Manipur a Covid-19 jeh’a thi mi 36 hita, natna nei 6883 lhingta

Manipur a Covid-19 jeh’a thi mi 36 hita, natna nei 6883 lhingta

103
0
SHARE

Manipur a Covid-19 jeh’a thi mi 36 hita, natna nei 6883 lhingta

 Imphal, Sept 5(ET): Manipur a COVID-19 natna jeh in nidan 24 sung in mikhat in thina anatoh kit in ahi. Thina toh hi kum 65 a upa Thoubal District mi ahi in Covid-19 natna leh natna chom kitho a JNIMS mun a ana muolliem ahi, hiche toh kilhonin state sunga COVID-19 a thi agomin 36 aphatan ahi tin Common Control Centre thusodoh chun atahlang in ahi.

Nidan 24 sung mama in natna nei athahbeh in mi 184 mube ahikit in, amaho lah a mi 160 hi milham ahiuvin chuleh mi 24 hi Central Armed Police Force (CAPF) ho ahiuvin ahi.

Natna nei a matdoh a um mi 160 lah a hin, gampam a chedoh leh vadohna neilou mi 154 ahiuvin, hinla Noney akon mi 6 ho hi state danga kon a inlang hinjon ho ahiuvin ahi. Milham 160 ho lah a mi 98 ho hi Imphal west akon ahiuvin, 19 ho hi Thoubal, 12 ho hi Imphal East, 9 ho hi Tengnoupal, 7 hohi Kangpokpi, 6 hohi Noney 4 ho hi Churachandpur,  3 ho hi  Bishnupur, chuleh Ukhrul, Tamenglong leh Senapati akon mi 1 cheh ahiuve. Amaho jouse hi Covid care centre a koilut ahi sohkei un, chuleh akhonungu kholchil leh vetsui ahi jing in ahi.

Alangkhat ah, mi 76 ho munchom chom a CCC akon a lhadoh ahiuvin ahi. Mi 29 ho CCC Lamboikhongnagkhong akon lhadoh ahiuvin, mi  27  CCC Thoubal apat, 14 ho CAP apat, 4 ho RIMS apat lhadoh ahiuvin chuleh 2 hi SDH Moreh akonin RT PCR test akibol utoh kilhon in COVID-19 natna a kuon in damsel in lhadoh in ana um un ahi.

Positive cases tuchan a kimandoh mong mong hi agomin mi 6883 ahi in, (Milham -5206 leh Central Security Personnel -1677). Tuchan a damdoh jat hi 4975 ahi kit in ahi. (Milham -3889 leh Central Security Personnel – 1086). Tule tua active case hi 1872 ahi (Milham – 1283 leh Central Security Personnel – 589).Chuleh recovery rate hi 72.27% ahi.

Covid-19 chung chang a Awareness Campaign tuni chun Imphal leh akimvel (Heingang, Khagempalli leh Nganappi Thong) vel lah ah aba bol un, mipi ho natna akon a kiven ding dan, inmun a hoitah a kikulkhup ding dan, helpline number holeh district chom chom leh state sunga online mangcha a hetnom poimo ho dohding dan ho hilna jong ana um in ahi.

Xxxxxx

Award kipehkhel na chungchang kholchilna mipi het a tahdoh dia AMSU in ngehna nei

Imphal, Sept 5(ET): Police natong pha ho Chief Minister Medal pehkhel chungchang kholchilna mipi het a tahdoh ding in All Manipur Student’s Union (AMSU) in Director General of Police , Manipur kom a ngehna lekha apelut tan ahi.

AMSU in asei na ah Independence Day nia Chief Minister’s Police Medal for Gallantry sang ding ho Imphal East SP in min apehlut lah a sub-inspector Mr. Bheishamayum Debson Singh pansah ahi chungchang kholchilna neiding a IGP makaina mi thum panna lom August 16, 2020 nia kisemdoh chun hapta khatsung a thulhut anung pehlut ding a ngansena peh ahi e, ati.

Hiche thudol kholchil dia High Court retired Judge sang a neojo lou ding makaina High Level Inquiry Committee semdoh na a pan la dia All Manipur Students’ Union (AMSU) in Manipur Governor jong ngehna ana nei sa ahi.

AMSU in lekhathot a chu adihlou a kimangcha police tohmun a paidohsa khat chun itilamdol a atohban ajom a chule gallantry award asan jengthei ham, akholding lom kisemdoh kal jong hapta 3 achetan, kholchilna thulhut nakom lhung tei ding chu agangthei pen a mipi het a tahdoh hihen, achutilou le nop le da umlou a hapta khat phatsung a Prime Minister le Union Home Minister lekha kithot ding ahitai tia DGP hetsahna anei ahi.

Assam Rifles hon NSCN-IM khat amat jeh’a Maram a boina ana um; Kiphinna bol hon Highway akha jeh uva thilpo gari 50 val tangden

Imphal, Sept 5(ET): Tuni nikho chun Maram town sung’ah AR hon NSCN-IM gamvahmi khat anatjeh un mipi in 34 Assam Rifles post mai Government leh NSCN-IM kikah a kihouna aumjing minphah pumin akimanpa lhadoh ahina ding in kiphinna ana neiyun ahi.

Hiche kiphinna jeh chun che le vale adeh a gari lhai le ho ana suboi lheh in, National Highway a vonpo gari truck 50 val lamlha thei louvin ana tangden uvin, chuleh Imphal jon ding a hung passenger gari tamtah jong Mao gate ah ana tangden in ahi.

