Manipur a Covid-19 case athah 16 hetdoh be ahitoh kilhon a nikhat...

Manipur a Covid-19 case athah 16 hetdoh be ahitoh kilhon a nikhat a case kisei asan na pen hi; natna neiho lah naosen khat pang

144
0
SHARE

Manipur a Covid-19 case athah 16 hetdoh be ahitoh kilhon a nikhat a case kisei asan na pen hi; natna neiho lah naosen khat pang

Imphal, May 19(ET): Manipur gam a Wednesday nikhon Covid-19 positive athah 16 akihetdoh be in, hiche lah a hi Churachandpur district a ni 23 bou hinalai naosen khat jong apang in, hiche naosen hi Manipur gam a Covid-19 natna nei ho lah a akhangdong pen ahitai.

Manipur gam a nikhat sunga Covid-19 positive case kihetdoh na atam ni pen jong ahitai. Case athah akihetdoh be toh kilhon a natna neiya gamsunga mi 25 alhing tan, hiche lah a hi Active case 23 um ahi. Additional Director Dr K Susheekumar Mangang in asei dungjuiya, Wednesday nikho a VRDL, JNIMS a agom a sample 200 test kibol a chule RIMS a sample 205 test kibol ahi, tin aseiyin, hiche lah a 16 hi positive hi ahi.

COVID-19 Common Control Room in Wednesday jan nidan 8.30 a thuso anei nauva positive ana kihe masa 11 chunga Covid-19 positive hi a numei 5 ahetdoh be u ahi.

Thulhut dungjuiya, athah a natna anei kihedoh holah a mi 9 hi Chennai a kon train a hung kile ho lah a pang a chule mi ni hi Delhi le Guwahati a kon gari a hung kile ahi. Natna nei holah a mi 10 hi Churachandpur district ho ahiuvin, JNIMS hospital a jen dinga admit abol diu ahitai. Mikhat hi Imphal East ho ahi’in, RIMS a kijen ding ahi, tin official hon asei uvin ahi.

Covid-19 positive ahi kihedoh masa mi 11 holah a mi 7 hi Youth Hostel, Hiangtam Lamka Quarantine Centre a um uva, mikhat hi JNV Yaralpat, Imphal a um a chule mithum hi Churachandpur district hospital isolation ward a um ahi’in, JNIMS a test bol dinga ‘refer’ ana bol sau ahitai.

Quarantine centre ho a ‘Containment’ kipan ahitai, tin official hon aseibe uvin ahi. Tuesday nikho a JNIMS Director Dr Th Bhimo Singh in, COVID Care Centre, JNIMS hospital a kijen adamlou mithum hin Covid-19 symptoms anei tapon, damdoh vah diu ahitai, tia anasei ahi. Active case atam cheh cheh toh kilhon a sorkar in natna achal louna dinga pan jochan a alah a, ‘containment contract tracing’ khoutah a achepi ahi. RIMS le JNIMS a kijenna ding jong macho a dinga kigotna hoitah a aneiyu ahitai.

Manipur gam a Covid case masapen ana kisei lhakhat jou, May 14 ni a Mumbai a kon hung kile kum 31 a upa pasal khat positive ahi akihetdoh hi amasapen ahi. Achesa March le April lha a Covid-19 natna nei masa teni hi damdoh a chule hospital a kon hungdoh lhon ahitai.

Xxxxxxxx

Mipa khat in aji le achapa atha kigot jouva ama le ama kikap lih

Imphal, May 20(ET): Kum 57 a upa pasal khat in Tuesday jan a ajinu le achapa tha ding agot jouva ama le ama akikap lih in ahi.

Dewlahland, Imphal West district mun a thilsoh ahi’in, in bahara a um u ahi. Athi pa hi TRI Chingmeirong a peon natong KS Ramthing ahi. Ramthing hin thih a ajinu tha ding agot ahi’in, ahivanga ajinu hi vangphat umtah a sohcha ahi. Hiche jouva achapa tha ding agot a, aban a ama le ama meithal a kikap lih ahi.

