Manipur a July nisim 15 chan Lockdown suhsaobe dinga CM Biren in...

Manipur a July nisim 15 chan Lockdown suhsaobe dinga CM Biren in thuphon nei

32
0
SHARE

Manipur a July nisim 15 chan Lockdown suhsaobe dinga CM Biren in thuphon nei

Imphal, June 28(ET): Chief Minister N. Biren Singh in July nisim 1 nikho a kon nisim 15 chan- nikho 15 Manipur gam a Lockdown phat suhsaobe dinga thuphon anei tan ahi.

Chief Minister’s Secretariat a Sunday nikho a thuso miho akimupi na a, Chief Minister in July nisim 1 nikho a kon ‘inter-district bus service’ ho kihong pan dinga sorkar in thulhuhna aneiyin, sorkar in asodoh guidelines le SOP ho phatah a kijui ding ahi, ati. Hiche phat sunga hi public transport system adang khatcha kiphal louding ahi tin jong aseiyin ahi. Gamsung mihon Covid 19 pandemic nat jo nadinga SOP le guidelines ho khoutah a jui diuvin temna jong aneiyin ahi.

Manipur a positive case agom a 1094 ahi in, hiche lah a active case 660 um a chule natna a kon dam doh case 432 alhingtai, ati. Gamsunga recovery rate hi 39.56% ahi, tin aseiyin chule test bol nading machine thah akilah be a, natong ding mi akilahbe toh kilhon a nikhat a test kibol thei jat jong 2600 nailam ahitai, ati. Re-test bol ding ho panna a sample 50,000 val tuchan a test bol dinga kila ahitan, atamjo tobang result kiphong ahitai, tin aseibe in ahi.

Testing capacity atam thei nadinga TRUENAT machine kila ahi in, tu le tua hi RIMS a machine 2, JNIMS a machine 1, IRL Imphal a machine 2, Senapati a machine 2, Tamenglong a machine 1 chule Ukhrul a machine 1 kikoi ahitai. TrueNat machine a hi nikhat a result 20-35 vel result kimu thei ahi in, ati. Chule gamsunga ‘community transmission’ aum poi, tin Chief Minister in aseiyin, natna nei hotoh ‘direct contact’ neiya frontline worker mi 7 ho tilouva positive case akimudoh adang jouse hi abon uva gamdang a kon hung kile hiu ahi, ati.

Tuchan geiya mi 43,000 institutional le community quarantine centre a um a chule mi 7200 vel hi quarantine centre a tu a um ahi. Covid 19 natna nei ho kijenna thu a Chief Minister in tu le tua JNIMS a Covid 19 positive ho kijen nading lupna 150, RIMS a lupna 100, Covid Care Center, Meitram a lupna 350, Ukhrul a um Covid Care Facility a lupna 100 um ahi in chule District hospital jouse a isolation ward le Covid bed um ahi, ati.

Mun chom chom a lupna 750 koi be nading natoh achelha e, tin aseiyin ahi. Senapati Trauma Centre a lupna 50, Imphal West Family Welfare Training Centre a lupna 100, Thoubal GNM School a lupna 100, Lamboikhongnangkhong Trade Centre a lupna 300, Kangpokpi BIET a lupna 50, Churachandpur NIELIT a lupna 100 chule Tamenglong a lupna 50 koibe dinga tohgon um ahi, ati.

State Corpus Fund a kon dangka crore 10 chule Chief Minister’s COVID 19 Relief Fund a donation a kipe dangka crore 14.41 hi nat douna a kimang ahi, tin CM in aseiyin chule ahung kile ho poh na (transportation), anchang chohna, gamdang a tangden ho sum a kithopina kipe chule CSO Committee hon awareness abol nauva agom a dangka crore 18.22 kisumang ahitai, tin aseibe in ahi. Press conference a Deputy Chairman, State Planning Board S Rajen le Yaiskul MLA Th Satybrata jong pang ahi.

Ukhrul a Covid-19 negative ahi tia QC a kon discharge kibol mi phabep ‘positive’ ahi akiti kit jeh’a Centre a kile solkit

Imphal, June 28: Gamdang a kon hung kile Ukhrul district mi phabep hi achesa June 26 ni a Covid 19 negative ahi, tia phondohna anei uva, June 27 ni a aumnau ‘quarantine centre’ a kon ahin soldoh u ahitan, ahin, lungdon umtah khat chu, amaho lah a mi phabep June 27 result dungjuiya Covid 19 positive ahiuve tia aseipeh kit jeh uva ‘quarantine centre’ a akile kit tauvin ahi.