Assam Rifles a konna thulhut kimu in aseina ah Salew Hepuni (40), S/o Salew Mao a umna mun Songsong Village, Mao gate chu NSCN-IM member ahina banah Mao Gate ah NSCN-IM kiloikhom ho dinga don le kai aboljeh a kiman ahi in ana leh aman jong kiphondoh na aneina banah ama a konin don leh kai a adondoh asum a Rs. 8,0000 leh don le kai a kimangcha lekha jong akimandoh in ahi ati.

Hinla, Maram khosung mi ho leh Senapati district CSO hon Assam Rifles ho thuso chu demna sangtah anei utoh kilhon in anielkal uvin, 34 AR in Major Arun lamkaina a nidan 3am vel a ana mat’u Hepani hi Songsong mi ahina banah milham ahi bouvin, NSCN-IM toh kikjopmatna imacha aneipoi atiuvin ahi. Cbuleh CSO hon aseibe na ah Assam Rifles hon Songsong khomi Rakuyop kiti khat akon in dangka Rs. 50,000/- alahpeh uvin ahi atiuvin ahi.

Akimandoh pa hi Mao gate akon a Maram a um 34 AR Battalion custody a kikoi ahijeh chun hiche munah mipi hon kiphinna jat chom chom ana bol uvin ahi. Boina mun hi police team in ana dellut un hinla boina ahiding bangtah in suhthip jou ana hipon ahi. Kiphinna nei hon placard choi pumin Salew Hepuni hi milham ahi, chule placard dang dang “Assam Rifles ho hi thinglhang mite melma ahi” chuleh “Milham akinthei penna lhadoh un” tiho a kisun jong akichoi un, lampi ana ting tan un, chele vale jong ana boilheh in ahi.

Vaigeitah thulhut kimun aseina ah akimanpa chu Mao Gate kom Nagaland border sung’a kiman ahijeh in Nagaland police khutna petlut ding in Manipur in phatsahna ananeito lhonin lampi kikha jong lahdoh ding in kinoptona ana umtai, ati.

Xxxxxxx

India a Covid-19 case million 4 val ta; Thina toh 69,561 hita

New Delhi, Sept 5: India sung ah Saturday nikho chun coronavirus natna nikhat sunga kimudoh lah a atampen ding in mihem 86,432 ana mudoh un, hitoh kilhon chun taking natna nei agom in mihem 40,23,179 aphatai tin Union Health Ministry data chun atahlang in ahi.

Tu le tua natna nei agomin 40,23,179 alhing tan chuleh natna jeh a thina toh hi agomin, 69,561, hiche hi nidan 24 sunga thina toh 1,089 in abelap toh kilhon ahi dan jinglam nidan 8:00 a data kisodoh chun atahlang in ahi.

Natna nei mihem 8,46,395 ahi in, chuleh tuni chan a natna akon a damdoh hi mihem 31,07,223  aphatan ahi. Hiche hi niseh a damdoh mihem 77,072 ahi toh kilhon in recovery rate 77.23 per cent in akalbe in ahi. Niseh a damdoh akibelap jing toh kilhon in niseh a damdoh jong 60,000 chunglang apha jing in ahi.

Maharashtra state sung hi coronavirus in asuhkhah na melse loi ahi jing in, tule tu in natna nei mi 8,63,069 aphatan chuleh thina toh 25,969 aphatan ahi. Abanah Andhra Pradesh ahikit in, natna nei 4,76,506 apha in chuleh thina toh mi 4,276 aphatan ahi. Tamil Nadu, Karnataka, Uttar Pradesh, Delhi, West Bengal, leh Bihar ho hi aban a natna tamna ho ahiuvin ahi.

India’s COVID-19 cases hi 10 lakh apat 20 lakh in nikho 21 in akalbe kit in ahi. 30 lakh aphah nading in nikho 16 alut in, 40 lakh lhinna ding in nikho 13 alut be kit in, chuleh 10 lakh lhin nading in nikho 59 alut kit in ahi.

Indian Council of Medical Research (ICMR), India te data a record dungjui in nikhat sunga test kibol hi 10,59,346 apha jouvin, tuni chan a test kibol hi 47,738,491 apha jouvin ahi.

Vannoi leiset a natna neiho lah a India hi athum channa ahi jing nalai in, tu le tua natna nei gam atam nei pen USA ahi in natna nei mihem 62,09,518 aneiyin, anina ah Bazail in 40,91,801 aneikit in ahi. India sunga Covid-19 natna nei jat hi Brazil a toh akiha kheh tapon, chomkhat jou leh ahin khel a vannoi a a nina a hung pang thei ding dinmun in aum jingin ahi.

Xxxxxxxxxxx

HRCM in State government in Khangthah khat kisuhset na a mona neiho gotna sangpen peh dinga ngehna nei

IMPHAL,  Sept 5(UNA): The Human Rights Council Manipur (HRCM) in achesa September 1, 2020 nikho a gang raped ana kibol jouva ana kithat Mayang Imphal Louruk a um Md. Abdul Karim chanu khangdong kum 14 vel bep Phusam Wasilla suhset ahi jouva kithana phamo asah nau aphondoh naban uvah, hiche chunga kigolkha jouse state government in matdohna aneiya gotna sangpen apeh diuvin ngehna aneina ban uvah hitobang thilsoh dei umlou tah ahidan aphongdoh un ahi.

