Manipur a Covid-19 positive 2 kihet doh be; Natna nei agom a...

Manipur a Covid-19 positive 2 kihet doh be; Natna nei agom a mi 9 lhingta

61
0
SHARE

Manipur a Covid-19 positive 2 kihet doh be; Natna nei agom a mi 9 lhingta

Imphal, May 19(ET): Manipur gam a Tuesday nikhon COVID-19 positive case athah ni akihetdoh be in, hiche toh kilhon a gamsunga natna neiya agom a 9 lhing ahitai.

Kum 64 a upa numei khat le kum 23 a upa achanu hi COVID-19 positive ahi akihedoh a athah pen ahi. Amani nu cha hi Kamjong district a kon ahi’in, achesa May nisim 16 nikho a Delhi a kon bus a Mao Gate langa kon hung kile lhon ahi. Ani lhon a tua hi symptom soh lou (asymptomatic) hilhon ahi, tin Additional Health Director Dr K Susheelkumar Mangang in aseiyin ahi.

Test report dungjuiya, nu-cha teni hi achesa February nisim 8 nikho a AIMMS Hospital, Delhi a anu mit jen sah ding ache lhon a chule Kotla Mubarakpur, South Delhi a in bahara a umlhon ahi. Institutional Quarantine centre, IIT Mantripukhri, Imphal khopi a ‘quarantine’ abol u ahi’in, tua hi COVID-19 care center, RIMS a jen dinga achon u ahitai.

Delhi a kon ahung kile khompi bus a tou adang 20 ho koi ahi akholdoh uva chule natna achal louna dinga kivenna a akimupi hou kholna (contact tracing) kipan ahitai, tin aseiyin ahi. Hiche chungchon a Quarantine centre panna a dan dungjuiya ‘Containment’ kibol ding ahi.

Kal masa a, Moreh town a cheng kum 75 a upa numei khat le kum 48 a upa achapa positive ahi kihedoh ahi. Amani nu-cha jong Regional Institute of Medical Sciences (RIMS), Imphal Isolation ward a kijen jing lhon nalai ahi. Amani hi Mumbai khopi a kon hung kile lhon ahi. Kal khat sunga bou Manipur gam a Covid-19 active case athah 7 kimudoh be ahitan, amasapen hi May nisim 14 nikho a kihedoh ahi’in, Mumbai a kon gari (hired) a hung kile Imphal East a cheng kum 31 a upa pasal khat ahi.

Active case sagi umho lah a mithum hi Mumbai a kon gari (hired) a hung kile ahi’in, mikhat hi Kolkata a kon hung chule numei khat hi Chennai a kon Indian Railways ‘special train’ a hung kile ahi. Official thulhut dungjuiya, active case hohi abon uva ‘asymptomatic’ hiu ahi.

Manipur gam a COVID-19 case masapen hi United Kingdom a kon March nisim 24 nikho a hung kile kum 23 a upa numei khat hi ahi. Ama jouva April nisim 2 nikho a Lilong a kon kum 53 a upa pasal khat Covid-19 positive ahi kihedoh ahi. Pasal pa hi Delhi khopi a um Nizamuddin Markaaz a anapang ahi. Adammo akihedoh masa teni hi ani lhon a April nisim 12 le 19 ni a adamdoh lhon jeh a hospital a kon discharge abol u ahitai.

Senapati CSO hon NH-2 a phat teplou ‘Economic blockade’ bol dinga gihna neiyu

Imphal, May 19 (UNA): Senapati Civil Society Organisation hon Covid-19 protocol palkeh a ngohna aneiyu Senapati DC Salam Samorjit ‘suspend’ bol dinga state sorkar henga thumna aneiya chule May nisim 17 jan nidan 6 a kon nidan 48 phat atep peh u akichai jouva hiche thu a sorkar in action alah loujeh a kiloikhomna hon mipi thalheng a state sorkar tujan (May 19) nidan 6 a kon nidan 24 phat atep peh be kit uvin ahi.

