Manipur a COVID 19 toh kisaiya mi 2 thibe; CAPF 165 panna...

Manipur a COVID 19 toh kisaiya mi 2 thibe; CAPF 165 panna a case thah 249 kimube

45
0
SHARE

Manipur a COVID 19 toh kisaiya mi 2 thibe; CAPF 165 panna a case thah 249 kimube

Imphal, Aug 7(ET): Manipur gam a Friday nikho a Covid 19 toh kisaina mi 2 athi be in, ani lhon a pasal ahi lhonin ahi. Mikhat hi kum 76 a upa Kangpokpi district mi ahi in chule khat hi kum 28 a upa Chandel district mi ahi.

Ani lhon a natna chom chom anei lhon ahi. Gamsunga natna toh kisaiya mi 2 athi kit toh kilhon a Manipur a Covid 19 toh kisaiya thi agom a mi 10 lhing ahitai, tin Health Department spokesperson, Dr Sasheekumar Mangang in soi akaina COVID 19 Common Control Room thuso in aseiyin ahi.

Achesa nidan 24 sungin Manipur a Covid-19 positive case thah 249 mudohbe ahin, ama ho chu Central Armed Police Force (CAPF) 165 leh gamsung mi milham (general population) mi 84 ahi. Gamsung mi natna nei ahi kihedoh 84 lah a mi 21 hi state dang a kon hung kile ho ahiuvin chule adang 63 hi state dang a che hilou gamsung mi hiu ahi. Abon uva Covid Care Facility a achon uvin chule ‘containment’ leh ‘contact tracing’ ho apan tauvin ahi.

Hiche phat sung ma ma a Covid 19 positive hi a mi 21 adamdoh toh kilhon a akijen nau CCC ho a kon discharged abol tauvin ahi. CCC, Meitam a mi 10, RIMS a mi 6, Kakching a 4 chule Kamjong a mi 1 hi RT PCR test akibol jouva Covid 19 a kon adamdoh tah jeh uva ahin soldoh u ahitai.

Gamsunga natna nei agom a mi 3466 alhing tan, hiche lah a general population 2765 chule CAPF 701 pang ahi. Natna a kon damdoh mi 1926 ahi in, general population 1834 chule CAPF 93 pang ahi. Chule active case 1530 um lah a CAPF 701 leh general population 829 pang ahi.

Tuni chan geiya Covid 19 positive hi a mi 694 hi state dang a che hilou, gamsunga natna kilah son ahiuvin, gamsunga local transmission a kon natna kilah hi 20% hi ahi. Achesa ni phabep sunga ‘local transmission’ hi kal cheh cheh ahitan, natna a kon kivenna dinga inmun a kon che doh jousen mask akibol tei uva, angaicha louva achedoh loudiu chule physical distance ajui diuva temna sangtah aneibe uvin ahi.

Chule koi tobang hospital a damlou kivetsahna a boina ahilouleh hahsatna toh aum leh Helpline Number (Toll Free) 1800-103-2015 a phone abol diuvin, thuso chun aseibe in ahi.

NSCN-IM leh India sorkar in kihouna nei

Imphal, Aug 7(ET): NSCN-IM leh India sorkar in achesa August 3, 2015 kum a Framework Agreement soi akai nauva kinoptona aneiyu thu phabep jeh a kinelkal na thusoh ana kisei jouva alangni in lunggel kibah louna suhlhap ding ago jing in, New Delhi a tunin kihouna anei kit uvin ahi.

Thulhut phabep in, tuni a akihou uhi kum 23 lhing athu kisei Naga Peace Process sei lhah nading (final settlement) ahi, tin aseiyun, ahin, IT thulhut in asei dungjuiya, NSCN-IM lamkai hon tua Nagaland Governor hi a Peace Talk Interlocutor RN Ravi khel dinga Centre a lamkai ho henga ngehna aneiyu ahi, ati.

Thulhut chom khat in, NSCN-IM hohi New Delhi a khatvei achaina a kihouna neipi dinga center in akou ahi in, kum 23 lhing Naga thu khumkha na ding ahi, ati. Ahin, adang phabep in hiche hi RN Ravi leh NSCN-IM ho kah a lunggel kibah louna chule kinelkal na aumjeh ahi, ati.

NSCN-IM member ho tilouva meeting a Naga hon amaho gam a asei Manipur, Assam leh Arunachal Pradesh gam thalheng hojong pang dinga kisei ahi. Ahin, Manipur a kon kihouna a apang e, tia stakeholder ho het dinga official tah a notification umlou ahi.