HRCM secretary Advocate Rabi Khan soikaina a thuso kisodoh in aseibe na ah Phusam Wasila thina a kigol kha jouse akinthei pen a matdoh loi ding in ngehna aneiyun ahi.

Tolthat a kingoh luboh dehset ho insung mite jong thudoh dinga puidoh ahiutoh kilhon a kigolna nei ho jouse matdoh ahina ding in kholchilna nei officer hon pan ala jing in chuleh vangset na toh insung mite toh kholchilna nei a officer hojong kithujahto jing diu ahi.

Post-mortem examination jong Executive Magistrate leh vangsetna toh insung mite jaona a video coverage kibol ding chuleh kholchil na jong vaigei sah louvacharge sheet jong akinthei lam pen a filed bol hiding ahi.

HRCM Council injong  Manipur Human Rights Commission a Chairperson henga Manipur Police a kon a kholchil na ahoilou leh pettion ki bol ding ahi ati. Chuleh Manipur Human Rights Commission in jong pan hinla henlang akinthei pen in kholchilna chelha henlang mona nei ho gotna peh loi in umhen tinjong angehbe un ahi.

Chubanah, state government injong chihgil na leh hetna thuhtah neiho ahin manchah uva pan ahinlah nadiuvin ngehna aneiyun ahi. Chief Minister leh State Government injong demna sangtah abol uva ahileh actor Sushant Singh case banga thusoh lakhom honjong ahin ngaisah nau sang ding ahi dan aphongdoh un ahi.

Thusodoh in aseibe na ah, Tu letua Phusam Wasila hunam a kisuhset jouva kithana thu hi Nirbhaya achesa December 2012 kum a gang raped case sanga sangjo ahidan atahlang un, chuleh tua vangsetna toh hi kum 14 khangdong chapang cha leh lekha hetna neilou lungset umtah numei ahi in, hinla Nirbhaya hi kum 23  mi leh lekha themtah jong ahi atin ahi.

Chuleh lungsung tongkha tahkhat chu ahileh tua vangsetna toh chapangnu apa hi khoja theilou nangong leh paotheilou ahikit in ahi. Hijeh chun Hon’ble Special Court(POCSO), Imphal West, Manipur injong mona neihi gotna sangpen apeh diu, athi tokah a khaisang hiding’u, society sunga hitobang aumkit lou nadinga vetjui ahi ding uvin jong Rabi min a kisodoh a chun asei in ahi.

Council in Civil Society Organisation chom chom ho kithopi najal a mona nei phabep matdoh a aum thei ahidan pachatna thu aphongdoh un, CSO ho kipehdohna ho hi suhmil hoi ahipon, aban a mona nei jouse abonchauva matdoh ahina dinga police holeh akisaipi government palai ho ahithei channa kithopi jing ding injong CSO leh mipi ho temna jong anei un ahi.

Xxxxxx

All Manipur ATM Service Sector hon Sept. 9 kah’a Ranjan that ho akimatdoh lou leh ATM leh service jouse kha ding’a Govt. gihna nei

B.Lalboi Gangte

CCpur. Sept. 5(ET) : Melhet lou gaalman chah choi mi phabep in sum dei chat najeh’a Arambam Ranjan Meitei @ Ranjan ana kaplih naochung’a kisemdoh Joint Action Committee (JAC) in Press/Media ho tunin akimupi uvin maban’a pan alah ding dan’u tahlangna anei uvin ahi. Hiche phatsung’a Siren Ibungo Singh, Convener, JAC in Ranjan thina chung’a tuni JAC akisemdoh toh lhon’a CCpur District sung’a Civil Society Organization (CSOs) chom chom hotoh jong tunin JAC in Joint  meeting ana kineikhom in ahi ati. Meeting hung kikhom hon (L) Arambam Ranjan kitha nachung’a demna anei naoban’a CSO chom chom in insung miho lunghempi naleh akhoh sah nao chung’a JAC in akipapi in ahi ati. Chule CCpur District sung’a philanthropic organization chom chom in jong JAC panlah na tosot’a anungthop ding uvin ngehna akinei jin ahi. Superintendent of Police (SP) Churachandpur in JAC heng’a kitepna (verbal assurance) anei naban’a ngehna anei dungjui’a thilong postmortem bolchai hi jong leh Morgue ah kikoi phot nalai ding ahi. Phat kitep peh sung’a imacha lolhin na aum louleh kiphinna chom chom kipan ding chule hiche hi nam thil hilou mitakip chung’a lhungthei thil ahi naban’a mipi ten kithopi na apehcheh ding uvin jong temna anei in ahi.

Alangkhat’a All Manipur ATM Service Sector hon Ranjan thina thu’a insung miho lunghempi na anei utoh lhon’a atoh khompiu melhet louhon sun changlai’a sum deina jeh’a akaplih nachung’a demna leh Govt. in tolthat ho ahung lhung ding Sept. nisim 9 sung’a  amatdoh ding uvin temna anei in ahi. Chuleh iti hamkhat’a phat kipeh phatsung’a imacha lolhinna aum lou leh Sept. nisim 10 akipat ATM chungchon’a Service jouse kha ding in gihna anei in ahi.  Ranjan thina chung’a kisemdoh Joint Action Committee (JAC) against the brutal killing of (L) Arambam Ranjan (35) s/o (L) Arambam Kumar hin pan ahin lahtou jing ding’u akinepnao jong aphongdoh in ahi.

