Manipur a ‘flight service’ kipan kit ta; nikhat a atampen a lenna...

Manipur a ‘flight service’ kipan kit ta; nikhat a atampen a lenna 5 hung lhung ding

129
0
SHARE

Manipur a ‘flight service’ kipan kit ta; nikhat a atampen a lenna 5 hung lhung ding

Imphal, June 29(ET): India gamsunga um khopi chom chom a kon Manipur gam hinjon ‘passenger flight service’ akipan tan, Monday nikho a Imphal Airport a lenna 5 ahung lhung in ahi.

Hiche masanga, state sorkar in gamsunga Covid 19 case akal cheh cheh jeh chule test kibol loulai sample tamtah aumjeh a Union Ministry of Civil Aviation henga June 18 a kon 28 sung hi Delhi a kon Imphal jon ding passenger flight service khat bou aphalpeh diuva ngehna anei ahi.

Achesa Sunday ni a Chief Minister N Biren Singh in thuso miho akihoupi na a, achesa ni 10 sunga test bol joulouva um sample 15,000 vel akisutheng in, test akibol tan chule nidan 24 sunga ahung kile thah ho sample athah a kila ding ahi, tia anasei ahi. Imphal Airport official in asei dungjuiya, Monday nikho a lenna 5 a tou mi 538 gamsung hunglhung a chule adang mi 383 Imphal a kon state dang dang jon dinga leng doh ahi.

Kolkata le Guwahati a kon Indigo lenna ni, Delhi a kon Air India lenna khat, Guwahati a kon AirAsia lenna khat chule Dimapur a kon Alliance Air lenna khat hunglhung ahi. Tuni chan geiya lenna chule train a gamdang a um gamsung mi 43,000 vel gamsung hunglhung ahitan, amaho hi ama ama district a um institutional le community quarantine centre a kikoi ahi, tin CM in aseiyin ahi.

Tu le tua Quarantine centre a mi 7,200 vel um ahi in, test akibol a positive ho tilou adangse hi ‘home quarantine’ a dinga asoldoh u ahitai. Alangkhat a Indian Railways in asol Shramik special train a tou mi 1,292 Sunday nilhah a Bengaluru a kon Jiribam ahung lhung tauvin ahi. Go tang louva ajuh jeh a Lamding le Badarpur, Assam kikah a railway track aset jeh a kal thum lhing train service alhai lou nunga train hunglhung amasapen ahi.

Jiribam railway station mun a ahunglhung ho screening chule angaicha adang dang abol jou uva bus 41 a ama ama district quarantine centre a umdinga apoh u ahitai.

Hill District Private Schools Association in Education Department chunga alunglhai louna thuso nei

Imphal, June 29(ET): Hill District Association 10 kiloikhomna Hill District Private Schools Association in Education Department in aphat tin a suhminset ding agot jing chunga alunglhai lounau thuso anei uvin ahi.

Education Department in Stakeholder – School/College a principal ho, head chule administrator ho, simlai kiloikhom ho, NGCT le education lampanga social worker ho June 30 sun nidan 11 teng consultative meeting nei dinga June 26 ni a thuso anei nauva alunggot uhi hetlou thei ahipoi, tin asei uvin ahi.

June 30 ni a umding meeting notification le Agenda hohin Education department in vangsetna thilsoh ho suhlhap nading lunggel aneilou avetsah ahi. Boina hi aumlou dan a kihetmosah na aneiyu ahi. Private school hon online education akha uva, admission thah angah uva chule facility ho Quarantine centre a akiman ding aphal loudiu, government natoh jouse boycott bol a angaicha khoh natoh ho dinga kot akha nading dinmun lhungthei ahi, tin asei uvin ahi.

Imphal valley a um organization ho natoh a bou department pansa a, thinglhang a um simlai kiloikhom ho lunggel akilah lou, sihnei langneina aum thu jong asei uvin ahi. Private school hon nu le pa te a kon sum alahnom pon chule tu dinmun a school staff le jilkung ho lo vaigei tah a pehding ahiloule suhnem ding jong adei lou ahi. Education Department in sum dinmun a mopohna phabep akilah a, boina asuhlhap dinga temna anei uvin ahi.

Private school ho suhmang lou dinga temna jong anei uvin ahi. Democracy gam a gamsung mi hina a mipi a dinga mopohna nei sorkar hiding, mipi a dinga din ding, hunam chang thuneina tuh lou dinga temna anei uvin ahi.

Chule kiloikhomna chom chom in thuso anei nauva ‘information’ apeh loujeh u thu jong asei uvin ahi. School chungchang a information alhingset hi school in kum seh a apeh UDISE a sorkar khut a um ahitai, tin asei uvin ahi. ‘Financial fraud, scam ahiloule financial misconduct’ hojeh a state exchequer aman, Public sum adih louva akiman le adang dang jeh tilouva Private school hon financial statement pehlou nadinga tha (right) anei ahi, ati.

