Manipur a Covid-19 jeh’a mi 4 thikit, agom a 44 lhingta; positive...

Manipur a Covid-19 jeh’a mi 4 thikit, agom a 44 lhingta; positive 7,470 phata

67
0
SHARE

Manipur a Covid-19 jeh’a mi 4 thikit, agom a 44 lhingta; positive 7,470 phata

Imphal, Sept 10(ET): Tuni nikho chun natna chom chom toh kitho COVID-19 natna nei mi 4 in thina atuo kit toh kilhon in Manipur sunga COVID-19 a thi agomin mi 44 a lhing tan chuleh natna nei agomin mi 7,470  aphatan ahi. Hiche hi Thursday nikho a athah beh a natna nei mihem 108 akimube toh kilhon ahi tin official thulhut chun aphongdoh in ahi.

Natna athah a kimi mihem 108 lah a pasal 59 leh numei 23  agoma 82  hi milham ahiuvin chuleh adang 26 hi Central Armed Police Force (CAPF) ahiuve.

Hiche natna thah kimube ho hi VRDL, JNIMS- 12; VRDL, RIMS – 17; Thoubal – 17; Noney – 2; Shija Hospital — 1; Jiribam – 10; Ukhrul — 1; Churachandpur – 16; Babina Diagnostics – 9; RIMS RAT – 6; Bishnupur – 4: Imphal East – 2; Samaritan – I; Imphal West – 2; Tamcnglong – 3; Raj Mcdicity – 5 akon a kimu ahiuve.  Chuleh ahung kondoh nau leh ami jat ahileh Imphal West – 15: Bishnupur -6; Churachandpur -3; Tamenglong – 3; Tengnoupal 2; Kakching -I; Jiribam – 3; Imphal East – 11; Thoubal-37; Ukhrul -1. Chuleh mi 8 (Tamenglong – 1; Jiribam -3, Ukhrul – I, Imphal East -1, Bishnupur – 1, Thoubal -1) amaho se hi gamdang a kon a hung kinung le ho ahiuvin, chuleh adang mi 74 ho hi milham ngen ahiuvin, lhun le kondoh na neilou ngen ahiuvin ahi.

Chukit leh JNIMS mun’ah Imphal East a konin pasal 2 kum 46 mikhat leh kum 68 khat in thina anatoh in, RIMS mun’ah Imphal West a konin numei kum 74 khat injong thina ana toh in ahi. Chuleh, CAPF khat akum 42 khat jong Churachandpur District Hospital munah thina anatoh kit in, tunia mi 4 in thina atuobe kit toh kilhonin agomin mi 44 aohatan ahi.

Nidan 24 sung chun adamdoh mi 245 lhakang in ana umbe kit in ahi.

Damdohna neiya lhakang a um ho hi CAPF (158). JNIMS (9). RIMS (5), CCC Landing Wangjing Thoubal (8). CCC Lamboikhongnangkhong (34). CCC UNACCO (28). CCC TK. Ukhrul (1) leh CCC Kangpokpi (2) a kon ahiuvin, RT PCR test kibol jouva negative ahiutoh kilhon a lhakang ana hiuvin ahi.

Natna nei agoma tuni chan a kimandoh hi 7470 (milham – 5706 leh Central Security Personnel -1764) alhing tan, adamdoh hi agomin mihem 5793 (milham – 4422 leh Central Security Personnel -1371) alhing tan ahi. Tutua natna neihi agomin mihem 1633 (Milham -1243 leh Central Security Personnel – 390) apha tan ahi. Chuleh recovery rate hi 77.55 % ahitai.

Xxxxxxx

13th September ‘Black Day’ nitcheh ding’a KNF-N in thuphon nei

Imphal, Sept 10(ET): Achesa 7th September, 1995 nikho a Kuki Inpi kilolna (Resolution) No. 5 dungjui a Kacha Naga, NSCN IM hon Kukite Gaal eina bol nauva 13th September itamthi napen u nikho hi ‘Black Day’ tia mancheh ding kiti ana hi jeh leh Kuki Inpi thupon tosotna akineina ban a, avella mipiten hiche nikho hi jabolna neitah a tukum jong ina man cheh  diuvin hetsahna ahung kinei e tin Gou@Kuki, Information & Publicity, Govt. Of Kukiland, KNF-N in thuphon aneiyin ahi.

Kum 30 lhing deh Kukite dandih loutah a kitha nale kho tampi kisuh mang na chunga tuchangei a Govt. of India kihetmosah a aum danhi ivetle NSCN-IM toh kitho a eitha ngap u ham tihi kigeldoh kom aum tai. Hijeh hin, Govt. in akin thei penna NSCN-IM ten Kukite chunga anatoh hoilou dan hi asuh fel gang ding akul’e  jong ati.

KNF-N in mona neilou Galmi te khut a, ana amollem tasa Kukite jouse lainat pi naleh kangailut nao sangpen kahin pe uvin, chule adalhah insungmite jouse jong lhamonna thuthot akineiye ati. Chule tukum hi kumdang banga kikhop komna umthei lou ding ahi jeh a Houbung jousen Angol tao na le amollem sa ho geldoh na kin hi imancheh diuvin Kukite jouse temna akineiyin, Haosaho le Khopi sunga lamkai ho vetkol na a kailhang leh, Inson na ponvom ina khaidoh cheh diuvin jong thupeh ahung kinei je ati.

Tangkhul te lamkaina NSCN-IM hon Pukhang Pakhanga pat ichen nao gamsunga thangthipna ahin neiuva hem le thal mangcha a, thagum ahin pat uva Gaal eina bol khum uvin numei chapang jaonan  mi 1000 val melse tah in eina that un, Khopi 360 eina haal lhah peh uvin chule mihem lakh khat val chenmun gemun kisuh louva eina lha u ahi.

Xxxxxxxxx

LTT in Twilangkuol mipite damtheiding deisah; KNO le UPF in amiho anunglahdoh ding’a temna nei

Imphal, Sept 10(ET): Liberation Tiger of Tribal’s (LTT) kiloikhomna Information & Publicity, David Kuki tin thuphon aneina ah achesa kum phabep sung chun Twilangkoul area ahin UTLA(J) hon vai anahom uvin hinlah mipi lungmong le lhamong in ana khosa pon inchen lou chen umtheilouvin agamkai ana cheh chao uvin koima dellou vohlou a agamhi mihem bei a agam leiset achanlo diu phat in nampi khonung ding gel nan, phat sot tah akigel nung achesa 17/8/2018 nikhon Twilangkuol a LTT Organi­sation hi tule khonung a nampi dindoh kit na dinga ki phut doh  ahi ati.

