Manipur a Covid-19 natna nei mikhat thi be kit; Covid 19 positive...

Manipur a Covid-19 natna nei mikhat thi be kit; Covid 19 positive case 116 kimudoh be

46
0
SHARE

Manipur a Covid-19 natna nei mikhat thi be kit; Covid 19 positive case 116 kimudoh be

Imphal, July 31(ET): Thoubal district mi khat jong Friday jingkah a akijenna Jawaharlal Nehru Institute of Medical Sciences (JNIMS) Hospital a athi in, Covid 19 toh kisai natna a thi anga channa chule Thoubal district mi natna jeh a thi athum channa ahitai, tin government thulhut in aseiyin ahi.

Thulhut dungjuiya, achesa July nisim 29 nikho a hai khoplou jeh a JNIMS Hospital a ahin pohlut u ahi in, ama sample hi Imphal a um private diagnostic center a test abol masat uva, hospital alhut masang uva positive ahi kihedoh ahitai. Tuchan geiya Manipur a Covid 19 jeh a thi mi 5 lhing ahitai.

Achesa July nisim 29 nikho a Khongjom Sapam, Thoubal district a cheng kum 56 a upa pasal khat kal natna leh natna dang dang toh Covid 19 akop jeh a akijenna RIMS Hospital, Imphal a thi ahi. Ajing, Thursday nikho a Leimakhong, Kangpokpi district a cheng kum 48 a upa mikhat, Langol, Imphal West a cheng kum 47 a upa mikhat chule Moijing, Thoubal district a cheng kum 60 a upa mikhat RIMS leh JNIMS Hospital a Covid 19 chule natna dang dang akop jeh uva thi ahi.

Friday jan nidan 6.30 chan, achesa nidan 24 sunga numei 19 leh pasal 97 panna a COVID 19 positive case athah 116 akimudoh be in ahi. Thoubal district mi 10, Imphal West district mi 7 chule Tamenglong district mi 2 panna a agom a mi 19 hi gamdang a kholjin hilouvu ahi, tin Dr. Sasheekumar, spokesperson, Health Department in soi akaina COVID 19 Common Control Room thuso in aseiyin ahi.

Friday nikho chan a gamsunga Covid 19 positive case hi agom a 2621 lhing ahitan chule active case 931 lhing ahi. Case athah a kimube mi 116 holah a Churachandpur district mi 59, Kakching 24, Thoubal 15, Tamenglong 2, Imphal East, Tengnoupal leh Senapati district mi khat cheh pang ahi. ABon uva Covid Care Facility a achon tauvin chule ‘containment’ leh contact tracing’ hojong apat u ahitai.

Hiche phat sung ma ma a CCC chom chom a kijen Covid 19 positive anahi mi 17 adamdoh in ahi. JNIMS hospital a kijen mi 5, Meitram CCC leh Thoubal a mi 4 cheh, Senapati a mi 3 chule RIMS Covid Care Facility a kijen mikhat RT PCR test abol uva COVID 19 negative ahi jouva discharged abol u ahitai. Hiche toh kilhon a tua gamsunga natna a kon kijen dam mi 1689 ahitan, recovery rate hi 64.44 percent hi ahi.

SOP kipe ho khoutah a ijuiya ahileh COVID 19 jeh a thi ho thilong hi kichat ding ahipoi, tin thuso chun aseibe in ahi. Achesa May nisim 30, 2020 ni a State sorkar in MOIEW toh kitoh a SOP asodoh ahi. SOP jui pum a thilong hohi sterile body bags a kikoiya, disinfect angaichat na chan a kibol ahi, ati. Natna jeh a thi masapen pa thilong hi July nisim 30 jan kim a kisumang a, anichanna hi ajan ma ma a Chingmeirong a kivui ahi. Mopohna nei District Administration leh Medical Team hon pandemic jeh a boina leh hahsatna umho vetkol nadinga choltih nei louva pan alah ahi.

Chief Minister in martyr chang AR sepai ho jana pe; thingnoi kiloikhom ho kihouna a apan ding uva kouna nei

Imphal, July 31(ET): Chief Minister N. Biren Singh in Friday nikhon Khongtal kho, Chandel district a achesa July nisim 29 nikho a thingnoimi hon abulu na a thi Assam Rifles sepai thum ho jana pehna aneiyin, Bir Tikendrajit International Airport mun a kigong kin a apang in ahi.