Xxxxx

State Level Teachers’ Day kingon kiman; Gamsung’a Jilkung mi 7 in State Teachers’ Award sang

Imphal, Sept 5(ET): Education Minister Dr. Thokchom Radheshyam in tunia Conference Hall, Samagra Shiksha Manipur, Babupara a State Level Celebration of Teachers’ Day kingon chelhah sung chun jilkung umlou a kalson dan hahsa ahi tia asei tolhon in themjil lam a jilkung ho panlah na akipapina aphongdoh in ahi.

Jin-Gun a pang Radheshyam in asei be na ah gam le nam khonung hi classroom a jilkung hon ahin sampan a, tunia mi nasa gamsung in inei hou jong jilkung ho tohga le semdoh ahi e, ati. Chule themjil kipatna insung ahitolhon a nu le pa in ahoipen acha dia adeisah bang a jilkung hon jong simlai ho aphapen athempen hiding adeisah ahi in hijeh a jilkung hi jana pehding ahi, ati.

Tunia Minister in ahomdoh State Teachers’ Award sang jilkung mi 7 ho chu Moirangthem Thoibi Devi, Headmistress – in-charge, P. K. Upper Primary School, Imphal East;  L. Khupkhothang Khongsai Headmaster – in – charge, Kumbipukhri High School, Churachandpur; Khwairakpam Sanayaima Singh, Vice – Principal, Moirang Multipurpose Hr. Sec. School, Bishnupur; Brahmacharimayum Romeo Sharma, Headmaster – in – Charge, Chajing Mairenkhong Upper Primary School, Imphal West; Thoungam Ajitkumar Singh Headmaster – in – charge, Khunthoknganbi Upper Primary School, Imphal West; Khundrakpam Warjit, Headmaster, Senapati Aided Junior High School, Senapati chule  Khangembam Kanhai Singh, Primary Teacher, Tekcham Girls Upper Primary School, Thoubal ahiuve.

Kingon a chun Commissioner, Education (S) Shri T. Ranjit Singh; Director Education (S) Shri L. Nandakumar Singh  le official ho jong apang uve.

Hetding chu kum seh September 5 Teachers’ Day hi gamsung pumpi a president masa, achademician le Bharat Ratna ana mu Dr Sarvepalli Radhakrishnan pen nikho geldohna kinit ahi.

Xxxxxxxxxxx

Bus a kikomtona leh Gamgi a sumkolvei hi kikhelna lentah hiding ahi: Ambassador Saurabh Kumar

Imphal, Sept 5(UNA): India leh Myanmar kikomto thei nading tohgon achelhah jing toh kilhon in tuni nikho chun webinar mang in Brahmaputra-Ayeyarwadi Dialogue: India Myanmar Cooperation for Prosperous Border Zone” kiti thupi mangcha in Asian Confluence, ASEAN India Center (AIC) RIS, New Delhi leh Mandalay Forum for East Asian Studies, Mandalay toh kithokhom in houlim khomna ana neiyun ahi.

Asian Confluence hon thusodoh ahin bol nauva chun tumasanga pat ana umsa banga kithokhom a pankhom ding dan ho seikhomna jong ana nei un ahi.

Houlimna masapen a Ambassador Saurabh Kumar (India’s Ambassador to Myanmar) in ahoulim na ah gamgi ana chotlut lai thu leh Government of India in Border Area Development mangcha a program chom chom a na kitoh dan ho leh Chin state leh Naga ho changa achom a aki vaihom nau mun ho dinga jong khantou machal na ahung um dan aphongdoh in ahi.

Aman aseibe na ah, bus mangcha a kikomtona hin gam teni kikah a adeh a nat le sat na hihen, houthu a vahle ho ading hijong leh navahna hoitah ahinlhut ding ahi. Chuleh  Rakhine state mun a India-Myanmar Industrial Training Center jong koi ding in tohgon akinei in, hiche hin tohmun ong tamtah umsah a tohmun neilou ho kihinso na phatah ahinlhut ding ahi ati.

Ambassador Myo Kyaw Aung, Myanmar’s Ambassador to India in ahoulim na ah hiche kikomto nadinga tohgon kibol hin gam teni kikah a lunggil tah a kijopmatna ahing lhut tei ding chuleh India-Myanmar-Thailand hiche gamthum ho kikomto nathei ding highway hin India leh ASEAN a ding a sumkolvei na leh tourism lampanga kikomto na lei phatah ahung hiding akinepna aphongdoh in ahi. Chuleh Myanmar in lungthengsel a India ading a kitah tah’a umjing ahi dan leh gamvah ho matdoh jing nadia atosot jing ahidan aphongdoh in ahi.

Governor of Manipur Dr. Najma Heptulla in ahoulim na ah North East Region sunga tourism a poima dan leh national leh international tourist ho dinga paradise tobang ahidan aphongdoh in chondan khandan leh ham le pao kisinsah na thu a Manipur University leh themjil na mun chom chom a Burmese pao simtheina a um ding adeisah dan jong aphongdoh in ahi.

Mr. R.K Ranjan (MP-Inner Manipur) injong a houlim na ah Indian in Myanmar chunga kithopi na leh asen ho atamsahbe diu adeidan leh adeh a loubol na lampang leh neh le chah semna lampanga aha sendiu adeisah dan aseidoh in ahi.

Chukit leh, technical session sung in former Indian Ambassador to Myanmar Gautam Mukhopadhyay chaired hina in akikhom ho jousen kilungtoh tah in India-Myanmar kikhut jopna hi adehset in infrastructures lampang, sumkolvei leh kikomtona hi athupi pen hihen ti hi ahi.