Alhang mipi te hahsat genthei jeh in chang le mim jeng jong donle kai akibol pon, mipi toh lung mong lha mong in aki khosa khom in mipi jong lha lengvai na kilena agam kidona hinte tin organisation aki neppi nao aphong jing uvin hinlah ipi atile agam mipi te lung mong lha mong nai lou lai a agam ma boina sem dinga KNO leh UPF in akhut ahin thillut na ajat le anam khat that ding’a Indian Army ahin pui lut jeng ahidem ati. Chule agam ngah dinga umho govt, sepai mangcha a nadel lele uhi, gam le nam leiset ngailu na hipouve tithei khop hel ahi. Hiche chung changa ijem tia KNO leh UPF in kahephapoi na ti Ihon lou na din amasan isung’u kikhol chil masa din ikitem uve tin aseiben ahi.

Hetding chu LTT hi nam natong ding ahijeh in nampi mina doulel le jolel ding akinei poi. Hijeh chun manthah le boina asolou na din, nung chih sangin machih uhitin KNO leh UPF in amicheh akinung lah doh din iki tem uve. Chutilou chun LTT in agam hi kida lhalou ding thisan vatkang gei ja kipang ding tin le haa tho’a agam ki veng tup ding ahi tin thuphon chun aseiben ahi.

Xxxxxx

59-Saikot A/C MLA TN Haokip in Constituency sung’a Orphanage Home leh Disable Centre ho vilna neu, Covid-19 Review meeting um

Ccpur, Sept 10(ET): TN Haokip, Hon’ble MLA 59-Saikot A/C in tuni chun Constituency sung Orphanage Home leh Disable Home ho vilna aneijin chuleh amaho tilkhouna leh panpina in Anchang leh Dal ho ana pen ahi. MLA pan tuni agavil na ho chu, Children Home, Saikot; Gilgal Children Home, Muolvaiphei; Salvation Boys and Baby Home, Muolvaphei; Tunnu Limbel Orphanage, Zomi Colony; Vondei Saulim Orphanage, Zomi Colony; Sanga Muon Inn, Bijang; Mercy Home, Kamdou Veng leh Gospel Ministry for Disable India, DHQ, Tuibuong ho ahi.

Orphanage Homes ho vilna aneijouvin Ngamhao Touthang, Hon’ble MDC inmun’a 59-Saikot A/C Covid-19 Committee review meeting aneipi in, SDOs, Doctors chuleh CQC vekhol a pang KSO, KKL ho jong hiche meeting ah ana jao uvin, gamsunga Covid-19 dinmun velvetna aum in, phat che dungjui in Gampam a kon inlam hung kile alhom tah tohlhon in Community Quarantine Centre mun 8 ho KSO leh KKL hon avetkol ho kha ahitah toh lhon in COVID-19 Committee jong phet ahitan ahi. SDO ho leh KKL, KSO hon jong houlimna anei sohkei uvin COVID-19 kimaituopi na a MLA pa in amakaija Sum leh Neh le chah ho a nasatah a pan ahinlah chunga pachatna leh kipa thuphonna  anei uvin ahi.

MLA TN Haokip in aseina achun COVID-19 frontline a pang ho sun le jan a anneh tuidon manlouva panla ho jouse chunga kipathuseina leh pachatna aneiyin ahi. Chuleh gelphah louva Novel Corona virus in gamsung pumpi eihin lhunkhum uva, gamsung mipi beidonga iin ana umjong leu hen, Pathen lungset in phat le nikho achedung jui in neokhat oldom in i-um thei tauvin, Covid-19 kichai hihlai jong leh boina in eidalhah uva maban a kinepna leh tohgon chom chom jomthei kitdin mipi ho lhamonna jong aneiyin ahi.

Covid-19 natna in eidalhah uva gamsung pumpi a angaibang a toh le tham ipat theikit na diuvin Pathen in phatpha eihin pekit uhenlang cham le lungmon, kipa thanop napum a mailam ahunglhung ding KUT Chibai abol in ahi.

Xxxxxxxxxxxx

Online test bollou ding’a KSO Ccpur in Principal /Headmaster ho heng’a ngehna nei

Ccpur, Sept 10(ET): KSO Churachandpur in district sung’a online test bollou ding in Principal le Headmaster ho hetsahna thuphon aneiyin ahi.

Tuni Information & Publicity Department min a thuphon kimun aseina ah district sunga Principal le Headmaster ho henga hetsahna le tiemna thuphon chu Covid 19 pandemic hin thil ijakai hahsatna alhut in, lekhasim nalang ajong nikho tamtah asumang in chule School ki kaitheilou ahijeh in Government in online class bolding tohgon nasatah in achepin hinla sum le pai muna lhasam ho le thinglhang a um ho din hahsatna nasatah apen, simlai chapang hodin hahsatna lentah apen ahi.

Innsung hahsaho (smartphone, computer etc neijoulou ho) gelkhohna jeh le munjouse a internet connection kisuhtah a umlou jeh in online class bolding tihi simlai chapang hodia thil hahsatah ahidan jong aphongdoh in ahi. Hijehchun Churachandpur sunga themjilna mun ho a headmaster ho le Principal ho henga koimachan online test (semester/internal) abol theilou ding ahi, tin KSO Churachandpur Information & Publicity Department in hetsahna le tiemna abol in ahi.

Xxxxxxx

Nagaland Governor RN Ravi in NNPGs hotoh official meeting nei

Imphal, Sept 10: Nagaland governor RN Ravi , Naga Peace Talks a Interlocutor leh Government of India  a dinga palai chun tuni chun Working Committee (WC), Naga National Political Groups (NNPGs) hotoh Dimapur, Nagaland a um Police Complex, Chumoukedima mun’ah officials meeting ana neipi in, hiche meeting a chun WC, NNPGs convenor N. Kitovi Zhimomi jong meeting a chun ana pangin ahi tin ginchat umtah thulhut chun aseiyin ahi.