Chief Minister in thusoh miho akihoupi na a, India tobang democracy umna gam a boina a ding mun ong aumpoi, tin aseiyin chule thilsoh demna sangtah aneiyin ahi. Sorkar in thipbeh a avet louding, thilse bol ho kihol doh tei tei ding ahi, tin aseiyin chule thal choi thingnoi hon gal abol angah uva, athu seilhah khom nadinga pan alah diuvin jong temna aneiyin ahi.

State sorkar in thilsoh a martyr chang a gamsung mi sepai ho insung mite kilomtah a kithopina apeh ding ahi, tin aseiyin chule hiche thu hi State Cabinet a seikhom dinga kipodoh ding ahi, ati. COVID 19 natna a thi ho chungchang dohna aneiyu chun CM in, tuchan geiya athi akisei hohin natna chom chom aneisa u ahi, ati. Hiche jeh a amaho hinkho huhdoh ding hi hahsa ahi. Hijong leh sorkar in hinkho jouse huhdoh nadinga abol thei chan abol ahi, tin aseibe in ahi.

Hiche masanga N Biren Singh lamkaina a adang dang hon athi Assam Rifles ho jana pehna aneiyu ahi. Khurai MLA L Sushindro, DGP LM Khaute, civil, military, police officer luboh ho leh insung mite jong kin a apang uvin ahi. Chief Minister in athi Assam Rifles sepai ho lah a pang Ratan Salam insung mite akimupi in, alunghempina thu aseiyin ahi.

Manipur, Nagaland leh Assam gam mi athi sepai ho kiphalna hin kipumkhat na hi igamsung u chule Assam Rifles thahatna avetsah ahi. Assam Rifles hohin India security a dinga pan sangtah alah uva, pan alah jom u ahi.

Thingnoimi ho buluna thilsoh a Barpeta, Assam gam a cheng Havildar (GD) Pranay Kalita, Mon district, Nagaland gam a cheng Rifleman (GD) Methna chule Kakching Makha Leikai, Manipur a cheng Rifleman Ratan Salam thi ahi. Pranay hin ajinu leh acha numei ni adalhah a, Methna hin ajinu leh acha numei khat chule Ratan Salam hin ajinu chule acha pasal ni athi san ahi. Abon uva Assam Rifles sepai hangsan tah a gam ngailutna nei ahiuvin, gamsung in amaho kiphalna hi jana sangtah apeh ahi.

August 7 chan Manipur a court a natoh imacha umtheilou ding

Imphal, July 31(ET): Manipur High Court in tuni a thuso khat abolna achun Manipur sung a high court leh district court ho August 7 chan Regular court sitting umtheilou ding in thuphon abol in ahi. Hiche hi Covid-19 natna douna toh kisai ahi ati. Hinlah akhoh dehset hovang video conference mangcha a kibol ding in asei in ahi. I ham tia video conference ahitheilou leh covid-19 protocol ho kitup sel a jui a court a bolding in jong asei in ahi.

Chief Secretary panmun gamsung mi IAS hon atuh ding thu a DESAM, ATSUM, AIMS in sorkar toh MoU soi kaina nei

IMPHAL, Jul. 31(UNA): Manipur government chule simlai kiloikhomna thum- Democratic Students Alliance of Manipur (DESAM), All Tribal Students’ Union of Manipur (ATSUM) leh Apunba Ireipakki Maheiroi Sinpanglup (AIMS) in Chief Secretary panmun tuh dinga gamsung mi IAS officer ho lhen ding chungchang a point 6 umna Memorandum of Understanding soi kaina anei uvin ahi.

MoU soi akai nauva state sorkar thalheng a Sumant Singh, IAS, OSD to CM apang in ahi. MoU dungjuiya, state sorkar in hiche chungchang thu a simlai kiloikhom hon lungneng na, hetthem na leh kithuto na aneiyu apachatna thu aseiyin ahi. Gamsung mi hi a IAS officer ho Manipur Chief Secretary panmun tuh dinga simlai kiloikhom hon thumna anei hi kilomtah ahi dan ahetpeh nau thu jong asei uvin, hijong leh ‘extant rules’ dungjuiya apet pet a appointment hithei lou ahi, ati.