Thilso namun police hon adel lut uvin, kot akikha jeh a police hon hunam a kot ahong uvin ahile mipa hi kot kom a athisa ana lum a chule akom a pistol khat um ahi. Achapa lupna kom a amu uva, alol mun neocha akisuhkhah ahi. Police honjong chapang pa apet pet a hospital alhut uvin, boina thei dinmun a vang um talou ahi.

XXXXXXX

TA&H department noiya scheme ho aganna thei pen a DBT a kon beneficiary ho apeh diuva ATSUM in sei

Imphal, May 21(ET): Tribal Affairs and Hills (TA & H) department noiya scheme chom chom sodoh ding avaigei jeh a ATSUM in 2018-19 chule 2019-20 kum a scheme pending a umho state sorkar in asodoh dinga temna anei uvin ahi.

Thinglhang district a vaichat genthei olsah nadinga kisem scheme ho achesa kum 2 sung politics boina chule bureaucrat ho kah thu jeh a chelha thei louva aumhi vangset umtah ahi’in, beneficiary hon hiche jeh a hahsatna ato ahi. Akisei scheme hohi central government in sponsored abol ahi’in, centre in asodoh ahitan, ahivanga lungdon umtah chu Manipur gam ahung lhun le mang soh ahitai, tin ATSUM thuso chun aseiyin ahi.

Scheme hohi kum masa a hop dinga kisem ahi’in, tuchan a khongai ahi, tin Seiboi Haokip, General Secretary, ATSUM in soi akaina thuso chun aseiyin ahi. Scheme kihop ding dan hi Direct Benefit Transfer (DBT) a kon hiding ahi, ajeh chu hiche hibou dihtah a na akitoh vetkol nading ahi’in, angaicha beneficiary ho heng alhun tei nading ahi, ati.

Scheme hohi alen alal hotoh kihe a mi phabep in amaho mi phatchomna dinga aman a, asunga adih louva thil kibol aum jing jeh a ATSUM in beneficiary jouse hi Direct Benefit Transfer bol dinga thumna aneijing ahi. Hiche jeh a state sorkar in scheme hi DBT a bou apeh dinga ATSUM in temna aneiyin, tu masanga ana kibol tobang a akihop a ahile scheme hi akisem lona umlou ding, adih louva thil kibolna umding ahi, tin aseibe uvin ahi.

Xxxxxxxxxxx

Manipur a NSCN-IM ho camp akon anodoh diuva State Sorkar in MHA heng’a temna nei

Imphal, May 20: Ministry of Home Affairs (MHA) in gamsunga NSCN-IM thingnoi ho phalna kipe louva um akisem nau camp ho a kon anodoh diuvin state sorkar in temna aneiyin ahi.

Manipur Chief Secretary J Suresh Babu in Ajay Kumar, Secretary, MHA henga lekhathot ape in, NSCN-IM hon ‘unauthorised camp’ ahon thu u alungkhampi na thu aseiyin ahi. Hiche camp hi gamsunga society boina khat a um ahi, tin Babu in aseiyin chule civil society organization tamtah hi NSCN-IM hon akisei camp ho a lhangphong tah a kouna apeh u ahi, ati.

Civil Society organization member hon achesa May nisim 8 nikho a Huthrong Brigade Camp, Senapati a NSCN-IM thingnoi ho kithopina a thil ape uve, tia thulhut um ahi’in, hitobang ma a hi achesa May nisim 13 nikho a jong NSCN-IM ho umna Ashiho Chaomai Battalion, Chandel district a jong kithopina thil ahop u ahi.

Civil society organization hon hitia abol nau video hi ‘social media platform’ a kitahdoh a, mipin demna sangtah aneiya, hiche hi state sorkar dinga jumna soh ahi, tin Babu in aseibe in ahi. Imphal khopi a um civil society organization hon NSCN-IM ho dan dihlouva achon nau doudalna sangtah aneiyu ahi, tin Chief Secretary in MHA lekhathot apeh na a aseiyin ahi.

India sorkar le NSCN(IM) in hemkham kinoptona asem hin Manipur gam ahop lou ahi’in, camp jouse hi dan dihlou ahi. Camp vesuiya central security force honjong NSCN-IM ho dan dihlouva achon nau avettup jou louvu ahi, tin Chief Secretary in aseibe in ahi.