Private establishment jouse a kibang chet a ‘requirement’ akipeh a ahile private school hon ‘financial statement’ apeh ding ahi, tin kitepna anei uvin ahi. Private school hon achesa May 9 le 11 ni a sorkar toh meeting anei nauva sorkar in staff ho lo peh nadinga soft loan ahiloule lo kipehna dinga sorkar a kon kithopina peh ding hi anop pehlou ahi.

Private school ho suhminset nadinga kilose, society a mopohna neilou le adang dang a asuhminset uhi Private school management douna a mipi tilna ahi. Private school teacher hon ama ama school management douna a kiphinna abol diuva tilkhouna ahi in, hiche hi society a dinga phalou ahi. Sorkar in sum a kithopina aneiding ahiloule soft loan apeh nomlou aselguh nading tohgon ahi in, sorkar in duha thuh tah a pan alah a, Private school ho asuhminset ahi, tin ngohna aneibe uvin ahi.

Gamlha tah a ding thil sorkar in avetlou ahi in, financial statement hi Education Department in gonsa akoi ama tohgon phalou toh kilom dinga aledoh ding ahi, ati. Staff ho lo le income (total income le total staff salary) hibou sorkar in ahetnom ahi, ti kilang ahi. Teacher ho lha lo chule fees chungchang a sorkar in order asodoh hi atho tho a private school ho kikam nading kikoi ahi. Ase umlou tobang ahivanga, lunggel dihlou aneiyu ahi.

Hiche ho jouse jeh a Hill District Private Schools Association of Manipur in June 30 ni a meeting umdinga kiphongdoh hi adihna amulou ahi, tin asei uvin chule Government Order (dated 20/6/2020) hi adeh a Hill District school ho kisuhmang nathei ahijeh a lahdoh dinga temna kaneiyu ahi, tin aseibe uvin ahi.

 

Thinglhang mi simlai kiloikhomna hon delimitation exercise thu’a Delimitation Commission of India heng’a memorandum pe

Imphal, June 29(ET): Manipur sung’a  Thinglhang mi simlai kiloikhomna hon Delimitation Commission of India heng a Manipur a delimitation exercise bolna chung changa delimitation 2001 census toh kisai a akibol lou le kiphinna nei ding in hetsah na anei uvin ahi. Hiche kiphin na chu mipi in chanvou kibang a chan ding deisah na deijeh a kibol hiding ahi tin jong hetsah na ana nei uvin ahi.

All Tribal Students’ Union, Manipur (ATSUM), Kuki Students’ Organisation, General Headquarters (KSO-GHQ) le All Naga Students’ Association, Manipur (ANSAM) kiloikhomna thum hon kithokhom in memorandum pehlut na Ranjana Prakash Desai, Chairperson, Delimitation Commission of India henga anei uvin ahi.

Hiche memorandum achun simlai kiloikhomna hon phaicham a phaicham ding bou gel mipi kiloikhomna phabep le political party phabep in Manipur sung a delimitation exercise kibol phaicham mi ho bou phatchom na ding le amaho lunggel dei bangtah in natoh na anei go uvin hiche chung chang a phate a vetchil na le natoh na kinei na ding in ngehna ana nei uvin ahi. Achesa June nisim 15 le 17 nikho a political party lamkai ho le legislature ho in  delimitation exercise kibol na chung a doudal na ana nei u hi vangset umtah ahi tin hetsahna ana nei uvin ahi.

Phaicham le thinglhangmi kikah a assembly seat population dungjui a vet a, hin kito sah ding thu hi 84 Amendment Act of 2001 dungjui a kibol kigo ahin, hiche hin phaicham politician themkhat tohgon atoh khah toh lhon a hitabang natohna hi ahin nei u ahi tin kiloikhomna thum ho chun hetsah na anei uvin ahi.

India sung a state 24 ho a assembly seat ho suh to le ahi toh lhon a Manipur a jong bolmo ahi loudan hetsah na ana nei uvin ahi. Memorandum achun simlai kiloikhomna ho chun delimitation exercise2001 census tohkisai a akibol jing na ding in hetsah na le temna jong ana nei uvin ahi. Hitabang natoh hi phaicham kiloikhomna phabep doudal na jeh a ahung kikhel khah le thinglhang mipi ho in kiphinna jat chom chom ahin nei diu dan ujong hetsah na ana nei uvin ahi. ATSUM, KSO le ANSAM  in hetsah na ana nei be na a district dungjui a fund  kihop na achesa kum 19 sung a phaicham politician ho in complain ima ana bol lou nung uva tu a delimitation exercise mi ahi lou behseh a khan jeh a ngoh a kiphinna le doudal na anei uhi Indian constitution chou ahiuvin ahitin jong hetsah na ana nei uvin ahi. Gamsung a nam len a um ho hin state sunga chanvou ho jouse anehchaiuva alhom jo thinglhang mi ho hi asuhnem jing u ahi tin jong simlai kiloikhomna thum ho chu hetsah na ana nei uvin ahi.

District Council school hohi school dang sanga lhasam chom jo ahipoi: ADC-SH Councilor

Kangpokpi, Jun 29(UNA): Thinglhang, adeh a Autonomous District Council noiya um government school ho ahoipon chule phatah a akivaipo poi, tia mi tamtah in agel ahi in, hijongle 2020 HSLC examination result kiphon na a kon school hohi government le private school dang dang sanga anem joh lou avetsah ahi.