Lunglut umtah khat chu hiche kihoulim khom na hi Centre leh Naga Political Groups ho kikah a kinoptuona aneikhom diu nailamcha a aumtoh kilhon kibol hidinga tahsan umtah khat chu ahi. Tuni kihoulim khom na hi lhani jouva Interlocutor Ravi leh NNOGs kikah a akihoulimnau anivei channa jong ahitan ahi. Kihoulim khomna masa chu achesa nisim 14 July, 2020 nikho chun Nagaland Commissioner’s Guest House, Dimapur mun’ah ana neiyun, hiche kihoukhom na achun ahunglhung ding achaina adia kinopto na neiding toh kilhon in action plan jong ana sem un chuleh draft agreement jong velvetna leh achaina hoitah a sem dingin jong seilhahna ana neiyun ahi.

Thulhut kimu in aseibe na ah, Ravi in kinoptuo na leh chamna thu kiseina ding a Nagaland sunga minority tribe hojong jaosah dingin phut na aneiye tin atahlang in, chuleh NSCN-IM hotoh kihoutoh thei leh boldia kilom ho boldoh ahi nading a Interlocutor in phat chomkhat angaichatbe ahidan jong thulhut chun aseiyin ahi.

Xxxxxxxxx

India a nidan 24 sung’a COVID-19 thah 95,735 kimube; tuchan a akimudoh tamna pen hinalai

New Delhi, Sept 10: Nikho khat sunga dinga Covid-19 natna kimube tampen mihem 95,735 akimube toh nikhat sunga thina tuoh mihem 1,172 alhin tah toh kilhon in, India sunga COVID-19 natna nei agomin 44-lakh aphatan ahi tin Ministry of Health and Family Welfare thuso chun aphongdoh in ahi.

Coronavirus cases agomin 44,65,864 alhing tan, mihem 9,19,018 hi tule tua active cases ahin, chuleh adamdoh mihem agomin 34,71,784  alhingtan chuleh thina toh mihem 75,062 aphatan ahi tin Health Ministry in atahlangin ahi.

Maharashtra hi tuchan a natna nei tamna pen ahitoh lhonin tunia natna nei athahbeh a 23,816 aki mudoh kit toh kilhon in agomin COVID-19 cases chu 9,67,349 aphatan ahi. Hiche lah ahin active case 2,52,734 apha in chuleh adamdoh 6,86,462 apha in, natna dantoh kitho a thina toh 27,787 aphatai tin State Health Department in atahlang in ahi.

Andhra Pradesh a natna kimudoh jat agomin 5,27,512 apha in, 97,271 hi active cases ahi in chuleh adamdoh jat agomin 4,25,607 apha in chuleh natna dang toh kitho a thina toh agomin 4,634 aphatan ahi. Chuleh Delhi in nikhat a dingin Covid-19 natna thahbeh nei 4,039 amudoh in hitoh kilhon chun agomin 2,01,174 aphat tan ahi.

Langkhat ah, Indian Council of Medical Research(ICMR) in tuni chan in agomin  samples test 5,29,34,433 jat aboldoh tauvin ahi. Samples test September 9 geiya kiboldoh hi 5,29,34,433 aphatan hiche hi janhi a test kibol doh 11,29,756 toh kigomkhom ahi tin ICMR thuphon chun atahlang in ahi.

Xxxxxxx

Hospital 2 in Covid test result chom chom pedoh

Imphal, Sept 11(ET): Gampam akon Manipur a um mi khat Babina in RT-PCR test dungjui a positive ana tiu chu anikho mama in Regional Institute of Medical Sciences (RIMS) a test kibol na a negative ahi kit in ahi.

Hiche mipa chu Nagamapal Paonam leikai a bhara a um ahin, alhangsung club le COVID-19 response committee in Health department ang a pehdoh na ana neiyu ahi. Nagamapal Paonam leikai club lamkai Lalitchandra Soibam in aseina a akiseipa hin buhse natna anei toh lhon a Babina a test akibol na result chu seidoh lou a RIMS a kivetsah na ana neina a test akithah bol le negative hi ahi ati.

Xxxxxxxxx

NCM in Ccpur a Archaeological site a nakitong ngahsah

Imphal, Sept 10(ET): Manipur government in Thinglhang mite gamsung leh aneite phalna louva thusim semthu ho mangcha a lahpeh ding agot jing chu National Commission for Minorities, Govt of India in ana phalpeh loutoh kilhon in natoh hojong suhtang ahina ding in thuphon ana neiyun ahi.

Commission chun Archaeological Survey of India heng’ah Churachandpur district, Singat Sub-division hopsunga Behiang mun a um Chivu mun a Chandrakirti Singh Memorial Park kisemna dinga hetpehna kibol ho jouse anung lahdoh a natoh jong suhtang hiding in thupeh ana neiyun ahi.

International Human Rights Association Manipur Chapter panlahna jal a achesa 2007 kum a United Nations in indigenous rights(UNDRIP) kisem dungjui a thinglhang mite thunei na leh gam le go ho venbit a aum ding deina jal in pan nasahtah in ana lauvin ahi.

Alangkhat ah IHRA injong National Commission for Minorities in India sung leh adeh a Manipur sunga nam lhasam leh namlhom ho thanei na ho jabol pehna leh venbitna aneipeh na chungah akipanau jong ana phongdoh un ahi.

The IHRA besides lauded and appreciates the initiative taken by the National Commission for Minorities for safeguarding the rights of the underprivileged and minority groups in Manipur and the rest of India.

