Manipur a Covid-19 natna a thi 22 lhingta; Imphal West district a...

Manipur a Covid-19 natna a thi 22 lhingta; Imphal West district a ‘sample collection team’ kikehlet be

96
0
SHARE

Manipur a Covid-19 natna a thi 22 lhingta; Imphal West district a ‘sample collection team’ kikehlet be

Imphal, Aug 22(ET): Manipur a Covid-10 positive case atam cheh cheh jeh a state injong Imphal West district a sample collection team akeh len be in, Covid-19 natna kal jing vetkol nadinga doctor 25 leh district surveillance team a akehlet be e, tin state Health Department in aseiyin ahi.

State surveillance officer in Imphal West a Covid-19 dinmun aphat tin a avetkol jing a, tanker driver ho ho test bol ding jong agon ahi. Protocol dungjuiya natna nei hotoh ikitohkhah (contact) ni 5-7 jouva test kibol ahi. Hiche jeh a positive case akimu na vengsung a apet pet a test akibol pai hi dihlou ahi in, ‘self-isolation’ hi athupi pen ahi, tin COVID-19 Common Control Room in Saturday nikhon thuso aneiyin ahi.

Saturday nikho a, CAPF personnel 22 panna a Manipur a Covid-19 positive case 83 akimu be in, hiche toh kilhon a gamsunga natna nei agom a 5132 lhing ahitai. Gamsunga Covid-19 nat na jeh a mi 2 athi be kit in, natna a thi jong 22 lhing ahitai, tin state health department in aseiyin ahi.

Covid-19 positive ahi kihet be milham 61 lah a Imphal West mi 26, Imphal East mi 17, Bishnupur mi 5, Chandel mi 3, Thoubal mi 5, Churachandpur mi 4 chule Kakching mi 1 apang in, Chandel a natna nei mikhat hi bou gamdang a kon hung kile ahi in, adang se hi kholjin lou ahi.

Saturday nikho a Thoubal district mi kum 70 a upa numei khat JNIMS facility a Covid-19 chule natna dang dang akop jeh a athi in, Saturday nikho chan a natna a thi mi 22 alhing tan ahi. Manipur a achesa July 29 ni a Covid-19 jeh a thi na toh masapen case anaum ahi.

Alangkhat a, RT PCR test akibol jouva mi 194 Covid 19 negative ahi tauvin ahi. Hiche toh kilhon a, gamsunga natna a kon dam doh mi 3455 alhing tan, hiche lah a hi CAPF 517 pang ahi. Chule recovery rate hi tu dinmun a 67.32 per cent a um ahi, tin thuso chun aseibe in ahi. Gamsunga active case hi CAPF 816 panna a agom a 1655 lhing um ahi.

Athah a Covid-10 positive ahi kihedoh ho abon uva Covid Care facility a achon tauvin chule contact tracing leh kivenna chom chom apan tauve, tin Additional director leh State Health Services spokesperson Dr Khoirom Sasheekumar Mangang in aseiyin ahi.

Health Department in ‘emergency’ a phone bol thei dinga Psychological Support –  8787457035, 9402751364, 76299435961, Hospital HelplineToll free number – 1800-103-2015 chule COVID-19 Common Control Roomhelpline number – 1800-345-3818 aphat tin a ahon ahi.

Xxxxxxxx

MHA in ‘inter-state leh intra-state guidelines’ ho phatah a jui dinga state Chief Secretary ho lekhathot pe

New Delhi, Aug 22: Union Home Secretary Ajay Bhalla in state Chief Secretary jouse henga lekhathot ape in, ‘inter-state leh intra state’ a thil pohna gari chule mi va le kha lou dinga aseiyin ahi. Bhalla in lekhathot apeh na a, gari lhai ho kikhah hi MHA in asodoh guidelines kipal keh na toh kibang ahi, ati.

“Intra-state leh inter-state a mi chule thil kipohna gari local level a akikha hin economy, supply chain leh employment’ asuhboi ahi”, tin lekhathot a aseiyin ahi. Gamgi khel a state dang a che ding hon achom beh a permission, phalna chule e-permit akilah u ngailou ding ahi, ati.

State chule district chom chom a ‘local-level’ a gari lhai akikhah e, ti thulhut Home Secretary in ajah thu jong lekhathot apeh na a aseiyin ahi. “Hitobang akikha hin economy activity leh employment aboi laitah a ‘supply chain’ atohkhah ahi. Hitia gari lhai akikha/akijah da hi Ministry of Home Affairs (MHA) in Disaster Management Act, 2005 noiya guidelines asodoh kipalkeh na ahi in, MHA guidelines ho phatah a jui ding ahi”, tin lekhathot chun aseibe in ahi.

Centre in achesa July nisim 29 nikho a Unlock 3.0 guidelines ana sodoh ahi in, coronavirus pandemic jeh a lockdown kikoi ol ol a akilahdoh na phase athum channa ahi. Hiche a hi intra-state leh inter-state gari lhai ding kiphal ahi. Guidelines hi August nisim 31 chan kichepi ding ahi in, sorkar in night curfew jong alahdoh a chule yoga institute ho akihon ding phalna apeh ahitai.

Guidelines thah dungjuiya, sorkar in rail operation chule mi tamtah kikhopna kin ho ‘ban’ abol nahlai ahi. Chule August lha kichai chan gei school, college leh education institution ho kikhah jom dinga jong kisei ahi.

Xxxxxxxxxxxx

CCpur Govt. College Founder (L) Dr. T.S Gangte het jing na song hondoh na kinei

B.Lalboi Gangte

CCpur. August 22 (ET): CCpur Government College Founder (Late) Dr. T.S Gangte hetjing nading in tunin CCpur Govt. College Campus ah ‘Bust and Memorial Plaque of Dr. TS Gangte’ hondohna ana um in ahi. Kingon phatsung’a Dr. Th Siamkhum, Principal, CCpur Govt College in ‘Bust and Memorial Plaque of Dr. TS Gangte’ hongdoh na anei in chuleh Elder. Pauzalun, Chairman, ESC in Pathen heng’a lhandohna aneiyin ahi. Dr. Th. Siamkhum in houlimna aneina’a Dr. TS Gangte Statue tundoh’a umhi CCpur Govt. College ding’a lolhinna tamtah analhut jeh’a  tuni chan’a College lhulouva um ahi. Chule pan halah najal’a khangdong tamtah Graduate hung um doh thei ahi ati.