Thumna aneiyu hi gamsung mi officer ho tongkha louva gel peh dinga kitepna anei uvin chule state sorkar in dan aumsa toh kilhon a thumna ho vetlhah dinga jong asei uvin ahi. Khonung teng sorkar in simlai kiloikhomna chom chom in thumna anei ho avet/agel peh dinga jong state sorkar in kitepna aneiyin ahi.

Simlai kiloikhom hon jong hiche thu a state sorkar in kitepna aneina ho chunga alunglhai nau thu asei uvin chule hiche thu a sorkar tosot dinga kitepna aneibe uvin ahi. Simlai kiloikhom hon kinoptona soi kikai palkehna auma ahileh gamsunga boina, adeh a simlai kiloikhom ho a kon boina sangtah umding ahi, tin jong asei uvin ahi. Chief Secretary panmun ong ahi tan, bureaucratic position tuh a senior pen hi a gamsung mi officer ho akhel a lhen dinga simlai kiloikhom thalheng a pang lamkai hon aseiyu ahi.

Hetthei khat chu achesa 2018 kum a, state sorkar leh simlai kiloikhom hon point 6 umna kinoptona soi ana kaiyu ahi in, chief secretary panmun tuh dinga gamsung mi officer ho akilhen na dinga hatah a aseiyu ahi. Achesa 2018 kum a simlai kiloikhomna chom chom in hiche thumna aneiyu toh kilhon a boina sem louva kijotna anei jou uva state sorkar leh simlai kiloikhom hon MoU soi kaina chan aneiyu ahi.

Nagaland a covid-19 case thah 127 kimube, Nikhat sung a kimudoh tampen a kihe

Kohima, July 31: Nagaland Health department thuso khat in aseina achun tuni chun Nagaland a Covid-19 case thah 127 akimube e ati. Tuni a kimudoh ho chu Dimapur akon case 96, Kohima akon case 31 ahiuve.

Tuhin Nagaland a confirm case 1693 aphatan hichelah achun active case 1052 aum in mi 635 ho adamdoh tauvin chule mi 4 hon thina atoh tauvin ahi. Ni 2 sung in Nagaland sung ah case thah 180 akimudoh in hichelah achun Armed force mi 77 chule frontline worker mi 53 ajao uvin ahi.

Tuni ma chun mi 10 ho adamdoh tauvin Peren district akon mi 8 chule Mokokchung akon mi 2 ahiuvin recovery rate jong 37.51% aphatan ahi.

AIFUCTO in New Education Policy, 2020 adeilou

na thu sei; centre sorkar demna neiyu

Imphal, July 31(ET): All India Federation of University & College Teachers’ Organisation (AIFUCTO) in National Education Policy (NEP), 2020 sangtah a doudalna anei uvin, education policy semphatna kinei hin education sector abon a ‘privatize’ abol ding ahi, tin asei uvin ahi.

Gamsung pumpi mihem hinkho huhdoh nadinga akisah lel a chule gamsung kingapna economy aboi laitah a Central government in hiche hi amaho lunggel chepi nadinga phat gomkom a aman ahi. “Public sector thupi ho privatize bol nadinga tantih neilouva lunggel anei u ahi in, tua NEP hin system jouse private ahisah ding, democracy, secular, scientific leh inclusive education mu nadinga AIFUCTO thina chan a adilsuh sah ding ahi”, tin General Secretary Prof. Dr. Arun Kumar in soi akaina AIFUCTO thuso chun aseiyin ahi.

Market, Corporate leh fundamentalist force hon dinmun hi phat gomkom a aman uva Education system kibulphu na asuhmang diu ahi, tin jong aseiyin ahi. Teacher ho democratic rights chule institution autonomy hi chimlha ding ahi. Online system a themjilna leh themvetna akichepi hi commercialization kot kihon peh na ahi in, simlai tamtah in themjilna amu louding ahi, ati.