Xxxxxxxx

By-election naitoh kilhon a lamlen ho semphat a um

Imphal, Sept 10(ET): By-election hunglhung ding koncha ahitoh kilhon a Chief Minister of Manipur in Wangjing Tentha Assembly constituency, Ex-MLA Paonam Brojen ading a election campaign hondohna aneitan ahi. Ex MLA Paonam Brojen membership a haina aneijouva election tet kit dinga kisahkholna aneitoh kilhon in a Constituency sungah developmental works chom chom atongpan tan ahi. A Constituency sunga 34/3 polling station umna Dhananjoy leirak leh Samei Loukon kho teni kikomtona lampi kilometre 1  a sao chu kum phabep don le dai louva ana um chu asetna mun jouse semphatna chu by-election tet dinga kigong P. Brojen in aneiyin ahi. Hiche lampi hi Tentha mite adeh a loulhou mi ho a dinga kihinso na lampi khat ahi naban a loumun 300 hectres val umna leh nga vahna phabep umna jong ahi.

xxxxxxxxxxxxxxxxxx

Mun phabep a Khamnathei le mi kiman

Imphal, Sept 10(ET):

Imphal, Sept 11(ET): NAB PS in tuni in Lalboi Haolai, akum 26 a upa, apa min Lenneo Haolai, Mollen, Saikul, Kangpokpi akon chu Dolaithabi Dam akon ana mandoh uvin, ama akon in brown sugar kg 2 matdoh in ana um in chuleh kani kg 4 jong an akimudoh in ahi.

Alangkhat a nilhah lam nidan 5 lam in Kakching District Police in Thoubal District Police toh kitho in WY tablet sangsom lam ana mandoh uvin ahi. Hiche tablet ho chu Abdul Wahid, 26 yrs, son of Md Abdul Manal, Lilong Chaobok, Mareimayum Akbar Ali, 26 yrs , son of Md Abdul Hakim,  Lilong Chaobok Mairen Khun le Md Tarique, 22yrs, son of Md Karim, Lilong Upak Thong akon ana kiman doh ahi.

Kakching police coammando hon jong tuni in Kakching Nature cure lhang sung a ju joh ho matna ana nei uvin ahi.  Police ho chun ju joh M. Ibomcha Singh le Sanayaima singh ana man doh uvin dangka 500 cheh leusah na ana kinei jou in aju lhon ho chu ana hal mang peh uvin ahi. Thuso chun asei be na a Nobin, Sumita Nembi, Y. Ojit le Eshingchaoba ho inna kon in ju litre 50 lam ana kiman doh in ana kihallha soh kei in ahi akiti.

Janni nikho jong chun nilhah lam nidan 4:00 vel chun CDO-BPR a ASI Haridas leh Hav.Islamuddin lamkaina in OC-CDO-BPR thupeh na leh SP Bishnupur  vaihomna nuoi a Toronglaobi Maning Gurukhana Leikai mun a checking ana bol nauvah Kenbo bike (black) khat Molngat kho a kon a hung lhai chun police ho peldoh ding aguot laitah in ana khamtan un check ana bol un ahi.

Hiche Kenbo tol leh matdoh a umpa hi Yamkhothang Baite (40) yrs S/O (L) Sodou Baite of Leisanbung Village ahi in, ama akonin Nylon bag sunga plastic 9 tah a kichun Kaani Kg. 9.01 chu ana mandoh un ahi. Matdoh a aumjouvin aki mandoh ho Moirang Police station a pehlut ahitoh kilhon in case jong jihlut ahi pai in ahi.

Xxxxx

Moreh sung a Covid toh kisai kilha ong na um tading

Tengnoupal, Sept 11(ET): Tengnoupal MLA D. Korungthang in Moreh khopi sung a nam lamkai hotoh jani a kihou na ana nei toh lhon in Covid toh kisai a kilha ong phabep aum tahding dan kinoptona ana nei uvin ahi.

MLA pa jaona a kihou na kinei na achu khopi sung a nam lamkai ho in adei u thil ho hetsah na ana nei toh lhon a ahiding thei ding dol ho lha ong na kinei tah ding dan tahlang na ana kinei in ahi. Kihou lhah na toh kisai in kopi sung a dukan ho jong abon in akihong pan tan ahi. MLA pa toh kihou na a panlah kiloikhomna ho chu Meetei Council Moreh, Hill Tribal council Moreh, Tamil Sangam Moreh le Gorkha Samaj Samiti ahi.

MLA pan ahoulimna achun Covid akon dammo na nei jong hi atam cheh cheh in chuleh ahung damdoh jong akibe jing jeng in hiche toh lhon a kilha ong na kinei ding hinlah hiche natna hi amang ahi lou lai toh lhon a mipi in kichih thei na anei jing ding dan u hetsah na ana nei in ahi. Inn pam pot jouse in maitom akitom cheh jing ding uvin jong temna ana nei in ahi.

Tamil sangam lamkai hon MLA pa heng a chun Moreh sung a um Hindu sakho chepi ho ding a Moreh ward no (5) a ana um building toilet in ana suh set jing toh lhon a mi kihel na mun sem phat ahina ding in temna ana nei uvin ahi. Football ground fencing jong aum lou jeh a kichep golseh lunglut ho in hahsat na ato dan ho u jong tahlang na ana nei in ahi.

Manipuri Muslim Council Moreh lamkai ho in MLA pa ang a football ground fencing le twi lon na ding umlou toh lhon a gojuh seh le lhang lhoh lon lut jing jeh a ground umdan ahoi tah loud an hetsah na ana nei utoh lhon in akin thei pen a fencing semding adeidan u tahlang na ananei uvin ahi.

Kiloikhomna chun school semphat ding le nehdingtwi kining lhing tah a mu ding adei da u jong tahlang na ana nei uvin ahi.

Xxxxxxxxxxxxxxxx

Tengnoupal le Chandel a World Suicide prevention Day kimang

Tengnoupal, Sept 11(ET): District health society Tengnoupal (NHM Manipur) makai na noi in  District Mental Programme DHS Tengnoupal in Primary Health centre (PHC) Tengnoupal  a World Suicide Prevention  Day  ana mang uvin ahi.

Hiche kingon chu ‘working Together to Prevent Suicide’ kiti thupi noi a ana kibol ahi. Kingon achun Reikimder Khaling,  SDO Tengnoupal le Machi chu jin gun in ana pang in chuleh Dr. Kh. Gojen Singh, Chief Medical officer (CMO) Tengnoupal District chu kinnei pa in ana pang in ahi. Leiset chung a suicide hi iti tan sah dingham ti hu in kihoulimna ana um in ahi.

Tuni kingon achun resource person ding in Dr. H. Manoranjan Singh Medical officer in-charge   Sub- district hospital Moreh le Dr. Kh. Imocha singh Medical officer in-charge Primary Health centre Tengnoupal teni ana pang lhon in ahi.