Hiche toh lhon’a Dr. TS Gangte lim tundoh ahithei nading’a Project kigon natoh kisai’a Mangminthang Gangte, Finance in-charge in aseina’a project  hi koi Nam koi Tribe ti umlouva mimal kiphal ho tokhom akon kisemdoh thei ahi. Chule hiche lim kitun lo na ajeh pipen hi Manipur thinglhang gam’a Higher Education hin polut ahi naleh ama panlah nahin thinglhang miho ding’a melchit thei ahidan khangthah hon ahetthem theina ding’u deisah najeh’a kibol ahi ati. Dr. TS Gangte loinu Dr. Priyadarshni M. Gangte in aseina’a kaloipa (Dr. TS Gangte) hin thinglhang gam’a themjil na apohlut keu hilouvin Manipur State pumpi ading’a themjil na apohlut ahi. Chule hiche lim kitungdoh hi athi kal kum 13 lhin nikho hetjing nading’a achesa July 29, 2020 nikho’a hondoh ding anahi tan ahin Covid-19 natna jeh’a aphat cha’a ana kihongdoh theilou ahi ati.

Hiche kingon achun Gangte Tribe Union, Gangte Tribe Council, Gangte Literature Society, Gangte Youth Organisation leh Gangte students Organisation, KSO-Ghq, KSO-CCp, SSPP-Ghqs, Zillai-Ghqs, GSO leh CCpur Govt. College Students’ Union chule CCpur College a staff ho jaonan angailu mitam tah anakikhom uvin ahi.

Hetthei khat chu Dr. TS Gangte (Thangkhomang Selpho Gangte) hi (L) Lalzalien Gangte leh Thangkhonieng chapa ahin amahi Nov. 30, 1932 a anapeng ahi. Ukhrul a ME School a Class VI chan asim in, 1954 in Johnstone High School, Imphal a Class X achai in, 1959 in St. Anthony’s College, Shillong a Graduate anachai ina hi. Hiche jou 1963 kum in  Delhi School of Economics, University of Delhi a Sociology subject ah Master achai in 1990 kum in Anthropology Department, Calcutta University, West Bengal in Doctor of Philosophy hina nakipe in ahi. Dr. TS Gangte hi Council of Higher Secondary Education, Manipur; Director of Education (University and Higher Education); Board of Secondary Education, Manipur a Founder Chairman jong ahin chule Manipur thinglhang gam ading’a College um masapen Churachandpur Govt. College a Founder Principal ahi naban’a Gandhi Memorial High School, Molnom, Ccpur ajong Founder Headmaster anahi. United States a Higher Education System ajil naban’a Moreh College, Moreh; Maram College; Bethany Christian Higher Secondary School, Ccpur leh Rayburn  College, Ccpur phudoh nading’a pan anala khat jong ahi.

xxxxxxx

Assam Rifles hon mun chom chom a khamnathei tamtah man

Imphal, Aug 22(ET): Assam Rifles hon HG IGAR (South) noiya Saturday nikhon Tengnoupal MVCP chule Khudengthabi Check Post a thilsoh chom chom a khamnathei tamtah aman uvin ahi.

Saturday jingkah nidan 9.30 don a Tengnoupal Battalion hon routine check abol nauva Imphal lang jon a che Echo Van (registration number ML 02 G 0376/white colour) khat alamtin uvin, gari phatah a akhol nauva dangka lakh 48 vel man lhing savon bom 23 a kikoi ‘brown sugar’ hidinga ginmo amudoh uvin ahi. Gari a hi Myanmar lou packet 152 jong amudoh uvin ahi. Gari hi S Molcham kho, Churachandpur a cheng Letkhohao Haokip (35) in atol ahi.

Thilsoh chom khat a, Tengnoupal Battalion team hon Imphal lang jon a che Alto car (regd.no WB 20 Z 0716/ grey colour) khat akham uvin, gari phatah a akhol nauva dangka lakh 45.2 vel man lhing ‘brown sugar’ packet 18 gari sunga kisel amudoh uvin ahi. Gari hi District Headquarter Tuibuong, Churachandpur a cheng Lamkam Baite (49(, s/o Khupsei Baite in atol ahi.

Akiman thil hohi Churachandpur a apoh u ahi in, akiman teni chule thil ho police station a maban thukhol dinga apedoh tauvin ahi.

Thilsoh chomkhat a Assam Rifles hon HQ IGAR (South) lamkaina noiya Khudengthabi Check post a kon khamnathei tamtah aman uvin ahi. Saturday jingkah nidan 9 don a Tengnoupal battalion hon thuguh amu dungjuiya Maruti Eeco Van (regd.no WB 02 AD 1637 (silver colour) khat alamtin uvin, gari hi Lilong Chingkham Makha, Thoubal district a cheng Nurul Hasan (30), Noor Md. in atol ahi.

Gari phatah a akhol nauva dangka lakh 80 vel man hidinga ginchat ‘brown sugar’ packet 34 kisel amudoh uvin ahi. Akiman mipa chule thil ho Moreh police station a maban khol dinga apedoh tauvin ahi.

Xxxxxxxxx

India a Covid-19 natna nei 69,878 kimu be, natna nei million 3 val ta

New Delhi, Aug 22: India gam a Covid-19 positive case million 3 aval tan, US leh Brazil gam ban a natna akisei khoh na pen gam athum channa a apang jing nalaiye, tin Union Health Ministry data in Saturday nikhon aseiyin ahi.

India gam a coronavirus case million 2 alhin nikho 15 jouva million 3 lhing pai ahi in, achesa August nisim 7 nikho a covid-19 case million 2 ana val ahi. India a tu leh tua hi case agom a 30,05,281 lhing a chule Maharahstra gam hi case kisei khoh na pen state (6,57,450) hijing nalaiya, aban a Tamil Nadu (3,73,410) leh Andhra Pradesh (3,45,216) hi ahi.