Langkhat ah, South Asia Regional Representative, Ministry of Economy, Trade and Industry (METI) Japan Mr. Keiichi Onozawa injong Japanese projects tamtah achallhah jing toh kilhon a India in economy lampang agelkhoh a asuh hat ding, labor laws ho avelvet a khutthem na neilou ho injong tohmun ahin neithei nadiu chan gei agelkhoh diu thu aphongdoh in ahi.

Gam teni kikah a sumkolvei namun tamsahbe ding, bus mangcha a kikomto na, infrastructure, phalna bei a gamgi a vah leh ho nunem tah a soisah dan, lou bol na lampang leh mipi a konna phatchomna tampi boldoh na leh thil dang dang angaikhoh dan jong seikhom ahi.

Toukhomna kin ah luboh in ASEAN India Center (SAIC) at RIS in presentation bol in Dr.Prabir De, Founder and Chief Economist Parami Roundtable Think-tank and Senior Advisor MISIS Yangon Dr Myo Thant, Executive Director CESD Myanmar Yangon Dr. Zaw Oo, Director CEES Myanmar Yangon Dr. Myo Myo Myint, Director Centre for Entrepreneurship and Skill Development Manipur University Dr. Ch Ibohal Meitei, Manipur University Professor Priyoranjan Singh, Chairman and Managing Director Shija Hospital and Research Institute Dr Palin Khundongbam and Convener Act East Policy Committee Dr. R.K. Shivachandra, scholars, practitioners, government officials leh experts chom chom ho webinar mangcha in toukhomna chun pan ana lauvin ahi.

XXXXXXXXX

Loktak Downstream tohgon achelhah tei hi phatsot a pat agam mipi ngehna ija se lou na ahi: CRA

Imphal, Sept 5(ET): National Hydroelectric Power Corporation Ltd (NHPC) le Manipur Government in 66 MW Loktak Downstream Hydroelectric Project boldoh nadia Power purchasing Agreement (PPA) tia Government of Manipur le Loktak Downstream Hydroelectric Corporation Limited in September 1, 2020 nia kinoptona aneilhon chungchang Centre for Research and Advocacy Manipur (CRA) in nopmo asahna aphondoh ban a Leimatak Power Station in alhadoh tui chu NHPC in Loktak Downstream project a amanchah got ahi in hiche hi thildang hilou in phatsot a pat agam mipi hon 105 MW Loktak Multipurpose Hydroelectric Project (Loktak project) noi a Ithai Barrage velvet dia ngehna aneijing ija se lou na thengsel ahi, ati.

CRA in asei be na ah Loktak project noi a Ithai Barrage hi agam mipi ding gel na a lahdoh dia Chief Minister a pat Prime Minister kom gei a achesa August 2, 2017 le Manipur Governor kom a jong September 2017 a ngehna kinei hi gam leiset aman le mang hen ti lungtho nei a NHPC in hiche tohgon hi amano ahi e, ati.

NHPC Loktak Project in 50000 hectare a len phailei tui peh tahsang in Manipur neh ninglhing kondoh thei lou na gam asodoh hi NHPC gelkhohna lah in apangpha poi, ati. Langkhat a meivah man atam behseh tolhon a Manipur government in PPA tohgon hi phatsot a pat boldia ana gel thei lou ahi.

Mihem a dia phachomjo micro hydel ahiloule solar energy ho semna joh a Loktak Downstream project hi manchah thei ahiban a 66 MW Loktak Downstream Project hi achombeh a bolkhoh ngailou ahi ajehchu aumsa 105 MW Loktak Multipurpose Hydroelectric Project ban a agam mipi genthei belap na tohgon thah khel a Government of Manipur le National Hydroelectric Power Corporation in achesa 26 September 2008 a MoU abolsa joh sutjom dia ngehna CRA chun anei ahi.

=============

PLA hon Arunachal Pradesh mi 5 apuimang e tia Congress MLA khat in sei

Itanagar, Sept 5: Line of Actual Control (LAC) a India le China kah a boina aso jing tolhon in Upper Subansiri district a pat mi 5 People’s Liberation Army (PLA) in apuimang e tin Arunachal Pradesh Congress MLA Ninong Ering in tunichun facebook ah atahdoh in hinla mi puimang nikho kichehsel in aseikit pon ahi.

Hinla hiche thudol a district a pat armed force ahilou le police kom a hehna aum dehlou vang in PLA le China akilom behseu a lethuh ding in MLA pa chun aseikit ahi. Hitia Arunachal Pradesh khangthah mi 5 puimang a aum hi Eastern Arunachal Pradesh MP Tapir Gao in jong photchenna ape kit e.

Gao in asei na ah McMohan line a pat km 40-50 a gamla Indo-China gamgi kom Sera 7 a pat puimang ahiuve, ati. Hiche thudol hi Gao in tuni jingkah a chu local MLA pa jong aseipeh a khangthah ho damsel a lhadoh nadia Indian Army toh kihoumatna anei thu jong eihetsah pai ahi, ati. Khangthah mi 5 PLA hon September 3 nia apuimang ho chu Tanu Bakar, Prasat Ringling, Ngaru Diri, Dongtu Ebiya le Toch Singkam abon uva Tagin nam ahiuve.

