Manipur a Covid-19 toh kisaiya mikhat thibe, ni 10 sunga mi 16...

Manipur a Covid-19 toh kisaiya mikhat thibe, ni 10 sunga mi 16 thi; Recovery rate 78.92% phata

77
0
SHARE

Manipur a Covid-19 toh kisaiya mikhat thibe, ni 10 sunga mi 16 thi; Recovery rate 78.92% phata

Imphal, Sept 12(ET): Manipur a mikhat in thina atuo kit toh lhon in COVID-19 jeh thina toh agomin mi 45 alhing tan ahi. Hitoh kilhon in state in ni 10 sungin Covid-19 jeh a thi mi 16 apha in chukeh positive case thah 152 aneiyin ahi. Central Armed Police Force (CAPF) personel mi 29 toh pum in state sunga COVID-19 positive agomin 7,731 alhing tan ahi.

Hiche positive cases ho hi; VRDL, RIMS-23; JNIMS-41; Thoubal – 6: Chandel – 1; Jiribam – 1; Ukhrul – 1: Maipakpi Hospital – 3; Churachandpur -9;lmphal East- 2; Imphal West -28: Raj Mcdicity 4: Babina Diagnostics – 21: Jivan Hospital – I; Bishnupur – 2: Shija Hospital – 2: Imphal West RAT -7 ahi. Ahung kondoh nau ahileh; Imphal West – 60; Kakching – 2: Chandel – I; Jiribam – I; Ukhrul – 1: Noncy -2; Thoubal – 12: Bishnupur -2; Imphal East -33: Churachandpur -9 chuleh mi 14 ho (IW- 5, Noncy – 2, Chandel – 1, Churachandpur – 5, Imphal East – 1) amaho hi state danga kon inlam hinjon ho ahiuvin chuleh adang 109 ho hi milham lhun leh kondohna(travel history)neilou ngen ahiuve.

Nidan 24 sung chun nupi kum 48 vel mi khat JNIMS mun ah thina ana toh in ahi. Tuni chan a agoma thina toh hi mi 45 alhing tan chuleh mi 100 discharged ana kibol in ahi.

Discharged kibol ho hi CAPF (31). RIMS (5). JNIMS (3). CCC TK Ukhrul (18), RD Wing (13). CCC Lamboikliongnangkhong (30) akon ahiuvin RT-PCR test kibol jouva negetive ahi photna aumtoh kilhon a lhakang a um ahiuve.

Tuchan a  positive cases kimudoh jat agomin 7731 (Milham – 5930 leh Central Security Personnel -1801) alhing tan ahi. Adamdoh jat agomin 6102 (Milham – 4604 leh Central Security Personnel -1498) alhing tan ahi. Chuleh active cases agomin 1584 (Milham – 1284 leh Central Security Personnel – 300) alhingtah hitoh kilhon in recovery rate 78.92 % aphatan ahi.

Anoiya helpline numbers hohi 24×7 a kijahmatpi theijing ahiuve:

Covid Common Control Room Number-1800-345-3818, Psychological Support Number – 8787457035. 9402751364. 7629943596 and Hospitalisation Number – 1800-103-2015.

Visit www.manipurcovidstories.org

Chuleh inmun a kon a government doctors ho Online a doh le sah neinom hon Sunday tailouva nidan  (10 a.m. to 3 p.m. ) sung a hi www.esanjeevaniopd.in ahi lou leh Google Play a eSanjeev aniOPD app download kibol a kihoumat pi jingthei ahi

xxxxxxxxx

MLA penna nu jaona a akinaipi mi 11 Covid-19 positive kimandoh

Imphal, Sept 12(ET): Thangmeiband Assembly Constituency a MLA Khumukcham Joykishan penna nu panna in akinaipi mi 11 chu test akibol nauva konin Covid-19 positive ahiu hetdoh ahi tin ginchat umtah thulhut chun aseiyin ahi.

MLA Khumukcham Joykishan security personnel phabep jong Covid-19 positive ahiu hetdoh ahi in hinla MLA Joykishan chu Covid-19 positive akonin ana hoidoh in ahi.

Xxxxxx

Covid-19 case thah 97,570 toh India a case agoma 4.6 million lhingta

New Delhi, Sept 12: India sunga coronavirus natna nikhat sunga (Covid-19) cases thah 97,570 akimube toh kilhon in agomin 4,659,984 alhing tan chuleh thina toh mihem 1,201 apha tan ahi tin Saturday nikho a Union health ministry thuphon chun aphongdoh in ahi.

India in nithum kijom in cases thah 95,000 niseh in ana mube jing in ahi. Chuleh September lhabul a kon in niseh a thi hi 1,000 val ana hijing in ahi. Tuchan in natna jeh a thi hi tuni geiyin mihem 77,472 alhing tan tin health ministry thuphon chun atahlang in ahi.

Tuchan a hospital a kon a discharge kibol hi agomin 3,624,196 alhing tan chuleh active cases hi 958,316 alhing tan ahi tin health ministry chun aphongdoh in ahi. Chuleh adamdoh leh active cases kikheh dan 2,665,880 in apha in chuleh recovery rate hi 77.77% alhing in ahi.

Health ministry in aseibe na ah nanatna nei 3.6 val lah ah 3/4 tobang damdoh a discharge kibol alhing tan chuleh tua active cases hi 1/4, vel bou ahitai tin atahlang in ahi.

 Friday nikho a ministry in aseina ah natna athahbeh a nei kimube hi 57% tobang ahi in amaho hi state 5 akon a kimudoh ahiuve ati.

Tuni chan in Maharashtra hi natna vei tam neipen ahi nalai in postive cases million val anei in ahi.

India Covid-19 total cases lah a 60% vel hi Maharashtra, Tamil Nadu, Andhra Pradesh, Karnataka leh Uttar Pradesh ho sehseh in alhinsah jou un ahi. India in recovery atam neibe jing toh kilhon in nidan 24 sung chun adamdoh mihem 70,880 discharge ana bol in ahi.