Naga People’s Organisation, Senapati District Students Association chule Senapati District Women Association in state sorkar in nidan 24 sunga thumna abulhit loule May nisim 20 jan nidan 6 a kon National Highway-2 a phat teplou Economic Blockade bol dinga gihna anei uvin ahi. CSO hon Tuesday nikho a Senapati District Headquarter mun a meeting abol nauva blockade bol dinga thulhuhna aneiyu ahi.

Chule economic blockade sunga akilha ong ding ho lah a medical, fire brigade, media, gamdang mi gamsunga hung kile permit neiho ahi, tin thuso chun aseiyin ahi. Organisation in state sorkar adoudal ahipon, ahivanga DC Senapati Samorjit Salam in May nisim 13 nikho a gamdang a kon hung kile gamsung mi 36 ho Mao Gate a ‘No entry’ phat sunga alut sah a, quarantine centre hilou Multipurpose hall a an anehdiu agon peh a Senapati a cheng asang a sim boina thei dinmun a akoiya, Covid 19 dan apalkeh jeh a thudih a thutanna kathum u ahi, tin asei uvin ahi.

Mipin thudih a thutanna ding akithum na a tosotna apeh uva chule Lockdown palkeh louna dinga inmun a aum tup diuvin organization kipunkhom hon temna aneibe uvin ahi.

Test kibol negative jouse Home Quarantine a soldoh’a um ahidan COVID-19 Rapid Response Team in mipi hetdia hilchet nanei

B.Lalboi Gangte

CCpur. May 19 (ET): COVID-19 Rapid Response Team, Churachandpur in tuni nilhah lam nidan 4:00 in CMO Office Chamber mun Quarantine Centre thu’a Media briefing anabol uvin ahi. Hiche achun Dr. VC Pau Tonsing, Member Secretary in Home Quarantine thu’a mi tamtah in hetthem louna anei dungjui in hilchetna abol in chuleh JNV a simlai 32 Home Quarantine ding’a lhadoh nachung thu ajong hilchetna anapen ahi.

Dr. VC Pau Tonsing in aseina’a Community Quarantine Centre aum test kibol jouse VRDL result ah negative ahi leh Home Quarantine ding’a lhadoh thei ahi in, Community Quarantine Centre ah nikho 14 um ding ti hijong leh test akibol’a negative result ahi leh nikho 7 um man hih jong leh Home Quarantine asutjom thei’u ahi ati. Home Quarantine ajong insung miho toh physical distancing hoi tah’a ajui ding’u hiche hi jalhang ading’a juthei leh abit napen khat ahi. Hiche dungjui’a Community Quarantine ham, Institutional Quarantine apat koima  nikho 14 um nai lou chuleh test bolna’a positive result koima Home Quarantine ding’a kipotsah lou ding’u ahi. Hitobang’a Home Quarantine bolthei ding’a lhadoh’a aum teng uleh kho sung lamkai, Village  Authority ho akihetsah man lou jong leh ahetthem ding uvin ngehna aneiyin ahi.

Dr. Shania Monica, in-charge, Quarantine Centre in mi tamtah in Quarantine Centre akon kipotsah ho chung thu ahethem thei pouvin ahi. Thermal scanning bou hilou’a COVID-19 test kibol chung chon’a negative result ahi nah leh potsah thei ahi in chuleh negative result kimu jouse Home Quarantine ding’a kisoldoh ahi ati. COVID-19 positive khat toh um khom kha hovang Institutional Quarantine Centre ah koi in aum in hijong leh ni ijat ham nung’a test kibol na’a kon negative result ahi louleh Institutional Quarantine Centre ah nikho 14 aum phatsung’a natna kilangdoh aum louleh Home Quarantine ding’a kisol doh thei ahi. Hiche hi midang Institutional Quarantine Centre aum ding ho mun otdoh na leh bit thei na ding’a ki jui ahi tinjong aseibei.