“MHA in hiche thu hi agel khoh a chule Army le Assam Rifles hon NSCN-IM ho chaloh avettup dinga temna kanei ahi. Chule mipi le civil society organization hon camp avil louna ding uva venna anei diuva temna kanei ahi”, ati. Manipur gam a um camp ho alahdoh uva Nagaland gam a achon diuvin jong MHA henga temna aneibe in ahi.

xxxxxx

India sorkar le NSCN hon hemkham kinoptona asem hin Naga chenna jouse ahop ahi: NSCN-IM

Imphal, May 20: NSCN-IM hon Wednesday nikhon Indo-Naga Ceasefire  le Peace Process hin Naga chenna gam jouse ahop ahi, tin asei uvin ahi.

“Indo-Naga political talk’ hi kum 22 lhing lhagao in eilamkaiyu ahi’in, kihouna hichan agei hi alangni kinoptona ahi”, ati. State sorkar in Union Home Ministry henga Manipur gam a um NSCN(IM) camp (unauthorized) ho Nagaland gam a achon diuva lekhathot apeh jou uva NSCN-IM in hiche thuso anei ahi.

Manipur Chief Secretary J Suresh Babu in India sorkar le NSCN-IM in hemkham kinoptona asem hin Manipur gam ahop poi, tia lekhathot apeh NSCN-IM hon hetpehna anei uvin ahi. State sorkar in lekhathot ajih dinga United Committee Manipur (UCM) in hatah a asei ahi, tin thuso a chun ngohna anei uvin chule, Committee hin adeh a NSCN chule alhangpi a Naga ho adem/adoudal jing ahi, ati.

UCM in a gammi ho lunghanna thil abol lou dinga akitim them diuvin jong asei uvin ahi. “UCM in Naga douna a avel vel a kivetda na thu asei jom hin thutah (historical reality) akhel deh louding ahi chule Indo-Naga political Talk hi kum 22 val chelha ahitai, ati. Hitia kilom loutah a thil kibol honk um 70 val Naga ho kiphalna asuhmang jou dehlou ding ahi, tin asei uvina hi.

UCM in lunggel toh louva boina thei dinmun asem vanga Meilhei hotoh kijato na chule kiloikhomna hoitah kinei ahi, tin NSCN thuso chun aseiyin ahi. State sorkar chule gamsung vaipo a political leader ho chingthei tah a apan uva, Naga ho lunghanna thei mopohna neilou thu ho amoh sei lou diuvin thuso chun aseibe in, achuti loule hiche hi kum sottah anaum kiloikhomna dinga phalou ding ahi, ati.

Indo-Naga Peace talk hin Northeast India a chamna ahin pohlut ding chule Manipur gam mi hon sangtah a aphatchompi diu NSCN-IM in thuso anei nauva akinepna thu aseibe uvin ahi.

Xxxxxx

Chivu a Chandrakirti Memorial Park sah ding thu hi state sorkar le Kuki ho kikah a seilhah ding ahi, tia KNO in sei

Imphal, May 20(ET): Chibu/Chivu a Maharaja Chandrakirti Memorial Park sah dinga akisei jeh a politics a kinel baotamna aumdoh hi vangset umtah ahi, tin Kuki National Organisation (KNO) in thuso anei uvin chule hiche boina thu toh kisaiya thutah phabep atahlang uvin ahi.

Stephen Kuki, Joint Secretary, Kuki National Organisation, Zale’n-gam, Manmasi in thuso aneina a Manipur gam hi Meilhei, Kuki chule Naga ho masang a kon achen nau gam ahi’in, hitobang thu hohi ipi hijong le nam thum a lamkai hon aseikhom angaiye, ati. Zo hi Kuki, Chin le Mizo nam miho thakhat a aum khom nau ahi’in, ahivanga kinoptona umlou chule Zo a acham a hetpehna kineiya nam khatcha umlou ahi, ati.