Nikhat sunga ding a Maharashtra a damdoh jat mihem 14,000 apha in, Andhra Pradesh ah 10,000 apha in ahi tin thuphon chun atahlang in ahi. Health ministry thuphon dungjui in natna nei lah a 74% tobang hi Maharashtra, Karnataka leh Andhra Pradesh akon tobang ahi in India pumpi a positive cases lah in 48% tobang alhit jou un ahi.

Vannoi leiset pumpi a natna nei agomin 28 million apha tan chuleh athi jat hi mihem 913,018 aphatai tin Johns Hopkins University coronavirus disease tracker chun atahlang in ahi.

Xxxxxxx

Meghalaya Power Minister leh NPP lamkai James K Sangma Imphal Airport a COVID-19 positive ahi kihedoh

Imphal, Sept 12(ET): National Peoples’ Party (NPP) a National Organisation Secretary leh Power Minister of Meghalaya Government James Pangsang Kongkal Sangma, tuni nikho a asopipa Conrad Sangma, Chief Minister, Meghalaya leh OSD khat toh Manipur sunga NPP sunga boina umho seitoh dinga ahung kholjin na lhon ah Imphal Airport mun a Rapid Antigen Test(RAT) test kibolna a kon in Covid-19 positive ahi hetdoh ahi in ahi. Chief Minister Conrad Sangma leh a OSD hovang negative ahi sohkei un ahi. Kholjin a hung lamkai len thum ho hi Imphal Airport mun ah Deputy Chief Minister Y. Joykumar, Sports Miinister Letpao Haokip, Health Minister Jyenta Kumar leh Fishery Minister leh tule tua NPP interim president Kaishii hon ana lamtuo un ahi.

Meghalaya Chief Minister Conrad Sangma leh Power Minister James K. Sangma pan na a kholjin a hung lamkai len mi thum ho hi nidan 12:50 vel a chu New Delhi a kon a Indigo Flight 6-E 2019 a hungtou ahiuvin ahi. Chief Minister Conrad Sangma leh James K Sangma hi touna jon khat a hung toukhom lhon ahi. Conrad touna hi 1C ahi in, chuleh Jame K Sangma touna hi 1D anh in chuleh OSD pa touna hi 1A ahi. Hiche a kon a hetthei chu nidan 3 sung Imphal ahin jot sung uva athum uva kinacha a toukhom ahiuvin ahi.

Union health Ministry in state jouse leh UT jouse a RAT test kibol jouva negetive ho avel a RT-PCR test bol kit ding tia phondohna ana nei dungjui uva Manipur health Department injong thupeh hi ana jui un ahi tin thulhut chun aseiyin ahi. Thulhut chun aseibe na ah, Chief Minister Conrad Sangma leh a OSD pa’n Hotel Classic ajon lhon in hinla James K Sangma chu airport mun a dalhah den in aum in ahi. Thulhut in aseibe na ah James K Sangna in Meghalaya kinungle nadin kisahkhol na aneitoh kilhon in Helicopter hire akibol in nilhah lam nidan 6pm vel chun Shillong ana jon pai tan ahi.

Alangkhat ah Chief Minister Conrad Sangma leh a OSD pa test sample jong avel photchetna ding in RT-PCR test bolkit ding in thotdoh in ana umngal in ahi.

Xxxxxxxx

Covid-19 dan gahtah pum a tuni NEET themvetna chelha ding

New Delhi, Sept 12: National Testing Agency (NTA) in Covid-19 dan gahtah pum a jing le achelhahpi ding NEET themvetna a hi simlai lakh 15 vel pang ding ahi, ati.

Hitolhon a kikahtah a um thei nading a exam centre jong 2546 a pat 3843 a suhsang le pindan khat a simlai 24 ana tou jong 12 a NTA chun asuhlhom ahi.

Hiche themvetna hi Covid-19 natna jeh a velni vohchon ana hi engineering entrance banglou a pen le lekha bouseh a chelha ding ahi. Hiche themvetna May 3 a umding chu July 26 a dia chon ana hi a achaina kei a September 13 a dia chon hikit ahi.

Themvetna a pang dia min pelut agom a simlai lakh 15.97 ahi.

NTA senior official khat in asei na ah simlai ho kikahtah a touna ding ijakai gontup le dan juiding ho gei simlai ho het a tahdoh hiding ahi, ati.

Exam centre mun phabep jong khel ahiban a exam centre jouse kotbul a hand sanitiser koi hiding simlai ho muhtom pum a chediu ahi.

Odisha, Madhya Pradesh le Chhattisgarh government hon simlai ho che nading gari agonpeh ding chule  Indian Institute of Technology (IIT) hon jong insung hahsa simlai ho che nading gari agonpeh ding ahi.

Hiche ban a Kolkata Metro Railway in jong simlai ho che le nadia railway agonpeh ding ahi.

Langkhat a Congress lamkai Rahul Gandhi, West Bengal Chief Minister Mamata Banerjee, Odisha CM Naveen Patnaik, DMK president M K Stalin chule Delhi Deputy Chief Minister Manish Sisodia hon themvetna phat chon dia ngehna aneikit ahi.

Themvetna chelhah ding jahda le phat chon dia  Rajasthan le Punjab (Congress), West Bengal (Trinamool Congress), Jharkhand (Jharkhand Mukti Morcha), Maharashtra (Nationalist Congress Party le Shiv Sena) hon ngehna anei jong Supreme Court in asanpeh tapon ahi.

Xxxxxxxx

ST Scholarship tuchan peh hinai lou

Imphal, Sept 12(ET): Ministry of Minority Government of India scheme noi a tribal simlai ho kipe ji Schedule tribe scholarship 2019-20 ading chu utni chan gei in Tribal Affairs & Hills Department, Government of Manipur pehdoh na anei hih lai uvin ahi. Hitabang chanvou tu channa kipeh lou na chung a All Manipur Students Union in govt ang a agan nathei peh a pehdoh ahi na ding in hetsah na ahin nei uvin ahi.