Dr. Ngahneikim, Spokesperson in aseina’a Community Quarantine Centre toh kisai’a tu dinmun’a CCpur District sung’a Community Quarantine Centre 70 hetpeh in aum in chuleh State dang akon hung kipan mi 955 tuhin Community Quarantine Centre ho’a um uva khosung lamkai hon avetkol’u ahi. Chuleh Community Quarantine Centre vetlhah na ding’a medical team hon phatseh in aki um pi man pon ahi. Hiche dungjui’a inmate um ho lah’a natna kilangdoh ham ahi louleh boina nei aum leh helpline number kipe’a kithu jah mat thei ding ahi dan atahlang in ahi. Mitakip in Community Quarantine Centre apat test kibol ahi nung’a result negative ho Home Quarantine ding’a solthei ding ahidan hetpoimo ahi ati. Tu dinmun in mun dang apat CCpur District hung lut mi 1,400 vetkol in aum in, Community Quarantine Centre ah mi 955, Institutional Quarantine Centre, Bijang ah mi 40 leh Youth Hostel, Hiangtam Lamka ah mi 11 aum in ahi. Chuleh District Hospital ah Isolation Ward a mi 9 vetlhah in aum in, Home Quarantine a mi 107 aum in ahi. CCpur District apat test ding’a sample 86 kithot dohna’a mi khat positive leh mi 85 negative ahi.

Gamsa that mi 5 Police hon manchah toh mat tha

Imphal, May 19(ET): Lamlai Police station in Inspector W Devkumar Singh lamkaina a Lamlai police station gate mai, NH 202 a Covid-19 Lockdown palkeh ho kholna a ‘frisking’ abol uvin ahi.

Team hon jingkah nidan 1.30 don a Churachandpur a kon Ukhrul jon a mi nga aman uvin, gamsa chule manchah jong aman uvin ahi. Akiman hohi Ngamkholal Haokip (43), s/o (L) Mangjathang Haokip, Shongphel kho a cheng, St Kamminlal Vaiphei (39), s/o Lenkhohao Vaiphei, Twisomjang kho, Letkhothang Haokip (40), s/o Thonglet Haokip, Shongphel, Ukhrul district, Letkhothang Haokip (40), s/o (L) Ngamjatong Haokip, Mullam kho, Ukhrul district chule Hemkhothang Mate (29), s/o Tongjang Mate, Twisomjang kho, Senapati district ahi.

State sorkar in mi 7,000 umna thei Quarantine Centre 130 lheng

Imphal, May 19(ET): Manipur Health Directorate in mi 7,000 vel umna thei institutional ahiloule government quarantine centre 130 alheng tauvin ahi.

Directorate a kon kimu thulhut dungjuiya, Institutional Quarantine centre 33 a hi mi 2,000 umthei chule kituptah a kivaipo thei ahi. State sorkar in gamsung mun chom chom a hitobang Quarantine centre 130 lhendohna anei ahi. “Identification’ hi Quarantine centre alhahsam louna dinga abol u ahi. District jouse a Community Quarantine centre 360 vel kihong ahitan, hiche hi aphat chule dinmun dungjuiya kal be thei ahi.

Integrated Disease Surveillance Programme in thuso aneina a, Monday nikho chan a mi 4,163 hi Community Quarantine centre’ chom chom a um ahi. Government Quarantine ahiloule Institutional Quarantine centre a um hi 1,490 ahi’in chule tu dinmun a ‘Home Quarantine’ kibol umlou ahi. Home Quarantine a ana kikoi hi 486 ahi’in, government quarantine a 3,967 chule community quarantine a 4,163 um ahi, tin aseibe in ahi.

Monday nikho a test result kimu hi RIMS a 149 chule JNIMS a umlou ahi, tin thuso chun aseibe in ahi. Ahivanga, agom a tuchan geiya test result kimu hi RIMS a kon 1,348 chule JNIMS a kon 1,120 chule NIV, Pune/GMCH a kon 15 lhing ahitai. Mao Gate a Monday nikho a truck tol 385, che le vah le 234 screened abol uva, Jiribam a mi 27 chule Jessami a truck tol mi 4 screened kibol ahi. Mao a agom a mi 64,999 screened kibol ahitan, Jiribam a 11,871 chule Jessami a 144 lhing ‘screened’ kibol ahitai.

Monday nikho a Control room a phone kibol 302 lhing ahi’in, tuchan geiya phone call 13,253 kila ahitai, tin thuso chun aseibe in ahi.