Achesa nidan 24 sunga Covid-19 case athah 69,878 akimu be in, nikhat sunga natna kimu be atamna pen ahitan chule hiche phat sung ma ma a natna jeh a thi case 945 akisei be e, tin Health Ministry in jingkah nidan 8 don a report update abol na a aseiyin ahi.

India gam a active case agom a 697,330 hi a chule natna jeh a thi 55,794 lhing ahitai. Recovery rate hi 74.69% a kal a chule achesa nidan 24 sunga Covid-19 natna nei mi 63,631 adamdoh toh kilhon a discharged kibol ahi. Tuni chan geiya coronavirus natna a kon adamdoh jat hi 2,222,577 lhing ahitai.

Sars-Cov-2 natna nei akihetdoh na dinga India gam in nikhat a test million khat abol doh tan, machalna sangtah ahi, tin health ministry in ahi. “Test a kon natna nei ho akihetdoh vah a, home isolation chule quality medical case peh a phatah a akijen jeh a achesa nikho 21 sunga natna a kon adamdoh jat (recovered case) hi 100% a kal ahi”, tin ministry in aseiyin ahi.

India gam a ‘case fatality rate (CFR) hi global average noilang a umjing ahi, tin Health Ministry in aseibe in ahi.

Xxxxxxxxx

Punjab, Haryana leh Chandigarh in ‘Weekend Lockdown’ chepi

Chandigarh, Aug 22: Punjab, Haryana leh UT Chandigarh a niseh ngaichat thil khoh ho kijohna tilou dukan adangse Saturday nikhon coronavirus case akal cheh cheh jeh a akhah tauvin ahi. Punjab sorkar in achesa Thursday nikho a khopi leh town jouse a ‘weekend lockdown’ phondohna anei ahi in chule alangkhat a, Haryana leh Chandigarh injong angaichah khoh ho kijohna dukan tilou adang se kha dinga thuphon anei ahitai.

Punjab, Haryana leh UT Chandigarh in agamsung a coronavirus case akal cheh cheh jeh a dan akhousah cheh cheh ahi. Punjab leh Haryana a Covid 19 positive agom a 39,327 leh 52,129 lhing a chule Chandigarh a tuchan geiya Covid-19 positive case 2,631 lhing ahitai.

State chule capital (Chandigarh) a thil khoh kijohna hilou dukan adang jouse natna vetkol jou nadinga akhah uvin, nidang a toh tekah dinga lamlen a vah le jong alhom in ahi. Khopi sunga lockdown kitup tah a akichepi thei na dinga police jong alhing a akoi uvin ahi. Punjab gamsung Phagwara a Cloth Merchand Association president Ashok Kultham in dukan hon guidelines phatah a ajui ding ahi, tin aseiyin ahi.

“Dukan jouse kakha u ahitai”, ati. Mask kibol lou ho chunga action khoutah lah dinga police hon thuhilna anei uva chule night curfew palkeh ho gari jong amat peh uvin ahi. Hoshiarpur a jong lou, anche, bongnoi leh akhoh khoh kijohna dukan ho tilou adangse akikhah in, Section 144 khoutah a achepi uvin ahi.

Senior Superintendent of Police Navjot Singh Mahal in mun chom chom a athu hillhang nadinga ‘flag march’ akibol e, tin aseiyin ahi. ‘Weekend lockdown’ tilouva a Punjab sorkar in night curfew jong nidan 2 aphat suhsaobe a, jan nidan 7 a kon jingkah nidan 5 chan khopi jouse a chepi dinga asei ahi. Restaurant a ‘home delivery’ bou kiphal ding chule Punjab leh Haryana ani a ju kijohna dukan ho kihong ding, hijong leh Chandigarh a hitobang dukan ho ‘weekend’ a kikhah ding ahi.

Xxxxxxxxxxx

Thoubal district a Canara Bank jong kikhah kit ta

Thoubal,Aug 22 (UNA): Canara Bank, Thoubal branch a natong branch manager khat Covid-10 positive ahi Saturday nikho a akihetdoh jouva office building pumpi nidan 48 sung kikhah ding ahitai, tin Thoubal Deputy Commissioner in thuso aneiyin ahi.

Thoubal DC in gamkaiya Covid-19 pandemic jeh a boina vetkol jou nadinga hitobang order asodoh ahi. Natna nei branch manager toh kimuto (primary contact) ho jousen District Surveillance Officer, Thoubal a angaicha ‘contact tracing exercise’ a dinga report abol diuvin jong thupehna aneiyin ahi. Chule Bank Manager in office ahon kit masanga protocol dungjuiya building abon a ‘disinfect’ abol dinga jong thuhilna apeh be in ahi.

Hetthei khat chu SBI Thoubal Branch a staff khat jong Covid-10 positive anahi jeh a Wednesday nikho a kon nidan 48 sung office building abon a kikhah ahi. Alangkhat a DC Thoubal in Saturday nikho a order achombeh khat asodoh na a, JNIMS hospital a Saturday nikho a Thoubal district mi Covid-19 natna jeh a athi nu achapa khat in mopohna nei authority ho henga anu thi lhah na kin hi SOP guidelines jui pum a Yairipok Singa Qabarstan a kin neipeh dinga ngehna anei ahi.

Hiche jeh a Medical Superintendent, JNIMS in thilong hi achapa khut a pehdohna aneiya, insung kinaipi khat in jong ajui dinga aseilhah ahi. Order dungjuiya, CMO Thoubal in thilong hi JNIMS, Porompat a kon thi lhahna kin kiman nading chan ambulance a apoh nading agon ding chule natna akilahson to louna dinga protocol leh kivenna ho ajui dinga jong asei ahi.

SP Thoubal in protocol phatah a kijui hinam ti vetkol nadinga security agon ding ahi. DC Thoubal in order aso dungjuiya, thilong kipohna chule akigo na ding mun a dan khoutah a jui dinga asei toh kilhon a Saturday jan nidan 6.30 a thilong lhahna kin achapa ngehna dungjuiya chelha ahitai.