Hitobang chavou hi ST simlai ho ading a lekha simna a phatchom na lentah a apan jing toh lhon a tu channa pehdoh na kinei lou hin simlai ijat ham atoh khah dan jong hetsah na ahin nei uvin ahi. Covid-19 toh kisai a thunglhang gam a um simlai ho in che le vale na a boina ato utoh lhon a admission kibol naho ahi thei channa achom lam le abei lam a bol ding adeisah dan u jong hetsah na ahin nei uvin ahi. Ahunglhungding 2020-21 a scholarship bol kit na ding nikho hi gamsung boi jing toh lhon  suh sao be ahi na ding in jong kiloikhmna in govt ang a hetsah na ahin nei uvin ahi.

xxxxxxxxxxxxxxxxx

Nagaland a Covid case 118 a khan be

Kohima, Sept 12: Nagaland sung a Covid natna nei mi 118 a ana pun be toh lhon in state sung a hiche natna nei agom in mi 5000 aval tan ahi. Tu channa state sung a natna nei hi mi 5064 lhing ahitan ahi. Case thah ho chu sample 609 ki test na a ana kimu doh ahi akiti.

Tuni a case thah hetdoh be ho chu Dimapur akon 113, Kohima le Peren akon 2 cheh chuleh Mon akon 1 ahi akiti. Tuni a covid akon damdoh ja chu mi 31 ana hi in ahi akiti. Tuni a adamdoh hop um in state sung a adamdoh jat hi 4000 lam ahung naitan ahi akiti. Tuni a damdoh ho lah achu mi 25 chu Kohima akon ahiuvin, Mon akon 5 chuleh Phek akon 1 ahi akiti.

State health minister S Pangnyu Phom in  state sung covid thu toh kisai in mipi ho hetsah na ana nei in ahi. Tu channa state sung case ho lah ahi armed force personnel natna hi 46%, gampam akon hung kile ho 28%, akilahson ho 19%  chuleh frontline worker ho 6% ahi akiti.

Xxxxxxxxxx

Sugnu Tribal a meikah um

Chandel, Sept 12(ET): SDPO sugnu in achesa nisim 10/9/2020 leh 11/9/2020 sung jan lam nidan 11.30 pm vel chun Sugnu Tribal village ah meikah aum e tithulhut ana mutoh kilhon in jingkah lam nidan 1:00 am vel chun fire service ho panlahna in meikah phelmit in ana um in ahi.

Meikahna mun kholchil ahitoh kilhon in thingpeh bang a kisem leh achung langva kikhu grocery shop 2 leh von kijohna leh tailoring kigom khat mei ana ka in ahi. Inn mei in akah khah ho ahi leh Teresa khongsai(35) years D/O(L) Jamsai khongsai of Sugnu Tribal, Oinam Damenti (45) W/O  O.Inaobi Singh of Sugnu Tribal leh PS Bicky Anal (43) W/O Kenning Anal ahiuvin, Sugnu Tribal area a khosa ngen ahiuvin ahi. Chuleh  PS K Kenning Anal (45) S/O PS Lhungthu Anal of Sugnu Tribal area chenna injong ana kalha in ahi. Meikah hung kipatdoh dan leh akahdoh jat hetchen ahi naipon, fire service ho thuchen hin kholtoh dinga nganse ahiuvin ahi.

Xxxxxxxx

Bishnupur a mikhat athisa a kimudoh

Bishnupur, Sept 12(ET): Achesa September nisim 11 nikho nidan 7:30 vel chun thulhut kimu a kon in melhetlou mi phabep in avoh jouva athisa a alupna chunga um chu achenna Bishnupur ward no. 3 a mudoh in ana um in ahi. Hitoh kilhon chun Bisnupur police team a Addl SP(LO) leh OC/NBL lamkaina in amun ana dellut un, thilsoh umdan giltah in kholcilna ana neiyun, thiluong jong Mobile Forensic Team, Impha west ho jaona in phatah in kholchil ahi. Thina toh pa hi Moirangthem Nilamani Singh (55) S/o M. Kalachand Singh of Bishnupur Maning leikai Ward No. 3 ahi akiti. Thilong hi post mortem bol ding in RIMS mortuary a koi  ahi.

Hiche thina toh kilhon in FIR No.57(9) 2020 NBL-PS U/s 302/34 IPC jihlut in ana um in ahi. Post Mortem jong Executive magistrate leh thina toh pa insungmite jaona in video coverage toh kitho in ana bol paipai un ahi.

Moirangthem Nilamani Singh (55) S/o M. Kalachand Singh thina toh kisaiya in mithum matdoh in a um pai pai in ahi. Matdoh a um ho ahileh Namoijam Tomba Singh (60) S/o. (L) N. Ibotombi Singh, Namoijam Sunder Singh (45) S/o. N. Tomba Singh leh Namoijam Romesh Singh (34) S/o. N. Tomba Singh of Bishnupur Maning Leikai W/No. 3 ahiuvin ahi.  Chuleh JAC leh local leader hotoh akituo un hiche chung changa boina imacha sem lou ding leh chingthei tah a umding in jong temna aneiyun ahi.

xxxxxxxx

Thoubal police hon WY Tablet phabep mandoh

Thoubal, Sept 12(ET): Tuni nikho nidan 3:15pm vel chun Thoubal District police hon Dr. S. Ibomcha Singh, SP/Thoubal vaisaina in Shri Sachidananda Soibam, Addl.SP(Ops) lamkai na leh Inspt. N. Sadananda, OC/Cdo Unit Thoubal kithopi na in mithum ana mandoh un ahi. Matdoh a um ho ahileh BM Rashid Ahamed (25) yrs S/o Abdul Hakim of Lilong Hangamthabi, Md. Boramdin (29) yrs S/o Md. Abdul Hamid of Moreh Turel wangma Ward No.7 leh  Md. Abdul Manan (34) yrs S/o Md. Abdul Shamat of Moreh Turel Wangma Ward no.7 ahiuve. Amaho a kon in WY Tablet packet 15 i.e. 2000 × 15= 30,000 leh two wheeler ni toh  Thoubal Bazar munah ana mandoh un ahi. Matdoh a um ho leh akimandoh thil ho Thoubal police station ah pehlit in ana um in ahi.

xxxxxxxxxx

Naga political thu seilhah phat anaitai tia NNPG Working Committee in sei

Kohima, Sept. 12(ET): Government of India interlocutor R.N Ravi leh Working Committee of Seven Naga National Political Groups (NNPGs) in September 10 nia Police Complex, Chumoukedima aki hou nauvah Naga te Political thu hi akicheh nading phat anaitai tin aseijin ahi.