India sorkar leh Naga ho akihou nauva aboinau pen khat hi Northeast a Naga ho achen nau mun jouse khat so dinga (integration) Naga hon thumna aneiyu hi ahi. NSCN-IM lamkai luboh khat in achesa Thursday nikho a, “Keiho team ho jing leh Peace Talk thu a Delhi che diu ahi in, thupha aso ding kinep ahi”, tia anasei ahi.

Kihouna a organization 7 panna Naga National Political Groups (NNPG) ho apang uvin, Centre toh kihouna khumkhana kinei ahitai, tin asei uvin ahi. Meeting hi NSCN-IM lamkai, kum 86 a upa general secretary Th Muivah lamkaina hidinga kisei ahi. Muivah hi achesa July nisim 20 nikho a kon Delhi a damlou jeh a kijen dinga um pan ahitai.

Manipur gam ke nadinga peace talk kinei ahi le mipi in doudal na kinei ding ahi: UCM

Imphal, Aug 7(ET): Tuni August nisim 7 akon a ana kipan NSCN-IM le NNPG toh Indian Government kihou na chung chang a United Committee Manipur in peace talk akon a Manipur gamsung kena ding ahi lou le kibung khenna ding ahung umle doudal na kinei a Indian government douna a mipi in panlah na kinei ding ahi tin hetsah na ahin nei uvin ahi.

Galguh bol phabep lung hol na a gamsung suh keh ding dinmun hi mipi koima anoplouding dan jong tahlang na ahin nei uvin ahi. Achesa phatsung a Indian govt in hiche kihou na ho akon gamsung ke louding dan hilchetna ana nei jing utoh lhon a hiche kitepna chu akijui jing na ding in hetsah na jong anei uvin ahi.

Interlocutor RN Ravi in Nagaland a thilchom asei  a Manipur a achom asei ji na chung a demna ahin nei utoh lhon in mipi kitomo na ding thu ima bol louding in jong temna ahin nei uvin ahi.

Kiloikhomna in asei na uva gamsung ahi gampam mi hung lut ho akon kivenna ding a agammi ho in panlah khomna anei phat ahi toh lhon a gampam mi akon kiven ding joh khohsah na akinei a agammi kikah a kibung khen na ding tohgon ho akon kilha ong na akinei na ding in jong hetsah na ahin nei uvin ahi.Gamsung mi ho kikah a kilung tona le kilungsetna aum lou teng Indian govt in kibung khen na ding tohgon ho hi ahin nei ji ahi toh lhon a gamsung a cheng mipi jouse in kilung toh tah a hitabang tohgon ho he them a kipunkhomna anei jing na ding uvin jong UCM in temna ahin nei uvin ahi.

COVID-19 duty bol doctor khat chol val jeh’a lhu

Imphal, Aug 7(ET): JNIMS COVID Care Center a kal khat seh a ‘rotation basis’ a duty bol senior resident consultant khat center mun a Covid 19 natna nei ho ajen le na a achol val jeh hidinga ginchat jeh a alhu in ahi.

Social media a kitahdoh video a PPE suit a kivon doctor khat lhu dehchet a, staff khat in wheelchair a atousah a akithopina kimu ahi. Thusoh mihon adoh uchun, JNIMS thulhut in, tuni hi CCC a doctor pa duty alhah achai ni ahi in, consultant thum hin kal khat khat duty abol uva, duty ajo teng ule nikho 7 ‘quarantine’ abol jiu ahi, ati.

Doctor pa hi Dr. Utthan, senior Resident consultant, JNIMS ahi. “Tuni hi kal khat duty abol na nikho kichai ni ahi in, nilhah nidan 3.30 don a ahungdoh na a lhu ahi in, tuhin aboi tapoi”, tin thulhut chun aseiyin ahi. Achesa nikho 7 sung duty khoutah a abol jeh a achol val jeh himai thei dinga aseibe uvin ahi.

Nikho 5 bep hinalai naosen khat thijeh a District Hospital a boina soh; thilsoh kholchil ding’a DC in committee khat semdoh

B.Lalboi Gangte

CCpur, August 7 (ET): Dorcas Veng, New Lamka aum naosen 5 days bou hinalai khat District Hospital a admit ding anaphal lou jeh uvin naosen chun anatna atoh joulou jeh in janni (Aug. 6) nilhah nidan 8:30 vel chun achenna inn mun’a ana thin in ahi. Hiche jeh chun naosen thu’a apa Lamlompiak in jih tho in Medical Superintendent, District Hospital, Churachandpur heng’a Casualty ah duty Doctor leh Nurse ho Complaint abolna lekha ape in chuleh a copy jong Principal Secretary, (Health & Family Welfare) Government of Manipur, DC, Churachandpur, CMO, Churachandpur,  Chairman, Village Authority leh President/ Secretary, YPA Dorcas Veng Unit ho jong anape in ahi. Hetthei khat hiche naosen nikho 5 bou hinalai hi Baby Genthian S/o Lamlompiak leh Ngainunfel ding’a achapa masapen ahi. Naosen hi August nisim 2 nikho’a peng ahi.