Thulhut dungjuiya, June 26 ni a Covid 19 test abol u ahi in, amaho sample hi June 22 le 23 nikho a alah uva, June 26 ni a result amu u ahi. Test akibol nauva negative hi uva chule ni 28 ‘quarantine period’ ajo jeh uva SDO/BDO Chingai Quarantine Centre a um agom a mi 15 hi June 27 sun a alhadoh u ahitai. Discharged certificate hi PHC Chingai a Medical Officer in soi akaiya apehdoh ahi.

Inn akile uva khosung mihon ‘guidelines’ ajui uva chule negative ahiu kipapina a chibai abol uva, ana lamto u ahi. Ahin, jan nidan 7.30 don a SDO/BDO Chingai Quarantine Centre a um mi 12 positive ahi, tia thulhut amu u ahi in, akipanau hi phat chomcha bou hi ahi. June 27 ni a RIMS a Covid 19 test abol dungjui uva amaho sample hi June 22 le 23 nikho a kila a, mi 12 positive hi ahi.

Result hi tamtah in ahetthem theilou chule lhang miho dinga lungkhamna soh ahi. “Sun a khosung hung kile lhung jouse Sunday khovah lhah masang nidan 1 don a kajol uva quarantine centre a kanungsol u ahi”, tin Chingai kho haosapu Akan K Shimray in aseiyin ahi. Akile holah a mikhat in amaho sample hi June 22 nikho hilouva June 24 ni a alah u ahi, tia aseikit ahi.

Ahung kile midang khat injong report a kisei June 23 nikho hilouva June 24 ni a sample alah u ahi, tin jong aseiyin ahi. “Kum 2 bou hinalai ka chapa positive hi a, kei le kajinu negative kahi in, ahivanga ka chapa toh quarantine centre a kakile kit u ahi”, ati.

“June 17 ni a test eibol nauva negative kahi ahi in, ahivanga inmate phabep positive ahijeh a avel a test eibol kit u ahi in, June 26 ni a result kamu ahi. June 27 ni a SDO/BDO Chingai Quarantine Centre a kon discharged eibol uva, ahivanga, jan nidan 7.30 don a positive hi holah a nang jong napang e, tia eihetsah u ahi”, tin Chinaoyo K in aseiyin ahi.

“Test thu kahepon, ahivanga mijouse damthei nadinga quarantine centre a kakile ahi. Swab sample nivei alah uva, test result ani a kamu ahi in, ahivanga June 27 ni a test result thum channa kisei hi kahethem poi, ajeh chu swab sample thumvei alah louvu ahi”, tin aseibe in ahi.

Ramva, Halang, Pharung le Mapum kho a jong hitobang thilsoh um ahi. Chairman, Ato Longphang (North Zone) Dearson Chamroy in, Halang, Pharung le Mapum kho mi ahung kile positive (June 27 report dungjuiya) hohi quarantine period nikho 28 alhin loulai jeh a quarantine a um nalai ahi, ati. Ramva khosung miho hin Covid 19 positive ahiu akihet uva hi centre a kon discharged abol uva inn lhung u ahitai.

Hiche thu a Ukhrul District Commissioner Joseph Pauline Kamson in June 28 ni a order asodoh na a, Ramva le Chingai kho pumpi hi ‘containment zone’ dinga aphondoh ahitai. Chingai le Ramva khosung miho inmun a kon potdoh loudiu chule tua kon ‘home quarantine’ a um dinga thupeh um ahi, tin order kisodoh chomkhat a asei uvin ahi.

Khosung miho chule ahung kile ho lah a thil hetthem theilou na le lunghanna um a, mi tamtah in test kibol dan thudohna aneiyu ahi. “Test result dihlou jeh a ni 28 lhing quarantine kibol aphatchomna umlou ahi. Ukhrul a ‘community transmission’ aumna thei dinmun sang ahi in, June 27 ni a Covid 19 test result kisei hi adihlou ahina dinga taona kaneiyu hibou kabol theiyu ahi”, tin TMNL president, Somatai Machinao in aseiyin ahi.

Covid-19 natna a kon dam doh numei khat a inmun a kikhailih sa kimudoh

Imphal, June 28(ET): Tu naicha Covid 19 natna a kon kijen dam a kum 23 a upa numei khat achenna Singjamei Wangma Pebia Leikai, Imphal West district a Sunday jingkah a alupna indan sunga akikhailih sa in akimu in ahi.