Working Committee (WC) in India government in Naga political thu hi aseichet phat le Naga te pumkhat a achenkhom diu hi Naga mipi ngaichat pen ahitai, ati.

PM Modi in September lhasung a sei lhah hiding ahi tia ana phon lhahsa jong ahitai, ati. November 17, 2017 a soi ana kikai kinop tona pa hi government in agelkhoh apoimoi tin GPRN/ NSCN vetsui na noija um Working Committee chun aseiye.

Xxxxx

India le ASEAN in  akiguijop na lhon velvet na anei hontoh lhon a Kum 5 sunga chepi ding doi le tup sem

New Delhi, Sept 12: India le gam 10 kiloikhomna ASEAN in tuni in gamsung ho kigui jop na chung a natoh na kinei ho velvet na anei hontoh lhon in ahnglhungding kum 5 sung a bolding tohgon hoc hung a jong kinoptona ana nei uvina hi.

India le ASEAN lamkai ho chun Covid-19 doudal na chung a pankhom jing ding angai dan jonng ana seikhom uvin ahi. Hiche kihou na chu External Affairs Minister S Jaishankar le Thai  external minister Don Pramudwinai makai na noi a ana kibol ahi.Hiche kihou an achun ASEAN sung ajao gamjouse aon foreign minister rho injong panlah na ana nei uvin ahi.

Hiche meeting hi China in South China sea le Ladakh hopsung a gam ahin keh be laitah a kibol ahin, kihou na achun China thu sei le sei lou thu vang hetsah na ahung kinei pon ahi. AHunglhungsing kum 5 sung a tohgon chung chang a kinoptona ho achun sum kol veina lam le mipi ho kivil to na chung chang thu seikhomna ana kinei in ahi. Gamsung ho a khantou machal na natoh naho a kihtokhom a panlah khomna kinei an ding in jong kihou na ana nei uvin ahi. Hetthei khatchu ASEAN gamho in achesa kum 17 sung ahi India sung a dangka USD 70 billion lam invest ana boldoh u ahitan ahi. ASEAN member gam ho chu Indonesia, Malaysia, Philippines, Singapore, Thailand, Brunei, Vietnam, Laos, Myanmar le Cambodia ahiuvin ahi.

Xxxxxxxxxxx

ZSP GHQ in Presidential election 2020 cum Oath taking ceremony kingon ananei

B.Lalboi Gangte

CCpur. Sept. 12 (ET) : Election Commission tohgon nanoi in tunin ZSP Library cum Study Centre, Zogal hall, Zoveng mun’a akhat-vei channa ding in Zou Sangnuapang Pawlpi (ZSP-GHQ) Presidential election 2020 cum Oath taking ceremony leh Disbursement ZSP kipuihoina dan-bu, dispersion of career A compendium of academic career kingon ana um in ahi. Kingon achun Election Commissioner Nengchinlam, Secretary, Literature and Youth Affairs UZO-GHQ lamkai nan ZSP GHQ 2020-2023 sung’a lamkai ding President lhenna ana kibol in ahi. Chuleh tu leh tua President hina tuh Nengkhosoi Phiamphu S/o (L) P. Goukham of P. Kamdou veng tailou adang Nomination file bol aumlou jeh in 2020-2023 sung’a ZSP GHQ a President ding in Un-contest in lhendoh anahi kit tan ahi. Election commissioner Nengchinlam in President thah Nengkhosoi Phiamphu kihahsel na jong ananei sah in ahi.

Hiche toh lhon’a kingon phatsung in Chinlunthang President, UZO-GHQ in First Amendment Constitution Book, ZSP kipuihoina dan-bu hondohna in chuleh Nangzathang, V-President UZO GHQ in Dispersion of career a compendium of academic career hondohna aneiyin ahi. Chuleh Thangzamang, Joint Secretary UZO-GHQ in ZSP GHQ President hina tuh ding’a lhendoh’a um Nengkhosoi Phiamphu ding in Pathen heng’a taopeh naleh phat khum khana aneiyin ahi. Hetthei khat chu Zou Sangnuapang Pawlpi (ZSP-GHQ) noi’a tuhin Block 12 leh Branch 2 aum in chuleh Block 12 noi’a Unit phabep jong aum in ahi.

xxxxxxxxxxxxxxxxxx

JAC lamkai na’a (L) Ranjan chung thu Police leh Govt. in gangtah’a mona neiho amatdoh thei nading nona’a toumun kiphinna nei

B.Lalboi Gangte

CCpur. Sept. 12 (ET) : (L) Arambam Ranjan kitha nachung thu tunin Government leh Police akon imacha tohdoh aum nailou toh lhon’a tolthat ho kholchilna natoh suhhat cheh nading in Zoveng lutna bul, Tedim Road lampi pang’a toumun kiphinna ananei uvin ahi. Hiche achun CCpur  khosung veng chom chom akon mi phabep in lungkim lou vetsahna ananei uvin chuleh placard ah thu cheng chom chom kichoi in tolthat ho matdoh nading nona in kholang anasam uvin ahi. Hetthei khat chu hiche toumun kiphinna hi Joint Action Committee (JAC) lamkai na noi’a chelha ahi.