Hijongle Constitution noiya pao chule chon le khan ho jeh a Zou tribe tia hetpehna kinei aumin, atamjo hi Chivu kimvel a cheng ahi. Meilhei leng hole Kuki haosa hohi ana kiloikhom jing ahi. PS Haokip, President, Kuki National Organisation (KNO) in ‘The World of the Kuki People’ kiti lekhabu ajih Mittal Publication in 2018 kum a published abolna a hi phengmai 107 le 108 a ‘The Zale’n-gam and Kangleipak Equation’ kiti chapter noiya masanga kon kiloikhomna ho kisei ahi.

“Leng Chandrakirti khang (1851-1852) a Kamhau, Sukte Chin leng in Meilhei lenggam douna a gal aphon doh ahi. Chandrakirti lengpa hi ajo uva Chin miho gam a gal hing (prisoner) a apui ahi. Chandrakirti kimat thu ajah jou uva Zale’n-gam Kuki hon galsat 1,200 asol a Kamhau adou uva chule Chandrakirti hi Kuki hon Kangleipak a lolhing tah a anungsol u ahi. Hiche jouva Chandrakirti lengpa in Zale’n-gam le Kangleipak miho akou a kin loupitah a abol a chule Kuki hon Meilhei leng ho tu masanga ana kithopi nau hetpehna jong anei ahi.

Hiche jeh a Maharaja Chandrakirti Memorial Park sah nading a akisei mun hi Kuki gam, Zou tribe ho chenna mun ahijeh a hiche thu hi state sorkar chule Kuki hon aseilhah ding ahi. Tribal forum adang ahiloule agam a cheng lou kiloikhomna ho akikum angaipon, chule angaicha louva kiphinna umho hetpehna neilou ding ahi, tin KNO thuso chun aseiyin ahi.

KNO in kiloikhomna masa ho hetpehna aneiya chule Chief Minister le ama lamkaina sorkar in Kuki-Meilhei ho kiloikhomna mapui ding a asei hi alamto ahi. Kuki hon melma ho a kon ana huhdoh Kangleipak lengpa geldohna park Kuki gam hop a akisem ding hi nam teni kah a kiloikhomna le kihetthem to na machal sah ding ahi tihi tahsanna akineiye,a ti.

Chief Minister in thinglhang miho phatchomna dinga ‘Go to Village’, ‘Go to Hills’, ‘Public Interview Day’ chule district headquarter a Cabinet meeting agon nau le tohgon thah thah achepi ho KNO in apachatna thu aseiyin ahi. CM Biren lamkaina noiya India sorkar toh Kuki thingnoi ho kihouna machal ahi, tin aseibe uvin ahi.

 Xxxxxxx

Senapati CSO hon phat teplou ‘economic blockade’ akou ladoh tau

Senapati, May 20(ET): Senapati CSO lamkai ho, tribe lamkai chule state official thalheng a PHED Minister L Dikho, MP Dr Lorho S Pfoze le MLA/adviser to CM, K Leishiyo in Wednesday nikho a kihouna anei utoh kilhon a Senapati a um civil society organization hon phat teplou ‘economic blockade’ bol dinga tohgon aneiyu avohai tauvin ahi.

Naga People’s Organisation (NPO), Senapati District Students’ Organisation (SDSO), Senapati District Women Association (SDWA) in thakhat a thuso anei nauva, state sorkar in Senapati DC anahi Somorjit Salam in Covid-19 protocol apalkeh na chungchang thu khol dinga ‘inquiry committee’ sem doh dinga kitepna anei jouva phat teplou ‘economic blockade’ bol dinga tohgon um kiladoh ahitai, tin asei uvin ahi.

Imphal-Dimapur highway (NH-2) a economic blockade hi Wednesday jan nidan 6 a pat dinga ana gon u ahi. Achesa Tuesday nikho a Senapati CSO hon DC Somorjit Salam nidan 24 sunga anatoh na a kon ‘suspend’ bol dinga thumna aneiyu bulhit ahi loule economic blockade phat teplouva bol dinga gihna aneiyu ahi. Hiche thu a achesa Monday nikho a CSO hon thumna aneiyu sorkar in nidan 48 sunga abulhit diuva CM Biren ‘Ultimatum’ apeh u ahi.

