Manipur a Covid-19 toh kisai natna jeh’a mi 2 thibe, thina toh...

Manipur a Covid-19 toh kisai natna jeh’a mi 2 thibe, thina toh 57 lhingta; Travel history neilou mi 163 covid-19 positive kimudoh

85
0
SHARE

Manipur a Covid-19 toh kisai natna jeh’a mi 2 thibe, thina toh 57 lhingta; Travel history neilou mi 163 covid-19 positive kimudoh

Imphal, Sept 20(ET): Achesa nidan 24 sung chun Imphal East akon a pasal kum 67 khat leh kum 53 khat in JNIMS munah COVID-19 jeh in thina ana tuoh lhon in hitoh kilhon chun Manipur a COVID19 jeh a thina toh agomin 57 alhingtan ahi.

Nidan 24 sung mama chun milham lah a konin positive cases thah 168 Central Armed Police Force (CAPF) akon mi 2 mudoh ana hikit in ahi. Milham 163 kimudoh thah ho hi travel history neilou ahiuvin ahi.

Positive cases thah kimube ho hi Imphal West district a kon 98, Imphal East akon mi 21, Thoubal akon mi 10, Bishnupur akon a mi 8, Kangpokpi a kon mi 6,  Churachandpur a 5, Senapati a 3 chuleh 1 Noney leh Kamjong akon 1 gel ahi. Amaho cheng hi Covid Care facilities a vetkol ahi ngal un ahi.

Alangkhat ah, CCC mun chom chom a kon in mi 44 tah discharged ana kibol in ahi.

Discharged kibol na ho ahi leh CCC Thoubal a 24, CCC Lamboikhongnagkhong a mi 8, CCC Tamenglong a mi 6, JNIMS a mi 3, RIMS a mi 2 chuleh Senapati a mi 2. Amaho cheng hi RT PCR test kibol toh kilhon a damsel a lhadoh ana hiuvin ahi.

Tuni chan a positive cases kimudoh agomin 8894 (milham — 6965 leh Central Security Personnel -1929) aphatan ahi. Adamdoh jat hi agomin  6767 (milham – 5156 leh Central Security Personnel -1611) alhing tan ahi. Tu le tua active cases hi agomin 2070 (Milham – 1755 leh Central Security Personnel – 315) aphatan ahi. Recovery rate hi 76.08 % ahi.x

Xxxxxxxxxxx

State government in AIMS volunteer kiman ho alhadoh diuva DESAM in ngehna nei; AIMS atosot thu phong

Imphal,  Sept. 20(UNA): Democratic Students’ Alliance of Manipur (DESAM) kiloikhom hon Sunday heng’ah state government in akinthei pen a Apunba Ireipakki Maheiroi Sinpanglup (AIMS) volunteer phabep education department noiya engineers ho nehguh thu a kiphinna nei a kiman ho alhadoh diuvin ngehna anei un, ihamtia lhadoh ahilou leh AIMS in kiphinna boldinga tohgon anei hi hattah a kitosot ding ahi atiuvin ahi.

Secretary Publicity & Propaganda DESAM HQ Sh. Rishikumar akon a thusodoh in aseina ah, education department engineer wing kot kikha toh kilhon a kiman AIMS volunteer ho state government in akinthei lam pen a alhadoh lou leh DESAM injong kiphinna a pan kilakhom ding ahi. Education department kot kikhah hi dan toh kitoh a kiphinna kibom ahi in hinla state government in kithuneisah tah a athu a seitoh leh kihoukhomna umlou a nehguh bol ho man masa louva nehguh chaguh man dinga kigong AIMS volunteer ho joh amat jeng uhin aki thuneisah nau atahlange ati.

Thusodoh in aseibe na ah, AIMS volunteer ho in office kot bou akha u ahi in, kiloikhomna in office thil le lo suhset anei pon, chuleh dei umloutah thilsoh jong aumpon ahi. Hiche thil neocha khat jeh a AIMS volunteer ho kimat jeng hi aval behseh in ahi tinjong asei in ahi.

Achaina a aseina ah, state government in akinthei pen a mat a um volunteer ho alhadoh uva, akinthei pen a nehguh chaguh a kigol kha jouse matdoh a gotna peh a um dingu, chuleh mat a um volunteer ho lhadoh ahilou leh DESAM in AIMS hoitah a kitosot a kiphinna khaotah a kibol ding ahi tinjong gihna a neiyin ahi.

Xxxxxxxxxxxxx

Private school, College Teacher Association kisemdoh

Imphal,  Sept. 20(ET): Manipur Private School/College Teachers’ Association (MPSCTA) kiti kiloikhomna thah chu jilkung ho thahatbe sah ding leh Manipur sung kikhelna umsah ding tup le doi a neipum in Sunday ni nidan 1:00 chun Khunthokhanbi Sanglen, D.M. College gate mun ah phudoh in ana um in ahi.

State Coordinator, Biju Leishangthem min a thusodoh in asena ah, kiloikhomna hi private school a jilkung ho lungtup leh duthusam tamtah suhmil a ana umho leh  athunei nao athahbeh a suhhat ahina dinga hung kiphutdoh ahi ati.

Kiloikhomna kiphudoh toh kilhon in kithulhuhna phabep jong ana semdoh un ahi. Hiche kithulhuhna ho ahileh achesa 17/09/2020 nikho a kiseisa banga interim committee ho ijakai a private jilkung ho tohgon leh kimanchah ding dan ahin semdiu, chuleh Manipir sunga private school jilkung jouse jong kiloikhomna a hung jaocheh ding, hiche nadinga State Coordinator hiche number 8787692375/9615821438 a akijahmat pi thei diuvin jong kithuhlhuh na anei un ahi.

Chuleh ahunglhung ding October, 5 2020 nikho leh Shanglen, D.M College gate mun a SOP phatah a jui pum a private school teachers jouse toukhomna umkit ding, hiche nikho leh executive committee kilhenna jong um ding, chuleh bit tah a school ho kithah honthei nading lampi jong seikhomna umding ahi tinjong thusodoh chun aphongdoh in ahi.