Tukum HSLC exam a 11 rank a pang Satmunchon Kipgen kipapina/lop pehna kin Multipurpose Hall, Sadar Hills Autonomous District Council (SH-ADC), Kangpokpi a aman nauva ADC Sadar Hills councilor atamjo in hitia hi asei ahi.

Satmunchon Kipgen lolhinna lop peh na kin gon hi Education Department, District Council Administration, Sadar Hills Autonomous District Council, Kangpokpi in agon ahi in, kin gon a Thangjakam Misao, Vice Chairman, ADC Sadar Hills, Executive Member le Councilor dang dang ho, Chief Executive Officer, Addl. CEO, School Inspector, Education department a official le staff chule SH-ADC a official le staff ho jong apang uvin ahi.

Satmunchon Kipgen le anu le apa Education Department, SH-ADC Kangpokpi in dangka 40,000 kipaman a ape in chule James Doujapao Haokip, MCS, Chief Executive Officer, SH-ADC in Satmunchon nu le pa saipikhup asil peh in ahi. Sadar Hills Autonomous District Council Teachers’ Association min a president Letkhohao Lhouvum injong kipapi na a memento le del ape in ahi.

Haokholal Hangshing, Chairman ADC Sadar Hills thalheng a ADC Sadar Hills Vice Chairman, Thangjakam Misao in Satmunchon tilkhouna thu aseiyin, Chinnu Kipgen, Inspector of Schools, SH-ADC in akipana thu sangtah aseiyin, ama kihambol nah in thinglhang gam, adeh a SH-ADC a education sector a thuthot sangtah anei ahi, ati.

Satmunchon Kipgen hi Class V chan Gamnomphai UJB School a kaiya, hiche jouva high school hi EMRS Gamnom Saparmeina a asim ahi. District a rank holder masapen hi ahi. “Satmunchom Kipgen masanga HSLC exam a District Council School simlai rank mu a kajah khah lou ahi”, tin Damma Vaiphei, Executive member, ADC Sadar Hills in aseiyin chule apachatna thu aseiyin, SH-ADC Kangpokpi chunga kipathu jong aseiyin ahi.

Tua sorkar in themjilna akhohsah hi vangphat umtah ahi, tin aseiyin chule adeh a SH-ADC noiya jilkung hon pan lahthei chan a alah diuvin temna aneiyin ahi. ADC Sadar Hills Councilor Thangkam Lupheng in Satmunchon lolhinna hin hill district, adeh a Sadar Hills Kangpokpi a school hohi adang sanga lhasam ahilou avetsah ahi, tin aseiyin ahi.

“Sadar Hills Autonomous District Council, Kangpokpi noiya um school hon themjilna a simlai pha asemdoh thei ahi tihi kithang at tah a kasei thei ahi”, tin aseiyin chule akipapina thu aseibe in ahi. Kin gon a James Doujapao Haokip, MCS, CEO, SH-ADC Kangpokpi, Thangjalal Touthang, DIS, Satmunchon Kipgen chule adang dang injong houlimna anei uvin ahi.

India govt in Chinese App 59 lam khah ta

New Delhi, June 29: Ministry of Information Technology, Government of India in India sung a Chinese App 59 lam kha ding in phondoh na ana nei taovin ahi.

Hiche natoh chu Information and technology act noi a section 69A dungjui a ana kibol ahi. Hiche natoh chu Indian defense security le integrity threat toh kisai a ana kibol ahi.

Hiche app kibol ho chu TikTok, Shareit, WeChat, Helo, Likee, UC News, Bigo Live, UC Browser, ES File Explorer le Mi Community ho ahi akiti.

Hiche app ho khana chu India le China kikah a gamgi thu a kiboina ana umtoh lhon a kibol ahi. China in agamsung a kon kisem app ho mangcha a India sung a thu le la a alahdoh ding ginmo na kinei toh lhon a hiche natoh chu ana kinei ahi.

Ministry of Information and technology in mobile app ho ahilou lamtah a kijah na chung a complaint ana mu jing utoh lhon a, transmitter data ho gampaam a kithot hetdoh ahi toh lhon a hiche app ho chu khana anei ahi tin Ministry of electronics akon thuso kimu chun asei in ahi. China in digital silk route jang a gam chom chom a hitabang technology akon gamsung a ho kholchil na le chalei ding tohgon anei ahi tin hetsah na jong ahung kinei in ahi. Chinese Company Huawei in 5G ana pohdoh toh lhon a hitabang network hi China in gamsung security suhboi na ding a ajah thei dinmun a aum toh lhon a gam tah tah in kichat na ana nei toh lhon a khan a le jah louding a phondoh na ana nei u ahita ahi akiti. India in hcieh app ho akha toh lhon a gam tamtah in jong hin khah uvin te tin Ministry of electronics in hetsah na ahin nei uvin ahi. Tu chan in itih chan ki ban ding ham vang sei ahi nai hih in hinlah India a nung jah talou ding in jong ministry in hetsah na ahin nei uvin ahi.