Alangkhat a, Charangpat Mamang Leikai, Wangkhem assembly constituency a ‘containment’ kikoi Saturday nikhon DC Thoubal in order asodoh dungjuiya aladoh tauvin ahi. Contact ho test akibol a, negative ahiu chule dan dungjuiya ‘discharged’ akibol jouva ‘containment zone’ a phondohna kiladoh ahi, tin order chun aseibe in ahi.

Xxxxxxxxxxx

Sanskriti Magazine in Ukhrul panna a North East a tribe phabep Mahabharata toh kisaina neiya sei

Imphal, Aug 22: Hindu based online magazine Sanskriti magazine in ‘North-East Tribals and thei connection to Ancient India’ kiti article asodoh nauva Northeast gam mi dihtah hi a tribal hohi Mahabharata leh Ramayana a apang uvin, tradition ajui nahlaiyu ahi, tin asei uvin ahi.

Article a hi Manipur gam a um Ukhrul hi Arjuna jinu toh kisaina neiya asei uvin ahi. “Ukhrul, Manipur hi Arjuna jinu Naga Uloopi toh kisai ahi in, amahin Bhabhruvahana nu-no hina chule Arjuna hinkho huhdohna a pan lentah alah ahi. Iravan hi Arjuna leh Uloopi chapa ahi in, Tangkhul tribe hohi martial arts a kihe minthang chule Nagalim sovereign state sem doh ding deiya NSCN member 40% val hiu ahi”, ati.

India a indigenous tribe amaho hi India a um hiu ahi in, British empire in vangset umtah a akhendoh a, asuhnem a, amaho hou chule lunggel akoikhum u ahi. Christian Missionary ho chule China a kon Maoist hon North-East hi India toh khen ding agot ahi, tin Hindu based magazine in aseibe in ahi.

Ukhrul district hi Tangkhul Naga ho chenna ahi in, Arjuna ahilouleh Mahabharata toh kisaina ima aneilou ahi. Sanskriti magazine researcher hon Mahabharata a Naga thucheng kimang hi ahetkhel jeh uva asuhkhel u lentah um ahi. Naga kiti thucheng hi Naka kiti abil vut ho a kon kiladoh ahi in, 5th grade honjong google a ahol a ahetdoh thei ahi.

Article a kipe dungjuiya Mahabharata toh kisaina neiya North East tribe ho lah a Idu Mishmi tribe (Arunachal Pardesh) jong pang a, Krishna jinu Rukmini lineage a kisei ahi. Meghalaya a Khashi tribe hojong thal kap them a kihe minthang ahi in, Khasi tribe atamjo in Eklavya ajah khah louvanga thusim lui (legend) dungjuiya amaho apu apa khang a mikhat in akhutpi hi Guru Dakshina a apehdoh jeh a thalkap na a akhutpi u aman ngai louvu ahi, tia kisei ahi.

Nagaland a dinga khopi lenpen Dimapur ahi in, mi phabep in hiche thucheng hi Hidimbapur kiti Mahabharata a Bhima jinu leh Ghotokacha anu Hidimba khopi kiseina ahi, tia atahsan u ahi. Kachar dynasty hi Mahabharat a kisei Kirat dynasty chilhah a kisei ahi. Assam gam a Bodo tribe ho jong Brahma chilhah ahiuve, tia kiseiya, Christian a lut lou ho se hin Brahmoism ajui ahi, kiti ahi.

Karbi hon Sugriva chilhah kahiuve, tia aseiyu ahi in, Sita Mata (purthemi Kungripi) hol a Northeast a kahung uva Ayodhya a kakile tahlouvu ahi, tia ‘Sabin Alun’ kiti Karbi version ‘Ramayana’ a kisei ahi. Article kijih hi North East India a um tribe ho ‘saffronise’ bol nadinga tohgon hoilou tah ahi.

XXXXXXX

Education Minister in simlai kiloikhom thalheng ho kimupi

Imphal, August 22(ET): State sung a athah a kisemdoh National Education Policy, 2020 hi hoijo cheh a chesah thei nading lampi seikhomna  Education Minister Dr. Thokchom Radheshyam leh simlai kiloikhomna thalheng hon tunichun Samagra Siksha, Manipur Conference Hall ah anei uve.

State sung themjil lam semphat nadia simlai kiloikhom ho panlah dan jong Minister in pachatna apen ahi.

Radheshyam in athahbeh a kisemdoh education policy het them a phatah a gamsung a chesah ding tupna a tuni kihoukhomna hi kigong ahi in, simlai thalheng hon ngaidan phatah tah ahin luidoh diu kinep ahi e, ati.

Education policy athahbeh a kisemdoh hi hetchen a gamsung themjil lam jong ahoipen a semdoh thei nading in Department of Education in amun mun a kihoukhomna agon jing ahidan jong Minister chun atahlang e.

National Education Policy, 2020 dungjui  5+3+3+4 tia themjilna cheding abanle class 5 chan nupao a kihil ding tohgon hi phatchompi tei nadia pan la cheh ding in minister chun stakeholder ho temna jong anei ahi.

Tuni kihoukhomna a chun Commissioner, Education-S, Shri T. Ranjit Singh; Director Education (S) Shri L. Nandakumar Singh; Additional Director, Education (S) Hills, Shri Lerte Hmangte Kom, Additional Director, Education (S) Valley, Smt. Ch Sachi Devi, abanle akisaipi department official ho apang cheh un ahi.

Xxxxxxx

Darjeeling MP in Manipur CM kimupi

Imphal,  Aug 22(UNA): Manipur a cheng Gorkha nam le chon le khan machal thei nading autonomous body khat semdoh ding in Darjeeling Member of Parliament Raju Bista in Delhi a tunia Manipur Chief Minister N. Biren Singh akimupi pet chun ngehna aneitan ahi.

Autonomous body chun Manipur a cheng Gorkha nam, chon le khan chule simlai ho achintup a ahin khantou sah thei ding ahi e tin Darjeeling MP Raju Bista chun Manipur CM akimupi pet a chu asei ahi.

Darjeeling MP Raju Bista office a kon thusodoh chun MP Raju in Manipur CM kom a Gorkha ho ham le pao chon le khan chule thusim chintup ding apoimo na ho akihoulim khom pi ahi, ati.