Hiche toh lhon’a hiche complaint abolna lekha achun Lamlompiak in nikho 5 bou lhing nalai kachapa tahsa  damlou jeh’a casualty kapohlut vang in duty Doctor in nahsah lou in lou (medicine) ding ei-jih peh uvin ahi. Chule duty aum nurse hon jong Covid-19 jeh in ginmo jeh in kholjin na nei leh neilou toh kisai’a dohna ei-nei uvin chule insung hahsa akihi jeh chun Duty aum nurse leh doctor ho thu mang in inlam joh’a kaki-vekol uvin ahi ati. Aman aseibe na’a naosen penglha til damlou’a um Hospital ah admit bolsah louva inn lam’a kivekol ding’a sol duty Doctor leh Nurse ho kholdoh ding in ngehna jong anei in ahi.

Alangkhat’a YPA Dorcas Veng Unit leh Village Authority thil umdan chung’a alungkim lounao aphongdoh uvin chuleh tuni sun in vengsung mipin Medical Superintendent, District Hospital, Churachandpur heng’a athu lhut ding in anache khom uvin ahi. Hiche thilsoh hi vengsung miho bou hita louvin mipi alaina tamtah in YPA Hall, Dorcas Veng akon in District Hospital amano uvin ahi. Hiche achun District Hospital a Medical Superintendent heng’a lekha peh ding ago uvin ahin Police in Hospital campus sung alutsah lou phat uvin Hospital lam’a kon thunei ho toh kihouna anei uvin chuleh vengsung lamkai hon jong lekha anape uvin ahi. Hiche phatsung’a chun Deputy Commissioner, Churachandpur thalheng in S. Ginmuan Ngaihte, MCS, SDO Churachandpur  khut’a DC ading lekha jong anape uvin ahi.

Hiche toh lhon’a Baby Genthian hi Hospital ah admit leh attend ahilou natoh kisai’a Pawan Yadav, IAS, Deputy Commissioner, Churachandpur in hiche thilsoh chung thu kholchil na nei ding in S. Ginmuan Ngaihte, SDO Churachandpur lamkai na Committee khat asemdoh in hiche achu Chairman ding Ginmuan Ngaihte, SDO Churachandpur leh member ding in Dr. VC Pau Tonsing, Chief Medical Officer  member secretary leh Bijoy Kumar, MPS, SDPO Churachandpur analhengdoh in ahi.

Loubol hochan ding dol phate in peuvin: NILSAL

Imphal Aug 7(ET): Central govt in loubol ho ading a programme jat chom chom ahin gon u PMKS  le  SMAM scheme ho Mnaipur a phate in pe uvintin Nongpok Imphal Loumi Sinmi Apulba Lup in hetsah na ahin nei uvina hi.

Kiloikhomna President H. Ibohanbi in thuso miho toh akihou limna a loubol ho in SMAM scheme apply abol na uva a chan ding a lo mho 90% ana kichang ji chu tu kum in 40% bou chan ding in ahin gong uvin, hitabang tohgon akon hin loubol ho in genthei na ijat ham khat atoh taovin ahi tin lamkai pa chun ana sei in ahi. Hitabang tohgon chung a lunglhai lou na jal a loubol ho in govt chung a kiphinna nei ding a kigotna anei dan u jong tahlang na ahin nei uvin ahi.

Hiche scheme phate a hopdoh na akinei lou le Manipur sung a loubol jous ein kihou toh na nei a kiphinna ahin nei khom ding dan u thu jong president ap chun tahlang na ana nei in ahi. Hiche scheme chung chang a prime Minister pa ang a jong lekha thot kinei ding dan jong tahlang na ana kinei in ahi. Loubol ho chan ding a lom thil ho achesa phat ho a Chief Minister N. Biren in jong alhing sel a pehding a kitepna ana nei jing dan tahlang na jong ahin nei in ahi.