Thilsoh hi Irilbung police station noiya um ahi in, vangsetna toh numeinu hi Naoroibam Echan @ Sarju Devi, d/o N Shanta, Singjamei Wangma Pebia Pandit Leikai a cheng ahi. Thulhut dungjuiya, numeinu hi Chandigarh a kon ahung kile jouva Bashikhong PHC a ‘quarantine’ abol nauva coronavirus positive ahi kihedoh ahi. Achesa May 30 ni a Imphal khopi hung lhung ahi.

Numeinu hi June nisim 2 nikho a JNIMS COVID-Care Center a admit abol uva, June 14 ni a ‘negative’ ahi jouva hospital a kon discharged abol uva, hiche a kon tuchan hi ‘home quarantined’ a um ahi. Athi numeinu hi DAV Chandigarh a Master degree simlai ahi.

A inheng hon asei dungjuiya, tuni hi ‘home quarantined’ a aumna ding nikho achaini pen ahi. Tuchan geiya police hon numeinu hi ama le ama kithat hidinga ginmona aneiyu ahi. Numeinu hi ‘home quarantined’ a aum sunga ‘depression’ lungthim natna/boina nei tobang a aume, tin thulhut in aseibe in ahi. Thilsoh toh kisaiya Sunday nikho ma ma a case ajihlut u ahitai.

India a Covid-19 active case sang’a adamdoh jat lakh 1 val in atam tai: Health Ministry

New Delhi, June 28: India gam a Covid 19 positive a kon adamdoh jat hin active case 1,00,000 val a akhel tai, tin Union Health Ministry in Sunday nikhon aseiyin ahi. India gam a natna nei agom a 5,28,859 lhing a chule natna jeh a thi 16,095 lhing ahitai.

Natna a kon damdoh jat hin Saturday nikho chan a active case aumjat 1,06,661 a akhel ahitai, ati. India gam a tuchan geiya natna a kon damdoh a hi 3,09,712 lhing ahitan, achesa nidan 24 sunga adamlou mi 13,832 damdoh ahi, ati.

“Covid 19 natna nei adamdoh jat hi 58.56 percent ahitai”, tin Ministry in aseiyin ahi. “India sorkar chule state le union territory hon natna a kon kivenna ding chule natna nei ho jen nading pan alah hou jeh a result hoitah tah kimu ahi”, ati. Tu le tua active case hi agom a 2,03,051 um ahi in, abon uva medical supervision noiya um ahi.

India gam a tua hi Covid 19 test kibolna diagnostic lab 1,036 um a, hiche lah a 749 hi government sector a hi a chule 287 hi private lab ahi. “Niseh a sample 2,00,000 val test kibol ahi. Achesa nidan 24 sunga test kibol sample hi 2,31,095 a kal ahitai. Tuni chan a sample test kibol jat hi 82,27,802 ahitai”, tin Ministry thuso chun aseibe in ahi.

June nisim 28 chan a, Covid toh kisai health infrastructure ho thahat be a, isolation bed umna 1,77,529 Covid 19 hospital 1,055 um a,  ICU lupna 168 umna hospital 23, chule oxygen support umna lupna 78,060 um ahi, ati. Chule isolation bed 1,40,099, ICU lupna 11,508 le oxygen support umna lupna 51,371 umna Covid Health Centre dinga kipedoh centre 2,400 kimangcha ahitai, ati.

Hiche tilouva Covid 19 nat douna dinga Covid Care Centre 9,519 um ahi in, lupna agom a 8,34,128 um ahi, tin Ministry in aseiyin ahi. Centre in state, UT le central institution ho a manchah ding N95 mask 187,43 lakh le PPE (Personal Protective Equipment) 116.99 lakh jong apehdoh ahitai.

Manipur a Covid-19 case 93 kimube; natna nei mi 1185 lhingta

Imphal, June 28(ET): Achesa nidan 24 sunga pasal 56 le numei 37 panna a COVID 19 positive case athah 93 akihetdoh be in, hiche lah a mi 75 hi VRDL, RIMS a test kibol a chule mi 18 hi VRDL, JNIMS a test kibol ahi.

Athah a positive ahi kihedoh holah a Churachandpur district mi 10, Imphal East a mi 2, Imphal West mikhat, Kakching mi 13, Kamjong mi 21, Noney mi khat, Tamenglong mi 14, Senapati mi 6 chule Ukhrul district mi 25 ahi. Amaho hi abon uva gamdang a kon hung kile ahiuvin, COVID Care Facility a achon tauvin chule angaicha ‘containment’ le ‘contact tracing’ ho jong apat u ahitai.

