gamsung mihon phat sottah atup lunggel abulhit peh jeh a jong kipathu aseibe in ahi.

Manipur a Covid-19 positive mi 4 damdoh be;  QC a lut louva inlang jon Delhi a kon hung kile khat police hon man, IQC a thah lut u

Imphal, May 31(ET): Centre in June lha kipat til a kon coronavirus lockdown toh kisaiya ‘relaxation’ tamtah umsah dinga phondohna anei vanga high-risk zone a um Manipur gam a June 30 chan Lockdown phat akisuhsao be tan, chule Sunday nikho a positive case athah 9 hetdoh be na aumtoh kilhon a gamsunga Covid 19 positive case 71 lhing ahitai.

Gamdang a kon hung kile mi 9 positive ahi kihetdoh be ahi, tin Sunday nilhah nidan 4:00 a kimu thuso in aseiyin, natna a kon mi 11 damdoh a chule tua hi ‘active case 60 um ahi. Natna anei kihedoh mi 9 holah a mithum hi Ukhrul, mikhat hi Noney, mi 2 hi Imphal East, mi 2 hi Kangpokpi district chule mikhat hi Sekmai, Imphal West district a kon ahi.

State Health Department in thuso aneina a, positive case kihetdoh be mi 9 holah a kum 19, 21 le 26 a upa mithum hi numei ahi’in, amaho hi VRDL, JNIMS a Saturday jan a test kibol ahi, ati. Amaho lah a mi 2 hi Pune a kon hung kile, Kangpokpi district mi 2 le Delhi a kon hung kile Imphal East district khat pang ahi.

Kum 20 a upa, Sekmai, Imphal West a cheng pasal khat jong VRDL, RIMS a Saturday jan a test abol uva positive ahi kihedoh ahi’in, amahi Delhi a kon hung kile ahi. Case jouse atahsa ahat nalai uvin, Covid Care Facility, JNIMS le RIMS a achon diu ahi.

VRDL, RIMS a positive case athah 5 (pasal 3 le numei 2) akihedoh be in, mithum hi Ukhrul district mi ahiuvin, mi 2 hi Noney chule Imphal East district mi ahi. Amaho hi Covid Care Facility, RIMS a achon diu ahi.

Sunday nikho a test nivei kijom a akibol jouva Covid 19 negative hi RIMS le JNIMS hospital a kijen Covid 19 positive anahi mi 2 cheh, agom a mi 4 hospital a kon discharged abol tauvin ahi. Mi 2 hi Thoubal district a kon ahi’in, mi 2 hi Churachandpur le Kamjong district mi ahi. Amaho hi ni 14 sung ‘Home quarantine’ a um nalai diu ahi.

Gamsunga Covid 19 natna a kon damdoh hi 11 lhing ahitan, active case 60 um a chule case agom a 71 lhing ahitai. District 16 lah a Tamenglong le Pherzawl district teni a bou Covid 19 positive umlou ahi. District dungjuiya Covid 19 positive case hi Churachandpur a 21, Thoubal 11, Imphal West 12, Imphal East 6, Kamjong 3, Tengnoupal 4, Kakching 1, Bishnupur 2, Kangpokpi 3, Senapati 1, Jiribam 1, Noney 2, Ukhrul 3 chule Chandel a 1 ahi.

Hiche lah a Thoubal le Kamjong district a kon mi 3 cheh, Tengnoupal a kon mi 2 chule Imphal East, Imphal West le Churachandpur district a kon mikhat cheh damdoh a hospital a kon discharged abol u ahitai.

Alangkhat a police hon natna hi community transmission ahilou nadinga pan sangtah ala uvin, Sunday nikhon New Delhi a kon Air Asia lenna a hung kile a chule quarantine center a lut ding go louva a in jon kigo mikhat aman uvin ahi. Mipa hi Assam Rifle a Havildar ahi’in, state sorkar in ‘quarantine’ a umtei dinga dan asem jui ding go louva airport adalhah a, a in joh kile dinga Tiddim road langa keng a che ahi. Police hon avon/athil toh Takhel Leikai, Tiddim a keng a ache amu uva, thudohna anei ule New Delhi a kon lenna a hung kile ahi ahetdoh uva police hon jong Institutional QC, HRD a athah lut tauvin ahi.

Manipur a Covid -19 active case 60 holah a mi 29 hi RIMS Covid Care centre a kijen a, chule mi 31 hi JNIMS a kijen ahi. Sunday nikho a RIMS lab a sample 573 test kibol lah a 6 positive hiya, adangse negative hi ahi’in chule JNIMS lab a sample 493 test kibol lah a 3 tailou adangse negative hi ahi.

Tuni chan geiya sample 9857 test kibol ahita, chule mi 12,492 hi Community Quarantine centre a um a chule mi 5516 Government Quarantine centre a um ahi. Sunday nikho a mi 919 Government quarantine centre a akoibe uva chule 1532 hi Community quarantine centre a kikoibe ahi, tin IDSP Manipur in aseiyin ahi.