Hiche toh lhon’a toumun kiphinna phatsung in Letboi Valte, Chief of Zenhang Lamka jaonan kiloikhomna lamkai chom chom hon jong pan anala uvin hiche achun Police Department in tolthat ho agannathei pen’a amatdoh nading’u nona’a anungthop’u ahidan atahlang uvin ahi. Chuleh mipi kikhen jou nung in JAC lamkai hon mipi hetding’a thuphon anei nao’a (L) Arambam Ranjan that ho matdoh ahitheina ding’a kholchil na achelhah sung’a koi tobang hiche thu’a thuguh peson thei aum leh Government in kipaman Dk. Lakh 1 apeh ding’a kitepna umsa ahi toh lhon’a JAC in jong Dk. Lakh 1 ma peh ding’a kitepna anei dan’u aphongdoh in ahi. Chuleh koitobang kholchilna panpi thei ding thu he hon 8730955304/ 9612649456 contact abol thei ding uvin jong phondohna anei in ahi.

xxxxxxxxxxxxxx

NHIDCL in NH-150 leh 105 lamlen semphat na natoh anei District In-charge Minister V. Hangkhanlian in vetlhah nanei

B.Lalboi Gangte

CCpur. Sept. 12 (ET): Manipur State sung’a National Highway sempha National Highway Infrastructure Development Corporation Limited (NHIDCL) in Churachandpur District sung’a lamlen poimo tah 2 tichu National Highway 105 (Tipaimukh Road) leh Guite Road National Highway 102-B semphatna natoh anei uvin ahi. Chuleh National Highway 150 semphatna natoh mun chom chom’a akipat nung in tuhin khopi sung Zero Point Police station apat  Pearsonmun kikah lamlen kisuh tona hoh-twi londoh na ding natohna anei uvin ahi. Hiche natoh chelhah pahtsung in District In-charge Minister V. Hangkhanlian in vetlhah na aneiyin chuleh Pawan Yadav IAS DC/CCpur leh S. Ginmuan Ngaihte, MCS SDO/CCpur panan Minister Worker hon jong anajui uvin ahi.

Hiche toh lhon’a Bungmual khosung’a nula ding pucca a kisem namun’a natoh ho vetlhahna anei masa uvin chule D.Phailen khosung nula sem natoh naleh mimal chenna inn kimkhat asuhkhah thei ding dinmun’a um ho jong amun in vetlhah anei in ahi. Chule lamlen pam’a um electric transformer kimkhat nula sukha thei ding’a um hojong vetlhahna anei uvin ahi. Hiche thu’a DC/CCpur in aseina’a lamlen semna natoh hi NHIDCL in abol ahi in gamsung leh khopi sung ding ajong khantouna chikhat ahi. Lamlen semna’a asuhkhah ding’a um gam ho Electric Dept. NHIDCL leh Revenue Dept. toh survey chelha ding, lamlen ding’a mun pehdoh’a umsa mimal kimkhat in chenna inn ding’a akisah uleh compensation peh louva eviction bol khum hi ding chule hitobang gam gu ho holdohna kipan ding ahi ati. Chule lamlen pang’a transformer kimkhat um jong akisaipi Dept. toh kitho’a mun thoveng’a chondoh  dingdan lampi vetlhah ding ahi.

Alangkhat’a National Highway (NH) 150 hi Zero Point, Police Station apat Kilometer 185 kikah chuleh Kilometer 185 apat Kilometer 262 ding portion 2 ahi. Zero Point, Police Station apat Kilometer 185 natoh nahi M/S NDS Construction khut’a pehdoh ahi naban’a natoh hi May 7, 2018 akipan ahitan tukum May 6, 2020 ah jotheng ding chu boina chom chom jeh’a aphat cha’a kichai theilou ahi. Chuleh Kilometer 185 apat Kilometer 262 kikah Kilometer 77 a sao hi Dk. Crore 36 lut’a natong ding’a M/S Nidhi Creative Infrastructure Private Limited kipedoh ahi naban’a Sept. 17, 2018 a natoh kipan ahi in Sept. 17, 2020 ah natoh jotheng ding ti ahi vang in Covid jeh in jotheng in aum thei naipon ahi.

xxxxxxxxxxxxxxxx

 CCpur District a Covid +ve case thah 6 kimudoh; CCC ding’a lupna 1000 um nathei ding kisem Miniter V. Hangkhanlian in vetlhah nanei

B.Lalboi Gangte

CCpur. Sept. 12 (ET) : Churachandpur  District sung’a Covid-19 +ve case akimudoh jing toh lhon’a Covid Care Centre 2 a lupna kining lhing lou ding dinmun’a aum tah jeh in lupna 100 um nathei ding Khominthang, New Lamka aum Sadhbhavna Mandap a natoh achelhah jing lai tah ahi. Chule natoh chelha ho velha ding in Minister V. Hangkhanlian, Pawan Yadav IAS DC/CCpur, S. Ginmuan Ngaihte MCS SDO/CCpur, Dr. Vumchinpau Tonsing CMO/CCpur  hon tunin vilna ananei uvin ahi. Hetthei khat chu New Lamka aum, Lamka South TD Block office campus sung’a Sadhbhavna Mandap um hi Covid Care Center hi iti nikho leh hondoh thei hi ding ham ti’a vetlhah na ananei’u ahi. Chule boina ima aum lou leh ahung lhung ding Sept. nisim 15 nikho’a hondoh thei ding’a natoh jouse jotheng ding in Official hon tahlang na ananei uvin ahi.

Hiche toh lhon’a vetlhahna anei phatsung’a Minister V. Hangkhanlian in Covid-19 Care Centre In-charge Dr. Donna akimupi in kihoulimna jong ananei lhon in ahi. CCpur District sung’a Covid-19 +ve case um jat dohna anei naban’a DC/CCpur leh CMO CCpur in District sung’a niseh’a +ve case akibelap jing toh lhon’a phalbi chan’a tua sang’a tamjo natna veibe ding ahidan atahlang lhon in ahi.