Xxxxxxxxx

IMC hopsung’a November 2019 apat September 2020 kah sunga thina toh mihem 1110 lhing

Imphal, Sept 20(ET): Imphal Municipal Corporation huopsung a population agoma 2011 census report dungjuiya 8,29,340 (Eight lakhs twenty-nine thousand three hundred and forty) um jat lah a November 2019 apat September 15, 2020 kikah a mihem thina toh agomin 1,110 (One Thousand one Hundred and Ten) apha in ahi. Hiche Imphal Municipal Council hi adihtah leh tahsan thei ahi leh Imphal khopi hi khopi damthei tah leh thina umlhom napen hiding ahi.

Imphal Municipal Corporation a Sub Registrar office record dungjuiya achesa November 2019 sunga thina toh mihem 147 (Pasal 120 leh numei 27), December 2019 a 163 (Pasal 127 leh numei 36), January 2020, a thi jat 144 (Pasal 107 leh Numei 37) , February 2020 a thi jat 130 (Pasal 92 leh Numei 38), March 2020 a thi jat 74 (Pasal 46 leh Numei 28), April 2020 a thi jat 22 (Pasal 19 leh Numei 3), May 2020 a thi jat 65 (Pasal 45 leh Numei -20), June 2020 a thi jat 137 (Pasal 88 leh Numei 49 ), July 2020 a thijat 125 (Pasal 81 leh Numei 44), August 2020 a thi jat 41 (Numei 11 leh Pasal 30) chuleh September 15 sunga thina toh 62 (Numei 13 leh Pasal 49) ahi.

IMC a record kimu dungjuiya COVID-19 natna hunglhun masanga sangin ahunglhun jouva thina toh alhomjo in ahi. Leiset pumpi a Covid-19 natna ahung umtoh kilhon a thina toh Covid-19 um masanga sanga atamjoh jing vang in, Greater Imphal municipal area a Covid-19 um masanga sanga thina toh alhom akon a mudoh thei chu kichat behseh lou ding, Covid-19 natna ahung lan vangin phatah in doudalna naho alolhinge ti muthei in aum in ahi.

Hitoh kilhon a IMC authority hon hiche thina tohjat data kijihlut ji ho hi ahina bangtah a record abol lou uleh hiche mong mong bol dinga lhalo kipe a ngansena kipe ho chunga gotna kipe ding ahi. Office a thina toh kisai jihlut dinga hung jouse ahithei chan a jihlut hiding ahi. Hiche data lahkhom ding hi amaho mopohna ahi. IMC sunga hin ward 27 aum in, ward khat a counselor khat cheh leh ward member 4 cheh kikoi ho hin aphatseh a IMC akijahmatpi jing uva ama ama umna huop sunga thina kiti poupou record abol ding uhi amaho natoh ding khat chu ahi.

Xxxxxxxx

Covid-19 case thah 92,605 leh athi 1,133 puma India a case lakh 54 phata

New Delhi, Sept 20: India sunga nikhat a natna nei kimandoh sanga adamdoh jat atamjoh tah toh kilhon in Sunday nikho chun nidan 24 sunga natna a kon in mihem 94,612 in damdohna ana nei toh kilhon in national recovery rate 79.68 percent ana lhing tan alangkhat ah, positive case thah 92,605 aki mube kit toh kilhon in Covid-19 cases agomin 54,00,619 alhingtai tin Union Health Ministry data chun atahlang in ahi.

Nidan 24 sunga Covid-19 jeh a thina toh 1,133 alhin toh kilhon in tuchan a thina toh agomin 86,752 alhing tan ahi. Chule Covid-19 akon a damdoh jat agomin 43,03,043 alhing tan ahi.

India in achesa August lha a kon chun positive cases 50,000 chunglam ana mube jing in ahi. Chuleh September 6 nikho chun nikhat sung in 90,632 ana mudoh in nikhat sunga kimudoh tamloi khat ana hitan ahi. India hi leiset pumpi a dinga Covid-19 in atohkhah nasa deh ho lah a anina ahi naban a tule tua akhatna a pang US sanga ahung tamjoh nading nailam cha ahitan ahi.

India in August 7 nikho chun lha 7 alhin nikho chan chun natna 2 million case ana lhit jouvin ahi. Case masa pen hi achesa January 30 nikho a Kerela mun a matdoh ana hi in ahi. Chuleh 3 million case lhit nading in nikho 42 bou ana lit kit in ahi. India in September 16 nikho chun 5 million ana lhungtou kit taget in ahi.

India data a kimu dungjui in Saturday leh Sunday nikho sehseh chun positive case thah 92,605 leh thina toh 1,333 ana lhing in ahi. Chuleh mihem 94,612 ana damdoh ho discharged ana kibol in ahi. Recovery rate 79.67% aphatan ahi.

Global recovery ah India 19% ahi jou tan ahi. Health Ministry in aseina ah 90% adamdoh kimu ho hi state 16 states Union territories a kon ahi in chuleh 60% tobang hi Maharashtra, Tamil Nadu, Andhra Pradesh, Karnataka leh Uttar Pradesh akon ahi.

Health Ministry in aseibe na ah Saturday nikho sung sehseh in India pumpi a 1.2 million test ana kiboldoh in ahi, hiche hi nikhat sunga test kibol tam loi ahitan chuleh agoma test kiboldoh hi 63.7 million aphatai ati. India in Covid-19 test masapen chu achesa January 23 a Pune’s National Institute of Virology ah ana kibol ahi.

Rajya Sabha in Saturday nikho chun Epidemic Diseases (Amendment) Bill, 2020, passed ana bol un ahi. Hiche hin health worker ho chunga khansetna leh engbolna atuo jingu doudalna dinga ki passed ahi in koi tobang doctor leh health worker ho chunga sose leh khutlha aum leh kum 7 songkul tang diu ahi.

Johns Hopkins University’s coronavirus tracker a kimu dungjui in tule tua leiset pupi a natna nei 30,683,828 aphatan chuleh thina toh agomin  955,841 aphatan ahi.

Xxxxx

Lok Sabha Session Coronavirus vei apun to lhon a Wednesday nileh khumkha hitading

New Delhi, Sept 20: Tulaitah a chelha jing Lok Sabha  Monsoon session chu government in opposition holeh Business Advisory Committee ho toh tuni lhah a meeting anei nauvah Coronavirus natna apunbe tolhon a suh hai ding in aphatsah tauve.

Hiche hi MP ho gelkhoh na jeh a kibol ahi tin centre chun asei e. Hetthei khat chu MP 3 in Coronavirus natna anei session kipat til a chu hetdoh a ana um ahi.