Mao le Jiribam gate a Sunday nikho a truck tol 656 le che le vah le mi 461 screened abol uva, chule ISBT, YAS Complex, Khuman Lampak, Sekmai Gas Plant a truck, gas bullet, oil tanker driver 740 test kibol a abon uva asymptomatic hiu ahi.

Quarantine centre a um numei khat in Kangpokpi a apa thilong alhah nadinga ‘minute 3’ phat mu

Kangpokpi, May 31(UNA): Quarantine Centre, Maria Montessori, Koirengei a um numei khat apa thi opna kin a apan nadinga ‘minute 3’ bou phat apeh utoh kilhon a PPE lhingset a akivon in, ambulance a kon akumlha in, doctor ho phabep a gamlha a ading uvin, ‘minute 3’ phat asimpeh uvin, alhem ding anu jeng jong akom a umthei louva numeinu in apa thilong alhah jouva aumna centre a akile kit tan ahi.

Kangpokpi DHQ mun thilsoh ahi’in, kal phabep masanga Sagang, Churachandpur district a jong hitobang thilsoh anaum ahi. Kangpokpi Ward No. 13 a cheng Anjali Hmangte (22) hi May 25 ni a train a kon gamsung hung kile ahi’in, lamkah a ginmo mikhat amudoh jeh uva ama chule compartment thakhat a atoukhompi hohi abon uva Maria Montessori school a quarantine abol u ahi.

Vangset umtah a apa hi phat sottah anat jou Saturday jan a inmun a thi ahi. Ward Chairman, in Kangpokpi Town Committee phalna alah a District Administration chule Chief Medical Officer henga Anjali in apa thilong alhah nading agon peh diuva ngehna anei ahi. Hiche dungjuiya District Administration le CMO, Imphal East phalna a Anjali hi Sunday jingkah a aumna centre, Koirengei a kon ambulance a apa thilong lhah dinga ahin pui uva chule PPE lhingset a avon u ahi.

Kangpokpi alhun uva, vengsung khangthah hon inmun a mi jouse asoldoh uva, chule Medical Superintendent in-charge, District Hospital Kangpokpi, Dr Paotinlal Haokip vetkolna noiya Anjali apuiyu ahi. “Na long kom a kaum a, phat kapeh be theilou ding ahijeh in heap lungnommo hih in, nei ngaidam in, ima jouse nei bol peh hojoh hi kipanan neitan”, tia Anjali in apa availhah jouva aumna centre a kile ahi.

Anjali akile jouva Dr Paotinlal Haokip vetkolna noiya volunteer ni le kin thempu Pastor J Lunkim in PPE akilahdoh in, akim avel abon a fire personnel hon sanitize abol uvin ahi.

Minsiter Nemcha le Kpi DC in IQC, IGNTU, Makhan vilna nei

Imphal, May 31(ET): Institutional Quarantine Centre (IQC), IGNTU, Kangpokpi District a neh leh chah kipehna hoilou tah limlah holeh aphatcha bu Ie me kipeh jilou thu toh kisai a tuni Social Media a videos kitahdoh kimu thu’a Minister Nemcha Kipgen makaina in Kangpokpi district DC Somoijit Salam in amun vilna aneilhon in TSA General Secretary pan jong anung anajui in ahi.

TSA Thuphon in seina ah hiche IQC, IGNTU hi Len Singsit MCS in-Charge ahin aman jong tom ngaitah in pan alah akimun chule Bu leh me hi Makhan Youth Club ho nganse ahiutoh lhon a alutding sum leh pai jong ngehna anei dungjui uva apeh jing’u ahi ati.

Nemcha Kipgen, Hon’ble Minister (SW & Coop), Manipur leh Somoijit Salam, DC Kangpokpi in IQC, IGNTU, Makhan avilna a chun inmates hon boina atohou thu asei utoh kilhon in DC pan agangthei pen a aboina ho jouse adeh a Toilet leh Dustbin ho suhtup pehding in availhahna aneiyin chule neh Ie chah bu le me hi Motbung area a um quarantine centre jouse  agom a abon uva dinga Cook (Bamon) koi ding in District Administration in agong in bu le me ho packing holding in TSA ho nganse na aneitoh lhon a packed food hi Magistrate-in-Charge in Baptist English High School, Motbung akon akilah a aphatcha IQC muncheh a apeh ding in jong DC in thupeh aneiyin ahi.

QC a Ju supply go kimandoh

Ccpur, May 31(ET): Tuni sun 12:00 don chun HES QC, Bungmual a umho ju supply kigo security hon ana mandoh un ju jong local miho masang a ana sumang uvin ahi. Achesa nikho phabep achun ju supply ho police hon ana mandoh uvin amaho jong quarantine a akoi uvin ahi. Alangkhat a Bishenpur dist. sung a Temple of Learning (TOL) a quarantine a umho khat nehding nehthei ahung kithahlut peh nalah achun talab, win ho chips bomsung a kikhum security hon ana mandoh kit uvin ahi.