National Education Policy (NEP) hi ‘collective consensus’ ahipon chule AIFUCTO panna a stakeholder jouse ngaidan kilahkhom vetsahna jong ahipoi. Sorkar in policy aseilhah masanga achom chom dohna kinei ahi, tia asei hi mipi ajoulhep nau ahi bou uvin, amaho toh kisaina neiya lunggel akibah pi ho bou dohna aneiyu ahi. Sorkar in parliament phatsahna lah ding jong anga joulou hi ajeh amahon bou ahet ahi, ati.

“Policy a kikhelna kisem hi amin mai maiya ajep hoi nau ahi in, quality education toh kisaina umlou ahi. Affiliating system kilahdoh a, curriculum khel dinga provision hi nam chom chom chenkhomna jilkung ho khonung sangtah a akitohkhah na hiding ahi. NEP pumpi hi ‘centralization, communalization, corporatization leh commercialization’ a ding bou ahi”, tin thuso a chun aseibe uvin ahi.

 

Covid-19 natna nei lakh 10 vaal adamdoh tai: Health Ministry

New Delhi, July 31: India sung a covid-19 natna nei mi lakh 10 vaal lam in damdoh na anei tai tin Health Ministry akon thuso kimu chun asei in ahi. Special Duty, Health Ministry Rajesh Bhushan  akon thuso kimu chun asei na a state 21 lam ah positive mi hi percent 10 jong alhing pon ahi tin ana sei in ahi.

COVID-19 positive rate hi Rajasthan a 3.5 per cent, Punjab a 3.9 per cent, Madhya Pradesh a 4 per cent chuleh Jammu and Kashmir a 4.7 percent ahi tin ana sei in ahi.  Achesa nidan 24 sung a natna nei mi 32,553 lam jong lhadoh na ana kinei dan tahlang na ahung kinei in ahi. Tu le tua gamsung a damdoh na nei hi mi 10,20,582 lam ahitan ahi akiti.

Tu le tua hiche natna nei mi hi 5,28,242 lam ahi akiti. India sung a adamdoh mi lakh 10 val um hi kithang aat p thei tah ahin, hitabang dinmun a eihin dinsah u natong ho chung a kipa thu nasatah a sei ding ahi tin ministry akon thuso kimu chun asei in ahi. Niseh a damdoh na nei 30,000 lam aval hi ani 7 kijom ahitan,  damdoh na nei ho lah ahi Delhi (88.99 pc), Assam (76.68 pc), Telangana (74.27 pc), Tamil Nadu (73.85 pc), Gujarat (73.06 pc), Rajasthan (70.76 pc) le Madhya Pradesh (69.47 pc) ahi akiti. Hiche state ho adamdoh jat hi national average sang a tamjo ahi akiti. India sung a hiche natna toh kisai a mi thi jong hi gamdang asang a ahaa em a anem dan jong tahlang na ahung kinei in ahi. Thina toh hi Assam (0.25 pc), Bihar (0.60 pc), Andhra Pradesh (1.01 pc), Tamil Nadu (1.60 pc), Rajasthan (1.67 pc), Karnataka (1.91 pc) le Uttar Pradesh (1.98 pc) ahin, national average sang a lhom jo ahi akiti. Natna nei ho hi achesa nidan 72 sung a natna nei sa hotoh kitong kha ham ahi lou le atoh khah an ung u tongkha hiding in state ho hetsah na akinei in ahi akiti. India in tetst hatah a bolding tohgon anei toh lhon in July kipat lam a nikhat a mi 2.4 lakh lam test anakibol doh ji chu tuni in nikhat in mi 4.68 lakh lam test akibol doh thei tan ahi akiti.

 

CCpur District sung’a Covid +ve 306 lah’a 154 damdoh ta

B.Lalboi Gangte

CCpur, July 31 (ET):  Novel Coronavirus (COVID-19) natna CCpur District sung’a tuni nilhah lam nidan 5:00 chan’a positive 60 mudoh ahitoh hon’a agom’a COVID-19 positive mi 306 alhing tan ahi. Chuleh case 60 kimudoh lah’a numei ni hi Sadhbhavna Mandap Quarantine Centre, Khominthang leh  Saikot Govt. High School Quarantine Centre akon ahin, mi 3 hi Mini Secretariat Quarantine Centre akon chuleh adang 55 hi STC-BSF campus sung’a 113-Bn. BSF akon ahi.