Government in hiche thu a hin opposition hotoh jong kihou na akinei e tin asei e. Opposition party phabep hohin session hi ngah dinga ana phut u ahi. Session hi Wednesday nileh hapta kit adin chontou ahitai. Rajya sabha injong ajui dingin thulhut chun asei e. Parliament session kipat masang a  Coronavirus natna nei hetdoh a um chu BJP a kon mi 12 aum in asangpen ahitai.

Adang hochu ahileh YSR Congress MP 2, Shiv Sena, DMK leh RLP ho khatcheh ahiuve. Hapta masa a chu Union Minister Nitin Gadkari leh Prahlad Patel session kipat masang a negative teni chu positive ahilhon mudoh a umkit ahi

Friday nin jong Rajya Sabha member Vinay Sahasrabuddhe chu Coronavirus positive ahi mudoh ahi e. Amahin House a jong thusei na ana nei ahitai. Vinay chun aseina ah test a negative Kahi jeh a Parliament a che kahi in ahin nilhah langin luchang nat le mild fever kanei in test kithah bolna ah positive kahi e tin ana seiye.

Hiche jouvin Parliament in dan khoutah in asem in hinla government in risk lahding aki nompoi tin Parliament a Authority hon aseiyin ahi. Tuchan a hi Parliament in bill 3 bou passed abol nahlai ahi in government in bill 11 passed teiding tohgon anei ahi. House teni hin social distancing jui ding aki dei in shift jong achom chom a sem ahi e tin guideline kisem chun aseiye.

Chuleh staff ho jouse hi rapid antigen test niseh a kinei jing ahi, ati. MP ho jong hin RT-PCR test hi aphatseh a voluntary basis a kinei jing ahi in Staff hohin dan dungjuiya nidan 72 sehleh test kinei jing ahi tin thuso chun aseiye.

Xxxxxxxx

COVID-19 pandemic sunga Footballer Ramanda chu Team Shija in Kidney Transplant bolpeh diu

Imphal, Sept 20(ET): Manipur a Footballer Ningthoujam Ramanda jenna ding in nungah kum 17 khat in a kidney atodoh ding ahitai. Mipin ama damthei nading adeisah un chuleh Chief Minister pa leh central government panna in Ramanda damna dingin ajo chan a panlah ding agong uvin ahi.

COVID 19 kipat a pat  kidney transplant hi India sunga bol lou a um chu Shija in jong anabol tahlou ahi. Hinla Hospital Authority hon Ramanda damna ding gelkhoh najal in surgery hi bol peh ding in ana phatsah un ahi.

Team Shija in a inkote jaonan blood group kibah pi anahol un Ramanda hi phatah a vetkol ahijing e tin authority hon asei un ahi. SHRI thuso doh in aseina ah thisan donor ding kihol na ah Ramanda pa jong hi ajao e, ati.

Ramanda hi a kidney Fail, Chronic Kidney Disease (CKD) dammo nanei dia ginmo ahi e tin SHIJA thuso chun aseiye. Ama hi Hypertensive Retinopathy nei le amit teni khumu na tha asulhom lheh e tin jong aseiye.

Tuhin amahi Shija Hospital a kijen jing le Haemodialysis hi hapta khat sung ah veithum kibol jing ahi. A blood pressure jong control jou ahi tan tuhin akho muna jong ahat deu tan ahi.

Chule Retina Specialist leh Kidney Transplant Team ho vetkol na noija kijen ahi.  Angong jet lang a hin Dialysis Vascular Access   , Internal Jugular Vein Catherer jong abol un ahi. Artery Venous Fistula (AVF) jong a kidney failure jeh hidinga tahsan ahi.

Xxxxxxxx

2020 Anaemia Free Manipur Poster Campaign kipan

Imphal, Sept 20(ET):  Anaemia (deficiency of Iron) thu a hetna akibe theina ding ngaito na in “Anaemia Free Manipur Poster Campaign 2020 chu Nongthombam Ongbi Hiyainu Devi Chef Minister N. Biren Singh jinu chun ana phongdoh tai.

Hiche hi Chief Minister Secretariat mun a Bharat Vikas Parishad noiya kigong ahi. Hiche poster campaign hi smt. Heikrujam Joybee Devi, Bharat Vikas Parishad a member in ana lamkai ahi.

Director (IPR) Shri Heishnam Balkrisna Singh chun aseina ah mipi lah adeh a numei holah a Iron lhahsam Anaemia thuhi lhangsap angai e tin aseiye.

Aman aseina ah hiche poster campaign a kon a hi mipin anaemia ahilou le Iron deficiency a kon a kiven ding dan ahet diu akinepna thujong ana sei e. Anaemia Free Manipur a Brand Ambassador a pang Nongthombam Ongbi Hiyainu Devi chung ah jong akipana thuphon ana neiyin ahi.

Devi in ahoulimna ah Numei khang dong chanei laiho lah ah anaemia hi atam lheh e tin aseiye. India sung a anaemia nei hi 20 percent sang a tamjo ahi, ati.

Hiche campaign ah chun Dr. Sinam Rajendra Singh National vice-president of Bharat Vikas Parishad,   Sinam Pritam Singh Eastern Motors a CEO, jong apang un ahi. Hiche campaign hi Eastern Motors, Manipur injong atosot ahi.

Xxxxxx

North East pumpi a Tripura a COVID 19 nat a thina toh asang pen e tia government in sei

Agartala, Sept 20: Union Ministry of Health and Family Welfare a kon a thulhut kimu dungjui in  Northeast a state neopen Tripura hi COVID 19 a thina toh atam pen e, ati.

Hiche data dungjui in Sikkim a 1.3%, Meghalaya a 0.79%, Manipur a 0.63, Assam a 0.35%, Nagaland a 0.28% le Arunachal Pradesh a 0.18% vel hi COVID 19 a thina toh ahi in hinla Mizoram a vang COVID 19 a thina toh aumpon ahi, ati.

Tripura hin case 21,507 aneilah ah 239 in thina atoh in, Positive rate 6.09% ahi in, India pumpi positive rate hi 8.01% ahi.