============

CCC a tong ding MBBS Medical Officer intervie chelha

B.Lalboi Gangte

CCpur. Sept. 5(ET) :  Churachandpur District ah Covid-19 Care Centre (CCC) atong ding MBBS Medical Officer 3 lahna ding’a tunin (Sept. 5) GNM Training Hall mun’a interview anachelha in ahi. Chuleh Medical Officer lah nading’a MBBS jilchai leh internship jousa leh Manipur Medical Council ah registration bol ho bou kouna anei in ahi. Hiche interview Board ah Chairman, Pawan Yadav, IAS, DC thalheng in Darun Kumar, IAS, AC to DC, Dr. Vumchinpau Tonsing, CMO, Member Secretary chuleh member 3 tichu Dr. Vanlalkungi, Medical Superintendent, District Hospital, Dr. Romeo Sanate, HR in-charge, Covid-19 leh Dr. Paulunmang Vaiphei, DFWO hon candidate ho interview anei uvin ahi. Hiche toh lhon’a interview Board in alhendoh mi 3 ho chu Medical Directorate, Imphal a athot uvin amahon approval abol dungjui uva result hi sodoh ding ahi.

xxxxxxxxxxxxxx

MH Dance Studio hondohna anakinei

B.Lalboi Gangte

CCpur. Sept. 5(ET) : Churachandpur District hopsung Kamdou Veng, Part 3, Tuibong mun’a tunin Minlun Hangmi in abol MH Dance Studio hondoh naleh lhandohna kingon ana um in ahi. Kingon achun Lalboi Misao, Chief of M. Lhahvom, TL. Haopu Haokip, former President KSO CCpur leh Lalboi Lupheng, Chief of L. Gamnomjang ho kindei chom in apang uvin chuleh Shokholal Haokip, Chiarman ECA Tuibong in MH Dance studio hongdoh na leh Pathen heng’a lhadohna ananeiyin ahi.

Hiche toh lhon’a Dance studio boldoh Minlun Hangmi in aseina’a gamsung’a lam toh kisai’a neh leh chah hol theina hihih jong leh India gamsung mun chom chom’a kimkhat ding in neh kimuna asohdoh tah ban’a mabah’a CCpur District akon dance chungchon’a neh leh chah hol theina ding tupna toh gelkhoh na jal’a  hiche dance studio hi kabol ahi tin atahlang in ahi. Chuleh hiche Studio a kichuh nahi Minlun Hangmi Chief Instructor hina noi’a Michael Limsei, Assistant Instructor in akithopi ding ahi.

xxxxxxxxxxxxxxxxx

DDRC tohgon nan PASS in apatdoh project noi’a tibukimlou ho thilkeu ana kihoppeh

B.Lalboi Gangte

CCpur. Sept. 5(ET) : People Advanced in Social Services (PASS) in project anapatdoh District Disability Rehabilitation Centre (DDRC) tohgon nan tunin Sangaikot kho’a Sangaikot Sub Division sung’a um tibukimlou (Persons with Disabilities) ho ding in Awareness leh khut manchah chom chom hopdohna Sangaikot kho Community Hall mun’a ananei uvin ahi. Kingon achun ‘Visiting PwDs in the midst of Covid-19 Pandemic’ kiti thupi amangcha uvin chuleh Coronavirus jeh’a Lockdown phatsung’a tibukimlou ho vilna neiding ti tohgon nei pum’a kingon hi anei’u ahi.

Hiche toh lhon’a kingon achun Jin-gun in Zosanglur Joute, MCS, SDO Sangaikot, Special Invitees ah Jamkholien Zou, Chief of Sangaikot, Seikholun Baite , Chairman VPC, Sangaikot Block, Khupsuon Zou, Chairman, Sangaikot Sub Division Chief Association leh Boilen Lhungdim, President KSO, Sangaikot Block ho apang uvin ahi. Chule PASS hin CCpur District sung hi Centre 6 in akhen in chule Centre jouse’a tibukimlou ho ding’a poimo khut manchah chom chom hopdohna anei utoh hon’a tuni’a Sangaikot Centre chungchon’a Area acheng ho ding’a hopdohna anei’u ahi.

Hiche kin’a tibukmlou ho ding in Kangkal 100, incentive dan in Dk. 100 cheh leh khojah nalang boina neiho ding in hearing aid 35, wheelchair 1, crutch 1, blind stick 2 leh therapy kits bag kum 70 chung lam mi 14 heng’a pehdohna anei uvin ahi. PASS in DDRC lemchang dungjui in Centre chom chom tichu Singngat Center, Lajangphai Center, Rengkai Center, Saipum Center leh Chongkhozou Center ho’a tibukimlou ho vil najong anei ding’u ahi.

Xxxxxxxxxxxxxxx

Assam Rifle hon daan toh kitoh louva Myanmar akon thil hung kipo Dk. Lakh 3.73 vel man anamandoh

Chandel, Sept. 5 (ET) : HQ IGAR (South) vetsui nanoi’a um Assam Rifle hon tunin Myanmar akon daan toh kitoh louva hung kipolut kuwa na Dk. Lakh 3.73 vel ding man janni (Sept. 4) chun anamandoh uvin ahi tin thulhut chun aseiyin ahi. Hetthei khat chu Assam Rifle hon thuguh pole ho akon thulhut amu dungjui uvin Chandel Battalion akon team khat in Moltuk akon New Songjang chan kholchilna anei nao’a TJNS road jui’a um gamlah’a boxe a kichun thil phabep anamudoh uvin ahi.