CCpur District ah tuni chan’a positive case 306 lah’a  numei 97 leh pasal 209 ahi in hiche lah’a adamsoh pasal 72 leh numei 82 agom’a 154 alhing tan ahi. Hiche lou’a tuni chan’a velhah aum mi 5956 apha in, Sadmple kila jouse abon  in 10,459 aphata in, hiche lah’a Result sodoh ahi leh 10,196 apha in, Sample test result sohdoh nailou 263 aum in, Institution Quarantine Centre Circuit House ah tuhin   lupna 45 um nalah’a pasal 4 leh numei 6 aum in, Staff Quarantine Centre, Lingsiphai ah lupna 50 um nalah’a pasal 3 leh numei 3 aum in, Covid-19 Care Centre, NIELIT ah lupna 50 um nalah’a tuhin Pasal 30 leh numei 7 aum in, Contact tracing kibol  895 aum in, May 27, 2020 apat tuni chen hin ni 14 sung Home Quarantine chai mi 4567 apha in, CCpur district sung aum BSF holah’a Coronavirus vei apum be jeh in tuni bou ajong Case thah 55 apunbe jeh in, BSF personnel COVID-19 positive jouse abon vin 119 aphatao vin, BSF ho munpi khat STC/BSF, CCpur ah Quarantine Centre ding kichentah umlou jeh in Kendriya Vidyalaya (STC/BSF) ajah thei ding vin  Pawan Yadav IAS  District Magistrate & Chairman, District Disaster Management Authority, CCpur in phal na ape in, tuhin BSF personnel adeh’a 113Bn BSF akon Covid-19 Positive ho hiche mun’a vetkol aum u ahi.

Tuni’a CCpur district a COVID-19 Positive   mi 60 kimudoh lah’a  STC/BSF Campus sung’a busa  113-Bn BSF akon mi 55 ho  ahileh Polymerase Chain Reaction (PCR) pansa ah test kibol result pot ah positive ahiu vin, July 23, 2020 in District Magistrate in STC-BSF sung ah containment zone koi  vang in nat navei kimsuh lang mano lou’a  test bolphat jouse’a positive kibelap bejing ahi.

 

Sorkar in company hotoh Manipur a Chromite leh Limestone khot nadinga MoU soi akai alahdoh dinga YFPHR in ngehna nei

Imphal, July 31(ET): Manipur gamsung mun chom chom adeh a Ukhrul, Kamjong, Tengnoupal leh Chandel district a Chromite, Limestone leh mineral dang dang akikhot jeh a thinglhang gam sangtah a asuhkhah ding chule Manipur gamsung mi dihtah hon agam, achon leh akhan chule akihet nau (identity) amansah theiyu ahijeh a Indigenous Peoples of Manipur, Youth’s Forum for Protection of Human Rights (YFPHR) in hiche thu toh kisaiya MoU soi kaina umho alahdoh ding uva temna anei uvin ahi.

Sorkar in agamsung miho phatsahna la louva minerals khot nadinga pan alah a chule sum tong hol a company hotoh MoU soi akai hin khantou machalna dinga thulhuhna a sorkar in agamsung mi dihtah ho pan alah sah louna avetsah ahi, ati. Sorkar in M/s Sarvesh Refractories Pvt. Ltd, Rourkela, M/s Rourkela Minerals Pvt. Ltd, Rourkela, M/s Kotak Resources, Mumbai, M/s Gulf Natural Resources, Gurgaon, M/s Visa Steel Ltd, Odisha, M/s Manipur Mines and Minerals Pvt. Ltd., M/s Balassore Alloys Ltd, Odisha chule adang dang toh achesa 2017 kum a Chromite exploration and mining a dinga kinoptona soi akai ahi.