“Working together to prevent Suicide” kiti thupi noi a Chief Medical Officer, Chandel District office mun a ana kimang in ahi. Tuni kingon chu District Mental Health Program (DMHP), Chandel le District Health Society (DHS) Chandel in Dr. Sethani Serbum, Chief Medical Officer, Chandel makai na noi a abol u ahi. Dr. Kh. Robindro Singh, Member Secretary cum CEO, Manipur State Mental Health   Authority in thupi chung chang a houlimna ana nei in ahi. Kingon toh kisai in lekha beh hopdoh na jong an akinei in ahi. Suicide a thi ho geldoh an in jong candle detna kingon ana kibol in ahi.

Xxxxxxxxxxxxxxxxxxx

Dan dihlou a Job Card a min khum jeh a GRS natong khat kihaisah

Imphal,  Sept. 10(UNA): Nikho khat masanga Rozgar Sahayak (GRS) natong khat Konthoujam Gram Panchayat mun a suspend akiboljou nungin, Phumlou Gram Panchayat mun a GRS natong dangkhat jong Job card holder dan dihlou tah a enroll abol jeh in suspend ana kibol kit in ahi.

Hiche GRS natong suspend kibol ahung umdoh thei na hi Rural Development & Panchayati Raj Minister, Thongam Biswajit Singh’s panlahna noiya Mahatma Gandhi National Rural Employment Guarantee Scheme (MGNREGS) sunga government sum le pai ho dan dih lou tah leh nehguh chahguh a kibol ho kholchilna nei dinga thupeh a aumtoh kilhona hung kimandoh ahi.

GRS natong akimandoh pa hi Sapam Ranadev Singh of Keishampat Top Leirak, GRS, Phumlou Gram Panchayat mun a tong ahi in, P Gojendro Singh, Director RD & PR department in tuni chun order ana sodoh in hiche GRS natong suspend kibol hi under Rule 10 of the Central Civil services (Classification, Control and Appeal) rules 1965 dungjui a kibol ahi.

Thulhut in aseina ah, GRS Sapam Ranadev Singh hin Keishamthong Top Leirak a um a upa Sapam Iboyaima Singh hi Phumlou GP Job card Muster roll a amin ana hetlut peh ahi. Government Sum le pai ahiding bangtah a kimangcha louva nehguh ana hijing ding ginmo na jong aum in ahi. Amapa hin muster roll period 6/10/2019 to 30/11/2019 sung chun a account no. 9011010020679, Manipur rural bank, Kwakeithel branch ah Rs. 13,392 ana mu tan ahi

MNREGS fund phabep Panchayat authority holeh GPS hon adihlou leh alhem a job card holder asem jing uva sum le pai nehguh um ahidan thulhut aum toh kilhon a government in GPS holeh Panchayat authorities ho henga  min dihlou leh job card nei dinga kilomlou jouse aphat phat a vetchil na nei ding leh suhmang dinga thupeh ana neisa ahi.

Thupeh aumjing laiyin, Phumlou GP in MNREGS fund ho ahina ding bangtah in a mangcha pon, job card nei dinga kilomlou tampi aki haplut e tithu department in ajah toh kilhon a kholchilna kineina a GRS Sapam Ranadev in a upa Imphal Municipal area a um khat Phumlou GP muster roll a ahaplut chu hetdoh a hung um ahi.

Hitoh kilhon chun, Under Secretary, RD & PR department in District Programme Coordinator (MGNREGS), Imphal West in tahsa tah a hiche thu hi angaito a Phumlou GP a Pradhan holeh member ho chunga dan toh kitoh a show cause notice leh FIR chanpha bol angai jong leh abol dingu, chuleh nikho 4 kah a report apeh din jong thupeh aneiyun ahi.

xxxxxx

Covid Care centre Moreh akon sample ana kila ho lah a mi 49 negative hi

Tengnoupal, Sept 11(ET): Sub-district Hospital Covid  Care centre Moreh a kijen mi 14 ho toh district sung a police le medical staff ho sample JNIMS a test ding a ana kithot ho lah achun sample 49 ho chu negative ahiuvin ahi akiti.

Care centre a um mi 14 ho lah a mi 2 jong negative ahi toh lhon lhadoh a um lhon ding chuleh adang mi 12 ho vang chu centre a um jing nalai ding u ahi akiti. Dr. Ahongsamgbam Cecil, District Nodel officer Tengnoupal District in ahoulimna a positive mi um jeh a mipi in Moreh mipi ho jatchom beh a amu na louding uvin jong temna ahin nei in ahi. Moreh khopi sung a covid casre centre mun a natong ho jong mipi in athet na lou ding uvin temna ahung kinei in ahi.

Xxxxxxxxxxxxxxxx

Thingkangphai Primary School building kithenso

Chandel, September 10(ET):  Chandel District Chakpikarong Sub Divisiong sung a um Thingkangphai Primary School Building tuni in Zonal Education Officer Chandel, Lourembam Nabakumar Singh (MES) in thenso na ana nei tan ahi.

SSA (Sarva Siksha Abhiyan) noi a um school thenso na kingon achun ZEO Chandel noi aum Civil work co-ordinator Hb Starson Anal (MES)System Analyst- Jolly Anal, Assistant Inspector of Schools Yendrembam Lokendro (MES), Assistant Inspector of Schools/District Co ordinator -IED L.Mojesh Anal,District Programme Manager – Ringsan Sheiza le Thingkangphai haosa JN Baite ho  in panlah na ana nei uvin ahi.