Manipur a kum 200 val hung khosa Gorkha ho hin lou lho, thingpoh le galsat nalam a Manipur khantou machal nadia pan anala jing ahi ban a achesa August 20, 1992 kum a consitution VIIIth Schedule a Manipuri leh Gorkha/Nepali pao pansah nading boipi a jong Manipur mipi toh Gorkha ho ana pang khom ahi, ati.

Raju Bista in Manipur Assembly a N Biren Singh makaina BJP government goljona achan akipapi ban a ngehna anei ho Manipur government in khohsah tah a ahin tohdoh ding akinepna jong aphongdoh in ahi.

Xxxxxxxxxx

India in nikhat sung a Covid-19 natna lakh 10 sang a tamjo patepna aboldohjou hi kidangtah ahi

New Delhi, Aug 22: Nikhat sung a lakh 10 sang a tamjo patepna aboldoh jou tolhon a India in tuchan a patepna aboldoh jat hi crore 3.4 aphatai tin Union Health Ministry thuso chun asei e.

State le UT hon patepna aboldoh thulhut apeh ho a pat natna nei lhomsuh dan jong het thei ahi e, ati.

Hiche hi thildang hilou in natna nei ho gangtah a chomkoi le aphatcha akijen jeh a natna jong lhomsuh ahi e tin ministry thuso chun aseiye.

Mi 10,23,836 ho sample jannia kila lah a lakh 3.8 ho rapid antigen test kibol ahi.

Centre, state le UT hon patepna abai pen a dia agondoh a pat patepna boldoh jat jong tamlheh jeng ahi e. India pumpi a patepna hi private lab 528 le government lab 983 agom 1511 lab a akibol thei jeh a niseh a patepna kibol jong tam ahi.

Nikhat sung a natna nei hetdoh 69,874 pum a India a Covid-19 natna nei hi 29,75,701 vel ahi in hiche lah a nikhat sung a 945 thina toh pum India a Covid-19 natna a thina toh jong 55,794 vel ahitai tin thulhut chun aseiye.

Xxxxxxx

Delhi Hospital in numei khat a pat kg 50 gih Ovarian Tumor alahdoh hi kum 30 phatsung a khatveina ahinalai e tia louthem hon sei

New Delhi, Aug 22: Natna hise umlai ahivang in tahsa kum 52 numei khat a pat kg 50 a gih Ovarian tumor lolhingtah in Delhi private hospital louthem hon aladoh un ahi.

Indraprastha Apollo Hospitals in lamjot le imut hahsa, kongnat nei le hai kisuhlou a um damlou nupi nu dinmun kholchil a pat ovary a aboh um chun anehlut ho asuhmin theilou le giljang na hen hun a um ahi hetdoh ahi in, hitobang natna hi kum 30 sung in jong katoh khapoi tin Dr Arun Prasad, Senior Consultant, Surgical Gastroenterology & Bariatric Surgery chun asei e.

Hitia natna chun lha phabep sung a damlou nu gih jong kg 106 aphahsah a abanle  haemoglobin jong 6 a kheh lo chu nidan 3 le akehsung a kg 50 gih aboh chu louthem hon alahdoh ahi.

Prasad in numei nu tahsa a pat laparoscopy manchah sutlut nading gei aumlou phat a tahsa ki-at a aboh chu Gastroenterology, Gyanecology le Anesthesiology louthem ho kithokhom a pat lolhingtah a lahdoh a um ahi, ati.

Operation makai Dr Abhishek Tewari in asei na ah vangphat umtah a aboh chu anemkhah jeh a gangtah a damlou nu jong damdoh vah ahi in, operation kichai in atahsa gih jong kg 56 bou ahitai, ati.

Chule Dr Geeta Chadha, Senior Consultant, Gyanecology le Obstetrics in ovary ima boilou natei dia chingthei tah a operation kibol ahi e, ati.

Damlou nu jong hatdoh a tunilhah lam a hospital a pat potdoh ahitai.

Xxxxx

Tuhtang mokei a PDS anchang lahdoh le homdoh hijing

Imphal, August 22(ET): COVID-19 natna hise umlai a nehngol umlou tei ding tupna in State Government in PDS noi a anchang mipi lah a homding in aladoh jing un ahi.

Hitolhon in August 21, 2020 nichun August lha a PMGKAY noi a Imphal West district assembly constituency 3 a homdoh ding anchang quintal 4903.65 lahdoh ahi in, hiche lah a Sagolband AC a ding quintal 1431.3, Konthoujam AC a ding quintal 1804.25 chule Wangoi AC a ding quintal 1668.1 ahi e. Chule district sung a gampam mi natong a um mi 815 ho a din anchang bag 41 hompih ahi e.

Sangaiprou FCI godown a pat August 21, 2020 ni chun NFSA noi a July lha Tamenglong AC a homdoh ding anchang quintal 864.2 pohdoh ahi in, chule PMGKAY noi a Churachandpur AC a ding August lha anchang quintal 1381 le Thanlon AC (Mualnuam) a homdoh ding Chana Whole quintal 16.49 jong August 20, 2020 nichun pohdoh ahi e.

Kakching district a PMGKAY noi a WholeChana July le August lha a Hiyanglam AC a homdoh ding quintal 87.95, Kakching AC a ding quintal 92.52 leh Wabagai AC a ding quintal 102.50 August 20, 2020 nichun pohdoh ahi e.

Thoubal District sung Wangjing Tentha AC a PMGKAY noi a September lha a homdoh ding anchang quintal 2051.30 chu August 19 le Wangkhem AC a ding quintal 1830.60 jong August 20 nia pohdoh ahi e. Hiche ban a PMGKAY anchang quintal 3881.9 jong  WangjingTentha AC le Wangkhem AC a hom ahi nalai e.

District jouse a dia anchang homdoh ding  State Government tohgon hi kipapi umtah ahi.

Xxxxxx

Chanvou kibang pehthei nadia Centre in National Council for Transgender semdoh

New Delhi, Aug 22: Nukiso hon gamsung vaihomna pan alah thei uva government a kon chanvou ho kibang a amuthei nadiu tohgon boipi ding in Centre in National Council for Transgender asemdoh tan ahi. Hiche hi Transgender Persons (Protection of Rights) Act, 2019 dan noi a Centre in asemdoh Friday jan a gazette a sohdoh ahi.