Chule M/s Super Ores, Guwahati, M/s Gulf Natural Resources, Gurgaon, leh M/s Ramung Enterprises, Imphal toh ‘Limestone exploration and mining’ a dinga soi akai ahi. Thinglhang gam asuhset uva, dam kisah jeh a vadung long asuhboi uva, railway line sahna dinga mol leh lhang ho asuhset uhi gamsung mi dihtah hon kihinso na dinga kingapna a aneiyu ahi in, hiche hi khantou machalna ding natoh kiti theilou, Right to Life, Rights to clean Environment, Right to Livelihood leh adang dang palkeh na joh ahi, ati.

Indian Bureau of Mines in Manipur gam a Chromite 6657 tonnes (66,57,000 kg) aume tihi photchenna anei ahitan chule mineral adang dang jong tamtah um ahi in, hiche hohi ikhot doh (mining) a ahileh mol umtalou ding, kihinso na ding vadung a twi umlou ding, gam go, chenna thei mun hilou ding, Manipur gam mi dihtah ho sangtah a atohkhah ding ahi, tia asei ahi, ati.

State sorkar in sum tong hol a company hotoh MoU soi akaiyu alahdoh dinga YFPHR in  ngehna anei uvin ahi. Limestone Mining hin Ukhrul, Kamjong, Tengnoupal leh Chandel district chule Manipur gam dang dang a gam leiset 37 sq.km asuhset thei chule Chromite Mining hin gam leiset 38.96 sq.km company hon asuhset ding ahi, tin aseibe uvin ahi.

 

Covid-19 jeh a Manipur a Lengthei 1.50 lakh Metric tonnes val mang ding a umta, State Government in agelkhoh ding a loubol mihon ngehna nei

H Goutinlien Gangte

Khousabung, July 31(ET): Kumlui 2019 a China akon hung kipan natna tijat umtah COVID 19 tia jong kihe Coronavirus in leiset kolning li a boina ana suohsah a adeh a economy dinmun nasatah a ana suhset banjom’a Manipur a jong Lengthei (Pineapple) 1.50 Lakhs Metric Tonnes (MT) val dangka Crore tamtah man chu amoh mansah dingin aum tan hiche hin state economy dinmun nasatah a ahin tohkhah keo hilouva Lengthei Lou bol a kihinso  mitam tah ho maban’a dinmun ding seithei louva aum toh lhon in state government in agelkhoh dingin Pineapple loubol hon ngehna anei uvin ahi.

Adeh a Manipur a Lengthei Lou bol tamna pen Churchandpur district sung aha tohkhah deh dingin a aum in, hiche district ahin Lengthei Lou bol a kivah farmers 1000 val aum in amao ho maban ding dinmun seithei louvin aum tan, tuhin Lengthei ahung minpan tan, hinla COVID 19 natna in phat nalang mano louva akhohset cheh cheh jeh’a government in gamsung Lockdown ana phondoh kit jeh in kum dang banga Lengthei johna aum ding tahsan aum pon Lengthei min phatsung hi August lha akon October gei ahi ji in, hinla COVID 19 in gamsung a Lengthei Loubol ho akasah dingin aum tan, hiche hi state government in hatah a agelkhoh’a amun muna cold storage ahilouva le atui heh a atuibeh a koitupna ding ham lampi khat agang theipen a agon angai in ahi.

 “Land of Pineapple” tia jong kihe Manipur a dinga Lengthei hung kondoh masatnapen leh Lengthei tamna pen a kihe Khousabung a cheng leh kumsot tah Lengthei a sumkolvei Nupi khat in Eimi Times ahetsah na achun kumdang a Lengthei 1.5 kg – 2 kg khat a dangka 30 leh 50 kikah a ana kijoh ji chu tukum hin dangka 10 jong alhung jou pon, Aman lhom keo hilouvin ajohna ding jong aum poi tin amitlhi akithei in, a Lou bolna sum leh pai dangka tamtah alut keo hilouva Gopi, Nisa noiya genthei tah a agahsoh ding kinepna’a kanatoh chu tukum a dinga mohman dingin aum tai ati.