Ahivanga, anilhah a Governor Najma Heptulla in Senapati DC Somorjit Salam hi Kangpokpi district a ‘transfer’ abol nau thuso aneiya, Lalithambigai Kalidas akhel sah ahi. DC masa pa hin achesa May 13 nikho a Mumbai a kon hung kile mi 36 hi Mao Gate a ‘alut theilou na phat’ a alut sah in, Covid 19 dan apalkeh e, tia Senapati CSO hon ngohna aneiyu ahi.

Hiche chungchon a District Magistrate in ahung hohi ‘quarantine centre’ mun hilou multi-purpose hall a alhun sah a neh ding agon peh a, district sunga cheng mihem asang a sim hinkho boina thei dinmun a akoi ahi, tia ngohna aneiyu ahi. Mumbai a kon hung kile holah a mi 2 Covid-19 positive ahi akihetdoh jouva DC pa ‘suspend’ bol dinga thumna aneiyu ahi.

Xxxxxx

KNF in 33rd Rising Day aman nauva Covid-19 pandemic sunga mipi kithopi ding thu hatah a seiyu

IMPHAL, May, 20(UNA): Suspension of Operation soi kai holah a pang Kuki National Front (KNF) chule non-SoO group KNF-N in achesa May nisim 18 nikho a 33rd Rising Day aman nauva, Covid 19 pandemic sunga mipi, adeh a angaicha ho kithopina angai dan thu hatah a asei uvin ahi.

Manipur gam a Kuki thingnoi kiloikhomna holah a aluipen KNF in Ebenezer Peace Camp, Natheljang a mipi pan louna a Rising Day amang uvin ahi. Kiloikhomna Home Secretary chule in-charge, Defense Secretary jong hi a Jangboi Kipgen in ponlap akhaidoh in, nam sepai chule official hon jana pehna anei uvin ahi.

Kiloikhomna phutdoh a aumtalou Nehlun Kipgen chule athi nam sepai ho jana pehna Lala Kipgen in alamkaiyin, hiche jouva amaho jana a ‘gun salute’ ape uvin, Chaplain Rev. Th Kipgen lamkaina a Chapel Hall a kin apan uvin ahi. KNF President thalheng a General Secretary le United People’s Front (sorkar toh kihouna sem Kuki thingnoi chom chom kiloikhomna) spokesperson jong hi a Aaron Kipgen in houlimna aneiyin, lungtup molso nadinga tahsanna ineiyu angaiye, tin aseiyin ahi.

Kukiland Territorial Council thumna um molso nadinga tahsanna nei pum a panlah ding ahi, tin nam sepai ho tilkhouna thu aseiyin ahi. KRA-U Chairman David Chongloi in nam sepai ho khamnathei ho a kon akichomkhen diuvin tilkhouna aneiyin ahi. KNF Home Secretary Jangboi Kipgen in ahoulimna a, Covid 19 pandemic sunga hi muntin a mijouse boi ahi’in, I mite ho, adeh a hahsatna sangtah toh ho akithopi uva, sorkar chunga bou ingap loudiu ahi, tin aseiyin ahi.

Sorkar in thupeh aneiho jui cheh dinga thuhilna aneiyin chule KRA-U lamkai le sepai ho thilpeh pehna jong anei uvin, hiche jouva Pathen thu a kitilkhouna le taokhomna anei uvin ahi.

Alangkhat a SoO soi kaina a panglou Kuki National Front- Nehlun group injong General Head Quarter, Daitwi Base Camp a 33rd Rising day amang uvin, Indo-Myanmar gamgi a um Molnoi kho a kiloikhomna phutdoh a aumtalou Pu Nehlun Kipgen pan lahna le kiphal thengna ho thu hatah a asei uvin ahi. KNF-N Deputy Chief-in-Command (C-in-C) Josh Kuki umna a Nehlun Kipgen chule athi nam sepai ho jana pehna anei uvin ahi.