Alangkhat a, RT PCR test akibol kit jouva Covid 19 negative hi a mi 23 akijen nau mun a kon discharged abol tauvin ahi. CCC, Meitram a kijen mi 6, RIMS a kijen mi 10 chule JNIMS a kijen mi 7 natna a kon adamdoh toh kilhon a asoldoh u ahitai. Manipur a tu le tua positive jat 1185 lhing a, hiche lah a active case 730 um a chule adamdoh mi 455 lhing ahitai. Recovery rate 38.39 percent lhing ahitai.

COVID 19 natna a kon kijen dam ahiloule quarantine kibol jou 20-25% hin society a kithetna ato maitheiyu ahi. Amaho hi COVID 19 natna kilahson to nathei hitalou ahiuvin, tosotna peh a, bungkhen louding ahi.

Quarantine sunga achang uva aum uhin atahsa u chule alungthim jong asuhboi thei ahi in, imut khoplou, nat ven joulouna, depression chule adang dang anei theiyu ahijeh a amaho kithopina nading le counseling a dinga aphat tin a helpline number 1800-345-3818 kihong ahi.

Bangalore akon Special Train Jiribam hunglhung

Jiribam, June 28(ET): Bangalore akon Manipur mi tangdan ho hung kipo chu tuni nilha lam idan 5 lhah kon in ahung lhung tan ahi.

Hiche train achu mi 1258 lam hung kipo ahi. Ahungkipo ho chu ama ama district a bus in ana kipodoh tan ahi. Senapati district sung akon in bus 9 in mi 329 ana kipodoh in, Kamjong ading in mi 40 bus 1 a ana kipodoh in, Kangpokpi a mi 95 bus 3 a ana kipodoh in, Kakching, CHandel le Tengnoupal ading in mi 69 bus 2 in anakipodoh in, Churachandpur ading in mi 182 bus 5 a ana kipodoh in, Pherzawl ading in mi 30 bus khat a an akipohdoh in, Thoubal ading in mi 25 bus khat a ana kipodoh in, Bishnupur ading in bus 2 a mi 47 chuleh Noney a bus 1 a mi 31 ahi akiti.

Gamsunga kimu chang man ho ajoh na mun kehlet nadinga tohgon sem angaiye: ACOAM-Lup

Imphal, Jun. 28: All Club Organization Association and Meira Paibi Lup (ACOAM-Lup) Kangleipak in state sorkar chule mopohna nei authority hon tu dinmun a ngaichat umtah changman ho joh nadinga tohgon asem diuvin ngehna anei uvin ahi.

Organisation Secretary Shanta Mangang in Lamphelpat a um ACOAM-Lup office mun a Sunday nikho a thuso miho akihoupi na a, UP a um niseh thuso khat in Australia gam a pohdoh (export) ding changman thu asei hi state sorkar le mopohna nei authority hon kholna aneiya chule akisei changman vom hi Manipur a kimu Chak-hao (black rice/changman) ham ti akhol dinga aseiyin ahi.

Vannoi muntin a changman chi umhi tamtah ahi in, Manipur gam a bou achi jat som um ahi. Hiche lah a Chak-hao hi nutritional value atam na pen ahi in, achombeh ahina jeh a Geographical Indication (GI) tag kipan ahi, tin Shanta Mangang in aseiyin ahi. UP a changman kisei hi gamsunga kimu changman ham hilou ham ti akhol dinga aseibe in ahi.

Chule GI black rice (Changman) authority hi a Manipur in aganna thei pen a GI authority henga hehna lekha athot ding ahi, ati. Gamsunga kimu changman hi akijohna ding mun akisem loujeh, aphatna akisei joulou jeh a gamdang dang a kimu changman ho eiho kailhang a kijoh ahi. Gamsunga kimu changman tobang neh soh ho joh nading ‘market expansion policy’ sem angaiye, tin Shanta Mangang in aseibe in ahi.

Assam twilet jeh’a thi mi 20 hita; Twilet in mi lakh 9 lam tongkha

Guwahati, June 28: Assam sung a twilet akhoh she toh lhon in mi lakh 9.26 lam atonglah tan mi 20 lam in thina atoh taovin ahi akiti. Assam State Disaster Management Authority (ASDMA) akon thuso kimu dungjui in revenue crile 67 sung a kho  2,071 lam twi in achup in ahi akiti.