India gam a Covid-19 positive lakh 20 val ta; nikhat sunga case athah 62,538 kimu be

New Delhi, August 7: India gam a Friday nikhon Covid 19 positive case lakh 20 aval tan, achesa nidan 24 sunga case athah agom a 62,538 akimube in, hiche hi tuni chan geiya India gam a Covid 19 case nikhat a kimu atam na pen ahitai, tin Union Health Ministry data in Friday jingkah nidan 8 a aseiyin ahi.

India gam a Covid 19 positive case hi amasapen a January 30 nikho a Kerala gam a kimudoh masapen ahi in, case masapen akimu ni 170 jouva case lakh 10 lhing a chule ni 21 jouva lakh 20 lhing pai ahi. Natna akilahson to dan hi gam khangtou phabep a a-oljep tah vanga eiho gam a tang louva chal jing nalai ahi.

Vannoiya pumpi a Covid 19 positive case tamna pen gam holah a United States sangpen a case 4.96 million um a chule Brazil gam a 2.98 million case lhing ahi. Achesa nidan 24 sunga India a case athah 62,538 akimu doh toh kilhon a, gamsunga natna nei agom a 2,027,054 lhing a chule natna jeh a athi 886 akisei be kit toh kilhon a, natna a thi 41,585 lhing ahitai.

Alangkhat a, Covid 19 natna neiya mi 49,769 natna a kon adamdoh in, adam doh jat agom a 1,378,105 lhing ahitai. India gam a active case hi tua 607,384 ahi, tia Union Health Ministry in tuni a update abol ahi. Achesa Thursday nikho chan a India gam a Covid 19 test kibol sample agom a 2.27 crore lhing ahitan, August nisim 6 ni a India gam chom chom a sample lakh 6 test kibol ahi, tin Union Health Ministry thulhut in aseibe in ahi.

 

Containment zone in Sky Hospital homlou

Imphal, Aug 7(ET): Imphal West district administration in khamgahna noi a umdia aphondoh lah a ama ho hospital umna tomlah ahomtha poi tin SKY Hospital & Research Centre Pvt. Ltd. tunichun hilchenna thuso abol in ahi.

Man gang tah a lungchang natna nei hon ajot uva akijen thei nadiu va Sky Hospital hi kihong jing ding chujongle Imphal West district administration khamgahna in jong ahom lou ahi tin Irom Loyangamba, Media & Publicity Officer, SKY Hospital & Research Centre thuso chun aseiye.

KNF(Z) in suhthengna nei

Imphal, Aug 7(ET): Janni N.H.P.C Loktak area a KNF(Z) cadre kiman kiti teni lah a Paokam (53) S/o (L) Ngamkhohen of N. Kungpi Leimata hi Kiloikhomna dankalla chon valna anei jing jeh’a Organisation in suspend a kikoi ahin hiche sung in Non-SoO group hotoh kitho a sumleh pai aboipi jing hijeh’a achesa 31/05/2020 nikho a organisation in terminate ana kobol ahitai tin Devil Kuki, Home Secretary, KNF(Z) akon thuso kimun asei in ahi. Chule akimattha pi Nohkhogin Baite (33) S/o Janglam Baite of Bongmol Leimata kiti hi organisation in koi ahi akihe khapon amani hi KNF (Z) toh akimatna imacha aumpoi tin suhthengna jong aneiyin ahi.

 

Ccpur District a JE natna jeh’a mikhat thi

B.Lalboi Gangte

CCpur, August 7 (ET): Churachandpur District a tukum sung ding’a ST. Chullouphai kho akon Japanese Encephalitis natna jeh in pasal chapang kum 5 khat in thina anatoh in ahi. Hetthei khat chu amahi achesa Aug. nisim 3 nikho’a Samaritan Nursing Home, Bijang mun’a admit ana kibol’a chu jouva insung miho nopna jal’a Aug. nisim 4 nikho’a RIMS Hospital, Imphal mun’a admit kibol ahi. Chuleh ajing (Aug. 5) nikhon RIMS ah CSF leh Serum test anabol uvin result dungjui’a JE vei ahidan anahedoh uvin ahi. Ahin JE natna ahi ahetdoh vang uvin jen man lou in Aug. nisim 6 nikhon ana thi in ahi.

Alangkhat’a JE natna jeh’a thina toh chapang kum 5 leh a-insung mite chenna hi thoukang tam namun ahi naban’a thoukang akon hung kipandoh natna toh kisai’a JE tilouvin  Dengue case ana kimudoh masapen chu achesa July nisim 21 nikho’a pasal khat akon ahi. Dengue case masapen mudoh ahi na chung chon’a sahit akon hung kipan natna Scrub Typhus vei tukum sung’a ding’a case 2 akimudoh tan ahi