Hiche district 8 holah ah hin case thah hihen athi hijong leh atam pen in ahi. Agartala West district ah  hin 70% tobang hi aum jouvin, August 9 leh 26 kikah ah kichenna, religious festival, chuleh political rallies 3000 val ana um in ahi, West District administration in aseina ah hiche hojeh a hi case hi pung dan in aseikit un ahi. Mipin jong social distancing dan kisem ajui pouve tinjong aseikit e. Dr. Shailesh Kumar Yadav, District Magistrate in Agartala Municipal Corporation case 70% val umna mun ah test centre phabep semdoh ahitai tin jong asei e. Hiche test centre a hin niseh le 400- 700 val test a kibol in, hiche lah a hin 20-30% tobang hohi positive ahiuve tin Official thulhut kimu chun aseiye.

Maban a athi apunbe louna dingin test hi phatah a chelhah sah ahi tinjong aseiye. Chuleh COVID 19 symptoms nei phatah a jen hilou hojeh a hi athi hi pung ahi tin Yadav chun aseibei.

Chief Minister Biplab Kumar chun adamlou ho Agartala a koi son lou a district hospital jouse a ajen diuvin jong thupeh anei ban in IAS Officer 10 panna Special Corona team jong semdoh ahi.

Central akon in mi 3 sol ahiuve, amaho hin social distancing dan, mask ahi in hospital a admit vaigei jeh a thina toh atam jeh a avettup diuvin jong hilchah ahi. Amaho hin athil muhou hi Government kom a apehlut jiu ahi. Hiche dan a chun mask kitom louho fine Rs. 200 chuleh avel a sukhel ho 400 leusah hiding ahi. Government in Saturday ni a kichai ni 2 lut a Mask Enforcement Drive kiti chu ana bol un ahi. March 24 leh September 14 kikah a lockdown dan juilou mi 10,569 val mat ana hi e. Hiche akiman hoa kon in police hon crore 2.57 anamu un ahi.

Agartala a COVID 19 jenna kimang umsun Govind Ballabh pant (GBP) chu damlou ho avettup loujeh un boina atoh uve. Hijeh chun Tripura High Court in September 11 chun hiche hospital sung para medical staff chuleh adang danga mopo ho list apehlut diuvin thupeh aneijin ahi. Court injong special enquiry cell ho vetsui na noi a GBP hospital hi akoidoh ahi.

Xxxxxx

Farm Bill ki passed jouva opposition party 12 hon RS deputy chairman no-confidence notice pe u                                                    New Delhi, Sept 20: Rajya Sabha a Farm bill 2 aki passed jouvin opposition party 12 hon Sunday nichun no-confidence notice Rajya Sabha Deputy Chairman Harivansh ana pe un ahi.

Hiche hi Harivansh in bill thu a athil ngeh u apompeh lou jeh u ahi. The Farmers and Produce Trade and Commerce (Promotion and Facilitation) Bill chuleh 2020 and Farmers (Empowerment and Protection) Agreement on Price Assurance and Farm Services Bill teni chu opposition party ho a kon a dei sahlou na aum vangin Sunday nichun ana passed tauvin ahi.

Hiche a party notice anape ho chu ahileh Congress, Trinamool Congress, Samajwadi Party, Telangana Rashtra Samithi, CPI, Rashtriya Janata Dal, National Conference, DMK chuleh Aam Aadami Party ho ahiuve. Hetthei khat chu opposition party 12 hon voice a adeilou nau asei jou uva hiche Bill teni hi ki passed ahi.

Xxxxxxxxxxx

Eastern Ladakh sector a mun poimo 6 India Army in nunglah ta

New Delhi, Sept 20: India Army chun Line of Actual Control (LAC) mun a China toh akibui jingna mun 6 hochu achesa hapta 3 sung chun anung lah tan ahi. Hiche mun 6 hohi August 29 leh September ni 14 sunga Chinese Army hohin ana toupha u ahi.

Government source khat a kon a kimu dungjuiyin hiche mun hochu ahileh Magar Hill, Gurung Hill, Recehen La, Rezang La leh Mokhpari ahi. Hiche munho hi a ong a um u ahipet a Indian Army chun Chinese Army in alah masanga alah danin aseiye. Hiche hi galmite sanga hatjoh nakhat ahi tin thuso chun aseiye.

Thuso chun aseina ah Chinese Army ho panmun lang hi Black Top hill features nei ahi in India lang hi LAC in ahuop ahi tin ANI chun asei e. Indian Army in hiche munho anunglah jouhin Chinese Army 3000 val Rezang La leh Rechen Ka heights lah ah ahunglut uve tinjong aseiye. People’s Liberation Army hojong aum uvin ahi. June lha a Galwan muna thusoh jouva India in gal manchah manglou a Chinese Army hohi ana ki dinte piu ahi. Pagong Lake leh Eastern Ladakh mun a alang to a sepai ho um ahi tin thusoh chun aseiye.

Xxxxxxxxxx

Sapam Susmita Devi

Imphal, Sep 20: Tulha September 10 apat 20 chan sung a Miss kitetna a Wabagai Lamkhai bazar a cheng Sapam kesho singh le Sapam sangita devi chanu Sapam Susmita Devi in IAWA Miss India 2020 gonna noiya IAWA Miss India 2020 1st runner up, chule Miss Iconi Title ana kisantan ahi. Ama hi tule tua Air Asia a Cabin crew a natong ahi.

Xxxxxxxxxx

GoI-NSCN (IM) in thilngeh ho achaina dia velvetna nei

Kohima, September 19: Atumbeh a flag leh constitution jaosah tei dinga phutna aum toh  lhon a Union Government leh National Socialist Council of Nagalim (NSCN) kikah a kihouna achaina sem ding in amano jing tan ahi.

Alangkhat ah NSCN (Isak-Muivah) in aphut Flag leh constitution jaosah tei ding thu ah lunggel kibahlouna aum jing in ahi. Thulhut kimu in aseina ah kihoucham nadia alangtuo a palai ho niseh tobang in page 30 val a kisun seikhomna aum jinge ati.

Naga group hon Arunachal Pradesh, Assam leh Manipur a um Naga ho dinga Naga Regional Territorial Council (NRTC) apom vang uvin, NSCN-IM in atumbeh a Flag leh constitution ngehna ahinbol hin thuchaina kisem ding a nongkai sah ding in aum in ahi. NSCN-IM in flag leh constitution jaolou a kihou chaina kisemthei lou ding tin apang chahkheh kit un ahi.