Kuki nam tundoh nadinga achaina chan a pan lah dinga asei uvin chule Kuki thingnoi kiloikhomna tamtah in Kuki nam a dinga akiphal doh ho panlah na sumil jong le sorkar khut a ikipeh lut louhel diu ahi, tin aseibe uvin ahi.

xxxxxxx

MSAD in Manipur gam a kile ding ho kilhenna a sihnei langneina umdinga aginmo nau thu seiyu

New Delhi, May 20: Shaikhom Chingkheinganba, President Manipur students Association Delhi (MSAD) in May nisim 23 le 25 nikho a Manipur gam a kile ho list kisem dan le akisodoh dan demna sangtah anei uvin ahi.

Simlai kiloikhom hon thuso anei nauva, akile ding ho kilhenna a thudih a na akitohna aumpoi, tin ngohna anei uvin chule Delhi a tangden gamsung miho hetkhelna ding thil asem lou diuvin temna anei uvin ahi. List hi iti avet uva asem uham, tin thudohna anei uvin chule adamlou ho panna a atangden ho khohsahna akipe masa poi, tin aseibe uvin ahi.

List hi ache masa dungjuiya akisem loujeh a thunei vaipo hotoh kinai ho kilheng masa a sihnei langneina a kisem hidinga ginmona um ahi, tin asei uvin ahi. Tengbang website a ‘detail’ pe ho serial number panna list apehdoh uva chule apet pet a suhthengna anei diuvin thuso anei nauva asei uvin ahi. Dinmun aboi cheh cheh toh kilhon a authority hon mopohna neitah a na atoh diuvin jong aseibe uvin ahi.

xxxxxxxxxx

Tulihal Gram Panchayat a MGNREGS natong hon lhalo amuna diuva ngehna nei

Imphal, May 20(ET): Tulihal Gram Pranchayat noiya MGNREGS a natong kiloikhomna a Convenor pa in thuso abolna achun Imphal East district noiya Keirao Bitra block noiya Tulihal Gram Panchayat a MGNREGS natong hon natoh man akimulou na hi asottan genthei hahsa ho kithopi na asum kipehding malah hahsatna akitoh cheh e ati. Hiche scheme dungjui a natong ho summu nading suh bulhin sang in gentheina aki belap in hiche scheme hi Tulihal Gram Panchayat ho ding a sum holna mun khat asohdoh e ati. Zilla Parishad Inaocha Kongbam leh Pradhan Md Khallique Khullakpam leh ward member hon natong ho thunei naho asusie uvin ahi.

2017-2018, 2018-2019 leh 2019-2020 kum sung a natoh manho atongho account khat khatvei jong alutkha pon hiche a sum chu Gram Panchayat ho, Bank a tong official ho, Programme officer leh Block development officer hon asuh chatvai hiding in convenor pa chun asei in ahi. Tuchung natna jeh in niseh a kilo hon jong tohding akimu jom tapouvin gentheina lentah in alhutkhum in 2017 kum apat MGNREGS a na kitoh man ho tuchung hin kimuleh gentheina hi kiledoh ding ahidan jong asei in ahi.

Thulhut in aseina achun mipi hon natohman sum homdoh ding a vel tamtah vei asei jou nung un a nahsah lou jeh un May lhabul chun Tulihal Gram Panchayat noiya a mipi ho akisukhom uvin ‘Committee Against the Gross Misappropriation of MGNREGS fund for Tulihal Gram Panchayat’ asemdoh uvin ahi. May 3 nikho a Zilla Parishad, Pradhan, Ward member leh natong hon meeting anei uvin hiche achun sum kiman dan adihlou thu jong amauho tah in akam cheng un ana phongdoh uvin ahi. May 16 nikho a meeting Pradhan sopi pa Md Azad Khan toh aneikit nauva chun sum kiladoh jouse May 18 nikho apat kilesah kit ding kinoptona soi jong akai uvin hinlah tuni chan in natoh imacha muthei ding aumpon, sum jong reimbursed akibol pon ahi. Committee hon government leh aki saipi authority heng ah natong hon atoh man uh sum amuthei nading uva panpi ding in ngehna anei uvin ahi.