Hiche toh lhon’a hiche boxe ho kholchilna anei nao in kuwa na Kg. 400, Myanmarese Mosquito coil packet 2400 leh Slaked lime packet 4,620 amudoh uvin ahi. Hiche thilkeu amudoh ho jouse daan toh kitoh’a kholchilna neibe ding in Chandel Police HQ noi’a um Molchom Police Station a anapelut tauvin ahi.

xxxxxxxxxxxx

NEIPDA in phattep louva Guwahati a petrol pump jouse Sept. 7 akon khah ding

Guwahati, Sept. 5 : Oil companie hon daan toh kitoh louva dealer ho asuhgenthei jing jeh in North East India Petroleum Dealers Association  (NEIPDA) akon Greater Guwahati Unit member hon ahung lhung ding Sept. nisim 7 akon Greater Guwahati sung’a um petrol pumps um jouse phattep louva kha ding in phongdohna ananei in ahi. Hetthei khat chu testing kibol phat sung’a Govt. leh Court in Covid-19 natna jeh’a relaxation akoi vang in oil campanie hon dealer ho thil jat chom chom in suhgentheina einei jing uvin ahi tin dealer association in aphongdoh naban’a Sept. nisim 7 akon Greater Guwahati region sung’a um oil pump jouse kha ding injong asei in ahi. Chule hiche thilsoh hi Greater Guwahati region sung’a um Bharat Petroleum Corporation Limited (BPCL) in petrol dealer chan khompi Ellora Debi, RRND Service Station, Beltola, Guwahait asuhgenthei jeh ahi.

Hiche toh hon’a BPCL in Ellora Debi heng’a hunam in dealership agreement sing abol lou leh petrol le diesel supple bol angah ding in August nisim 31 nikho chun gihna jong ananei in ahi tin association chun aseiyin ahi.

xxxxxxxxxx

Jilkung ho nikho a President Kovind in jilkung mi 47 ho National Award pehdohna nei

New Delhi, Sept 5: Tunia President Ram Nath Kovind in jilkung mi 47 ho National Award apehdoh lah a Odisha a pat mitcho ho jatchom beh a lekha hil le Uttarakhand a pat thinglhang gam a simlai ho ngailutna nei jilkung jong apang uvin ahi.

Kovind in kipaman sang lah a 40 percent numei ho apahcha dehset in chule Dr. S Radhakrishnan in themjil agelkhohdan melchihna a tuni apen nikho hi jilkung nikho a kimang ahi e, ati. Chule hitobang phat hahsat lai a mun gam la tah a nam nem simlai hon jong themjilna aphatchompi thei ding a tohgon neiphat jong ahi, ati.

Chule National Education Policy a pat ga hoitah ahung so doh nading in jilkung hon panmun lentah anei e tin President Kovind chun aseiben ahi.

Union Education minister Ramesh Pokhriyal Nishank in asei na ah gamsung khantou machal nading bidoi, themjil lam a khohsah ding ho le aphat dungjui a kikhelna ngaichat ho het them ding chu jilkung ho mopohna ahitai, ati.

Jilkung kipaman sang holah a Odisha gamsung Khorda a pat Bhima Bhoi School for Blind jilkung Tapas Kumar Mohanty chun themjil lam a mitcho ho manchah ding lekhabu le audio semdoh ahi in, Dehradun kom Eklavaya Model Residential School vice principal Sudha Painuli chun nam, nem simlai ho ngailutna nei a lekha kihildan jatchom beh boldoh ahi in, government Primary School jilkung Snehil Pandey in simlai thanop pi thei dia kihilna jatchom beh boldoh, Delhi hopsung Mount Abu Public School a pat Jyoti Arora chule Delhi hopsung Adarsh Nagar MCP school a pat Surender Singh ho chu kipaman sang achom beh a melchih thei ho ahiuve.

==============

Alamlou a numei chunga chonho gotna gahtah pehding ngehna a Governor kom a lekha pehlut hi

Imphal, Sept 5(ET): Mayang Imphal Police Station hopsung a kum 14 numei chapang chung a chon thanghoi ho gotna gahtah pehding in United Women Rights Defenders (UWRD) in tunichun Manipur Governor Dr.Smt. Najma Heptulla kom a ngehna lekha apetan ahi. UWRD chun Mayang Imphal Police Station hopsung Heibongmakhong Leikai  a cheng Sikender Ali chapa Phusam Majja Khan lamkaina a mi 5 hon September 1 nia chu numei chapang nu apuimang uva khat khat a kilhah tho a asuhset chu police hon phatsot tah hahsa tah a aboipi nung a local MLA in numei suse mi 2 chu police kom a athahlut hi POCSO Act noi a thilsoh jihlut nading a Imphal West SP le Mayang Imphal OC gahtah a thupehna neiding le numei chapang nu insung mi ho kithopina agangthei pen a gonpeh dia Social Welfare Minister thupehna neidia jong a Governor chu temna anei u ahi.

Chule hiche thilsoh thudol Supreme Court of India retired Judge lamkaina mithum lom in vetlhahna neidia  Prime Minister le Union Home Minister kijahmatpi dia jong Governor kom a ngehna anei u ahi.

==============

Ccpur Kuki Kiloikhomna hon sum kiguh demna nei

Ccpur, Sept 5(ET): Churachandpur sung a Kuki mipi kiloikhomna ho in kigomkhom in ATM booth ho a koi ding sum dangka 1.15 crore lam kiguh doh na chung a demna sangtah ahin nei uvin ahi. Hiche sum kiguh na a sum pole a pang Ranjan Meitei kithana demna jong kiloikhomna ho chun hatah in demna ahin nei uvin ahi.