Alangkhat’a CCpur Khopi sung’a Covid-19 +ve case tuni athah 6 akimudohbe toh lhon’a agom’a case 746 alhing tan ahi. Case thah kimudoh 6 (Pasal 4 leh numei 2) hohi abon uvin State polang akon hung kipan ngen ahi uvin ahi.

xxxxxxxxxxxxxx

KUSA in General meeting ananei

CCpur, Sept. 12 (ET) : Kuki Songwriters Association (KUSA) in tunin Head Office T. Champhai, CCpur District mun’a General Meeting ananei uvin hiche achun KUSA in kilolna ananei holeh KUSA Constitution a Articles ho velvetna ananei uvin ahi. Chuleh hiche phatsung’a makho’a toh ding le bol ding poimo (Agenda) ho seikhomna jong ananei uvin ahi.

Hiche toh lhon’a Lalzom Gangte in World Record Award anamu loppeh na ding tohgon lockdown jeh a postponed kibol na chung thu, Head  Office lamdoh ding thu, laa lama khantou machal na ding step lah ding dan leh adang dang thu poimo ho seikhomna jong ana kinei in ahi tin KUSA Spokesperson L. Seikholen Khongsai in aseijin ahi.

Xxxxxxxxx

L Phaimol leh S Zezaw kho’a Gram Sabha ana kibol; Govt. akon scheme hung ho hi hahsa genthei ho ding bou ahi ti’a District Social Auditor L. Vahboi in sei

CCpur, Sept. 12 (ET): L Phaimol leh S Zezaw kho mun’a Social Audit  for MGNREGS anakibol in chuleh tunin (Sept. 12) mipi hon Mask leh Social distancing phatah’a jui pum in Gram Sabha anabol uvin ahi.

Chule Audit kibol sung ding hi achesa Sept. 7 apat 12 chan hiding ahitoh lhon’a tunin ( Sept. 12) kho 2 tichu L Phaimol leh S Zezaw in Gram sabha anabol ahi. Gram Sabha meeting achun  Singat TD Block BDO (MGNREGS) Jameson leh staff hon pan anala uvin ahi.

Hiche toh lhon’a District Social Auditor  L. Vahboi  in Social audit kibol na’a findings ho phondoh na anei in chuleh Audit kibolsung’a bol phat ding’a kimu ho seilhanna anei in ahi. Chule Gram Sabha  hin lamkai leh recording bol kimneithem, VRP in Social Audit kibol lona ajeh hilchenna anei in ahi. District Auditor L.Vahboi in hiche scheme hohi inchen nomsa, service neiho a ding ahipoi, ajeh chu Govt. in khohsah na hahsa genthei ho ding’a abol ahin scheme hi man’a moh bolbol’a sum mu ding ahipoi. Chuleh  tua jong akiphal aum leh a chanvou ho cancel/surrender abol thei nalai ding ahi ati.

Alangkhat’a Central Govt. leh State Govt in mipi hahsa genthei ho gelkhoh najal’a hitobang phatchom naho ahin peh jih in alunglhai nao leh kipathu seina anei uvin ahi. Jameson SDO/BDO in DBT ,Direct Benefit Transfer ahi thei na ding’a poimo ho hilchen na anei in chuleh account kihon nailou hon agannathei pen’a ahin kisuhtup ding uvin hetsah na anei in ahi.  Chuleh MIS In-charge Sanga in jong Management Information   System (MIS)  chung chang’a hilchen najong anei in ahi.

xxxxxxxxxxxx

Arunachal Khangdong mi 5 kipuidoh ho ni 10 jouva China in lhadoh tau

New Delhi, Sep 12: Indian Army official thuso in aseina achun Arunachal Pradesh gammi khangthah 5 China gamsung a thinglhang lou hol a ache nauva ni 10 aumnau aki mulou jouvin China official hon Indian official heng a ahin pedoh uvin ahi. Indian army hon lekha poimo o chaiding jouse achai jou uvin Kibithu akon khangthah hochu akipuidoh e tin Tezpur based Lieutenant Colonel Harsh Wardhan Pande, PRO (Defence) chun aseiyin ahi. Khangthah ho chu ni 14 sung quarantine aum jouteng ule a insung mite akilah thei ding u ahidan jong thulhut chun aseiyin ahi. Army ho seidan achun hiche tobang Arunachal Pradesh khangthah ho chung a lhung hi a thumveina ahitai ati. Hiche tobang thilsoh ahin Indian Army hon agelkhoh lheh uvin ahitheina chan in mudoh tei ding in pan ala uvin ahi. Khangthah ho jouse tuhin abit tauvin protocol dungzui a quarantine ni 14 umding ahiuve ati.

Khangthah ho hi Indian army ho manding a bel sem a natong ahiuvin amau hi September 2 nikho a chu sera-7 akon Upper Subansiri district akon apotdoh uchu ana kiholmo pan u ahitai. Akiholmo phat uvin amang lah a khat anaopa in social media a PLA hon aman uve tin post abol in chule Arunachal East BJP MP Tapir Gao in jong twitter a alungnopmo thu ana phong in ahi. People’s Liberation Army hon jong hiche thuso chu amu uvin khangthah ho chu amau gamsung a umding anaginmo jeh un ahol uvin tuesday nichun amudoh thu ana phong uvin ahi.

Xxxxxx

Assam a COVID-19 case thah September lhasung a 90,000 val umbe thei

Guwahati, Sept 12: Assam health minister Himanta Biswas Sarma in September lhasung a COVID-19 case thah 90,000 umbe theiding ahi tin asei e. August sung a case thah 68,000 ana kimudoh in, September ni 10 sungkah in case thah 29,000 mudohbe ahi, ati.

Aman thuso miho koma aseina ah hitia hi achejom peh leh lha kichai lang leh case 90,000 val umthei ding in aseiye.