Xxxxxxxxxxxxxxxxxxx

May 25 apat Domestic flight hon natoh pankit tading

New Delhi, May 20: Lockdown dan kilha kang jep toh lhon in May 25 apat India gamsung a leng (Domestic flight) ho lengpan ahi thu Civil Aviation Minister Hardeep Singh Puri in asei in tupet hin vang Cargo flight leh gamdang a tangden ho puidoh ding ho bou aleng uvin ahi. India gamsung a lockdown hi May 31 chan a ding a suhsaobe ahi in hinlah dan juiding themkhat aki lhakang in ahi.

Janhi chun Puri in aseina achun Central government in vanleng lengding phasah jong leh state government hon ajahnom loule hithei dehlou ding ahithu ana sei in ahi. Passenger vanleng hi March 25 nikho a lockdown first phase kipat apat chun ana kikhah tan ahi. India gamsung bou a vanleng lengpat thei ding nikho akitep vang in International flight ho kipatkit ding nikho vang akisei naipon ahi.

xxxxxxxxxxxx

Art & Culture Minister in Manipur State Film Award 2020 phongdoh

Imphal, May 20(ET): Art & Culture Minister, L. Jayantakumar in Lifetime Achievement Award jaona in 13th Manipur State Film Awards, 2020 chu tuni a Scretariat South Block Imphal a a office ah phondohna anei in ahi. Hiche award hi kumseh leh Art & Culture Department in sponsored abol ahi in Manipur gamsung a film toh kisai a machalna aumthei nading a agon u ahi. Minister Jayantakumar in aseina achun Jury committee hon aphatcha in award sangding ho ana gongtup jong leu tuchung natna jeh in aphatchan aki phongdoh theipon Actor leh Film personality hon award amu u chung chon ah Manipur government in crew member ho award muthei ding dan jong ki ngaito ding ahi ati.

Manipur State Film Award 2020 ahin award 57 aum in hichelah ahin award 33 hi Feature film a ding ahi in, award 20 hi non-feature film a ding chule adang 3 hi Best writing on Manipur Cinema a hiding chule 1 hi MSFDS-Lifetime Achievement Award hiding ahi. Hiche lifetime Achievement Award chu Thangmeiband Lourung Purel Leikai a cheng Ksh. Rashi Devi achang in ahi. Best Feature Film chu Konsam Saroja Produce na noi chule Oinam Gautam Director hina noiya kibol ‘Pandam Amada’ film in akisan in ahi. Non-Feature film award chu Maibam Amarjeet Singh Director hina noiya chule Films Division, GoI produce hina noiya kibol ‘Highways of Life’ film achang in ahi. Best Critic award chu Aken Sijagurumayum in akisan in, Best Child award chu S. Saolin in akisan in Best Actor (Pasal le Numei) chu Amar Mayanglambam leh Bala Tensubam in akisan hon in ahi. Hiche award ho kiphon dohna kin achun Art & Culture a Commissioner M. Joy IAS, Art & Culture a Director Ng. Uttam MCS, Jury Panel a Chairman L. Surjakanta Sharma, Ronel Haobam leh R.K. Bidur hon pan ala uvin ahi.

Xxxxxxxxxxxxxxxxxxx

Vijayawada akon special train khat in Manipur gammi atangden ho hinpo

Imphal, May 20(ET): Lockdown jeh a Manipur gammi Andhra Pradesh gamsung a tangden hochu special train in Vijayawada akon ahinpo in tuni jingkah 8:14 don chun Jiribam railway station ahung lhung uvin ahi. Tuni a hunglhung holah achun mi 12 chu Ukhrul District ho ahiuvin, mi 28 chu Ccpur leh Pherzawl mi, mi 14 chu Tamenglong district ho, mi 20 chu Senapati leh Kpi District ho, Chandel District mi 15 chule Tengnoupal district mi 19 ahiuvin chule Jiribam District a mi 3, Bishnupur district mi 53, Kakching mi 61, Thoubal district a mi 62, Imphal East leh Kamjong akon mi 80, Imphal west leh a mi 117 ahi. Ahung lhung ho jouse chu Screening phatah a bolchai ahi jou uvin ama ama district cheh lhunna ding in bus amangcha uvin chule a District cheh uva ni 14 sung quarantine a umkit ding ahiuve.