School building hondoh na kinei jou chun Chakpikarong Block noi a um  Children with Special Needs (CWSN) simlai ho Transport le Escort allowance ho hopdoh na ana kinei in ahi.

xxxxxxxxxxxxxxx

Nagaland a covid case 261 kimudoh be

Kohima, Sept 11- Nagland sung a tuni in covid-19 case  261 lam ana kimudoh be in ahi. Tuni a kimudoh be hop um in state sung a covid case 4636 alhing tan ahi. Tuni a kimudoh be ho chu sample 741 test kibol na a ana kimudoh ahi. Nagaland health minister S Pangnyu Phom  in hetsah na ahin neina a tuni a case thah ho chu Dimpaur akon 197, Kohima akon  59 chuleh Makokchung akon 5 ahi akiti.

xxxxxxx

AR in Indo-Myanmar gamgi a lou mandoh u

Tengnoupal, Sept 11-     Assam Rifles in covid jeh a gampam akon mi hung lut ding phal hilou toh kisai a gamgi vetsui na an anei jing utoh lhon in gamgi a lou a kivei ho matdoh na ana nei uvin ahi. Jani jingkah lam nidan 3 vel in Haolenphai lam akon Myanmar lang akon mi che le jing an akimudoh toh lhon a Assam Rifles in ana dal lut na uva mi khat an amu uvin, mipa chun Assam Rifles ho amu phat in athill poh dalha in ana jam in ahi akiti. Alhang sung holna akinei na achun lou dangka 2.80 lakh lam ana mudoh uvin ahi. Hiche lou ho chu anakila in Moreh a um custom office a pehlut na ana kinei tan ahi.

Xxxxxxxxx

Raj Medicity in adamlou jen louding in akinung sol khapoi: Director

Imphal, Sept 11(ET): Raj Medicity veipo ho in dammo kijan a hung akinung sol khapoi tin Chairman le managing director, Raj Medicity Haobijam Rajen in hetsah na ahin nei in ahi.

Raj Medicity conference hall a thuso miho toh akihou na a  Rajen in achesa August nisim 6 nikho a naovop khat ana kilut sah lou thu chu adih lou ahidan tahlang na ahin nei in ahi. Hetthei khatchu galguh bol KCP (MC) Progressive in numei naovop khat jan lou jeh a hospital chu ana moso u ahi. Thilsoh chung chang a ahoulimna a Rajen in naovop nu chu Bolera kang khat a hung kipo ahin, nisim 6 nikho nilhah lam nidan 3.30 pm vel a hung u ahin, ahung lhun uva night manager pa in ala ding a aga lem le gari akon koima hung pot lou u ahi ati.

Manager pan thil umding dan ho hetsah na ana nei jou a gari sung a tou ho chun kihou na anei jou uva ana dalhah u ahi tin hilchetna ahin nei in ahi. Chairman pa chun Senapati akon kijan ding a hung khat hospital tamtah in ana lah lut lou u chung a adetmo na phondoh na ana nei in ahi.

Xxxxxxxxxxxxxxxxxx

MU in Semester exam ho bol ding

Imphal, Sept 11: University Grant Commission in India pumpi a semester exam ho ahunglhungding nisim 30 kah a bol ding thupeh ahin nei utoh lhon a Manipur University in anoi a um university le college ho semester exam abol ding ahi. Hiche semester exam bolding ahi toh lhon in exam ho kichai kah a college le university ho kihongding in govt in hetsah na ahin nei uvin ahi.

Xxxxxxxxxxxxxxxxx

CCpur District a peace protest rally boina umlouva chelha; CSOs leh JAC lamkai hon memorandum DC heng’a pelut

B.Lalboi Gangte

CCpur. September 10 (ET) : CCpur District sung’a Civil Society Organization (CSO) chom chom lamkai nanoi in tunin JAC leh mipin (L) Arambam Ranjan kitha nachung’a tolthat ho agannathei pen’a matdoh ahi nading in lampi jui na ananei uvin chule Chief Minister ading memorandum khat, Deputy Commissioner, Churachandpur khut’a pehlut najong ananei uvin ahi. Hiche Peace Rally chu Peace Ground akon Mary Kom Ring Road ajui uvin DC Office leh M. Songgel jotna  lamlen kisuh tona’a Police hon akham tan phat uvin hiche akon chun CSO leh JAC lamkai hon DC khut’a Memorandum pehlut nading in DC office ah analut uvin ahi.

Hiche peace Rally achun CCpur District sung’a cheng khom nam chom chom in placards chom chom kichoi in lampi juina anei uvin chuleh “Ranjan that ho gangtah’a matdoh hi hen”, “Tolthat demna kanei uve” tiho kholhang sap na jong anei uvin ahi. Hiche thilsoh chung’a Police hon ginmo in mi 3 thudoh anei uvin kholchil natoh kisai’a Police akon thuchen phondoh in um hih lai jong leh tolthat natoh kisai’a ginmo mi 3 mat’a um ahi dan aphongdoh in ahi. Kholchil na natoh achelha jing lai ahitoh lhon’a mipi lam akon tolthat ho matdoh na ding’a komuthei aum leh Dk. Lakh 1 peh ding in jong Police in thuphon anei in ahi.

Hiche toh lhon’a rally phatsung in CSO leh JAC lamkai hon Pawan Yadav, IAS, Deputy Commissioner, Churachandpur khut’a memorandum anapehlut sung uvin Amrita Sinha, IPS, Superintendent of Police, Churachandpur leh S. Khaikhopau Ngaihte, MCS, Addition DC hon jong pan anala uvin ahi. Hiche sung’a chun JAC lamkai hon thilsoh kipat dan toh kisai’a briefing anei uvin chuleh Sairam Ibungo, Convener in memorandum pehdohna ananei in ahi.

xxxxxxxxxxxxxx

Government in NHPC toh MoU akai People Progressive Council in kipapi

Imphal, Sept 10 (ET) : Manipur West People’s Progressive Council in government le National Hydroelectric Power Corporation (NHPC) in Noney District hopsung Longjang (Thangal) le Taosang Khunou mun a 66 MW Loktak Downstream Hydroelectric Project sah nadia August 31, 2020 nia Memorandum of Understanding (MoU) akailhon akipapina tunichun aphongdoh e.

CM N. Biren Singh makaina government in Go to Village, Go to Hills apatdoh hin mitin lung nasatah a ana chothou a abanle phaicham leh thinglhang kah a kihet themna ahin lhut be ding kinep aum thu jong Council in asei e. Council in aseibena ah government masa in achesa kum 45 sung hin mipi thuneina ana gelkhoh pon hinla MoU kikai hin mipi ho kisuboi lou ding mipin jong khan touna thei thil hohi doudal lou din temna aneiye.

Council in hiche tohgon hin alhang mipin akhan toupi ding, free electricity chuleh skilled leh unskilled categories a jong reservation kikoi ding ahi, ati.

Hiche “Go to village, Go to hills hin thilpha tamtah ahin lhut dinjong aseibei.