Thulhut kimu dungjui chun NSCN-IM in Centre langa flag leh constitution thu nasatah a aphut ahi in, Nagaland gamsunga civil society phabep in Naga group ho hengah kihoucham na achaina sem loi ding in anokhu cheng kit un ahi. Hiche Naga group dinmun leh achaina semloi ding hi NSCN-IM anom kit pon ahi.

Central Government in intelligence bureau a kon top brass ho amanchah a seitoh tei ding ti ahitoh kilhon in  NSCN (IM) langa kon in Chief Negotiator, Thuingaleng Muivah. Chairman, Q. Tuccu leh Vice Chairman, Tongmeth Wangnao, chuleh atohkhompi phabep toh New Delhi ana jon un ahi.

Thulhut in aseina ah thilngeh kibol leh bol dinga kilom phabep seilhah leh suhtup ahitan, final agreement sign akibol bol leh hiche hi manchah thei ahina dia joint monitoring team kikoi ding ahi ati.

Chuleh centre in proposed abolpeh chu India Constitution Article 371A phabep hatsah leh suhmanga Nagaland Assembly bicameral, Tatar Hoho ajong kihe chu upgrade bol ding, Lower House ahilou leh Leacy Hoho ajong kihe chun 80 members anei ding chuleh Upper Hoho(Federal Hoho) in 46 members anei ding chule kum 6 term hiding. Lok Sabha MP jong 4 hiding, Rajya Sabha seat jong 1 a kon a 3 seat aneiding ti ahi.

NRTC dinga legislature, Legislative leh judicial power atumbeh a anei ding,

Governor in imalam jouse a council advice alah ding. Council in budgetary provisions atumbeh a anei ding, Article 371A NRTC area  aextended kibol ding. Chuleh Naga chenna mun ho a dinga khantou machalna lampang a dinga economic package jong um ding ahi.

Naga peace process achaina lang ahitoh kilhon in political party leh NGOs jong touthim mokei in aum gam tauvin ahi. Opposition Naga People’s Front (NPF), hochu Political Affairs Mission (PAM) min in Naga groups leh civil society organizations phabep toh former Chief Minister leh Leader of Opposition, TR Zeliang lamkaina in meeting ana neiyun ahi.

Chuleh Naga Mothers’ Association (NMA) ho lamkaina in , Nagaland, Manipur, Arunachal Pradesh  Assam akon Naga nute kiloikhom phabep New Delhi ah Central leaders ho kimupi din ana vaikon doh un ahi.

Xxxxxxxxxxx

Moreh sunga POCSO Act, 2012 kimang theilou ham: YFHR

Imphal, Sept 20(ET): Numei kumlhing lou kisuhset na thu a Youth Forum for Protection of Human Rights (YFHR) chun mona neiho Police in amatlou thu a demna sangtah ape un ahi.

YFHR statement in aseina ah Moreh Police in chapang nu suse pahi POCSO Act 2012 noiya booked kibol sa ahi in iti dana kimanlou ham tin aseiun hiche hi phatah a kholchil ahi nadin ngehna jong anei un ahi.

Ana kihoucham nauva hi Dk. Lakh 3.5 a kichai ahiuvin Director General of Police Tengnoupal SP kom a alang ni a amat diuvin jong temna anei un ahi.

Hetthei khat chu chapang numei nuhi dantoh kitoh louva adopted ahi e. Khonung le CWC Tengnoupal in chapang nuhi avetkol ding ahi.

Customary Law dungjui a lac 3.5 a ana kihoucham jeh uva Police in amatdoh lou ahi tin asei un ahi. Hiche a Rape bolpa hi Hausa pa  insung mi ahijeh a hi kiman lou hidin jong asei uve. YFHR chun aseikit na ah POCSO Act 2012 hi Moreh Town a dinga kimang theilou ham tin dohna ana nei ban un POCSO Act noiya Child Rapist hohi sum leh pai a kichai thei ham tinjong dohna ana nei un ahi.

YFHR chun Chief Justice Manipur kom a petition pehlut a hitobang a khanse ho matdoh ahi tei nading a panlah thei chan a lah jing ding ahi e tin aphongdoh uve.

xxxxxxxxxxxxx

BJP Andro Mandal in Sewa-Saptah kingon nei

IMPHAL, Sept. 20 (ET): BJP Andro Mandal in tuni chun gamsung mun chom chom’a nationwide program tichu BJP ding’a Sewa Saptah Prime Minister Narendra Modi pen nikho kipapi na in hapta lhung in kingon ananei uvin ahi. Office Secretary L. Kiran Singh in aseina’a hiche kingon chu face mask hopdohna, kichep golseh nalam’a lunglut nanei TYPO, Top Chingtha akon player 70 neh leh chah ding leh theiphung 70 val TYPO ground kimvel’a ana kiphut in hiche naban’a Hr. Sec. School, Moirang Purel leh akimvel dung’a jong thingnou 70 val anakiphut in ahi.

Hiche toh lhon’a Kh. Basanta Singh in houlimna aneina’a hiche kingon kibollo na ajeh hi Prime Narendra Modi pen nikho ahitoh lhon’a hapta lhung kei’a chaga genthei panpi ngaicha ho thilpeh na in akimang in chuleh gamsung suhtheng naleh thingnou phutna in akimang in ahi. Chuleh hiche thingnou kiphut ho hi ahung pilhing tokah’a vetsui jing ding ahi ajeh chu Manipur a mi atamjo hi thingnou phut mai mai’a apilhing nading’a vetsui na um talou chuleh lim kilah pi’a media dung’a thethang ding bou lungput nei jong aum da pon ahi ati. Chuleh kingon achun secretary BJP Manipur Pradesh leh in-charge Imphal East District a kingon lamkai Kh. Basanta Singh, Secretary BJP Manipur Pradesh & ZP member K. Inaocha Devi, Tulihal ZP. Mandal President chuleh Karyakartas ho jong pan anala uvin ahi.

xxxxxxxxxxx

Mizoram a Covid +ve case thah 30 kimudoh; agom’a case 1,744 lhing ta

Aizawl, Sept. 20 : Mizoram a nidan 24 sung in Covid-19 +ve case thah 17 Assam Rifles personnel ho panna’a mi 30 akimudoh toh lhon’a agom’a case 1,578 alhing tan ahi tin thulhut chun aseiyin ahi. Chuleh janni (Sept. 19) nikho chan chun sample 1,744 tested kibol nalah’a Zoram Medical College (ZMC) akon confirmed case khat, District Hospital chom chom akon Trunet machine akon case 26 chuleh District 2 akon Rapid Antigen Test akon case 3 anamudoh uvin ahi. Hiche toh lhon’a case 30 kimudoh lah’a 20 hi Lunglei District akon, Kolasib leh Lawngtlai District akon 4 cheh chuleh Aizawl leh Mamit District akon khat cheh ahi. Chuleh Aizawl akon patient khat tailou adangse vang hi State chom chom akon ngen ahitoh lhon’a amaho cheng chu Covid-19 +ve test kibol masang’a quarantine a um’u ahitai tinjong thulhut chun aseiyin ahi.