Hiche council chun nukiso ho ventup nadia ngaicha dan le chanvou kibang amuthei nadiu abanle department jouse a nukiso ho chanvou um ho holdoh ding a mopohna peh ahiuvin, nukiso ho thalheng, state 5 leh Centre department 10 ho palai a pang diu,  Union Minister of the Ministry of Social Justice and Empowerment chairperson hiding, anoidou chu vice-chairperson a pang ding abanle Ministry of Health and Family Welfare, Ministry Home Affairs, Ministry of Housing and Urban Affairs, Minority Affairs ministry le Rural Development ministry a pat thalheng ho jong palai a pangding ahiuve.

State government le union territories thalheng palai ho kilhah tho diu, sah, lhum, lhang le so le north east a pat nukiso thalheng mi 5 jong palai a pang diu ahi.

Nukiso a pat thalheng Meera Parida in hahsatna kitoh ho le asuhlhap na ding lampi umthei ho government kom a pehlut ding hi kamopohna pen ahi, ati.

XXXXXXXX

ThePrint in Nagaland Political Issue phabep ana kahlha

New Delhi, Aug 22- Founding Editor, ThePrint, Shekhar Gupta in Clutter episode 555 ana kahlhah khah toh lhon in Muivah in sah solam gamkai lhangsung kikhel na le khang thusim dihtah hilou a semthu a alhangsung ahin khel dan thu ana sei in ahi. Editor pa chun Muivah in ana toh na A Nagland khang thusim dihtah ahin pohdoh jou loudan tahlang na ana nei in ahi. Editor pa lekha sut chu retired IAS officer, Khekiye K. Sema geldan ahi dan jong tahlang na ana kinei toh lhon in framework agreement hi ahung chimlhah ding dan jong tahlang na ana neiin ahi. Shekhar Gupta in Naga thu chung chang a thil thum tahlang na ana nei in ahi. AKipatna pen in Gupta in Naga ho in atup u Naga gamsung chamlhat na gam ahidan atahlang na u pompeh na ana nei pon, ani na a Naga ho in August nisim 14 chamlhat nikho a kiman thu chuleh Naga mite in India akon chamlhat na muding le chang a kivaipoh ding chung chang thu ahi. Hiche thu chung chang hop hate a kisei lhah na akinei lou le Naga thu kichai thei louding dan jongtahlang na ana nei in ahi. Gupta in Naga thu boina chung ahin Muivah doi le tup bou ana vesui in chuleh anungjui NSCN-IM sung a Tangkhul hobou ahidan thu tahlang na ana nei in ahi.  Muivah le anungjui Tangkhul ho in Ukhrul khopi sung le akimvel munpi a anei uva Naga dang ho ding gel lou a asung a Tangkhul ho let nading le phatchom na ding bou atup dan jong tahlang na ana nei in ahi.  Gupta in Sumi tribe akon NSCN-IM chairman a pang Isak CHisi  chung chang thu an ajao sah loudan adei bang tah a Muivah toh kangtup na ana neina chung ahi deman jong hung kinei jing ahi.

Xxxxxxxx

Parathenium Awareness kibol kikhum khata

Imphal, Aug 21:  Krishi Vigyan Kendra Imphal East lamkai na noi a achesa August nisim 16 akon “Parathenium Awareness” Imphal East sung mun chom chom a ana kibol chu tuni in khumkha ana hitan ahi. Hiche programme khumkha na kingon achun Program Co-ordinator S. Monibala makai na noi in District sung a Porompat DC road, Minuthong Khurai Tejpur, Sawombung, Lamlai, Soubungkhok, Yaingangpokpi, Keibi Sagolmang, Yumnam Khunou, Pangei, Waiton, Heingang, Mantripukhi, Irilbung Yairipok, Kongba le Bamol leikai ho a awareness pehna ana kinei in ahi. Tuni programme kibol naho achun KVK Imphal East team ho in mipi hoc hung a hilchet nale programme toh kisai a het ding a lo mho hetsah na ana nei utoh lhon in angai jouse in jong ahelou ho ang a seipeh na anei diu dan kitepna ana nei uvin ahi.

Xxxxxxxxxxxxxxxxxxxxxxxx

TYA Bengaluru in lamkai thah lhendoh na le lemna kingon ana nei u

Bengaluru, Aug 22: Thadou Youth Organisation, Bengaluru in Lakshmipuram, Indira Nagar, Bangalore a um Rocky inn mun a lamkai thah kilheng ho kihatsel na kingon ana nei uvin ahi.

Lamkai thah kilhengdoh ho chu, H. Shonkhomang President, Thang David  Vice president, Lunkhohao General Secretary, Paosonlal Rocky Joint Secretary, K. Lamneineng  Finance Secretary, Naomi Kipgen, Asst. Secretary,  Janglam Games and Sports Secretary,  Zohn Lalboi, Info & Pub Secretary,  Satminlun Art and Culture Secy., Sonlenmang Asst. Secretary chuleh Thonglam John  Senior Advisor ahiuvin ahi. Hiche kihatsel na kingon chu Thang david, Vice president TYA-B makai na noi a ana kibol ahin. Pastor Haopu, EBCC&F in lamkai thah kilheng ho chu taopeh na ana nei in ahi.

xxxxxxxxxxxxxxxxxxxx

Nagaland a mi covid-19 positive thah 16 um be

Kohima, Aug 22: Tuni in Nagaland sung ah covid positive mi 16 in ana punbe in ahi. Tuni a athah beh a positive hiho pum in state sung a positive case hi agom in 3,635 lam alhing tan ahi akiti. Tuni a case thah ho lah achun security force 9 ajao uvin ahi akiti.  Sepai 9 lah achun 8 ho chu Kohima akon ahiuvin ahi akiti. Tuni a positive ho chu Kohima akon 12, Tuensang akon 2, Wokha le Longleng akon 1 cheh ahi. Case thah 16 ho chu sample 723 ana ki test na a hetdoh a ana um u ahi. Alangkhat a tuni a state sunga  covid akon damdoh mi hi 92 ana lhing in ahi akiti. Nagaland health minister S Pangnyu Phom in asei na a adamdoh lah a mi 72 chu Kohima akon ahin, Dimapur akon 18 ahi in chuleh Peren akon 2 ahi ati.