 

India a Covid-19 jeh a thi hi mihem lakh khat lah a 0.2 ahi’in, Global Figure 4.1 toh tekah dinga lhom ahi: Health Ministry

New Delhi, May 19: India gam a tuchan geiya COVID-19 jeh a thi hi global figure 4.1 toh tekah dinga population dungjuiya 0.2 vel ahi, tin Union Health Ministry in aseiyin ahi. Tuesday nikho a natna jeh a thi 3,163 alhin jou ahi’in chule natna neiya agom a 1,01,139 lhing ahitai.

Chule India gam a Monday ni a COVID-19 test kibol hi sample 1,08,233 lhing ahi’in, gamsunga dinga record ahi. Tuchan geiya sample agom a 24,25,742 test kibol ahitai, tin Ministry in aseiyin ahi. WHO data report thu Ministry in aseina a, Tuesday nikho chan a vannoi pumpi a COVID-19 jeh a thi hi 3,11,847 ahi’in, population lakh khat a 4.1 thi tina ahi, ati.

COVID-19 jeh a vangsetna toh gam holah a US sangpen ahi’in, US a natna jeh a mi 87,180 thi ahitan, mihem lakh khat lah a 26.6 thi tina ahi. UK gam a 34,636 thi a, population lakh khat lah a 52.1 vel tina ahi. Italy a natna jeh a thi 31,908 lhing a, 52.8 (per lakh population) tina ahi. France gam athi hi mihem lakh khat lah a 41.9 vel tina ahi’in, mi 28,059 thi a chule Spain gam a 27,650 thi a, lakh khat lah a 59.2 tina ahi.

Germany, Iran, Canada, Netherlands leh Mexico a natna jeh a thi 7,935, 6,988, 5,702, 5,680 chule 5,045 cheh ahi’in, hiche hi mikhem lakh khat lah a 9.6, 8.5, 15.4, 33.0 leh 4.0 thi tina tobang ahi. China gam a natna jeh a thi 4,654 ahi’in, per lakh population a sei dinga 0.3 vel ahi. “Aphat cha natna neiho akihetdoh chule vetkolna aumjeh a lhom ahi”, tin Ministry in aseibe in ahi.

India gam a COVID-19 test kibolna government laboratory 385 chule private laboratory 158 um ahi, tin aseiyin chule central government lab, state medical college, private medical college le private sector hotoh kithona kineiya, testing capacity kikehlen ahi, ati. TrueNAT le CBNAAT kiti hojong test kibol atamna dinga kimangcha ahi, tin aseiyin ahi.

Test kibol atam thei nadinga depot 15 kisemdoh ahi’in, India company tamtah in atosot ahi, tin aseibe in ahi.

KRSU le TYA in Kangpokpi district a thil aman tam a joh dukan bol ho gihna nei

Kpi, May 19 (UNA): KomRem Students’ Union Kangpokpi le Thadou Youth Association Kangpokpi in thakhat a thuso anei nauva Kangpokpi district sunga thil man akal doudalna sangtah anei uvin chule thil man kalsah ho chunga action khoutah lah dinga gihna anei uvin ahi.

Kangpokpi mun a K Songreng Kom, President, KRSU in thuso miho akimupi na a, state sorkar in gamsunga Lockdown aphondoh jouva kon district sunga thil man sangtah tah a akal thu kahet uhi vangset umtah chule dei umlou tah ahi, tin aseiyin ahi. Mipin pandemic jeh a hahsatna ato a, neh le chah mu nadinga akiham bol jing laiya dukan bol hon thil man akal sah uhi simlai kiloikhom hon amoh vetlou ding ahi, tin Songreng Kom in aseibe in ahi.

KRSU le TYA in pan alahkhom a May nisim 21 nikho a kon thukholna (inspection) abol ding ahi’in chule koi tobang MRP kalval a thil man kalsah a aum akihetdoh a ahile dan dungjuiya action kilahkhum ding ahi, tin gihna aneibe in ahi.

AMSU, CADA leh Khongjom Circle vengsung mihon Kuwa na tamtah man; thilsoh toh kisaiya police hon mi 6 man ta

Imphal, May 19(ET): Khongjom Circle Covid-19 Relief Committee member hole Khongjom Circle a club 11 thalheng ho panna a vengsung mi tamtah in Tuesday nikhon ‘brickfield’ abo khum uvin, truck thum vel a kipo hidinga ginchat kuwa na basket 180 vel aman uvin ahi.