Official akon athulhut kimu dungjui’a Lunglei District hopsung Kawmzawl facility a 17 Assam Rifles personnel quarantined aum ho, Jharkhand akon Border Road Organisation (BRO) a construction worker 4 tule tu’a Lawngtlai District a um chuleh Assam akon hung truck driver 2 amaho cheng hi case kimudoh thah lah in apang uvin ahi ati. Chuleh case 30 kimudoh lah’a mi 4 bou hi State mi ahi in adangse vang hi gamchom akon ngen ahi uvin ahi.

Alangkhat’a Mizoram a tule tu’a active case 588 um nalah’a 153 hi security personnel ahi. Chuleh mi 17 janni (Sept. 19) chun Hospital chom chom akon in Covid natna a adamdoh tah jeh uvin discharged anakibol tan agom’a mi 990 adamdoh tan ahi tin Health Department chun atahlang in ahi.

Xxxxxxxxxx

Nagaland a Covid-19 case thah 59 kimudoh; mi 78 damdoh

Kohima, Sept. 20 : Nagaland a sample 562 test anakibol nalah’a tunin Covid-19 +ve case 59 akimudoh toh lhon in agom’a case 5,451 alhing tan ahi. State Health Minister S Pangnyu in aseina’a tuni case thah kimudoh 59 lah’a 45 hi Dimapur akon chuleh 14 hi Kohima akon ahi ati. Chuleh Covid natna akon damdoh mi 78 discharged akibol toh lhon’a agom’a adamdoh 4,228 alhing tan ahi. Adamdoh mi 78 lah’a 68 hi Dimapur akon, 7 hi Kohima akon, 2 hi Mon akon chuleh khat hi Tuensang akon ahi.

Hiche toh lhon’a Nagaland a tule tu’a positivity rate hi 7.4% ahi. Dimapur a positivity rate 9.7%, Kohima a 8.5%, Peren a 7.7% chuleh Zunheboto a 7.2% ahi. Chuleh District chom chom’a positivity rate hi 4% noilam ngen ahi. Alangkhat’a Nagaland a confirmed case kimudoh lah’a 50% hi Dimapur akon chuleh 32% hi Kohima akon ahi. State Health and family welfare department akon weekly bulletin dungjui’a traced contact akon positive case kimudoh July second week chan chun 1% anahi in ahin tu hapta sung’a 21% in akhang tan ahi. Chuleh data dungjui’a traced contact akon –ve case kimudoh atamjo hi kum 21-30 (32%) leh 31-40 (35%) ahi. Hiche naban’a District leh State surveillance teams in 19,688 contact traced aboldoh nalah’a 1,103 hi –ve case ahi. Hiche lah’a Government employees (32%), household contacts (35%) leh constitute (67%) ahitoh lhon’a hetthei khat chu atamjo hi natoh namun leh insung akon kiladoh ahidan jong akihedoh thei in ahi.

 Xxxxxxx

Arunachal Pradesh a Covid-19 case thah 211 kimudoh

Itanagar, Sept. 20: Arunachal Pradesh a tunin security personnel 20 leh health care worker pannan Covid –ve case 211 akimudoh toh lhon’a agom’a case 7,250 alhing tan ahi tin Senior Health Department official chun aseiyin ahi. Chuleh mi 27 tailou adangse hi asymptomatic ahin amaho cheng chu Covid Care Centre a akikoi tan ahi ati.

Hiche toh lhon’a hiche case thah kimudoh lah’a atampen hi State Capital Complex region – Itanagar, Naharlagun, Nirjuli leh Banderdewa kimvel akon 101, Changlang a 19, Papumpare a 18, West Siang a 15, Longding a 13, East Siang a 7, Lower Dibang Valley, West Kameng leh Lower Subansiri akon 6 cheh, East Kameng a 4, Pakke Kessang, Tirap leh Namsai a thum cheh, Upper Subansiri, Upper Siang leh Lohit a 2 cheh chuleh Kurung Kumey a khat ahi. Chuleh security personnel 20 lah’a 12 hi Army akon, 4 hi State Police force chuleh Indian Reserve Battalion leh Assam Rifle akon 2 cheh ahi.

Alangkhat’a State Surveillance Officer (SSO) Dr Lobsang Jampa in aseina’a health care worker ho jong Covid natna avei gam tauvin ahi. Chuleh janni (Sept. 19) chun Covid natna akon damdoh mi 140 discharged akiboldoh toh lhon’a agom’a adamdoh jeat 5,280 alhing tan ahi. Chuleh tule tu’a Northeastern State a recovery rate hi 72.82% in aum in ahi ati. Aman aseibe na’a tule tun Arunachal Pradesh a Covid active case 1,957 aum in chuleh Covid jeh in mi 13 in thina chan jong atoh tan ahi. Chuleh janni (Sept. 19) sample 2,426 test akiboldoh toh lhon’a agom’a tuni chan in sample 2,20,706 test akiboldoh tan ahi tinjong aseibei.

Xxxxxxxx

Phattep umlouva recruitment ho kikhah

Imphal, Sept 20(ET): Government of Manipur, Department of Personnel and Administrative Reforms (Personnel Division) akon a thusohdoh kimu dungjui in tulaitah a Department jouse a recruitment chelha jing (daily wages, contract employment, muster roll, direct recruitment) leh agencies, societies, undertakings boards corporations ho jaona a   thupeh athahbeh a ahung umkit masangse a khongai hiding in thusodoh ana bol un ahi.

Hiche hin Written Test Examinations leh Viva-Voce jong ahomtha ahi.