Xxxxxxx

Tahsa kum 70 tehse pasal khat in World Suicide Prevention Day nia ama hinkho ana kisuhchom                          Imphal, Sept 10(ET): Tuni jingkah matah chun kum 70 tehse pasal khat Imphal West District hopsung Maklang vadung lei kisem namun a pat athisa mudoh ahi.

Police leh amun a mipi ho seidan in mipa hi khao a amale ama kikhai lih hidin aging mo uvin ahi.

Gah hetthei khat chu tuni kho hi World Suicide Prevention Day ahi e.

Amahi kum 40 tobang Mumbai lah a vaitham le, limkap them Firoz Shakir in a insung mite toh ana kimu tosah ahi.

Athipa hi amin Gambhir Singh kum 65 ahi a achenna Khumbong mun a April 19, 2018 ni a chu thahlut anahi ahi. Atahsa thisa chu lei a thih holah ah kikhai sa a jingkah a lhai hon 3:30 AM  vela amudoh u ahi.

Xxxxxxx

Kum lhinglou numei nu long koidoh hita; kingon a mona neiho matdoh ding lhangsap u

Imphal, Sept 10(ET):  Numei chapang kum 14 suh set le kithana thua JAC ana kisem chun RIMS Morgue a long alahdoh tolhon in mipi aja a sim in kijot na le mona neiho matdoh a gotna peh din lhangsap na ana nei un ahi.

Mayang Imphal chapang nu chenna mun a alongdamsa lhahna kingon man ahi e.

Mipi kiphin ho chun mona neiho matdoh a thina chan gotna pehding adei sahnao aphongdoh un chule Manipur Police in boina umlou nadin venbitna ape un ahi.

Gel doh thei khat chu chapang nuhi Sept 2 nikho a khothei louva mudoh um ahi e. Amahi suhset ahijou a dalhah a umden chu RIMS pohlut ahivang a damjou talou a September 3 nia ahinkho bei ahi.

Special Judge, (POCSO)  Imphal West in ngoh a um mi 6 leh a inkote custody a anakoi ahi. Chief Minister N. Biren Singh in mona neiho achan diuva lom gotna pehding in aphongdoh e.

Kiloi khomna chom chom hon mona neiho demna leh gotna peh tei dia ngehna ananei sau ahi. Kwakta mun a mipi tampin kiphinna ananei un, chuleh Chandel district a kon a organisation chom chom hon jong agangthei pen a mona neiho matdoh din  ngehna anei un ahi.

Hetthei khat chu Police hon mi 5 ana matdoh ho police custody a umjing nalai ahi.

Xxxxxxxxx

Gandhi, Khadi leh Aatmanirbhar Abhiyaan: Gamsung khantouna thah semhoi hiding

Imphal, Sept.10: Mahatma Gandhi in eima  kitou del ding ana hil bangin society khan touna dingin khadi movement hi mipin ahethem angai e tin Webinar kiman na a Press Information Bureau le Regional Outreach Imphal gonna noi a kimang ahi e tin  professor Amar Yumnam, Department of Economics Manipur University chun aseiye.

Khadi movement thu hi Aatmanirbhar Bharat in agelkhoh pen ahi. Smt N Sanitation, senior journalist in aseina ah Prime Minister shri Narendra Modi in Gandhi lunggel a eima chang kitou del ding ti ahin thah pohdoh hin gamsung pumpi ahin khantou sah thei ahi, ati.

Khadi hin thinglhang hihen phaicham hijongle unemployment hi ahin suhnem ding akinep jong aseiye.

Chuleh shri S N Pradhan, additional Director General, Ministry of Information and Broadcasting in ahou limna ah tua hi Gandhi idea hohi thah semhoina dia chouna phat phatah ahi e.

Webinar hi Mahatma Gandhi birthday kum 150 lhin melchihna a hiche kingon chu chelha ahi.

Xxxxxx

CCpur District a Covid +ve case thah 4 kimudoh; agom’a case 732 lhingta

B.Lalboi Gangte

CCpur. Sept. 10 (ET) : Churachandpur District sung’a Covid-19 +ve case thah tuni 4 akimudohbe toh lhon’a agom’a case 732 alhing tan ahi. Chuleh case thah kimudoh 4 lah’a 2 hi military personnel ho chuleh adang ni hi kholjin dohna neilou mi ahi. Kholjin dohna neilou akon case thah 2 mudohbe ahi toh lhon’a tuni chan’a case kimudoh 79 alhing tan ahi.

Hiche toh lhon’a tuni kholjin dohna neilou case thah 2 kimudoh lah’a khat hi District Hospital a damlou ki-vekol ding’a Kwakta akon hung chuleh khat hi Samaritan Hospital ah damlou ki-vetsah’a che Tuibong khomi ahi.

xxxxxxxxxxxxxx

CCpur District a BSc Nursing College sah nading mun Architect hon vetchilna nei

B.Lalboi Gangte

CCpur. Sept. 10 (ET) : Churachandpur District sung’a BSc (Nursing) College khat aumdoh thei na ding in tunin (Sept. 10) Imphal akon Architect hon amun ding vetlhahna ananei uvin ahi. Hetthei khat chu Central Government in National Health Policy 2017 achepi dungjui’a India gamsung State leh Union Territory chom chom’a General Nursing Midwifery (GNM) course jilthei na School jouse’a B.Sc (Nursing) Course jil thei na ding dopsang na ding’a panlahna anei ahi. Hiche dungjui’a CCpur District ah GNM School of Nursing jong jaokha ahitoh lhon’a natoh pat ahi theina ding’a Medical Director in Imphal akon Architect ho amun ding vetchilna nei ding’a asol ahi.

Hiche toh lhon’a Imphal kon che Architect hochu Moirangthem Bimol Singh, BJYM National Executive Member leh Laishram Sanjoy Singh, Executive Engineer, Manipur state Cooperative Union, Technical Engineering Cell (MSCUTEC) ahi. Amaho chu Dr. Vumchinpau Tonsing, CMO/CCpur leh N. Tangbi Devi, Princpal GNM School of Nursing in kithopina anape uvin ahi. Hiche ading’a  Academic year 2020-2021 chan GNM course jil ding batch nukhah pen lah hi ding ahin ANM course vang angai bang’a chelha ding ahi. Chuleh B.Sc (Nursing) batch hi  2021-2022 apat kipan ding hiche hin CCpur District ding’a hamphat na lentah ahi naban’a  Centre funding’a Medical College jong gangtah’a natoh patpai hi ding ahi.