Xxxxxxxx

BSF hon India-Pakistan gamgi a mi 5 ana kap lih

New Delhi, Aug 22: Border Security Force (BSF) ho in tuni in Pakistan akon India hung lut kigo mi 5 Punjab Tarn Taran district sung a ana kap lih uvin ahi. BSF 103rd  battalion ho chun akikap lih ho akon in AK-series rifle khat le pistol khat jong ana mudoh uvin ahi. AKikap lih ho chu Bhikhiwind sub-division sung a um Dal khosung a ana kap lih u ahi. Thilsoh chu Dall kho gamgi a jingkah lam nidan 5 vel a mi ahung lut kigo hetdoh ana hitoh lhon a BSF ho in ana dal lut u ahin,  ana dal lut na uva meipum ahin lha utoh lhon a kile thu na a hiche mi ho chu ana kikap lih kha ahi akiti.  Tu chan in ahunglut ding dang umnalai ding ham ti in kholchil na akinei jing nalai in ahi.

xxxxxxxxxxxxxxxxXxxxx

Mahatma Gandhi mitbeh UK a dangka 2.5 Crore a kijoh

London, Aug 22: Mahatma Gandhi in mitbeh sana a ana kisem chu Britain a dangka £260,000 ($340,000  ahilou le 2.54 crore) in ana kijoh in ahi. East Bristol Auction akon thuso kimu dungui in hoche mitbeh chu mi khat in letterbox a ahung koi ahin,  ahung koipa apa et ho khat hi Gandhi in ana peh hiding in akisei in ahi akiti. Hetthei khat chu Gandhi hin athil alo hohi angaicha ho ang a pehdoh na ana nei jing ahi. Auction house in ana sei na uva Gandhi in hiche mitbeh chu achesa 1920 le 1930 kikah a South Africa sung a British petroleum a natong khat ang a ana peh ahi akiti. Auctioneer Andrew Stowe in asei na a ahung pe pa hin na joh lhah lou ule pei mang jeng uvin ati in ahi ati.

xxxxxx

Assam in covid-19 doudal na a kal kichai na lockdown kinit

Guwahati, Aug 22: Assam in tuni in covid-19 doudal na ding in kal kichai hitoh lhon in lockdown ana nit uvin ahi.  Guwahati sung a jong lockdown kinit toh lhon in koima pam in ana pot pou vin ahi. Hetthei khat chu achesa August nisim 14 nikho a state govt in August nisim 16 akon 31 channa juiding dan phondoh na jong ana nei u ahitan ahi. Govt in hiche phatsung a phal ding le phal louding thil ho jong phondoh na ana nei uvin, til a sang a thil phabep lha ong ding ahidan jong tahlang na ana nei uvin ahi.

Xxxxxxxxxxxxxxxxxxxxxxxxxxxxxxxxxxx

Covid Vaccine sem company 3 lam umtoh lhon a India in Coronavirus doudal na a pan nasatah a lading

New Delhi, Aug 22: Tu le tu in India sung a vaccine ni phase 1 le 2 trail kibol jing lai ahi toh lhon le adang khat semjing ahi toh lhon in India in panmun sangtah ahin nei ding dan in ahung kilang in ahi. India sung a COVID-19 vaccine masapen “ Covaxin”  chu Hyderabad-based vaccine sem Bharat BioTech” in asem a  Indian Council of Medical Research (ICMR) in vetsui na anei ahin chuleh National Institute of Virology (NIV) in phase one achai tah toh lhon a phase 2 kipat vah ding dan jong hetsah na ahin nei uvin ahi.  Vaccine dangkhat Zydus Cadila inasem “ZyCoV-D” chu achesa August nisim 6 akon a phase 2 ana kibol pat toh lhon in kichai bei dig ahitan ahi akiti. Oxford-Astrazeneca vaccine jong chu 3rd phase akibol tah toh lhon in “Covishield” tia kimin vo ding, Pune based Serum Institute of India(SII) in 20-30 lakh dose lam ahin sem ding u ahi akiti. Parliamentary standing committee, home affairs ang a Indian Council of Medical Research (ICMR) Chief Balram Bhargava in ahou limna a hiche vaccine ho hi gamsung a kisem ahin, lha 9 lam chan asem na alut ding ahi ati. Hinlah vaipo ho in emergency a ngaichat na anei ule tua jong phate a vetsui ahi a jah thei ahidingdan jong tahlang na ana nei in ahi. Aalngkhat a ICMR in parliamentary committee ang a hetsah na ana neina uva Bharat Biotech in National Institute of Virology  toh kitho a asem le Zydus Cadila Ltd’s DNA plasmid vaccine teni tu le tua phase 1 a aum nahlai dan jong tahlang na ana nei uvin ahi. ICMR in SII hi phase 2 le 3 trial ho a kithopina apeh jing ahin,  adang vaccine ZyCOV-D” (Zydus Cadila) le “Covaxin” (Bharat BioTech) jong phase 2 kibol jing lai ahidan tahlang na ahung kinei in ahi.

Xxxxxxxxxxxxxxxxxxxxxxxxxxxxx

AR in thingnou tuna nei

Imphal, Aug 22: Assam Rifles in tuni in achesa ni 3 sung a muntin na thingnou tuna ana nei utoh lhon in tuni in khumkha na ana nei taovin ahi. Hiche thingnou tuna kingon chu Assam Rifles base camp muntin a ana kinei ahi. Tuni in thingnou tuna kingon chu Mantripukhri Batallion,  Yaingangpokpi le Sawombung Company Operating Base, Keithelmanbi Battalion noi a Andro, Canchipur le Lilong Company Operating Base ho a jong ana kibol in ahi. Hiche thingnou tuna kingon achun sepai 408 lam in panlah na ana nei uvin ahi. Assam Rirle sin achesa nit hum sunga  thingnou atudoh uhi 5565 lam ahi akiti. Kakching Battalion in jong alhang sung a gamsung suh eng ding tohgon mipi ang a hetsah na ana nei jing utoh lhon in thingou tuna kingon jong ana nei uvin, thingou 1880 lam ana tudoh uvin ahi.