Chuleh, emergency recruitment ngaichat ahina ho a Department of Personnel phalna toh kilhona dan kipe dungjuiya recruitment abolthei diu ahi tin Dr. Rajesh Kumar Chief Secretary Government of Manipur min a thusodoh kimu chun atahlang in ahi.

xxxxxxx

International art contest a Manipur Police Officer khat in gold medal sang

Imphal, Sept. 20 : Gamsung’a pandemic jeh’a genthei hahsat na tamtah um jong leh Manipur Police officer khat in fourth International Online Art Contest and Exhibition 2020 a gold medal anamu in ahi. Hiche gold medal kipaman sang hi Manipur Police Department akon Sub-Inspector RK Miranda ahi. Hetthei khat chu International Online Art Contest and Exhibition 2020 hi kingon hi Pune-based Artreion in agon ahi. Hiche hi achesa July akon August nisim 31 chan anahi.

Thulhut kimu dungjui’a International Online Art Contest and Exhibition 2020 achun mi 40 in kitet na ananei uva hiche mi 40 lah’a gold medal chang ding’a mi 5 lhendoh nalah’a Miranda jong hi hung pang ahi akiti.

xxxxxx

Bodoland Territorial Council election nai toh lhon’a State Police in gaal-manchah mudoh

Guwahati, Sept 20 : Bodoland Territorial Council election ahung um ding toh lhon’a Assam Police hon gamsung’a boina asolou nading’a choltih neilouva drive abol jing nao’a daan in aphallou gaalchah lha masa lam’a kon ahin matdoh jing utoh lhon’a janni (Sept. 19) jong Kokrajhar District hopsung Kachugaon Police Station sung’a um Shantipur gamkai gamlah’a gaal-manchah phabep anamudoh kit uvin ahi tin thulhut chun aseiyin ahi. Hiche gaal-manchah amudoh hochu grenade 4, detonator 4, magazines, 7.65mm pistol, AK-47 rifle leh adang dang ahi.

Hiche toh lhon’a State Police in Bodoland Territorial Area District (BTAD) election ahung nai toh lhon’a gamkai sung’a daan in aphallou gaal-manchah leh thingnoi ho vetchilna anei jing uvin ahi. Assam Director General of Police Bhaskar Jyoti Mahanta in lha masa lam’a anaseina’a BTAD noi’a um District 4 sung’a State Police in daan toh kitoh louva gaal-manchah amatdoh jing naban’a BTAD election kichai kah’a gamkai sung kholchilna kinei kichelhapi jing ding ahi tin anasei in ahi. Chuleh ipi thilsoh um jong gamkai sung’a election kichai kah’a kholchilna/venbit na kinei jing ding ahi ati.

Xxxxxxxxxxx

Moreh Muslim Basti containment zone a phondoh hita

Tengnoupal, Sept 20: Moreh ward no 5 Muslim basti chu covid positive ana um toh lhon in  Contentment Zone in phondoh na akinei tan ahi. Covid positive hi insung mi 6 lamjong sample ana kila in home quarantine ana kibol sah tan ahi. Sub–district hospital Covid Care centre a ana kijan mi 11 lam le positive ana hinu le a insung miho sample chu JNIMS  a test ding in ahung kipo lha tan ahi. Positive ana hinu chu  Primary Health Centre (PHC) a ana kijan ahi toh lhon in centre jong phatchom kha ding in hetsah na ana kinei in ahi. PHC  aum doctor ho le nurse ho jong innlam ki le talou in PHC a akhosa dan taovin ahi akiti. Tengnoupal District Deputy commissioner  M. Rajkumar in thupeh ahin nei dungjui in Muslim basti sung jong tuni in containment zone in phondoh na ana kinei in ahi. Xxxxxxxxxxxxxxxxxxxxxxxxxxxxxxxxxx

Kakching District sung muntin a Sewa Saptah kingon anakinei

Kakching September 20:  Prime Minister Narendra Modi kum 70 lhinna toh kisai a Indi apumpi a muntin a achesa nisim 14 akon an akipan Sewa Saptah kingon chu Kakching district sung muntin a jong ana kimang in ahi.   Sewa Saptah Celebration Committee-BJP Kakching Kendra makai na noi a kingon kibol ho lah achun Sora Mamang Leikai a Bhubon Technical and Skill Development Private Limited a Chairman le  Social Worker Naorem Nabachandra jin gun hina, BJP Kakching District Vice President Sh. Inaobi kinnei le adang dang jin ja um hina in kingon an akinei in ahi.  BJP Kakching District  in jong Sewa Saptah kingon chu Social Welfare Club (SWC) Keirak Playground a jong ana bol uvin ahi. Kingon achun BJP Manipur Pradesh a Vice President Wabagai Ex MLA Dr Usham Deben, BJP Kakching District a President Usham Ibomcha chuleh BJP lamkai dang dang jaona in kingon ana kinei in ahi.  Kingon achun Prime Minister pa kum 70 lhinna chung a kipa thu seina ana nei cheh uvin ahi.   BJP Wabagai Mandal in jong  Sewa Saptah kingon chu Keirak Usham Leikai Community Hall a ana bol uvin ahi. Kingon achun MANIDCO le MANITRON Chairman Hiyanglam Kendra  MLA Dr Radheshyam Yumnam jin gun in ana pang in, BJP Manipur Pradesh Vice President le Wabagai Ex MLA Dr Usham Deben, BJP Kakching District a President Usham Ibomcha, BJP Wabagai Mandal a President M. Nabachandra, BJP Manipur Pradesh a Secretary Scheduled Caste hi Kakching Municipal Council Ward no 7 a Councillor Sandham Premita Devi hoc un deichom a kou an ahiuvin ahi.

 xxxxxxxxxx

Mission Blind School Heikakpokpi suhtheng na kinei

Kakching September 20:  Youth Development Organization (YDO) Pallel Thong Wangmagi volunteer  ho in Mission Blind School Heikakpokpi mun sung suh theng na ana nei uvin ahi. Club in school chu kihtopina in thil jat chom chom pehdoh na jong ana nei uvin ahi. School sung net le hampa khul ho hetdoh ahi toh lhon a club volunteer ho in hitabang na toh na nei ding a kigel lhah na ahin nei u ahidan club President Chongtham Rajen in ana sei in ahi.    Mission Blind School Heikakpokpi hi govt in phat sot tah ahin vet tah lou ahi toh lhon a hahsat na ana to jing u ahitah dan jong tahlang na ana kinei in ahi.