Alangkhat’a Nursing College min ding hi College of Nursing Lamka, Churachandpur hi ding’a phatsah ahitoh lhon’a  N. Tangbi Devi, Principal, GNM School of Nursing in aseina’a keima Principal kahi phat sung’a Government in GNM School dopsang ding agot nachung’a State leh Centre Government chung’a akipana aphongdoh in ahi. Chuleh hiche College hi ahung pilhing teng CCpur District mipin nasatah’a ahamphat pi ding ahi nachung chon’a jillai hobou hilouva jilkung ding toh kisai’a jong mipin ahamphat pi ding ahidan aginchat nathu jong atahlang in ahi.

xxxxxxxxxxxxxx

 DHS, NHM CCpur noi’a Mental Health Program tohgon nanoi’a “World Suicide Prevention Day 2020” ana kimang

B.Lalboi Gangte

CCpur. Sept. 10 (ET) : District Health Society, National Health Mission, Churachandpur noi’a National Mental Health Program tohgon nanoi in  tunin GNM School of Nursing Training Hall, IB Road mun’a “Working Together to Prevent Suicide” kiti thupi mangcha in District Level ding in World Suicide Prevention Day 2020 kingon ana chelha in ahi. Kingon achun Jin-gun in Dr. Vumchinpau Tonsing, Chief Medical Officer/District Mission Director, DHS Churachandpur, Jinja-um in Dr. Vanlalkungi, Medical Superintendent, District Hospital, Churachandpur chuleh Kin-neipa in Dr. Paulunmang Vaiphei, DFWO Churachandpur  anapang uvin ahi.

Hiche toh lhon’a V. Jamkhanpau, Secretary NEST in houlimna aneina’a 2014 akipat 2019 kikah (kum 6) sung’a CCpur khopi sung mun chom chom 50 val’a milip Lakh 1 vel leh lhanmol 33 a athisa kivuidoh natoh kisai’a study kinei na’a hiche kum 6 sung in ama leh ma kithat mi 103 alhing in ahi. Chule tukum Sept. 10 chan’a case thah 8 akibelap toh lhon’a ago’a mi 111 alhing tan ahi. Hiche case 111 lah’a numei 27 leh pasal 84 ahi. 2019 chan’a ama leh ama kithat lah’a kum 30 apat 40 kikah sung atampen in chuleh hiche thilsoh hi New Lamka leh Thingkangphai in atampen in ahi. Chuleh 2014-2019 kikah sung’a ama leh ama kithat case 103 lah’a case 14 FIR jihlut in aum in ahi ati.

World Health Organisation dungjui’a kum seh leh vannoi’a ama leh ama kithat  8,00,000 val aum jing in chuleh atamjo hi  kum 15-29 kikah ngen ahi. 2018 ah World Population Review in atahlang na’a Sri Lanka a milip Lakh 1 um nalah’a  ama leh ama kithat  35.3% alhing aban’a South Korea  28.3%  alhing in ahi.

Alangkhat’a District Health Society, National Health Mission, Pherzawl noi’a National Mental Health Program tohgon nan tunin Auditorium Hall, HSA Building, Nehru Marg mun’a “Working Together to Prevent Suicide” kiti thupi mangcha in District Level ding in World Suicide Prevention Day 2020 anamang uvin ahi. Kingon achun Jin-gun in Mannuamching IAS DC/Pherzawl, Kin-neipa in Joy Gangte, Addl. DC/Pherzawl chule Jinja-um in David Piaklian SP/Pherzawl anapang uvin ahi.

Kingon phatsung’a Rev. Tlanghmingthang, Director Evangelism & Church Growth leh Ruth Lalneizawn, MA Psychology tenin “Working Together to Prevent Suicide” kiti thupi pansa in thusei na ananeilhon in ahi.

Xxxxxx

Wangbal Part II muna thingnou tuna camp chelha

 Imphal,  Sept. 10: Thingnou keh tuna camp Wangbal part ii Thoubal district ah achelha e.  Hiche camp hi Educational Gym Club Wangbal part ii  in Joint Coordination Committee on Wildlife and Biodiversity (JCCWB)  Manipur police leh Thoubal district police vetsui na noiya chelha ahi.

Lou le aii a man thei  thing nou keh 200 val tuna jong  EGC,  wangbal sungah ana nei un ahi.

Chule DWPC Secretary Nandarani in face mask hop na jong ana nei in ahi. Aman asei na ah JCCWB tohgon akipapina aphonjou in maban a jong pan alah dinjong aseije. Camp chelhah sung chun SOP  guidelines phatah a jui ahi.

Xxxxxxx

Rafael jets IAF “Golden Arrows” squadron noiya um tading

New Delhi,  Sept 10: India in achesa July 27 nia Rafael aircraft 5 ana choh chu Indian Air Force 17 squadron noiya ‘Golden Arrows’ tia lahlut ahi.

Defence Minister Rajnath Singh in lahlut na lekha Group Captain Harkeerat Singh commander Officer 17 Squadron ‘Golden Arrows ‘ peh doh na ana nei ahi. Hiche kin a chief Marshall RKS  Bhadauria  in Rafael huikong hin galmi hoa kona hatah a kivenna asuh hatbe dinjong aseije. Chief Marshall in aseikitna ah centre in Air Force suhhat nading tohgon ahin nei na chungah akipa na thu jong asei e.

Hiche keu hilou a Indo-French kisam kaina asuh hatcheh dinjong aseibe e. Air Force in LAC  mun a natoh Hoitah ahinbol Jom ding ahi tin Defence Minister chun asei e.

French minister Armed Forces in aseina ah India in hiche huikong alah lut hin security lam a akidou piho sanga chung nunjoh na anei ding ahi tin aseije. Hiche huikong kilah lut hin India leh France kihet themna avetsah ahi ati.

Kingon a chun Defence Minister leh Chief of Defence Staff General Bipin Rawat  Air Chief Marshall RKS  Bhadauria jong ajao uvin ahi.