Dhemaji le Udalguri district a tuni a mi 2 an athi be toh lhon in athi mi 20 alhing tan ahi. Tuni in athah beh in relief camp 193 lam a mi 27,000 lam abusa uvin ahi akiti. Brahmaputra le akisam kei vadung ho ahung khan utoh lhon in maban a hung len be nalai ding in aum in ahi akiti. Twilet toh kisai in Union Home Minister Amit Shah in Chief Minister Sarbananda Sonowal le health minister Himanta Biswa Sarma ana kihou pi toh lhon kihtopina pehding in jong hetsah na ananei lhon in ahi. Kazieanga national park sung akeh khatvaal twi in achup in ahi akiti. Park sung aum gancha ho jong mun sang lai lai a aum tah dan u hetsah na ahung kinei in ahi.

Gancha ho park akon a ava doh lou na ding uvin vetsui na jong akinei jing in ahi akiti. Park komlah dung a highway ho a koimain gari aha tol thei na louding in jong hetsah na ana kine tan ahi. Jani a chu twilet jeh a sachung khat in thina ana to ahi. Tinsukia district sung a OIL well meikah suh thip na toh jong twilet jeh a bangkhai ahitan ahi. Hiche well jot naidng lampi chu twi in achup tah toh lhon a mei phal mit ding le thil tol na ding um loutohlhon a hiche natoh ch bangkhai ahi akiti.

Assam a twilet Manipur CM in apohnat thu phong

Imphal, June 28: Assam a twilet jeh a mi 9.26 lakh tobang in agentheina toh chung chon uvin mi 18 in thina atoh tauvin Manipur Chief Minister N. Biren Singh in apohnat thu aphong in gentheina toh leh thina toh insungmi ho chung ah lunghempina thu jong twitter mangcha in ana phongdoh in ahi.

Assam Disaster Management Authority (ASDMA) thulhut nukhah pen achun Assam sung a district 23 jouse twi in achup kho 2,071 achuptai ati. Barpeta district hi akhohset dehset namun ahi in kho 395 tobang twi in achuptan aban ah Dhemaji district sung a kho 265 ho twi in achup in ahi. Relief camp jong 193 akisadoh tan mi 27,308 tobang aki kulkhup uvin ahi.

 

Association of drug users Manipur in drug policy semphat ding a ngehna bol

Imphal, June 28: Khamnathei lampang toh kisai a mopohna neihon ‘Support. Don’t Punish’ kiti thupi pansat in khamnathei bolhon angah theina ding uva pan lahpi a chule khamnathei abol jeh uva themmo moh chansah louva chule gotna pelou ding in asei uvin ahi. Association of drug users Manipur (ADUM) leh Harm Reduction Network Manipur (HRNM) hon janhi chun Social Awareness Service Organization (SASO) ho office a kingon neucha aman nauva chun ADUM a Advisor H Dinesh in aseina achun gamsung a Drug Law hi semphat angai in gotna pehding jeng bou lunggel kineipa hi semphat angai e ati. R K Tiken, General Secretary SASO in jong aseina achun khamnathei bolho HIV hinvei hi 1997 kum chun Manipur a 76.9 pc tobang ahi in hinlah awareness phabep akibol jouva chule suhtan theina ding lampi nasatah a akibol jou nung in 2019 kum chun 7.2 pc ahitai tin asei in ahi.

Alangkhat ah Manipur Network of Positive People a lamkai L Deepak in aseina achun policy kituptah umlou jeh a Manipur a khamnathei toh kiman thilsoh umho chung a akhohsah thu aphong in chule ADUM Co-convenor Raj Nongthombam in aseina achun hiche association chu mi 17 chihgilna neideh set ho kithokhom a kiphutdoh ahi thu asei in chule Covid-19 toh kisai a khamnathei bolho umna ding quarantine centre Ccpur leh Ukhrul a kiboldoh ahithu jong asei in ahi.

 

Moreh Institutional Quarantine Centre ho a koima um talou

Tengnoupal, June 28: Moreh khopi sung a institutional Quarantine centre sing a ana kijang   Ekalavya Model Residential school, Moreh collage, Electricity Guest house le Inspection Bungalow Moreh Forest department a koima uam tapon ahi tin  Dr. Cicil Ahongsangba, District Nodal  officer Tengnoupal District in thuso miho ang a phondoh na ana nei in ahi.

Tu le tua electricity Guest House a Maynamr mi 6 um ho hi Imphal akon a hung ho centre ana on lou jeh a hotel a ana ki um sah ho chu ahi tin jong hetsah na ahin nei in ahi. Myanmar lam lut na ding pass amu teng ule adalhah tah diu dan jong Dr. Cecil in hetsah na ana nei in ahi. Tu le tua Moreh a um community quarantine centre a mi 3 aum in amaho hi a result u out toh lhon in negative ahitaovin ahi akiti.