Assam hin Friday chan a chu COVID-19 positive 1,38339 ana nei ahi in 1,08329 ana damdoh tauvin hiche ho lah ahin 430 in thina anato ahi.

Chule Assam hin COVID-19 case thah hi niseh a 2500 tobang aneijing ahidan aphongdoh in ahi. Government in ICU unit jaonan hospital ah kijenna dinmun vetlhah na akinei jing e, ati.

Biswas in aseina ah athi a kihe hi 430 hijong leh negative hi jou a thijong aum e tin aseibei.

Xxxxxxxxxx

Lillong Hoareibi College angai banga hon ahi tai: Principal

Imphal, Sept 12(ET): Themjilna mun ho COVID19 pandemic sunga hon leh hon louding thua lunggel kituo louna tamtah um jong leh Lilong Haoreibi College a principal Dr Raheijuddin Sheikh chun college angai banga achesa September nisim 11 apat chun akihong tai tin phondohna anei in ahi.

Thuphon in aseina ah lhakhat val College Students’ Union ho a konna kiphinna aum jeh a ana kikhah ahi ati, hiche notification hi janhi a Manipur Education Minister in themjilna mun ho September 21 apat kihon nading thupeh imacha akisem naipon, education department leh chief minister toukhom a juiding SOP ahin boldoh teng le bou hon le hon lou thu kihebep ding ahi tia ana phondoh nunga hiche college honding thuphon hung umdoh ahi.

Thuphon in aseibe na ah Directorate of University & Higher Education, Govt, of Manipur lamkaina noi ah ‘One Day Extensive Sanitization cum Cleanliness Programme’ ana kimang in, hiche hi ahunglhung ding September nisim 13 a BA leh BSc 6th Semester umding toh kilhon a kigong ahi ati.

Hiche clealiness programme hi tuni jingkah 6am apat Principal Dr. Raheijuddin Sheikh makaina a teaching faculties, nonteaching staff leh students union members ho jaona a

physical distance, face mask leh Covid-19 toh kisamkai SOP ho phatah a jui pum a ana kigong ahi dan thuphondoh chun atahlang in ahi.

Principal pa min a thuphon in atahlahbe na ah September nisim 14 apat September 16, 2020 geiya college phatah a kihong ding ahi. Hiche hi BA leh BSc 6th Semester themvetna a jao ding ho aboina lou diuva kigong ahina banah jilkung koi hileh hiche exam a pan lading jouse thonlouva pangcheh ding injong temna ana neiyin ahi.

Xxxxxxxxxxx

Dr. Vumkhoneh Haokip in ajih ‘Kalbi 40’ lekhabu hondoh hita

Imphal, Sept 12(ET): Dr Vumkhoneh Haokip in ajih ‘KALBI-40’ (The forty steps for Self-Improvement and Transformation) kiti lekhabu tunin Khaimang Chonhgloi, President KIM leh Paotinthang Lupheng, President KSO (GHQ) Jin-gun leh Jin jaum hina leh Rev. Thongkhosei Haokip, General Secretary, KBC thempu hinan Kuki Inn Imphal a thenso ahitai.

Hiche lekhabu hi Thadou-Kuki paova kisun Self-Improvement lekhabu masapen hiding tahsan ahi. Hiche kinguon na houlimna nei jousen hiche lekha sunga kisun thupi 40 hohi eima mimal leh society dinga khantouna theitah leh kikhelna phatah ahithei ding akinepnao thu asei uvin ahi.

Book review bol Rev. Lalpi Vaiphei in KALBI – 40 lekhabu hi Seminar Topic a neija mun chom leh houbung jousea seikhom dinga adeisahna jong aseijin ahi.

Lekhabu jihpa Dr Vumkhoneh Haokip in hiche lekhabu’a Mitthah lim kikoihin kikhelna leh lamdanna (Transformation) vetsah ahidan leh 40 hi Bible a significant tah number ahidan jong aseijin ahi.

Lekhabu sunpa Dr. Vumkhoneh Haokip hi Vumkhothang leh Ngaikhoneng Haokip chapa ahi in, MBBS hi RIMS mun a ana chai in, chuleh MD (Public Health and Community Medicine) hi AIIMS, New Delhi a ana chai in ahi. Chuleh ama hi Diploma in Ultrasonography, Diploma in Diabetes, chuleh Thyroid Health Training certificate neikhat jong ahi. Chuleh Medical Consultant in UNFPA, Public Health Specialist in Central Health Education Bureau, New Delhi, Deputy Director, All India Institute of Hygiene and Public Health, Kolkata, Assitant Professor, JNIMS Imphal mun ho a jong anatong in ahi.

Tule tu hin Dr. Vumkhoneh Haokip hi Tribal Affairs and Hills Department, Manipur noiya Chief Medical Officer leh Joint Director, atuh jing lai ahi.

Alekhabu jih phabep hochu HIV/AIDS, Diabetes and its treatment, Tintong Haokip, Chief of Laijang hojong hi ahi.

Lekhabu hondoh na kin hi phatah a  COVID-19 SOPs ho jui puma kigong ahi.

Hiche lekhabu hi asimnom hon bailamtah’a amutheina diuva munchom chomma hung kikoi ding ahi.

Xxxxxxx

DESAM in numei chapang suse a mona neiho POCSO dan noi a gotna pehdia government kom a ngehna lekha pelut

Imphal, Sept 12(ET): DESAM Secretary Women Welfare Sanoujam Nikita Chanu in press release khat asona ah Chief Minister komah Democratic Students’ Alliance of Manipur (DESAM) in memorandum akipe lut e tin asei e. Themmona neiho hin mihem hina jana anei pouvin gotna sangtah peh hihen tia DESAM in CM kom a lekhathot a chu ngehna anei ahi. Mona neiho hin asuhset nu hi alim le amin jong mi jouse hetthei dia ana tahlang ahi, ati.