Chuleh kumdang chun munchom chom’a kon Lengthei a sumkolvei mitam tah tah ahung ji uvin a Lou/Lei (field) a pehdoh nom hon ana kipedoh ji in, akijoh nom hon akiki joh uvin, hinla tukum hin koimacha jong ahung tapon, Lengthei la Amin/aphat akipan tan, johna ding aumlou jeh in apal/amin masa ho jong tamtah asie aumtan, tuhin jong dangka tamtah man amangpan tai tin jong aphongdoh in ahi. Ginchah umtah thulhut khat in aseina a, achesa niphabep masang chun Khousabung Community Hall a gamkai sunga Lengthei Lou bol hon meeting ana nei uvin gamsunga COVID 19 nat jeh a Lengthei joh thei lou dinga aum toh lhon a maban’a panlah ding dan le Lengthei Lou bol ho state government a compansation ngeh dingle Lengthei johdoh ahilouva le akoitup ding dan concerned authorities in agelkhoh peh dinga ngehna nei dingle thulhuhna dang dang ana nei uvin, hinla hiche thu kisut chan hin official tah a government a hetsahna anei nai pouvin ahi.

Directorate of Horticulture & Soil Conservation, Government of Manipur in aphondoh dungjui in 2014 – 15 kum gei chun Manipur gam’a Thei (fruit) jatchom chom (horticulture crops) gam 100.01 thousand hectares a ana kibol/kiching in hiche achun agom a 1159.03 thousand tones agahsuoh (production) alhung jouvin, hiche lah achun Lengthei hi atampen in horticulture crops 100.1 thousand hectares lah achun 26 % ahi ban’a production a jong atampen kit in 30% alhung joukit in, Chuleh Department of Horticulture and Soil Conservation, Government of Manipur leh NABARD in survey abol naova kon  Manipur thinglhang leh phaicham district 9 val a Area (ha) 2,77,064 val a Lengthei Lou kibol ahi dan KD Sharma Asst. Soil Conservation Officer Deptt. of Horti & SC Government of Manipur in Manipur Pineapple Festival Committee (MPFC) Souvenir Footprint 2011 achun ana phongdoh in ahi.

Kumlui 2019 a (India Council of Agriculture Research) ICAR Research Complex for NEH Region, Manipur Centre, Imphal in khuolchilna anei naova kon in 2017 – 18 kum sung chun Manipur a gam 14.15 thousand hectares a Lengthei akibol in hiche a production leh productivity chu 1.34 metric tones leh 9.47 t/ha alhung jouvin, ICAR in 2017 – 18 kumsunga Manipur a Lengthei Lou/Lei kiha bol dehna district ana lhendoh hole production leh productivity ana phondoh dungjui Churchandpur hi asangpen in aum in Area (Ha) 2500 a Production (MT) 25000 leh Productivity (t/ha) 10.00, district dang 3 hochu Bishnupur district a Area (Ha) 2034, Production (MT) 4456, Productivity (t/ha) 2.9, Chandel Area 645, MT 6335, t/ha 9.82 leh Imphal East a Area 1415, MT 18327 leh t/ha 12.95 ahi Dan ana phongdoh uvin ahi.

National Horticulture Board (NHB) in 2017 Kuma India sunga Lengthei dinmun ana phondoh na achun India state chom chom a gam 121.09 thousand Ha a Lengthei Lou bol ahin, agasuoh 2038.44 thousands MT alhung jouvin hiche achun Manipur a 13.54 thousand Ha a 126.43 thousand MT agasuoh lahkhom jou ahi danle India sunga Lengthei produced 45-49 % chu North Eastern region akon ahi tin ana phongdoh uvin ahi. Langkhat a Lengthei akon tua sanga hoijo leh phajo a state economy dinmun nasatah a semphat ding lungtup neiya Lengthei Lou bol miho jabol a tosotna hin nei jinga 2008 kum akon Manipur Pineapple Festival Committee tohgon na noiya state sung munchom chom’a Pineapple Festival ana um ji jong chu tukum hin aum ding tahsan aum pon, hinla tuchung leiset a COVID 19 nat jeh a Lengthei Lou bol ho boina nasatah a ato uhi Committee in hatah in agelkhoh in pan alahnathei chan a pan alah uva Lengthei Lou bol miho adinpi a atosot jing diuvin jong Committee lamkai ho chun Eimi Times ahetsah uvin ahi.