Brickfield neipa gari hidinga tahsan flagpost umna gari khat jong aman uvin ahi. Papal Mamang Leikai, Khongjom police station noiya um Thoubal district a um Brickfield mun a thilsoh ahi. Vengsung miho le club member hon Brick Field a mi chaloh dan avet jing uva asunga thil kibol vetlhah dinga thulhuhna aneiyu ahi.

Brick Field hi Charangpat a cheng Kangabam Jadumani a ahi’in, amahi Lok Janashakti Party (LJP) Manipur State Dalit President jong hi ahi. Kuwa na kipohna Tata truck (registration number UP20 AT-2678) chule thil po a pang gamdang mi 5 jong vengsung mihon amat tha ahi. Vengsung mihon kuwa na chule akiman gari meiya hal ding agot pet uva Khongjom le Thoubal police hon thilso namun adel lut uvin ahi.

Vengsung nupi hon asei dungjuiya, Covid-19 dan palkeh louva amun kholna kinei ahi, tin aseiyin chule Brick Field neipa hind an in aphal lou thil dang dang jong abol dinga aginmona thu aseiyin ahi. Mipi inmun a umtup dinga thupeh kineiya ahivanga Brick Field a lut le pot gari aphat tin a aumjing chule gamdang miho iti dan a um ham, tin thudoh aneiyin ahi.

Brick Field neipa hi Covid-19 virus sanga kichat umjo ahi, tin vengsung mikhat in aseiyi chule state sorkar in themmona neiho dan dungjui chule mipi lunglhaina dinga gotna apeh ding atahsanna thu aseibe in ahi. Thilsoh toh kisaiya FIR ajihlut tauvin chule mi 6 aman uvin ahi.

Akiman hohi- Kangabam Shantidas Singh (40) s/o K. Dijamani Singh, Charangpat Mayai Leikai a cheng, Kangabam @ Jadu Jadumani Singh (50) s/o K. Dijamani Singh, Charangpat Mayai Leikai, Sanjoy Choudhury (43) s/o Arjun Choudhury, Thangal Bazaar  Khuyathong Road a cheng,  Birendra Saha (39) s/o (L) Khellawan Motihar Dist Bihar tu le tua Cheirap court kom Uripok a cheng, Kulvinder Singh (43) s/o (L) Chain Singh, Tirak Karma PO Garddey, Anandpur Punjab a cheng chule Adnan Khan (21) s/o  Jahid  Khan, Chandpur Bijanor District, Uttar Pradesh a cheng ahi.

Amaho akimat jouva police hon K Shantidas Singh inmun a kon kuwa na basket ni amat be kit uvin ahi. Thilsoh toh kisiaya Tata truck khat le Toyota Fortuner car akang khat (registration number umlou) chule gari lekha hojong amat tha uvin ahi.

Alangkhat ah Jani nilhah lam nidan 5:30 vel in Imphal Mao Road akon Tata truck khat a kuwa naa ahung kipoh toh lhon in Coalition Against Drugs & Alcohol (CADA) le All Manipur Student’s Union (AMSU) in kitho khom in Mantripukhri aum NRL pump kom a truck (NL01AD 0629) chu anaman uvin Heingang Police station a apelut tauvin ahi. Heingang Police, CADA le AMSU ho in truck chu vetlhah na ana neina uva kuwa naa aalu bora 34 lam a kichun ana mu uvin ahi.

Hetthei khat chu Ministry of Health & Family Welfare (Tobacco Control), Government of India in kuwa twi kisit thang akon covid-19 natna ki thethang thei ahi tia khana ananei u ahi. Hitabang gamsung hahsat genthei laitah a daan in phal lou natoh nah o koima in abol lou ding in kiloikhomna teni chu hetsah na ahin nei uvin ahi. Lockdown hi mipi ho kivenna ding le ki hin so na ding a kibol ahin, sumkol vei ho in amaho ding gelna a moh cha cha nah o anei louding uvin jong hetsah na ahung kinei in ahi.