xxxxxxxxxxxxxxxxxxxxxxxxxxxxxxx

Hyderabad University entrance test Imphal center a bol ding a ngehna kinei

Imphal, Sept 20- University of Hyderabad Manipuri Students ho in lockdown toh kisai a che le vale boi jeh in tahlal mi tam toh lhon a University entrance test bolding hi IMphal a bolthei ahi na dingin temna ahin nei uvin ahi. Hiche temna chu Manipur Education minister rin ahin gon ding a hetsah na ana kinei ahi. Hetthei khat chu Imphal ding a entrance tetst mun ding lhenna ana nei jing ho hin Dimpaur ahi lou le Guwahati lam an ajot jing u ahi. Tu laitah a nat na jat chom chom um jing toh lhon a gampam che a exam aga bol ding ahi thei loutoh lhon a tuchung ading beh hijong le hiche themvetna neina ding mun chu Imphal sung ahithei na ding a temna ana kinei ahi. Hetthei khat chu Hyderabad University hi India sung a top 10 a ajao toh lhon a kum she a Manipur akon entrance test tou um jing ahi.

Xxxxxxxxxxxxxx

Naga nupi kiloikhomna ho in NSCN-IM lamkai ho kimupi

Dimapur, September 20- Naga nupi kiloikhmna jat chom chom akon lamkai 7 lam in NSCN-IM lamkai ho kimupi na ana nei uvin ahi. Naga Mothers Association (NMA), Naga Women Union Manipur (NMUM), Rengma Hills, Assam  le Arunachal akon Naga nupi kilokhomna nah o in NSCN (IM) general secretary, Th Muivah, NSCN (IM) Chairman, Q Tuccu, Vice Chairman, Tongmeth le lamkai dang dang ho chu New Delhi mu nana kimupi uvin ahi. Hiche numei kiloikhomna ho chu Global Naga Forum tosot na noi a ana kalsong ahiuvin ahi akiti. Nupi lamkai ho chun NSCN-IM lamkai hooth akihou na uva agan n athei pen a kihou lhah na ahin nei uva Naga ho gamsung a chamna hung umnading in temna le ngehna ana nei uvin ahi. Nupi lamkai ana kal song ho lah a chun Prof. Rosemary Dzuvichu, Advisor, NMA jong ana jao in ahi. Muivah in kimutona a ana hou limna a kihou na chung a flag le daanpi nei ding hi thupi pen a ana kisei ahin, achaina kinoptona a hiche ajao na ding a tohgon nasatah a kinei ahidan tahlang na ana nei in ahi. Naga nupi kiloikhomna lamkai ana kal song ho chu Prof Rosemary Dzuvichu, Advisor, NMA,  Abeiu Meru, President ,NMA, Asha Wungnam, President NWUM, Ningreichon Tungshang ,Former Convenor, NPMHR, Delhi, Neikesanuo Sorhie, Former Convenor, NPMHR, Yutan Sunya ,Tirap, Arunachal le Miriam Rengma, Rengma Hills, Assam ahiuvin ahi.

Xxxxxxxx

Assam Chief Minister in police themvetna a Qs. Paper leak na chung a kholchil na neiding a hetsah na nei

Guwahati,Sept 20: Assam government  in tuni a kibol ding police themvetna kahlhah na ana nei utoh lhon in Qs. Paper leak na chung a kholchil na nei idng in hetsah na ana nei uvin ahi. Hetthei khat chu Assam Police SI kilah na ding toh kisai a themvetna kinei kigo chu social media a qs. Ana leak toh lhon a kah lhah na kinei ahi. Chief Minister Sarbananda Sonowal hiche chung chang a kholchil na nei dinga thupeh ana nei toh lhon a DGP Bhaskarjyoti Mahanta ang a mona nei ho kholdoh a man ding a thupeh ana nei ahi. Hiche qs paper ho chu tu jingkah lam a ana leak ahi akiti. Simlai tamtah exam pe ding ho in exam ki kah lhah na chung a demna sangtah ana nei uvin ahi. Recruitment board in agan na thei pen a exam nikho ding ahin gon kit ding dan u jong hetsah na ahung kinei in ahi.

Xxxxxxxxxxxxxxxxxxxxxxxxxxxxx

Union Govt in Rural kiloikhomna ho ading a grant in aid hom, Manipur dangka crore 88.5 chang

New Delhi, Sept 20: 15th Finance Commission (XV FC) in 2020-21 ading report ahin peh na uva state 28 ading Rural Local Bodies (RLBs) gran in aid fund hopdoh na ahin nei uvin ahi. Hiche fund ho hi natong ho lo tilou a natoh na le khantou machal na natoh naho a kijang ding ahi akiti. Hiche fung ho hi alhang sung cheh a don ding twi, sanitation le natoh an jay chom chom ho a jahding ahidan jong tahlang na ahung kinei in ahi. Hich efund hi instalment ni a kipe ding ahi akiti.

xxxxxxxxxxxxxxxxxxxxxxx

Revenue Minister in Langthabal Khoupum a cheng ho gam lekha pehdoh na nei

Imphal, Sept 20(ET): Revenue Minister Karam Shyam in Langthabal Khoupum a Kabui inn 120 lam ang a gam lekha pehdoh na ana nei in ahi.

Amaho hi kum 200 lam hung chang ahu tah toh lhon a gam lekha chu pehdoh na ana kinei ahi akiti. Hiche pehdoh an kingon chu tuni a Langthabal Community Hall a ana kinei ahi.

Minister pan ahoulimna a Langthabal Chingkha le Chingthak ho ang a jong gam lekha pehdoh na kinei vah ding ahitan ahi ati. Manipur Hill Peoples Regulation Act 1947 le Manipur Court’s Act 1947 dungjui a Sadar Hills a kho phabep ho hin kai ana peh jing u ahin, hiche lhang sung hi achesa 1984 akon a Imphal west evebue noi a ahung um tah toh lhon a lekha ho chu pehdoh na ana kinei ahi.

Alhangsung a khantou machal na natoh nah o jong ahung kibol vah tahding dan jong minister pa in tahlang na ana nei in ahi. Revenue Commissioner R.K Dinesh le Joint Secretary, Revenue Department- Y. Rajen in jong kingon achun panlah na ana nei lhon in ahi.