Hiche sum kiguh toh lhon a AT mho kikha na chung chang a mipi sum lah na ding aboina ho pohdohna jong kiloikhomna ho chun ahin nei uvin ahi. Tulai a Job card, PM KISAN ahilou le sum lahdoh na ding a mipi in ATM ho aman jing ahi toh lhon a, mipi in lunggim na anei jing dan u jong tahlang na ahin nei uvin ahi. Hitobang a sun chang laitah a gucha nomtah a kilhai mang sah na chung a thudoh ahin nei utoh lhon in gucha ho agan na thei penna matdoh a aum na ding uvin jong hetsah na ahin nei uvin ahi.

Xxxx

Koite a inn 2 mei in ka

Ccpur, Sept 5(ET): Tunilhah chun Churachandpur Koite kho a inn ni mei in ana ka in ahi. Meikah thu ana jah toh lhon in Ccpur fire service in ana del lut uvin ahi. Innei pa chu Seikholen Haokip ahin,  inn neite umlou kah ahi toh lhon a akitong le athi amang ana umpon ahi.

Hiche meikah achun cylinder jong ana pohkeh in ahi akiti. Meikah chu mei gui akon hiding in ginmo ahi.

Xxxx

NH-103B Haosa kiloikhom hon compensation thu a thuphon bol; natong ho ngahsah u

Ccpur, Sept 5(ET): NH-102B a haosa kiloikhom hon thuso anei nauvah chun lamlen kehlet ding toh kisai achesa nisim 01, September, 2020 nikho a Mr. Pawan Yadav IAS, Deputy Commissioner, Churachandpur in NHIDCL ho henag “Natoh pat thei ahitai” ti thupeh ana neyin ahi. Hiche thupeh hin lamleh kehlet ding ahitoh kilhon a asuhkhah ding kho le veng, thei phung, thinglhang lou leh neh le chah kiholna mun ho a seitohna imacha umnailou va thuso abol hi agam mipi musit naleh kimuneo na ahi tin atahlang un ahi.

Hichetoh kilhon chun lamlen kehlet in hung um leh inn le lou chenna ding neilou tamtah hung umding ahitah jeh asuhkhah ding kho haosa phabep NHIDCL ho hengah kinoptona hoitah aum kahse a koiman natoh atohjom thei louding in gihna jong akineiyin, koi  company hijong leh thupeh juiloubaum leh haosa kiloikhom hon kimohvet lou ding, asuhkhah ding ho jouse compensation aum kahse a koiman natoh apat thei lou ding ahi tin jong thusodoh chun aseiyin ahi.

Chuleh achesa kum 2018 chun Imphal – Moreh lamlen kehlet ahi laichun asuhkhah ding gam ho compensation Rs. 60/sq. ft. ana peuvin, ipi ati leh DC Churachandpur in ei thinglhang gam a ding a compenseanem pen Rs. 8/sq.ft. recommend abol a solatium leh achom chom ho igopkhom leh Rs. 32/sq.ft. ahijou ham ham in ahi. Hitobanga compensation rate achelhah jing leh khonung geiya melchih a um jing ding, boin tampi ahin lhut thei ahi tinjong thusodoh chun atahlang in ahi.

 Compensation toh kisai a agam sung mipi ho lunglhaina bang tah a peh ahung hithei nading leh akinthei lam a suh bulhit ahung hitei nading a haosa ho kithopi cheh ding injong temna jong aneiyun ahi.

Xxxxx

Numei chapang suse a kingoh mi 4 police khut a um ta

Imphal, Sept 5(ET): Manipur police in tuni in numei chapang kum 14 a upa khat suse a thina to sah mi 4 chu ana mandoh taovin ahi.

Hetthei khat chu thilsoh toh kisai a thina toh numei chapang nu tahsan chu RIMS morgue a um nalai ahin, athu kisei lhah lou jeh a lah lou a ana um jing nalai ahi.  Police in alang khat a athinu insung mi ang a post mortem ho bolthei an ding a phalna apeh ding uvin temna ana nei uvin ahi. Hetthet khat chu Mayang Imphal Bengoon lhang sung a mip iho in hiche chapang nu thina toh kisa a JAC khat jong semdoh na an anei u ahitan ahi.

XXXXX

Moreh PHC a achesa lha khat sunga naosen 10 ana peng

Tengnoupal, Sept 5(ET):  Primary Health Centre, Moreh a achesa lha khat sung in naosen 10 ana peng in ahi akiti.

Hetthei khatchu Moreh Sub district hospital  a achesa July nisim 24 akon covid natan nei ho bou anakijan pan tah toh lhon a Primary Health Centre joh a dammo an nei ho ana kijan pan ahi. Tuni in PHC sunga  block program management Unit Moreh in PHC moreh munna kingon khat ananei uvin ahi. Tuni kingon achun Dr. Kh Gojen Singh, Chief Medical Officer, Tegnoupal, district, Dr. H. Manoranjan Singh, Medical officer in charge, sib district hospital, Moreh, le Dr. Kh Santikumar, Medical Officer in charge Primary Health Centre Moreh ho in panlah na ana nei uvin ahi. Achesa lha sung a nao som lam lolhing tah a ana kinei sah jou jeh in PHC sung a grade 4 natong L. Thaba Devi le Dh Veikim Aimol teni ang a kipa thilpeh ana kipe in ahi. Hiche kipaman chu Dr. H Manoranjan, Medical Officer in charge, Sub district hospital in pehdoh na ana nei ahi.