Government in hitobang anung so lou nadia pan alah angai e tia DESAM Secretary nu chun asei ahi. Aki suse nu leh a insung mite ho government in panpi na special budget agonpeh ding, thugah na aumlou jeh a hitobang hi avel a sohkit ahi in, mit a mu ho jong venbitna pehding a DESAM chun government kom a ngehna jong anei ahi.

DESAM Secretary nu in aseibena ah numei chunga sosetna neiho hi thina chan gotna pehding apoimodan le Fast Track court in navah a na atohthei lou jeh a tuchan a case chai loujong phabep pi umnalai ahi in, district jouse a Fast Track Special Court semdoh loi ngai ahitai, ati.

Xxxxxxxxxxxx

Delhi a Manipur khangdong pasal khat chem a kisut thu a mi 3 matdoh a um

Imphal, Sept 12(ET): Delhi a Manipur khangdong pasal kum 28 khat voh a aum thu a Special Police Unit for North East ( SPUNER) in mi 3 ana mandoh tan ahi. Amapa hi chem a anasat u ahi.

Chirag mun a pansa Shap Jajo kiti pa hin Kishangarh, South Delhi a aloipa kom a gavah le  jingkah nidan 3:45 vel a hung kile chu chem a ana lamtin u ahi.

Amapa hi auto tol khat in amudoh a AIIMS Trauma Center a ana pohlut ahi. Angong chem a kisat ahi.

SPUNER in ahet phat a hospital a umpa thudoh anei pai ule, mi 3 holah a khatpa hi lim a kon a hetdoh anahi e. Indian Penal Code 307 noija Kishangarh Police Station a FIR jihkhum ahitauve. Court a mat a um mi 3 ho tunia dinsah ahiuve.

Akisu kha pa hi phatlam amano to lhon in hospital a kon a lhadoh ahitai tin thuso khat chun aseiye.

Xxxxx

Damlou kivetsah hon Dr. H. Manoranjan Singh chunga kipathu sei

Tengnoupal, Sept 12(ET): Sub-district Hospital Moreh covid Care centre ana kiso toh lhon a natna dang nei ho in  PHC Moreh joh a kivetsah na ana nei jing utoh lhon in kivetsa na nei hon  Dr Manoranjan Singh specialist Family medicine,  M/O  in-charge Sub–district Hospital chung a kipathu seina anei uvin ahi.

Doctor pan OPD a tou a Diabetics, lung chang naho, Blood pressure, Hypertension,  Stroke patients le Bronchial natna nei ho avetsui na chung a mi 500 lam in kivetsah na ana nei dan u jong hestsah na ahung kinei in ahi. Hitabang a Doctor pa in mipi janna anei na chung a Moreh sung a um mipi kiloikhomna ho in kipa thu seina jong anei uvin ahi.

Natna jat chom chom nei ho in til a Imphal lam jonna kivetsah na ana nei ji uchu Moreh sung a specialist khat aum toh lhon a khopi sung mun mama a akijan the na chung uva kipathuseina jong anei uvin ahi.

Xxxxxxxxx

Naga People’s Movement for Human Rights(NPMHR), South Sector in AR ho chaloh demna nei

IMPHAL, SEP 12(ET): Naga People’s Movement for Human Rights (NPMHR), South Sector in achesa Septmber nisim 11 nikho a Namrei kho a Assam Rifles natoh an chung a demna sangtah ahin nei uvin ahi. NPMHR-South Sector akon thuso kimu chun aseina a 27th Assam Riffles (AR) in CO, Rippon Bora makai na noi in September nisim 11 nikho jingkah lam in Namrei kho a operation ana bol uvin, NSCN cadre 3 ana man uvin ahi ati.

Namrei kho mite chung a hunam natoh ana kinei na chung a kiloikhomna in demna nasatah a ahin nei utoh lhon a NSCN 3 ho le Namrei kho haosa pa blank paper a soi kaisah na ana kinei na chung a jong demna sangtah ahin nei uvin ahi. Leiset chung muntin a COvid-19 akon kivenna dinga kiven na aum jing lai a Assam Rifles in hitabang operation khosung khat a anei hi vangset umtah ahi ati. Muntin a Assam Rifles le Army ho Covid-19 case tam pen ahi utoh lhon a hitabang natoh na kinei hi mipi in adem ngai ahi tin jong tahlang na ahin nei uvin ahi.

Tu le tua Indian government le NSCN-IM kikah a ceasefire um jing lai a hitabang na toh an kinei hi daan toh kikal ahidan jong hetsah na ahin nei uvin ahi. Indian govt le asepai ho in kum 23 lam hung kihou na jana nei lou a NSCN chung a khan set na anei jing an chung uva jong demna ahin nei uvin ahi. Gamsung a mipi vetsui na ding kisa a hitabang natoh ankinei ho hi daan toh kikal ahidan le gamsung huinung sunommo ahidan u tahlang najong ahin nei uvin ahi.

Xxxxxxxxxxxxxxxxxxxxxxxxxx

Tamenglong District a NPF lamkai 17 in BJP jop

Tamenglong, Sept 12(ET): Naga People’s Front (NPF), Tamenglong akon lamkai 17 lam in tun in BJP ana jop uvin ahi.

NPF member ho chun ahunglhungding By election a BJP MLA MLA Janghemlung Panmei tosot na ding a NPF akon haina anei uva BJP ajop u ahi akiti.

Tuni a NPF akon BJP ana jop ho chu NPF, Tamenglong Unit President G Keikhumjanang; Working president Adim Panmei; Vice president Asin Kamei; Vice president Daikham; Vice president BT Guijuanang; Vice president Gaiduanrei; Treasurer Adi panmei; Secretary Moses le advisor 6 ahiuvin ahi. Haina nei ho lah achun ADC member ni jong ajao in amani chu executive member Pouhotlung Panmei le Small Town chairman Charles Liangdiang ahi lhon in ahi. NPF akon BJP hung lut ho chu tuni in lemna kingon khat ana kinei pi in ahi. Hiche kingon chu Janghemlung inn mun Utopia Ward No 1, Tamenglong a ana kibol ahi.