Xxxxxxxx

CCpur District a Covid toh kisai’a SOP daan phabep August 24 akon kikhel ding

B.Lalboi Gangte

CCpur. August 22 (ET): Chief Medical Officer (CMO) CCpur Dr. VC Pau Tonsing in tunin office Chamber mun’a Press/Media ho ana kimupi na’a Covid-19 doudal natoh kisai’a chelha daan phabep akikhel natoh kisai’a mipi hetding leh jui ding ho tahlang na ananei in ahi. Dr. VC Pau in aseina’a Chief Secretary, Government of Manipur in Covid-19 toh kisai’a Standard Operating Procedure (SOP) thah ahin sodoh na’a eiho lah’a jong Covid-19 positive 600 val mudoh nalah’a tamjo Sepai (Military Service) akon ahi naban’a thina toh um hih lai jong leh ahung lhung ding Aug. 24, 2020 akon jui ding District Administration in SOP thah ahin sodoh ding ahi ati. Hiche dungjui’a Quarantine Centre suh kimding leh Covid-19 bou boipi sang’a gamsung khantou nalam jong khohsah najal’a kalson dan khel ding got ahi. Hiche’a test kibol’a positive jouse tilou mundang apat hung kipan jouse inn a hoitah’a Quarantine norms ajui cheh ding chuleh symptom nei jouse aki-report ding ti ahi.

Hiche toh lhon’a mun dang akon hung kipan ho Transit Centre a Registration bolsah hiding, sampling Team in agannathei pen’a Rapid Antigent Test (RAT) mangcha’a sample test alah ding hiche test kibol na’a positive jouse  Covid Care Centre, NEILIT a koi hiding ahi. Ahin result negative jouse inn a sol hi jong leh a-inn mun cheh uva Home/Self Isolation/Room Quarantine khoutah’a ajui cheh’u ngai ding ahi.

Xxxxx

“Sating” kipehto kal kum 10 lhinna nikho’a U Pa Guite in PS Haokip vangthumpeh na kingon nei peh

B.Lalboi Gangte

CCpur. August 22 (ET) : Kuki te Custom chon-le-khan daan dungjui’a U Pat, Neojo kikah’a chonngai’a jui ding’a um “Sating” kipehto nathu’a kum sottah suhtup louva ana um chu achesa 2010 kum a “Sating” kipeh nathu’a PS Haokip in anasuhto kal kum 10 alhin tah toh lhon in tunin (Aug. 21) Sating kipeh na Kum 10 lhinna leh PS Haokip President KNO vangbuh na chuleh vangthum pehna kingon U Pa Guite’s in Churachandpur District hopsung B.Aijalon mun’a ananeipeh in ahi.

Hiche kingon aphatsung’a  Thangkhosei Guite, Secretary, Guite Inpi in houlimna aneina’a

achesa Aug. 2010 lha’a Kuki te chondan kibulphu toh naleh kisuhtup na anaum nading’a PS Haokip in ”Sating” kipeh ding dol agontoh kal kum 10 ahung lhing tan ahi. Chuleh 2010 kum a “Sating” kipeh na nikho’a Song kiphut jong mun tin’a hetgil joh nading in kitundohbe heng lang hileh khang thusim helou hon jong hetgil na ahin nei thei ding’u ahidan adeisah nathu aphongdoh in ahi. Guite Innpi hi neidop hat jeh uvin akilhahsam lheh vang’a kiding jou ahin chule Guite phungpi in tuni abul kahin pat’u ahin kum 20/30 alhin teng Naopa te Haokip Bulpi, Doungel Bulpi, Kipgen Bulpi hon jong aban ban’a ahin bol ding adeisah dan jong aphongdoh in ahi. Aman aseibena’a U Pa ten tuni chan’a Naopa te hichen’a neidop sang nao hi keiho ding’a suhmil thei thil ahipon ahi. Chuleh tuni’a hi PS Haokip hi Gan thisan a lhalho na Guite Inpi in kinei peh ahi ati.

Hiche toh lhon’a Guite Inpi Chairman Gougin Guite in Traditional head-gear kiti dilkop pehna PS Haokip anei in hiche hin avetsah chu PS Haokip in Nampi kong atolna tusang’a ahat joh nading leh tha le-jung kibe’a “Tahchapa” ti’a hangsan tah’a kalse nading’a akop peh ahi dan aphongdoh in ahi. Chule Rev. P.Dousuanthang President, Phiamphu Phungpi Organization in Pathen heng’a vangthumpeh naleh phatthei bohna ananeiyin ahi. Phiamphu Guite Inpi Advisor P.khupsuanmuang in houlimna aneina’a Tribe recognition um hi eihon Pathen thilpeh’a inei khah jeh uvin tuchang’a Nam sung lamkai ho samkang leuva ikoi lo’u ahin chule ham le-pao chom chom kitho jong leh thisan khat sopi khat kahi uve ti’a ikipehdoh thei lou jeh uva tuni chan’a kikhen telna jeh’a vaihop khumna policy hi lolhing’a chelha jing nalai ahi ti ikigel doh ding’u angai in ahi. Chuleh U Pa Guite pa kom’a  ”Sating” pe jouse ham le-pao a kingailu louva thisan a kingailut a insung kito nathei ding’a thisan’a panlah ngai ahi.

President KNO PS Haokip in houlimna aneina’a U Pa Guite’s ten hitobang vangthum peh naleh vangbuh na kingon eihin neipeh nachung’a kakipah in ahi. Chule Sating kipeh tokal kum 10 lhinna nikho ahitoh lhon’a hiche nikho hi U Pa Guite, Doungel, Kipgen, Haokip, Chongloi, Sating kipeh to na nikho ahi. 2010 August nikhon Doungel in Guite pa Sating ape in, Kipgen pa in Doungel pa apen chule Haokip leh Chongloi ten Kipgen pa anapeh toh lhon’a hiche nikho’a chu Kuki Custom kibulhit ahi ati.